ಶಿಕೇರಾಮ್, ಸುರತ್ಕಲ್

ಮಾಧ್ಯಮಿಕ್ ಇಸ್ಕೊಲಾಂತ್ ಶಿಕ್ತಾನಾಂಚ್ ಕನ್ನಡ ತಶೆಂ ಕೊಂಕ್ಣೆಂತ್ ಮಟ್ವ್ಯೊ ಕಾಣಿಯೊ, ಲಲಿತ್ ಪ್ರಬಂಧ್, ಕವಿತಾ ಆನಿ ವೈಚಾರಿಕ್ ಲೇಖನಾಂ ಬರವ್ನ್ ಆಯಿಲ್ಲೊ ರೊನಾಲ್ಡ್ ಜೋಸೆಫ್ ಸಿಕ್ವೇರಾ ಗಾಂವಾನ್ ಸುರತ್ಕಲ್‌ಚೊ. ಬಿ.ಕೊಮ್. ಪದ್ವೆದಾರ್, ವೃತ್ತೆನ್ ಇಲೆಕ್ಟ್ರಿಕಲ್ ಕಂತ್ರಾಟ್‌ದಾರ್ ಜಾವ್ನಾಸ್‌ಲ್ಲ್ಯಾ ತಾಣೆ ಬೆಂಗ್ಳುರ್, ಚಿಕ್‌ಮಗ್ಳುರ್, ಹಾಸನ್ ಧರುನ್ ರಾಜ್ಯಾಚಾ ಚಡಾವತ್ ಜಿಲ್ಲ್ಯಾಂನಿ ಸರ್ಕಾರಿ ತಶೆಂ ಖಾಸ್ಗಿ ಸಂಸ್ಥ್ಯಾಂಕ್ ಸೆವಾ ದಿಲ್ಯಾ. ವೃತ್ತೆಚ್ಯಾ ದಬಾವಾನ್ ಆನಿ ವೆಳಾಚ್ಯಾ ಅಭಾವಾನ್ ಥೊಡೊ ತೇಂಪ್ ಲಿಕ್ಣೆಕ್ ವಿರಾಮ್ ದಿಲ್ಲ್ಯಾ ತಾಣೆ ಪರತ್ ಲಿಕ್ಣಿ ಹಾತಿಂ ಘೆವ್ನ್ ಕಾಂಯ್ ಧಾ ವರ್ಸಾಂನಿಂ ಪಂಚ್ವಿಸಾ ಪ್ರಾಸ್ ಚಡ್ ಮಟ್ವ್ಯೊ ಕಾಣಿಯೊ, ಪನ್ನಾಸಾ ವಯ್ರ್ ಪ್ರಬಂದ್ ಆನಿ ಲೇಖನಾಂ ತಶೆಂ ಜಾಯ್ತ್ಯೊ ಕವಿತಾ ಬರಯ್ಲ್ಯಾತ್. ಫ್ರೆಡ್ ಎಸ್. ಕಾಮತ್, ವಿಲ್ಫಿ ರೆಬಿಂಬಸ್, ಸನ್ನಿ ಎ ಡಿಸೊಜಾ ತಸಲ್ಯಾ ಮಾಲ್ಘಡ್ಯಾ ಸಾಂಗಾತಾ ಕಾಮ್ ಕರುನ್ ಅನ್ಭೊಗ್ ಆಸ್‌ಲ್ಲೊ ತೋ ಅಮೆಚೂರ್ ರೆಡಿಯೊ 'ಹ್ಯಾಮ್' ಸಾಂದೊ ಜಾವ್ನಾಸ್‌ಲ್ಲೊ. ಮಹಮ್ಮದ್ ರಫಿ ಆನಿ ವಿಲ್ಫಿ ರೆಬಿಂಬಸಾಚಿಂ ಪದಾಂ ಉತರ್ ಆನಿ ತಾಳೊ ಚುಕಾನಾಸ್ತಾನಾ ಗಾಂವ್ಚ್ಯಾ ತಾಕಾ ಡಿ.ವಿ.ಜಿ. ಚೆಂ 'ಮಂಕು ತಿಮ್ಮನ ಕಗ್ಗ' ಕಾವ್ಯೆಂ ತೊಂಡ್ಪಾಟ್ ಆಸ್‌ಲ್ಲೆಂ. ನಿವೃತ್ ಜಾಲ್ಯಾರೀ ತಬಲಾ ಆನಿ ಪಿರ್ಲುಕೆಚಿ ಸಂಗೀತ್ ತರ್ಭೆತಿ ತೋ ಜೊಡುನ್ ಆಸ್ಲೊ. ಏಕ್ ಉತ್ತೀಮ್ ಕಾರ್ಯಾನಿರ್ವಾಹಕ್ ತಶೆಂ ಸಂಘಟಕ್ ಜಾವ್ನಾಸ್ಚ್ಯಾ ತಾಣೆ ಕೊಂಕ್ಣಿ ಸಾಹಿತಿ ಆನಿ ಕಲಾಕಾರಾಂಚೆಂ ಸಂಘಟನ್ ( KWAA ) ಹಾಚೊ ಅಧ್ಯಕ್ಷ್ ಜಾವ್ನ್ ಸೆವಾ ದಿಲ್ಯಾ. 2017 ವ್ಯಾ ವರ್ಸಾ ತಾಚ್ಯಾ ವಿಂಚ್ಣಾರ್ ಕಾಣಿಯಾಂಚೊ ಜಮೊ 'ಗರ್ಜೆಕ್ ಪಡತ್' ಫಾಯ್ಸ್ ಜಾಲ್ಲೊ. ಹ್ಯಾ ಜಮ್ಯಾಕ್ 2019 ವ್ಯಾ ವರ್ಸಾ ಮಣಿಪಾಲ್‌ಚ್ಯಾ ಡೊ। ಟಿ. ಎಮ್. ಎ. ಪಯ್ ಫಾಂವ್ಡೇಶನ್ ಥಾವ್ನ್ ವರ್ಸಾಚೊ ಉತ್ತೀಮ್ ಪುರಸ್ಕಾರ್ ಪ್ರಶಂಸಾ ಪುರಸ್ಕಾರ್ ಫಾವೊ ಜಾಲ್ಲೊ. ತಾಚ್ಯಾ ವಿಂಚ್ಣಾರ್ ವಿನೋದಿಕ್ ಬರ್ಪಾಂಚೊಂ ಸಂಗ್ರಹ್ ಛಾಪ್ಯಾಂತ್ ಆಸ್ತಾನಾಂಚ್ 2024 ಮೇ 6 ತಾರಿಕೆರ್, ಥೊಡ್ಯಾಚ್ ಕಾಳಾಚ್ಯಾ ಪಿಡೆನ್ ತೋ ದೆವಾದೀನ್ ಜಾಲೊ. ತಾಚ್ಯಾ ಸಂಪರ್ಕಾಕ್ ಆಯಿಲ್ಲ್ಯಾ ಹರ್ ವೆಕ್ತಿಚೊ ಜಲ್ಮಾ ದೀಸ್ ವಿಸ್ರಾನಾಸ್ತಾನಾ ಉಡಾಸ್ ದವರುನ್ ಪಯ್ಲ್ಯಾ ಫಾಂತ್ಯಾರ್ ಫೊನ್ ಕರುನ್ ಶುಭಾಶಯ್ ಪಾಟಂವ್ಚಿ ರಿವಾಜ್ ಜೀಣ್ ಭರ್ ಪಾಳ್ನ್ ಆಯಿಲ್ಲ್ಯಾ ತಾಚಿ ಜಲ್ಮಾ ತಾರಿಕ್ : ಜೂನ್ 5, 1954