ಕೊಂಕಣ್ ಪ್ರದೇಶಾಚೆಂ ಪ್ರಮುಕ್ ಕೊಂಕ್ಣಿ ಸಾಂಸ್ಕೃತಿಕ್ ಸಂಘಟನ್ ಮಾಂಡ್ ಸೊಭಾಣ್, ಅಸ್ತಿತ್ವಾಚಿಂ ಚಾಳೀಸ್ ವರ್ಸಾಂ ಸಂಭ್ರಮ್ಚ್ಯಾ ಸುವಾಳ್ಯಾರ್ (1986 – 2026) ಕೊಂಕಣಿ ಸಂಗೀತಾಕ್ ಉಂಚ್ಲಿ ದೆಣ್ಗಿ ದಿಲ್ಲ್ಯಾ ಸಂಘಟನಾಚೊ ಸ್ಥಾಪಕ್ ಎರಿಕ್ ಒಝೇರಿಯೊಕ್ ಅರ್ಪಣ್ ಜಾವ್ನ್, ಆಪ್ಲ್ಯಾ ಧ್ಯೇಯೋದ್ದೇಶಾಂಕ್ ಪೂರಕ್ – ಪ್ರಥಮ್ ವಿಶ್ವ ಕೊಂಕಣಿ ಸಂಗೀತ್ ಮಹಾ ಸಮಾವೇಶ್ ಮಾಂಡುನ್ ಹಾಡ್ತೇ ಆಸಾ.
ನವೆಂಬರ್ 03 ಥಾವ್ನ್ 15 ಪರ್ಯಾಂತ್ ಚಲ್ಚ್ಯಾ ಹ್ಯಾ ಬೃಹತ್ ಸಂಗೀತ್ ಸಮಾವೇಶಾಚೆಂ ಮುಹೂರ್ತ್ ಆನಿ ಲಾಂಛನ್ ಉಗ್ತಾವಣ್ ಕಾರ್ಯೆಂ ಸುಕ್ರಾರಾ, ಎಪ್ರಿಲ್ 10 ವೆರ್ ಕಲಾಂಗಣಾಂತ್ ಸಾಂಜೆರ್ 4.00 ವರಾಂಚೇರ್ ಚಲ್ತಲೆಂ ಮ್ಹಣ್ ಮಾಂಡ್ ಸೊಭಾಣ್ ಅಧ್ಯಕ್ಷ್ ಲುವಿ ಜೆ. ಪಿಂಟೊ ಹಾಣಿ ಪತ್ರಾ ಪರಿಶದೆಂತ್ ಜಾಹೀರ್ ಕೆಲೆಂ.
ಕರ್ನಾಟಕ ಸರ್ಕಾರ್ ವಿದಾನ್ಸಭೆಚೊ ಅಧ್ಯಕ್ಷ್ ಯು.ಟಿ. ಖಾದರ್ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಜಾಂವ್ಚ್ಯಾ ಕಾರ್ಯಾಂತ್, ಕರ್ನಾಟಕ ಸರ್ಕಾರಾಚೊ ಭಲಾಯ್ಕೆ ಮಂತ್ರಿ ತಶೆಂ ದಕ್ಷಿಣ ಕನ್ನಡ ಜಿಲ್ಲ್ಯಾಚೊ ಖಬಾಡ್ದಾರ್ ಮಂತ್ರಿ ದಿನೇಶ್ ಗುಂಡೂರಾವ್ ಲಾಂಛನ್ ಉಗ್ತಾಯಲೊ. ಮಾನಾಚೆ ಸಯ್ರೆ ಮ್ಹಣುನ್ ಮಂಗ್ಳುರ್ಚೊ ಶಾಸಕ್ ವೇದವ್ಯಾಸ ಕಾಮತ್, ವಿಧಾನ ಪರಿಷತ್ ಸಾಂದೊ ಐವನ್ ಡಿಸೋಜ ಆನಿ ಗೊಂಯ್ಚೊ ಕಲಾಕಾರ್ ಮೈಕಲ್ ಗ್ರೇಶಿಯಸ್ ಹಾಜರ್ ಆಸ್ತಲೆ.
“ಹ್ಯಾ ಸಂಗೀತ್ ಮಹಾ ಸಮಾವೇಶಾಂತ್ 12 ದೀಸ್, 12 ಗಂಟೆ, 12 ಮಿನುಟಾಂ, ಜಮ್ಯಾ ಗಾಯನ್ ಕರುನ್ ಗಿನ್ನೆಸ್ ದಾಕ್ಲೊ ರಚ್ಚೆಂ ಪ್ರೇತನ್ ಚಲ್ತಲೆಂ. ಹ್ಯಾ ಪ್ರೇತನಾಕ್ ಕರ್ನಾಟಕ, ಗೋವಾ, ಮಹಾರಾಷ್ಟ್ರ, ಕೇರಳ ಆನಿ ಹೆರ್ ರಾಜ್ಯಾಂ ಥಾವ್ನ್ ಮಾತ್ ನಯ್, ವಿದೇಶಾ ಥಾವ್ನ್ 6000 ಪ್ರಾಸ್ ಚಡ್ ಗಾವ್ಪಿ ಸಾಂಗಾತ್ ದಿತಲೆ. ಹ್ಯಾ ದಾಖ್ಲ್ಯಾಕ್ ಕಥೊಲಿಕ್, ಜಿಎಸ್ಬಿ, ದಾಲ್ದಿ, ಕುಡ್ಮಿ, ಖಾರ್ವಿ, ಸಿದ್ದಿ, ಸಿರಿಯನ್ ಆರ್ಥೊಡಾಕ್ಸ್ ಆನಿ ಹೆರ್ ಸಮುದಾಯಾಚಿಂ ಸುಮಾರ್ 5000 ಕೊಂಕ್ಣಿ ಪದಾಂ ಗಾಯ್ತಾಲೆ. ಹ್ಯಾ ದಿಸಾಂನಿ ಸಂಗೀತಾಕ್ ಸಂಬಂದಿತ್ ಸಂವಾದ್ ಸತ್ರಾಂ ಆಯೋಜನ್ ಕೆಲ್ಲಿಂ ಆಸುನ್, ಸಂಗೀತ್ ಶೆತಾಂತ್ ಸಾಧನ್ ಕೆಲ್ಲ್ಯಾ ಮಾಲ್ಘಡ್ಯಾಂಕ್ ಮಾನ್ ಕರ್ಚೆ ಬರಾಬರ್, ಕೀರ್ತಿ ಮಂದಿರ್, ಸಂಗೀತ್ ಆನಿ ಸಂಸ್ಕೃತಿಕ್ ಸಂಬಂಧ್ ವಸ್ತು ಪ್ರದರ್ಶನ್ ಆಸ್ತಲೆಂ ಆಸ್ತಲೆಂ” ಮ್ಹಣ್ ಲುವಿ ಪಿಂಟೊ ಹಾಣಿ ಪತ್ರಾ ಪರಿಸದೆಂತ್ ಮಾಹೆತ್ ದಿಲಿ.
ಪತ್ರಾ ಪರಿಶದೆಂತ್, ಕಲಾಂಗಣ್ ಫಿರ್ಜೆಂತ್ – ರೊಯ್ ಕ್ಯಾಸ್ತೆಲಿನೊ, ಪ್ರಥಮ್ ವಿಶ್ವ ಕೊಂಕ್ಣಿ ಸಂಗೀತ್ ಮಹಾ ಸಂಮೇಳಾಚೊ ಸಂಗೀತ್ ನಿರ್ದೇಶಕ್ ಜೊಯೆಲ್ ಪಿರೇರಾ, ಮಾಂಡ್ ಸೊಭಾಣ್ ಸಂಘಟಕ್ ಸ್ಟ್ಯಾನಿ ಆಲ್ವಾರಿಸ್, ಮಾಂಡ್ ಸೊಭಾಣ್ ಉಪಾಧ್ಯಕ್ಷ್ ನವೀನ್ ಲೋಬೊ ಆನಿ ಮಾಂಡ್ ಸೊಭಾಣ್ ಕಾರ್ಯದರ್ಶಿ ರೊನಾಲ್ಡ್ ಕ್ರಾಸ್ತಾ ಹಾಜರ್ ಆಸ್ಲೆ.
