ಎಮ್. ಪಿ. ರೊಡ್ರಿಗಸ್ 

ಸಬಾರ್ ವರ್ಸಾಂ ದುಬಂಯ್ತ್ ವಾವುರ್ನ್, ಪ್ರಸ್ತುತ್ ಕುಟ್ಮಾಸಾಂಗಾತಾ ಮಂಗ್ಳುರ್ ಮಿಲಾರ್ ಪಿರ್ಗಜೆಚ್ಯಾ ವಾಸ್ ಲೇನಾಂತ್ ವಸ್ತಿ ಕರುನ್ ಆಸ್ಚ್ಯಾ ಕವಿ ಎಮ್. ಪಿ. ರೊಡ್ರಿಗಸ್ ಹಾಂಚ್ಯಾ ವಿಂಚ್ಣಾರ್ ಕವಿತೆಂಚೆ – ರುಮ್ಡಿ ಪುಲಾಂ (2009) ಆನಿ ರಸ್ತ್ಯಾ ದೆಗೆಚಿಂಫುಲಾಂ (2017) – ಅಶೆಂ ದೋನ್ ಜಮೆ ಫಾಯ್ಸ್ ಜಾಲ್ಯಾತ್ ಆಸುನ್, 2010 ವ್ಯಾ ತಾಂಚ್ಯಾ 'ರುಮ್ಡಿ ಫುಲಾಂ' ಬುಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ಆನಿ 'ರಸ್ತ್ಯಾ ದೆಗೆಚಿಂಫುಲಾಂ' ಬುಕಾಕ್ ಗೊಂಯ್ ಸಾಹಿತ್ಯ ಅಕಾಡೆಮಿ ಥಾವ್ನ್ 2018 ವ್ಯಾ ವರ್ಸಾಚೊ ಉತ್ತೀಮ್ ಪುಸ್ತಕ್ ಪುರಸ್ಕಾರ್ ಫಾವೊ ಜಾಲ್ಯಾತ್. ಕೊಂಕ್ಣಿ ಕವಿತೆಚ್ಯಾ ಉದರ್ಗತೆಖಾತಿರ್ ವಾವುರ್ಚ್ಯಾ ಮಂಗ್ಳುರ್ಚ್ಯಾ ಕವಿತಾ ಟ್ರಸ್ಟಾನ್ ಪಾಟಂವ್ಚೊ 2015 ವ್ಯಾ ವರ್ಸಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ತಾಂಕಾ ಲಾಭ್ಲಾ. ಕವಿತೆ ಶಿವಾಯ್ ಸುವಾರ್ತೆ ಗಿತಾಂಯ್ ತೆ ರಚುನ್ ಆಸಾತ್. ಅಪ್ರೂಪ್ ಮಟ್ವ್ಯೊ ಕಾಣಿಯೊಯ್ ಬರಯ್ತಾತ್. ರಾಕ್ಣೊ ಪತ್ರಾಚೊ ಸ್ಥಾಪಕ್ ಮೊ| ಸಿಲಾ ಮಿನೇಜಾ ಥಾವ್ನ್ ಪ್ರೇರಣ್ , ಮಾರ್ಗದರ್ಶನ್ ಜೊಡ್‌ಲ್ಲ್ಯಾ ತಾಣಿ ರಚ್‌ಲ್ಲ್ಯೊ ಭಕ್ತಿಕ್ ಕವಿತಾ ಮಾ. ಜೆ. ಎಸ್. ಟಿ. ಲುದ್ರಿಗ್ ಹಾಂಚ್ಯಾ ಸಂಗೀತಾಂತ್ ಮಿಸ್ಳಾಲ್ಯಾತ್. ‘ಆಮ್ಚೆ ಸಮಾಜೆಂತ್ಲಿಂ ಪದಾಂ’ ಬುಕಾಂತ್ ತಾಂಚಿಂ ಪದಾಂ ಆಸಾತ್. ಸಿರಿವಂತಾಚೊ ಲಾಗ್ಶಿಲ್ಯಾನ್ ಸಂಪರ್ಕ್ ಆಸ್‌ಲ್ಲ್ಯಾ ತಾಂಚಿ ಜಾಯ್ತಿಂ ವೈಚಾರಿಕ್ ಲೇಖನಾಂ ತವಳ್ಚ್ಯಾ ‘ಕಾಣಿಕ್’ ಆನಿ ‘ಪಯ್ಣಾರಿ’ ಪತ್ರಾರ್ ಫಾಯ್ಸ್ ಜಾಲ್ಲಿಂ ಆಸಾತ್. ರಾಕ್ಣೊ ಪತ್ರಾರ್ ತಾಂಚಿ ‘ಮೊಗಾಚಿ ಧಾಂವ್’ ಕಾದಂಬರಿ ಶಿಂಕ್ಳೆರುಪಾರ್ ಫಾಯ್ಸ್ ಜಾಲ್ಲಿ ಆಸಾ. ‘ಕಾಂಟ್ಯಾಚೊಂ ಖುರಿಸ್’ ಆನಿ ‘ನಿಮಾಣಿ ಆಶಾ’ – ತಾಣಿ ಅನುವಾದ್ ಕರುನ್ ಫಾಯ್ಸ್ ಕೆಲ್ಲ್ಯೊ ಹೆರ್ ಕಾದಂಬರಿ.