ಕೊಂಕಣಿ ಲೊಕಾಚೊ (ತೆನ್ನಾಚೆ ಗೊಂಯ್ಕಾರ್) ದರ್ಯಾದೆಗೆವೆಲ್ಯಾ ಕರ್ನಾಟಕಾಕ್ ಆನಿ ಕೆರಳಾಕ್ ಲೆಗೀತ್ ಸ್ಥಳಾಂತರ್ ಜಾಲ್ಲ್ಯಾಚೆಂ ‘ಏಕ್‌ಚ್ ಕಾರಣ್’ ಸಿದ್ಧಾಂತ್ ದುಬಾವಾಸ್ಪದ್‌ ಆಸಾ. ಹೆಂ ‘ಏಕ್‌ಚ್ ಕಾರಣ್’ ಸಿದ್ಧಾಂತ್ ʻವಯ್ಲ್ಯಾ ಜಾತಿಚ್ಯಾಂನಿಂಯ್‌ ಇಂಕ್ವಿಝಿಶನಾ ವರ್ವಿಂ ದಗ್ದೊಣಿ ಸೊಸ್ಲ್ಯಾʼ ಮ್ಹಣ್ ದಾಕಂವ್ಕ್ ಸಾಮಾನ್ಯ್‌ ಜಾವ್ನ್‌ ವಾಪಾರ್ಚೆಂ ಏಕ್ ಮೆಟಾನರೇಟಿವ್‌ (metanarrative) ಜಾವ್ನಾಸಾ. ಅಶೆಂ ʻಆಪ್ಲೊ ಸಮಾಜ್‌ಯಿ ಇಂಕ್ವಿಝಿಶನಾ ವರ್ವಿಂ ಕಶ್ಟಾಲಾʼ ಮ್ಹಳ್ಳೆಂ ಸ್ವಕಲ್ಪಿತ್‌ ಚಿಂತಪ್‌ ಅನಿರ್ಣಯಾತ್ಮಕ್ ಸಂಗರ್ಶಾಚ್ಯಾ ಸಂದರ್ಭಾಂತ್‌ ಉದೆತಾ, ಜೆಂ, ಚಡ್‌ ಕರುನ್‌ ಲೊಕಾಂಚ್ಯಾ ಸಾಮೂಹಿಕ್ ಸ್ಮರಣಾಚೆರ್ ಪರಿಣಾಮ್ ಕರ್ತಾ. ಗೊಂಯಾಂಥಾವ್ನ್‌ ಮಂಗ್ಳುರಾಕ್ ಸ್ಥಳಾಂತರ್ ಜಾಲ್ಲ್ಯಾಂನಿ ನಿರ್ಮಾಣ್‌ ಕೆಲ್ಲಿ ಕಲಾಕೃತಿ ʻಅಸ್ಮಿತಾಯ್ʼ ಹ್ಯಾಚ್ ಮೆಟಾನೆರೆಟಿವ್ಹಾಚೆರ್ ಆದಾರೂನ್ ಆಸಾ, ಜೊ, ಇಂಕ್ವಿಜಿಸಾಂವಾಂಚ್ಯಾ ಚುಕೀಚ್ಯಾ ಕರ್ತುಬಾಂತ್‌ ಆಪುಣ್‌ ಯಿ ವಾಂಟೆಲಿ ಮ್ಹಳ್ಳೆಂ ಸತ್ ಲಿಪವ್ನ್ ʻಆಪುಣ್‌ ಯಿ ಇಂಕ್ವಿಜಿಸಾಂವಾಚಿ ಬಲಿʼ ಮ್ಹಳ್ಳಿಂ `ಫಟ್ಕಿರಿಂ ಸೊಧ್ನಾಂʼ ದಾಕಂವ್ಕ್ ಅವಿಶ್ಕಾರ್‌ ಕೆಲ್ಲೊ ಸಂಪ್ರದಾಯ್.
ʻಅಸ್ಮಿತಾಯ್ʼ ಫಿಲ್ಮಾನ್‌, ಆಜ್‌ ಆಮಿ ಗೊಂಯ್ ಮ್ಹಣ್ತಾಂವ್‌ ತ್ಯಾ ತೆನ್ನಾಚ್ಯಾ ಪ್ರದೆಶಾಚೊ ಲೋಕ್ ಗೊಂಯಾಂ ಭಾಯ್ರ್ ಸ್ಥಳಾಂತರ್ (exodus )ಜಾಲ್ಲ್ಯಾಚಿಂ ಭೋವ್ ಸಂಕೀರ್ಣ್‌ ಕಾರಣಾಂ ಕಿತೆಂ ಮ್ಹಣ್ ಸೊಧ್‌ ಕರಿನಾಸ್ತಾಂ, ಸ್ಥಳಾಂತರಾಕ್ ಫಕತ್ ಏಕ್ ನೀಬ್/ ಏಕ್ ಕಾರಣ್ (ಇಂಕ್ವಿಜಿಸಾಂವ್) ದಾಕಂವ್ಚೆ ಮಾರಿಫಾತ್ ಖರ‍್ಯಾ ಇತಿಹಾಸಾಚ್ಯಾ ದಾಖಲೀಕರಣಾಚ್ಯಾ ಗರ್ಜೆಕ್ ನವ್ಯಾನ್ ಜೀವ್‌ ದಿಲಾ. ಹ್ಯಾ ಫಿಲ್ಮಾಂತ್ಲೊ ಕೊಂಕಣಿ ಸಂಸ್ಕೃತಾಯೆಚೊ ಅಭಿನಯ್‌ ಆನಿ ಪ್ರದರ್ಶನ್‌ ವೀಕ್ಷಕಾಕ್‌ ಧಾದೊಸ್‌ ಕರ್ತಾ ಖರೆಂ. ಪುಣ್‌, ಹಾಕಾ ಲಾಗೊನ್ ಹ್ಯಾ ಫಿಲ್ಮಾಕ್‌ ಹೊಗೊಳ್ಸುಂಚೆ ಬರಾಬರ್‌, ಹ್ಯಾ ಫಿಲ್ಮಾನ್‌ ದಾಕಯಿಲ್ಲ್ಯಾ ಗೊಂಯ್ಚ್ಯಾ ಲೊಕಾಚ್ಯಾ ಗೊಂಯಾಂ ಭಾಯ್ಲ್ಯಾ ಸ್ಥಳಾಂತರಾಚ್ಯಾ ಕಾರಣಾ ಪಾಟ್ಲೊ ಮುದ್ದೊ ಪರಿಶೀಲನ್‌ ಕರ್ಚೆಂಯ್‌ ಪ್ರಸ್ತುತ್‌ ಪರಿಗತೆಂತ್‌ ಭೋವ್ ಚಡ್‌ ಗರ್ಜೆಚೆಂ. ಫಿಲ್ಮಾಂತ್‌ ದಾಕಯಿಲ್ಲೆಂ ಕಾರಣ್ ಖರೋಖರ್‌ ಜಾವ್ನ್‌ ʻಉಜ್ವಿ ವಿಚಾರ್ ಸರಣಿʼ (right-wing ideology) ಪ್ರತಿಧ್ವನಿತ್‌ ಕರ್ತಾ.
ʻಏಕ್ ಸ್ಥಳಾಂತರ್ ಆನಿ ತಾಕಾ ಎಕ್ಚ್ ಕಾರಣ್ʼ ಉಜ್ವೆ ವಿಚಾರ್ ಸರಣೆಚೊ ಪ್ರತಿಧ್ವನಿ ದಿತಾ. ದೆಖೂನ್ ಸಿನೆಮಾಚ್ಯಾ ಮುಖ್ಯ್‌ ಸ್ವರ್‌ ಸಂಗತಿಚಿ ವಿಮರ್ಶಾತ್ಮಕ್ ತಪಾಸ್ಣಿ ಭೋವ್ ಮಹತ್ವಾಚಿ. ಆಮ್ಚ್ಯಾ ದೆಶಾಂತ್ಲ್ಯಾ ಅಲ್ಪ್‌ಸಂಖ್ಯಾಂತಾಂಚ್ಯಾ ಹಿತಾಕ್ ಹಾನಿಕಾರಕ್ ಆಶಿಲ್ಲ್ಯಾ ಉಜ್ವೆ ವಿಚಾರ್‌ಸರಣೆಚ್ಯಾ ಅಜೆಂಡೆ ಕಡೆನ್ ಸಿನೆಮಾಚಿ ಮುಖ್ಯ್‌ ಸ್ವರ್‌ ಸಂಗತ್ ಕಶೆಂ ಜುಳ್ಟಾ ತೆಂ, ಹ್ಯಾ ವಿಶ್ಲೇಷಣಾಂತ್ಲ್ಯಾನ್ ಸ್ಪಶ್ಟ್ ಜಾತಲೆಂ. ಹೊ ಸಿನೆಮಾ ಕ್ರಿಸ್ತಾಂವ್ ಲೊಕಾಂನಿ ತಯಾರ್ ಕೆಲ್ಲೊ ಆಶಿಲ್ಲ್ಯಾನ್ ನಿರ್ಮಾಪಕಾಂಚೆಂ ನಿರಪರಾಧಪಣಾಚೆ ನಾಟಕ್ ಉಗ್ತೆ ಕರ್ಪಾಕ್ ಆನಿ ತಾಂಚೊ ರಾಜಕೀಯ್ ಅಜೆಂಡಾ ಉಕ್ತೊ ಕರ್ಪಾಕ್ಯ್ ಹೆಂ ವಿಶ್ಲೆಶಣ್ ಗರ್ಜೆಚೆಂ ಥಾರ್ತಾ.
ಆತಾಂ ಗೊಂಯ್ ಹ್ಯಾ ನಾಂವಾನ್ ಆಮಿ ವಳ್ಖತಾತ್ ತ್ಯಾ ಪ್ರದೆಶಾ ಭಾಯ್ರ್ ಕೊಂಕ್ಣಿ ಭಾಸ್ ಉಲೊವ್ಪಿ ಲೊಕಾಂಚೆಂ ಸ್ಥಳಾಂತರ್ ಜಾಯ್ತ್ಯಾ ಹಂತಾಂನಿ ಜಾಲಾಂ ಆನಿ ಹರ್‌ ಪಾವ್ಟಿಂ ಸ್ಥಳಾಂತರಾಚೆಂ ಲ್ಹಾರ್‌ ವೆವೆಗ್ಳ್ಯಾ ಕಾರಣಾ ಪಾಸುನ್‌ ಜಾಲ್ಲೆಂ ಆಸಾ. ಪೊರ್ತುಗೆಜಾಂಚ್ಯಾ ಯೆಣ್ಯಾಚ್ಯಾಕೀ ಜಾಯ್ತ್ಯಾ ವರ್ಸಾಂ ಪಯ್ಲೆಂ ಥಾವ್ನ್‌ಚ್‌ ಸ್ಥಳಾಂತರಾಚಿಂ ಲ್ಹಾರಾಂ ಉಟ್‌ಲ್ಲಿಂ ಆಸೊನ್‌, ತೆದ್ನಾಂ ಲೆಗೀತ್ ಥಂಯ್ಚ್ಯಾನ್ ಕಾಂಯ್ ಲೊಕ್ ದಕ್ಷಿಣೆ ಸಕಯ್ಲ್ ಬರೆ ಚರೊವ್ಪಾಚೆ ಜಾಗೆ ಸೊಧುನ್ ಸ್ಥಳಾಂತರೀತ್ ಜಾಲ್ಲೆ ವಿಶಿಂ ಮಾಹೆತ್‌ ಲಾಬ್ತಾ. ಹಾಚೆ ಭಾಯ್ರ್ ಜಾಯ್ತಿಂ ಕಾರಣಾಂಕ್‌ ಲಾಗುನ್‌ ಗೋಂಯ್ ಕೊಂಕ್ಣಿ ಲೋಕ್ ದೇಸಾಂತರ್‌ ಗೆಲ್ಲೊ ಆಸಾ. ದೆಖೂನ್, ಗೊಂಯ್ಚ್ಯಾ ಕೊಂಕ್ಣಿ ಲೊಕಾಚೆಂ ಸ್ಥಳಾಂತರ್ ಫಕತ್ ಇನ್ಕ್ವಿಝಿಶನಾಚ್ಯಾ ಅತ್ಯಾಚಾರಾಂಚ್ಯಾ (atrocities of the Inquisition) ಎಕಾಚ್‌ ಕಾರಣಾಕ್ ಲಾಗೂನ್ ಜಾಲ್ಲೆಂ ಮ್ಹಣ್ಚೆಂ ಇತಿಹಾಸಾಚ್ಯಾ ಸತಾಂಕ್‌ ಆಡ್ ವೆತಾ. ಪೊರ್ತುಗೆಜ್ ಭಾರತಾಕ್ ಯೆಂವ್ಚೆ ಆದಿಂಚ್ ಕೇರಳ್‌ ಆನಿ ಕರ್ನಾಟಕಾಂತ್ ಕೊಂಕ್ಣಿ ಭಾಸ್ ಉಲೊವ್ಪಿ ಲೊಕ್ ಆಶಿಲ್ಲೆ ಅಶೆಂ ಕೆ ಎಮ್ ಪಣಿಕ್ಕರ್ ತಸಲೆ ಇತಿಹಾಸಕಾರ್ ಸಾಂಗ್ತಾತ್. ದೆಖೂನ್ ಸಿನೆಮಾಂತ್ ಸಗ್ಳ್ಯಾ ಸ್ಥಳಾಂತರಾಂಕ್ ಎಕ್ಚ್ ಕಾರಣ್ ದಾಕವ್ನ್‌ ಎಕೆಚ್‌ ದಿಶ್ಟಿಚೆಂ ನಿರೂಪಣ್‌ ದಿಲ್ಲೆಂ ಸವಾಲಾಂಭರಿತ್‌ ಆಸಾ. ಹೆಂ ನಿರೂಪನ್‌ ʻಉಂಚ್ಲ್ಯಾ ವರ್ಗಾಚೊ ಲೋಕ್‌ಯಿ ಇಂಕ್ವಿಜಿಸಾಂವಾಚೊ ಬಲಿ ಪಶುʼ ಮ್ಹಣ್ ನವ್ಯಾನ್ ಘಡೊನ್‌ ಹಾಡ್ಲೆಲ್ಯಾ ಕಾಲ್ಪನಿಕ್ ಸಂಪ್ರದಾಯಾಕ್‌ (invented tradition of a shared victimhood) ಪಾಟಿಂಬೊ ದಿಂವ್ಚೆ ಉದೆಶಿಂ ಬಾಂದುನ್‌ ಹಾಡ್‌ಲ್ಲೊ ದಿಸ್ತಾ.
ಕೊಚೀನ್ ಆನಿ ಮಂಗ್ಳುರಾಂತ್ಲ್ಯಾ ಉಂಚ್ಲ್ಯಾ ಜಾತಿಚ್ಯಾ ಜಾತೀಯ್ ಭೂಗೊಲಾಂಚೊ (caste geographies of the upper caste) ವಿಚಾರ್ ಕೆಲ್ಯಾರ್ ಹಿ ʻಆವಿಶ್ಕಾರ್ ಕೆಲ್ಲಿ ಪರಂಪರಾʼ ಸತಾಕ್‌ ಪಯ್ಶಿಲಿ ಮ್ಹಳ್ಳೆಂ ನಖ್ಖಿ ಜಾತಾ. ಕೊಚ್ಚಿನ್‌ ತಶೆಂ ಮಂಗ್ಳುರ್‌ ದೊನೂಯ್ ಬಂದ್ರಾಂ, ಕಾಂಯ್ ಕಾಳ್ ಪೊರ್ತುಗೆಜ್ ಪ್ರಶಾಸನಾಖಾಲ್ ಆಶಿಲ್ಲಿಂ. ಪೊರ್ತುಗೆಜಾಂನಿ ಜರ್‌ ಉಂಚ್ಲ್ಯಾ ಜಾತಿಚ್ಯಾ ಹಿಂದೂ ಲೊಕಾಚೆರ್‌ಯಿ ಇನ್ಕ್ವಿಝಿಶನಾಚೊ ವಾಪರ್ ಕೆಲ್ಲೊ ಜಾಲ್ಯಾರ್, ಪೊರ್ತುಗೆಜಾಂಚೆಂ ನಿಯಂತ್ರಣ್ ಆಶಿಲ್ಲ್ಯಾ ಕಿಲ್ಲ್ಯಾ ಲಾಗ್ಸಾರ್ ಕೊಚೀನ್ ಹಾಂಗಾ ಕೊಂಕ್ಣಿ ವಸ್ಣುಕೊ ಕಶ್ಯೊ ಮೆಳ್ತಾತ್?
ತಶೆಂಚ್ ಮಂಗ್ಳೂರಾಂತ್‌ಯ್ ಆಮಿ ಹೊಚ್ ಪ್ರಸ್ನ್ ಕೆಲೊ ತರ್, ಹೆಂಯ್‌ ಏಕ್ ಬಂದರ್ ಶ್ಹೆರ್‌ ಜಾವ್ನಾಸೊನ್ ಎಕಾ ಕಾಳಾಂತ್ ಪೊರ್ತುಗೆಜ್ ಲೊಕಾಂ ಖಾಲ್ ಆಶಿಲ್ಲೊ. ಪೊರ್ತುಗೆಜ್ ಇನ್ಕ್ವಿಝಿಶನಾನ್ ಹ್ಯಾ ಉಂಚ್ಲ್ಯಾ ಜಾತಿಚ್ಯಾ ಕೊಂಕ್ಣಿ ಉಲೊವ್ಪ್ಯಾಂಕ್ ಗೊಂಯಾಂತ್ಲ್ಯಾನ್ ಭಾಯ್ರ್ ಸರ್ಪಾಕ್ ಲಾಯಿಲ್ಲೆಂ ಜಾಲ್ಯಾರ್ ತಾಂಕಾಂ ಕೊಚೀನ್ ವಾ ಮಂಗ್ಳೂರ್ ಬಂದರ್ ವಾಠಾರಾಂನಿ ಶಾಂತಿನ್ ರಾವ್ಪಾಕ್ ಆನಿ ಫುಲ್ಪಾಕ್ ಕಶೆಂ ಸಾಧ್ಯ್‌ ಜಾಲೆಂ? ʻಫಕತ್ ಇನ್ಕ್ವಿಝಿಶನಾಕ್‌ ಲಾಗೊನ್‌ಚ್ ಸಗ್ಳೊ ಕೊಂಕ್ಣಿ ಭಾಶೀಕ್ ಲೋಕ್ ದಕ್ಷಿಣೆಕಡೆನ್ ಪಳೂನ್ ಗೆಲೊʼ ಅಸಲೆಂ ಚಿತ್ರಣ್ ಖರ‍್ಯಾ ಇತಿಹಾಸಾಚಿಂ ಸತಾಂ ವಿದ್ರೂಪ್‌ ಕರ್ತಾತ್. ತಶೆಂಚ್, ಮೆಟಾನೆರೆಟಿವ್ಹಾಂತ್‌ ʻಕೊಂಕ್ಣಿ ಸರಸ್ವತಿ ಸಂಸ್ಕೃತಾಯೆಚ್ಯಾ ಉಂಚ್ಲ್ಯಾ ಜಾತಿಚ್ಯಾ ಲೊಕಾಚಿ ಭಾಸ್ʼ ಅಶೆಂ ಚಿತ್ರಣ್ ಕೆಲ್ಲೆಂಯ್‌ ಚುಕಿಚೆಂ ಥರ್ತಾ.
ಕೊಂಕಣಿ ಲೋಕ್ ಭಾರತಾಚ್ಯಾ ಉತ್ತರಾಥಾವ್ನ್‌ ಗೊಂಯಾಂತ್‌ ವಸ್ತೆಕ್‌ ಲಾಗೊಂಕ್‌ ನೈಸರ್ಗಿಕ್‌ ಆಪತ್ತಿಚ್‌ ಕಾರಣ್ ಮ್ಹಣ್ ದಾಕಯ್ಲಾಂ. ಸ್ಥಳಾಂತರಾಚ್ಯಾ ಹ್ಯಾ ಎಕಾ ಕಾರಣಾವಿಣ್‌ ಗೋಂಯ್ ಕಸಲ್ಯಾಚ್‌ ಸಮಸ್ಯಾವಿಣ್‌ ಬ್ಲಾಂಕ್‌ ಸ್ಲೇಟ್‌ (blank slate) ಜಾವ್ನಾಸ್‌ಲ್ಲೆಂ ಆನಿ ಕೇವಲ್‌ ಪುಡ್ತುಗೆಜಾಂಚೆಂ ಯೆಣೆಂ ಕೊಂಕ್ಣಿ ಲೊಕಾಚ್ಯಾ ಪರತ್‌ ಸ್ಥಳಾಂತರಾಕ್ ಕಾರಣ್ ಜಾಲೆಂ ಮ್ಹಣ್ ದಾಕಯ್ತಾ.
Using Church for film promotion in Mangalore
ಅಶೆ ತರೆನ್ ಹ್ಯಾ ಸಿನೆಮಾಚೊ ಕಥಾನಕ್ ʻವಾಂಟೂನ್ ಘೆತಿಲ್ಲ್ಯಾ ಬಲಿಪಶುʼಚೊ ಸಿದ್ಧಾಂತ್ ಬಳ್ವಂತ್ ಕರ್ಪಾ ಖಾತೀರ್ ವಾಪ್ರಿಲ್ಲೊ ದಿಸ್ತಾ ಆನಿ ಪೊರ್ತುಗೆಜ್ ಲೊಕಾಂ ಕಡೆನ್ ಉಂಚ್ಲ್ಯಾ ಜಾತಿಚ್ಯಾಂಕ್‌ ಆಸ್‌ಲ್ಲೊ ಬರೊ ಸಂಬಂದ್‌ ಧಾಂಪುನ್‌ ದವ್ರುಂಕ್‌ ವಾ ಲಿಪಂವ್ಕ್‌ ನಿರ್ದೆಶೀತ್ ಕೆಲ್ಲೊ ತಶೆಂ ದಿಸೊನ್ ಯೆತಾ. ಅಸ್ಮಿತಾಯ್ ಸಿನೆಮಾ ಕುಡ್ಡೆಪಣಾನ್ ಹ್ಯಾ ಅಜೆಂಡೆಕ್ ಅಧೀನ್ ಜಾತಾ ಆನಿ ದುರ್ದೈವಾನ್ ಕೊಂಕ್ಣಿ ಮಾಂಯ್ಕ್ ತ್ಯಾ ಅನಿಷ್ಟ್ ಅಜೆಂಡೆಚಿ ದಾಸಿ ಕರ್ಪಾಕ್ ಪರ್ವಣ್ಗಿ ದಿತಾ!
ʻಆಪುಣ್‌ಯಿ ಬಲಿ ಪಶುʼ ಮ್ಹಳ್ಳಿ ನವ್ಯಾನ್ ರಚ್‌ಲ್ಲಿ ಪರಂಪರಾ ಆಯ್ಚ್ಯಾ ಹಿಂದುತ್ವ್ ವಿಚಾರ್‌ಸರಣೆಕಡೆನ್ ಜುಳ್ಟಾ ಆನಿ ʻಆಪುಣ್‌ಯಿ ಬಲಿ ಪಶುʼ ಮ್ಹಣ್ ದಾಕವ್ನ್‌, ರಚುನ್‌ ಹಾಡುಲ್ಲೊ ಪುಡ್ತುಗೆಜಾಂ ವಯ್ಲೊ ದ್ವೇಶ್‌, ಇನ್ಕ್ವಿಝಿಶನಾ ವರ್ವಿಂ ನಿಜಾಯ್ಕಿ ಕಶ್ಟಾಲ್ಲ್ಯಾ ಆಮ್ಚ್ಯಾ ನಿರಾಪ್ರಾದಿ ಪುರ್ವಜಾಂಪರಿಂ, ಆಯ್ಚ್ಯಾ ನಿರಾಪ್ರಾದಿ ಕ್ರಿಸ್ತಾಂವಾಂಚೆರ್‌ ಕಾಡ್ಚೊ ಸಂಭವ್‌ ಆಸಾ. ಜರ್‌ ಇನ್ಕ್ವಿಝಿಶನಾಚೊ ನೀಜ್‌ ಬಲಿಪಶು ಆಸಾ ತರ್, ತೊ ತವಳ್ಚೊ ಕಥೊಲಿಕ್‌ ಸಮುದಾಯ್. ಇತಿಹಾಸ್‌ ಪರತ್‌ ಗುಂವೊನ್ ತ್ಯಾಚ್‌ ಸಮಾಜೆಚೆರ್‌ ಥೀರ್‌ ಜೊಕುನ್‌ ಆಸಾ!
ಡೊ| ಡೆಲ್ಲನ್‌ ಜೊ ಫ್ರೆಂಚ್‌ ಆಸ್‌ಲ್ಲೊ, ಜಾಚೆಂ ಪ್ರಕರಣ್‌ ಆಮ್ಕಾಂ ಕಳಿತ್‌ ಆಸ್‌ಲ್ಲೆಂಚ್. ತೊ ದಾಮಾನಾಂತ್‌ ಆಸ್ತಾನಾ ತಾಕಾ ಇನ್ಕ್ವಿಝಿಶನಾ ಖಾಲ್ ಹಾಡ್‌ಲ್ಲೊ. ತಾಣೆಂ ದಿಲ್ಲೆಂ ಇನ್ಕ್ವಿಝಿಶನಾಚ್ಯಾ ಕಾರ್ಯಾವಳೀಂಚೆಂ ಉತ್ಪ್ರೇಕ್ಷಿತ್ ಚಿತ್ರ್ ಪ್ರತಿಕಾರಾಚೆಂ ಪ್ರಯತ್ನ್‌ ಜಾವ್ನಾಸ್‌ಲ್ಲೆಂ ಮ್ಹಳ್ಳೆಂ ವಿಸ್ರಾನಾಯೆ.
ಖರೆಂ ತರ್, ಉಂಚ್ಲ್ಯಾ ಜಾತಿಚೊ ಗೊಂಯ್ಚೊ ಹಿಂದು ಲೋಕ್ `ಪುಡ್ತುಗೆಜ್ ರಾಜ್ವಟ್ಕೆಚೊ ವಾಂಟೆಲಿ’ ಮ್ಹಳ್ಳ್ಯಾ ಆಪ್ರಾದಾಚೊ ಭೊರೊ ವ್ಹಾವವ್ನ್‌ ಆಸಾ. ತಾಂಣಿಂಚ್ ಪೊರ್ತುಗೆಜಾಂಕ್ ಗೊಂಯ್ಚೆರ್ ರಾಜ್ಯ್ ಕರ್ಪಾಕ್ ಆಪಯ್ಲಲೆಂ. ಇನ್ಕ್ವಿಝಿಶನಾ ವೆಳಾರ್, ಇನ್ಕ್ವಿಝಿಶನ್ ಚಲಯಿಲ್ಲ್ಯಾ ಬಾಂದ್ಪಾಚ್ಯಾ ಪಂದ್ಲ್ಯಾ ಮಾಳಿಯೆರ್‌ ಹಾಂಚೊಚ್‌ ವೆಪಾರ್‌ ಚಲ್ತಾಲೊ. ಹಿಂ ಸತಾಂ ಲಿಪಂವ್ಚೆ ಖಾತಿರ್‌, ಉಂಚ್ಲ್ಯಾ ಜಾತಿಚೆಯ್‌ ʻಇನ್ಕ್ವಿಝಿಶನಾಚೆ ಬಲಿಪಶುʼ ಮ್ಹಣೊನ್‌ ಚಿತ್ರಿತ್‌ ಕರ್ನ್‌, ಫಿಲ್ಮ್‌ ನಿರ್ಮಾಪಕಾಂನಿ, ಇತಿಹಾಸಾಂತ್‌ ಇನ್ಕ್ವಿಝಿಶನಾಚೆ ಬಲಿ ಪಶು ಜಾವ್ನಾಸ್ಲೆಲ್ಯಾ ಪ್ರಸ್ತುತ್‌ ಕ್ರಿಸ್ತಾಂವಾಂಚ್ಯಾ ಪುರ್ವಜಾಂಚೊ ಅಕ್ಮಾನ್‌ ಕೆಲಾ. ಮಾತ್ರ್‌ ನ್ಹಯ್‌, ʻಆಪುಣ್‌ಯಿ ಬಲಿ ಪಶುʼ ಮ್ಹಳ್ಳ್ಯಾ ನವ್ಯಾನ್ ರಚ್‌ಲ್ಲ್ಯಾ ಪರಂಪರೆಚ್ಯಾ ಸಮುದಾಯಾಕ್‌, ಆಯ್ಚೆ ಕ್ರಿಸ್ತಾಂವ್, ಇನ್ಕ್ವಿಝಿಶನಾ ವೆಳಾರ್ ಉಂಚ್ಲ್ಯಾ ವರ್ಗಾಚ್ಯಾ ಹಿಂದು ಲೊಕಾಚ್ಯಾ ದಣ್ಸೊಣೆಕ್‌ ಕಾರಣ್ ಜಾಲ್ಲೆ ಖಳ್ನಾಯಕ್ ಮ್ಹಣೂನ್ ಬಿಂಬಿತ್‌ ಕರುಂಕ್ ಜಾಯ್‌ ಆಸ್ಚೆಂ ಬಳ್‌ ದಿಲಾಂ.
ತ್ಯಾ ಮಾರಿಫಾತ್, ಹೊ ಸಿನೆಮಾ, ಕೊಂಕ್ಣಿ ಮಾಂಯ್ ಭಾಶೆಚಿ ಆನಿ ತಿಚ್ಯಾ ಲೊಕಾಂಚ್ಯಾ ಹಿತಾಚಿ ಸೆವಾ ಕರ್ಪಾಚೆಂ ನಾಟಕ್ ಕರ್ತಾಂಕರ್ತಾನಾ, ಕ್ರಿಸ್ತಾಂವಾಂಕ್ ʻವಸಾಹತ್‌ವಾದಿ ಭೂತ್‌ ಕಾಳಾಚೆ ರಾಕ್ಷಸ್ʼ ಮ್ಹಣೂನ್ ವೊಲಾಂವ್ಕ್‌ ಸೊದ್ಚ್ಯಾ ರಾಜ್‌ಕಾರಣಾಕ್ ಆಪ್ಲೊ ಬಲೀಶ್ಟ್‌ ಪಾಟಿಂಬೊ ದಿತಾ. ಅಸ್ಮಿತಾಯ್ ಸಿನೆಮಾಂತ್ ಕೊಂಕ್ಣಿ ಮಾಂಯ್ ಆನಿ ಕೊಂಕ್ಣಿ ಸಂಸ್ಕೃತಿ ಗೊಂಯಾಂತ್ಲ್ಯಾ ಪ್ರಸ್ತುತ್‌ ಕ್ರಿಸ್ತಾಂವಾಂಕ್ ಬಲಿ ದಿವ್ಪಾ ಪಾಸತ್‌ ವಾಪಾರ್ಲ್ಯಾ. ಖರೆಂ ಮ್ಹಣ್ಲ್ಯಾರ್‌ ಪುಡ್ತುಗೆಜಾಂಚ್ಯಾ ಕಾಳಾರ್‌ ಇಂಕ್ವಿಝಿಶನಾನ್‌ ಕ್ರಿಸ್ತಾಂವಾಂಕ್ ಕಿತೆಂ ಕೆಲ್ಲೆಂಗೀ, ತೆಂಚ್‌ ʻಅಸ್ಮಿತಾಯ್ʼ ಸಿನೆಮಾ ಆತಾಂ ಕರ್ತಾ!
ಪುಡ್ತುಗೆಜಾಂಚ್ಯಾ ಕಾಳಾರ್‌ ಕರ್ನಾಟಕ್‌ ಆನಿ ಕೇರಳಾಕ್‌ ಜಾಲ್ಲ್ಯಾ ಕೊಂಕ್ಣಿ ಲೊಕಾಚ್ಯಾ ಸ್ಥಳಾಂತರಾಕ್ ʻಏಕ್ ಕಾರಣ್-ಏಕ್ ಸ್ಥಳಾಂತರ್ʼ ಮ್ಹಳ್ಳೊ ಸಿದ್ಧಾಂತ್ ಪ್ರಸಾರ್‌ ಕರ್ಚ್ಯಾ ಉಜ್ವ್ಯಾ ವಿಚಾರ್ ಸರಣಿಚ್ಯಾ ಹಿಂದುತ್ವಾ ಲಾಬಿ ಸಂಗಿಂ ಮೆಳೊನ್ ಹೊ ಸಿನೆಮಾ ಇಂಕ್ವಿಝಿಶನಾನ್‌ ಭೊಳ್ಯಾ ಕ್ರಿಸ್ತಾಂವಾಂಕ್ ಕಿತೆಂ ಕೆಲ್ಲೆಂಗೀ, ತೆಂಚ್‌ ಆಯ್ಚ್ಯಾ ನಿರಾಪ್ರಾದಿ ಕ್ರಿಸ್ತಾಂವಾಂಕ್ ಕರ್ತಾ; ಸೀಜರಾಕ್‌ ಆಪ್ಲ್ಯಾಚ್‌ ಬ್ರೂಟಸಾನ್‌ ಸುರಿ ಘಾಲ್ಲೆ ಬರಿಂ. ಆಯ್ಚ್ಯಾ ಕ್ರಿಸ್ತಾಂವಾಂಚಿ ದುರ್ದಶಾ ಫ್ಯೊಡೊರ್ ದೊಸ್ತೊಯ್ವ್ಹಸ್ಕಿ (Fyodor Dostoevsky)ಚ್ಯಾ ʻಗುನ್ಯಾಂವ್ ಆನಿ ಖ್ಯಾಸ್ತ್ʼ (Crime and Punishment) ಸಾರ್ಕೀಚ್ ಆಸಾ. ತಾತೂಂತ್ ಸಗ್ಳೊ ಪ್ರಸ್ನ್ ಅಸೊ ಆಸಾ, “ಹಾಂವ್ ರಾಕ್ಷಸ್?, ವಾ ಹಾಂವ್ ಬಲಿ? ಆನಿ ಬಲಿಪಶು ತರ್ ಕಿತೆಂ?’
■ ಫಾ| ವಿಕ್ಟರ್‌ ಫೆರಾವೊ, ಸಾಂ ಫ್ರಾನ್ಸಿಸ್‌ ಸಾವೆರ್‌ ಫಿರ್ಗಜ್‌, ಬೊರಿಮ್‌, ಪೊಂಡಾ, ಗೋಂಯ್.
3 comments