ಅಕಿಲ್ ಭಾರತ್ ಕೊಂಕಣಿ ಪರಿಷದೆಚೆಂ ೩೩ ವೆಂ ಅಧಿವೇಶನ್, ಅಕ್ಟೋಬರ್ ೨೬ ಆನಿ ೨೭ ವೆರ್, ರವೀಂದ್ರ ಭವನ್, ಮಡ್ಗಾಂವ್, ಹಾಂಗಾಸರ್ ಜಮ್ತಲೆಂ. ದೋನ್ ದಿಸಾಂಚೆಂ ಅಧಿವೇಶನ್ ೨೬ ವೆರ್ ಸಕಾಳಿಂ ಮಾಲ್ಘಡೊ ಸಾಹಿತಿ ಆನಿ ಭಾಶೆ ವಿಗ್ಯಾನಿ ಡಾ| ಗಣೇಶ್ ದೇವಿ ಉಗ್ತಾಯ್ತಾಲೆ.
ಪರಿಷದೆಂತ್ ಕೊಂಕಣಿ ಶಿಕ್ಷಣ್, ಭಾಶೆಚ್ಯಾ ಅಭಿವೃದ್ದೆಕ್ ತಂತ್ರಗಿನ್ಯಾನಾಚೊ ಉಪೆಗ್ ಆನಿ ಹೆರ್ ಸಮಕಾಳೀನ್ ವಿಚಾರಾಂಚೆರ್ ಚರ್ಚಾ ಚಲ್ತೆಲಿ. ಅಧಿವೇಶನಾಕ್ ಕರ್ನಾಟಕ, ಕೇರಳ, ಮಹಾರಾಷ್ಟ್ರ ಆನಿ ಗೋವಾ ಥಾವ್ನ್ ವ್ಹಡ್ ಸಂಕ್ಯಾನ್ ಪ್ರತಿನಿಧಿ ಜಮ್ತಲೆ. ಮಾ| ಮೌಝಿನೋ ಅತಾಡೆ ಹಾಂಕಾ ಪರಿಷದೆಚೊ ಅಧ್ಯಕ್ಷ್ ಮ್ಹಣ್ ನೆಮ್ಲಾ ಆಸುನ್, ಮುಕ್ಲ್ಯಾ ದೋನ್ ವರ್ಸಾಂಚ್ಯಾ ಆವ್ಧೆಕ್ ತೆ ಪರಿಶದೆಕ್ ಫುಡಾರ್ಪಣ್ ದಿತೆಲೆ.
ಕೊಂಕಣಿ ಭಾಷಾ ಮಂಡಳ್, ಗೊಂಯ್ ಹಾಚೊ ಆದ್ಲೊ ಅಧ್ಯಕ್ಷ್ ಪ್ರಶಾಂತ್ ನಾಯಕ್ ಯೆವ್ಕಾರ್ ಅಧ್ಯಕ್ಷ್ ಜಾವ್ನ್ ವಿಂಚುನ್ ಆಯ್ಲಾ ಅಸುನ್, ಅನಂತ ಅಗ್ನಿ ಆನಿ ಮಂಗಲ್‌ದಾಸ್ ಭಟ್ ಸಂಘಟನಾ ಸಮಿತಿಚೆ ಕಾರ್ಯಾಧ್ಯಕ್ಷ್ ಆನಿ ಮತ್ತು ಸಚಿವ್ ಜಾವ್ನ್ ವಿಂಚೊನ್ ಆಯ್ಲ್ಯಾತ್.
ಪರಿಷದೆಚೊ ಕಾರ್ಯಾಧ್ಯಕ್ಷ್ ಚೇತನ್ ಅಚಾರ್ಯ, ಪ್ರಶಾಂತ್ ನಾಯಕ್ ಮತ್ತು ಸುದೀನ್ ಲೊಲಿಯೇಕರ್ ಹೆ ಪ್ರತಿನಿಧಿ ಜಮಂವ್ಚ್ಯಾಕ್ ಹಾಲಿಂ ಕರ್ನಾಟಕ ಆನಿ ಕೇರಳ ರಾಜ್ಯಾಂಚಾ ಪ್ರವಾಸಾರ್ ಆಸಾತ್.
೧೯೩೯ ವ್ಯಾ ವರ್ಸಾ ಸ್ವರ್ಗೇಸ್ತ್ ಮಾಧವ ಮಂಜುನಾಥ ಶಾನುಭಾಗ್ ಹಾಣಿ ಕೊಂಕಣಿ ಭಾಸ್ ಆನಿ ಲೊಕಾಚ್ಯಾ ಬರೆಪಣಾ ಪಾಸತ್ ವಾವ್ರುಂಕ್ ಪರಿಷದೆಚಿ ಸ್ಥಾಪನಾ ಕೆಲ್ಲಿ ಆನಿ ತವಳ್ ಪಾಸುನ್ ಪರಿಷದ್ ಕೊಂಕ್ಣೆ ಖಾತಿರ್ ವಾವುರ್ನ್ ಆಸಾ. ೩೩ ವ್ಯಾ ಅದಿವೇಶನಾಚ್ಯಾ ಆಯೋಜಕಾಂನಿ ಕರ್ನಾಟಕ ಥಾವ್ನ್ ಚಡ್ ಆನಿ ಚಡ್ ಕೊಂಕ್ಣಿ ಲೊಕಾನ್ ಪ್ರತಿನಿಧಿ ಜಾವ್ನ್ ಪರಿಷದೆಂತ್ ವಾಂಟೊ ಘೆಂವ್ಕ್ ವಿನಂತಿ ಕೆಲ್ಯಾ.
https://forms.gle/UoKnxAxsu2g86TgM6
ವಿದ್ಯಾರ್ಥಿಂಕ್ ಫಕತ್ ೧೦೦ ರುಪಯ್ ಆನಿ ಹೆರ್ ಪ್ರತಿನಿಧಿಂಕ್ ವಸ್ತೆ ವೆವಸ್ತೆಚೆರ್ ಹೊಂದೊನ್ ರು. ೫೦೦, ರು.೧,೦೦೦, ರು.೩,೦೦೦ ಅಶೆಂ ಶುಲ್ಕ್ ಫಾರಿಕ್ ಕರುಂಕ್ ಆಸ್ತೆಲೆಂ. ಪ್ರತಿನಿಧಿ ಜಾತೆಲ್ಯಾಂನಿ ಹಾಂಗಾಸರ್ ವಯ್ರ್ ದಿಲ್ಲೆಂ ಗೂಗಲ್ ಫೊರ್ಮ್ ಲಿಂಕ್ ವಾಪಾರುನ್ ಪ್ರತಿನಿಧಿ ಜಾವ್ನೆತ್ ಮ್ಹಣ್ ಸಮಿತಿನ್ ಕಳಯ್ಲಾಂ.
ಪತ್ರಾ ಪರಿಷದೆಂತ್ ಕಾರ್ಯಾಧ್ಯಕ್ಷ್ ಚೇತನ್ ಅಚಾರ್ಯ, ಯೆವ್ಕಾರ್ ಅಧ್ಯಕ್ಷ್ ಪ್ರಶಾಂತ್ ನಾಯಕ್, ಸುದೀನ್ ಲೊಲಿಯೇಕರ್, ಡಾ| ಕಸ್ತೂರಿ ಮೋಹನ್ ಪೈ , ಎಚ್. ಎಮ್. ಪೆರ‍್ನಾಲ್ , ಟೈಟಸ್ ನೊರೊನ್ಹಾ ಆನಿ ಮೆಲ್ವಿನ್ ರೊಡ್ರಿಗಸ್ ಹಾಜರ್ ಆಸ್ಲೆ.