■ Transliterated using KONKANVERTER ■  

एपरील म्हयन्याच्या २९, ३० आनी माय ०१ तारिकेर कार्वार च्या सदाशिवघडांत अखील भारतीय कोंकणी परिषदेचें विसावें अखील भारतीय कोंकणी सम्मेळन घडोन आयिल्लें. मालघडी लेककी मीना काकोडकर हिणें आदलो अध्यक्ष रमेश वेळुसकार हांचे थावन एपरील २९ तार्केर सांजेर जाल्ल्या उग्तावणे सुवाळ्यार अध्यक्ष पद्वेचीं सूत्रां हातीं घेतलीं. पाटल्या वर्सांनी जाल्ल्या वीस सम्मेळनांनी मीनाबाय फकत दुस्री स्त्री अध्यक्षीण. पयली बाय शीला कोळंबकर. ह्या काऱ्याक नामणेचो हिंदी लेकक डो. गिरिराज किशोर उग्तावपी जावन आयिल्लो. पूण ताच्या नांवा तेकीद ताणे कसलो संदेश यी दिलोना. पूण मीनाबायेन आपुरबायेन तयारी कर्न २७ पानांचें अध्यक्षीय भाषण बरवन हाडुल्लें आनी तें तिणें हटाक पडोन म्हळ्ळेपरीं वाचलें. तिचें भाषण लांबलेलें पळेवन  वेदी वयल्या एका मुकेल सयऱ्याकी धरून जायते उटोन गेले तरी तिच्या भाषणांत गर्जेचे आनी महत्वाचे जायते विशय आसले. पूण  ते लांबंवच्या बदलाक थोडे मटवे कऱ्येते. दूसऱ्या दिसा सकाळिंचो पयलो परिसंवाद जाल्लोच चायेच्या वेळार  हांवे आनी मीनाबायेन माडामुळांत बसोन थोड्यो गजाली उलोवन काडल्यो. तांतले  कांय विचार हांगा आसात :

तुमी आपल्या अध्यक्षीय भाषणांत सांगलें सम्मेळनां लोकाक एकटांय कर्तात. पूण तुमी तुमच्या भाषणांत रोमी लिपियेगारां विश्यांत उलयताना थोडे उटोन भायर गेल्ले पळयताना सम्मेळनां वांटे कर्तात  गी म्हण दुबाव जालो….

ना, हो  फ्याकट  आनी  हो फ्याकट जो आसा न्हंय गी आमकां गोंयांत बोव च महत्वाचो. आनी हो प्रश्न आसा न्हंय  कोंकणी भुर्ग्यांच्या शिक्षणाचो,  भुर्ग्यांक आवय भाषेंत च  भुर्ग्यांक मुळावें शिक्षण दिंवचो , शिक्षण सिद्दांता वयर बांदून हाडला आनी इंगलिशा पाटल्यान वेतेल्यांक हाची खबर ना. पयलें ताणी रोमी रोमी म्हण सुरू केलें आनी आतां इंगलिशा पाटल्यान गेले. रोमी मुकार दवर्न सर्काराचें अनुदान माग्तेल्यांक  आज कोंकणीच नाका.  आवय भास सोडन हेर भाषेंत मुळावें शिक्षण दिल्यार आमची संसकृती कशी उर्तेली?  आतां कितें जालां म्हळ्यार घरांनी  सयत कोंकणी ना. गोंयांत लोक आतां फकत इंगलीश च उलयता. आनी आतां हें फकत क्रिसतांव मात्र  करिनांत. गोंयांत हिंदू घरांनी सयत इंगलीश भास आनी संसकृती रिगल्या. जात मत भेद नासताना घरा घरांनी हातून बितून तीच पर्की संसकृती वयर पडल्या. हाचे वर्वीं कोंकणी भास कितली पिडद्यार जाल्या म्हळ्यार जरी आमी सांगलें सत्यान्नोव भुर्ग्यांक खबर ना कितें सत्यान्नोव तें. बुद्वार म्हळ्यार, बुद्वार कोण ? म्हण विचार्तात. दिसाचें नांव म्हण सयत कळीत ना. ही संसकृती घेवन आनी कित्तून पाव्येत ? सोड्यां ह्या भुर्ग्यांचें इंगलीश तरी सार्कें आसा ? ना . तांचे प्रास कोंकणी मराठेंत शीक‍ल्ल्या आमचें इंगलीश बरें आसा. आमी कांय मराठेक विरोद न्हय. पयलें मराठी –  कोंकणी थोडे अभिपराय भेद आसले.  कोंकणी आनी मराठी म्हणटाना आमची प्राथमिकता कोंकणेक. कोंकणेंत जांव मराठेंत मुळावें शिक्षण घेतुल्ल्यान आमची संसकृती उर्ता. थोडे असो वाद मांडतात कोंकणेंत शिकोन फकत बोटलेर मात्र जाव्येत. म्हळ्यार कोंकणेंत मुळावें शिकप जोडल्यार पोट भरुंक जायना. अशें न्हंय.  म्हजो स्वताचो चलो जो मुळावें शिक्षण  कोंकणेंत घेतलोलो आज  कंप्यूटर इंजिनियर जाला आनी  स्टेटसांत आसा. ताका कामांत आनी व्हेवारांत आज खंयचीय अडकळ ना. म्हजो अन्येक चलो तवळ कोंकणी सोय नातुल्ल्यान इंगलिषांत मुळावें शिकप  शिकलो आनी म्हाका दोगांच्या शिकपांतलो फरक समजुंक  येता.

सार्कें, जर आवयची भास ‍च इंगलीश, आवयक च कोंकणी वा मराठी येना आनी तांच्या घरांत कोंकणी ना तर ?

 नो प्रोबलेम. तुमकां मसतू इंगलीश इसकोलां आसात न्हंय, तुमी तुमच्या भुर्ग्यांक इंगलीश इसकोलाक घाला न्हंय? कोण आडायता? आमचें कसलेंच ओबजेक्षन ना. पूण सर्काराचें गऱ्यांट विचारिनाकात. तुमकां गऱ्यांट दिल्यार आमच्या कोंकणी इसकोलांक अन्याय जाता. तुमच्या भुर्ग्यांक इंगलिशांत मुळावें शिक्षण दिंवचें वा सोडचें तुमचें प्रश्न. आमी घालिनाकात म्हण सांगिनांव. तुमच्या भुर्ग्याचो फुडार कसो घडोवपाचो तें  तुमच्या  हातांत आसा. देकून तुमी विचार करून तुमच्या भुर्ग्याचें मुळाव्या शिक्षणाचें माध्यम विंचा. तुमकां जर तुमच्या भुर्ग्याचो विकास जावंक नाका तुमी तांका पर्की भाशेन मुळावें शिक्षण दिया. जरी तरी भुर्ग्याच्या मुळाव्या शिक्षणाची भास आवय भास न्हंय तर सगळो शिकपा प्रोसेस तांका कठीण जातोलो. इतलें कळ्ळ्या उपरांती तुमकां तुमच्या भुर्ग्यांक इंगलिशांत ‍च मुळावें शिक्षण दीवंक आसा, खंडीत तुमी दियात. पूण हांवें आदीं सांगलें न्हंय, दयाकरून सर्कारा थावन गऱ्यांट विचारिनाकात. एकादवेळा गऱ्यांट दिल्यार कितें जाता म्हळ्यार, समाजेंत जो बारीक लोक आसा आनी तांका हें कांय कळना कित्याक तांची चिंत्पा प्रक्रिया वेगळी आसा. ते चिंत्तात आनी चुर्चुर्तात ,  होय  आमी आमच्या भुर्ग्यांक इंगलिशांत बरें शिकप दिलें ना न्हंय ? आनी तेयी आपल्या भुर्ग्यांक इंगलीश शाळांक दाडतात.  मागीर कितें जाता ? तांतलीं थोडीं भुर्गीं मात्र मुकार शिक्तात , हेर शिकप च अर्द्यार‍ च रावयतात. ड्रोप अवट. मागीर हांगायी ना, थंय यी ना, खंय यी ना. देकून तुमची आवय भास इंगलीश  म्हण तुमी चिंत्तात तर  आनी  तुमच्या भुर्ग्यांक  इंगलिशांत मुळावें शिक्षण दीवंक आसा तर , खुशेन दिया. पूण गऱ्यांट विचारिनाकात. तितलेंच.

आतां गोंया भितर हो एक पोलिटिकल प्रश्न जाला सो दिसता  ….

ना, ना हो पोलिटिकल प्रश्न न्हयंच. तुमी जरी मुळाव्या शिक्षणाचें सिद्धांताच्या गुंडायेक वचोन सोदल्यारी, भुर्ग्याक मुळावें शिक्षण आवय भाषेंत च दीजे म्हळ्ळो विचार स्पश्ट दिसता. आतां हो प्रश्न खंय अयलो जाणांत? आतांता,  पयलें हे सगळे चर्चा भाषेच्या निषटेन जाताले आतां हांतूय राजकारण भितर सरलां.  देकून‍ंच म्हज्या अध्यक्षीय भाषणांत हो इश्यू हांवे जाय म्हण काडलो. म्हका खबर असली  हांवे अशें उलयल्यार थोड्यांक तरी लाग्ता म्हण . पूण एक बरवपी जावन म्हाका सगळें लाग्ता आनी म्हाका कोंकणी भुर्ग्यांच्या फुडाराची फिकीर आसा. ही गजाल हांवे सांगाना जाल्यार म्हाकाच  अन्याय केल्लेपरीं जातो.  एका बरवप्याक सगळे गजाली लाग्तात आनी लागाजे. रसत्या वयलीं कुत्रीं सयत.  हांव एक बरवपीण आनी हांव आनी म्हजो नोवरो वाटसूऱ्या कूतऱ्यांचीं जतन घेंवचो एक एन जी ओ संसत्या खातीर काम कर्तांव. देकून म्हज्या साहित्यांत चड आनी चड मोनजाती येतात कित्याक म्हळ्यार  भुर्ग्यांथंय मोनजाती मोग वाडंवच्या दिशेन ल्हान शी जागृती हाडुंक. म्हज्या मता पर्माणे हरेका घरांत एक माजार वा कुत्रें कितें तरी मोनजात आसोंक जाय. आमचे मधें एक मानसिकता आसा , भुर्ग्यांनी कूतऱ्यां लागीं गेल्यार म्हणटांव  शी शी शी हात लावूनाका! भुर्ग्यांच्या वाडावळेचेर ही मानसिकता परिणाम कर्ता.देकून‍ंच हांवे काल गीता धर्मराजनाची विशय सांगली म्हज्या भाषणांत. ती एक बरवपीण , स्कोलर आनी कथा म्हळ्ळी एक संस्था चलयता थंय. तिका दिल्लिंत युपी राजस्थानाचे खूब बाळ कामगार दिश्टीक पडले. तिणें चिंतलें ह्या भुर्ग्यांक शिकप दिव्यां. पूण तांका जर ती शिकवंक घेतेली  हांच्या जोडिचेर जियेंवचे तांचे आवयो उपाशीं पडटेल्यो. हो विचार केल्ल्या तिणें  त्या   आवयांक च शिकप दिलें आनी आपल्या हक्कां खातीर झगडपचें  समाजीक न्याया कातीर कशें कसो अवाज उटंवचो म्हण शिकयलें. अशें तिणें चडुणें नोवोद हजार बायलांक शिक्षीत केलें. सगळीं रसत्या वयलीं. आनी तिचें हें काम पळेवन दिल्ली सर्कारान तिका तिहार जयला भितरल्या बायलांक शिकवंक आपयलें. आनी थंय तिणें पळयलें अमायेन , निर्दोश बायलो , फटकिरे केजी थापून जयलांत घालां. कित्याक ? हांची आसत बळिषट नातेवयतिकांनी हडप कर्च्या खातीर.  आनी त्या बायलांक सगळ्यांनी सोडन घाल्लें. तांचे विश्यांत अवाज उटयतोल कोण ना. तांचे सांगाता तांची नेंटुलीं भुर्गीं सयत आसलीं. आनी  थंय तिणे साहित्याचो उपेग केलो आनी तांका एकेक च काणियो वाचून सांगल्यो आनी हळटार ह्या बायलांचो जिण्ये विश्यांतलो नकारात्मक मनोभाव बदलोंक सुरू जालो. चार वोणदी बितर जिणेंच संपलें  म्हण्णेल्यांचो जिण्ये दिश्टावो च बदाल्लो. आनी ताणी तांचेंच काणियो बरवंक धरल्यो आनी कोणाक बरवंक येना ताणी रेकोर्ड करुंक धरले.तांत्या थोड्या कृतियांनी जानपद गूण असले.  गीता धर्मराजनान साहित्याचो असो उपेग केलो. देकून हांव कितें म्हणटां म्हळ्यार साहित्य म्हळ्यार साहित्याक कसलेच मिती नांत आनी आसोंक यी  नजो. अमकां बरवप्यांक  सगळे गजाली लागजेच. आनी एका बरवप्यान सगळ्या गजालीं विश्यांत बरयजे. देकून हांव जरी रोमी लिपियेंगारां विश्यांत उलयलीं तरी तें हांगा अपरसतूत कांय न्हय. आनी हांवे तशें उलयिल्ल्यान कांय सम्मेळन वांटे जाता म्हण हांव चिंतिना. म्हजी भास आनी आमच्या भुर्ग्यांचो फुडार हे विशीं उलंवचो आनी प्रतिपादन कर्चो कायदो म्हाका बांदता.

तुमी काल दुस्रो झूज सुरू जाला म्हळें न्हय गी होच गी तो झूज कितें ? 

व्हय. होच तो. पयलें झूज आमचे मालघडे कोंकणेक मऱ्याद मेळचे खातीर झुजले आनी हें दुस्रें झूज आमी इंगलिषा विरोध झुजाजे जालां.  इंगलीष आज फकत  कोंकणी मात न्हय मराठी तसल्या हेर प्रादेशीक भासांकी गिळटे आसा. हांव खंडीत म्हणाना इंगलीष एक पाड भास. ती आयची गर्ज आनी आमी सगळ्यांनी ती शिकजेच. इंगलिषा थावन जायतें बरेंपण जाता. पूण कोणाक जागो कितलो दिवपाचो हो प्रश्न. आनी आयच्या कोन्वेंट इसकोलाच्य  भुर्ग्यांचें इंगलीश तरी कसलें बाबा ? ऐ याम कमिंग टू  क्याच युवर बेबी. क्याच करुंक कसलें बोल कितें  तो ? असलें इंगलीष उलयतात. आमकां तांका सार्कें करिजे पडटा.  हांव च सात्वे पऱ्यांत मराठेंत शिकलेलीं आनी म्हजें इंगलीष हाचे प्रास कितलेंगी बरें आसा. देकून हांव म्हणटां : मुळावें शिक्षण आवय भाषेंत च घेतल्यार बरें.

तुमी काल कोंकणी साहित्यान आपली प्रादेशिकता उरवन घेजे म्हण सांगलेंगी , मेरो उत्रजे म्हळें ? 

ना ना हांवे आमच्या साहित्यांत प्रादेशिकता उरवन घेजे म्हण सांगोंक ना. आमच्या साहित्यान प्रादेशीक शिमो उत्रोन पावल्यांव म्हण हांवे म्हळें.  आनी ह्या संदर्भार अंतराषटीय पांवड्यार पाव‍ल्ल्या महाभलेश्वर सयल हाच्या पल्तडिचो मनीस फिल्माचो उल्लेक केलो.आनी पुंडलीक बाबाचे पचतीस वर्सां पाटीं बरयिल्ले नाटक आतां ,  मराठिंत रुपांतर जाल्यात आनी ह्या नाटकांक मराठी मांचियेर पयलो म्हान मेळ्ळा म्हळें.  हें कितें दाकयता म्हळ्यार , काळाच्या पासळेंत सयत आमचें साहीत बंदी ना. एज बार्ड , हें धा वर्सां पयलेंचें ,अशें न्हय. सदां समकाळीन.

पूण एका तेंपार मराठी थावन‍ंच कोंकणेक अन्याय जाल्लो म्हण सांगचें आयकालां हांवें . .

 ना ना अन्याय जाला तर तो कांय पुसून काडुंक ना .एका तेंपार तेण आशिल्लें. आमच्या कोंकणी भाषेक साहित्य अकाडेमीन मान्यता दिवपाक ताणी विरोद केल्लो. गोंयांत कोंकणिराज भास जातानांय मराठेवर्वीं त्रास जाल्ले खरें. अबिपराय भेद आतांयी आसोंक पुरो. सुर्वातेच्या कोंकणो चळवळेच्या संदर्भार कोंकणी एक  भास च न्हय म्हण ते प्रचार कर्ताले. पूण गोंयांत  क्रमेण कितें जालें म्हळ्यार बापूय मराठी पुरसक्रत आसलो तर ताची भुर्गीं कोंकणी पुरसक्रत जालो.आतां जायते मराठी कोंकणी जाल्यात. आतां कोंकणेचींय खूब शाळां जाल्यांत , भाषेची प्रगती जाल्या. पूण आमी फकत आनी फकत कोंकणी कोंकणी म्हण संकुचीत उर्चें न्हय. प्रादेशिकतेचे मिती उत्रोन वचजे. रुपांतरा बाबतीन सांगचें जाल्यार , ह्या गजालिंक आनी ताका कांय संबंद ना.

काल तुमी समाजेंतल्या भ्रषटाचारा विश्यांत उलयल्यात. पूण प्रशसती , पुरसकारां खातीर साहितीक वर्तुलांत चलोन आसच्या भृषटाचारा विश्यांत कितें ?

हो हो हो ( हासो ) म्हाका ते विश्यांत कांय सांगोंक नाका. हांव खंयच्यायी डिटेयलांक वचना. ही फकत चिकल उडंवचो खेळ. अन्येक्याचेर चिकल फेक करून कोण आपलें पोजिषन व्हड करून घेतां म्हळ्यार कशें ? पूण आतांता कोंकणेंत आनी पेपरांनी चल्लां. हें खंडीत सार्कें न्हय. हांव कितें म्हणटां जाणांय , तुमचे मधें कितले अभिपराय बेध आसल्यारी बसोन उलवन सेटल करा. हांगा – अन्येक गजाल आसा , जें आमी बरयताना आमकां जी अभिपराय असता वाचकान आमचें बरप वाचून तीच अभिपरायेक येजे अशें केन्नांच नासता. वाचक ताणें वाच्च्या बर्पा विश्यांत  कसलेय अभिपरायेक येवंक  स्वतंत्र. एक दाकलो दिंवचो तर हांव कांय बारा तेरा वर्सांची आसताना आमच्या घरांत ल्हानपणाथावन म्हाका सांगात दीवन आमच्या घरांतल्या एका मालघड्या बायले विश्यांत हांवे एक कविता बरयली, मराठिंत.  म्हज्या आनी त्या बायलेच्या मोगा मायपासा विश्यांत.  म्हज्या आवयक म्हज्या बर्पाचेर कूब गवरव आसलो.  ती म्हज्या आवयन म्हज्या मावळ्याक दाकयली. ताणे ती एक मोगाची कविता म्हण म्हाका अशे गोवजी केल्योगी , हांव घाबरलीं. आनी ते दिसा थावन आज पऱ्यांत हांवे मोगा विश्यांत बरवंक ना. म्हज्या साहित्यांत तुमकां लव स्टोरी मेळची ना. कारण ती भितर थावन येना.

म्हजें शीदा सवाल आसा ,  एवार्ड दिताना फिक्सिंग चल्ता ?  ना ?

तें आसा आनी चल्ते आसा. पूण म्हजी गजाल कितें म्हळ्यार हांव सदांच कुशीन रावतां.

कुशीन रावल्यार चुकारी मार ल्लेपरीं  जायना ? एक बरवपी जावन ह्या गजालिंत आमची जवाब्दारी कितें? 

जवाब्दारी . . . आसात थोडे निदर्शनां कर्तेले, सम्मेळनां चल्चेकडे येवन यी ते निदर्शनां कर्तीत . पूण तांचे इरादे साहितीक न्हय म्हण आमी समजाजे. तांचे इरादे वेगळेच आसतात.  हांवे हें सगळें वाचलां. हे विश्यांत आयलेवार एका पत्रान म्हाका विचारलें तुमचो मत कितें? हांवे सांगलें म्हजे कांयच कमेंटस नांत. पूण हांव एक उतर पर्त्यान  सांग्तां : ह्या लोकाचो इरादो साहितीक ना.

तुमी काल भाषणांत म्हळें : एका साहितीन फकत एक बरवपी मात जावन उरानाये ? एका बरवप्यान कांय आसल्यारी बरवन आपली जवाब्दारी पाळ्येत शिवाय समाजेंत हेर कितें कऱ्येत ?

हांगा हांव एक गजाल सांग्तां तुमकां. गणीत म्हण हांवे एक लेक बरयिल्लो. तो म्हज्या शब्दसूर बुकांत अयला. तांतू कितें जाता म्हळ्यार , जांट्या जातिचे हाल आसात. आज काल आवय बापय  भुर्ग्यांक जड जावपाक लागल्यांत. भुर्ग्यांक तीं आतां तांच्या घरांत नाकात. आवय बापयनीं भुर्ग्यांक केल्लें सगळें भुर्गीं विस्रून वेतात आनी तांका वरून वृद्दाश्रमाक पावयतात. थंय सगळ्यो सवलत्यो आसोंक पुरो पूण भावनेचें कितें ? तांका कांय आपल्या नात्रांचों उडास आयलो आनी नात्रां  सांगाता खेळाजे म्हण भोगलें , तांका थंय हें मेळटा कितें ? समाजेंतले  असले गजाली म्हाका तरी खूब अस्वस्थ कर्तात आनी प्रतेक थरान ही गजाल आनी हांवे हेच विशीं एक लेक बरयलें गणीत  तांतू अशें बरयलें की आतां दोन आनी दोन चार हें गणीत न्हय प्रतेक जन आपणाक जाय तशें गणीत माग्ता आनी आपलें गणीत आपूण‍ंच कर्ता.  हें वाचून आपल्या आवयक तिची आसत सगळी भितर घालन तिका आश्रमाक सोडून आयिल्ल्या एका मानेसतान म्हाका वकीलाचें नोटीस सोडलें.  पूण हांवे म्हज्या गणीत बर्पांत फकत  एका असहायक आवयचें मात्र चित्रण केल्लें आनी थोडे विचार वाचप्यां समोर दवरिल्ले. तितलेंच.  ताचो वाद आसलो म्हजें गणीत बरप वाचून एका दिसा ताका वीस फोन कोलां आयलीं खंय आनी ताची बेइज्जदी जाली खंय.  हांव म्हणटां : हांवे कांय म्हज्या बर्पांत त्या मानेसताच्या नांवाचो उल्लेक करूंक ना. असलीं कितलिंगी घडितां समाजेंत घडटात. पूण म्हजें बरप वाचून वाचप्यानी ताका फोनां करिजे तर ताणें केल्ल्याची खबर सगळ्यांक आसा म्हण जालें. तर साहीत जागंवचें काम कर्ता म्हण खंडीत  जालें. पूण जातां कितें म्हळ्यार , असले समाजीक इश्श्यू घेवन बरयताना ते कोणाक तरी लाग्तात आनी बरयिल्ल्यांक , तें फायस केल्ल्या पत्रांक  नोटिसां येतात. ज्या पत्रान म्हजें बरप फायस केल्लें तांकांयी नोटीस आयिल्लें. पूण म्हज्या वकीलान दिल्ली जाप वाचून हो मनीस थंड जालो. आज यी  हांव समाजेंत असलीं घडितां घडल्यार अस्वस्थ जाता आनी बरयतां.

समीक्षे विश्यांत काल तुमी भाषणांत म्हळें – समीक्षा फकत पोसिटीव आसोंक जाय. अशें कित्याक ?

समीक्षे विश्यांत उलयताना म्हका म्हजो मामा उडास येता. ताणे हांवे बारा वर्सां पिरायेर बरयिल्ल्या कवितेची अशी समीक्षा केली गी ते उपरांत हांवे मोगा विश्यांत बरंवचेंच सोडलें. तशें थोडे बोव क्रूड बरयतात. हांव म्हणाना समीक्षा नाका. पूण ती कशी आसजे म्हळ्यार साक्री मेळांत गुटलावन दिंवच्या कोडू गुळिये परीं. तांचेर ताचो परिणाम जरूर जायजे. पूण  कितें आसा , डिसकरेज कर्पाक नाका. नव्यांक थोड्यांक आशा आसता फकत बूक पर्गटिजे म्हण , पूण तसल्यांनी आम्सोर कर्चो न्हय , म्हजे तसल्या कांय मालघड्यांक बरयिल्लें दाकंवचें आनी मार्गदर्शन घेंवचें. थोडें हाळवायेन चला.अनिकी थोडें वाचा. बरयनाका अशें न्हय. कारण कितें आसा म्हळ्यार जिण्येची वाट चल्ता चल्ताना मेचुरिटी येता. सवकास तुमी चमकल्यार तुमी शिक्तेल्यात. आतां म्हजोच दाकलो घेंवचो तर हांवे तेन्नां बरयलेली कविता वा काणियो आतां पळेयल्यार म्हाका भोग्ता , अरे , हांवे हेंय बरयिल्लें ? देकून हांवे तर्न्यांक म्हणचें आम्सोर करिनाकात. बरंवचें रावय नाकात . मार्गदर्शन घेया. आमचे मधें जाणटे आसात. ते तुमकां सार्की वाट दाकयताली.

आयलेवार कोंकणेंती फेस बूक साहित्य उबजलां , हें कोंकणेच्या वाडावळेक कशें रावत ?

होय ,   जें बरें आसा तें ठिक्तेलें आनी खंयच्यांत तांक ना तें मोर्तेलें. आतां कितें जालां म्हळ्यार – हें सगळें रिमिक्स साहित्य. जशें पर्नीं हिंदी पदां आतांयी आयकाताना आमच्या मतीक उल्लास जाता.  आयकोव्यां म्हण भोग्ता. तीं आमच्या उडासांत उर्तात.  आतांचें पदां सगळीं  डं डं चीक चीक कितें ठिक्तेलीं ? फकत दोन दीस.  कशें हीं पदां उरनांत तशें हेंयी उराशें ना. हांगा  अन्येक गजाल आसा. व्हड अपायाची आनी म्हाका बोव वायट दिसची. हे भुर्गे नांव जोडच्या आशेन कितें कर्तात जाणा ? दूसऱ्या कोणाचिगी पर्नी कविता आसा न्हय ती आसा तशी उकलन हाडटात आनी आपल्या नांवान फायस कर्तात. चोरी.  थोडे पावटीं कितें जाता म्हळ्यार आमी खंय एका स्पर्द्याक जडज म्हण वेतांव आनी आमचीच कविता हीं भुर्गीं तांची म्हण वेदीर वाचतात . हें म्हाका काल सांगोंक विसरलें. फेस बुकारी अशेंच जाता.

तरी तुमी म्हणटात साक्री मेलांत गुळी दिया! तशें दिल्यार फकत साक्रिचें मेल लेंवोन गुळी काडन उडयतीत. आसों. तुमी म्हळें एक भास आनी एक लिपी. असल्या धोर‍णान एकवट घडटलो वा वांटे जाताले ?

आतांचीं भुर्गीं आसात पळेया , जीं गोंयांत तरी देव नागरी लिप्येंत कोंकणी शिक्तात , आमकां हिंदी आसा म्हणोन कांय लिपी कश्ट जायना. आतां जेस फेर्नांडीस ताचो बूक नागरिंत काडलो आनी ताका साहित्य अकाडेमिचो पुरसकार मेळ्ळो.आतां कितें जालां म्हळ्यार तुमी देव नागरिंत बूक पर्गट केल्या शिवाय तुमचो बूक साहित्य अकाडेमी एवार्डाक कन्सिडर जायना. आतां चा. फ्रा. डी कोसटाचें पुसतक आसा , तें कितलें सुंदर आसा. तें पासून देव नागरिंत आसा. देकून आतां मातशें त्रास काडिजे पडटालो.एका भाषेक मोसतू लिपियो जाल्यार फल्यां गजाल हाता भायर वचोंक आसा.

साहित्यांत बायलांक वेगळी ऐडेंटिटी जाय म्हणटात तुमी ? 

बायलांक वेगळी अस्मिताय गर्ज ना म्हळ्ळो मत आसा खरें. तर चाळीस वर्सांनी फकत दोग‍च बायलो कित्याक सम्मेळनाच्या अध्यक्ष पदाचा गादियेर बसल्यो? म्हळ्यार समाजेंत दादले बायलां प्रास बरें काम कर्तात म्हळ्ळी एक मनातिती अजून आसा आनी काम कर्ता. गोंयांत तरी म्हज्या समजणे फर्माणे  वयल्या स्थरार खंयच्यायी हुद्द्यार खंय यी चड बायलो झळकनांत. कित्याक ? म्हळ्यार आमची समाज आनी तिची मांयड सेट च तशी. आनी आमां बरवप्यांच्या बाबतीन सांगचें तर पयस पयस सम्मेळनां मीटिंगां दवरल्यार तिका एकलेक वचोंक मातशें  कश्ट जातात. हांव वेतां , एकलिंच प्रवास कर्तां. पूण अमच्या थोड्या स्त्री लेककिंक तांच्या कुटमाकी सांगाता हाडिजे म्हण आसता. प्रतिभा म्हळ्ळी एक हिंदी लेककी म्हणटा : काजार जावन पंद्रा वर्सां पऱ्यांत म्हज्या घरांत म्हका कसलेंच स्वतंत्र म्हळ्ळें नातुल्लें आनी आतां म्हाका तें मेळ्ळां आनी हांव जायते साहितीक प्रवास कर्तां आनी एक बरवपी देकून म्हाका अभिमान असा.

पूण हाका अपवाद – कमलादास , जिण्येचे शेवोटचे दीस ती बुर्कांत जियेली आनी म्हणाली हांव पर्द्यांत  सेफ …

व्हय , तिची जिणी हांवे समजाल्लेपरीं बोव तळमाळ्यांची . तिका हांवे थोडेंच वाचलां.

आज सगळे मोनजाती मोगा विश्यांत उलयतात , हांवे मुंबंयत पळेयलां मनशाक च रावोंक घरां नांत, रसत्यार निदतात …

न न हें कंपल्सरी कांय न्हय. हांव म्हणटां मोनजातीं प्रती इल्ली दया आसों. दाकल्याक रसत्यार एक कुत्रो अवघडाक सांपडलो आमकां फोन करा आमी येवन ताची काळजी घेतांव. उण्यार उणें इतलें तरी कऱ्येत न्हय? दुस्रें सुणीं माज्रां आसलेल्या घरांक भुर्ग्यां सांगाता गेल्यार हेय हेय हात लायनाका , हात लायनाका शी शी म्हणानाकात. तीं भुर्गीं मागीर वीत ड्रा कर्तात. तशेंच खंय एनिमल क्रूयेल्टी केजी घडटात जाल्यारी आमकां खबर दिव्येत. अरे म्हयनो म्हयनो भायर वेता आनी कूतऱ्याक घरांत बांदून दवर्ता ? तो बावडो असो जाता … आमचे कडे शेल्टर आसा , केनाल्स आसात. ताचो वापार करात.

सुणें पोसचें , संस्थे चलंवचेंयी आज ग्लामर – बिजनेस जालाशें दिसता . . . 

ना आमी आमचे पयशे मोडटांव.  सावर्डें आमचें घर च  आमी शेल्टर केलां. आमचे लाग्गीं डोकटर आसात  आमी ओपरेशनां कर्तांव आनी आमचेलाग्गीं ओर्गन कांवट आसात. एनिमल हसबेंडरिचे इन्सेकटर येवन सगळें चेक कर्तात. आमकां थोडी मदत भायल्या गांवाथावन मेळटा. चडावत दुडू आमिंच घाल्तांव.

बायलांच्या साहित्याक  स्त्रीवादी ट्याग गर्ज आसा ? ना ?

न तें खंडीत नाका , गर्ज ना. हांव कांय फेमिनिसट न्हय आनी बायल बरवपी आनी दादलो बरवपी म्हण आसजे म्हणच्याक विरोध. अशें सम्मेळनांक गेल्यार म्हाका  स्त्री लेककी म्हण ओळोक करून दितात पूण हांव स्त्री वादी न्हय. आमकां दादल्यां सांगाताच बसोन प्रबंद  मंडन कर्ची तांक आसा तसेंच थोडीं बंधनांयी आसात. जितलो मान अमकां दादले दितात तो घेवंक आमकां संतोस जाता. फकत बरंवच्या बायलांक मात न्हय , थोडे बेब्दे घोव तांच्या बायलांक मार्चें बडंवचें कर्तात तेंयी रावाजे.

---

ಎಪ್ರಿಲ್ ಮ್ಹಯ್ನ್ಯಾಚ್ಯಾ 29, 30 ಆನಿ ಮಾಯ್ 01 ತಾರಿಕೆರ್ ಕಾರ್ವಾರ್ ಚ್ಯಾ ಸದಾಶಿವಘಡಾಂತ್ ಅಖಿಲ್ ಭಾರತೀಯ್ ಕೊಂಕಣಿ ಪರಿಷದೆಚೆಂ ವಿಸಾವೆಂ ಅಖಿಲ್ ಭಾರತೀಯ್ ಕೊಂಕ್ಣಿ ಸಮ್ಮೇಳನ್ ಘಡೊನ್ ಆಯಿಲ್ಲೆಂ. ಮಾಲ್ಘಡಿ ಲೇಕಕಿ ಮೀನಾ ಕಾಕೋಡ್ಕರ್ ಹಿಣೆಂ ಆದ್ಲೊ ಅಧ್ಯಕ್ಷ್ ರಮೇಶ್ ವೆಳುಸ್ಕಾರ್ ಹಾಂಚೆ ಥಾವ್ನ್ ಎಪ್ರಿಲ್ 29 ತಾರ್ಕೆರ್ ಸಾಂಜೆರ್ ಜಾಲ್ಲ್ಯಾ ಉಗ್ತಾವ್ಣೆ ಸುವಾಳ್ಯಾರ್ ಅಧ್ಯಕ್ಷ್ ಪದ್ವೆಚಿಂ ಸೂತ್ರಾಂ ಹಾತಿಂ ಘೆತ್ಲಿಂ. ಪಾಟ್ಲ್ಯಾ ವರ್ಸಾಂನಿ ಜಾಲ್ಲ್ಯಾ ವೀಸ್ ಸಮ್ಮೇಳನಾಂನಿ ಮೀನಾಬಾಯ್ ಫಕತ್ ದುಸ್ರಿ ಸ್ತ್ರೀ ಅಧ್ಯಕ್ಷಿಣ್. ಪಯ್ಲಿ ಬಾಯ್ ಶೀಲಾ ಕೋಳಂಬ್ಕರ್. ಹ್ಯಾ ಕಾರ್ಯಾಕ್ ನಾಮ್ಣೆಚೊ ಹಿಂದಿ ಲೇಕಕ್ ಡೊ. ಗಿರಿರಾಜ್ ಕಿಶೋರ್ ಉಗ್ತಾವ್ಪಿ ಜಾವ್ನ್ ಆಯಿಲ್ಲೊ. ಪೂಣ್ ತಾಚ್ಯಾ ನಾಂವಾ ತೆಕಿದ್ ತಾಣೆ ಕಸಲೊ ಸಂದೇಶ್ ಯಿ ದಿಲೊನಾ. ಪೂಣ್ ಮೀನಾಬಾಯೆನ್ ಆಪುರ್ಬಾಯೆನ್ ತಯಾರಿ ಕರ್ನ್ 27 ಪಾನಾಂಚೆಂ ಅಧ್ಯಕ್ಷೀಯ್ ಭಾಷಣ್ ಬರವ್ನ್ ಹಾಡುಲ್ಲೆಂ ಆನಿ ತೆಂ ತಿಣೆಂ ಹಟಾಕ್ ಪಡೊನ್ ಮ್ಹಳ್ಳೆಪರಿಂ ವಾಚ್ಲೆಂ. ತಿಚೆಂ ಭಾಷಣ್ ಲಾಂಬ್ಲೆಲೆಂ ಪಳೆವ್ನ್  ವೆದಿ ವಯ್ಲ್ಯಾ ಎಕಾ ಮುಕೆಲ್ ಸಯ್ರ್ಯಾಕೀ ಧರುನ್ ಜಾಯ್ತೆ ಉಟೊನ್ ಗೆಲೆ ತರೀ ತಿಚ್ಯಾ ಭಾಷಣಾಂತ್ ಗರ್ಜೆಚೆ ಆನಿ ಮಹತ್ವಾಚೆ ಜಾಯ್ತೆ ವಿಶಯ್ ಆಸ್ಲೆ. ಪೂಣ್  ತೆ ಲಾಂಬಂವ್ಚ್ಯಾ ಬದ್ಲಾಕ್ ಥೊಡೆ ಮಟ್ವೆ ಕರ್ಯೆತೆ. ದುಸ್ರ್ಯಾ ದಿಸಾ ಸಕಾಳಿಂಚೊ ಪಯ್ಲೊ ಪರಿಸಂವಾದ್ ಜಾಲ್ಲೊಚ್ ಚಾಯೆಚ್ಯಾ ವೆಳಾರ್  ಹಾಂವೆ ಆನಿ ಮೀನಾಬಾಯೆನ್ ಮಾಡಾಮುಳಾಂತ್ ಬಸೊನ್ ಥೊಡ್ಯೊ ಗಜಾಲಿ ಉಲೊವ್ನ್ ಕಾಡ್ಲ್ಯೊ. ತಾಂತ್ಲೆ  ಕಾಂಯ್ ವಿಚಾರ್ ಹಾಂಗಾ ಆಸಾತ್ :

ತುಮಿ ಆಪ್ಲ್ಯಾ ಅಧ್ಯಕ್ಷೀಯ್ ಭಾಷಣಾಂತ್ ಸಾಂಗ್ಲೆಂ ಸಮ್ಮೇಳನಾಂ ಲೊಕಾಕ್ ಎಕ್ಟಾಂಯ್ ಕರ್ತಾತ್. ಪೂಣ್ ತುಮಿ ತುಮ್ಚ್ಯಾ ಭಾಷಣಾಂತ್ ರೋಮಿ ಲಿಪಿಯೆಗಾರಾಂ ವಿಶ್ಯಾಂತ್ ಉಲಯ್ತಾನಾ ಥೊಡೆ ಉಟೊನ್ ಭಾಯ್ರ್ ಗೆಲ್ಲೆ ಪಳಯ್ತಾನಾ ಸಮ್ಮೇಳನಾಂ ವಾಂಟೆ ಕರ್ತಾತ್  ಗೀ ಮ್ಹಣ್ ದುಬಾವ್ ಜಾಲೊ….

ನಾ, ಹೊ  ಫ್ಯಾಕ್ಟ್  ಆನಿ  ಹೊ ಫ್ಯಾಕ್ಟ್ ಜೊ ಆಸಾ ನ್ಹಂಯ್ ಗೀ ಆಮ್ಕಾಂ ಗೊಂಯಾಂತ್ ಬೋವ್ ಚ್ ಮಹತ್ವಾಚೊ. ಆನಿ ಹೊ ಪ್ರಶ್ನ್ ಆಸಾ ನ್ಹಂಯ್  ಕೊಂಕ್ಣಿ ಭುರ್ಗ್ಯಾಂಚ್ಯಾ ಶಿಕ್ಷಣಾಚೊ,  ಭುರ್ಗ್ಯಾಂಕ್ ಆವಯ್ ಭಾಷೆಂತ್ ಚ್  ಭುರ್ಗ್ಯಾಂಕ್ ಮುಳಾವೆಂ ಶಿಕ್ಷಣ್ ದಿಂವ್ಚೊ , ಶಿಕ್ಷಣ್ ಸಿದ್ದಾಂತಾ ವಯ್ರ್ ಬಾಂದುನ್ ಹಾಡ್ಲಾ ಆನಿ ಇಂಗ್ಲಿಶಾ ಪಾಟ್ಲ್ಯಾನ್ ವೆತೆಲ್ಯಾಂಕ್ ಹಾಚಿ ಖಬರ್ ನಾ. ಪಯ್ಲೆಂ ತಾಣಿ ರೊಮಿ ರೊಮಿ ಮ್ಹಣ್ ಸುರು ಕೆಲೆಂ ಆನಿ ಆತಾಂ ಇಂಗ್ಲಿಶಾ ಪಾಟ್ಲ್ಯಾನ್ ಗೆಲೆ. ರೊಮಿ ಮುಕಾರ್ ದವರ್ನ್ ಸರ್ಕಾರಾಚೆಂ ಅನುದಾನ್ ಮಾಗ್ತೆಲ್ಯಾಂಕ್  ಆಜ್ ಕೊಂಕ್ಣಿಚ್ ನಾಕಾ.  ಆವಯ್ ಭಾಸ್ ಸೊಡ್ನ್ ಹೆರ್ ಭಾಷೆಂತ್ ಮುಳಾವೆಂ ಶಿಕ್ಷಣ್ ದಿಲ್ಯಾರ್ ಆಮ್ಚಿ ಸಂಸ್ಕೃತಿ ಕಶಿ ಉರ್ತೆಲಿ?  ಆತಾಂ ಕಿತೆಂ ಜಾಲಾಂ ಮ್ಹಳ್ಯಾರ್ ಘರಾಂನಿ  ಸಯ್ತ್ ಕೊಂಕ್ಣಿ ನಾ. ಗೊಂಯಾಂತ್ ಲೋಕ್ ಆತಾಂ ಫಕತ್ ಇಂಗ್ಲಿಶ್ ಚ್ ಉಲಯ್ತಾ. ಆನಿ ಆತಾಂ ಹೆಂ ಫಕತ್ ಕ್ರಿಸ್ತಾಂವ್ ಮಾತ್ರ್  ಕರಿನಾಂತ್. ಗೊಂಯಾಂತ್ ಹಿಂದೂ ಘರಾಂನಿ ಸಯ್ತ್ ಇಂಗ್ಲಿಶ್ ಭಾಸ್ ಆನಿ ಸಂಸ್ಕೃತಿ ರಿಗ್ಲ್ಯಾ. ಜಾತ್ ಮತ್ ಭೆದ್ ನಾಸ್ತಾನಾ ಘರಾ ಘರಾಂನಿ ಹಾತೂನ್ ಬಿತೂನ್ ತಿಚ್ ಪರ್ಕಿ ಸಂಸ್ಕೃತಿ ವಯ್ರ್ ಪಡ್ಲ್ಯಾ. ಹಾಚೆ ವರ್ವಿಂ ಕೊಂಕ್ಣಿ ಭಾಸ್ ಕಿತ್ಲಿ ಪಿಡ್ದ್ಯಾರ್ ಜಾಲ್ಯಾ ಮ್ಹಳ್ಯಾರ್ ಜರಿ ಆಮಿ ಸಾಂಗ್ಲೆಂ ಸತ್ಯಾನ್ನೋವ್ ಭುರ್ಗ್ಯಾಂಕ್ ಖಬರ್ ನಾ ಕಿತೆಂ ಸತ್ಯಾನ್ನೋವ್ ತೆಂ. ಬುದ್ವಾರ್ ಮ್ಹಳ್ಯಾರ್, ಬುದ್ವಾರ್ ಕೋಣ್ ? ಮ್ಹಣ್ ವಿಚಾರ್ತಾತ್. ದಿಸಾಚೆಂ ನಾಂವ್ ಮ್ಹಣ್ ಸಯ್ತ್ ಕಳಿತ್ ನಾ. ಹಿ ಸಂಸ್ಕೃತಿ ಘೆವ್ನ್ ಆನಿ ಕಿತ್ತೂನ್ ಪಾವ್ಯೆತ್ ? ಸೊಡ್ಯಾಂ ಹ್ಯಾ ಭುರ್ಗ್ಯಾಂಚೆಂ ಇಂಗ್ಲಿಶ್ ತರೀ ಸಾರ್ಕೆಂ ಆಸಾ ? ನಾ . ತಾಂಚೆ ಪ್ರಾಸ್ ಕೊಂಕ್ಣಿ ಮರಾಠೆಂತ್ ಶಿಕ್‍ಲ್ಲ್ಯಾ ಆಮ್ಚೆಂ ಇಂಗ್ಲಿಶ್ ಬರೆಂ ಆಸಾ. ಆಮಿ ಕಾಂಯ್ ಮರಾಠೆಕ್ ವಿರೋದ್ ನ್ಹಯ್. ಪಯ್ಲೆಂ ಮರಾಠಿ –  ಕೊಂಕ್ಣಿ ಥೊಡೆ ಅಭಿಪ್ರಾಯ್ ಭೇದ್ ಆಸ್ಲೆ.  ಕೊಂಕ್ಣಿ ಆನಿ ಮರಾಠಿ ಮ್ಹಣ್ಟಾನಾ ಆಮ್ಚಿ ಪ್ರಾಥಮಿಕತಾ ಕೊಂಕ್ಣೆಕ್. ಕೊಂಕ್ಣೆಂತ್ ಜಾಂವ್ ಮರಾಠೆಂತ್ ಮುಳಾವೆಂ ಶಿಕ್ಷಣ್ ಘೆತುಲ್ಲ್ಯಾನ್ ಆಮ್ಚಿ ಸಂಸ್ಕೃತಿ ಉರ್ತಾ. ಥೊಡೆ ಅಸೊ ವಾದ್ ಮಾಂಡ್ತಾತ್ ಕೊಂಕ್ಣೆಂತ್ ಶಿಕೊನ್ ಫಕತ್ ಬೊಟ್ಲೆರ್ ಮಾತ್ರ್ ಜಾವ್ಯೆತ್. ಮ್ಹಳ್ಯಾರ್ ಕೊಂಕ್ಣೆಂತ್ ಮುಳಾವೆಂ ಶಿಕಪ್ ಜೊಡ್ಲ್ಯಾರ್ ಪೋಟ್ ಭರುಂಕ್ ಜಾಯ್ನಾ. ಅಶೆಂ ನ್ಹಂಯ್.  ಮ್ಹಜೊ ಸ್ವತಾಚೊ ಚಲೊ ಜೊ ಮುಳಾವೆಂ ಶಿಕ್ಷಣ್  ಕೊಂಕ್ಣೆಂತ್ ಘೆತ್ಲೊಲೊ ಆಜ್  ಕಂಪ್ಯೂಟರ್ ಇಂಜಿನಿಯರ್ ಜಾಲಾ ಆನಿ  ಸ್ಟೇಟ್ಸಾಂತ್ ಆಸಾ. ತಾಕಾ ಕಾಮಾಂತ್ ಆನಿ ವ್ಹೆವಾರಾಂತ್ ಆಜ್ ಖಂಯ್ಚೀಯ್ ಅಡ್ಕಳ್ ನಾ. ಮ್ಹಜೊ ಅನ್ಯೇಕ್ ಚಲೊ ತವಳ್ ಕೊಂಕ್ಣಿ ಸೊಯ್ ನಾತುಲ್ಲ್ಯಾನ್ ಇಂಗ್ಲಿಷಾಂತ್ ಮುಳಾವೆಂ ಶಿಕಪ್  ಶಿಕ್ಲೊ ಆನಿ ಮ್ಹಾಕಾ ದೊಗಾಂಚ್ಯಾ ಶಿಕ್ಪಾಂತ್ಲೊ ಫರಕ್ ಸಮ್ಜುಂಕ್  ಯೆತಾ.

ಸಾರ್ಕೆಂ, ಜರ್ ಆವಯ್ಚಿ ಭಾಸ್ ‍ಚ್ ಇಂಗ್ಲಿಶ್, ಆವಯ್ಕ್ ಚ್ ಕೊಂಕ್ಣಿ ವಾ ಮರಾಠಿ ಯೇನಾ ಆನಿ ತಾಂಚ್ಯಾ ಘರಾಂತ್ ಕೊಂಕ್ಣಿ ನಾ ತರ್ ?

 ನೊ ಪ್ರೊಬ್ಲೆಮ್. ತುಮ್ಕಾಂ ಮಸ್ತು ಇಂಗ್ಲಿಶ್ ಇಸ್ಕೊಲಾಂ ಆಸಾತ್ ನ್ಹಂಯ್, ತುಮಿ ತುಮ್ಚ್ಯಾ ಭುರ್ಗ್ಯಾಂಕ್ ಇಂಗ್ಲಿಶ್ ಇಸ್ಕೊಲಾಕ್ ಘಾಲಾ ನ್ಹಂಯ್? ಕೋಣ್ ಆಡಾಯ್ತಾ? ಆಮ್ಚೆಂ ಕಸಲೆಂಚ್ ಒಬ್ಜೆಕ್ಶನ್ ನಾ. ಪೂಣ್ ಸರ್ಕಾರಾಚೆಂ ಗ್ರ್ಯಾಂಟ್ ವಿಚಾರಿನಾಕಾತ್. ತುಮ್ಕಾಂ ಗ್ರ್ಯಾಂಟ್ ದಿಲ್ಯಾರ್ ಆಮ್ಚ್ಯಾ ಕೊಂಕ್ಣಿ ಇಸ್ಕೊಲಾಂಕ್ ಅನ್ಯಾಯ್ ಜಾತಾ. ತುಮ್ಚ್ಯಾ ಭುರ್ಗ್ಯಾಂಕ್ ಇಂಗ್ಲಿಶಾಂತ್ ಮುಳಾವೆಂ ಶಿಕ್ಶಣ್ ದಿಂವ್ಚೆಂ ವಾ ಸೊಡ್ಚೆಂ ತುಮ್ಚೆಂ ಪ್ರಶ್ನ್. ಆಮಿ ಘಾಲಿನಾಕಾತ್ ಮ್ಹಣ್ ಸಾಂಗಿನಾಂವ್. ತುಮ್ಚ್ಯಾ ಭುರ್ಗ್ಯಾಚೊ ಫುಡಾರ್ ಕಸೊ ಘಡೊವ್ಪಾಚೊ ತೆಂ  ತುಮ್ಚ್ಯಾ  ಹಾತಾಂತ್ ಆಸಾ. ದೆಕುನ್ ತುಮಿ ವಿಚಾರ್ ಕರೂನ್ ತುಮ್ಚ್ಯಾ ಭುರ್ಗ್ಯಾಚೆಂ ಮುಳಾವ್ಯಾ ಶಿಕ್ಷಣಾಚೆಂ ಮಾಧ್ಯಮ್ ವಿಂಚಾ. ತುಮ್ಕಾಂ ಜರ್ ತುಮ್ಚ್ಯಾ ಭುರ್ಗ್ಯಾಚೊ ವಿಕಾಸ್ ಜಾಂವ್ಕ್ ನಾಕಾ ತುಮಿ ತಾಂಕಾ ಪರ್ಕಿ ಭಾಶೆನ್ ಮುಳಾವೆಂ ಶಿಕ್ಷಣ್ ದಿಯಾ. ಜರಿ ತರಿ ಭುರ್ಗ್ಯಾಚ್ಯಾ ಮುಳಾವ್ಯಾ ಶಿಕ್ಷಣಾಚಿ ಭಾಸ್ ಆವಯ್ ಭಾಸ್ ನ್ಹಂಯ್ ತರ್ ಸಗ್ಳೊ ಶಿಕ್ಪಾ ಪ್ರೊಸೆಸ್ ತಾಂಕಾ ಕಠಿಣ್ ಜಾತೊಲೊ. ಇತ್ಲೆಂ ಕಳ್ಳ್ಯಾ ಉಪ್ರಾಂತಿ ತುಮ್ಕಾಂ ತುಮ್ಚ್ಯಾ ಭುರ್ಗ್ಯಾಂಕ್ ಇಂಗ್ಲಿಶಾಂತ್ ‍ಚ್ ಮುಳಾವೆಂ ಶಿಕ್ಷಣ್ ದೀಂವ್ಕ್ ಆಸಾ, ಖಂಡಿತ್ ತುಮಿ ದಿಯಾತ್. ಪೂಣ್ ಹಾಂವೆಂ ಆದಿಂ ಸಾಂಗ್ಲೆಂ ನ್ಹಂಯ್, ದಯಾಕರುನ್ ಸರ್ಕಾರಾ ಥಾವ್ನ್ ಗ್ರ್ಯಾಂಟ್ ವಿಚಾರಿನಾಕಾತ್. ಎಕಾದವೆಳಾ ಗ್ರ್ಯಾಂಟ್ ದಿಲ್ಯಾರ್ ಕಿತೆಂ ಜಾತಾ ಮ್ಹಳ್ಯಾರ್, ಸಮಾಜೆಂತ್ ಜೊ ಬಾರೀಕ್ ಲೋಕ್ ಆಸಾ ಆನಿ ತಾಂಕಾ ಹೆಂ ಕಾಂಯ್ ಕಳ್ನಾ ಕಿತ್ಯಾಕ್ ತಾಂಚಿ ಚಿಂತ್ಪಾ ಪ್ರಕ್ರಿಯಾ ವೆಗ್ಳಿ ಆಸಾ. ತೆ ಚಿಂತ್ತಾತ್ ಆನಿ ಚುರ್ಚುರ್ತಾತ್ ,  ಹೋಯ್  ಆಮಿ ಆಮ್ಚ್ಯಾ ಭುರ್ಗ್ಯಾಂಕ್ ಇಂಗ್ಲಿಶಾಂತ್ ಬರೆಂ ಶಿಕಪ್ ದಿಲೆಂ ನಾ ನ್ಹಂಯ್ ? ಆನಿ ತೇಯಿ ಆಪ್ಲ್ಯಾ ಭುರ್ಗ್ಯಾಂಕ್ ಇಂಗ್ಲಿಶ್ ಶಾಳಾಂಕ್ ದಾಡ್ತಾತ್.  ಮಾಗಿರ್ ಕಿತೆಂ ಜಾತಾ ? ತಾಂತ್ಲಿಂ ಥೊಡಿಂ ಭುರ್ಗಿಂ ಮಾತ್ರ್ ಮುಕಾರ್ ಶಿಕ್ತಾತ್ , ಹೆರ್ ಶಿಕಪ್ ಚ್ ಅರ್ದ್ಯಾರ‍್ ಚ್ ರಾವಯ್ತಾತ್. ಡ್ರೊಪ್ ಅವ್ಟ್. ಮಾಗಿರ್ ಹಾಂಗಾಯೀ ನಾ, ಥಂಯ್ ಯೀ ನಾ, ಖಂಯ್ ಯೀ ನಾ. ದೆಕುನ್ ತುಮ್ಚಿ ಆವಯ್ ಭಾಸ್ ಇಂಗ್ಲಿಶ್  ಮ್ಹಣ್ ತುಮಿ ಚಿಂತ್ತಾತ್ ತರ್  ಆನಿ  ತುಮ್ಚ್ಯಾ ಭುರ್ಗ್ಯಾಂಕ್  ಇಂಗ್ಲಿಶಾಂತ್ ಮುಳಾವೆಂ ಶಿಕ್ಷಣ್ ದೀಂವ್ಕ್ ಆಸಾ ತರ್ , ಖುಶೇನ್ ದಿಯಾ. ಪೂಣ್ ಗ್ರ್ಯಾಂಟ್ ವಿಚಾರಿನಾಕಾತ್. ತಿತ್ಲೆಂಚ್.

ಆತಾಂ ಗೊಂಯಾ ಭಿತರ್ ಹೊ ಏಕ್ ಪೊಲಿಟಿಕಲ್ ಪ್ರಶ್ನ್ ಜಾಲಾ ಸೊ ದಿಸ್ತಾ  ….

ನಾ, ನಾ ಹೊ ಪೊಲಿಟಿಕಲ್ ಪ್ರಶ್ನ್ ನ್ಹಯಂಚ್. ತುಮಿ ಜರಿ ಮುಳಾವ್ಯಾ ಶಿಕ್ಷಣಾಚೆಂ ಸಿದ್ಧಾಂತಾಚ್ಯಾ ಗುಂಡಾಯೆಕ್ ವಚೊನ್ ಸೊದ್ಲ್ಯಾರೀ, ಭುರ್ಗ್ಯಾಕ್ ಮುಳಾವೆಂ ಶಿಕ್ಷಣ್ ಆವಯ್ ಭಾಷೆಂತ್ ಚ್ ದೀಜೆ ಮ್ಹಳ್ಳೊ ವಿಚಾರ್ ಸ್ಪಶ್ಟ್ ದಿಸ್ತಾ. ಆತಾಂ ಹೊ ಪ್ರಶ್ನ್ ಖಂಯ್ ಅಯ್ಲೊ ಜಾಣಾಂತ್? ಆತಾಂತಾ,  ಪಯ್ಲೆಂ ಹೆ ಸಗ್ಳೆ ಚರ್ಚಾ ಭಾಷೆಚ್ಯಾ ನಿಷ್ಟೆನ್ ಜಾತಾಲೆ ಆತಾಂ ಹಾಂತುಯ್ ರಾಜಕಾರಣ್ ಭಿತರ್ ಸರ್ಲಾಂ.  ದೆಕುನ್‍ಂಚ್ ಮ್ಹಜ್ಯಾ ಅಧ್ಯಕ್ಷೀಯ್ ಭಾಷಣಾಂತ್ ಹೊ ಇಶ್ಯೂ ಹಾಂವೆ ಜಾಯ್ ಮ್ಹಣ್ ಕಾಡ್ಲೊ. ಮ್ಹಕಾ ಖಬರ್ ಅಸ್ಲಿ  ಹಾಂವೆ ಅಶೆಂ ಉಲಯ್ಲ್ಯಾರ್ ಥೊಡ್ಯಾಂಕ್ ತರೀ ಲಾಗ್ತಾ ಮ್ಹಣ್ . ಪೂಣ್ ಏಕ್ ಬರವ್ಪಿ ಜಾವ್ನ್ ಮ್ಹಾಕಾ ಸಗ್ಳೆಂ ಲಾಗ್ತಾ ಆನಿ ಮ್ಹಾಕಾ ಕೊಂಕ್ಣಿ ಭುರ್ಗ್ಯಾಂಚ್ಯಾ ಫುಡಾರಾಚಿ ಫಿಕಿರ್ ಆಸಾ. ಹಿ ಗಜಾಲ್ ಹಾಂವೆ ಸಾಂಗಾನಾ ಜಾಲ್ಯಾರ್ ಮ್ಹಾಕಾಚ್  ಅನ್ಯಾಯ್ ಕೆಲ್ಲೆಪರಿಂ ಜಾತೊ.  ಎಕಾ ಬರವ್ಪ್ಯಾಕ್ ಸಗ್ಳೆ ಗಜಾಲಿ ಲಾಗ್ತಾತ್ ಆನಿ ಲಾಗಾಜೇ. ರಸ್ತ್ಯಾ ವಯ್ಲಿಂ ಕುತ್ರಿಂ ಸಯ್ತ್.  ಹಾಂವ್ ಏಕ್ ಬರವ್ಪಿಣ್ ಆನಿ ಹಾಂವ್ ಆನಿ ಮ್ಹಜೊ ನೊವ್ರೊ ವಾಟ್ಸುರ್ಯಾ ಕುತ್ರ್ಯಾಂಚಿಂ ಜತನ್ ಘೆಂವ್ಚೊ ಏಕ್ ಎನ್ ಜಿ ಒ ಸಂಸ್ತ್ಯಾ ಖಾತಿರ್ ಕಾಮ್ ಕರ್ತಾಂವ್. ದೆಕುನ್ ಮ್ಹಜ್ಯಾ ಸಾಹಿತ್ಯಾಂತ್ ಚಡ್ ಆನಿ ಚಡ್ ಮೊನ್ಜಾತಿ ಯೆತಾತ್ ಕಿತ್ಯಾಕ್ ಮ್ಹಳ್ಯಾರ್  ಭುರ್ಗ್ಯಾಂಥಂಯ್ ಮೊನ್ಜಾತಿ ಮೋಗ್ ವಾಡಂವ್ಚ್ಯಾ ದಿಶೆನ್ ಲ್ಹಾನ್ ಶಿ ಜಾಗೃತಿ ಹಾಡುಂಕ್. ಮ್ಹಜ್ಯಾ ಮತಾ ಪರ್ಮಾಣೆ ಹರೇಕಾ ಘರಾಂತ್ ಏಕ್ ಮಾಜಾರ್ ವಾ ಕುತ್ರೆಂ ಕಿತೆಂ ತರೀ ಮೊನ್ಜಾತ್ ಆಸೊಂಕ್ ಜಾಯ್. ಆಮ್ಚೆ ಮಧೆಂ ಏಕ್ ಮಾನಸಿಕತಾ ಆಸಾ , ಭುರ್ಗ್ಯಾಂನಿ ಕುತ್ರ್ಯಾಂ ಲಾಗಿಂ ಗೆಲ್ಯಾರ್ ಮ್ಹಣ್ಟಾಂವ್  ಶಿ ಶಿ ಶಿ ಹಾತ್ ಲಾವೂನಾಕಾ! ಭುರ್ಗ್ಯಾಂಚ್ಯಾ ವಾಡಾವಳೆಚೆರ್ ಹಿ ಮಾನಸಿಕತಾ ಪರಿಣಾಮ್ ಕರ್ತಾ.ದೆಕುನ್‍ಂಚ್ ಹಾಂವೆ ಕಾಲ್ ಗೀತಾ ಧರ್ಮರಾಜನಾಚಿ ವಿಶಯ್ ಸಾಂಗ್ಲಿ ಮ್ಹಜ್ಯಾ ಭಾಷಣಾಂತ್. ತಿ ಏಕ್ ಬರವ್ಪಿಣ್ , ಸ್ಕೊಲರ್ ಆನಿ ಕಥಾ ಮ್ಹಳ್ಳಿ ಏಕ್ ಸಂಸ್ಥಾ ಚಲಯ್ತಾ ಥಂಯ್. ತಿಕಾ ದಿಲ್ಲಿಂತ್ ಯುಪಿ ರಾಜಸ್ಥಾನಾಚೆ ಖೂಬ್ ಬಾಳ್ ಕಾಮ್ಗಾರ್ ದಿಶ್ಟಿಕ್ ಪಡ್ಲೆ. ತಿಣೆಂ ಚಿಂತ್ಲೆಂ ಹ್ಯಾ ಭುರ್ಗ್ಯಾಂಕ್ ಶಿಕಪ್ ದಿವ್ಯಾಂ. ಪೂಣ್ ತಾಂಕಾ ಜರ್ ತಿ ಶಿಕಂವ್ಕ್ ಘೆತೆಲಿ  ಹಾಂಚ್ಯಾ ಜೊಡಿಚೆರ್ ಜಿಯೆಂವ್ಚೆ ತಾಂಚೆ ಆವಯೊ ಉಪಾಶಿಂ ಪಡ್ಟೆಲ್ಯೊ. ಹೊ ವಿಚಾರ್ ಕೆಲ್ಲ್ಯಾ ತಿಣೆಂ  ತ್ಯಾ   ಆವಯಾಂಕ್ ಚ್ ಶಿಕಪ್ ದಿಲೆಂ ಆನಿ ಆಪ್ಲ್ಯಾ ಹಕ್ಕಾಂ ಖಾತಿರ್ ಝಗಡ್ಪಚೆಂ  ಸಮಾಜಿಕ್ ನ್ಯಾಯಾ ಕಾತಿರ್ ಕಶೆಂ ಕಸೊ ಅವಾಜ್ ಉಟಂವ್ಚೊ ಮ್ಹಣ್ ಶಿಕಯ್ಲೆಂ. ಅಶೆಂ ತಿಣೆಂ ಚಡುಣೆಂ ನೊವೊದ್ ಹಜಾರ್ ಬಾಯ್ಲಾಂಕ್ ಶಿಕ್ಶಿತ್ ಕೆಲೆಂ. ಸಗ್ಳಿಂ ರಸ್ತ್ಯಾ ವಯ್ಲಿಂ. ಆನಿ ತಿಚೆಂ ಹೆಂ ಕಾಮ್ ಪಳೆವ್ನ್ ದಿಲ್ಲಿ ಸರ್ಕಾರಾನ್ ತಿಕಾ ತಿಹಾರ್ ಜಯ್ಲಾ ಭಿತರ್ಲ್ಯಾ ಬಾಯ್ಲಾಂಕ್ ಶಿಕಂವ್ಕ್ ಆಪಯ್ಲೆಂ. ಆನಿ ಥಂಯ್ ತಿಣೆಂ ಪಳಯ್ಲೆಂ ಅಮಾಯೆನ್ , ನಿರ್ದೋಶ್ ಬಾಯ್ಲೊ , ಫಟ್ಕಿರೆ ಕೇಜಿ ಥಾಪುನ್ ಜಯ್ಲಾಂತ್ ಘಾಲಾಂ. ಕಿತ್ಯಾಕ್ ? ಹಾಂಚಿ ಆಸ್ತ್ ಬಳಿಷ್ಟ್ ನಾತೆವಯ್ತಿಕಾಂನಿ ಹಡಪ್ ಕರ್ಚ್ಯಾ ಖಾತಿರ್.  ಆನಿ ತ್ಯಾ ಬಾಯ್ಲಾಂಕ್ ಸಗ್ಳ್ಯಾಂನಿ ಸೊಡ್ನ್ ಘಾಲ್ಲೆಂ. ತಾಂಚೆ ವಿಶ್ಯಾಂತ್ ಅವಾಜ್ ಉಟಯ್ತೊಲ್ ಕೋಣ್ ನಾ. ತಾಂಚೆ ಸಾಂಗಾತಾ ತಾಂಚಿ ನೆಂಟುಲಿಂ ಭುರ್ಗಿಂ ಸಯ್ತ್ ಆಸ್ಲಿಂ. ಆನಿ  ಥಂಯ್ ತಿಣೆ ಸಾಹಿತ್ಯಾಚೊ ಉಪೆಗ್ ಕೆಲೊ ಆನಿ ತಾಂಕಾ ಎಕೇಕ್ ಚ್ ಕಾಣಿಯೊ ವಾಚುನ್ ಸಾಂಗ್ಲ್ಯೊ ಆನಿ ಹಳ್ಟಾರ್ ಹ್ಯಾ ಬಾಯ್ಲಾಂಚೊ ಜಿಣ್ಯೆ ವಿಶ್ಯಾಂತ್ಲೊ ನಕಾರಾತ್ಮಕ್ ಮನೊಭಾವ್ ಬದ್ಲೊಂಕ್ ಸುರು ಜಾಲೊ. ಚಾರ್ ವೊಣದಿ ಬಿತರ್ ಜಿಣೆಂಚ್ ಸಂಪ್ಲೆಂ  ಮ್ಹಣ್ಣೆಲ್ಯಾಂಚೊ ಜಿಣ್ಯೆ ದಿಶ್ಟಾವೊ ಚ್ ಬದಾಲ್ಲೊ. ಆನಿ ತಾಣಿ ತಾಂಚೆಂಚ್ ಕಾಣಿಯೊ ಬರಂವ್ಕ್ ಧರ್ಲ್ಯೊ ಆನಿ ಕೊಣಾಕ್ ಬರಂವ್ಕ್ ಯೇನಾ ತಾಣಿ ರೆಕೊರ್ಡ್ ಕರುಂಕ್ ಧರ್ಲೆ.ತಾಂತ್ಯಾ ಥೊಡ್ಯಾ ಕೃತಿಯಾಂನಿ ಜಾನಪದ್ ಗೂಣ್ ಅಸ್ಲೆ.  ಗೀತಾ ಧರ್ಮರಾಜನಾನ್ ಸಾಹಿತ್ಯಾಚೊ ಅಸೊ ಉಪೆಗ್ ಕೆಲೊ. ದೆಕುನ್ ಹಾಂವ್ ಕಿತೆಂ ಮ್ಹಣ್ಟಾಂ ಮ್ಹಳ್ಯಾರ್ ಸಾಹಿತ್ಯ್ ಮ್ಹಳ್ಯಾರ್ ಸಾಹಿತ್ಯಾಕ್ ಕಸಲೆಚ್ ಮಿತಿ ನಾಂತ್ ಆನಿ ಆಸೊಂಕ್ ಯಿ  ನಜೊ. ಅಮ್ಕಾಂ ಬರವ್ಪ್ಯಾಂಕ್  ಸಗ್ಳೆ ಗಜಾಲಿ ಲಾಗಜೇಚ್. ಆನಿ ಎಕಾ ಬರವ್ಪ್ಯಾನ್ ಸಗ್ಳ್ಯಾ ಗಜಾಲಿಂ ವಿಶ್ಯಾಂತ್ ಬರಯ್ಜೆ. ದೆಕುನ್ ಹಾಂವ್ ಜರಿ ರೊಮಿ ಲಿಪಿಯೆಂಗಾರಾಂ ವಿಶ್ಯಾಂತ್ ಉಲಯ್ಲಿಂ ತರೀ ತೆಂ ಹಾಂಗಾ ಅಪ್ರಸ್ತುತ್ ಕಾಂಯ್ ನ್ಹಯ್. ಆನಿ ಹಾಂವೆ ತಶೆಂ ಉಲಯಿಲ್ಲ್ಯಾನ್ ಕಾಂಯ್ ಸಮ್ಮೇಳನ್ ವಾಂಟೆ ಜಾತಾ ಮ್ಹಣ್ ಹಾಂವ್ ಚಿಂತಿನಾ. ಮ್ಹಜಿ ಭಾಸ್ ಆನಿ ಆಮ್ಚ್ಯಾ ಭುರ್ಗ್ಯಾಂಚೊ ಫುಡಾರ್ ಹೆ ವಿಶಿಂ ಉಲಂವ್ಚೊ ಆನಿ ಪ್ರತಿಪಾದನ್ ಕರ್ಚೊ ಕಾಯ್ದೊ ಮ್ಹಾಕಾ ಬಾಂದ್ತಾ.

ತುಮಿ ಕಾಲ್ ದುಸ್ರೊ ಝುಜ್ ಸುರು ಜಾಲಾ ಮ್ಹಳೆಂ ನ್ಹಯ್ ಗೀ ಹೋಚ್ ಗೀ ತೋ ಝುಜ್ ಕಿತೆಂ ? 

ವ್ಹಯ್. ಹೋಚ್ ತೊ. ಪಯ್ಲೆಂ ಝುಜ್ ಆಮ್ಚೆ ಮಾಲ್ಘಡೆ ಕೊಂಕ್ಣೆಕ್ ಮರ್ಯಾದ್ ಮೆಳ್ಚೇ ಖಾತಿರ್ ಝುಜ್ಲೆ ಆನಿ ಹೆಂ ದುಸ್ರೆಂ ಝುಜ್ ಆಮಿ ಇಂಗ್ಲಿಷಾ ವಿರೊಧ್ ಝುಜಾಜೆ ಜಾಲಾಂ.  ಇಂಗ್ಲಿಷ್ ಆಜ್ ಫಕತ್  ಕೊಂಕ್ಣಿ ಮಾತ್ ನ್ಹಯ್ ಮರಾಠಿ ತಸಲ್ಯಾ ಹೆರ್ ಪ್ರಾದೇಶಿಕ್ ಭಾಸಾಂಕೀ ಗಿಳ್ಟೇ ಆಸಾ. ಹಾಂವ್ ಖಂಡಿತ್ ಮ್ಹಣಾನಾ ಇಂಗ್ಲಿಷ್ ಏಕ್ ಪಾಡ್ ಭಾಸ್. ತಿ ಆಯ್ಚಿ ಗರ್ಜ್ ಆನಿ ಆಮಿ ಸಗ್ಳ್ಯಾಂನಿ ತಿ ಶಿಕಜೆಚ್. ಇಂಗ್ಲಿಷಾ ಥಾವ್ನ್ ಜಾಯ್ತೆಂ ಬರೆಂಪಣ್ ಜಾತಾ. ಪೂಣ್ ಕೊಣಾಕ್ ಜಾಗೊ ಕಿತ್ಲೊ ದಿವ್ಪಾಚೊ ಹೊ ಪ್ರಶ್ನ್. ಆನಿ ಆಯ್ಚ್ಯಾ ಕೊನ್ವೆಂಟ್ ಇಸ್ಕೊಲಾಚ್ಯ  ಭುರ್ಗ್ಯಾಂಚೆಂ ಇಂಗ್ಲಿಶ್ ತರೀ ಕಸಲೆಂ ಬಾಬಾ ? ಐ ಯಾಮ್ ಕಮಿಂಗ್ ಟು  ಕ್ಯಾಚ್ ಯುವರ್ ಬೇಬಿ. ಕ್ಯಾಚ್ ಕರುಂಕ್ ಕಸ್ಲೆಂ ಬೊಲ್ ಕಿತೆಂ  ತೋ ? ಅಸ್ಲೆಂ ಇಂಗ್ಲಿಷ್ ಉಲಯ್ತಾತ್. ಆಮ್ಕಾಂ ತಾಂಕಾ ಸಾರ್ಕೆಂ ಕರಿಜೆ ಪಡ್ಟಾ.  ಹಾಂವ್ ಚ್ ಸಾತ್ವೆ ಪರ್ಯಾಂತ್ ಮರಾಠೆಂತ್ ಶಿಕ್ಲೆಲಿಂ ಆನಿ ಮ್ಹಜೆಂ ಇಂಗ್ಲಿಷ್ ಹಾಚೇ ಪ್ರಾಸ್ ಕಿತ್ಲೆಂಗೀ ಬರೆಂ ಆಸಾ. ದೆಕುನ್ ಹಾಂವ್ ಮ್ಹಣ್ಟಾಂ : ಮುಳಾವೆಂ ಶಿಕ್ಶಣ್ ಆವಯ್ ಭಾಷೆಂತ್ ಚ್ ಘೆತ್ಲ್ಯಾರ್ ಬರೆಂ.

ತುಮಿ ಕಾಲ್ ಕೊಂಕ್ಣಿ ಸಾಹಿತ್ಯಾನ್ ಆಪ್ಲಿ ಪ್ರಾದೇಶಿಕತಾ ಉರವ್ನ್ ಘೆಜೆ ಮ್ಹಣ್ ಸಾಂಗ್ಲೆಂಗೀ , ಮೆರೊ ಉತ್ರಜೆ ಮ್ಹಳೆಂ ? 

ನಾ ನಾ ಹಾಂವೆ ಆಮ್ಚ್ಯಾ ಸಾಹಿತ್ಯಾಂತ್ ಪ್ರಾದೇಶಿಕತಾ ಉರವ್ನ್ ಘೆಜೆ ಮ್ಹಣ್ ಸಾಂಗೊಂಕ್ ನಾ. ಆಮ್ಚ್ಯಾ ಸಾಹಿತ್ಯಾನ್ ಪ್ರಾದೇಶಿಕ್ ಶಿಮೊ ಉತ್ರೊನ್ ಪಾವ್ಲ್ಯಾಂವ್ ಮ್ಹಣ್ ಹಾಂವೆ ಮ್ಹಳೆಂ.  ಆನಿ ಹ್ಯಾ ಸಂದರ್ಭಾರ್ ಅಂತರಾಷ್ಟೀಯ್ ಪಾಂವ್ಡ್ಯಾರ್ ಪಾವ್‍ಲ್ಲ್ಯಾ ಮಹಾಭಲೇಶ್ವರ್ ಸಯ್ಲ್ ಹಾಚ್ಯಾ ಪಲ್ತಡಿಚೊ ಮನಿಸ್ ಫಿಲ್ಮಾಚೊ ಉಲ್ಲೇಕ್ ಕೆಲೊ.ಆನಿ ಪುಂಡ್ಲೀಕ್ ಬಾಬಾಚೆ ಪಚ್ತಿಸ್ ವರ್ಸಾಂ ಪಾಟಿಂ ಬರಯಿಲ್ಲೆ ನಾಟಕ್ ಆತಾಂ ,  ಮರಾಠಿಂತ್ ರುಪಾಂತರ್ ಜಾಲ್ಯಾತ್ ಆನಿ ಹ್ಯಾ ನಾಟಕಾಂಕ್ ಮರಾಠಿ ಮಾಂಚಿಯೇರ್ ಪಯ್ಲೊ ಮ್ಹಾನ್ ಮೆಳ್ಳಾ ಮ್ಹಳೆಂ.  ಹೆಂ ಕಿತೆಂ ದಾಕಯ್ತಾ ಮ್ಹಳ್ಯಾರ್ , ಕಾಳಾಚ್ಯಾ ಪಾಸ್ಳೆಂತ್ ಸಯ್ತ್ ಆಮ್ಚೆಂ ಸಾಹಿತ್ ಬಂದಿ ನಾ. ಏಜ್ ಬಾರ್ಡ್ , ಹೆಂ ಧಾ ವರ್ಸಾಂ ಪಯ್ಲೆಂಚೆಂ ,ಅಶೆಂ ನ್ಹಯ್. ಸದಾಂ ಸಮಕಾಳೀನ್.

ಪೂಣ್ ಎಕಾ ತೇಂಪಾರ್ ಮರಾಠಿ ಥಾವ್ನ್‍ಂಚ್ ಕೊಂಕ್ಣೆಕ್ ಅನ್ಯಾಯ್ ಜಾಲ್ಲೊ ಮ್ಹಣ್ ಸಾಂಗ್ಚೆಂ ಆಯ್ಕಾಲಾಂ ಹಾಂವೆಂ . . 

 ನಾ ನಾ ಅನ್ಯಾಯ್ ಜಾಲಾ ತರ್ ತೋ ಕಾಂಯ್ ಪುಸುನ್ ಕಾಡುಂಕ್ ನಾ .ಎಕಾ ತೇಂಪಾರ್ ತೆಣ್ ಆಶಿಲ್ಲೆಂ. ಆಮ್ಚ್ಯಾ ಕೊಂಕ್ಣಿ ಭಾಷೆಕ್ ಸಾಹಿತ್ಯ ಅಕಾಡೆಮಿನ್ ಮಾನ್ಯತಾ ದಿವ್ಪಾಕ್ ತಾಣಿ ವಿರೊದ್ ಕೆಲ್ಲೊ. ಗೊಂಯಾಂತ್ ಕೊಂಕ್ಣಿರಾಜ್ ಭಾಸ್ ಜಾತಾನಾಂಯ್ ಮರಾಠೆವರ್ವಿಂ ತ್ರಾಸ್ ಜಾಲ್ಲೆ ಖರೆಂ. ಅಬಿಪ್ರಾಯ್ ಭೆದ್ ಆತಾಂಯೀ ಆಸೊಂಕ್ ಪುರೊ. ಸುರ್ವಾತೆಚ್ಯಾ ಕೊಂಕ್ಣೊ ಚಳ್ವಳೆಚ್ಯಾ ಸಂದರ್ಭಾರ್ ಕೊಂಕ್ಣಿ ಏಕ್  ಭಾಸ್ ಚ್ ನ್ಹಯ್ ಮ್ಹಣ್ ತೆ ಪ್ರಚಾರ್ ಕರ್ತಾಲೆ. ಪೂಣ್ ಗೊಂಯಾಂತ್  ಕ್ರಮೇಣ್ ಕಿತೆಂ ಜಾಲೆಂ ಮ್ಹಳ್ಯಾರ್ ಬಾಪುಯ್ ಮರಾಠಿ ಪುರಸ್ಕ್ರತ್ ಆಸ್ಲೊ ತರ್ ತಾಚಿ ಭುರ್ಗಿಂ ಕೊಂಕ್ಣಿ ಪುರಸ್ಕ್ರತ್ ಜಾಲೊ.ಆತಾಂ ಜಾಯ್ತೆ ಮರಾಠಿ ಕೊಂಕ್ಣಿ ಜಾಲ್ಯಾತ್. ಆತಾಂ ಕೊಂಕ್ಣೆಚೀಂಯ್ ಖೂಬ್ ಶಾಳಾಂ ಜಾಲ್ಯಾಂತ್ , ಭಾಷೆಚಿ ಪ್ರಗತಿ ಜಾಲ್ಯಾ. ಪೂಣ್ ಆಮಿ ಫಕತ್ ಆನಿ ಫಕತ್ ಕೊಂಕ್ಣಿ ಕೊಂಕ್ಣಿ ಮ್ಹಣ್ ಸಂಕುಚಿತ್ ಉರ್ಚೆಂ ನ್ಹಯ್. ಪ್ರಾದೇಶಿಕತೆಚೆ ಮಿತಿ ಉತ್ರೊನ್ ವಚಜೆ. ರುಪಾಂತರಾ ಬಾಬ್ತಿನ್ ಸಾಂಗ್ಚೆಂ ಜಾಲ್ಯಾರ್ , ಹ್ಯಾ ಗಜಾಲಿಂಕ್ ಆನಿ ತಾಕಾ ಕಾಂಯ್ ಸಂಬಂದ್ ನಾ.

ಕಾಲ್ ತುಮಿ ಸಮಾಜೆಂತ್ಲ್ಯಾ ಭ್ರಷ್ಟಾಚಾರಾ ವಿಶ್ಯಾಂತ್ ಉಲಯ್ಲ್ಯಾತ್. ಪೂಣ್ ಪ್ರಶಸ್ತಿ , ಪುರಸ್ಕಾರಾಂ ಖಾತಿರ್ ಸಾಹಿತಿಕ್ ವರ್ತುಲಾಂತ್ ಚಲೊನ್ ಆಸ್ಚ್ಯಾ ಭೃಷ್ಟಾಚಾರಾ ವಿಶ್ಯಾಂತ್ ಕಿತೆಂ ?

ಹೋ ಹೋ ಹೋ ( ಹಾಸೊ ) ಮ್ಹಾಕಾ ತೆ ವಿಶ್ಯಾಂತ್ ಕಾಂಯ್ ಸಾಂಗೊಂಕ್ ನಾಕಾ. ಹಾಂವ್ ಖಂಯ್ಚ್ಯಾಯೀ ಡಿಟೆಯ್ಲಾಂಕ್ ವಚನಾ. ಹಿ ಫಕತ್ ಚಿಕಲ್ ಉಡಂವ್ಚೊ ಖೆಳ್. ಅನ್ಯೇಕ್ಯಾಚೆರ್ ಚಿಕಲ್ ಫೆಕ್ ಕರೂನ್ ಕೋಣ್ ಆಪ್ಲೆಂ ಪೊಜಿಷನ್ ವ್ಹಡ್ ಕರುನ್ ಘೆತಾಂ ಮ್ಹಳ್ಯಾರ್ ಕಶೆಂ ? ಪೂಣ್ ಆತಾಂತಾ ಕೊಂಕ್ಣೆಂತ್ ಆನಿ ಪೆಪರಾಂನಿ ಚಲ್ಲಾಂ. ಹೆಂ ಖಂಡಿತ್ ಸಾರ್ಕೆಂ ನ್ಹಯ್. ಹಾಂವ್ ಕಿತೆಂ ಮ್ಹಣ್ಟಾಂ ಜಾಣಾಂಯ್ , ತುಮ್ಚೆ ಮಧೆಂ ಕಿತ್ಲೆ ಅಭಿಪ್ರಾಯ್ ಬೆಧ್ ಆಸ್ಲ್ಯಾರಿ ಬಸೊನ್ ಉಲವ್ನ್ ಸೆಟಲ್ ಕರಾ. ಹಾಂಗಾ – ಅನ್ಯೇಕ್ ಗಜಾಲ್ ಆಸಾ , ಜೆಂ ಆಮಿ ಬರಯ್ತಾನಾ ಆಮ್ಕಾಂ ಜಿ ಅಭಿಪ್ರಾಯ್ ಅಸ್ತಾ ವಾಚಕಾನ್ ಆಮ್ಚೆಂ ಬರಪ್ ವಾಚುನ್ ತೀಚ್ ಅಭಿಪ್ರಾಯೆಕ್ ಯೇಜೆ ಅಶೆಂ ಕೆನ್ನಾಂಚ್ ನಾಸ್ತಾ. ವಾಚಕ್ ತಾಣೆಂ ವಾಚ್ಚ್ಯಾ ಬರ್ಪಾ ವಿಶ್ಯಾಂತ್  ಕಸಲೆಯ್ ಅಭಿಪ್ರಾಯೆಕ್ ಯೇಂವ್ಕ್  ಸ್ವತಂತ್ರ್. ಏಕ್ ದಾಕ್ಲೊ ದಿಂವ್ಚೊ ತರ್ ಹಾಂವ್ ಕಾಂಯ್ ಬಾರಾ ತೆರಾ ವರ್ಸಾಂಚಿ ಆಸ್ತಾನಾ ಆಮ್ಚ್ಯಾ ಘರಾಂತ್ ಲ್ಹಾನ್ಪಣಾಥಾವ್ನ್ ಮ್ಹಾಕಾ ಸಾಂಗಾತ್ ದೀವ್ನ್ ಆಮ್ಚ್ಯಾ ಘರಾಂತ್ಲ್ಯಾ ಎಕಾ ಮಾಲ್ಘಡ್ಯಾ ಬಾಯ್ಲೆ ವಿಶ್ಯಾಂತ್ ಹಾಂವೆ ಏಕ್ ಕವಿತಾ ಬರಯ್ಲಿ, ಮರಾಠಿಂತ್.  ಮ್ಹಜ್ಯಾ ಆನಿ ತ್ಯಾ ಬಾಯ್ಲೆಚ್ಯಾ ಮೊಗಾ ಮಾಯ್ಪಾಸಾ ವಿಶ್ಯಾಂತ್.  ಮ್ಹಜ್ಯಾ ಆವಯ್ಕ್ ಮ್ಹಜ್ಯಾ ಬರ್ಪಾಚೇರ್ ಕೂಬ್ ಗವ್ರವ್ ಆಸ್ಲೊ.  ತಿ ಮ್ಹಜ್ಯಾ ಆವಯ್ನ್ ಮ್ಹಜ್ಯಾ ಮಾವ್ಳ್ಯಾಕ್ ದಾಕಯ್ಲಿ. ತಾಣೆ ತಿ ಏಕ್ ಮೊಗಾಚಿ ಕವಿತಾ ಮ್ಹಣ್ ಮ್ಹಾಕಾ ಅಶೆ ಗೊವ್ಜಿ ಕೆಲ್ಯೊಗೀ , ಹಾಂವ್ ಘಾಬರ್ಲಿಂ. ಆನಿ ತೆ ದಿಸಾ ಥಾವ್ನ್ ಆಜ್ ಪರ್ಯಾಂತ್ ಹಾಂವೆ ಮೊಗಾ ವಿಶ್ಯಾಂತ್ ಬರಂವ್ಕ್ ನಾ. ಮ್ಹಜ್ಯಾ ಸಾಹಿತ್ಯಾಂತ್ ತುಮ್ಕಾಂ ಲವ್ ಸ್ಟೋರಿ ಮೆಳ್ಚಿ ನಾ. ಕಾರಣ್ ತಿ ಭಿತರ್ ಥಾವ್ನ್ ಯೇನಾ.

ಮ್ಹಜೆಂ ಶೀದಾ ಸವಾಲ್ ಆಸಾ ,  ಎವಾರ್ಡ್ ದಿತಾನಾ ಫಿಕ್ಸಿಂಗ್ ಚಲ್ತಾ ?  ನಾ ?

ತೆಂ ಆಸಾ ಆನಿ ಚಲ್ತೇ ಆಸಾ. ಪೂಣ್ ಮ್ಹಜಿ ಗಜಾಲ್ ಕಿತೆಂ ಮ್ಹಳ್ಯಾರ್ ಹಾಂವ್ ಸದಾಂಚ್ ಕುಶಿನ್ ರಾವ್ತಾಂ.

ಕುಶಿನ್ ರಾವ್ಲ್ಯಾರ್ ಚುಕಾರಿ ಮಾರ್ ಲ್ಲೆಪರಿಂ  ಜಾಯ್ನಾ ? ಏಕ್ ಬರವ್ಪಿ ಜಾವ್ನ್ ಹ್ಯಾ ಗಜಾಲಿಂತ್ ಆಮ್ಚಿ ಜವಾಬ್ದಾರಿ ಕಿತೆಂ? 

ಜವಾಬ್ದಾರಿ . . . ಆಸಾತ್ ಥೊಡೆ ನಿದರ್ಶನಾಂ ಕರ್ತೆಲೆ, ಸಮ್ಮೇಳನಾಂ ಚಲ್ಚೆಕಡೆ ಯೇವ್ನ್ ಯೀ ತೆ ನಿದರ್ಶನಾಂ ಕರ್ತಿತ್ . ಪೂಣ್ ತಾಂಚೆ ಇರಾದೆ ಸಾಹಿತಿಕ್ ನ್ಹಯ್ ಮ್ಹಣ್ ಆಮಿ ಸಮ್ಜಾಜೆ. ತಾಂಚೆ ಇರಾದೆ ವೆಗ್ಳೆಚ್ ಆಸ್ತಾತ್.  ಹಾಂವೆ ಹೆಂ ಸಗ್ಳೆಂ ವಾಚ್ಲಾಂ. ಹೆ ವಿಶ್ಯಾಂತ್ ಆಯ್ಲೆವಾರ್ ಎಕಾ ಪತ್ರಾನ್ ಮ್ಹಾಕಾ ವಿಚಾರ್ಲೆಂ ತುಮ್ಚೊ ಮತ್ ಕಿತೆಂ? ಹಾಂವೆ ಸಾಂಗ್ಲೆಂ ಮ್ಹಜೆ ಕಾಂಯ್ಚ್ ಕಮೆಂಟ್ಸ್ ನಾಂತ್. ಪೂಣ್ ಹಾಂವ್ ಏಕ್ ಉತರ್ ಪರ್ತ್ಯಾನ್  ಸಾಂಗ್ತಾಂ : ಹ್ಯಾ ಲೊಕಾಚೊ ಇರಾದೊ ಸಾಹಿತಿಕ್ ನಾ.

ತುಮಿ ಕಾಲ್ ಭಾಷಣಾಂತ್ ಮ್ಹಳೆಂ : ಎಕಾ ಸಾಹಿತಿನ್ ಫಕತ್ ಎಕ್ ಬರವ್ಪಿ ಮಾತ್ ಜಾವ್ನ್ ಉರಾನಾಯೆ ? ಎಕಾ ಬರವ್ಪ್ಯಾನ್ ಕಾಂಯ್ ಆಸ್ಲ್ಯಾರಿ ಬರವ್ನ್ ಆಪ್ಲಿ ಜವಾಬ್ದಾರಿ ಪಾಳ್ಯೆತ್ ಶಿವಾಯ್ ಸಮಾಜೆಂತ್ ಹೆರ್ ಕಿತೆಂ ಕರ್ಯೆತ್ ?  

ಹಾಂಗಾ ಹಾಂವ್ ಏಕ್ ಗಜಾಲ್ ಸಾಂಗ್ತಾಂ ತುಮ್ಕಾಂ. ಗಣಿತ್ ಮ್ಹಣ್ ಹಾಂವೆ ಏಕ್ ಲೇಕ್ ಬರಯಿಲ್ಲೊ. ತೊ ಮ್ಹಜ್ಯಾ ಶಬ್ದಸೂರ್ ಬುಕಾಂತ್ ಅಯ್ಲಾ. ತಾಂತು ಕಿತೆಂ ಜಾತಾ ಮ್ಹಳ್ಯಾರ್ , ಜಾಂಟ್ಯಾ ಜಾತಿಚೆ ಹಾಲ್ ಆಸಾತ್. ಆಜ್ ಕಾಲ್ ಆವಯ್ ಬಾಪಯ್  ಭುರ್ಗ್ಯಾಂಕ್ ಜಡ್ ಜಾವ್ಪಾಕ್ ಲಾಗ್ಲ್ಯಾಂತ್. ಭುರ್ಗ್ಯಾಂಕ್ ತಿಂ ಆತಾಂ ತಾಂಚ್ಯಾ ಘರಾಂತ್ ನಾಕಾತ್. ಆವಯ್ ಬಾಪಯ್ನಿಂ ಭುರ್ಗ್ಯಾಂಕ್ ಕೆಲ್ಲೆಂ ಸಗ್ಳೆಂ ಭುರ್ಗಿಂ ವಿಸ್ರುನ್ ವೆತಾತ್ ಆನಿ ತಾಂಕಾ ವರುನ್ ವೃದ್ದಾಶ್ರಮಾಕ್ ಪಾವಯ್ತಾತ್. ಥಂಯ್ ಸಗ್ಳ್ಯೊ ಸವ್ಲತ್ಯೊ ಆಸೊಂಕ್ ಪುರೊ ಪೂಣ್ ಭಾವನೆಚೆಂ ಕಿತೆಂ ? ತಾಂಕಾ ಕಾಂಯ್ ಆಪ್ಲ್ಯಾ ನಾತ್ರಾಂಚೊಂ ಉಡಾಸ್ ಆಯ್ಲೊ ಆನಿ ನಾತ್ರಾಂ  ಸಾಂಗಾತಾ ಖೆಳಾಜೆ ಮ್ಹಣ್ ಭೊಗ್ಲೆಂ , ತಾಂಕಾ ಥಂಯ್ ಹೆಂ ಮೆಳ್ಟಾ ಕಿತೆಂ ? ಸಮಾಜೆಂತ್ಲೆ  ಅಸಲೆ ಗಜಾಲಿ ಮ್ಹಾಕಾ ತರೀ ಖೂಬ್ ಅಸ್ವಸ್ಥ್ ಕರ್ತಾತ್ ಆನಿ ಪ್ರತೇಕ್ ಥರಾನ್ ಹಿ ಗಜಾಲ್ ಆನಿ ಹಾಂವೆ ಹೇಚ್ ವಿಶಿಂ ಏಕ್ ಲೇಕ್ ಬರಯ್ಲೆಂ ಗಣಿತ್  ತಾಂತು ಅಶೆಂ ಬರಯ್ಲೆಂ ಕೀ ಆತಾಂ ದೋನ್ ಆನಿ ದೋನ್ ಚಾರ್ ಹೆಂ ಗಣಿತ್ ನ್ಹಯ್ ಪ್ರತೇಕ್ ಜನ್ ಆಪ್ಣಾಕ್ ಜಾಯ್ ತಶೆಂ ಗಣಿತ್ ಮಾಗ್ತಾ ಆನಿ ಆಪ್ಲೆಂ ಗಣಿತ್ ಆಪುಣ್‍ಂಚ್ ಕರ್ತಾ.  ಹೆಂ ವಾಚುನ್ ಆಪ್ಲ್ಯಾ ಆವಯ್ಕ್ ತಿಚಿ ಆಸ್ತ್ ಸಗ್ಳಿ ಭಿತರ್ ಘಾಲ್ನ್ ತಿಕಾ ಆಶ್ರಮಾಕ್ ಸೊಡುನ್ ಆಯಿಲ್ಲ್ಯಾ ಎಕಾ ಮಾನೆಸ್ತಾನ್ ಮ್ಹಾಕಾ ವಕೀಲಾಚೆಂ ನೋಟಿಸ್ ಸೊಡ್ಲೆಂ.  ಪೂಣ್ ಹಾಂವೆ ಮ್ಹಜ್ಯಾ ಗಣಿತ್ ಬರ್ಪಾಂತ್ ಫಕತ್  ಎಕಾ ಅಸಹಾಯಕ್ ಆವಯ್ಚೆಂ ಮಾತ್ರ್ ಚಿತ್ರಣ್ ಕೆಲ್ಲೆಂ ಆನಿ ಥೊಡೆ ವಿಚಾರ್ ವಾಚ್ಪ್ಯಾಂ ಸಮೊರ್ ದವರಿಲ್ಲೆ. ತಿತ್ಲೆಂಚ್.  ತಾಚೊ ವಾದ್ ಆಸ್ಲೊ ಮ್ಹಜೆಂ ಗಣಿತ್ ಬರಪ್ ವಾಚುನ್ ಎಕಾ ದಿಸಾ ತಾಕಾ ವೀಸ್ ಫೊನ್ ಕೊಲಾಂ ಆಯ್ಲಿಂ ಖಂಯ್ ಆನಿ ತಾಚಿ ಬೆಇಜ್ಜದೀ ಜಾಲಿ ಖಂಯ್.  ಹಾಂವ್ ಮ್ಹಣ್ಟಾಂ : ಹಾಂವೆ ಕಾಂಯ್ ಮ್ಹಜ್ಯಾ ಬರ್ಪಾಂತ್ ತ್ಯಾ ಮಾನೆಸ್ತಾಚ್ಯಾ ನಾಂವಾಚೊ ಉಲ್ಲೇಕ್ ಕರೂಂಕ್ ನಾ. ಅಸಲಿಂ ಕಿತ್ಲಿಂಗೀ ಘಡಿತಾಂ ಸಮಾಜೆಂತ್ ಘಡ್ಟಾತ್. ಪೂಣ್ ಮ್ಹಜೆಂ ಬರಪ್ ವಾಚುನ್ ವಾಚ್ಪ್ಯಾನಿ ತಾಕಾ ಫೊನಾಂ ಕರಿಜೆ ತರ್ ತಾಣೆಂ ಕೆಲ್ಲ್ಯಾಚಿ ಖಬರ್ ಸಗ್ಳ್ಯಾಂಕ್ ಆಸಾ ಮ್ಹಣ್ ಜಾಲೆಂ. ತರ್ ಸಾಹಿತ್ ಜಾಗಂವ್ಚೆಂ ಕಾಮ್ ಕರ್ತಾ ಮ್ಹಣ್ ಖಂಡಿತ್  ಜಾಲೆಂ. ಪೂಣ್ ಜಾತಾಂ ಕಿತೆಂ ಮ್ಹಳ್ಯಾರ್ , ಅಸಲೆ ಸಮಾಜಿಕ್ ಇಶ್ಶ್ಯೂ ಘೆವ್ನ್ ಬರಯ್ತಾನಾ ತೆ ಕೊಣಾಕ್ ತರೀ ಲಾಗ್ತಾತ್ ಆನಿ ಬರಯಿಲ್ಲ್ಯಾಂಕ್ , ತೆಂ ಫಾಯ್ಸ್ ಕೆಲ್ಲ್ಯಾ ಪತ್ರಾಂಕ್  ನೊಟಿಸಾಂ ಯೆತಾತ್. ಜ್ಯಾ ಪತ್ರಾನ್ ಮ್ಹಜೆಂ ಬರಪ್ ಫಾಯ್ಸ್ ಕೆಲ್ಲೆಂ ತಾಂಕಾಂಯಿ ನೊಟಿಸ್ ಆಯಿಲ್ಲೆಂ. ಪುಣ್ ಮ್ಹಜ್ಯಾ ವಕೀಲಾನ್ ದಿಲ್ಲಿ ಜಾಪ್ ವಾಚುನ್ ಹೊ ಮನಿಸ್ ಥಂಡ್ ಜಾಲೊ. ಆಜ್ ಯೀ  ಹಾಂವ್ ಸಮಾಜೆಂತ್ ಅಸಲಿಂ ಘಡಿತಾಂ ಘಡ್ಲ್ಯಾರ್ ಅಸ್ವಸ್ಥ್ ಜಾತಾ ಆನಿ ಬರಯ್ತಾಂ.

ಸಮೀಕ್ಷೆ ವಿಶ್ಯಾಂತ್ ಕಾಲ್ ತುಮಿ ಭಾಷಣಾಂತ್ ಮ್ಹಳೆಂ – ಸಮೀಕ್ಷಾ ಫಕತ್ ಪೊಸಿಟಿವ್ ಆಸೊಂಕ್ ಜಾಯ್. ಅಶೆಂ ಕಿತ್ಯಾಕ್ ?

ಸಮೀಕ್ಷೆ ವಿಶ್ಯಾಂತ್ ಉಲಯ್ತಾನಾ ಮ್ಹಕಾ ಮ್ಹಜೊ ಮಾಮಾ ಉಡಾಸ್ ಯೆತಾ. ತಾಣೆ ಹಾಂವೆ ಬಾರಾ ವರ್ಸಾಂ ಪಿರಾಯೆರ್ ಬರಯಿಲ್ಲ್ಯಾ ಕವಿತೆಚಿ ಅಶಿ ಸಮೀಕ್ಷಾ ಕೆಲಿ ಗೀ ತೆ ಉಪ್ರಾಂತ್ ಹಾಂವೆ ಮೊಗಾ ವಿಶ್ಯಾಂತ್ ಬರಂವ್ಚೆಂಚ್ ಸೊಡ್ಲೆಂ. ತಶೆಂ ಥೊಡೆ ಬೋವ್ ಕ್ರೂಡ್ ಬರಯ್ತಾತ್. ಹಾಂವ್ ಮ್ಹಣಾನಾ ಸಮೀಕ್ಷಾ ನಾಕಾ. ಪೂಣ್ ತಿ ಕಶಿ ಆಸಜೆ ಮ್ಹಳ್ಯಾರ್ ಸಾಕ್ರಿ ಮೆಳಾಂತ್ ಗುಟ್ಲಾವ್ನ್ ದಿಂವ್ಚ್ಯಾ ಕೊಡು ಗುಳಿಯೆ ಪರಿಂ. ತಾಂಚೆರ್ ತಾಚೊ ಪರಿಣಾಮ್ ಜರೂರ್ ಜಾಯ್ಜೆ. ಪುಣ್  ಕಿತೆಂ ಆಸಾ , ಡಿಸ್ಕರೇಜ್ ಕರ್ಪಾಕ್ ನಾಕಾ. ನವ್ಯಾಂಕ್ ಥೊಡ್ಯಾಂಕ್ ಆಶಾ ಆಸ್ತಾ ಫಕತ್ ಬೂಕ್ ಪರ್ಗಟಿಜೆ ಮ್ಹಣ್ , ಪೂಣ್ ತಸಲ್ಯಾಂನಿ ಆಮ್ಸೊರ್ ಕರ್ಚೊ ನ್ಹಯ್ , ಮ್ಹಜೆ ತಸಲ್ಯಾ ಕಾಂಯ್ ಮಾಲ್ಘಡ್ಯಾಂಕ್ ಬರಯಿಲ್ಲೆಂ ದಾಕಂವ್ಚೆಂ ಆನಿ ಮಾರ್ಗದರ್ಶನ್ ಘೆಂವ್ಚೆಂ. ಥೊಡೆಂ ಹಾಳ್ವಾಯೆನ್ ಚಲಾ.ಅನಿಕೀ ಥೊಡೆಂ ವಾಚಾ. ಬರಯ್ನಾಕಾ ಅಶೆಂ ನ್ಹಯ್. ಕಾರಣ್ ಕಿತೆಂ ಆಸಾ ಮ್ಹಳ್ಯಾರ್ ಜಿಣ್ಯೆಚಿ ವಾಟ್ ಚಲ್ತಾ ಚಲ್ತಾನಾ ಮೆಚುರಿಟಿ ಯೆತಾ. ಸವ್ಕಾಸ್ ತುಮಿ ಚಮ್ಕಲ್ಯಾರ್ ತುಮಿ ಶಿಕ್ತೆಲ್ಯಾತ್. ಆತಾಂ ಮ್ಹಜೋಚ್ ದಾಕ್ಲೊ ಘೆಂವ್ಚೊ ತರ್ ಹಾಂವೆ ತೆನ್ನಾಂ ಬರಯ್ಲೆಲಿ ಕವಿತಾ ವಾ ಕಾಣಿಯೊ ಆತಾಂ ಪಳೆಯ್ಲ್ಯಾರ್ ಮ್ಹಾಕಾ ಭೊಗ್ತಾ , ಅರೇ , ಹಾಂವೆ ಹೇಂಯ್ ಬರಯಿಲ್ಲೆಂ ? ದೆಕುನ್ ಹಾಂವೆ ತರ್ನ್ಯಾಂಕ್ ಮ್ಹಣ್ಚೆಂ ಆಮ್ಸೊರ್ ಕರಿನಾಕಾತ್. ಬರಂವ್ಚೆಂ ರಾವಯ್ ನಾಕಾತ್ . ಮಾರ್ಗದರ್ಶನ್ ಘೆಯಾ. ಆಮ್ಚೆ ಮಧೆಂ ಜಾಣ್ಟೆ ಆಸಾತ್. ತೆ ತುಮ್ಕಾಂ ಸಾರ್ಕಿ ವಾಟ್ ದಾಕಯ್ತಾಲಿ.

ಆಯ್ಲೆವಾರ್ ಕೊಂಕ್ಣೆಂತೀ ಫೇಸ್ ಬುಕ್ ಸಾಹಿತ್ಯ್ ಉಬ್ಜಲಾಂ , ಹೆಂ ಕೊಂಕ್ಣೆಚ್ಯಾ ವಾಡಾವಳೆಕ್ ಕಶೆಂ ರಾವತ್ ?

ಹೋಯ್ ,   ಜೆಂ ಬರೆಂ ಆಸಾ ತೆಂ ಠಿಕ್ತೆಲೆಂ ಆನಿ ಖಂಯ್ಚ್ಯಾಂತ್ ತಾಂಕ್ ನಾ ತೆಂ ಮೊರ್ತೆಲೆಂ. ಆತಾಂ ಕಿತೆಂ ಜಾಲಾಂ ಮ್ಹಳ್ಯಾರ್ – ಹೆಂ ಸಗ್ಳೆಂ ರಿಮಿಕ್ಸ್ ಸಾಹಿತ್ಯ್. ಜಶೆಂ ಪರ್ನಿಂ ಹಿಂದಿ ಪದಾಂ ಆತಾಂಯಿ ಆಯ್ಕಾತಾನಾ ಆಮ್ಚ್ಯಾ ಮತಿಕ್ ಉಲ್ಲಾಸ್ ಜಾತಾ.  ಆಯ್ಕೊವ್ಯಾಂ ಮ್ಹಣ್ ಭೊಗ್ತಾ. ತಿಂ ಆಮ್ಚ್ಯಾ ಉಡಾಸಾಂತ್ ಉರ್ತಾತ್.  ಆತಾಂಚೆಂ ಪದಾಂ ಸಗ್ಳಿಂ  ಡಂ ಡಂ ಚಿಕ್ ಚಿಕ್ ಕಿತೆಂ ಠಿಕ್ತೆಲಿಂ ? ಫಕತ್ ದೋನ್ ದೀಸ್.  ಕಶೆಂ ಹಿಂ ಪದಾಂ ಉರನಾಂತ್ ತಶೆಂ ಹೆಂಯಿ ಉರಾಶೆಂ ನಾ. ಹಾಂಗಾ  ಅನ್ಯೇಕ್ ಗಜಾಲ್ ಆಸಾ. ವ್ಹಡ್ ಅಪಾಯಾಚಿ ಆನಿ ಮ್ಹಾಕಾ ಬೋವ್ ವಾಯ್ಟ್ ದಿಸ್ಚಿ. ಹೆ ಭುರ್ಗೆ ನಾಂವ್ ಜೊಡ್ಚ್ಯಾ ಆಶೆನ್ ಕಿತೆಂ ಕರ್ತಾತ್ ಜಾಣಾ ? ದುಸ್ರ್ಯಾ ಕೊಣಾಚಿಗೀ ಪರ್ನಿ ಕವಿತಾ ಆಸಾ ನ್ಹಯ್ ತೀ ಆಸಾ ತಶಿ ಉಕಲ್ನ್ ಹಾಡ್ಟಾತ್ ಆನಿ ಆಪ್ಲ್ಯಾ ನಾಂವಾನ್ ಫಾಯ್ಸ್ ಕರ್ತಾತ್. ಚೊರಿ.  ಥೊಡೆ ಪಾವ್ಟಿಂ ಕಿತೆಂ ಜಾತಾ ಮ್ಹಳ್ಯಾರ್ ಆಮಿ ಖಂಯ್ ಎಕಾ ಸ್ಪರ್ದ್ಯಾಕ್ ಜಡ್ಜ್ ಮ್ಹಣ್ ವೆತಾಂವ್ ಆನಿ ಆಮ್ಚಿಚ್ ಕವಿತಾ ಹಿಂ ಭುರ್ಗಿಂ ತಾಂಚಿ ಮ್ಹಣ್ ವೆದಿರ್ ವಾಚ್ತಾತ್ . ಹೆಂ ಮ್ಹಾಕಾ ಕಾಲ್ ಸಾಂಗೊಂಕ್ ವಿಸರ್ಲೆಂ. ಫೇಸ್ ಬುಕಾರೀ ಅಶೆಂಚ್ ಜಾತಾ.

ತರೀ ತುಮಿ ಮ್ಹಣ್ಟಾತ್ ಸಾಕ್ರಿ ಮೇಲಾಂತ್ ಗುಳಿ ದಿಯಾ! ತಶೆಂ ದಿಲ್ಯಾರ್ ಫಕತ್ ಸಾಕ್ರಿಚೆಂ ಮೇಲ್ ಲೆಂವೊನ್ ಗುಳಿ ಕಾಡ್ನ್ ಉಡಯ್ತಿತ್. ಆಸೊಂ. ತುಮಿ ಮ್ಹಳೆಂ ಏಕ್ ಭಾಸ್ ಆನಿ ಏಕ್ ಲಿಪಿ. ಅಸಲ್ಯಾ ಧೋರ‍ಣಾನ್ ಎಕ್ವಟ್ ಘಡ್ಟಲೊ ವಾ ವಾಂಟೆ ಜಾತಾಲೆ ?

ಆತಾಂಚಿಂ ಭುರ್ಗಿಂ ಆಸಾತ್ ಪಳೆಯಾ , ಜಿಂ ಗೊಂಯಾಂತ್ ತರೀ ದೇವ್ ನಾಗರಿ ಲಿಪ್ಯೆಂತ್ ಕೊಂಕ್ಣಿ ಶಿಕ್ತಾತ್ , ಆಮ್ಕಾಂ ಹಿಂದೀ ಆಸಾ ಮ್ಹಣೊನ್ ಕಾಂಯ್ ಲಿಪಿ ಕಶ್ಟ್ ಜಾಯ್ನಾ. ಆತಾಂ ಜೆಸ್ ಫೆರ್ನಾಂಡಿಸ್ ತಾಚೊ ಬೂಕ್ ನಾಗರಿಂತ್ ಕಾಡ್ಲೊ ಆನಿ ತಾಕಾ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಮೆಳ್ಳೊ.ಆತಾಂ ಕಿತೆಂ ಜಾಲಾಂ ಮ್ಹಳ್ಯಾರ್ ತುಮಿ ದೇವ್ ನಾಗರಿಂತ್ ಬೂಕ್ ಪರ್ಗಟ್ ಕೆಲ್ಯಾ ಶಿವಾಯ್ ತುಮ್ಚೊ ಬೂಕ್ ಸಾಹಿತ್ಯ ಅಕಾಡೆಮಿ ಎವಾರ್ಡಾಕ್ ಕನ್ಸಿಡರ್ ಜಾಯ್ನಾ. ಆತಾಂ ಚಾ. ಫ್ರಾ. ಡಿ ಕೊಸ್ಟಾಚೆಂ ಪುಸ್ತಕ್ ಆಸಾ , ತೆಂ ಕಿತ್ಲೆಂ ಸುಂದರ್ ಆಸಾ. ತೆಂ ಪಾಸುನ್ ದೇವ್ ನಾಗರಿಂತ್ ಆಸಾ. ದೆಕುನ್ ಆತಾಂ ಮಾತ್ಶೆಂ ತ್ರಾಸ್ ಕಾಡಿಜೆ ಪಡ್ಟಾಲೊ.ಎಕಾ ಭಾಷೆಕ್ ಮೊಸ್ತು ಲಿಪಿಯೊ ಜಾಲ್ಯಾರ್ ಫಲ್ಯಾಂ ಗಜಾಲ್ ಹಾತಾ ಭಾಯ್ರ್ ವಚೊಂಕ್ ಆಸಾ.

ಸಾಹಿತ್ಯಾಂತ್ ಬಾಯ್ಲಾಂಕ್ ವೆಗ್ಳಿ ಐಡೆಂಟಿಟಿ ಜಾಯ್ ಮ್ಹಣ್ಟಾತ್ ತುಮಿ ?  

ಬಾಯ್ಲಾಂಕ್ ವೆಗ್ಳಿ ಅಸ್ಮಿತಾಯ್ ಗರ್ಜ್ ನಾ ಮ್ಹಳ್ಳೊ ಮತ್ ಆಸಾ ಖರೆಂ. ತರ್ ಚಾಳಿಸ್ ವರ್ಸಾಂನಿ ಫಕತ್ ದೋಗ್‍ಚ್ ಬಾಯ್ಲೊ ಕಿತ್ಯಾಕ್ ಸಮ್ಮೇಳನಾಚ್ಯಾ ಅಧ್ಯಕ್ಷ್ ಪದಾಚಾ ಗಾದಿಯೆರ್ ಬಸ್ಲ್ಯೊ? ಮ್ಹಳ್ಯಾರ್ ಸಮಾಜೆಂತ್ ದಾದ್ಲೆ ಬಾಯ್ಲಾಂ ಪ್ರಾಸ್ ಬರೆಂ ಕಾಮ್ ಕರ್ತಾತ್ ಮ್ಹಳ್ಳಿ ಏಕ್ ಮನಾತಿತಿ ಅಜೂನ್ ಆಸಾ ಆನಿ ಕಾಮ್ ಕರ್ತಾ. ಗೊಂಯಾಂತ್ ತರೀ ಮ್ಹಜ್ಯಾ ಸಮ್ಜಣೆ ಫರ್ಮಾಣೆ  ವಯ್ಲ್ಯಾ ಸ್ಥರಾರ್ ಖಂಯ್ಚ್ಯಾಯೀ ಹುದ್ದ್ಯಾರ್ ಖಂಯ್ ಯೀ ಚಡ್ ಬಾಯ್ಲೊ ಝಳ್ಕನಾಂತ್. ಕಿತ್ಯಾಕ್ ? ಮ್ಹಳ್ಯಾರ್ ಆಮ್ಚಿ ಸಮಾಜ್ ಆನಿ ತಿಚಿ ಮಾಂಯ್ಡ್ ಸೆಟ್ ಚ್ ತಶಿ. ಆನಿ ಆಮಾಂ ಬರವ್ಪ್ಯಾಂಚ್ಯಾ ಬಾಬ್ತಿನ್ ಸಾಂಗ್ಚೆಂ ತರ್ ಪಯ್ಸ್ ಪಯ್ಸ್ ಸಮ್ಮೇಳನಾಂ ಮೀಟಿಂಗಾಂ ದವರ್ಲ್ಯಾರ್ ತಿಕಾ ಎಕ್ಲೆಕ್ ವಚೊಂಕ್ ಮಾತ್ಶೆಂ  ಕಶ್ಟ್ ಜಾತಾತ್. ಹಾಂವ್ ವೆತಾಂ , ಎಕ್ಲಿಂಚ್ ಪ್ರವಾಸ್ ಕರ್ತಾಂ. ಪೂಣ್ ಅಮ್ಚ್ಯಾ ಥೊಡ್ಯಾ ಸ್ತ್ರೀ ಲೇಕಕಿಂಕ್ ತಾಂಚ್ಯಾ ಕುಟ್ಮಾಕೀ ಸಾಂಗಾತಾ ಹಾಡಿಜೆ ಮ್ಹಣ್ ಆಸ್ತಾ. ಪ್ರತಿಭಾ ಮ್ಹಳ್ಳಿ ಏಕ್ ಹಿಂದೀ ಲೇಕಕಿ ಮ್ಹಣ್ಟಾ : ಕಾಜಾರ್ ಜಾವ್ನ್ ಪಂದ್ರಾ ವರ್ಸಾಂ ಪರ್ಯಾಂತ್ ಮ್ಹಜ್ಯಾ ಘರಾಂತ್ ಮ್ಹಕಾ ಕಸಲೆಂಚ್ ಸ್ವತಂತ್ರ್ ಮ್ಹಳ್ಳೆಂ ನಾತುಲ್ಲೆಂ ಆನಿ ಆತಾಂ ಮ್ಹಾಕಾ ತೆಂ ಮೆಳ್ಳಾಂ ಆನಿ ಹಾಂವ್ ಜಾಯ್ತೆ ಸಾಹಿತೀಕ್ ಪ್ರವಾಸ್ ಕರ್ತಾಂ ಆನಿ ಏಕ್ ಬರವ್ಪಿ ದೆಕುನ್ ಮ್ಹಾಕಾ ಅಭಿಮಾನ್ ಅಸಾ.

ಪುಣ್ ಹಾಕಾ ಅಪ್ವಾದ್ – ಕಮಲಾದಾಸ್ , ಜಿಣ್ಯೆಚೆ ಶೆವೊಟ್ಚೆ ದೀಸ್ ತಿ ಬುರ್ಕಾಂತ್ ಜಿಯೆಲಿ ಆನಿ ಮ್ಹಣಾಲಿ ಹಾಂವ್ ಪರ್ದ್ಯಾಂತ್  ಸೇಫ್ …

ವ್ಹಯ್ , ತಿಚಿ ಜಿಣಿ ಹಾಂವೆ ಸಮ್ಜಾಲ್ಲೆಪರಿಂ ಬೋವ್ ತಳ್ಮಾಳ್ಯಾಂಚಿ . ತಿಕಾ ಹಾಂವೆ ಥೊಡೆಂಚ್ ವಾಚ್ಲಾಂ.

ಆಜ್ ಸಗ್ಳೆ ಮೊನ್ಜಾತಿ ಮೊಗಾ ವಿಶ್ಯಾಂತ್ ಉಲಯ್ತಾತ್ , ಹಾಂವೆ ಮುಂಬಂಯ್ತ್ ಪಳೆಯ್ಲಾಂ ಮನ್ಶಾಕ್ ಚ್ ರಾವೊಂಕ್ ಘರಾಂ ನಾಂತ್, ರಸ್ತ್ಯಾರ್ ನಿದ್ತಾತ್ … 

ನ ನ ಹೆಂ ಕಂಪಲ್ಸರಿ ಕಾಂಯ್ ನ್ಹಯ್. ಹಾಂವ್ ಮ್ಹಣ್ಟಾಂ ಮೊನ್ಜಾತಿಂ ಪ್ರತಿ ಇಲ್ಲಿ ದಯಾ ಆಸೊಂ. ದಾಕ್ಲ್ಯಾಕ್ ರಸ್ತ್ಯಾರ್ ಏಕ್ ಕುತ್ರೊ ಅವ್ಘಡಾಕ್ ಸಾಂಪಡ್ಲೊ ಆಮ್ಕಾಂ ಫೊನ್ ಕರಾ ಆಮಿ ಯೇವ್ನ್ ತಾಚಿ ಕಾಳ್ಜಿ ಘೆತಾಂವ್. ಉಣ್ಯಾರ್ ಉಣೆಂ ಇತ್ಲೆಂ ತರೀ ಕರ್ಯೆತ್ ನ್ಹಯ್? ದುಸ್ರೆಂ ಸುಣಿಂ ಮಾಜ್ರಾಂ ಆಸ್ಲೆಲ್ಯಾ ಘರಾಂಕ್ ಭುರ್ಗ್ಯಾಂ ಸಾಂಗಾತಾ ಗೆಲ್ಯಾರ್ ಹೇಯ್ ಹೆಯ್ ಹಾತ್ ಲಾಯ್ನಾಕಾ , ಹಾತ್ ಲಾಯ್ನಾಕಾ ಶಿ ಶಿ ಮ್ಹಣಾನಾಕಾತ್. ತಿಂ ಭುರ್ಗಿಂ ಮಾಗಿರ್ ವಿತ್ ಡ್ರಾ ಕರ್ತಾತ್. ತಶೆಂಚ್ ಖಂಯ್ ಎನಿಮಲ್ ಕ್ರೂಯೆಲ್ಟಿ ಕೇಜಿ ಘಡ್ಟಾತ್ ಜಾಲ್ಯಾರೀ ಆಮ್ಕಾಂ ಖಬರ್ ದಿವ್ಯೆತ್. ಅರೇ ಮ್ಹಯ್ನೊ ಮ್ಹಯ್ನೊ ಭಾಯ್ರ್ ವೆತಾ ಆನಿ ಕುತ್ರ್ಯಾಕ್ ಘರಾಂತ್ ಬಾಂದುನ್ ದವರ್ತಾ ? ತೊ ಬಾವ್ಡೊ ಅಸೊ ಜಾತಾ … ಆಮ್ಚೆ ಕಡೆ ಶೆಲ್ಟರ್ ಆಸಾ , ಕೆನಾಲ್ಸ್ ಆಸಾತ್. ತಾಚೊ ವಾಪಾರ್ ಕರಾತ್.

ಸುಣೆಂ ಪೊಸ್ಚೆಂ , ಸಂಸ್ಥೆ ಚಲಂವ್ಚೆಂಯಿ ಆಜ್ ಗ್ಲಾಮರ್ – ಬಿಜ್ನೆಸ್ ಜಾಲಾಶೆಂ ದಿಸ್ತಾ . . . 

ನಾ ಆಮಿ ಆಮ್ಚೆ ಪಯ್ಶೆ ಮೊಡ್ಟಾಂವ್.  ಸಾವರ್ಡೆಂ ಆಮ್ಚೆಂ ಘರ್ ಚ್  ಆಮಿ ಶೆಲ್ಟರ್ ಕೆಲಾಂ. ಆಮ್ಚೆ ಲಾಗ್ಗಿಂ ಡೊಕ್ಟರ್ ಆಸಾತ್  ಆಮಿ ಒಪ್ರೆಶನಾಂ ಕರ್ತಾಂವ್ ಆನಿ ಆಮ್ಚೆಲಾಗ್ಗಿಂ ಒರ್ಗನ್ ಕಾಂವ್ಟ್ ಆಸಾತ್. ಎನಿಮಲ್ ಹಸ್ಬೆಂಡರಿಚೆ ಇನ್ಸೆಕ್ಟರ್ ಯೇವ್ನ್ ಸಗ್ಳೆಂ ಚೆಕ್ ಕರ್ತಾತ್. ಆಮ್ಕಾಂ ಥೊಡಿ ಮದತ್ ಭಾಯ್ಲ್ಯಾ ಗಾಂವಾಥಾವ್ನ್ ಮೆಳ್ಟಾ. ಚಡಾವತ್ ದುಡು ಆಮಿಂಚ್ ಘಾಲ್ತಾಂವ್.

ಬಾಯ್ಲಾಂಚ್ಯಾ ಸಾಹಿತ್ಯಾಕ್  ಸ್ತ್ರೀವಾದಿ ಟ್ಯಾಗ್ ಗರ್ಜ್ ಆಸಾ ? ನಾ ?

ನ ತೆಂ ಖಂಡಿತ್ ನಾಕಾ , ಗರ್ಜ್ ನಾ. ಹಾಂವ್ ಕಾಂಯ್ ಫೆಮಿನಿಸ್ಟ್ ನ್ಹಯ್ ಆನಿ ಬಾಯ್ಲ್ ಬರವ್ಪಿ ಆನಿ ದಾದ್ಲೊ ಬರವ್ಪಿ ಮ್ಹಣ್ ಆಸಜೆ ಮ್ಹಣ್ಚ್ಯಾಕ್ ವಿರೋಧ್. ಅಶೆಂ ಸಮ್ಮೇಳನಾಂಕ್ ಗೆಲ್ಯಾರ್ ಮ್ಹಾಕಾ  ಸ್ತ್ರೀ ಲೇಕಕಿ ಮ್ಹಣ್ ಒಳೊಕ್ ಕರುನ್ ದಿತಾತ್ ಪೂಣ್ ಹಾಂವ್ ಸ್ತ್ರೀ ವಾದಿ ನ್ಹಯ್. ಆಮ್ಕಾಂ ದಾದ್ಲ್ಯಾಂ ಸಾಂಗಾತಾಚ್ ಬಸೊನ್ ಪ್ರಬಂದ್  ಮಂಡನ್ ಕರ್ಚಿ ತಾಂಕ್ ಆಸಾ ತಸೆಂಚ್ ಥೊಡಿಂ ಬಂಧನಾಂಯೀ ಆಸಾತ್. ಜಿತ್ಲೊ ಮಾನ್ ಅಮ್ಕಾಂ ದಾದ್ಲೆ ದಿತಾತ್ ತೊ ಘೆಂವ್ಕ್ ಆಮ್ಕಾಂ ಸಂತೊಸ್ ಜಾತಾ. ಫಕತ್ ಬರಂವ್ಚ್ಯಾ ಬಾಯ್ಲಾಂಕ್ ಮಾತ್ ನ್ಹಯ್ , ಥೊಡೆ ಬೆಬ್ದೆ ಘೊವ್ ತಾಂಚ್ಯಾ ಬಾಯ್ಲಾಂಕ್ ಮಾರ್ಚೆಂ ಬಡಂವ್ಚೆಂ ಕರ್ತಾತ್ ತೆಂಯಿ ರಾವಾಜೆ.