ಭುರ್ಗ್ಯಾಂಕ್ ಪವಿತ್ ಪುಸ್ತಕಾಚೊ ಸಂದೇಶ್ ಆಕರ್ಶಕ್ ರಿತಿನ್ ಪಾವಂವ್ಚ್ಯಾ ಉದ್ದೇಶಾನ್ “ಲೆಂಟನ್ ಗಾಸ್ಪೆಲ್ ಕಾಮಿಕ್ಸ್” ಮ್ಹಳ್ಳೊ ಪುಸ್ತಕ್, ಸಿಂಜಿಚ್ಯಾ ಬುದ್ವಾರಾಚ್ಯಾ ದುಸ್ರ್ಯಾ ದಿಸಾ, ಹ್ಯಾಚ್ ಫೆಬ್ರೆರ್ 19 ವೆರ್ ಬಿಕರ್ನಕಟ್ಟೆ ಬಾಳೊಕ್ ಜೆಜುಚ್ಯಾ ಪೂನ್ಶೆತಾಂತ್, ಕರೆಜ್ಮಾಚ್ಯಾ ಕಾಳಾಕ್ ಸಹಜ್ ಜಾವ್ನ್ ಮೊಕ್ಳಿಕ್ ಕೆಲೊ.
“ಸರಳ್ ನಿರೂಪಣ್ ಆನಿ ಆಕರ್ಶಕ್ ಚಿತ್ರಾಂ ಮುಕಾಂತ್ರ್ ಭುರ್ಗ್ಯಾಂಕ್ ದೆವಾಚೆಂ ಉತರ್ ಸಮ್ಜೊಂಕ್ ಆದಾರ್ ಜಾಯ್ಶೆಂ ಹೊ ಪುಸ್ತಕ್ ತಯಾರ್ ಕೆಲಾ. ಭುರ್ಗ್ಯಾಂಕ್ ಪಸಂದೆಚಿಂ ನವಿಂ ವಿದಾನಾಂ ವಾಪರುನ್ ಭುರ್ಗ್ಯಾಂ ಥಂಯ್ ಭಾವಾರ್ಥ್ ಘಟ್ ಕರ್ಚೊ ಹ್ಯಾ ಪ್ರೇತನಾ ಪಾಟ್ಲೊ ಉದ್ದೇಶ್. ಭುರ್ಗ್ಯಾಂನಿ ಕ್ರೀಸ್ತಾಚ್ಯಾ ವಾಟೆರ್ ಚಲೊನ್, ಅರ್ಥಾಭರಿತ್ ಪಾಸ್ಕ್ ಆಚರಣ್ ಕರ್ಚೆ ದಿಶೆನ್ ಹೊ ಬೂಕ್ ಉಪಾರ್ತಲೊ” ಮ್ಹಣ್ ಪೂನ್ಶೆತಾಚೊ ವ್ಹಡಿಲ್ ಮಾ| ಬಾ| ಸ್ಟೀವನ್ ಪಿರೇರಾ ಹಾಣಿ ಹ್ಯಾ ಸುವಾಳ್ಯಾರ್ ತಾಂಚಿ ಅಭಿಪ್ರಾಯ್ ಉಚಾರ್ಲಿ.
ಪುಸ್ತಕಾಚೊ ಲೇಖಕ್ ಆನಿ ಧ್ಯಾನ ಸಾಧನ ಕೇಂದ್ರ್ ಹಾಚೊ ನಿರ್ದೇಶಕ್ ಮಾ| ಬಾ| ರಿಚರ್ಡ್ ಮಿನೇಜಸ್ ಹಾಣಿ ” ಹ್ಯಾ ಪುಸ್ತಕಾಂತ್ ಹರ್ ದಿಸಾಚೆಂ ವಾಚಪ್ ದೋನ್ ವಾಂಟ್ಯಾಂನಿ ದಿಲಾಂ. ಪಯ್ಲೊ ವಾಂಟೊ ಭುರ್ಗ್ಯಾಂ ಖಾತಿರ್ ಸರಳ್ ನಿರೂಪಣ್ ಆನಿ ದುಸ್ರೊ ವಾಂಟೊ ವಾಚ್ಪಾಚೊ ಸಂದೇಶ್ ದಿಸ್ಪಡ್ತ್ಯಾ ಜಿವಿತಾಂತ್ ಕಸೊ ಲಾಗು ಕರ್ಯೆತ್ ಮ್ಹಳ್ಳೆವಿಶ್ಯಾಂತ್ ಪ್ರಾಯೋಗಿಕ್ ಚಿಂತಪ್” ಮ್ಹಣ್ ಬುಕಾ ಪಾಟ್ಲ್ಯಾ ಪರಿಕಲ್ಪನಾ ವಿಶ್ಯಾಂತ್ ಸಮ್ಜಣಿ ದಿಲಿ.
ಸಾಂ. ಜುಜೆ ಕೊವೆಂತಾಚೊ ವ್ಹಡಿಲ್ ಮಾ| ಬಾ| ಮೆಲ್ವಿನ್ ಡಿಕೂನಾ ಹಾಣಿ ಮಾ|ಬಾ| ವಾಲ್ಟರ್ ಡಿಸೋಜಾ ಆನಿ ಮಾ| ಬಾ| ಸ್ಟೀಫನ್ ಪಿರೇರಾ ಹಾಂಚ್ಯಾ ಸಾಂಗಾತಾ ಪುಸ್ತಕ್ ಲೊಕಾರ್ಪಣ್ ಕೆಲೊ.
ಆಧುನಿಕ್ ದೊತೊರ್ನಿಕ್ ಹೊ ಪುಸ್ತಕ್ ಏಕ್ ಆದಾರ್ ಕೃತಿ ಆನಿ ಕರೆಜ್ಮಾಚ್ಯಾ ಕಾಳಾರ್ ಭುರ್ಗ್ಯಾಂ ಥಂಯ್ ಬಾವಾರ್ಥ್ ಘಟ್ ಕರುಂಕ್ ಕುಟ್ಮಾಚ್ಯಾ ವ್ಹಡಿಲಾಂಕ್ ಆನಿ ಶಿಕ್ಶಕಾಂಕ್ ಹೊ ಪುಸ್ತಕ್ ಉಪ್ಕಾರಾಚೆಂ ಸಾಧನ್ ಜಾತೆಲೆಂ ಮ್ಹಣ್ ಪರ್ಗಟ್ಣಾರಾಂನಿ ಕಳಯ್ಲಾಂ.
