“ಪಾಪಾ ಫ್ರಾನ್ಸಿಸಾನ್ ಆಯ್ಲೆವಾರ್ ಸಾಂ. ಬೆನೆಡಿಕ್ಟಾಚ್ಯಾ ‘ನಿಮಾಣ್ಯಾಂಕ್ ತುಮಿ ಆಯ್ಕಾ’ ಮ್ಹಣ್ಚ್ಯಾ ಉತ್ರಾಂಚೊಂ ಉಲ್ಲೇಕ್ ಕರ್ನ್, ಲ್ಹಾನಾಂಕ್ ಆಮಿ ಆಯ್ಕಜೆ ಆನಿ ಸಾಂಗಾತಾ ಚಲ್ಚಿ ಪವಿತ್ ಸಭಾ ಬಾಂದುನ್ ಹಾಡಿಜೆ ಮ್ಹಣ್ ಉಲೊ ದಿಲಾ. ಲ್ಹಾನಾಂಕ್ ಆಯ್ಕೊಂಚ್ಯಾ ಸಾಂಗಾತಾ ತಾಂಚೆ ಥಂಯ್ ಭರ್ವಸೊ ಭರ್ಚೆಂ ಕಾಮ್ ಗರ್ಜೆಚೆಂ ಜಾವ್ನಾಸಾ. ಪ್ರೇರಣಾನ್ ಆನಿ ಚಾಲನಾನ್ ಚಳ್ವಳ್ ರುತಾ ಜಾತಾ. ಶ್ರೀ ಮೈಕಲ್ ಡಿಸೊಜಾ ಆನಿ ತಾಚೆಂ ಕುಟಮ್ ದುರ್ಬಳ್ಯಾಂಕ್ ಬಳ್ವಂತ್ ಕರ್ಚ್ಯಾ ಚಳ್ವಳೆಕ್ ಪ್ರೇರಣ್ ಜಾವ್ನ್, ತ್ಯಾ ಪ್ರೇರಣಾಕ್ ಚಾಲನ್ ಮೆಳೊನ್ ಆತಾಂ ತಾಚೆಂ ಕುಟಮ್ ಚಳ್ವಳೆಕ್ ಭರ್ವಶ್ಯಾಚೆಂ ಕೀರ್ಣ್ ಜಾಲಾಂ” ಮ್ಹಣಾಲೊ ಮಂಗ್ಳುರ್ ದಿಯೆಸೆಜಿಚೊ ದರ್ಮಾಧ್ಯಕ್ಷ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ದಾನ್ಹಾ.
ದೊ| ಸಲ್ಡಾನ್ಹಾ, ನಂತೂರ್, ಸಿ.ಒ.ಡಿ.ಪಿ. ಮದರ್ ತೆರೆಜಾ ಸಾಲಾಂತ್ ‘ಮೈಕಲ್ ಡಿ ಸೊಜಾ ಆನಿ ಕುಟಮ್ ಎಡುಕೇರ್ ಎಂಡೊಮೆಂಟ್ ಫಂಡ್’ ಹಾಚೆಂ ಉಗ್ತಾವಣ್ ಕರುನ್ ಉಲಯ್ತಾಲೊ. “ಮ್ಹಾಕಾ ಹ್ಯಾ ದಿಯೆಸೆಜಿಂತ್ ಸ ವರ್ಸಾಂ ಅನ್ಭೊಗ್ ಜಾಲೊ. ಹಾಂಗಾ ದುಬ್ಳಿಕಾಯ್ ಮ್ಹಳ್ಯಾರ್ ಫಕತ್ ದುಡ್ವಾಚಿ ಮಾತ್ ಮ್ಹಣೊಂಕ್ ಜಾಯ್ನಾ. ಎಕ್ಸುರ್ಪಣ್, ಕುಟ್ಮಾಂ ಭೆಸಾಂ ಜಾಂವ್ಚೆಂ, ಅನಾತ್ಪಣ್ – ಹೆ ಸಂಗ್ತೀಯ್ ದುಬ್ಳಿಕಾಯ್‌ಚ್ ‘ದಿಶ್ಟಾವೊ ನಾತ್‌ಲ್ಲೊ ದೇಶ್ ಮೊರ್ತಾ’ ಮ್ಹಣ್ತಾತ್. ಪವಿತ್ ಸಭೆಕ್ ಜೆಜುನ್ ಬಳ್ವಂತ್ ದಿಶ್ಟಾವೊ ದಿಲ್ಲೊ ಆಸಾ ಆನಿ ಸಾಂ. ಪೆದ್ರು ತಸಲ್ಯಾ ಖಡ್ಪಾಚೆರ್ ಪವಿತ್ ಸಭೆಚಿ ಘಟ್ ಬುನ್ಯಾದ್ ಬಾಂದುನ್ ಹಾಡ್ಲ್ಯಾ ಆಸ್ತಾಂ ಸೊಮ್ಯಾಚಾ ಎಕಾ ಉತ್ರಾಕ್ ಹರ್ ದುಬ್ಳಿಕಾಯ್ ಪಯ್ಸ್ ಕರ್ಚಿ ತಾಂಕ್ ಆಸಾ. ಆಮಿ ಭರ್ವಸೊ ಸಾಂಡುಂಕ್ ನಜೊ” ಮ್ಹಣ್ ತಾಣೆ ಹ್ಯಾ ಸಂದರ್ಬಾರ್ ಮ್ಹಳೆಂ.
“ಶಿಕ್ಪಾದ್ವಾರಿಂ ಸಮುದಾಯ್ ಸಶಕ್ತೀಕರಣ್ ” – ಹ್ಯಾ ಧ್ಯೇಯಾಖಾಲ್ 2013 ವ್ಯಾ ವರ್ಸಾ ಶ್ರೀ ಮೈಕಲ್ ಡಿ ಸೊಜಾನ್ ವಾಡಿವೀಣ್ ಶಿಕ್ಪಾರೀಣ್ ಯೆವ್ಜಣ್ ಫಕತ್ ಧಾ ವರ್ಸಾಂಚ್ಯಾ ಆವ್ಧೆಕ್ ಮ್ಹಣ್ ಸುರು ಕೆಲ್ಲಿ. ಭಾಸಾಯಿಲ್ಲಿ ಆವ್ಧಿ ಸಂಪ್ತಾನಾ ತಾಣೆ ಆನಿ ತಾಚ್ಯಾ ಕುಟ್ಮಾನ್ ಫಂಡಾ ರುಪಾರ್ ನವಿ ಯೆವ್ಜಣ್ ಚಾಲು ಕೆಲ್ಯಾ ” ಮ್ಹಳ್ಳ್ಯಾ ದೊ| ಸಲ್ಡಾನ್ಹಾನ್ ಶ್ರೀ ಮೈಕಲ್ ಡಿ ಸೊಜಾ, ಪತಿಣ್ ಶ್ರೀಮತಿ ಫ್ಲಾವಿಯಾ ಡಿಸೊಜಾ, ಧುವೊ ನಿಶಾ , ರೋಶೆಲ್, ಪೂತ್ ಮನು ಆನಿ ಸಲಹಾದಾರಾಂಚೊಂ ದಿಯೆಸೆಜಿ ತರ್ಫೆನ್ ಪ್ರತೇಕ್ ತರಾನ್ ಉಪ್ಕಾರ್ ಬಾವುಡ್ಲೊ.
ಹ್ಯಾ ಸಂದರ್ಬಾರ್ ಶ್ರೀಮತಿ ಫ್ಲಾವಿಯಾ ಡಿ ಸೊಜಾ, ಶ್ರೀಮತಿ ನಿಶಾ ಡಿಸೊಜಾ, ಸಲಹಾದಾರ್ ಮಾ| ಬಾ| ವಲೇರಿಯನ್ ಡಿ ಸೊಜಾ, ಶ್ರೀ ಸ್ಟೀಫನ್ ಪಿಂಟೊ, ಬೆಂದುರ್, ಶ್ರೀ ಓಸ್ವಲ್ಡ್ ರೊಡ್ರಿಗಸ್, ಇಜಯ್, ಶ್ರೀ ಹೆನ್ರಿ ಡಿ ಸೊಜಾ, ಬೆಂದುರ್ ಆನಿ ಶ್ರೀ ಲೈನಲ್ ಆರಾನ್ಹಾ ಹಾಂಕಾ ಸಿಒಡಿಪಿ ತರ್ಫೆನ್ ಸನ್ಮಾನ್ ಕೆಲೊ.
ಎಡುಕೇರ್ ಎಂಡೋಮೆಂಟ್ ಫಂಡ್ ಪಯ್ಲ್ಯಾ ಆವ್ಧೆಚಿ 75 ಲಾಕಾಂಚಿಂ ಚೆಕ್ ಶ್ರೀ ಮೈಕಲ್ ಡಿ ಸೊಜಾ ಕುಟ್ಮಾ ತರ್ಫೆನ್ ಶ್ರೀಮತಿ ಫ್ಲಾವಿಯಾ ಡಿ ಸೊಜಾ ಆನಿ ಶ್ರೀಮತಿ ನಿಶಾ ಡಿ ಸೊಜಾ ಹಾಣಿ ಧರ್ಮಾಧ್ಯಕ್ಷ್ಯಾಕ್ ಹಾತಾಂತರ್ ಕೆಲಿ ಆನಿ ದರ್ಮಾಧ್ಯಕ್ಷ್ ದೊ| ಸಲ್ಡನ್ಹಾನ್ ಸಾಂಕೇತಿಕ್ ಜಾವ್ನ್ ತೆಗಾಂ ವಿದ್ಯಾರ್ಥಿಂಕ್ ಶಿಕ್ಪಾಕುಮ್ಕೆಚಿ ಚೆಕ್ ದಿಲಿ. ಹ್ಯಾ ಸಂದರ್ಭಿಂ ಸಿಒಡಿಪಿ ಸಹ – ದಿರೆಕ್ತೊರ್ ಬಾ। ಲೊರೆನ್ಸ್ ಕುಟಿನ್ಹೊ ವೆದಿರ್ ಹಾಜರ್ ಆಸ್ಲೆ.
ಮ್ಯಾಥ್ಯು ವೆಸ್ಟ್ ಹಾಚ್ಯಾ ಗೀತಾಚೊ ವೊಳಿ ಉಲ್ಲೇಕ್ ಕರ್ನ್ ಶ್ರೀ ಮೈಕಲ್ ಡಿ ಸೊಜಾ ಕುಟ್ಮಾ ತರ್ಫೆನ್ ಉಲವ್ನ್ ಶ್ರೀಮತಿ ನಿಶಾ ಡಿಸೊಜಾ ಮ್ಹಣಾಲಿ “ದೆವಾನ್ ಆಮ್ಕಾಂ ತಾಚೆಂ ಕಾಮ್ ಕರುಂಕ್ ಸಂಸಾರಾಕ್ ಧಾಡ್ಲಾಂ. ದೆವಾಚೆಂ ಹಾತೆರ್ ಜಾವ್ನ್ ಕಾಮ್ ಕರ್ಚೆಂ ಭಾಗ್ ಮಂಗ್ಳುರ್ ದಿಯೆಸೆಜ್ ಆನಿ ಸಿಒಡಿಪಿ ವರ್ವಿಂ ಆಮ್ಕಾಂ ಫಾವೊ ಜಾಲಾಂ. ದೆಕುನ್ ಹೊ ಅವ್ಕಾಸ್ ಆಮ್ಚ್ಯಾ ಕುಟ್ಮಾಕ್ ದಿಲ್ಲ್ಯಾಕ್ ಆಮಿ ತುಮ್ಕಾಂ ರಿಣ್ಕಾರಿ ಆಸಾಂವ್ “
“ಸಮಾಜೆಚ್ಯಾ ಗರ್ಜಾಂಕ್ ಪಾಂವ್ಚೊ ಗೂಣ್ ಆಮ್ಕಾಂ ಆಮ್ಚ್ಯಾ ಆವಯ್ – ಬಾಪಯ್ಚ್ಯಾ ಕುಟ್ಮಾಂ ಥಾವ್ನ್ ದೆಂವೊನ್ ಆಯ್ಲಾ. ರೋಟಿ, ಕಪ್ಡಾ, ಮಕಾನ್ – ಹ್ಯೊ ತೀನ್ ಸಂಗ್ತಿ ಹರ್ ಮನ್ಶ್ಯಾಚೊ ಮುಳಾವ್ಯೊ ಗರ್ಜೊ. ಶಿಕಪ್ ಏಕ್ ಕುಟಮ್ ಸಶಕ್ತ್ ಕರ್ತಾ. ಶಿಕ್ಪಾನ್ ಸಶಕ್ತ್ ಜಾಲ್ಲ್ಯಾಂನಿ ಆಪ್ಲ್ಯಾ ಪೆಲ್ಯಾಚಾ ಗರ್ಜೆಕ್ ಆಪ್ಲ್ಯಾ ತಾಂಕಿಭಿತರ್ ಪಾಂವ್ಚೆಂ ಲ್ಹಾನ್ ಕಾಮ್ ಕೆಲ್ಯಾರೀ ಆಮಿ ಜಿಯೆಂವ್ಚಿ ಸಮಾಜ್ ಬಳ್ವಂತ್ ಜಾತಾ” ಮ್ಹಣ್ ಶ್ರೀಮತಿ ನಿಶಾ ಡಿ ಸೊಜಾ ಮ್ಹಣಾಲಿ.
ಸಿಒಡಿಪಿ ನಿರ್ದೇಶಕ್ ಮಾ| ಬಾ| ವಿನ್ಸೆಂಟ್ ಡಿಸೊಜಾ ಹಾಣಿ ಪ್ರಾಸ್ತಾವಿಕ್ ಉಲವ್ನ್ ಸಯ್ರ್ಯಾಂಕ್ ಯೆವ್ಕಾರ್ ಮಾಗ್ಲೊ. ಸಿಒಡಿಪಿ ಶಿಬಂದೆನ್ ಪ್ರಾರ್ಥನ್ ಗೀತ್ ಗಾಯ್ಲೆಂ. ರೀನಾ ಡಿ ಕೊಸ್ಟಾ ಹಿಣೆ ದಿನ್ವಾಸ್ ಪಾಟಯ್ಲೆ. ರಿಚರ್ಡ್ ಆಲ್ವಾರಿಸ್ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ.