Pope Francis
ಆರ್ವಿಲ್ಯಾ ದಿಸಾಂನಿ ಸಮಾಜೆಂತ್ ಆರ್ಥಿಕ್ ಸಂಕಷ್ಟ್ ಚಡ್ಲ್ಯಾತ್, ಪ್ರತ್ಯೇಕ್ ಜಾವ್ನ್ ಕೊರೊನಾ ಕಾಳಾ ಉಪ್ರಾಂತ್ ನಿರುದ್ಯೋಗಾಚೆ ಸಮಸ್ಸೆ ಆನಿ ಆದಾಯ್ ಉಣೆ ಜಾಲ್ಲೆ ಮಾರಿಪಾತ್ ಉಪ್ಜಲ್ಲೆ ಸಮಸ್ಸೆ ವಾಡ್ಲ್ಯಾತ್. ಝುಜಾವರ್ವಿಂ ಲೋಕ್ ನಿರಾಶ್ರಿತ್ ಜಾಲಾ, ಸಮಾಜೆಂತ್ ಆಶಾಂತಿ ಚಡ್ಲ್ಯಾ ಆನಿ ವಸ್ತು ಮ್ಹಾರಗ್ ಜಾಲ್ಯಾತ್. ಯುವಜಣಾಂ ಥಂಯ್ ಶಿಕ್ಪಾ ಆನಿ ಕಾಮಾವಿಶಿಂ ಸಮಾಜಿಕ್ ದಬಾವ್ ಚಡ್ಲಾ. ಪರಿಸರಾಚೆಂ ಮ್ಹೆಳಪ್, ಪ್ರತ್ಯೇಕ್ ಜಾವ್ನ್ ವಾರೆಂ, ಉದಕ್, ಆನಿ ಹವ್ಯಾಂತ್ ಮ್ಹೆಳ್ಸಾಣ್ ಚಡ್ಲ್ಯಾ. ಸಮಾಜೆಂತ್ ಭೃಷ್ಟಾಚಾರ್, ಕೋಮುವಾದಾಚೆಂ ವಾತಾವರಣ್ ವಾಡತ್ ವೆತೆ ಆಸಾ. ಹೆ ಸಮಸ್ಸೆ ನವೆ ನ್ಹಯ್ ತರಿ, ತಾಂಚೆಂ ಥಾವ್ನ್ ಸಮಾಜೆಚೆರ್ ಪ್ರಭಾವ್ ಪಡ್ತೆ ಆಸಾ. ಆಶೆಂ ಆಸ್ತಾಂ ಸರ್ವ್ ಅನಿಶ್ಚಿತಾಯೆ ಮಧೆಂ ಆಮ್ಕಾಂ ಜಿವಿತಾಂತ್ ಪುಡೆಂ ಸರುಂಕ್ ಭರ್ವಸೊ ಆಧಾರ್ ದಿತಾ. ಪಾಪಾ ಬೆನೆದಿಕ್ತ್ ಸೊಳಾವೊ ಮ್ಹಣ್ತಾ: “ಭರ್ವಸೊ ಆಸ್‌ಲ್ಲೊ ಮನಿಸ್ ದುಸ್ರೆಚ್ ರಿತಿನ್ ಜಿಯೆತಾ. ಭರ್ವಸ್ತಲ್ಯಾಕ್ ನವ್ಯಾ ಜಿವಿತಾಚೆಂ ದೆಣೆಂ ಲಾಭ್ಲಾಂ” (ವಿಶ್ವ್‌ಪತ್ರ್ ಸ್ಪೆ ಸಾಲ್ವಿ, 2).
ಜುಬ್ಲೆವಾಚೆಂ ವರಸ್ ಆನಿ ಭರ್ವಸೊ
ಪವಿತ್ರ್ ಸಭಾ 2025 ವೊ ಜುಬ್ಲೆವ್ ಆಚರಣ್ ಕರ್ಚ್ಯಾ ಸಂದರ್ಭಾರ್ ಪಾಪಾ ಫ್ರಾನ್ಸಿಸಾನ್ ‘ಭರ್ವಸ್ಯಾಚೆ ಪಯ್ಣಾರಿ’ ಮ್ಹಳ್ಳ್ಯಾ ಚಿಂತ್ಪಾಚೆರ್ ನಿಯಾಳ್ ಕರುಂಕ್ ಆಪೊವ್ಣೆಂ ದಿಲಾಂ. ಜುಬ್ಲೆವಾಚಿ ತಯಾರಾಯ್ ಜಾವ್ನ್ ತಾಣೆಂ ದಿಲ್ಲೆಂ ದಸ್ತಾವೇಜ್ ‘ಭರ್ವಸೊ ನಿರಾಶಾ ಹಾಡಿನಾ’ (Hope Does Not Disappoint) ಸಂಸಾರಾರ್ ಆಸ್‌ಲ್ಲಿಂ ಪಂಥಾಹ್ವಾನಾಂ ಪುಡ್ ಕರುಂಕ್ ಭರ್ವಸ್ಯಾಚಿ ಗರ್ಜ್ ಮ್ಹಣ್ ಶಿಕಯ್ತಾ. ಜುಬ್ಲೆವಾಚೆಂ ವರಸ್ ಆಚರಣ್ ಕರ್ಚೊ ಸಂಪ್ರದಾಯ್ ಕ್ರಿ.ಶ. 1300 ಇಸ್ವೆಂತ್ ಥಾವ್ನ್ ಪಾಪಾ ಬೊನಿಪಾಸ್ ಆಟ್ವ್ಯಾಚ್ಯಾ ಕಾಳಾಥಾವ್ನ್ ಆರಂಬ್ ಜಾಲೊ. ಸುರ್ವೆರ್ 100 ವರ್ಸಾಂಚೊ ಜುಬ್ಲೆವ್ ಆಚರಣ್ ಕರ್ತಲೆ ತರ್, ಉಪ್ರಾಂತ್ 50 ವರ್ಸಾಂಚೊ, ಆನಿ 1470 ಇಸ್ವೆಂತ್ ಥಾವ್ನ್ ಹರೇಕಾ 25 ವರ್ಸಾಂಚೊ ಜುಬ್ಲೆವ್ ಆಚರಣ್ ಕರ್ಚಿ ಸಂಪ್ರದಾಯ್ ಪವಿತ್ರ್ ಸಭೆಂತ್ ಆಯ್ಲ್ಯಾ.
Pope Boniface VIII
ಜುಬ್ಲೆವಾಚೆಂ ವರಸ್ ಆಚರಣ್ ಕರ್ಚೆಂ ಪರ್ನ್ಯಾ ತೆಸ್ತೆಮೆಂತಾಂತ್ ಪಳೆಂವ್ಕ್ (ಲೆವಿತ್ 25:8-13) ಮೆಳ್ತಾ. ಜುಬ್ಲೆವಾಚೆಂ ವರಸ್ ಪ್ರಾಚಿತ್ ಆಧಾರ್ನ್ ದೆವಾಥಂಯ್ ಪಾಟಿಂ ಪರ್ತುಂಕ್ ಆನಿ ದೆವಾನ್ ತಾಚೆ ಪರ್ಜೆ ಥಂಯ್ ಕೆಲ್ಲ್ಯಾ ಸೊಲ್ಲ್ಯಾ ಥಂಯ್ ಆಮ್ಚೆಂ ಸಮರ್ಪಣ್ ನವೀಕೃತ್ ಕರುಂಕ್ ಆಪೊವ್ಣೆಂ. ದೆಕುನ್ ಹೊ ವೇಳ್ ದೆವಾಥಂಯ್, ಎಕಾಮೆಕಾ ಥಂಯ್ ಆನಿ ಸಗ್ಳ್ಯಾ ರಚ್ಣೆಥಂಯ್ ಆಮ್ಚೊ ಸಂಬಂದ್ ನವ್ಯಾನ್ ರೂಪಿತ್ ಕರುಂಕ್ ಎಕ್ ಆವ್ಕಾಸ್. ಮ್ಹಣ್ಜೆ, ದೆವಾನ್ ತಾಚೆ ಪರ್ಜೆಕ್ ಸದಾಂಚ್ ಆಶೆಲ್ಲ್ಯಾ ಶೆಗುಣಾಂಕ್ – ಮೋಗ್, ಸತ್, ನೀತ್, ದಯಾಳಾಯ್, ನಿತಿವಂತ್ಪಣಾಕ್ – ಪಾಟಿಂ ಪರ್ತುಂಕ್ ಆಪೊವ್ಣೆಂ. ಕ್ರಿಸ್ತಾಚ್ಯಾ ಪಾಸ್ಕಾಂಚ್ಯಾ ಮಿಸ್ತೆರಾ ಮಾರಿಪಾತ್ ಹೊ ಸೊಲ್ಲೊ ನವೊ ಜಾಲೊ. ದೆಕುನ್ ಜುಬ್ಲೆವಾಚೆಂ ವರಸ್ ಆಮ್ಕಾಂ ಜೆಜು ಕ್ರಿಸ್ತಾಚ್ಯಾ ಸುವಾರ್ತೆಕ್ ವಿಶ್ವಾಶಿ ಜಾವ್ನ್ ಜಿಯೆಂವ್ಕ್ ಉಲೊ ದಿತಾ. ಹರೇಕ್ ಜುಬ್ಲೆವ್ ಆಮಿ ಹ್ಯಾ ಸಂಸಾರಿಂ ಪಯ್ಣಾರಿ ಆನಿ ಸರ್ಗಿಂಚ್ಯಾ ರಾಜಾ ಕುಶಿನ್ ಪಯ್ಣಾರ್ ಆಸಾಂವ್ ಮ್ಹಳ್ಳ್ಯಾ ಭರ್ವಸ್ಯಾನ್ ಜಿಯೆಂವ್ಕ್ ಆಪೊವ್ಣೆಂ ದಿತಾ. ಸಾಂ ಪಾವ್ಲಾಚಿಂ “ಭರ್ವಸ್ಯಾ ವರ್ವಿಂ ಆಮಿ ಬಚಾವ್ ಜಾಲ್ಯಾಂವ್ (ರೋಮಾ 8:24)” ಮ್ಹಳ್ಳಿಂ ಉತ್ರಾಂ ಆಮ್ಕಾಂ ಪುಡೆಂ ಸರುಂಕ್ ಆಧಾರ್ ದಿತಾತ್.
ಭರ್ವಸ್ಯಾ ವಿಶಿಂ ಸಂಶೋಧನ್ ಸಮಾವೇಶ್
ಭಾರತೀಯ್ ಕ್ರಿಸ್ತೀ ತತ್ವ್‌ಶಾಸ್ತ್ರೀಯ್ ಚಿಂತ್ಪ್ಯಾಂಚೆಂ ಸಂಘಟನ್ ಆನಿ ಮಂಗ್ಳುರ್ ವಿಶ್ವ್‌ವಿದ್ಯಾಲಯಾಚೆಂ ಚೇರ್ ಇನ್ ಕ್ರಿಶ್ಚಿಯಾನಿಟಿ ಹಾಂಚ್ಯಾ ಸಹಯೋಗಾಖಾಲ್ “ಭರ್ವಸೊ: ತತ್ವ್‌ಶಾಸ್ತ್ರೀಯ್ ಥಳಾರ್ ವಿವಿಧ್ ದೃಷ್ಟಿಕೋನ್” ಮ್ಹಳ್ಳ್ಯಾ ವಿಶಯಾಚೆರ್ ಸಂಶೋಧನ್ ಸಮಾವೇಶ್ ಚಲ್ತಾ.
ಮಂಗ್ಳುರ್‌ಚ್ಯಾ ಸಾಂ ಜುಜೆ ಸೆಮಿನರಿಂತ್ ಆಕ್ತೋಬರಾಚ್ಯಾ 19-21 ಪರ್ಯಾಂತ್ ಚಲ್ಚ್ಯಾ ಹ್ಯಾ ಸಂಶೋಧನ್ ಸಮಾವೇಶಾಂತ್ ಭಾರತಾಚ್ಯಾ ವಿವಿಧ್ ಜಾಗ್ಯಾಂನಿ ವಾವ್ರ್ ಕರ್ಚೆ ತತ್ವ್‌ಶಾಸ್ತ್ರಿ ಭರ್ವಸ್ಯಾ ವಿಶಿಂ ಚಿಂತಪ್ ಆಟಯ್ತಾಲೆ. 2025 ವ್ಯಾ ಜುಬ್ಲೆವಾಕ್ ತಯಾರಾಯ್ ಕರ್ಚೆ ವೆಳಿಂ ಭರ್ವಸ್ಯಾ ವಿಶಿಂ ರಾಜಾಂವಿಕ್ ನದ್ರೆನ್ ಚಿಂತಪ್ ಆಟಂವ್ಚೆಂ ಸಕಾಳಿಕ್.
ಭಾರತೀಯ್ ಕ್ರಿಸ್ತೀ ತತ್ವ್‌ಶಾಸ್ತ್ರೀಯ್ ಚಿಂತ್ಪ್ಯಾಂಚೆಂ ಸಂಘಟನ್
1975-76 ವ್ಯಾ ವರ್ಸಾ ಆರಂಬ್ ಜಾಲ್ಲೆಂ ಭಾರತೀಯ್ ಕ್ರಿಸ್ತೀ ತತ್ವ್‌ಶಾಸ್ತ್ರೀಯ್ ಚಿಂತ್ಪ್ಯಾಂಚೆಂ ಸಂಘಟನ್ ಹರೇಕಾ ವರ್ಸಾ ಸಾಂಗಾತಾ ಮೆಳುನ್ ಪ್ರಸ್ತುತ್ ಕಾಳಾಕ್ ಸರಿ ಜಾಲ್ಲ್ಯಾ ತತ್ವ್‌ಶಾಸ್ತ್ರೀಯ್ ಸವಾಲಾಂಚೆರ್ ಆವಲೋಕನ್ ಕರ್ನ್ ಆಯ್ಲಾಂ. 1976 ಇಸ್ವೆಂತ್ ಕೇರಳಾಚ್ಯಾ ಆಳುವೆ ಹಾಂಗಾಸರ್ ದೊ| ರಿಚರ್ಡ್ ದೇ ಸ್ಮೆತ್, ಜೆ.ಸ. ಆನಿ ದೊ| ಆಲ್ಬರ್ಟ್ ನಂಬಿಯಾಪಾರಂಬಿಲ್, ಸಿ. ಎಮ್. ಐ. ಹಾಂಚ್ಯಾ ಮುಕೇಲ್ಪಣಾಖಾಲ್ ಹೆಂ ಸಂಘಟನ್ ಆಸ್ತಿತ್ವಾಕ್ ಆಯ್ಲೆಂ.
1989 ಇಸ್ವೆಂತ್ ಹೆಂ ಸಂಘಟನ್ ‘ರಿಜಿಸ್ಟರ್‌ಡ್ ಸೊಸೈಟಿ’ ಜಾಲಿ ಆನಿ ಹಾಚೆಂ ಸಾಂದೆಪಣ್ ಸಗ್ಳ್ಯಾ ಭಾರತಾಂತ್ ತತ್ವ್‌ಶಾಸ್ತ್ರಾಚೆರ್ ಸಂಶೋಧನ್ ಕರ್ಚ್ಯಾ, ತತ್ವ್‌ಶಾಸ್ತ್ರ್ ಶಿಕಯ್ತೆಲ್ಯಾ ಆನಿ ತತ್ವ್‌ಶಾಸ್ತ್ರೀಯ್ ಸವಾಲಾಂಚೆರ್ ಲೇಕನಾಂ ವಾ ಪುಸ್ತಕಾಂ ಪರ್ಗಟ್ ಕರ್ತೆಲ್ಯಾ ಸರ್ವ್ ಕ್ರಿಸ್ತಾಂವಾಂಕ್ ವಿಸ್ತರಾಯ್ಲೆಂ. ಹ್ಯಾ ಸಂಶೋಧನ್ ಸಮಾವೇಶಾಂತ್ ಪ್ರಸ್ತುತ್ ಕೆಲ್ಲೆಂ ಸಂಶೋಧನ್ ಸಾಂಗಾತಾ ಘಾಲ್ನ್ ಹರೇಕಾ ವರ್ಸಾ ಎಕ್ ಸಂಶೋಧನ್ ಲೇಕನಾಂಚೊ ಪುಸ್ತಕ್ ಪರ್ಗಟ್ತಾತ್.
ಕ್ರಿಸ್ತಾಂವ್ ಜಾವ್ನ್ ಆನಿ ಭಾರತೀಯ್ ಜಾವ್ನ್ ಕಶೆಂ ಭಾರತೀಯ್ ಕ್ರಿಸ್ತೀ ತತ್ವ್‌ಶಾಸ್ತ್ರೀಯ್ ಚಿಂತ್ಪ್ಯಾಂನಿ ಪ್ರಸ್ತುತ್ ಕಾಳಾಕ್ ಸರಿ ಜಾಲ್ಲೆಂ ತತ್ವ್‌ಶಾಸ್ತ್ರೀಯ್ ಚಿಂತಪ್ ಆಟವ್ಯೆತ್ ಮ್ಹಳ್ಳೆಂ ಹ್ಯಾ ಸಂಘಟನಾಚ್ಯಾ ಸಾಂದ್ಯಾಂನಿ ಕರ್ನ್ ದಾಕಯ್ಲಾಂ. ಆಶೆಂ ಹ್ಯಾ ಸಂಘಟನಾನ್ ಭಾರತೀಯ್ ತತ್ವ್‌ಶಾಸ್ತ್ರಾಕ್ ಕ್ರಿಸ್ತಾಂವ್ ದಿಶ್ಟಾವ್ಯಾ ಥಾವ್ನ್ ದೆಣ್ಗಿ ದಿಲ್ಯಾ. ಹ್ಯಾ ವರ್ಸಾ ತಾಂಚೊ 47 ವೊ ವಾರ್ಷಿಕ್ ಸಂಶೋಧನ್ ಸಮಾವೇಶ್ ಚಲ್ತಾ.
ಮಂಗ್ಳುರ್ ವಿಶ್ವ್‌ವಿದ್ಯಾಲಯಾಚೆಂ ಚೇರ್ ಇನ್ ಕ್ರಿಶ್ಚಿಯಾನಿಟಿ
ಚೇರ್ ಇನ್ ಕ್ರಿಶ್ಚಿಯಾನಿಟಿ ಮ್ಹಳ್ಯಾರ್ ಕಿತೆಂ? ಚೇರ್ ಮ್ಹಳ್ಯಾರ್ ಸಾದ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ಬಸ್ಕಾ. ಪುಣ್ ಶೈಕ್ಷಣಿಕ್ ಸಂಸಾರಾಂತ್ ಚೇರ್ ಮ್ಹಳ್ಯಾರ್ ವಿಶ್ವ್‌ವಿದ್ಯಾಲಯಾಂತ್ ಎಕಾ ಪ್ರತ್ಯೇಕ್ ಶೈಕ್ಷಣಿಕ್ ವಿಶಯಾಚೆರ್ ಆಧ್ಯಾಯನ್ ಕರುಂಕ್ ಆಸ್ಚೆಂ ವಿಶ್ವ್‌ವಿದ್ಯಾಲಯಾಚೊ ವಾಂಟೊ. ಮಂಗ್ಳುರ್ ವಿಶ್ವ್‌ವಿದ್ಯಾಲಯಾಂತ್ ಚೇರ್ ಇನ್ ಕ್ರಿಶ್ಚಿಯಾನಿಟಿ 1987 ಇಸ್ವೆಂತ್ ಭಿಸ್ಪ್ ಬಾಜಿಲ್ ಡಿಸೋಜ ಹಾಂಚ್ಯಾ ಮುಕೇಲ್ಪಣಾಖಾಲ್ ಆರಂಬ್ ಜಾಲ್ಲೆಂ.
ಧರ್ಮಾವಿಶಿಂ ಆನಿ ಮನ್ಶಾಕುಳಾಚೆರ್ ಆನಿ ಸಮಾಜೆಚೆರ್ ಧರ್ಮಾಚ್ಯಾ ಪ್ರಭಾವಾವಿಶಿಂ ಆಧ್ಯಯನ್ ಕರ್ಚೆಂ ಚೇರ್ ಇನ್ ಕ್ರಿಶ್ಚಿಯಾನಿಟಿಚೊ ಪ್ರಮುಕ್ ಉದ್ದೇಶ್. ದೆಕುನ್ ಹಾಂಗಾಸರ್ ಪವಿತ್ರ್ ಪುಸ್ತಕ್, ತತ್ವ್‌ಶಾಸ್ತ್ರ್, ದೇವ್‌ಶಾಸ್ತ್ರ್, ಕ್ರಿಸ್ತಾಂವ್ ಧರ್ಮಾಂತ್ ನೈತಿಕತಾ ಆನಿ ಹೆರ್ ವಿಶಯಾಂಚೆರ್ ಭಾರತೀಯ್ ಪಾಟ್‌ಥಳಾರ್ (Indian Context) ಆಧ್ಯಯನ್ ಚಲ್ತಾ. ಹ್ಯಾ ವಿಶಯಾಂಚೆರ್ ಚೇರ್ ಇನ್ ಕ್ರಿಶ್ಚಿಯಾನಿಟಿ ಶಿಕೊವ್ಣ್, ಉಪನ್ಯಾಸ್, ಚರ್ಚಾಬಸ್ಕಾ, ಶಿಕ್ಪಾಸಾಳ್, ಸಮ್ಮೇಳ್, ಆನಿ ಆಧ್ಯಯನ್ ಜಮಾತ್ ಮಾಂಡುನ್ ಹಾಡ್ತಾ.
ಮಾ। ದೊ। ಐವನ್ ಸೊಜ್
ಹ್ಯಾ ವರ್ಸಾ ಚೇರ್ ಇನ್ ಕ್ರಿಶ್ಚಿಯಾನಿಟಿ ಆನಿ ಭಾರತೀಯ್ ಕ್ರಿಸ್ತೀ ತತ್ವ್‌ಶಾಸ್ತ್ರೀಯ್ ಚಿಂತ್ಪ್ಯಾಂಚ್ಯಾ ಸಂಘಟನಾನ್ ಸಾಂಗಾತಾ ಮೆಳುನ್ ಭರ್ವಸ್ಯಾ ವಿಶಿಂ ತತ್ವ್‌ಶಾಸ್ತ್ರೀಯ್ ಸವಾಲಾಂಚೆರ್ ಸಂಶೋಧನ್ ಸಮಾವೇಶ್ ಮಾಂಡುನ್ ಹಾಡ್‌ಲ್ಲೆಂ ಭೋವ್ ಸೂಕ್ತ್. ಭರ್ವಸ್ಯಾ ವಿಶಿಂ ಸಂಶೋಧನ್ ಸಮಾವೇಶ್ ಮಾಂಡುನ್ ಹಾಡುಂಕ್ ದೊ| ಐವನ್ ಡಿಸೋಜ ಆನಿ ಸೆಮಿನರಿಚ್ಯಾ ಪ್ರಾದ್ಯಾಪಾಕಾಂನಿ ಆನಿ ಸೆಮಿನರಿಸ್ತಾಂನಿ ಮೊಟೊ ವಾವ್ರ್ ಕೆಲಾ.
■ ಬಾ| ಪ್ರವೀಣ್ ಜೊಯ್ ಸಲ್ಡಾನ್ಹಾ, ಜೆಪ್ಪು ಸೆಮಿನರಿ