ಆಮ್ಚ್ಯಾ ಪಂಗ್ಡಾಚ್ಯಾ ಮುಕೆಲ್ಪಣಾರ್, ಗ್ರಾಹಕ್ ಸೆವಾ, ಗರ್ಜೆವೊಂತಾಂಕ್ ಆದಾರ್ ಆನಿ ಸಮುದಾಯ್ ಸೆವೆಂತ್ ಪಾಟಿಂ ಉರಾನಾಸ್ತಾನಾ ಎಂ.ಸಿ.ಸಿ. ಬ್ಯಾಂಕ್ ನಿರಂತರ್ ಪ್ರಗತೆಚ್ಯಾ ವಾಟೆರ್ ಚಲ್ತೇ ಆಸುನ್, 2018 ವ್ಯಾ ವರ್ಸಾ ಆಮ್ಚ್ಯಾ ಪಂಗ್ಡಾನ್ ಬ್ಯಾಂಕಾಚೆಂ ಆಡಳ್ತ್ಯಾ ಸುಂಕಾಣ್ ಘೆತಾನಾ ಫಕತ್ 500 ಕೊರೊಡ್ ಆಸ್ಲಲೊ ವೆವ್ಹಾರ್ ಆಜ್ ತೀನ್ ವಾಂಟೆ ವಾಡೊನ್ 1,525 ಕೊರೊಡಾಂಕ್ ತೆಂಕ್ಲಾ. 16 ಶಾಖ್ಯಾಂ ಥಾವ್ನ್ ಬ್ಯಾಂಕ್ 21 ಶಾಖ್ಯಾಂಕ್ ಪಾವ್ಲಾಂ ಆಸುನ್ ಹ್ಯಾ ಆರ್ಥಿಕ್ ವರ್ಸಾಚ್ಯಾ ಆಕೇರಿಕ್ 25 ಶಾಖ್ಯಾಂಕ್ ಪಾಂವ್ಚಿ ಸಂಪೂರ್ಣ್ ತಯಾರಿ ಚಲ್ತೇ ಆಸಾ” ಮ್ಹಣ್ ಎಂಸಿಸಿ ಬಾಂಕಾಚೊ ಅಧ್ಯಕ್ಶ್ ಸಹಕಾರ ರತ್ನ ಅನಿಲ್ ಲೋಬೊನ್ ಮ್ಹಳೆಂ.
ತೋ ಬ್ಯಾಂಕಾಚಾ ಆಡಳ್ತ್ಯಾ ದಫ್ತರಾಂತ್ 2025 -26 ವ್ಯಾ ಆರ್ಥಿಕ್ ವರ್ಸಾ ಬ್ಯಾಂಕಾನ್ ದಾಕಲ್ ಕೆಲ್ಲಿ ಪ್ರಗತಿ ಮಾದ್ಯಮಾಂ ಮುಕಾರ್ ಪೇಶ್ ಕರ್ತಾಲೊ.
“ಪ್ರಸ್ತುತ್ ವರ್ಸಾಂತ್ ಬ್ಯಾಂಕಾನ್ 13 ಕೊರೊಡ್ ಲಾಭ್ ಜೊಡ್ಲಾ ಆಸುನ್, ನಿರಂತರ್ ಪ್ರಯತ್ನಾನ್ ಎನ್.ಪಿ.ಎ. 1.25% ಆಸಾ. ಎಕುಣ್ ವೆವ್ಹಾರ್ 1,525 ಕೊರೊಡಾಂಕ್ ಫಾವೊನ್, ಬ್ಯಾಂಕಾಚಾ ಪ್ರಗತೆಂತ್ 23% ವೃದ್ಧಿ ಜಾಲ್ಯಾ. ಆರ್ಥಿಕ್ ವರ್ಸಾಂತ್ ಬೈಂದೂರಾಂತ್ 20 ವೊ ಶಾಖೊ ಆನಿ ಸಂತೆಕಟ್ಟೆ 21 ಶಾಖೊ ಸುರ್ವಾತ್ಲಾ ಆಸುನ್ ಬೆಳ್ಮಣ್, ಸುರತ್ಕಲ್, ಉಡುಪಿ, ಬೆಳ್ತಂಗಡಿ, ಸಂತೆಕಟ್ಟೆ, ಕಿನ್ನಿಗೋಳಿ ಆನಿ ಕುಲ್ಶೇಕರಾಂತ್ 7 ಏಟಿಎಮ್ ಸ್ಥಾಪನ್ ಕೆಲ್ಯಾಂತ್ ಆಸುನ್ ಪ್ರಸ್ತುತ್ ಎಟಿಎಮಾಂಚೊ ಸಂಕೊ 15 ಜಾಲಾ.”
“2026-27 ವ್ಯಾ ಆರ್ಥಿಕ್ ವರ್ಸಾಂತ್ 4 ನವೆ ಶಾಖೆ ಉಘಡ್ಚೆಂ ಯೋಜನ್ ಆಸುನ್, ಆರ್ಥಿಕ್ ವರ್ಸಾಚ್ಯಾ ಅಕೇರಿಕ್ ಶಾಖ್ಯಾಂಚೊಂ ಸಂಖೊ ಪಂಚ್ವೀಸಾಕ್ ಪಾವ್ತೊಲೊ. 22 ವೊ ಶಾಖೊ ದೇರಳಕಟ್ಟೆ ಆನಿ 23 ವೊ ಶಾಖೊ ಕಟಪಾಡಿ ಹಾಂಗಾಸರ್ ಉಘಡುಂಕ್ ಎದೊಳ್ಚ್ ಅನುಮತಿ ಲಾಭ್ಲ್ಯಾ ಆಸುನ್, ಜೂನ್ ಆನಿ ಆಗೋಸ್ತ್ ಮಯ್ನ್ಯಾಂತ್ ಶಾಖೆ ಕಾಮ್ ಕರುಂಕ್ ಲಾಗ್ತಾಲೆ.” ಮ್ಹಣ್ ತಾಣೆ ಮ್ಹಳೆಂ.
ಎಂಸಿಸಿ ಬ್ಯಾಂಕ್ ಭಾರತ್ ಸರ್ಕಾರಾಚೆಂ ರಿಸರ್ವ್ ಬ್ಯಾಂಕ್ ಆನಿ ಕರ್ನಾಟಕ ಸರ್ಕಾರಾಚೊ ಸಹಕಾರಿ ಇಲಾಖೊ ಹಾಂಚ್ಯಾ ಜೋಡ್ ನಿಯಂತ್ರಣಾರ್ ಕಾಮ್ ಕರ್ತಾ ಜಾಲ್ಲ್ಯಾನ್, ಗ್ರಾಹಕಾಂನಿ ಬ್ಯಾಂಕಾಂತ್ ದವರ್ಚ್ಯಾ ದುಡ್ವಾಕ್ ಡಿಪಾಸಿಟ್ ಇನ್ಸುರೆನ್ಸ್ ಅಂಡ್ ಕ್ರೆಡಿಟ್ ಗ್ಯಾರಂಟಿ ಕಾರ್ಪೊರೇರ್ಷನ್ (DICGC) ಮುಕಾಂತ್ರ್ ವಿಮ್ಯಾ ಸವ್ಲತ್ ಆಸಾ ಮ್ಹಣ್ ಶ್ರೀ ಲೋಬೊನ್ ಮ್ಹಳೆಂ.
ಪತ್ರಾ ಪರಿಶದೆಂತ್ ಬ್ಯಾಂಕಾಚೆ ನಿರ್ದೇಶಕ್, ಆಂಡ್ರೂ ಡಿಸೊಜಾ, ಡಾ| ಜೆರಾಲ್ಡ್ ಪಿಂಟೊ, ಅನಿಲ್ ಪತ್ರಾವೊ, ಜೆ.ಪಿ. ರೊಡ್ರಿಗಸ್, ಡೇವಿಡ್ ಡಿಸೊಜಾ, ಎಲ್ರೊಯ್ ಕಿರಣ್ ಕ್ರಾಸ್ಟೊ, ಹೆರಾಲ್ಡ್ ಮೊಂತೇರೊ, ರೋಶನ್ ಡಿಸೊಜಾ, ಮೆಲ್ವಿನ್ ವಾಸ್, ವಿನ್ಸೆಂಟ್ ಲಸ್ರಾದೊ, ಸುಶಾಂತ್ ಸಲ್ಡಾನ್ಹಾ, ಐರಿನ್ ರೆಬೆಲ್ಲೊ, ಡಾ| ಫ್ರೀಡಾ ಡಿಸೊಜಾ, ಆಲ್ವಿನ್ ಪಿ. ಮೊಂತೆರೊ, ಫೆಲಿಕ್ಸ್ ಡಿಕ್ರೂಜ್ ಆನಿ ಮಹಾ ಪ್ರಬಂದಕ್ ಸುನಿಲ್ ಮಿನೇಜಸ್ ಹಾಜರ್ ಆಸ್ಲೆ.
