Come on people… have a heart…ಇಲ್ಲೆಂ ತರೀ ಸುಧಾರ್ಯಾಂ

ಸಮಾಜೆಂತ್ಲಿ ವ್ಹಡ್ಲಿಂ ಜಣಾಂ, ಘನಾಮಾನಾಚ್ಯಾ ಘರಾಣ್ಯಾಂಚಿಂ, ಸುಸಂಸ್ಕೃತ್, ಸುಶೀಲ್ ಕುಟ್ಮಾಂತ್ಲಿಂ. ಖಂಯ್ಚ್ಯಾಯ್ ಕಾರ್ಯಾನಿಂ, ಸಭೆನಿಂ ಆಮ್ಕಾಂ ಫುಲಾಂತುರ‍್ಯಾಂಚೊ ಯೆವ್ಕಾರ್, ಪಯಿಲ್ಲೊ ಜಾಗೊ ಜೆವ್ಣಾ ಪಂಗ್ತೆರ್. ಪೂಣ್ ಹಿಚ್ ಆಮ್ಚಿ ಸಭ್ಯತಾ, ಶಿಷ್ಟತಾ, ಹೆರ್ ಸಂಗ್ತಿನಿಂ ಆಮ್ಕಾಂ ಕಿತ್ಯಾಕ್ ಸಾಂಗಾತ್ ದೀನಾ? ಕಾಂಯ್ ನಾಂ ತರ್ ತೊ ಸೆಲ್ ಫೋನ್ ವಾಪಾರ್ಚ್ಯಾಂತ್? ಆಮ್ಚಿ ಸುಸಂಸ್ಕೃತಿ ಆಮ್ಕಾಂ ಮೊಬಾಯ್ಲ್ ಶಿಷ್ಟಾಚಾರ್ ಶಿಕಯ್ನಾ? ಇಲ್ಲೀಶೀಯ್ sensitivity ಆಮ್ಚೆಲಾಗಿಂ ನಾ?

ಕೊಣಾಚೆಂಗಿ ಕಾಜಾರ್…ತಾಂಚ್ಯಾ ಕುಟ್ಮಾಚೆಂ ಕಾರ್ಯೆಂ… ಆಮ್ಕಾಂಯ್ ಸಯ್ರೆ ಜಾವ್ನ್ ಆಪಯ್ಲಾಂ. ಕಾರ್ಯಾಚಿ ಜವಾಬ್ದಾರಿ, ಮಾಂಡಾವಳ್, ಆಮ್ಕಾಂ ಆಪಯಿಲ್ಲೆಂ ಕುಟಾಮ್ ಪಳೆವ್ನ್ ಘೆತಾ. ಆನಿ ತಾಣಿಂ ಖಂಡಿತ್ ತರೀ, ತಸ್ವೀರ‍್ಯಾಂಕ್ ಆನಿ ವೀಡಿಯೊ ರೆಕೊರ್ಡ್ ಕರುಂಕ್ ಕುಶೆಲಿ ವೆಕ್ತಿಂಕ್ ಜೊಕ್ತೊ ಸಾಂಬಾಳ್ ಠರಾವ್ನ್ ನೆಮ್ಲಾಂ. ಮಾಗಿರ್ ಆಮ್ಕಾಂ ಆಮ್ಚ್ಯಾಸೆಲ್ ಫೋನಾಂತ್ ತಸ್ವಿರ‍್ಯೊ ಆನಿ ವೀಡಿಯೊ ಕಾಡ್ಚಿ ಕಸಲಿ ಪಿಸಾಯ್? ತೇಂಯ್ ಮುಕಾರ್ ವಚೊನ್, ತ್ಯಾ ಕಾಮಾ ಖಾತೀರ‍್‌ಚ್ ಆಸ್‌ಲ್ಲ್ಯಾ ತ್ಯಾ ಕುಶೆಲಿ ಫೊಟೊಗ್ರಾಫರ್ ಆನಿ ವೀಡಿಯೊಗ್ರಾಫರಾಂಕ್ ಆಡ್ ರಾವೊನ್? ಜಾಂವ್ ಅಶೆಂ ಆಮಿ ರೆಕೊರ್ಡ್ ಕೆಲ್ಲೆ ವೀಡಿಯೊ ಆನಿ ತಸ್ವಿರ‍್ಯೊ ಕಾಂಯ್ ಉಪ್ಕಾರಾಕ್ ಪಡ್ತಾತ್ಗಿ? ಆಮಿಂಚ್ ಖುದ್ ತೆಂ ಕಾಂಯ್ ಏಕ್ ಪಾವ್ಟಿಂ ಪುಣೀ ಪಳೆತಾಂವ್ಗಿ? ನಾಂ…ಆಮ್ಚಿ ಮೆಮೊರಿ ಭರ್ಲಿ, ತ್ಯೊ ತಸ್ವಿರ‍್ಯೊ ಆನಿ ವೀಡಿಯೊ ಡಿಲೀಟ್ ಕೆಲೆ ಆನಿ ಆನ್ಯೇಕ್ ಕಾರ್ಯೆಂ ರೆಕೋರ್ಡ್ ಕೆಲೆಂ. ಕಿತ್ಯಾ ಖಾತಿರ್?

ಹೆಂ ಚಲ್ತಾ ಕಾಜಾರಾಂ ಸೊಭಾಣಾಂನಿ ಆನಿ ಮೊರ್ನಾತಸಲ್ಯಾ ಸಂವೇದನ್ ಶೀಳ್ ಸಂಗ್ತಿನೀಂಯ್?

ಹ್ಯಾಚ್ ಪಾಟ್ಲ್ಯಾ ದಿಸಾಂನಿಂ, ಏಕ್ ತರ್ನೊ ಜೀವ್ ಬಲಿ ಜಾಲ್ಲೆಂ ಕರಾಳ್ ಘಡಿತ್, ಅವ್ಘಡ್ ಘಡೊನ್ ಕಾಂಯ್ ಅರ್ಧ್ಯಾ ವೊರಾ ಭಿತರ್ ಮೆಲ್ಲ್ಯಾ ಕುಡಿಚ್ಯೊ ತಸ್ವಿರ‍್ಯೊ, ದುಖಾಂತ್ ಹಾಕ್ ಮಾರ್ಚ್ಯಾ ಕುಟ್ಮಾಚ್ಯೊ ವೀಡಿಯೊ ವಾಟ್ಸ್ಯಾಪ್ ಆನಿ ಫೇಸ್ಬುಕಾಂತ್! ಮೊರ್ನಾಮೀಸ್, ಮೊರ್ನಾರೀತಿಚೊ ಲಾಯ್ವ್ ಸ್ಟ್ರೀಮಿಂಗ್… ಪುಣ್ಯಾಕ್ ಲಾಯ್ವ್ ಕಮೆಂಟರಿ ಏಕ್ ನಾಂ…

Come on people… have a heart…

ಆಮಿ ಕೆನ್ನಾಂ ಜಾಣ್ತೆ ಜಾಂವ್ಚೆಂ? ಫಾಲ್ಯಾಂ ಕಾಂಯ್ ಆಮ್ಚ್ಯಾಯ್ ಕುಟ್ಮಾನಿಂ ಕಾಂಯ್ ಅಶೆಂ ಘಡ್ಲೆಂ ಆನಿ ಆಮ್ಚ್ಯಾ ಹ್ಯಾ ಅಕಾಲಿಕ್ ಸಂದರ್ಭಾಂಚೊ ಲಾಯ್ವ್ ಶೊ ಅಸೊ ಪರ್ಗಟ್ ಜಾಯ್ತ್ ತರ್? ಕಾಂಯ್ ಇಲ್ಲಿಶಿ ತರೀ sensitivity ಆಮ್ಚೆ ಥಂಯ್ ನಾಕಾ?

ಇತ್ಲೆಂ ಮಾತ್ ನಂಯ್, ಖಂಯ್ ಏಕ್ ನಾಟಕ್, ಸಂಗೀತ್ ಕಾರ್ಯೆಂ, ಪಿಕ್ನಿಕ್ ಆನಿ ಭೊಂವ್ಡೆಂಕ್ ಗೆಲ್ಲೆತವಳ್‌ಯ್ ಹಿಚ್ ಗತ್ ಆಮ್ಚಿ. ತ್ಯಾ ಘಡ್ಯೆ ತ್ಯಾ ಕಾರ್ಯಾಚಿ ಮಜಾ ಭೊಗ್ಚಿ ಸೊಡ್ನ್, ತಾಚೆಂ ರೆಕೊರ್ಡಿಂಗ್ ಕರ್ಚಿ ಪಿಸಾಯ್. ತಾಚೆ ಉಪ್ರಾಂತ್ ಜರ್ ಕೆನ್ನಾಂಯ್ ತೆಂ ರೆಕೊರ್ಡ್ ಕೆಲ್ಲೆ ಕಾರ್ಯೆಂ ಪಳೆಲೆಂ ತರೀ, ಲಾಯ್ವ್ ಶೊ ಪಳೆಲ್ಲಿ ಮಜಾ ಯೇತ್ಗಿ? ಆನಿ ತೆಂಚ್ ಪಳೆಜೆ ಆಸ್‌ ತರ್ ಆಸಲ್ಯೊ ರಾಟಾವಳಿ ಪೂರಾ ಬಗ್ಲೆಕ್ ದವರ್ನ್ ತ್ಯಾ ಕಾರ್ಯಾಕ್ ವೆಚಿ ಗರ್ಜ್ ತರೀ ಕಿತೆಂ ಆಸಲ್ಲಿ? ವೀಡಿಯೋಚ್ ಪಳವ್ಯೆತೊ ನಂಯ್?

ಹ್ಯಾ ವಿಶಿಂ ಇಲ್ಲೆಂ ಚಿಂತ್ಯಾಂ… ಕುಶೆಲಿ ಫೋಟೋಗ್ರಾಫರ್ ಆನಿ ವೀಡಿಯೊಗ್ರಾಫರಾಂಕ್ ತಾಂಚಿ ಕಾಮಾಂ ಕರುಂಕ್ ಸೊಡ್ಯಾಂ. ಅವ್ಘಡ್ ಮೊರ್ನಾಂ ಘಡಲ್ಲೆ ತೆನ್ನಾಂ ತ್ಯಾ ದುಖೇಸ್ತ್ ಕುಟ್ಮಾವಿಶಿಂ ಚಿಂತ್ಯಾಂ, ತಾಂಚೆ ದೂಖ್ ಹಾಳುಕರ್ಚೆವಿಶಿಂ ಕಾಂಯ್ ಚಿಂತ್ಯಾಂ. ಕಾಂಯ್ ಆಮ್ಚ್ಯಾ ಹಜಾರ್ ರಾಟಾವಳಿಂಮದೆಂ ಇಲ್ಲಿ ಫುರ್ಸೊತ್ ಕರ್ನ್, ನಾಟಕ್, ಸಂಗೀತ್ ಕಾರ್ಯಾಕ್, ಪಿಕ್ನಿಕ್ ಯಾ ಭೊಂವ್ಡೆಕ್ ಗೆಲ್ಲೆ ವೆಳಿಂ, ನಾಕಾ ಜಾಲ್ಲ್ಯೊ ಜವಾಬ್ದಾರ‍್ಯೊ ಆಂಗಾರ್ ವೋಡ್ನ್ ಕಾಣ್ಘೆನಾಸ್ತಾನಾ, ತ್ಯಾ ಘಡ್ಯೆಚಿ, ಕಾರ್ಯಾಚಿ, ಸಂಗೀತ್ ನಾಟಕಾಚಿ ಮಜಾ ಭಗ್ಯಾಂ. ಆಮ್ಚಿಂ ಆನಿ ಹೆರಾಂಚಿ ಕಾಂಯ್ ಖಂತ್ ಬೆಜಾರಾಯ್ ಹಾಳು ಕರ್ಯಾಂ… ಇಲ್ಲೆಂ ತರೀ ಸುಧಾರ್ಯಾಂ…

► ಕಿಶೂ, ಬಾರ್ಕುರ್