ಸುರ್ವಾತುನ್ ಫಕತ್ ಸ ಮಯ್ನ್ಯಾಂ ಭಿತರ್ 10 ಕೊರೊಡ್ ವೆವ್ಹಾರ್ ಕೆಲ್ಲೊ ಮಯ್ಲಾಫಾತೊರ್ ಸಂಭ್ರಮ್ ಆನಿ ಸ್ತ್ರಿಯಾಂಚ್ಯಾ ದಿಸಾಂಚೆಂ ಆಚರಣ್ ಆಯ್ತಾರಾ ಮಾರ್ಚ್ 8 ವೆರ್ ಬೈಂದೂರ್ ಎಂಸಿಸಿ ಬ್ಯಾಂಕ್ ಆವರಣಾಂತ್ ಚಲ್ಲೆಂ. ಹ್ಯಾ ಸಂದರ್ಬಾರ್ ಕಂಕ್ನಾಡಿ ಫಾ| ಮುಲ್ಲರ್ ಆಸ್ಪತ್ರೆಚ್ಯಾ ಸಹಯೋಗಾನ್ ಭಲಾಯ್ಕೆ ಶಿಭಿರಾಚೆಂ ಮಾಂಡುನ್ ಹಾಡ್ಲಲೆಂ.
ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರಿ ರತ್ನ ಅನಿಲ್ ಲೋಬೊ ಹಾಣಿ ಕಾರ್ಯಾಚೆಂ ಅಧ್ಯಕ್ಷ್ಪಣ್ ಘೆತ್ಲ್ಲೆಂ. ಮುಕೆಲ್ ಸಯ್ರೆ ಜಾವ್ನ್ ಬೈಂದೂರ್ ಭಾಗೆವೊಂತ್ ಖುರ್ಸಾಚ್ಯ್ಯಾ ಫಿರ್ಗಜೆಚೊ ಯಾಜಕ್ ಮಾ| ಬಾ| ವಿನ್ಸೆಂಟ್ ಕುವೆಲ್ಹೊ, ನಾಟಕಿಸ್ತ್ ಗಣೇಶ್ ಕಾರಂತ್, ಸಮಾಜ್ ಸೇವಕ್ ಫಯಾಜ್ ಅಲಿ, ಬೈಂದೂರ್ ಯಡ್ತರೆ ಧರ್ಮಸ್ಥಳ ಸ್ವಕುಮ್ಕೆ ಪಂಗ್ಡಾಚಿ ಅಧ್ಯಕ್ಷಿಣ್ ಶ್ರೀಮತಿ ಶೈಲಾ ಹಿಂ ಹಾಜರ್ ಆಸ್ಲಿಂ. ಫಾ| ಮುಲ್ಲರ್ಸ್ ಆಸ್ಪತ್ರೆಚೊ ತಜ್ಞ್ ವಯ್ಜ್ ಎಲ್ರೊಯ್ ಸಲ್ಡಾನ್ಹಾ, ಶಾಖ್ಯಾಚೊ ಖಬಾಡ್ದಾರ್ ನಿರ್ದೇಶಕ್ ಎಲ್ರೊಯ್ ಕಿರಣ್ ಕ್ರಾಸ್ಟೋ , ಮಹಾ ಪ್ರಬಂದಕ್ ಸುನಿಲ್ ಮಿನೇಜಸ್ ಆನಿ ಬೈಂದೂರ್ ಶಾಖ್ಯಾಚೊ ಪ್ರಬಂದಕ್ ಸಂದೀಪ್ ಕ್ವಾಡ್ರಸ್ ವೆದಿರ್ ಹಾಜರ್ ಆಸ್ಲೆ.
ಬೋವ್ ಉಣ್ಯಾ ಆವ್ಧೆಂತ್ 10 ಕೊರೊಡ್ ವೆವ್ಹಾರಾಚೊ ಮಯ್ಲಾಫಾತೊರ್ ಉತ್ರೊಂಕ್ ಕಾರಣ್ ಕರ್ತ್ ಜಾಲ್ಲ್ಯಾ ಸರ್ವ್ ಶಿಬಂದಿ ಆನಿ ಗ್ರಾಹಕಾಂಚೊಂ ಬ್ಯಾಂಕಾಚೊ ಅಧ್ಯಕ್ಷ್ ಸಹಕಾರ ರತ್ನ ಅನಿಲ್ ಲೋಬೊ ಹಾಣಿ ಉಪ್ಕಾರ್ ಭಾವುಡ್ಲೊ. ಆನಿ ಎಂಸಿಸಿ ಬ್ಯಾಂಕಾಚಿ ಡಿಜಿಟಲ್ ಸೆವಾ ಹೆರ್ ರಾಷ್ಟ್ರೀಯ್ ಬ್ಯಾಂಕಾಂಚ್ಯಾ ತುಲನಾಂತ್ ಕಾಂಯ್ ಉಣಿ ನಾ. ಲೊಕಾಥಾವ್ನ್ ಹೆಚ್ ಪರಿಂ ಸಹಕಾರ್ ಆನಿ ಪಾಟಿಂಬೊ ಮೆಳ್ಳೊ ತರ್ ವೆಗಿಂಚ್ ಎಂಸಿಸಿ ಬ್ಯಾಂಕ್ ಅಖ್ಖ್ಯಾ ಕರ್ನಾಟಕಾಕ್ ವಿಸ್ತಾರಾಂವ್ಚೆಂ ಸಪಣ್ ಜ್ಯಾರಿ ಜಾತೆಲೆಂ ಮ್ಹಣ್ ತಾಣೆ ಹ್ಯಾ ವೆಳಿಂ ಮ್ಹಳೆಂ.
ಬ್ಯಾಂಕ್ ಶಿಬಂದಿ ಮನೋಜ್ ಲೊಪೆಜ್ ಆನಿ ಕು| ಟ್ರೀಜಾ ಲೊಪೆಜ್ ಹಾಂಚ್ಯಾ ಪ್ರಾಥನ್ ಗೀತಾದ್ವಾರಿಂ ಕಾರ್ಯೆಂ ಸುರ್ವಾತ್ಲೆಂ.
ಶಾಖ್ಯಾ ಖಬಾಡ್ದಾರಿ ನಿರ್ದೆಶಕ್ ಎಲ್ರೊಯ್ ಕಿರಣ್ ಕ್ರಾಸ್ಟೋ ಹಾಣೆ ಯೆವ್ಕಾರ್ ಮಾಗ್ಲೊ. ಬ್ರಹ್ಮಾವರ್ ಶಾಖಾ ಪ್ರಬಂದಕ್ ಓವಿನ್ ರೆಬೆಲ್ಲೊ ಹಾಣೆ ಕಾರ್ಯೆಂ ಚಲಯ್ಲೆಂ ಆನಿ ದಿನ್ವಾಸ್ ಪಾಟಯ್ಲೆ.
