ಪಿಂಜ್ರೊ ತಯಾರ್ ಜಾಲೊ. ಬಾಲ್ತಜಾರಾನ್ ತಾಕಾ ಘರ್ಚ್ಯಾ ಪಾಕ್ಯಾಕ್ ಉಮ್ಕಾಳಾವ್ನ್ ಜೆವ್ನ್ ಮುಗ್ದಿತಾನಾ ತೊ ಪಿಂಜ್ರೊ ಅಖ್ಯಾ ಸಂಸಾರಾಂತ್ ಸೊಭೀತ್ ಮ್ಹಣ್ ಪಳೆಯಿಲ್ಲೊ ಹರ್ಯೆಕ್ಲೊ ಮ್ಹಣಾಲೊ. ತಾಕಾ ಪಳೆಂವ್ಕ್ ಮ್ಹಣ್ ಆಯ್ಲೆಲ್ಯಾ ಲೊಕಾಚೊ ಏಕ್ ವ್ಹಡ್ ಜಮೊಚ್ ಬಾಲ್ತಜಾರಾಚ್ಯಾ ಘರಾ ಮುಖಾರ್ ಜಮ್ಲೊ. ಅಖ್ರೇಕ್ ಉಪಾವ್ ನಾಸ್ತಾಂ ತಾಕಾ ಪಾಕ್ಯಾ ವಯ್ಲೊ ಕಾಡ್ನ್ ಭಿತರ್ ವರ್ನ್ ಘರ್ಚೆಂ ದಾರ್ ಧಾಂಪ್ಚೆಂ ಪಡ್ಲೆಂ.
“ಪಯ್ಲೆಂ ಖಾಡ್ ತಾಸ್. ಪಳೆಂವ್ಕ್ ಜಾಯ್ನಾ. ಮಾಂಕ್ಡಾಬರಿ ದಿಸ್ತಾಯ್” ಮ್ಹಣಾಲಿ ತಾಚಿ ಬಾಯ್ಲ್ ಅರ್ಸುಲಾ.
“ಜೆವ್ಲ್ಯಾ ಉಪ್ರಾಂತ್ ಖಾಡ್ ತಾಸುಂಕ್ ಬರೆಂ ಲಾಗನಾ” ಮ್ಹಣಾಲೊ ಬಾಲ್ತಜಾರ್.
ಖಾಡ್ ತಾಸುನ್ ಸುಮಾರ್ ದೋನ್ ಹಫ್ತೆ ಜಾಲ್ಲೆ. ದೆಕುನ್ ತೆಂ ಗಾಡ್ವಾಚ್ಯಾ ಗಳ್ಯಾಂತ್ಲ್ಯಾ ಲೊಂವೆ ಬರಿ ಉಟೊನ್ ರಾವುಲ್ಲೆಂ. ತ್ಯಾ ವರ್ವಿಂ ತಾಚೆಂ ತೋಂಡ್ ಭಿಯೆಂವ್ಚಾ ಏಕಾ ಚೆಡ್ಯಾಬರಿ ದಿಸ್ತಾಲೆಂ. ತೆಂ ತಾಚೆಂ ನೀಜ್ ತೋಂಡ್ ನ್ಹಯ್ ಹಾಂ!
ಪಾಟ್ಲ್ಯಾ ಫೆಬ್ರೆರಾಂತ್ ತಾಕಾ ತೀಸ್ ಭರ್ ಲ್ಲಿಂ. ಚಾರ್ ವರ್ಸಾಂ ಥಾವ್ನ್ ಅರ್ಸುಲಾ ಸಾಂಗಾತಾ ಕಾಜಾರ್ ಜಾಯ್ನಾಸ್ತಾಂ ಆನಿ ಭುರ್ಗಿಂಯ್ ನಾಸ್ತಾಂ ಜಿಯೆತಾಲೊ. ಖಂಚಾಯ್ಕೀ ಭಿಯೆನಾಸ್ತಾಂ ಆಪ್ಣಾಚಿಚ್ ಏಕ್ ಜಿಣಿ ಜಿಯೆಂವ್ಕ್ ತೊ ಶಿಕ್ಲಾ. ಥೊಡ್ಯಾ ವೆಳಾದಿಂ ತಾಚೊ ಪಿಂಜ್ರೊ ಪಳೆವ್ನ್ ತೊ ಅಖ್ಯಾ ಸಂಸಾರಾಂತ್‌ಚ್ ಮೊಸ್ತು ಸೊಭೀತ್ ಮ್ಹಣ್ ಜಮೊ ಜಾಲ್ಲ್ಯಾನಿ ಸಾಂಗ್ಲೆಲೆಂ ತೊ ನೆಣಾಂ. ಲ್ಹಾನ್ಪಣಾ ಥಾವ್ನ್ಂಚ್ ಪಿಂಜ್ರೊ ತಯಾರ್ ಕರ್ಚೆಂ ಮ್ಹಳ್ಯಾರ್ ತಾಕಾ ಉದಾಕ್ ಪಿಯೆಲ್ಲ್ಯಾ ಬರಿ ಸಲೀಸ್. ದೆಕುನ್ ಹೆರ್ ಸಂಗ್ತಿಚಾಂಕೀ ಚಡ್ ಸಲಿಸಾಯೆನ್ ತೊ ಪಿಂಜ್ರೊ ಕರ್ತಾಲೊ.
“ಹೆಂ ಖಾಡ್ ಸೊಡ್ನ್ ತುಂವೆಂ ಭಾಯ್ರ್ ವೆಚೆಂ ನಾಕಾ. ಇಲ್ಲೊ ಉಸ್ವಾಸ್ ಸೊಡ್” ಮ್ಹಣಾಲಿ ಬಾಯ್ಲ್ ಅರ್ಸುಲಾ.
ದೆಕುನ್ ತೊ ಖಟ್ಲ್ಯಾರ್ ಆಡ್ ಪಡ್ಲೊ. ಪೂಣ್ ಸೆಜರ್ಚ್ಯಾಂಕ್ ಪಿಂಜ್ರೊ ದಾಖಂವ್ಕ್ ಮ್ಹಣ್ ಸಭಾರ್ ಪಾವ್ಟಿಂ ತಾಕಾ ಉಟೊನ್ ಭಾಯ್ರ್ ವೆಚೆಂ ಪಡ್ಲೆಂ. ಘೊವಾನ್ ಸುತಾರಿಚೆಂ ಕಾಮ್ ಕರ್ಚೆಂ ಸೊಡ್ನ್ ಚಡ್ ಪಿಂಜ್ರ್ಯಾ ವಿಶಿಂ ಗಮನ್ ದಿಂವ್ಚೆಂ , ಪಾಟ್ಲ್ಯಾ ದೋನ್ ಹಫ್ತ್ಯಾ ಥಾವ್ನ್ ಸಾರ್ಕಿ ನೀದ್ ಕಾಡ್ಲಿ ನಾ ಮ್ಹಳ್ಳೆಂ, ಇಲ್ಲೆಶೆಂ ನಿದ್ಲ್ಯಾರೀ ಗಡ್ಜೆಚೆರ್ ಲೊಳೊನ್ ಗುಣ್ಗುಂಣ್ಚೆಂ, ದೋನ್ ಹಫ್ತ್ಯಾ ಥಾವ್ನ್ ಖಾಡ್ ಕಾಡಿನಾಸ್ತಾಂ ಭಂವ್ಚೆಂ, ಇತ್ಯಾದಿ ವಿಶಿಂ ಅರ್ಸುಲಾಕ್ ಮೊಸ್ತು ಬೆಜಾರ್ ಜಾಲ್ಲೆಂ. ಪೂಣ್ ಪಿಂಜ್ರೊ ಪಳೆತಚ್ ತಿಚಿ ಬೆಜಾರಾಯ್ ಖರ್ಗೊನ್ ಗೆಲಿ. ಬಾಲ್ತಜಾರ್ ದನ್ಪಾರಾಂಚಿ ನೀದ್ ಕಾಡ್ನ್ ಉಟ್ಚೆ ಪಯ್ಲೆಂಚ್ ತಾಚೆಂ ಪ್ಯಾಂಟ್ ಆನಿ ಶರ್ಟ್ ಇಸ್ತ್ರಿ ಕರ್ನ್ ಖಟ್ಲ್ಯಾ ಲಾಗ್ಸಿಲ್ಯಾ ಕದೆಲಾರ್ ದವರ್ಲೆಂ. ಉಪ್ರಾಂತ್ ಪಿಂಜ್ರೊ ಉಕಲ್ನ್ ಜೆಂವ್ಚಾ ಮೆಜಾರ್ ದವರ್ಲೊ. ಹೆಂ ಸಕ್ಕಡ್ ತಿಣೆಂ ಆವಾಜ್ ಕರಿನಾಸ್ತಾಂ ಕೆಲೆಂ.
“ಹಾಕಾ ಕಿತ್ಲೊ ದುಡು ವಿಚಾರ್ತಾಯ್?” ತಿಣೆಂ ತೊ ಉಟ್ತಚ್ ವಿಚಾರ್ಲೆಂ.
“ಇತ್ಲೊಚ್ ಮ್ಹಣ್ ಗೊತ್ತುನಾ. ಪಳೆವ್ಯಾಂ. ತಿನ್ಶಿಂ ರುಪಯ್ ಮ್ಹಣ್ ಸಾಂಗ್ತಾಂ. ದೊನ್ಶಿಂ ಪುಣೀ ಮೆಳ್ತೆಲೆ.”
“ಆಯ್ಯೋ ದೆವಾ, ಪಾಂಯ್ಶಿಂ ಸಾಂಗ್. ಹಾಕಾ ತಯಾರ್ ಕರ್ಚಾಕ್ ತುಂ ನೀದ್ ಕಳ್ಳಾಯ್. ವ್ಹಡ್ ಸಯ್ತ್ ಆಸಾ ನೇ. ಮ್ಹಜ್ಯಾ ಜಿಣ್ಯೆಂತ್ ಪಳೆನಾತ್ಲ್ಯಾ ತಸಲೊ ವ್ಹಡ್ ಪಿಂಜ್ರೊ ಹೊ ಮ್ಹಣ್ ಮ್ಹಾಕಾ ಭಗ್ತಾ. “
ಬಾಲ್ತಜಾರ್ ಖಾಡ್ ತಾಸಿಲಾಗ್ಲೊ.
“ತಾಕಾ ಪಾಂಯ್ಶಿ ಮೆಳಾತ್ ಮ್ಹಣ್ ತುಕಾ ಭಗ್ತಾಗೀ?”
“ಮಾಂತ್ಯೆಲಾಕ್ ಪಾಂಯ್ಶಿ ಕಿತೆಂಚ್ ನ್ಹಯ್. ಪಿಂಜ್ರೊ ಕಾಂಯ್ ಪಾಡ್ ನಾ. ತುಂ ಸಯ್ಶಿಂ ವಿಚಾರ್.”
ಸಗ್ಳೆಂ ಘರ್ ಉಸ್ವಾಸ್ ಭಾಂದ್ಚಾ ತಸೆಂ ಭಗ್ಲೆಂ. ತೊ ಎಪ್ರಿಲ್ ಮಹಿನ್ಯಾಚೊ ಪಯ್ಲೊ ಹಫ್ತೊ ಜಾಲ್ಲ್ಯಾನ್ ಮೊಸ್ತು ಗರ್ಮಿ ಅಸ್ಲೆಲಿ. ಸಾಂಗಾತಾ ಕೀ ಕರ್ನ್ ಬೊಬಾಟ್ಚೆ ಕಿಡೆ. ಬಾಲ್ತಜಾರ್ ನೆಸೊನ್ ಇಲ್ಲೆಂ ಥಂಡ್ ವಾರೆಂ ಯೇಂವ್ದಿ ಮ್ಹಣ್ ಮುಖ್ಲೆಂ ದಾರ್ ಉಗ್ತೆಂ ಕೆಲೆಂ. ತಕ್ಷಣ್ ಭುರ್ಗ್ಯಾಂಚೊ ಏಕ್ ಜಮೊ ಜೆವ್ಣಾಚ್ಯಾ ಕೂಡಾಕ್ ರಿಗ್ಲೊ.
ಸಗ್ಳ್ಯಾನಿತ್ಲ್ಯಾನ್ ಖಬಾರ್ ವಾಳ್ಳಿ. ಜಿಣ್ಯೆಂತ್ ಖುಶೇನ್ ಆಸ್ಲ್ಯಾರೀ ,ವೆವರಾಂತ್ ಥಕ್ಲೆಲ್ಲೊ ಮಾತಾರೊ ವ್ಹಯ್ಜ್, ಆಕ್ಟೆವಿಯೋ ಜೆರಾಲ್ಡೊ ಆಪ್ಲ್ಯಾ ಬಾಯ್ಲೆ ಸಾಂಗಾತಾ ಜೆವ್ಣಾಚ್ಯಾ ವೆಳಾರ್ ಬಾಲ್ತಜಾರಾಚ್ಯಾ ಪಿಂಜ್ರೊ ವಿಶಿಂ ಚಿಂತುಂಕ್ ಲಾಗ್ಲೊ. ಗಿಮಾಳ್ಯಾ ದಿಸಾಂನಿ ಸೊಫ್ಯಾರ್ ಆಸ್ಲೆಲ್ಯಾ ಮೆಜಾ ವಯ್ರ್ ದವರ್ಲೆಲಿಂ ಫುಲಾಂಚಿಂ ಸಭಾರ್ ವಾಜಾಂ ಥಂಯ್ಸರ್ ಆಸ್‌ಲ್ಲಿಂ. ತಾಚ್ಯಾ ಬಾಯ್ಲೆಕ್ ಸುಕ್ಣಿಂ ಮ್ಹಳ್ಯಾರ್ ಜೀವ್. ಹ್ಯಾಚ್ ಕಾರಣಾಕ್ ಲಾಗೊನ್ ತಿಕಾ ಮಾಜ್ರಾಂ ಮ್ಹಳ್ಯಾರ್ ಬಿಲ್ಕುಲ್ ಜಾಯ್ನಾಂ. ತ್ಯಾ ದೀಸ್ ದೊನ್ಪಾರಾಂ ಜೆರಾಲ್ಡೋ ಪಿಡೆಸ್ತಾಕ್ ಪಳೆಂವ್ಕ್ ಗೆಲ್ಲೊ ಪಾಟಿಂ ಘರಾ ಯೆಂವ್ಚಾ ವಗ್ತಾ ಬಾಲ್ತಜಾರಾಚೊ ಪಿಂಜ್ರೊ ಪಳೆಂವ್ಕ್ ಗೆಲ್ಲೊ. ಥಂಯ್ ಜೆವ್ಣಾಚ್ಯಾ ಕೂಡಾಂತ್ ಲೋಕ್ ಜಮೊ ಜಾಲ್ಲೊ. ಮೆಜಾ ವಯ್ರ್ ಪಿಂಜ್ರೊ ದವ್ರಿಲ್ಲೊ. ವ್ಹಡ್ ಆಸ್ಲೆಲ್ಯಾ ತಾಂತು ತೀನ್ ಮಾಳಿಯೊ. ಬಾಗ್ಲಾಂ ಆನಿ ಕೂಡಾಂ ಸಯ್ತ್ ಆಸ್ಲೆಲಿಂ. ಖಾಂವ್ಕ್, ನಿದೊಂಕ್ ಆನಿ ಸುಕ್ಣ್ಯಾಂಕ್ ನಾಚೊಂಕ್ ಬರೊಚ್ ಜಾಗೊ ಆಸ್ಲೊ. ಮಧೆಗಾತ್ ಏಕ್ ಪಾಳ್ಣೆಂ ಉಮ್ಕಾಳಾಯಿಲ್ಲೆಂ. ಆಸೆಂ ಸಗ್ಳೊ ಪಿಂಜ್ರೊ ಏಕ್ ವ್ಹಡ್ ಫ್ಯಾಕ್ಟರಿ ಬರಿಂ ದಿಸ್ತಾಲೊ. ವ್ಹಯ್ಜಾನ್ ತಾಕಾ ಲಾಗ್ಸಿಲ್ಯಾನ್ ಪಳೆಲೊ. ಸೊಭೀತ್ ಪಿಂಜ್ರೊ ಆನಿ ಬಾಯ್ಲೆನ್ ಸಪ್ಣಾಂತ್ ಪಳೆಯಿಲ್ಲ್ಯಾಚಾಕೀ ಚಡ್ ಅದ್ಭುತ್ ಮ್ಹಣ್ ತಾಣೆಂ ಚಿಂತ್ಲೆಂ.
“ತುಜೊ ಪಿಂಜ್ರೊ ಅಪೂರ್ವ್ ಕಲ್ಪನಾಂಚೊ ಪ್ರತೀಕ್ ಜಾವ್ನಾಸಾ” ಮ್ಹಣ್ ಗುಣ್ಗುಣ್ಲೊ.
ಜಮ್ಯಾಂತ್ ಬಾಲ್ತಜಾರಾಕ್ ಸೊಧುನ್ ಇಶ್ಟಾಗತಿಚೊ ಹಾಸೊ ದೀವ್ನ್, “ತುಂ ಏಕ್ ಫಾಮಾದ್ ಶಿಲ್ಪಿ ಜಾವ್ನಾಸಾಯ್.” ಮ್ಹಣಾಲೊ.
ಬಾಲ್ತಜಾರ್ ಲಜೆನ್ ದೊಡ್ಲೊ.
“ಮೊಸ್ತು ದೇವ್ ಬರೆಂ ಕರುಂ” ತಾಣೆಂ ಜಾಪ್ ದಿಲಿ.
“ಹಾಂವೆಂ ಸಾಂಗ್ಚೆಂ ಸತ್” ವ್ಹಯ್ಜಾಚಿ ಜಾಪ್. ಸೊಭೀತ್ ಚಲಿಯೆಬರಿ ಮೊಟೊ ದಿಸ್ಲ್ಯಾರೀ ಮೊಟೊ ನ್ಹಯ್. ತಾಚ್ಯೆ ಹಾತ್ ಕಾಪ್ಸಾಬರಿ ಮೋವ್ ಆನಿ ತಾಚೊ ತಾಳೊ ಲಾತೆಂ ಉಲಂವ್ಚಾ ಪಾದ್ರಿಬರಿ ಆಯ್ಕಾತಾಲೊ. ತಾಣೆಂ ಪಿಂಜ್ರೊ ಉಕಲ್ನ್ ಧರ್ನ್, ” ತುಂವೆಂ ಹಾಂತು ಸುಕ್ಣ್ಯಾಂಕ್ ಘಾಲ್ಚಿ ಗರ್ಜ್ ನಾ. ಖಂಚಾಯ್ ಏಕಾ ರೂಕಾಚ್ಯಾ ಫಾಂಟ್ಯಾಕ್ ಉಮ್ಕಾಳಾಯ್ಲ್ಯಾರ್ ಪುರೊ, ತಾಚ್ಯಾ ಇತ್ಲ್ಯಾಕ್ ತೊ ಗಾಯ್ತೊಲೊ” ಮೆಜಾರ್ ದವ್ರುನ್ ಪರ್ತುನ್ ತಾಕಾ ಪಳೆವ್ನ್, “ಪಿಂಜ್ರೊ ಹಾಂವ್ ಘೆತಾಂ.”
“ತಾಕಾ ಎದೊಳುಚ್ ವಿಕುನ್ ಜಾಲಾ” ಮ್ಹಣಾಲೆಂ ಅರ್ಸುಲಾ.
“ಹೊ ಚೇಪೇ ಮಾಂತ್ಯೆಲಾನ್ ಆಪ್ಲ್ಯಾ ಪೂತಾಕ್ ಮ್ಹಣ್ ಕರಯ್ಲಾ” ಮ್ಹಣಾಲೊ ಬಾಲ್ತಜಾರ್.
ವ್ಹಯ್ಜಾನ್ ತಕ್ಲಿ ಹಾಲಯ್ಲಿ.
“ತಾಣೆಂ ತುಜ್ಯಾಲಾಗಿಂ ಅಸಲೊಚ್ ಪಿಂಜ್ರೊ ಜಾಯ್ ಮ್ಹಣ್ ಸ್ಯಾಂಪಲ್ ದಿಲ್ಲೊವೇ?”
“ನಾ. ವ್ಹಡ್ ಪಿಂಜ್ರೊ ಜಾಯ್ ಮ್ಹಣ್ ಸಾಂಗ್‌ಲ್ಲೆಂ ಮಾತ್ರ್. ಏಕ್ ಜೊಡಿ ಕೊಗುಳ್ ಸುಕ್ಣ್ಯಾಂಕ್ ಮ್ಹಳ್ಳೊ ಉಗ್ಡಾಸ್.”
“ಪೂಣ್ ಹೊ ಕೊಗುಳ್ ಸುಕ್ಣ್ಯಾಂಕ್ ನ್ಹಯ್.”
“ಖಂಡಿತ್ ವ್ಹಯ್” ಮ್ಹಣ್ ಬಾಲ್ತಜಾರ್ ಮೆಜಾಲಾಗಿಂ ಗೆಲೊ. ಭುರ್ಗ್ಯಾಂನಿ ತಾಕಾ ರೆವೊಡ್ ಘಾಲೊ. “ಬರೊಚ್ ಮಾಪ್ ಕಾಡ್ನ್ ಹಾಂವೆಂ ಹೊ ತಯಾರ್ ಕೆಲಾ” ಮ್ಹಣ್ ಬೋಟ್ ಜೊಕುನ್ ತಾಣೆಂ ಪಿಂಜ್ರ್ಯಾಕ್ ಹಳ್ವಾಯೆನ್ ಏಕ್ ಥಾಪಡ್ ದಿಲೆಂ. ಟಣ್ ಮ್ಹಣ್ ಪಿಂಜ್ರೊ ಆವಾಜ್ಲೊ.
“ಪಳೆಯಾ, ಹಾಂತ್ಲ್ಯೊ ಸರಿಯೊ ಕಿತ್ಲ್ಯೊ ಘಟ್ ಆಸಾತ್ ಮ್ಹಣ್. ಬರೆಂಚ್ ವೊಳುನ್ ಹಾಂವೆಂ ಸರಿಯಾಂಕ್ ಭಾಂದ್ಲಾಂ.”
“ಹೊ ಕಿರಾಕ್ ಸಯ್ತ್ ವ್ಹಡ್ ಜಾಲೊ” ಮ್ಹಣಾಲೊ ಜಮ್ಯಾಂತ್ಲೊ ಏಕ್ಲೊ ಚೆಡೊ.
“ತೆಂ ಸಮಾ”
“ತೆಂ ಆಸೊಂ. ತಾಣೆಂ ತುಕಾ ಪಿಂಜ್ರೊ ಅಸೊಚ್ ಜಾಯ್ ಮ್ಹಣ್ ಪಿಂತ್ರಾವ್ನ್ ದೀವ್ನಾ. ಅಸಲಿಚ್ ಡಿಸಾಯ್ನ್ ಜಾಯ್ ಮ್ಹಣ್ ಸಯ್ತ್ ಸಾಂಗೊಂಕ್ನಾ. ಕೊಗುಳ್ ಸುಕ್ಣ್ಯಾಂಕ್ ಏಕ್ ಪಿಂಜ್ರೊ ಜಾಯ್ ಮ್ಹಣ್ ಮಾತ್ರ್ ಸಾಂಗ್ಲೆಲೆಂ ವ್ಹಯ್ಮೂ?” ವ್ಹಯ್ಜಾಚೆಂ ಸವಾಲ್.
“ತೆಂ ವ್ಹಯ್.”
“ತಸೆಂ ಜಾಲ್ಯಾರ್, ತೊಂದ್ರೆ ಕಸಲೆ? ತಾಕಾ ಏಕ್ ವ್ಹಡ್ ಪಿಂಜ್ರೊ ಜಾಯ್ ತಿತ್ಲೆಂಚ್. ತಾಣೆಂ ಕರುಂಕ್ ಸಾಂಗ್ಲೆಲೊ ಪಿಂಜ್ರೊ ಹೊಚ್ ಮ್ಹಣ್ ಸಾಂಗ್ಚಾಕ್ ಆಧಾರ್ ಕಸ್ಲೊ ಆಸಾ?”
“ಹೊಚ್ ಪಿಂಜ್ರೊ ಹಾಂವೆಂ ತಾಕಾ ಮ್ಹಣ್ ತಯಾರ್ ಕೆಲಾ” ಪಾದ್ದೆವ್ನ್ ಬಾಲ್ತಜಾರ್ ಮ್ಹಣಾಲೊ.ವ್ಹಯ್ಜಾಚೆಂ ತೋಂಡ್ ತಿರಸ್ಕಾರಾನ್ ಭರ್ಲೆಂ.
“ಜಾಯ್ ತರ್ ತುಂವೆಂ ಅಸಲೊಚ್ ಅನ್ಯೆಕ್ ಪಿಂಜ್ರೊ ಕರ್ಯೆತ್” ಘೊವಾಕ್ ಪಳೆತ್ತ್ ಬಾಯ್ಲ್ ಉಲಯ್ಲಿ. ಉಪ್ರಾಂತ್ ವ್ಹಯ್ಜಾಕ್ ಪಳೆವ್ನ್, ” ತುಕಾ ಅಮ್ಸೊರ್ ನಾ ನ್ಹಯ್ವೇ?” ಮ್ಹಣ್ ವಿಚಾರ್ಲೆಂ.
“ದೊನ್ಪಾರಾಂಚ್ ಹಾಡ್ನ್ ದಿತಾಂ ಮ್ಹಣ್ ಬಾಯ್ಲೆಕ್ ಉತರ್ ದಿಲಾಂ ಹಾಂವೆಂ.”
“ಮಾಫ್ ಕರ್ ದಾಕ್ತೆರಾಬಾ. ಎದೊಳುಚ್ ವಿಕ್ಲೆಲೊ ಪಿಂಜ್ರೊ ಪರ್ತುನ್ ಕಸೆಂ ವಿಕುಂ?” ವ್ಹಯ್ಜಾನ್ ಬಾವ್ಳೆ ಹಾಲಯ್ಲೆ ಬೊಲ್ಸಾಂಥಾವ್ನ್ ತುವಾಲೊ ಕಾಡ್ನ್ ಗೊಮ್ಟೆಚೊ ಘಾಮ್ ಪುಸ್ಲೊ.
“ಜಾಂವ್ದಿ ಹಾಬಾ. ತಾಣೆ ಹಾಕಾ ಕಿತ್ಲೆಂ ಮೋಲ್ ದಿಲಾಂ?” ಬಾಲ್ತಜಾರಾನ್ ಬಾಯ್ಲೆಕ್ ಪಳೆಲೆಂ.
“ಸಯ್ಶಿಂ ರುಪಯ್” ಅರ್ಸುಲಾನ್ ತಕ್ಷಣ್ ಜಾಪ್ ದಿಲಿ.
“ಹೊ ಪಿಂಜ್ರೊ ಮೊಸ್ತು ಸೊಭೀತ್ ಆಸಾ.ಅದ್ಭುತ್,” ವ್ಹಯ್ಜಾನ್ ಏಕ್ ನೀಳ್ ಸ್ವಾಸ್ ಸೊಡ್ನ್ ಮ್ಹಳೆಂ ತುವಾಲ್ಯಾನ್ ವಾರೆಂ ಘಾಲಿತ್ತ್ ಹಾಸೊನ್ ದಾರಾದಿಶಿಂ ಚಲ್ಲೊ.” ಮಾಂತ್ಯೆಲ್ ಗಿರೆಸ್ತ್ ಮನಿಸ್” ಮ್ಹಣೊನ್ ಸಕ್ಕಡ್ ವಿಸ್ರೊನ್ ಗೆಲಾಂ ಮ್ಹಳ್ಲ್ಯಾಬರಿ ಮಾಯಾಗ್ ಜಾಲೊ.
ಮಾಂತ್ಯೆಲ್ ಸಾಂಗ್ಚಾ ತಿತ್ಲೊ ಗಿರೆಸ್ತ್ ನ್ಹಯ್. ಪೂಣ್ ತಸೆಂ ಜಾಂವ್ಚಾಕ್ ತೊ ಕಿತೆಂ ಕರುಂಕೀ ತಯಾರ್ ಆಸ್ಚೊ ಮನಿಸ್. ಘರಾಂತ್, ವಿಕ್ಚಾಕ್ ಸಾಧ್ಯ್ ಜಾಯ್ನಾ ತಿತ್ಲ್ಯೊ ವಸ್ತು ಭರುನ್ ತಾಣೆಂ ದವರ್ಲ್ಯಾತ್. ಮರ್ಣಾವಿಶಿಂ ಭೆಂ ಆಸ್ಚಿ ತಾಚಿ ಬಾಯ್ಲ್ ಜೆವ್ಣಾ ಉಪ್ರಾಂತ್ ಘರ್ಚಿಂ ಜನೆಲಾಂ ಆನಿ ದಾರಾಂ ಪೂರಾ ಧಾಂಪುನ್ , ಖಟ್ಲ್ಯಾರ್ ನಿದೊನ್, ಕೂಡಾಂತ್ಲೊ ಕಾಳೊಕ್ ಪಳೆಂವ್ಚಾ ವಗ್ತಾ ದೊನ್ಪಾರಾಂಚಿ ಏಕ್ ಲಾನ್ಶಿ ನೀದ್ ಮಾಂತ್ಯೆಲ್ ಕಾಡ್ತಾಲೊ. ಭಾಯ್ರ್ ಆವಾಜ್ ಜಾಲ್ಲ್ಯಾನ್ ಜನೆಲಾಂತ್ಲ್ಯಾನ್ ಪಳೆತಾನಾ ಲೊಕಾಚೊ ಏಕ್ ವ್ಹಡ್ ಜಮೊ ತಿಣೆ ಪಳೆಲೊ. ಜಮ್ಯಾ ಮಧೆಂ ಪಿಂಜ್ರೊ ಧರ್ನ್ ಖಾಡ್ ತಾಸುಲ್ಲೊ ಆನಿ ಧವೆಂ ನ್ಹೆಸ್ಲೆಲೊ ಬಾಲ್ತಜಾರ್ ಉಭೊ ಆಸಾ. ದುಬ್ಳೊ ಗಿರೆಸ್ತಾಚ್ಯಾ ಘರಾ ವೆತಾನಾ ಆಸ್ಚೊ ಖಾಲ್ತೆಪಣಾಚೊ ಭಾವ್ ತಾಚ್ಯಾ ತೊಂಡಾರ್ ಆಸ್ಲೊ.
“ಅಬ್ಬಾ, ಕಿತ್ಲೊ ಸೊಭೀತ್ ಆಸಾ” ಬಾಯ್ಲೆನ್ ಬಾಲ್ತಜಾರಾಕ್ ಘರಾ ಭಿತರ್ ಆಪಯ್ಲೆಂ. “ಅಸಲೊ ಪಿಂಜ್ರೊ ಹಾಂವೆಂ ಮ್ಹಜ್ಯಾ ಜಿಣ್ಯೆಂತ್ ಚ್ ಪಳೆಲ್ಲೊ ನಾ” ಮ್ಹಣ್ ತಿ ಉದ್ಗಾರ್ಲಿ. ಉಪ್ರಾಂತ್ ಕಿರ್ಕಿರಿ ಕರ್ಚ್ಯಾ ಜಮ್ಯಾಂಕ್ ಪಳೆವ್ನ್ ವಿರಾರ್ ಜಾವ್ನ್ “ತುಂ ತಾಕಾ ಭಿತರ್ ಹಾಡ್ನ್ ದವರ್”. ಮ್ಹಣಾಲಿ.
ಬಾಲ್ತಜಾರ್ ಮಾಂತ್ಯೆಲಾಚ್ಯಾ ಘರಾಕ್ ನವೊ ನ್ಹಯ್. ತಾಚಿ ಬರಿ ಬೂದ್ ಆನಿ ಕಾಮಾಚಿ ಶಾಥಿ ಪಳೆವ್ನ್ ಥೊಡೆ ಪಾವ್ಟಿಂ ಲ್ಹಾನ್ ಲ್ಹಾನ್ ರೂಕಾಚೆಂ ಕಾಮ್ ಕರುಂಕ್ ತಾಕಾ ಆಪಯಿಲ್ಲೆಂ ಆಸಾ. ತಸೆಂ ಜಾವ್ನ್ ತಾಕಾ ಗಿರೆಸ್ತ್ ಬಾಯ್ಲಾಂಚಿ ಚೌಕಾಸಿ ಕರ್ಚಿ ಪಾಡ್ ಸವಯ್ ಆನಿ ಚಡ್ ಉಲಂವ್ಚಾ ವಿಶಿಂ ಗೊತ್ತಾಸಾ. ತೆದ್ನಾಂ ತಾಕಾ ತಾಂಚೆರ್ ಭಿರ್ಮತ್ ಯೆತಾಲಿ. ತಸಲ್ಯಾಂಚೆ ಘರಾ ಗೆಲ್ಲ್ಯಾ ವಗ್ತಾ ಪಾಯ್ ವೊಡಿನಾಸ್ತಾಂ ತಾಚ್ಯಾನ್ ಚಲೊಂಕ್ ಜಾಯ್ನಾತ್ಲೆಂ.
“ಪೆಪೆ ಘರಾ ಆಸಾವೇ?” ತಾಣೆಂ ತಿಕಾ ವಿಚಾರ್ಲೆಂ ಪಿಂಜ್ರೊ ಮೆಜಾ ವಯ್ರ್ ದವರ್ತಾನಾ.
“ತೊ ಇಸ್ಕೊಲಾಕ್ ಗೆಲಾ. ಆನಿ ಕಿತೆಂ ಯೆಂವ್ಚೊ ವೇಳ್ ಜಾಲೊ. ಮಾಂತ್ಯೆಲ್ ನಾಂವ್ಕ್ ಗೆಲಾ” ನೀಜ್ ಗಜಾಲ್ ಕಸಲಿಗೀ ಮ್ಹಳ್ಯಾರ್ ಮಾಂತ್ಯೆಲಾಕ್ ನಾಂವ್ಚಾಕ್ ವೇಳ್ ಮೆಳೊಂಕ್ ನಾತ್‌ಲ್ಲೊ. ಭಾಯ್ರ್ ಕಿತೆಂ ಚಲ್ತಾ ಮ್ಹಣ್ ಪಳೆಂವ್ಚಿ ಆತುರಾಯ್ ತಾಚಿ. ತೊ ಕಿತ್ಲೊ ಬುದ್ವಂತ್ ಮ್ಹಳ್ಯಾರ್, ನಿದ್ಚ್ಯಾ ವಗ್ತಾ ಕಸಲೊಯ್ ಆವಾಜ್ ಜಾಲ್ಯಾರ್ ಆಪ್ಣಾಕ್ ಆಯ್ಕೊಂವ್ದಿ ಮ್ಹಣ್ ಪಂಕೊ ಸಮೇತ್ ಚಾಲು ಕರಿನಾತ್ಲೊ.
“ಕಿತೆಂ ಚಲ್ತಾಗೇ ಥೈಂ?” ನಾಣ್ಯೆಂತ್ ಥಾವ್ನ್ ತೊ ಬೊಬಾಟ್ಲೊ.
“ಕಸಲಿ ಅದ್ಭುತ್ ವಸ್ತ್! ತುಂಚ್ ಯೇವ್ನ್ ಪಳೆ.” ಮ್ಹಣಾಲಿ ಬಾಯ್ಲ್.
ಚರ್ಭಿ ಚಡ್ಲೆಲ್ಯಾ ತಾಚ್ಯಾ ಕೂಡಿರ್ ಪೂರಾ ಲೋಂವ್. ತಾಣೆಂ ನಾಣ್ಯೆಚ್ಯಾ ಜನೆಲಾಂತ್ಲ್ಯಾನ್ ಭಾಯ್ರ್ ತೀಳ್ನ್ ಪಳೆಲೆಂ.
“ಕಿತೆಂ?”
“ಪೆಪೆಚೊ ಪಿಂಜ್ರೊ” ಮ್ಹಣಾಲೊ ಬಾಲ್ತಜಾರ್.
ಮಾಂತ್ಯೆಲಾಚ್ಯೆ ಬಾಯ್ಲ್ ಘಾಬ್ರೆಲಿ.
“ಕೊಣಾಚೊ ಮ್ಹಳೆಂಯ್?”
“ಪೆಪೆಚೊ. ತಾಣೆಂ ಜಾಯ್ ಮ್ಹಣ್ ಸಾಂಗೊನ್ ಕರಯಿಲ್ಲೊ.”
ತ್ಯಾ ಘಡ್ಯೆ ಕಿತೆಂಚ್ ಜಾಲೆಂ ನಾ. ಪೂಣ್ ದುಸ್ರ್ಯಾ ಘಡ್ಯೆ ನಾಣ್ಯೆಚೆಂ ದಾರ್ ಆಪ್ಲ್ಯಾ ತೊಡಾಕ್ ರಪ್ಪ ಕರ್ನ್ ಮಾರ್ಲೆಲ್ಯಾಬರಿ ಭಗ್ಲೆಂ ಬಾಲ್ತಜಾರಾಕ್. ಮಾಂತ್ಯೆಲ್ ಚಡ್ದೆಚೆರ್ ಚ್ ಭಾಯ್ರ್ ಆಯ್ಲೊ.
“ಪೆಪೆ” ತೊ ಬೊಬಾಟ್ಲೊ.
“ತೊ ಅನಿಕೀ ಯೇಂವ್ಕ್ ನಾ” ಮ್ಹಣ್ ಬಾಯ್ಲ್ ಪುಸ್ಪುಸ್ಲಿ.
ತ್ಯಾಚ್ ವಗ್ತಾ ಪೆಪೆ ದಾರಾರ್ ದಿಸ್ಲೊ. ಸುಮಾರ್ ಬಾರಾ ವರ್ಸಾಂಚೊ ಭುರ್ಗೊ. ಅವಯ್ ಬರಿಚ್ ದೊಳೆ ಆನಿ ಖಾಲ್ತೆಂ ಮುಖಮಳ್.
“ಯೇ ಹಾಂಗಾ. ಹೊ ಕರ್ನ್ ದೀ ಮ್ಹಣ್ ತುಂವೆಂ ಸಾಂಗ್‌ಲ್ಲೆಂಯ್ವೇ?” ಪುತಾಕ್ ಬಾಪಾಯ್ನ್ ವಿಚಾರ್ಲೆಂ. ಚೆಡ್ಯಾನ್ ತಕ್ಲಿ ಬಾಗಾಯ್ಲಿ. ತಾಚ್ಯೆ ಕೇಸ್ ಧರ್ನ್ ಧರ ಧರ ವೋಡ್ನ್, ದೊಳೆ ವಾಟಾರುನ್ ಬಾಪುಯ್ ಬೊಬಾಟ್ಲೊ.
“ಉಲಯ್, ಮ್ಹಜ್ಯಾ ಸವಾಲಾಕ್ ಜಾಪ್ ದೀ” ಚೆಡ್ಯಾನ್ ತೋಂಡ್ ಉಗ್ತೆಂ ಕೆಲೆಂ ನಾ.
“ಮಾಂತ್ಯೆಲ್” ಬಾಯ್ಲ್ ಪುಸ್ಪುಸ್ಲಿ.
ಪೂತಾಕ್ ಪಯ್ಸ್ ಲೊಟುನ್ ತೊ ಬಾಲ್ತಜಾರಾ ದಿಶಿಂ ಘುಂವ್ಲೊ.
“ಮಾಫ್ ಕರ್ ಬಾಲ್ತಜಾರ್. ಪಿಂಜ್ರೊ ತಯಾರ್ ಕರ್ಚಾದಿಂ ಮ್ಹಜ್ಯೆಲಾಗಿಂ ವಿಚಾರಿಜಾಯ್ ಅಸ್ಲೆಂ. ಹ್ಯಾ ಚೆಡ್ಯಾಚೆಂ ಆಯ್ಕೊನ್ ತುಂವೆಂ ಹೊ ಕಸೊ ತಯಾರ್ ಕೆಲೊಯ್?” ಮ್ಹಣ್ ಪಿಂಜ್ರೊ ಪಳೆನಾಸ್ತಾನಾ ತಾಕಾ ಉಕಲ್ನ್ ಬಾಲ್ತಜಾರಾಕ್ ದೀವ್ನ್, “ಆತಾಂಚ್ ಹಾಕಾ ವರ್ನ್ ವಚ್. ತುಕಾ ಜಾಯ್ ಜಾಲ್ಲ್ಯಾಂಕ್ ವೀಕ್. ಫೂಣ್ ಮ್ಹಜೆಲಾಗಿಂ ವಾದ್ ಮಾಂಡಿನಾಕಾ” . ತಾಣೆಂ ಬಾಲ್ತಜಾರಾಚಿ ಪಾಟ್ ಧಾಪುಡ್ಲಿ. “ಹಾಂವೆಂ ರಾಗಿಶ್ಟ್ ಜಾಯ್ನಾಯೆ ಮ್ಹಣ್ ವ್ಹಯ್ಜಾನ್ ಸಾಂಗ್ಲಾಂ.”
ಬಾಲ್ತಜಾರ್ ಆತಾಂ ಏಕಾ ಸಂಧಿಗ್ದ್ ಪರಿಸ್ಥಿತಿಂತ್ ಶಿರ್ಕಾಲೊ. ತಾಣೆ ಚೆಡ್ಯಾಕ್ ಪಳೆಲೆಂ. ತೊ ಜಾಲ್ಯಾರೀ ದೊಳೆ ಸೊಡಿತ್ತ್, ಆಸ್ಡ್ಯೊ ಕಾಲಯ್ನಾಸ್ತಾಂ ಉಭೊ ಆಸ್ಲೊ. ಉಪ್ರಾಂತ್ ಸುಣ್ಯಾಬರಿ ಕುಂಯ್ ಕುಂಯ್ ಕರ್ನ್ ಧರ್ನಿರ್ ಲೊಳೊನ್ ಬೊಬಾಟುಂಕ್ ಲಾಗ್ಲೊ. ಬಾಪಾಯ್ನ್ ಗಣ್ಣೆಂ ಕೆಲೆಂನಾ. ಆವಯ್ನ್ ಭುಜಂವ್ಕ್ ಪಳೆಲೆಂ.
“ತಾಕಾ ಉಕಲ್ನಾಕಾ. ಧರ್ನಿಕ್ ತಕ್ಲಿ ಧಾಡಾಂವ್ದಿ. ಘಾಯ್ ಜಾಲ್ಯಾರ್ ತಾಕಾ ಮೀಟ್ ಘಾಲ್ನ್ ಲಿಂಬೊ ಪೀಳ್. ದೂಖಿನ್ ಕಿತ್ಲೆಂ ಜಾಯ್ ತಿತ್ಲೆಂ ರಡೊಂದಿ” ಮ್ಹಣ್ ಮಾಂತ್ಯೆಲ್ ಬೊಬಾಟ್ಲೊ. ಪೂಣ್ ತಿಣೆಂ ಪೂತಾಕ್ ಉಕಲ್ಚೆಂ ಪ್ರೇತನ್ ಕೆಲೆಂ.
“ತಾಕಾ ತಾಚ್ಯೆ ಇತ್ಲ್ಯಾಕ್ ಸೊಡ್ ಮ್ಹಳೆಂಮೂ. ಆಯ್ಕೊಂಕ್ ನಾವೇ ತುಕಾ?”
ಪಿಶ್ಯಾ ಸುಣ್ಯಾಕ್ ದೂಖಿನ್ ಪಿರ್ಗಾಂತಾನಾ ಪಳೆಂವ್ಚಾಬರಿ ಬಾಲ್ತಜಾರಾನ್ ತಾಕಾ ಪಳೆಲೆಂ. ಸಾಂಜೆಚಿಂ ಚಾರ್ ವರಾಂ. ತಾಚಿ ಬಾಯ್ಲ್ ಕುಜ್ನಾಂತ್ ಪರ್ನೆಂ ಪದ್ ಗಾಯಿತ್ತ್ ಪಿಯಾವ್ ಸುಟಿ ಕರ್ತಾಲಿ.
“ಪೆಪೆ”, ಮ್ಹಣಾತ್ತ್ ಹಾಸೊನ್ ಚೆಡ್ಯಾಲಾಗಿಂ ವಚುನ್ ಬಾಲ್ತಜಾರಾನ್ ಪಿಂಜ್ರೊ ಚೆಡ್ಯಾಕ್ ಒಡ್ದಾಯ್ಲೊ. ಚೆಡೊ ತೆದ್ನಾಂ ಚಕ್ಕ್ ಕರ್ನ್ ಉಟ್ಲೊ ಆನಿ ಆಪ್ಣಾಚಾಕೀ ವ್ಹಡ್ ಆಸ್ಲೆಲೊ ಪಿಂಜ್ರೊ ಪೊಟ್ಲುನ್ ಧರ್ನ್ ಕಿತೆಂ ಸಾಂಗ್ಚೆಂ ಮ್ಹಣ್ ಕಳನಾಸ್ತಾಂ ಬಾಲ್ತಜಾರಾಕ್ ಪಳೆಲಾಗ್ಲೊ. ತಾಚ್ಯಾ ದೊಳ್ಯಾಂತ್ಲ್ಯಾನ್ ಏಕ್ ಥೆಂಬೊ ಸಯ್ತ್ ಗಳ್ಳೊನಾ.
“ತುಕಾ ವರ್ನ್ ವಚ್ ಮ್ಹಣ್ ಸಾಂಗ್ಲೆಂಲೆಮೂ ಬಾಲ್ತಜಾರ್?” ಮಾಂತ್ಯೆಲ್ ಉಲಯ್ಲೊ.
“ತೊ ತಾಕಾ ಪಾಟಿಂ ದೀ ಪುತಾ” ಆವಯ್ ಮ್ಹಣಾಲಿ.
“ಹಿ ಕಸ್ಲಿ ವಡ್ ಗಜಾಲ್ ? ಸೊಡ್ ನೇ, ಹಾಂವೆಂ ಪೆಪೆಕ್ ಇನಾಮ್ ಜಾವ್ನ್ ದೀಜಾಯ್ ಮ್ಹಣ್ ಹೊ ತಯಾರ್ ಕೆಲ್ಲೊ. ಫುಂಕ್ಯಾಕ್ “ಮ್ಹಣಾತ್ತ್ ಬಾಲ್ತಜಾರ್ ಜಮ್ಯಾಕ್ ಪಾಟ್ ಕರ್ನ್ ಥೈಂ ಥಾವ್ನ್ ಚಲ್ತೆಚ್ ರಾವ್ಲೊ.
“ದಾಡ್ಡೊ ಜಾಯ್ನಾಕಾ ಬಾಲ್ತಜಾರ್”, ಮಾಂತ್ಯೆಲಾನ್ ತಾಕಾ ಆಡಾವ್ನ್ ಮ್ಹಳೆಂ. “ತುಜಿ ವಸ್ತ್ ಘೆವ್ನ್ ತುಂ ಚಲ್. ಹಾಂವ್ ತುಕಾ ಏಕ್ ಪಯ್ಸೊ ಸಯ್ತ್ ದಿಂವ್ಚೊ ನಾ. ಅಕ್ರೇಚ್ಯಾ ಪಾವ್ಟಿಂ ತುಕಾ ಸಾಂಗ್ತಾಂ, ಪೆಟ್ಯಾ ಮ್ಹಜ್ಯಾ ಪುತಾ” ಮಾಂತ್ಯೆಲ್ ಬೊಬಾಟ್ಲೊ. ತಾಚೆಂ ಮುಸ್ಕಾರ್ ಧವ್ಸೆಲ್ಲೆಂ. ದೊಳೆ ತಾಂಬ್ಶೆಲ್ಲೆ.
ಬಾರಾಕ್ ಪಾವ್ಲೆಲ್ಯಾ ಬಾಲ್ತಜಾರಾಕ್ ಥೈಂ ಅಸ್ಲೆಲ್ಯಾ ಜಮ್ಯಾನ್ ಸಂಭ್ರಮಾನ್ ಯೆವ್ಕಾರ್ ಕೆಲೊ. ಹಾಂವೆಂ ಎದೊಳ್ ಮ್ಹಣಾಸರ್ ತಯಾರ್ ಕರಿನಾತ್ಲೊಲೊ ಸೊಭೀತ್ ಪಿಂಜ್ರೊ, ಮಾಂತ್ಯೆಲಾಚ್ಯಾ ಪೂತಾಚೆಂ ರಡ್ಣೆಂ ರಾಂವಂವ್ಚಾ ಖಾತಿರ್ ದಿಲೊ ಆನಿ ಹಿ ಏಕ್ ಸಾಂಗ್ಚಾ ತಿತ್ಲಿ ವಡ್ ಗಜಾಲ್ ನ್ಹಯ್ ಮ್ಹಣ್ ತೊ ತಾಂಕಾಂ ಸಾಂಗಿಲಾಗ್ಲೊ.
“ತರ್, ತುಜ್ಯಾ ಪಿಂಜ್ರ್ಯಾಕ್ ಪಾಯ್ಶಿಂ ರುಪಯ್ ಮೆಳ್ಳೆ ಮಣ್ ಸಾಂಗ್” ಏಕ್ಲೊ ಬೊಬಾಟ್ಲೊ.
“ಪಾಂಯ್ಶಿ ನ್ಹಯ್, ಸಯ್ಶಿಂ” ಮ್ಹಣಾಲೊ ಬಾಲ್ತಜಾರ್.
“ತುಂ ಭಾಗಿ ಸಾಯ್ಬಾ. ಮಾಂತ್ಯೆಲಾ ಥಾವ್ನ್ ಆಸೆಂ ದುಡು ಕಾಣ್ಗೆಲ್ಲೊ ತುಂ ಸೊಡ್ನ್ ದುಸ್ರೊ ಸಂಸ್ರಾಂತ್ ಕೊಣ್ಂಚ್ ನಾ. ದೆಖುನ್ ಪಾರ್ಟಿ ಕರಿಜಾಯಿಚ್” ಆನ್ಯೆಕ್ಲೊ ಮ್ಹಣಾಲೊ.
ತಾಣಿ ತಾಕಾ ಏಕ್ ಬಿಯರ್ ಹಾಡಯ್ಲಿ. ಬಾಲ್ತಜಾರ್ ಏಕ್ ರೌಂಡ್ ಪಿಯೆಲೊ. ಜಿಣ್ಯೆಂತ್ ಪಯ್ಲೆಂ ಪಾವ್ಟಿಂ ತೊ ಪಿಯೆಲೊ. ಸಾಂಜ್ ಜಾತಾನಾ ಪುರ್ತೊ ಅಮಾಲಿ ಜಾಲೊ. ತ್ಯಾ ವಗ್ತಾ ತೊ ಆಪ್ಲ್ಯಾ ಏಕಾ ಅದ್ಬುತ್ ಯೋಜನಾ ವಿಶಿಂ ಉಲಯ್ಲೊ. ಸುಮಾರ್ ಹಜಾರ್ ಪಿಂಜ್ರೆ ತಯಾರ್ ಕರ್ನ್, ಹರ್ಯೆಕ್ ಸಯ್ಶಿಂ ರುಪ್ಯಾಂಕ್ ವಿಕಿಜಾಯ್, ಉಪ್ರಾಂತ್ ಲಾಖ್, ತ್ಯಾ ಉಪ್ರಾಂತ್ ಧಾ ಲಾಖ್ ಪಿಂಜ್ರೆ, ಇತ್ಯಾದಿ ಸಕ್ಕಡ್ ಬಡ್ಬಡ್ಲೊ .”ಹೆ ಗಿರೆಸ್ತ್ ಲೋಕ್ ಮೊರ್ಚಾದಿಂಚ್ ಆಮಿ ತಾಂಚ್ಯೆ ಖಾತಿರ್ ಥರಾವಳ್ ವಸ್ತು ತಯಾರ್ ಕರ್ನ್ ವಿಕಿಜಾಯ್. ” ಬಾಲ್ತಜಾರ್ ಉಲಯಿತ್ತ್ ಗೆಲೊ. ಪಿಸೊ ಬೆಬ್ದೊ. “ತಾಂಕಾಂ ಪೂರಾ ಥರಾವಳ್ ಪಿಡಾ ಆಸಾತ್. ತೆ ಪೂರಾ ವೆಗಿಂಚ್ ಮೊರ್ತಾತ್. ತಾಂಚೆರ್ ರಾಗಿಶ್ಟ್ ಜಾಂವ್ಕೀ ಜಾಯ್ನಾ” ಮ್ಹಣಾಲೊ. ಆನಿ ಬಾರಾಂತ್ ಪದಾಂ ಗಾಂವ್ಚಾ ಜೂಕ್ ಬಾಕ್ಸಾಂತ್ ನಾಣಿಂ ಘಾಲಿತ್ತ್ ಗೆಲೊ. ದೋನ್ ವರಾಂ ಪದಾಂ ಗಾಜ್ಲಿಂ.
ಥಂಯ್ಸರ್ ಆಸ್ಲೊಲೊ ಲೋಕ್ ಸಕ್ಕಡ್ ಬಾಲ್ತಜಾರಾಕ್ ಬರಿ ಭಲಾಯ್ಕಿ, ಸುಖ್ ಸಂತೊಸ್ ಆನಿ ಸಮಾಧಾನ್ ಇತ್ಯಾದಿ ಮೆಳೊಂದಿ ಮ್ಹಣ್ ಸಾಂಗೊನ್, ಆಮಿ ಸಯ್ತ್ ಅಸಲ್ಯಾ ಗಿರೆಸ್ತಾಂಚೆಂ ಮರಣ್ ಆಶೆತಾಂವ್ ಮ್ಹಣ್ ಉಲಯಿತ್ತ್ ಪಿಯೆಲೊ. ಉಪ್ರಾಂತ್ ಜೆವ್ಣಾಚೊ ವೇಳ್ ಜಾತಾನಾ ಬಾಲ್ತಜಾರಾಕ್ ಏಕ್ಲ್ಯಾಕ್ ಚ್ ಸೊಡ್ನ್ ಗೆಲೊ.
ಅರ್ಸುಲಾ ಪಿಯಾವ್ ಘಾಲ್ನ್ ಬರೆಂಚ್ ಮಾಸ್ ರಾಂದುನ್ ಘೊವಾಚಿ ವಾಟ್ ಪಳೇತ್ತ್ ರಾತಿಂ ಆಟ್ ವಾಜ್ತಾ ಮ್ಹಣಾಸರ್ ರಾಕ್ಲೆಂ. ಘೊವ್ ಸಂತೊಸಾನ್ ಪಿಯೇತ್ತ್ ಆಸಾ ಮ್ಹಣ್ ಕೊಣೆಂಗೀ ತಿಕಾ ಖಬಾರ್ ದಿಲಿ. ತೊ ಪಿಯೆಂವ್ಚೊ ತಿಣೆಂ ಕೆದಿಂಚ್ ಪಳೆಲ್ಲೆಂ ನಾ. ಮಧ್ಯಾನ್ ರಾತ್ ಜಾತಾನಾ ತಿಕಾ ನೀದ್ ಆಯ್ಲಿ.
ಬಾಲ್ತಜಾರ್ ಪರ್ಜಳ್ಚೆ ದಿವೆ, ಲ್ಹಾನ್ ಲ್ಹಾನ್ ಮೆಜಾಂ ಆಸ್ಲೆಲ್ಯಾ , ಏಕಾ ಕೂಡಾಂತ್ ಆಸಾ. ತ್ಯಾ ಏಕೆಕಾ ಮೆಜಾ ಭಂವ್ತಿಂ ಚಾರ್ ಕದೆಲಾಂ. ಲಾಗ್ಸರ್‌ಚ್ ನಾಚ್ಪಾಚೆಂ ಅಂಗಣ್. ಭಂವ್ತಿಂ ಸುಕ್ಣಿಂ ಉಭ್ತಾಲಿಂ. ತಾಚೆಂ ತೋಂಡ್ ತಾಂಬ್ಶೆಲ್ಲೆಂ. ತಾಚ್ಯಾನ್ ಏಕ್ ಮೇಟ್ ಸಯ್ತ್ ಕಾಡ್ಚಾಕ್ ಜಾಯ್ನಾತ್ಲೆಂ. ತ್ಯಾ ವಗ್ತಾ ದೊಗಾಂ ಬಾಯ್ಲಾಂ ಸಾಂಗಾತಾ ನಿದೊಂಕ್ ತಾಕಾ ಮನ್ ಜಾಲೆಂ. ಆಸ್ಲೆಲೊ ಸಕ್ಕಡ್ ದುಡು ಖರ್ಚ್ ಕೆಲ್ಲೊ ಜಾಲ್ಲ್ಯಾನ್, ಬಾಕಿಚೊ ಫಾಲ್ಯಾಂ ಯೇವ್ನ್ ಫಾರಿಕ್ ಕರ್ತಾಂ ಮ್ಹಣ್ ಹಾತಾಕ್ ಭಾಂದ್ಲೆಲೆಂ ಗಡಿಯಾಳ್ ಕಾಡ್ನ್ ತಾಣೆಂ ಅಡವ್ ದವರ್ಲೆಂ. ಉಪ್ರಾಂತ್ ರಸ್ತ್ಯಾರ್ ಲಕೊನ್ ವೆತಾನಾ ಆಪ್ಲೆ ಮೊಚೆ ಕೊಣೆಂಗೀ ಚೊರ್ಲ್ಯಾತ್ ಮ್ಹಳ್ಳೆಂ ತಾಕಾ ಕಳ್ಳೆಂ. ಪೂಣ್, ತ್ಯಾ ಘಡ್ಯೆ ತಾಚ್ಯಾ ಜಿಣ್ಯೆಚಿ ಚಡ್ ಸಂತೊಸಾಚಿ ಘಡಿ ಹೊಗ್ಡಾವ್ನ್, ಸೊಡ್ನ್ ದೀಂವ್ಕ್ ತೊ ತಯಾರ್ ನಾತ್ಲೊ.
ಸಕಾಳಿಂ ಪಾಂಚ್ ವರಾರ್ ತ್ಯಾ ವಾಟೆರ್ ಮಿಸಾಕ್ ವೆಚ್ಯಾ ಬಾಯ್ಲಾಂನಿ ತೊ ಮೆಲಾ ಮ್ಹಣ್ ಚಿಂತುನ್ ತಾಕಾ ಪಳೆಂವ್ಚೆಂ ಧಯ್ರ್ ಕೆಲೆಂ ನಾ.
■ ಮೂಳ್: ಗ್ಯಾಬ್ರಿಯಲ್ ಗಾರ್ಸಿಯಾ ಮಾರ್ಕ್ವೇಜ್. ಕೊಂಕ್ಣೆಕ್ : ಉಬ್ಬ, ಮೂಡ್‌ಬಿದ್ರಿ
2 comments