ʻʻಕೊಂಕ್ಣ್ಯಾಂಚೊ ಜಣಾ ಸಂಖೊ ಉಣೊ ತರೀ, ತಾಂಚಿ ಉಮೆದ್ ಆನಿ ಸರ್ಜನ್ಶೀಳತಾ ವಾಖಣೆಕ್ ಫಾವೊ. ಸಾಂಸ್ಕೃತಿಕ್ ಥಳಾರ್ ಆನಿ ಸಮಾಜ್ಸೆವೆಂತ್ ಹೊ ಸಮುದಾಯ್ ಮುಕಾರ್ ಆಸಾ. ಸಂಗೀತ್ ತಾಂಚ್ಯಾ ರಗ್ತಾಂತ್ ಆಸಾ. ಸಬಾರ್ ದಾಖ್ಲೆ ರಚ್ಲ್ಲ್ಯಾ ಮಾಂಡ್ ಸೊಭಾಣ್ ಸಂಸ್ಥ್ಯಾ ಥಾವ್ನ್ ಸ ಹಜಾರ್ ಗಾವ್ಪಿ ಆನಿ ಪಾಂಚ್ ಹಜಾರ್ ಪದಾಂಸವೆಂ ನವೊ ವಿಶ್ವ್ ದಾಖ್ಲೊ ಘಡ್ಚೆಂ ಪ್ರೇತನ್ ಸುರ್ವಾತ್ಲಾಂ. ಸಾಧ್ಯ್ ತರ್ ಹಾಂವ್ಯಿ ಯೆತಲೊಂʼʼ ಮ್ಹಣ್ ಕರ್ನಾಟಕ ಸರ್ಕಾರಾಚ್ಯಾ ಭಲಾಯ್ಕೆ ಆನಿ ಕುಟ್ಮಾ ಕಲ್ಯಾಣ್ಮಂತ್ರಿ ದಿನೇಶ್ ಗುಂಡೂರಾವ್ ಹಾಣೆಂ ಸಾಂಗ್ಲೆಂ.
ತೊ ಕೊಂಕ್ಣೆಚೆಂ ಪ್ರಮುಖ್ ಸಾಂಸ್ಕೃತಿಕ್ ಸಂಘಟನ್ ಮಾಂಡ್ಸೊಭಾಣಾಚ್ಯಾ ಮಾಣಿಕ್ ಉತ್ಸವಾ ಸಂದರ್ಭಿಂ, ನವೆಂಬ್ರ್ 3-15 ಪರ್ಯಾಂತ್ ಯೆವ್ಜಿಲ್ಲ್ಯಾ, ಪಯ್ಲ್ಯಾ ವಿಶ್ವ್ಕೊಂಕ್ಣಿ ಸಂಗೀತ್ ಮಹಾ ಸಮಾವೇಶಾಚೊ ಮುಹೂರ್ತ್, ವೀಣಾ ಪ್ರತಿಕೃತಿ ವಯ್ಲೆ 12 ರಂಗಾಳ್ದಿವೆ ಪೆಟೊವ್ನ್ ಆನಿ ಬೊಂಗೊ ಫುಲೊವ್ನ್ ಲಾಂಛನ್ ಮೆಕ್ಳಿಕ್ ಕರ್ನ್ ಉಲಯ್ಲೊ.
ಮಾನಾಚೊ ಸಯ್ರೊ ವಿಧಾನ್ ಪರಿಷತ್ ಸಾಂದೊ ಐವನ್ ಡಿಸೋಜಾನ್ ಸಂಗೀತ್ ನಿರ್ದೇಶಕ್ ಜೊಯೆಲ್ ಪಿರೇರಾಕ್ ಸಂಗೀತ್ ಬೇಟನ್ ಹಾತಾಂತರ್ ಕೆಲೆಂ. ಮ್ಹಾನ್ ಸಾಧನಾಂ ಕೆಲ್ಲ್ಯಾ ಮಾಂಡ್ ಸೊಭಾಣಾಕ್ ಎದೊಳ್ ಕರ್ನಾಟಕ ರಾಜ್ಯೋತ್ಸವ್ ಪ್ರಶಸ್ತಿ ಮೆಳುಂಕ್ ನಾ. ಹ್ಯಾ ವಿಶಿಂ ಸರ್ಕಾರಾಚೆಂ ಗುಮಾನ್ ವೊಡ್ತಲೊಂ. ಕೊಂಕ್ಣೆಚೊ ಕೀರ್ತಿ ಬಾವ್ಟೊ ಸದಾ ಉಬೊಂವ್ಚ್ಯಾ ಸಂಸ್ಥ್ಯಾಚ್ಯಾ ಹ್ಯಾ ಕಾರ್ಯಾಕ್ ಸರ್ಕಾರಾನ್ ಅನುದಾನ್ ದೀಜೆ. ಹೊ ದಾಖ್ಲೊಯ್ ಯಶಸ್ವೆನ್ ಘಡ್ತಲೊ ಮ್ಹಣ್ ಬರೆಂ ಮಾಗ್ಲೆಂ.
ಹೆರ್ ಮಾನಾಚೆ ಸಯ್ರೆ ಮಂಗ್ಳುರ್ ದಕ್ಷಿಣ್ ಶಾಸಕ್ ವೇದವ್ಯಾಸ ಕಾಮತ್ ಆನಿ ಗೊಂಯ್ಚೊ ಕಲಾಕಾರ್ ಮೈಕಲ್ ಗ್ರೇಶಿಯಸ್ ಹಾಣಿಂ ಬರೆಂ ಮಾಗ್ಲೆಂ.
ಪ್ರಸ್ತಾವಿಕ್ ಉಲೊವ್ಪ್ ದಿಲ್ಲ್ಯಾ ಅಧ್ಯಕ್ಷ್ ಲುವಿ ಪಿಂಟೊನ್ “ಕೊಂಕ್ಣಿ ಸಂಗೀತಾಕ್ ಮಾನ್ ಜೊಡುನ್ ದಿಲ್ಲ್ಯಾ ಎರಿಕ್ ಒಝೇರಿಯೊಚಿಂ ಕಾಮಾಂ ಫುಡೆಂ ವರ್ಚಿಂಚ್ ಆಮಿ ತಾಕಾ ಭೆಟೊಂವ್ಚಿ ನೀಜ್ ಶ್ರದ್ಧಾಂಜಲಿ. ಹೆಂ ಫಕತ್ ಏಕ್ ಗಿನ್ನೆಸ್ ದಾಖ್ಲ್ಯಾ ಪ್ರಯತ್ನ್ ನ್ಹಯ್, ಬಗಾರ್ ಕೊಂಕ್ಣಿ ಎಕ್ವಟ್ ಆಚರುಂಚೆಂ, ಕೊಂಕ್ಣಿ ಬಾವ್ಟೊ ಉಂಚಾಯೆಕ್ ಉಬಾರ್ಚೆಂ ಆನಿ ತ್ಯಾ ಮುಕಾಂತ್ರ್ ಕೊಂಕ್ಣಿ ಸಂಗೀತಾಚಿ ಗಿರೇಸ್ತ್ಕಾಯ್ ಸಂಭ್ರಮ್ಚೊ ಸುವಾಳೊ ಜಾತಲೊ. ಎದೊಳ್ ಆಮ್ಚ್ಯಾ ಕಾರ್ಯಾಚಿ ಶಿಸ್ತ್, ಮಾಂಡಾವಳ್ ಪಳೆವ್ನ್ ಲೊಕಾನ್ ಸಹಕಾರ್ ದಿಲಾ. ಹೆಂ ಕಾರ್ಯೆಂಯ್ ಸರ್ವಾಂಚ್ಯಾ ಸಹಕಾರಾನ್ ಜಯ್ತೆವಂತ್ ಜಾತಲೆಂ” ಮ್ಹಳೆಂ.
ಹ್ಯೆ ವೆಳಿಂ ಜೊಯ್ಸ್ ಒಝೇರಿಯೊಕ್ ಫುಲಾಂಚೊ ಮಾನ್ ಭೆಟಯ್ಲೊ. ವೆದಿರ್ ಮೆಸ್ಕೊಮ್ ಅಧ್ಯಕ್ಷ್ ಹರೀಶ್ ಕುಮಾರ್, ಮಾಂಡ್ ಸೊಭಾಣ್ ಸಂಘಟಕ್ ಸ್ಟ್ಯಾನಿ ಆಲ್ವಾರಿಸ್ ಆನಿ ಕಾರ್ಯದರ್ಶಿ ರೊನಿ ಕ್ರಾಸ್ತಾ ಉಪಸ್ಥಿತ್ ಆಸ್ಲ್ಲೆ. ರೈನಾ ಸಿಕ್ವೇರಾಚ್ಯಾ ಮುಕೆಲ್ಪಣಾರ್ ಸುಮೇಳ್ ಪಂಗ್ಡಾ ಥಾವ್ನ್ ಗಾಯನ್ ಚಲ್ಲೆಂ. ಮಾಂಡ್ ಸೊಭಾಣ್ ಚಲುನ್ಆಯಿಲ್ಲ್ಯಾ ವಾಟೆ ವಿಶ್ಯಾಂತ್ ಸಾಕ್ಷೆ ಚಿತ್ರ್ ದಾಕಯ್ಲೆಂ. ಕಲಾಂಗಣ್ ಪಿರ್ಜೆಂತ್ ರೊಯ್ ಕ್ಯಾಸ್ತೆಲಿನೊನ್ ಆಭಾರ್ ಮಾಂದ್ಲೊ. ಐರಿನ್ ರೆಬೆಲ್ಲೊನ್ ಕಾರ್ಯೆಂ ಚಲಯ್ಲೆಂ.
