ರಸ್ತ್ಯಾರ್ ವಾಳ್ಚೆಂ ರಗತ್ ಪಳಯ್ಲ್ಯಾ ಶಿವಾಯ್ ಬರವ್ಪ್ಯಾಂನೀಯ್ ಜಾಗೆ ಜಾಯ್ನಾತ್ಲೆ ತಿತ್ಲಿ ಸಂಸಾರಾಚಿ ಪರಿಸ್ಥಿತಿ ವಿಷಮ್ ಆನಿ ಬರವ್ಪ್ಯಾಂಚಿಂ ಮನಾಸ್ಥಿತಿ ಅಸೂಕ್ಶ್ಮ್ ಜಾಲ್ಯಾಗಾಯ್? ಮ್ಹಳ್ಳ್ಯಾ ಆತ್ಮ್ಯಾವಲೋಕನಾಕ್ ಕವಿ ಆಂಡ್ರ್ಯೂ ಎಲ್ ಡಿ ಕೂನ್ಹಾ ಚಿ ಪ್ರಸ್ತುತ್ ಕವಿತಾ ವಾಚ್ಪ್ಯಾಂಕ್ ಲೊಟ್ತಾ.
ಆಜ್ – ಭುರ್ಗ್ಯಾಂಚ್ಯಾಂ ಇಸ್ಕೊಲಾಂನಿ, ನಾಗರೀಕ್ ವಸ್ತೆ ವಠಾರಾಂನಿ ಝುಜಾನ್ ಉಟಯಿಲ್ಲಿಂ ವಿಸ್ಫೊಟಾಚಿಂ ಕಾಳಿಂ ಮೊಡಾಂ ಮೊಳ್ಬಾಕ್ ವೆಂಗುನ್ ಆಸಾತ್. ಆನಿ ಹ್ಯಾ ಮೊಡಾಂಚ್ಯಾ ಸಾವ್ಳೆಂತ್ ರಸ್ತ್ಯಾರ್ ಧೊನ್ಪಾರಾಂಚೆಂ ರಗತ್ ಥಂಡ್ ವಾಳೊನ್ ಆಸಾ. ಜರಿ ಬರವ್ಪ್ಯಾಕ್ ಫಕತ್ ಕುಪಾಂ ಮಾತ್ ದಿಸ್ತಾತ್ ಆನಿ ರಗತ್ ದಿಸಾನಾ ತರ್; ತ್ಯಾ ಬರವ್ಪ್ಯಾ ಥಂಯ್ ಸಂವೇದನಾಂ ಜೀವ್ ಆಸಾತ್ ಮ್ಹಣೊಂಕ್ ಜಾತಾ? ಆನಿ ಹ್ಯಾಚ್ ಕಾರಣಾಕ್ ಲಾಗೊನ್ ಪ್ರಸ್ತುತ್ ಕವಿತೆಂತ್ ಕವಿ ಆಪ್ಣಾಚೇರ್ಚ್ ವಿಜ್ಮಿತ್ ಜಾತಾ – ಹಾಂವ್ ಬರವ್ಪಿ, ಕವಿ, ಸಾಹಿತಿ ಮ್ಹಣ್ ಒಳ್ಕಾತಾತ್! ಹ್ಯಾ ವಿಜ್ಮಿತ್ಕಾಯೆಂತ್ ಆತ್ಮ್ಯಾವಲೋಕನಾಚೆಂ ‘ಪ್ರಶ್ನ್’ ಆಸಾ. ಆಯ್ಚ್ಯಾ ಸಾಮಾಜಿಕ್ ಸಂದರ್ಬಾರ್ ಬರಂವ್ಚ್ಯಾ ಹರ್ ಸಂವೇದನಾಶೀಲ್ ಬರವ್ಪ್ಯಾನ್ ಆಪ್ಣಾಕೂಚ್ ವಿಚಾರಿಜೆ ಜಾಲ್ಲೆಂ, ಆನಿ ಪ್ರಾಮಾಣೀಕ್ ಜಾಪ್ ಸೊಧಿಜೆ ಜಾಲ್ಲೆಂ ಮಹತ್ವಾಚೆಂ ಪ್ರಶ್ನ್ ಹೆಂ.
ಹ್ಯಾ ಪಾಟಿಥಳಾರ್ ಕವಿನ್ ಕವಿತೆಕ್ ದಿಲ್ಲೆಂ ಶೀರ್ಷಕ್ ‘ತೆಣೆಂ ತಿಳ್ತಾನಾ…’ ಮಾರ್ಮಿಕ್ ಆನಿ ಹಜಾರೊಂ ಸಬ್ದಾಂನಿಂ ಉಲಂವ್ಚೆಂ ತಸಲೆಂ ‘ಪ್ರಾತಿನಿಧಿಕ್’ ಮ್ಹಣ್ ಭೊಗ್ತಾ. ತಿಳ್ತಾನಾ … ಉಪ್ರಾಂತ್ಲೊ ಶೀರ್ಷಕಾಂತ್ಲೊಂ ಏಕೇಕ್ Dot … (ಟಿಂಬ್) ಸಂವೇದನಾಶೀಲ್ ಬರವ್ಪ್ಯಾಂನಿ ತೆಣೆಂ ಆನಿ ಹೆಣೆಂ ತಿಳ್ಚೆ ಪ್ರಾಸ್ ‘ಆಪ್ಣಾ ಭಿತರ್’ ತೀಳ್ನ್ ಪಳೆಂವ್ಕ್ ಆಹ್ವಾನ್ ದಿತಾತ್ಶೆಂ ಮ್ಹಾಕಾ ಭೊಗ್ತಾ.
ರಸ್ತ್ಯಾರ್ ವಾಳೊನ್ ಆಸ್ಚ್ಯಾ ರಗ್ತಾಚೆಂ ಮೂಳ್ ಸೊಧುನ್ ವೆಚಿ ಜಾಪ್ದಾರಿ ಎಕಾ ಬರವ್ಪ್ಯಾಕ್ ಬಾಂದ್ತಾ ವಾ ನಾ – ಅಭಿಪ್ರಾಯ್ ದೀಂವ್ಕ್ ಕಶ್ಟ್. ಪೂಣ್, ಸಬ್ದ್ ಗುಂತುನ್ ವೊಳಿ ರಚುಂಕ್ ರಗತ್ ವಾಳೊಂಕ್ ರಾಕೊನ್ ರಾವ್ಚೆಂ ಕಾಮ್ ಕವಿಚೆಂ ನಯ್ ಮ್ಹಣ್ಚೊ ಕವಿತೆಚೊ ಅಭಿಮತ್ ಹಾಂವ್ ಪೂರ್ಣ್ಪಣಿಂ ವೊಪ್ತಾಂ.
ಪೋಯ್ರ್
ಥಂಯ್ ಫುಲಾಂ ಭರಲ್ಲಿಂ
ಪಾಕಾಂಚೆರ್ ಪರ್ಮಳ್ ಶಿಂಪ್ಡಾವ್ನ್
ಪಿಸೊಳಿಂ ನಾಚ್ತಾಲಿಂ
ಕಾಲ್
ಥಂಯ್ ಮಾತಿಚ್ ದಿಸ್ಲಿ
ಮುಳಾಂತ್
ಮಾತಿಯೆನ್ ನೆಗಾರಲ್ಲೆ
ಅನಾಥ್ ಕಾಂಟೆ.
ಆಜ್ ಸಾಕಾಳಿಂ
ಮಾತಿಯ್ ನಾ
ಇಟೆ ಅನಿ ಕೊಂಕ್ರಿಟ್…
ಉಪ್ರಾಟೆ ಕಾಂಟೆ ವಾಟೆರ್
ಇಟ್ಯಾಂ ಇಡ್ಯಾಂತ್ಲ್ಯಾನ್
ತಕ್ಲಿ ಉಬಾರ್ಚ್ಯಾ
ಪಾಚ್ವಪಣಚ್ಯಾ ಉಸ್ವಾಸಾಕ್
ಚಿರುಂಕ್ ತಯಾರ್!
ಸಾಂಜೆರ್ ಪಳೆತಾಂ
ರಸ್ತೊ ಇಲ್ಲೆಂ ಇಲ್ಲೆಂಚ್
ಘೊಟುನ್ ಅಸಾ
ಧೊನ್ಪಾರಾಂಚೆಂ ತಾಜೆಂ ರಗತ್!
ಹೆಂ ರಗತ್ ಕೊಣಾಚೆಂ?
ಮನ್ಶಾಚ್ಯಾ ಶಿರಾಂತ್ಲೆಂ?
ಜಾತಿಚ್ಯಾ ಘಾಯಾಂಚೆಂ?
ಮನ್ಶಾಪಣಾಚ್ಯಾ ಕಾಳ್ಜಾಚೆಂ?
ಅವ್ಘಡ್? ಖುನಿ? ಪುಜಾ? ಫೆಸ್ತ್?
ಮೊಳ್ಬಾಚೊ ಪಾಲಂವ್
ರಗ್ತಾನ್ ಭಿಜಲ್ಲೊ
ಹಾಂವ್ ಬರವ್ಪಿ, ಕವಿ, ಸಾಹಿತಿ ಮ್ಹಣ್ ಒಳ್ಕಾತಾತ್!
ಮಾಕಾಯ್ ಎಕಚ್ ಕಾಮ್
ತೆವ್ಶಿನ್ ತೀಳ್ನ್ ಪಳೆಂವ್ಚೆಂ
ರಗತ್ ವ್ಹಾಳ್ಳ್ಯಾ ಉಪ್ರಾಂತ್ಚ್
ದಾಖಲ್ ಕರ್ಚೆಂ!
ಸಬ್ದಾಂಕೀ ಲಾಗ್ಲ್ಯಾ ತಾನ್
ತಾಂಕಾಂಯ್ ರಗತಚ್ ಜಾಯ್ ಕೊಣ್ಣಾ
ಜಿಯೆಂವ್ಚ್ಯಾ ಖಾತಿರ್ !
– ಆಂಡ್ರ್ಯೂ ಎಲ್. ಡಿ ಕೂನ್ಹಾ
3 comments
ಪ್ರಸ್ತುತ ಪರಿಸ್ಥಿತಿ ವಿವರ್ಸೂಚಿ ಮಾರ್ಮಿಕ್ ಕವಿತಾ. ಮನುಷ್ಯಾಲೆ ರಗತ್ ಸಾಬಾರ್ ಸೌರಗ್ ಜಲಾಂ. ಭೂಯ್ಚೇರಿ ಮನುಷ್ಯಪಣ್ ಮೊರ್ನುಗೆಲ್ಲೆಲೆ ಪೊಳೆವ್ನು ಮಳಬ್ ರಗತ್ ಗಳೊವ್ನು ರಡ್ಲೆ ಕಿ ಕಿತ್ತೆ?
ಹ್ಯಾ ಕವಿತೆ ಮುಕಾಂತ್ರ್ ಕವಿ ಸಬಾರ್ ಥರಾಂಚ್ಯೊ ಪ್ರತಿಮಾಂ ಆನಿ ಪರ್ನ್ಯಾ ಆನಿ ನವ್ಯಾ ಜಿಣ್ಯೆ ಶೈಲಿಂಚಿ ಝಳಕ್ ವಾಚ್ಪ್ಯಾಂಚ್ಯಾ ಮತಿ ಪಡ್ದ್ಯಾರ್ ಉಬೊನ್ ವೆಚೊ ಅನ್ಭೋಗ್ ದಿತಾ!
ಆಧುನಿಕ್ ಜಿಣಿಂ ಸಾರ್ಚ್ಯಾ ಖಾತಿರ್ ಮನಿಸ್ ಪಾಚ್ವೆಂಪಣ್ ಸಾಂಡುನ್, ಬೆಂಡುನ್ ಪ್ರಕೃತಿ ನಾಸ್ ಕರುಂಕ್ ಕಾಂಯ್ ಪಾಟಿ ಸರಾನಾ. ತಾಕಾ ಮಜೆನ್ ಜಿಯೆಂವ್ಕ್ ಆಧುನಿಕತಾ ಜಾಯ್.
“ಕಾಂಟೆ”- ಮ್ಹಳ್ಯಾರ್ ” ಮನ್ಶ್ಯಾಪಣ್ ನಾತ್ಲ್ಲೆ ಮನಿಸ್”! ಇಟ್ಯಾಂಚ್ಯಾ ಇಡ್ಯಾಂತ್ ಪುಣೀ ಭಿಂಯಾನ್ ತೀಳ್ನ್ ಜಿಯೆಂವ್ಚ್ಯಾ ಎಕಾ ಪಂಗ್ಡಾಚ್ಯಾ ಮಾಸೂಮ್ , ಸಾದ್ಯಾ ಮನ್ಶ್ಯಾಂಕ್ ಆನ್ಯೇಕ್ ಪಂಗ್ಡಾಚೆ ಹೆ ಕಾಂಟೆ ಜಿಯೆಂವ್ಕ್ ಸೊಡಿನಾಂತ್!
ಮನ್ಶ್ಯಾಪಣ್ಂಚ್ ನಾ ತರ್, ಹೆರ್ ಜೀವಿ ಜಾಂವ್, ಪ್ರಕೃತಿ ಯ ಮನ್ಶ್ಯಾಚೆಂಚ್ ಮೋಲ್ ಕಶೆಂ ಸಮ್ಜುಂಕ್ ಸಕ್ತಿತ್!?
ಕವಿ ಮ್ಹಣ್ತಾ, “ಸಬ್ಧಾಂಕೀ ತಾನ್ ಲಾಗ್ಲ್ಯಾ..!” ತರ್ ತಾಂಕಾಂಯ್ ಜೀವ್ ಅಸಾ, ಶಿರೊಯ್ ಅಸಾತ್, ಅನಿ ತಾಂತ್ಲ್ಯಾನ್ ರಗ್ತಾನ್ ವ್ಹಾಳೊಂಕ್ ಸುರು ಕೆಲಾಂ ಮ್ಹಣ್ ಖಾತ್ರಿ ಜಾಲೆಂ! ಅತಾಂ ಹ್ಯಾ ರಗ್ತಾಂತ್ ಕಸಲೆ ಗೂಣ್ ಅಟಾಪ್ಲ್ಯಾತ್ ಮ್ಹಣೊನ್ ತಪಾಸ್ಣಿ ಕರ್ಚಿ ಗರ್ಜ್ ಉದೆಲ್ಯಾ. ನಾ ತರ್ ಸಬ್ಧಾಂಕೀ ರಗ್ತಾಚಿಚ್ ತಾನ್ ಲಾಗ್ಲ್ಯಾ ಮ್ಹಳ್ಯಾರ್!!!!??…..ತ್ಯಾ ಸಬ್ಧಾಚೆಂ ಕಾಳಿಜ್ ಕಸಲೆಂ ಜಾವ್ಯೆತ್!?
ಬೋವ್ ಊಂಚ್ ಕವಿತಾ, ಹೆ ಕವಿತೆಂತ್ ಎಕಾ ಫಾಂಕಿವಂತ್ ಹಾತಾನ್ ಆಪ್ಲೆ ತಾಂಕಿವಂತ್ ಚಿಂತ್ಪಾ ಸಕ್ತೆನ್ ವಾಚ್ಪ್ಯಚಾ ಮತಿ ಪರ್ದ್ಯಾರ್ ಆಪ್ಲಿ ತಾಲ್ವಾರ್ ಬರೀ ಪಜ್ಲೆಲಿ ಝಳ್ಕತಾ.! ಆನಿ ತೇ ತಾಲ್ವಾರಿಚೆ ತಕ್ಲಿ ಥಾವ್ನ್ ಮೂಳ್ ಪರ್ಯಂತ್ ಜಿವೆಂಚ್ ರಗತ್ ಪಾಜ್ರತಾ ತಶೆಂ ಭಗ್ತ….ತಶೆಂಚ್ ರಸ್ತಯರ್ ರಗತ್ ವಾಳ್ಚ ಆದಿಂಚ್ ಬರೊವ್ಪನ್ ಆಪ್ಲಿ ತಾಲ್ವಾರ್ ಘೆವ್ನ್ ಜಾಗೊ ರಾವ್ವೌಂಕ್ ಚತ್ರಾಯ್ ದಿತಾ..! ಕವಿ. Andew L Dcunha. ಕ್ ಸರ್ವೆ ಬರೆಂ ಮಾಗ್ತಾಂ.