ವರ್ಸಾ ಆದಿಂ ಗಾಯನ್ ರಾವಯಿಲ್ಲೊ ʻಕೊಂಕಣ್ ಕಲಾಶ್ರಿʼ ಬಿರುದಾಂಕಿತ್ ಕ್ಲೊಡ್ ಡಿಸೋಜಾ ಹಾಚೊ ಉಡಾಸ್ ಕಾಡುನ್ ʻಹಜಾರ್ ಸಲಾಮ್ ತುಕಾ ಅಮರ್ ಕ್ಲೊಡ್ ಡಿʼಸೋಜಾʼ ಮ್ಹಳ್ಳಿ ತಾಚ್ಯಾಚ್ ಪದಾಂನಿ ವಿಣ್ಲೆಲಿ ವಿಶಿಷ್ಟ್ ಸಂಗೀತ್ ಸಾಂಜ್ ಮಂಗ್ಳುರ್ಚ್ಯಾ ಸಾಂ ಆಗ್ನೆಸ್ ಕೊಲೆಜಿಚ್ಯಾ ಶತಮಾನೋತ್ಸವ್ ಸಭಾಸಾಲಾಂತ್ ಸಾಲ್ ಭರ್ ಲೊಕಾ ಸಮೊರ್ ಪ್ರಸ್ತುತ್ ಜಾಲಿ. ಅಗೊಸ್ತಾಚೆ 15ವೆರ್ ಸಾದರ್ ಜಾಲ್ಲ್ಯಾ ಹ್ಯಾ ಸಂಗೀತ್ ಸಾಂಜೆವೆಳಾರ್ ಕ್ಲೊಡ್ ಡಿಸೋಜಾಚ್ಯಾ ಪದಾಂಚೆಂ ಪೆನ್ ಡ್ರೈವ್ ಆನಿ ತಾಂತ್ಲ್ಯಾ ಪದಾಂಚೆಂ ಪುಸ್ತಕ್ ಮೊಕ್ಳಿಕ್ ಕರ್ನ್ ಕ್ಲೊಡಾಕ್ ಮಾನ್ ಭೆಟಯ್ಲೊ.
ಮಂಗ್ಳುರಾಂತ್ಲೆಂ ಫಾಮಾದ್ ಕಲಾ ಸಂಘಟನ್ ʻಕರಾವಳ್ ಕೊಂಕಣ್ಸ್ʼ ಹಾಂಣಿ ಮಾಂಡುನ್ ಹಾಡ್ಲೆಲ್ಯಾ ಹ್ಯಾ ಕಾರ್ಯಾಕ್ ಅನಿವಾಸಿ ಭಾರತೀಯ್ ಉದ್ಯಮಿ ಎರೋಲ್ ಸ್ಯಾಮ್ಯುಯೆಲ್, ಕೊಂಕಣ್ ಮೈನಾ ಮೀನಾ ರೆಬಿಂಬಸ್; ದೈಜಿವರ್ಲ್ಡ್ ಸಂಸ್ಥಾಪಕ್ ವಾಲ್ಟರ್ ನಂದಳಿಕೆ, ಸಂಗೀತ್ ಗುರು ಜೋಯಲ್ ಪಿರೇರಾ, ಸಾಂ ಆಗ್ನೆಸ್ ಕೊಲೆಜಿಚಿ ಪ್ರಿನ್ಸಿಪಾಲ್ ಸಿ| ವೆನೆಸ್ಸಾ, ಕ್ಲೊಡ್ ಡಿʼಸೋಜಾಚಿ ಪತಿಣ್ ಶ್ರೀಮತಿ ಮಾರಿ, ಧುವೊ ಮೌಶ್ಮಿ ಆನಿ ಮೆಲಿಸ್ಸಾ, ಕರಾವಳಿ ಕೊಂಕಣ್ಸ್ ಹಾಚೊ ಅಧ್ಯಕ್ಷ್ ಲೆಸ್ಲಿ ರೇಗೊ ಹಾಜರ್ ಆಸೊನ್, ಕ್ಲೊಡ್ ಡಿಸೋಜಾಚ್ಯಾ ತಸ್ವಿರೆಕ್ ಫುಲಾಂ ಅರ್ಪುನ್ ನಮನ್ ಭೆಟಯ್ಲೊ.
ವೆದಿ ಕಾರ್ಯಾವೆಳಿಂ ಕ್ಲೊಡ್ ಡಿಸೋಜಾಚ್ಯಾ ಸರ್ವ್ ಸಂಗೀತ್ ಕಾರ್ಯಾಂಕ್ ಸಂಗೀತ್ ದಿಲ್ಲ್ಯಾ ಪಪ್ಪನ್ ಆನಿ ಕರಾವಳಿ ಕೊಂಕಣ್ಸ್ ಹಾಂಚ್ಯಾ ಸರ್ವ್ ವಿನ್ಯಾಸ್ ಆನಿ ಛಾಪ್ಯಾ ವಾವ್ರಾಂತ್ ಸಹಕಾರ್ ದಿಂವ್ಚ್ಯಾ ಜೋಕಿಮ್ ಪಿಂಟೊ ವಾಮಂಜೂರ್ ಹಾಂಕಾಂ ಫುಲಾಂ ದೀವ್ನ್ ಮಾನ್ ಕೆಲೊ.ಉಪ್ರಾಂತ್ ಕ್ಲೊಡಾಚ್ಯಾ ಸಂಗೀತ್ ಜಿಣ್ಯೆ ಪಯ್ಣಾರ್ ಸಾಂಗಾತ್, ಸಹಕಾರ್ ಆನಿ ಪಾಟಿಂಬೊ ದಿಲ್ಲೆ ಕ್ರಿಸ್ಟೋಫರ್ ಮಸ್ಕರೇನ್ಹಸ್ (ಕ್ರಿಸ್ಟಿ), ಜೋಸ್ವಿನ್ ಪಿಂಟೊ ಆನಿ ಲೆಸ್ಲಿ ರೇಗೊ ಹಾಂಕಾಂ ಕ್ಲೊಡ್ ಡಿʼಸೋಜಾಚ್ಯಾ ಕುಟ್ಮಾ ತರ್ಫೆನ್ ಶ್ರೀಮತಿ ಮಾರಿ, ಮೌಶ್ಮಿ ಆನಿ ಮೆಲಿಸ್ಸಾ ಸಂಗಿಂ ದೆರೆಬಯ್ಲ್ ಫಿರ್ಗಜಿಚೊ ವಿಗಾರ್ ಮಾ| ಬಾ| ಜೋಸೆಫ್ ಮಾರ್ಟಿಸ್, ಬೆಂದುರ್ ಫಿರ್ಗಜಿಚೊ ವಿಗಾರ್ ಮಾ| ಬಾ| ವಾಲ್ಟರ್ ಡಿʼಸೋಜಾ ತಶೆಂಚ್ ʻಸಂಪದʼ ಹಾಚೊ ನಿರ್ದೇಶಕ್ ಮಾ| ಬಾ| ರೆಜಿನಾಲ್ಡ್ ಪಿಂಟೊ ಹಾಣಿಂ ಶೊಲ್ ಪಾಂಗುರ್ನ್, ಉಡಾಸಾಚಿ ಕಾಣಿಕ್ ಅರ್ಪುನ್ ಸನ್ಮಾನ್ ಕೆಲೊ.
ಹ್ಯಾ ವೆಳಾರ್ ಉಲಯಿಲ್ಲೊ ವಿಗಾರ್ ಮಾ| ಬಾ| ಜೋಸೆಫ್ ಮಾರ್ಟಿಸ್ ʻಆಪ್ಲ್ಯಾ ಸಂಗೀತ್, ನಟನ್ ತಶೆಂಚ್ ಸಾಹಿತ್ಯ್ ದೆಣ್ಯಾಂ ಮಾರಿಫಾತ್ ಕ್ಲೊಡ್ ಡಿಸೋಜಾನ್ ಪನ್ನಾಸ್ ವರ್ಸಾಂಚ್ಯಾಕೀ ಚಡಿತ್ ಕಾಳ್ ಕೊಂಕಣ್ ಮಾಯೆಚಿ ಸೆವಾ ಕೆಲಿ ಆನಿ ಕೊಂಕಣ್ ಲೊಕಾಥಾವ್ನ್ ʻಕೊಂಕಣ್ ಕಲಾಶ್ರಿʼ ಮ್ಹಳ್ಳೆಂ ಬಿರುದ್ ಘೆವ್ನ್ ಅಮರ್ ಜಾಲೊ. ಆಜ್ ತೊ ಆಮ್ಚೆ ಮಧೆಂ ತಾಚ್ಯಾ ಪದಾಂ, ಸಾಹಿತ್ಯ್ ಆನಿ ಸಂಗೀತಾ ಮಾರಿಫಾತ್ ಹಾಜರ್ ಆಸಾ. ಅಸಲ್ಯಾ ಮಹಾನ್ ಕೊಂಕ್ಣಿ ಕಲಾಕಾರಾಕ್ ಭೋವ್ ಸಹಜ್ ಜಾಲ್ಲಿ ಶೃದ್ದಾಂಜಲಿ ಆಯೋಜನ್ ಕೆಲ್ಲ್ಯಾ ʻಕರಾವಳಿ ಕೊಂಕಣ್ಸ್ʼ ಹಾಂಕಾಂ ದಿನ್ವಾಸ್ʼ ಅಶೆಂ ಮ್ಹಣಾಲೊ. ಹೆಂ ಕಾರ್ಯೆಂ ಫಾಮಾದ್ ಕಾರ್ಯೆಂ ಚಲಯ್ಣಾರ್ ಡೊಲ್ಫಿ ಸಲ್ಡಾನ್ಹಾ ಹಾಣೆ ಚಲವ್ನ್ ವ್ಹೆಲೆಂ. ʻಕರಾವಳಿ ಕೊಂಕಣ್ಸ್ʼ ಹಾಚೊ ಆದ್ಲೊ ಕಾರ್ಯದರ್ಶಿ, ಆತಾಂ ಸಾಂದೊ ರಾನ್ಸಮ್ ಸಲ್ಡಾನ್ಹಾನ್ ಧನ್ಯವಾದ್ ಸಮರ್ಪಣ್ ಕೆಲೆಂ.
ತ್ಯಾ ಉಪ್ರಾಂತ್ ಪ್ರಸ್ತುತ್ ಜಾಲ್ಲ್ಯಾ ಸಂಗೀತ್ ಸಾಂಜೆಚೆಂ ಸುಂಕಾಣ್ ಫಾಮಾದ್ ಕಾರ್ಯೆಂ ನಿರ್ವಾಹಕ್ ತಶೆಂಚ್ ʻಕರಾವಳಿ ಕೊಂಕಣ್ಸ್ʼ ಹಾಚೊ ಅಧ್ಯಕ್ಷ್ ಲೆಸ್ಲಿ ರೇಗೊನ್ ಘೆತ್ಲ್ಲೆಂ. ಲೆಸ್ಲಿಚ್ಯಾ ಘಣ್ಘಣಿತ್ ತಶೆಂ ಮನಾಕರ್ಶಿಕ್ ಉತ್ರಾಂ ಸವೆಂ ಸಂಗೀತ್ ಸಾಂಜ್ ಪ್ರಸ್ತುತ್ ಜಾಲಿ. ಹ್ಯಾ ಸಂಗೀತ್ ಕಾರ್ಯಾವಳಿಂತ್ ಕ್ಲೊಡ್ ಡಿʼಸೋಜಾಚಿಂ ಭೋವ್‌ಚ್ ಲೊಕಾಮೊಗಾಳ್ 15 ವಿಂಚ್ಣಾರ್ ಪದಾಂ ರೊನಿ ಡಿʼಕುನ್ಹಾ, ಗಾಲ್ಡಿನ್ ಡಿʼಸೋಜ, ಡೊ| ಮುಸ್ತಾಫಾ, ಆಲ್ವಿನ್ ನೊರೊನ್ಹಾ, ಕಿರಣ್ ಮಿನೇಜಸ್, ಆಶಾ ಮಿನೇಜಸ್, ಜೊಯೆಲ್ ಡಿʼಸೋಜ, ರಾನ್ಸಮ್ ಸಲ್ಡಾನ್ಹಾ, ಬಬಿತಾ ಪಿಂಟೊ, ಶಾಲನ್ ಪಿಂಟೊ, ಶಾಂತಿ ಪಿಂಟೊ, ಬಿಂದು ಕುಟಿನ್ಹಾ, ವಿವಿನಾ ಡಿʼಸೋಜ, ಶೆರಿಲ್ ತಾವ್ರೊ, ಮುನಿಟ ವೇಗಸ್, ಬ್ಲೊಸಮ್ ರೇಗೊ ಹಾಂಣಿ, ಫಾಮಾದ್ ಸಂಗೀತ್ ನಿರ್ದೇಶಕ್ ಜೊಡಿ ʻಪಪ್ಪನ್-ಜೊಸ್ವಿನ್ʼ ಹಾಂಚ್ಯಾ ಮನಾಂ ಧಲಂವ್ಚ್ಯಾ ಸಂಗೀತಾ ಸಂಗಿಂ ಪ್ರಸ್ತುತ್ ಕೆಲಿಂ. ಭಾಂಗ್ರಾಳ್ಯಾ ತಾಳ್ಯಾಚೊ ಗಾವ್ಪಿ ಐವನ್ ಡಿಸೋಜಾ ಹಾಣೆ ಗಾವುನ್, ಫಾಮಾದ್ ನಟ್ ಜೊಸ್ಸಿ ರೇಗೊ ಆನಿ ಪ್ರಶಸ್ತಿ ವಿಜೇತ್ ನಾಚ್ಪಿಣ್ ರೆಮೊನಾ ಇವೆಟ್ ಪಿರೇರಾನ್ ನಟನ್ ಕರ್ನ್ ಪ್ರಸ್ತುತ್ ಕೆಲ್ಲೆಂ ಕ್ಲೊಡ್ ಡಿʼಸೋಜಾಚೆಂ ಭೋವ್‌ಚ್ ಸಿಂತಿಮೆಂತಾಳ್ ಪದ್ ʻಧುವೆ ಮ್ಹಜ್ಯೆʼ ಜಮ್ಲೆಲ್ಯಾ ಸಂಗೀತ್ ಪ್ರೇಮಿಂಚ್ಯಾ ದೊಳ್ಯಾಂನಿ ದುಖಾಂ ಹಾಡುಂಕ್ ಪಾವ್ಲೆಂ.
ಸಂಗೀತ್ ಪಂಗ್ಡಾಂತ್ ಶಬ್ಬೀರ್ ದಾಸ್ (ತಬಲಾ ಆನಿ ಧೋಲಕ್), ಗಣೇಶ್ (ರಿದಮ್ ಪ್ಯಾಡ್), ಆಶಿತ್ ಪಿಂಟೊ (ಬಾಸ್ ಗಿಟಾರ್), ರೂಬೆನ್ ಮಚಾದೊ (ಪಿರ್ಲುಕ್ ಆನಿ ಸ್ಯಾಕ್ಸೋಫೋನ್), ನೈಝಿಲ್ (ಟ್ರಂಪೆಟ್) ಆನಿ ಶಾಜು (ಪಿಟೀಲ್) ಹಾಂಣಿ ಸಾಂಗಾತ್ ದಿಲೊ. ಕು| ರೆಮೊನಾ ಪಿರೇರಾ ಹಿಚ್ಯಾ ಶೋ ಸ್ನ್ಯಾಚರ್ಸ್ ಪಂಗ್ಡಾಚೊ ಆಕರ್ಶಿಕ್ ನಾಚ್, ತಶೆಂಚ್ ಲೆಸ್ಲಿ ರೇಗೊ ಆನಿ ಡೊಲ್ಲ ಹಾಂಚಿಂ ಫೋಕಣಾಂ ಜಮ್‌ಲ್ಲ್ಯಾ ಪ್ರೇಕ್ಷಕಾಂಕ್ ಸಂಪೂರ್ಣ್ ಮನೋರಂಜನ್ ದೀಂವ್ಕ್ ಪಾವ್ಲಿಂ.
ಕ್ರಿಸ್ ಇಲೆಕ್ಟ್ರೋನಿಕ್ಸ್ ಹಾಂಚೊ ಆವಾಜ್, ರೋಸ್ ಎರೆಂಜರ್ಸ್ ಹಾಂಚಿ ವೆದಿ ಆನಿ ಅರುಣ್ ಡಿಸೋಜಾ ಹಾಂಚೊ ಉಜ್ವಾಡ್ ಹ್ಯಾ ಸಂಗೀತ್ ಸಾಂಜೆಕ್ ವೈಭವ್ ದೀಂವ್ಕ್ ಪಾವ್ಲೊ.