ಬೆಳ್ಮಣಾಂತ್ ಎಕಾ ವರ್ಸಾ ಆದಿಂ ಸುರ್ವಾತ್ಲೆಲ್ಯಾ ಎಂಸಿಸಿ ಬ್ಯಾಂಕಾಂತ್ 10 ಕೊರೊಡ್ ವೆವ್ಹಾರ್ ಕರ್ಚೆಸವೆಂ ದಾಕ್ಲೊ ಕೆಲಾ ಆಸುನ್, ಸನ್ವಾರಾ ಫೆಭ್ರೆರ್ 28 ವೆರ್ ವಾರ್ಷಿಕೋತ್ಸವ್ ಆನಿ 10 ಕೊರೊಡ್ ವೆವ್ಹಾರಾಚೊ ಸಂಭ್ರಮ್ ಆಚರಣ್ ಚಲ್ಲೊ.
ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಅನಿಲ್ ಲೋಬೊ ಹಾಣಿ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಘೆತ್ಲ್ಲೆಂ. ಪರಪ್ಪಾಡಿ ಫಿರ್ಗಜೆಚೊ ವಿಗಾರ್ ಮಾ| ಡೆನಿಸ್ ದೆಸಾ, ಬೆಳ್ಮಣ್ ಸಾಂ. ಜುಜೆ ಹೈಸ್ಕೂಲಾಚಿ ಮುಕೆಲ್ ಶಿಕ್ಶಕಿ ಲೈಲಾ ಬಬಿತಾ ನೊರೊನ್ಹಾ ಮುಕೆಲ್ ಸಯ್ರಿಂ ಜಾವ್ನ್ ಹಾಜರ್ ಆಸ್ಲಿಂ.ವೆದಿರ್ ಬ್ಯಾಂಕಾಚೊ ಉಪಾಧ್ಯಕ್ಷ್ ಜೆರಾಲ್ಡ್ ಜೂಡ್ ಡಿ ಸಿಲ್ವ, ನಿರ್ದೇಶಕ್ ಡಾ| ಫ್ರೀಡಾ ಡಿ ಸೊಜಾ, ಮಹಾಪ್ರಬಂದಕ್ ಸುನಿಲ್ ಮಿನೇಜಸ್ ಆನಿ ಬೆಳ್ಮಣ್ ಶಾಖ್ಯಾಚಿ ಪ್ರಬಂದಕಿ ಶೈನಿ ಲಸ್ರಾದೋ ಹಾಜರ್ ಆಸ್ಲಿಂ.
ಕೇಕ್ ಕಾತರ್ಚೆ ಸವೆಂ ಸಂಭ್ರಮ್ ಆಚರಣಾಕ್ ಚಾಲನ್ ದೀವ್ನ್ ಆಪ್ಲ್ಯಾ ಅಧ್ಯಕ್ಶೀಯ್ ಭಾಷಣಾಂತ್ ಸಹಕಾರ ರತ್ನ ಅನಿಲ್ ಲೋಬೊನ್ “ಎಕಾಚ್ ವರ್ಸಾ ಭಿತರ್ 10 ಕೊರೊಡಾಂಚೊ ಮಯ್ಲಾಫಾತೊರ್ ಉತ್ರೊಂಚೆಂ ಮ್ಹಳ್ಯಾರ್ ಸಾಮೂಹಿಕ್ ಪ್ರೇತನಾನ್ ಮಾತ್ ಸಾಧ್ಯ್. ಆಮ್ಚ್ಯಾ ಪಯ್ಸಾ ದಿಶ್ಟಿಕ್ ಗ್ರಾಹಕಾಂಚೊ ವಿಶ್ವಾಸ್ ಮೆಳ್ಳ್ಯಾರ್ ಸಾಧನ್ ಕರುಂಕ್ ಸುಲಭ್. ಬ್ಯಾಂಕಾಚಾ ಗ್ರಹಕಾಂಕ್ ತುರ್ತ್ ಆನಿ ಪರಿಣಾಮ್ಕಾರಿ ಸೆವಾ ದಿಂವ್ಚೊಚ್ ಆಮ್ಚೊ ಮುಕೆಲ್ ಶೆವೊಟ್” ಮ್ಹಣ್ ತಾಣೆ ಅಭಿಪ್ರಾಯ್ ಉಚಾರ್ಲಿ ಆನಿ ಗ್ರಾಹಕಾಂಕ್ ಶಾಭಾಸ್ಕಿ ಪಾಟಯ್ಲಿ.
ಆಪ್ಲ್ಯಾ ಭಾಷಣಾಂತ್ ಮುಕೆಲ್ ಸಯ್ರೊ ಮಾ| ಬಾ| ಡೆನಿಸ್ ಡಿ ಸೊಜಾ ಹಾಣಿ “ನಯ್ತಿಕ್ ಮೌಲ್ಯಾಂ, ಶಿಸ್ತೆಚೆಂ ಆಡಳ್ತೆಂ, ಪಾರದರ್ಶಕ್ ವೆವ್ಹಾರ್ ಆನಿ ಸೆವೆಚೊ ಮನೋಭಾವ್ – ಹ್ಯಾ ಸಂಗ್ತಿಂನಿ ಕಸಲಿಚ್ ಸೊಡ್ದೊಡ್ ಕರಿನಾತ್ಲ್ಯಾನ್ ಎಂಸಿಸಿ ಬ್ಯಾಂಕಾಕ್ ಆಜ್ ಹೆಂ ಸಾಧನ್ ಕರುಂಕ್ ಸಾಧ್ಯ್ ಜಾಲಾಂ” ಮ್ಹಣ್ ಬ್ಯಾಂಕಾಚಿ ತೊಕ್ಣಾಯ್ ಕರ್ನ್ ಆಪುಣ್ 2004 ವ್ಯಾ ವರ್ಸಾ ಥಾವ್ನ್ ಎಂಸಿಸಿ ಬ್ಯಾಂಕಾಚೊ ಖಾಯಂ ಆನಿ ಸಂತೃಪ್ತ್ ಗ್ರಾಹಕ್ ಮ್ಹಳೆಂ.
ಹ್ಯಾ ಸುವಾಳ್ಯಾರ್ ಧಾವಿ ಆನಿ ಭಾರಾವಿ ಪರೀಕ್ಶೆಂನಿ ಉತ್ತೀಮ್ ಸಾಧನ್ ಕೆಲ್ಲ್ಯಾ ಗ್ರಾಹಕಾಂಚ್ಯಾ ಭುರ್ಗ್ಯಾಂಕ್ ಆನಿ ಪಂಚ್ವೀಸ್, ಪನ್ನಾಸ್, ಸಾಟ್, ಪಾವುಣ್ಶೆಂ ಆನಿ ಅಯ್ಶಿಂ ಅಶೆಂ ಜಲ್ಮಾದೀಸ್ ಅಚರುಂಚ್ಯಾ ಗ್ರಾಹಕಾಂಕ್ ಸನ್ಮಾನ್ ಕೆಲೊ. ಆಪ್ಲ್ಯಾ ಯಾಜಕೀ ದೀಕ್ಷೆಚೊ ರುಪ್ಯೋತ್ಸವ್ ಆಚರುಂಚ್ಯಾ ಮಾ| ಬಾ| ಡೆನಿಸ್ ಡಿ ಸೊಜಾ ಹಾಂಕಾಂಯ್ ಹ್ಯಾ ಸುವಾಳ್ಯಾರ್ ಮಾನ್ ಕೆಲೊ.
ಶಿಬಂದೆಚ್ಯಾ ಪ್ರಾಥನ್ ಗೀತಾದ್ವಾರಿಂ ಕಾರ್ಯಕ್ರಮಾಕ್ ಚಾಲನ್ ದಿಲೆಂ. ನಿರ್ದೇಶಕಿ ಡಾ| ಫ್ರೀಡಾ ಡಿ ಸೊಜಾನ್ ಯೆವ್ಕಾರ್ ಮಾಗ್ಲೊ. ಜೇಸನ್ ಪಿರೇರಾ, ಶಿರ್ತಾಡಿ ಹಾಣೆ ಕಾರ್ಯೆಂ ಚಲಯ್ಲೆಂ.
