ಮುಕೆಲ್ಪಣಾಂತ್ ವೃತ್ತಿಪರತಾ ಆನಿ ಗ್ರಾಹಕ್ ಸೆವೆಂತ್ ಸಕಾರಾತ್ಮಕ್ ಮನೋಭಾವ್ ವಾಡಂವ್ಚ್ಯಾ ದಿಶೆನ್ ಎಂಸಿಸಿ ಬ್ಯಾಂಕಾಂತ್ ಎಕಾ ದಿಸಾಚಿ ವಿಶೇಷ್ ತರ್ಭೆತ್ ಕಾರ್ಯಾವಳ್ ಮಾಂಡುನ್ ಹಾಡ್ಲ್ಲಿ. ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಅನಿಲ್ ಲೋಬೊ ಹಾಣಿ ಕಾರ್ಯಾವಳಿಚೆಂ ಅಧ್ಯಕ್ಷ್ ಸ್ಥಾನ್ ಘೆತ್ಲ್ಲೆಂ. ಮುಕೆಲ್ ಉಲವ್ಪಿ ಜಾವ್ನ್ ಮಸ್ಕತ್ ಬ್ಯಾಂಕಿಂಗ್ ಆನಿ ಆರ್ಥಿಕ್ ಅಧ್ಯಯನ್ ಕೊಲೆಜಿಚೊ ಪ್ರಾಧ್ಯಾಪಕ್ ಡೊ| ಕೆ. ರಾಜೇಶ್ ನಾಯಕ್ ಆನಿ ಮಂಗ್ಳುರ್ಚೊ ನಾಮ್ಣೆಚೊ ಚಾರ್ಟರ್ಡ್ ಎಕಾಂವ್ಟೆಂಟ್ ಎಸ್. ಎಸ್. ನಾಯಕ್ ಹಾಜರ್ ಆಸ್ಲೆ.
“ಭಾರತಾಚಿ ಬ್ಯಾಂಕಿಂಗ್ ವೆವಸ್ತಾ ಸಂಸಾರಾಂತ್ಚ್ ಪಯ್ಲ್ಯಾ ಸ್ಥಾನಾರ್ ಆಸಾ. ಬ್ಯಾಂಕಾಂತ್ ನವಿಂ ಉಪಕ್ರಮಾಂ ಹಾತಿಂ ಘೆತಾನಾ ಗ್ರಾಹಕಾಂಕ್ ವಿಶ್ವಾಸಾಂತ್ ಘೆವ್ನ್ ಕರೂಂಕ್ ಜಾಯ್. ಸಹಕಾರಿ ಶೆತಾಂತ್ ದಕ್ಶಿಣ ಕನ್ನಡ ಆನಿ ಉಡುಪಿ ಜಿಲ್ಲ್ಯಾಂನಿ ಬ್ಯಾಂಕಿಂಗಾಕ್ ಧಾರಾಳ್ ಅವ್ಕಾಸ್ ಆಸೊನ್, ಗ್ರಾಹಕ್ ಸೆವೆಂತ್ ಕಾಂಯ್ ಸಮಸ್ಸೆ ಆಸ್ಲ್ಯಾರ್ ತೆ ಶಾಖ್ಯಾ ಹಂತಾರ್ಚ್ ಪರ್ಯಾರ್ ಕರಿಜೆ” ಮ್ಹಣ್ ಸಿ.ಎ. ನಾಯಕ್ ಹಾಣಿ ಮ್ಹಳೆಂ. ಡೊ| ಕೆ. ರಾಜೇಶ್ ನಾಯಕ್ ಹಾಣಿ ಕೃತಕ್ ಬುದ್ವಂತ್ಕಾಯ್ ಕಿತ್ಲಿ ಮುಕಾರ್ ಗೆಲ್ಯಾರ್ ಬ್ಯಾಂಕಿಂಗಾಂತ್ ಮನ್ಶ್ಯಾ ಕೌಶಲ್ಯಾಂ ಉರ್ತಲೆಂ ಮ್ಹಣ್ ಅಭಿಪ್ರಾಯ್ ಉಚಾರ್ಲಿ.
“ಮುಕೆಲ್ಪಣ್ ಮ್ಹಳ್ಯಾರ್ ಫಕತ್ ನಿರ್ಧಾರ್ ಘೆಂವ್ಚೆ ಮಾತ್ ನಯ್, ಗ್ರಾಹಕಾಂಕ್ ವಿಶ್ವಾಸಾಂತ್ ಘೆಂವ್ಚೆಂ ಆನಿ ಲಾಂಬ್ ಕಾಳಾಕ್ ಉರ್ಚೆ ತಸಲೊ ಸಂಬಂದ್ ಬಾಂದುನ್ ಹಾಡ್ಚೊ. ಗ್ರಾಹಕಾಂ ಲಾಗಿಂ ಸಕಾರತ್ಮಕ್ ಸಂವಾದ್ ಚಡ್ ಗರ್ಜೆಚೊ ಕಿತ್ಯಾಕ್ ಮ್ಹಳ್ಯಾರ್ ಹೋಚ್ ಸಂವಾದ್ ಲಾಂಬ್ ಕಾಳಾಚೊ ವಿಶ್ವಾಸಿ ಸಂಬಂದ್ ಜಾವ್ನ್ ಬದಲ್ತಾ” ಮ್ಹಣ್ ಕಾರ್ಯಾವಳಿಚೊ ಅಧ್ಯಕ್ಷ್ ಸಹಕಾರ ರತ್ನ ಅನಿಲ್ ಲೋಬೊ ಹಾಣಿ ಮ್ಹಳೆಂ.
ನಿರ್ದೇಶಕಾಂಚ್ಯಾ ಮಂಡಳಿ ತರ್ಫೆನ್ ಸಿ.ಜಿ.ಪಿಂಟೊ ಹಾಣಿ ಅಭಿಪ್ರಾಯ್ ಉಚಾರ್ಲಿ.
ಆಲ್ವಿನ್ ಡಿ ಸೊಜಾ ಹಾಣೆ ಕಾರ್ಯೆಂ ಚಲವ್ನ್ ವೆಲೆಂ ಆನಿ ದಿನ್ವಾಸ್ ಪಾಟಯ್ಲೆ. ಕಾರ್ಯಾವಳಿಕ್ ಬ್ಯಾಂಕಾಚೆ ನಿರ್ದೇಶಕ್, ಆಡಳ್ಯ್ತ್ಯಾ ಮಂಡಳಿಚೆ ಸಾಂದೆ, ಆಡಳ್ತ್ಯಾ ದಫ್ತರಾಚೆ ಶಿಬಂದಿ, ಶಾಖ್ಯಾಂಚೆಂ ವೆವಸ್ತಾಪಕ್ ಹಾಜರ್ ಆಸ್ಲೆ.
