ನೆದರ್ಲ್ಯಾಂಡ್ಸಾಂತ್ ರಾವ್ತೆಲ್ಯಾ ಕೊಂಕ್ಣಿ ಉಲಯ್ತೆಲ್ಯಾ ಕ್ರಿಸ್ತಾಂವ್ ಸಮುದಾಯಾನ್ ಪಾಸ್ಕಾಂ ಫೆಸ್ತ್ ಅವಿಸ್ಮರ್ಣೀಯ್ ರಿತಿರ್ ಆಚರ್ಸಿಲೆಂ. ಕೊಂಕ್ಣಿ ಸಮುದಾಯ್ ನೆದರ್ಲ್ಯಾಂಡ್ಸ್ (KSN) ಡಚ್ ವ್ಯಾಪಾರ್ ಮಂಡಳ್ (KVK) ಅಧೀನ್ ಅಧಿಕೃತ್ ಸಾಂಸ್ಕೃತಿಕ್ ಸಂಸ್ಥೊ ಜಾವ್ನ್ ನೋಂದ್ ಕೆಲ್ಲ್ಯಾ ಉಪ್ರಾಂತ್ ಹೆಂ ಪಯ್ಲೊ ವ್ಹಡ್ ಮೆಳಾವೊ ಜಾಲ್ಲ್ಯಾನ್ ಹ್ಯಾ ಫೆಸ್ತಾಕ್ ಖಾಸ್ ಮಹತ್ವ್ ಆಸ್ಲ್ಲೆಂ. ಯುರೋಪಾಂತ್ ಕೊಂಕ್ಣಿ ಡಯಾಸ್ಪೊರಾಕ್ ಏಕ್ ನವಿ ಸುರ್ವಾತ್ ಜಾಲ್ಲಿ.
ಬ್ರೆಡಾಚ್ಯಾ ಸಾಂ ಮಿಕೆಲ್ ಇಗರ್ಜೆಂತ್ ಮಾ| ಬಾ| ರಿಚರ್ಡ್ ಲೋಬೊ ಹಾಣಿ ಸಂಪೂರ್ಣ್ ಕೊಂಕ್ಣಿ ಭಾಶೆನ್ ಮಿಸಾಚೆಂ ಪವಿತ್ ಬಲಿದಾನ್ ಭೆಟಯ್ಲೆಂ. ಮಾಯ್ ಭಾಶೆಂತ್ ಪ್ರಾರ್ಥನ್, ವಾಚಾಪ್ ಆನಿ ದೆವಾಚೆಂ ಉತರ್ ಆಯ್ಕಾಲ್ಲ್ಯಾ ಭಾವಾರ್ಥ್ಯಾಂ ಥಂಯ್ ಕೊಂಕ್ಣೆಚೊ ಮೋಗ್ ಉಮಾಳ್ಳೊ. ಇಗರ್ಜೆಚ್ಯಾ ಪಡ್ದ್ಯಾರ್ ಕೊಂಕ್ಣಿ ಲಿಪಿಯೆಂತ್ ಉತ್ರಾಂ ಘಾಲ್ಲ್ಯಾನ್ ಭುರ್ಗ್ಯಾಂಕ್ ಸಯ್ತ್ ಸುಲಭ್ ಜಾಲೆಂ. ಗಿಟಾರ್ ಆನಿ ಕೀಬೋರ್ಡ್ ಸವೆಂ ಕೊಂಕ್ಣಿ ಕೊರ್ ಗ್ರೂಪಾನ್ ಸಂಗೀತ್ ದಿಲ್ಲೆ.
ಮಿಸಾ ಉಪ್ರಾಂತ್ ಚಲ್ಲೆಲ್ಯಾ ಸಾಂಸ್ಕೃತಿಕ್ ಕಾರ್ಯಾಂತ್ ಹಾಸ್ಯ್, ಸಂಗೀತ್ ಆನಿ ಖೆಳ್ ಆಸೊನ್ ಪ್ರಾಯೆಚಿ ಬಂದಡ್ ನಾಸ್ತಾನಾ ಸಗ್ಳ್ಯಾಂನಿ ವಾಂಟೊ ಘೆತ್ಲೊ. ಮುಕೆಲ್ ಆಕರ್ಶಣ್ ಜಾವ್ನ್ ಬೈಲಾ ನಾಚ್ ಸಾದರ್ ಜಾಲೊ ಆನಿ ಕುಟ್ಮಾ ಜೊಡ್ಯಾಂನಿ ಹಾಂತು ಉರ್ಬೆನ್ ವಾಂಟೊ ಘೆತ್ಲೊ.
ಹ್ಯಾ ಸಂದರ್ಭಾರ್ ಮೆಳಾವ್ಯಾಂತ್ ನವ್ಯಾ ಸಾಂದ್ಯಾಂಚಿಂ ಭರ್ತಿ ಜಾಲಿ. ಘರಾಚ್ ರಾಂದುನ್ ಹಾಡ್ಲೆಲ್ಯಾ ಗಾಂವ್ಚ್ಯಾ ರುಚಿಚ್ಯಾ ಜೆವ್ಣಾಸವೆಂ ಮೆಳಾವೊ ಸಂಪ್ಲೆಂ.
ಕೊಂಕ್ಣಿ ಸಮುದಾಯ್ ನೆದರ್ಲ್ಯಾಂಡ್ ಹಾಣಿ ವರ್ಸ್ ಭರ್ ಚಲ್ಚ್ಯಾ ಕಾರ್ಯಾಂಚಿ ಯಾದಿ ತಯಾರ್ ಕೆಲ್ಯಾ ಆಸುನ್, ಮುಖ್ಲೆಂ ಮಹತ್ವಾಚೆಂ ಕಾರ್ಯೆಂ 2026 ಜೂನ್ ಮಯ್ನ್ಯಾಂತ್ ‘ಕೊಂಕ್ಣಿ ದೀಸ್’ ಆಚರಣ್ ಕರುನ್, ನೆದರ್ಲ್ಯಾಂಡ್ಸಾಂತ್ ಕೊಂಕ್ಣಿ ಭಾಶಿಕ್ ಕ್ರಿಸ್ತಾಂವ್ ಲೊಕಾ ಖಾತಿರ್ ವಿಶೇಸ್ ಕಾರ್ಯೆಂ ಜಾಂವ್ಚ್ಯಾರ್ ಆಸಾ. ಕೊಂಕ್ಣಿ ಭಾಸ್, ಸಾಹಿತ್ಯ್, ಸಂಗೀತ್ ಆನಿ ಸಮುದಯಾಚಿ ಒಳಕ್ ಪಾಸಾರ್ಚೆಂ ಹೆಂ ಕಾರ್ಯೆಂ ಯುರೋಪಾಂತ್ ಕೊಂಕ್ಣಿ ವರ್ತುಲಾಂತ್ ಏಕ್ ನವೊ ಮಯ್ಲಾ ಫಾತೊರ್ ಜಾತೆಲೆಂ ಮ್ಹಣ್ ಸಂಘಟಕಾಂನಿ ಉಮೆರ್ದ್ ಉಚಾರ್ಲ್ಯಾ.
