ತರ್ನಾಟಾಂಕ ಆತ್ಮವಿಶ್ವಾಸ ವಾಡೊವಚೆ ಆನಿ ಸರ್ವ ಆಸಕ್ತಾಂಕ ಮುಕ್ತಜಾವನ ಆಸಚೆ, ವಿಶಿಷ್ಟ ರೀತೀಚೆ ತರಬೇತ “ಸಿ.ಎ. ಪವರ್ 25- ಸಿ.ಎ ಇಂಟರ್- ಗ್ರೂಪ್1, ಸೀಸನ್ -4” ತರಬೇತ ಶಿಬಿರಾಚೆ ಸಮಾರೋಪ ಸುವಾಳೊ 24-02-2024 ತಾರೀಖೇರ ವಿಶ್ವ ಕೊಂಕಣಿ ಕೇಂದ್ರಾಂತ ಚಲ್ಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಸಿ.ಎ. ನಂದಗೋಪಾಲ ಶೆಣೈ ಹಾನಿ ತಾಂಚೆ ಸಂದೇಶಾಂತ ವಿದ್ಯಾರ್ಥಿಂನಿ ತಾಂಗೆಲೆ ಸೊಪನ ಸಾಕಾರ ಕರಚಾಕ ಧೃಢ ನಿರ್ಧಾರ ಆನಿ ಸಮರ್ಪಣ ಭಾವನೇನ ಕಾಮ ಕರೀತ ಶಿಬಿರಾಚೆ ಸದುಪಯೋಗ ಘೆವನ ಆತ್ಮವಿಶ್ವಾನ ಧ್ಯೇಯ ಸಾಧನ ಕರಕಾ ಅಶಿಂ ಸಾಂಗಲೆಂ. ಮುಖೇಲ ಸೊಯ್ರೆ ಜಾವನ ತ್ರಿಶಾ ಕ್ಲಾಸಸ್ ಉಪನ್ಯಾಸಕ ಸಿ.ಎ. ನಾಗೇಂದ್ರ ಭಕ್ತಾ ಹಾನಿ ಸಿ.ಎ. ಪರೀಕ್ಷಾ ಬದ್ದಲ ಪರೀಕ್ಷಾರ್ಥಿಂಕ ಅವಶ್ಯಕ ಜಾಲ್ಲೆಲೆ ಮನೋ ಸಾಮರ್ಥ್ಯ ವಿವರಣ ದಿಲೆಂ. ಡಾ. ಬಿ. ದೇವದಾಸ್ ಪೈ ಹಾನಿ ಶಿಬಿರಾಂತ ಮನಾಂತ ದವರಕಾ ಜಾಲ್ಲೆಲೆ ವಿಚಾರ ಬದ್ದಲ ಕಳಯಲೆಂ.
ಧಾ ದೀಸ ಭರ ಚಲಚೆ ಹೆಂ ಉದಾರ ಸನಿವಾಸೀ ತರಬೇತಿಂ ಶಿಬಿರಾಂತ ಪರೀಕ್ಷಾ ಬೊರವಚೆ ಛಾತ್ರಾಂಕ ನವೆಂ ನಮೂನೆಂತ ಸಂಪೂರ್ಣ ಪುನರಾವರ್ತನಾ ಕರಚೆ ಆನಿ ಅಣಕ ಪರೀಕ್ಷಾ ದೀವನ ಅಂತ್ಯಾ ಮಟ್ಟಾಕ ತಯಾರ ಕರಚೆ ಜಾವನ ಆಸಾ.
ಸಿ.ಎ. ಉಲ್ಲಾಸ್ ಕಾಮತ್ ಹಾಂಗೆಲೆ ಯು.ಕೆ. ಆಂಡ್ ಕೊ ಆನಿ ತ್ರಿಶಾ ಕ್ಲಾಸಸ್ ಸಂಸ್ಥಾ ಆನಿ ವಿಶ್ವ ಕೊಂಕಣಿ ಕೇಂದ್ರ ಹೆಂ ತರಬೇತಿ ಯೋಜನೆಕ ಸಾಂಗಾತ ದಿತಾತಿ.
ಶಿಬಿರಾರ್ಥಿಂನಿ ಉತ್ಸಾಹಾನ ಶಿಬಿರಾಂತ ತಾನ್ನಿ ಘೆತಿಲ್ಲೆ ಅನುಭವಾಕ ವಾಂಟುನ ಘೆತಲೆಂ. ವಿದ್ಯಾರ್ಥಿ ಯಶಸ್ವಿನ ಸ್ವಾಗತ ಕೆಲೆಂ, ದೀಪ್ನಾ ಜೆ ನ ಕಾರ್ಯಕ್ರಮ ನಿರೂಪಣ ಕೆಲೆಂ, ವೈಷ್ಣವಿನ ಧನ್ಯವಾದ ಸಮರ್ಪಣ ಕೆಲೆಂ.