2018 ವರ್ಸಾ ಕಾಂಯ್ಚ್ ಅಪೇಕ್ಷಾನಾಸ್ತಾಂ ವೇಳ್ ಪಾಶಾರ್ ಕರುಂಕ್ ಮ್ಹಳ್ಳೆಬರಿಂ ಪದ್ವಾ ಹಾಯ್ಸ್ಕೂಲ್ ಮಯ್ದಾನಾರ್ ಅಸ್ಥಿತ್ವ ಪಂಗ್ಡಾಚೊ ಸಳ್ಗಿ ನಾಟಕ್ ಪಳೆಂವ್ಕ್ ಗೆಲ್ಲ್ಯಾ ಮ್ಹಾಕಾ ಘಡ್ಗಡೊ ಮಾರ್ಲೊ. ಮಾನಾಧಿಕ್ ಬಾಪ್ ಒಲ್ವಿನ್ ಸೆರಾವೋನ್ ಅಣ್ಕಾರ್ ಕರುನ್ ಹಾಂಗಾಚ್ಯಾ ಪರಿಗತೆಕ್ ಒಳ್ಸಾಯಿಲ್ಲೊ ಬಳಿಶ್ಟ್ ನಾಟಕ್, ಕ್ರಿಸ್ಟಿ ಆನಿ ಕ್ಲ್ಯಾನ್ವಿನ್ ಮಜ್ಭೂತ್ ನಟನಾಂತ್ ಪ್ರಸ್ತುತ್ ಜಾಲ್ಲ್ಯಾ ಹ್ಯಾ ನಾಟಕಾನ್ ಮ್ಹಾಕಾ ಹ್ಯಾ ಪಂಗ್ಡಾಚ್ಯಾ ಮೊಗಾರ್ ಪಡಾಶೆಂ ಕೆಲ್ಲೆಂ. ಹಾಚೆ ಉಪ್ರಾಂತ್ ಕೆನ್ನಾಂ ಅವ್ಕಾಸ್ ಮೆಳ್ಳ್ಯಾರೀ ಹ್ಯಾ ಪಂಗ್ಡಾಚೆ ನಾಟಕ್ ಆಸ್ತಾನಾ ಚುಕಯ್ನಾಸ್ತಾಂ ಪಳೆಂವ್ಚ್ಯಾ ಹಾಂವೆ ಸಳ್ಗಿ ನಾಟಕ್ ಕಾಂಯ್ ಚಾರ್ ಪಾವ್ಟಿಂ ಆನಿ ಕೆಂಡೋನಿಯನ್ಸ್ ತೀನ್ ಪಾವ್ಟಿಂ ಪಳಯಿಲ್ಲೆ ಮಾತ್ ನಂಯ್, ಹ್ಯಾ ದೊನೀ ನಾಟಕಾಂಚಿಂ ‘ಹೌಸ್ಫುಲ್’ ಪ್ರದರ್ಶನಾಂ ಆಮ್ಚೊ ಸಾಂಸ್ಕೃತಿಕ್ ಪಂಗಡ್ ದಿ ಎಕ್ಸ್ಪ್ರೆಶನ್ಸ್ ಬೊಂದೆರಾರ್ ಬ್ರಹ್ಮಾವಾರಾಂತ್ ಪ್ರಸ್ತುತ್ ಕೆಲ್ಲಿಂ.
ಆನಿ ಕಾಲ್ 1 ಮಾರ್ಚ್ 2026 ಪರತ್ ದಿ ಎಕ್ಸ್ಪ್ರೆಶನ್ಸ್ ಬೊಂದೆರಾರ್ ಹ್ಯಾಚ್ ತೇಗ್ ಮಾನಾಯಾಂಚ್ಯಾ ಖಾಂದಾರ್, ಒಲ್ವಿನ್ ಸಿ. ವೇಗಸ್ ಆನಿ ಸ್ವೀಡಲ್ ಡಿಸೋಜಾಚ್ಯಾ ಪಾಟಿಂಬ್ಯಾನ್ ಪರತ್ ‘ಹೌಸ್ಫುಲ್’ ಪ್ರದರ್ಶನ್ ಆಪ್ಣಾಯಿಲ್ಲೊ ‘ಚಿರಿ : ತೀಸ್ ನಾಣ್ಯಾಂಚಿ’ ನಾಟಕ್ ಫಕತ್ ಸಾಲಾಂತ್ಲಿ ಸಯ್ಶಿಂ ಕದೆಲಾಂ ಭರುಂಕ್ ಮಾತ್ ನಂಯ್, ಬಗಾರ್ ತಿತ್ಲೆಚ್ ಅತ್ಮೆ ಖದ್ವಳಾಂವ್ಕ್ ಪಾವ್ಲೊ. ಬಾಪ್ ಒಲ್ವಿನ್ ಸೆರಾವೊನ್ ಖುದ್ ಬರಯಿಲ್ಲೊ ನಾಟಕ್ ತಾಚ್ಯಾ ಎದೊಳ್ಚ್ಯಾ ನಾಟಕಾಂನಿಂ ಅವ್ವಲ್ ಮಾತ್ ನಂಯ್, ಪ್ರಸ್ತುತ್ ಕಾಳಾಕ್ ಏಕ್ ವಯುಕ್ತಿಕ್ ಆನಿ ಬೋವ್ ಗರ್ಜ್ ಆಸ್ಚೆಂ ಬಳಿಶ್ಟ್ ಆನಿ ಚಿಂತುಂಕ್ ಕರ್ಚೆಂ ಸ್ಪಂದನ್ ಜಾವ್ನ್ ಉದೆಲಾ.
ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿಂ ಬಾಪ್ ಸೆರಾವೊನ್ ಹಳ್ತಾರ್ ಪೂಣ್ ಸ್ಪಶ್ಟ್ ಏಕ್ ಪರಂಪರಾ ರುತಾ ಕೆಲ್ಯಾ. ಹೆರ್ ಭಾಶೆಂತ್ಲೆ ನಾಟಕ್ ಅಣ್ಕಾರ್ ಕರುನ್ ಹಾಂಗಾಚ್ಯಾ ಪರಿಗತೆಕ್ ಒಳ್ಸಾವ್ನ್ ಜಾಲ್ಲಿ ಸುರ್ವಾತ್ ಆಪ್ಣಾಚೆಚ್ ನಾಟಕ್ ಬರವ್ನ್ ಆಜ್ ಕೊಂಕ್ಣೆಂತ್ಲೊ ಏಕ್ ಮಾಸ್ಟರ್ ನಾಟಕಿಸ್ತ್ ಜಾವ್ನ್ ತೆ ಬದಲ್ಲ್ಯಾತ್. ಏಕ್ ನಾಟಕಿಸ್ತ್ ಜಾವ್ನ್ ಎಕಾ ಧಾಕ್ಡ್ಯಾಭಿತರ್ ತಾಂಚಿ ವಾಡಾವಳ್ ಏಕ್ ವಿಜ್ಮಿತ್. ಸಳ್ಗಿ, ಝುಜ್, ಎಮ್ಮಾವ್ಸ್ ತಸಲ್ಯಾ ತಾಚ್ಯಾ ನಾಟಕಾಂನಿಂ ಗೂಂಡ್ ಸಂಗ್ತ್ಯಾಂಕ್, ವೋಡ್ನ್ ಧರ್ಚ್ಯಾ ಕಾಣಿಯಾಂಸವೆಂ ಮಿಸ್ಳಾಂವ್ಚಿ ತಾಚಿ ಕುಶೆಲಾಯ್ ಪಾರ್ಕಿಯೆತಿ. ಪೂಣ್ ‘ಚಿರಿ’ ಹ್ಯಾ ಕುಶೆಲಾಯೆಕ್ ಏಕ್ ಅಥ್ವ್ಯಾಚ್ ಪಾಂವ್ಡ್ಯಾಕ್ ಪಾವಯ್ತಾ. ಸಗ್ಳೊ ನಾಟಕ್ ಏಕ್ ವಿಗಾರ್ ಆನಿ ನವೊಚ್ ಆಯಿಲ್ಲ್ಯಾ ಕಾಜಿತೊರಾ ಮಧ್ಲ್ಯಾ ಏಕ್ ಪ್ರಾಮಾಣಿಕ್ ಪೂಣ್ ಗೂಂಡ್ ಭಾಸಾಭಾಸೆಂತ್ ಉಗ್ತೊ ಜಾತಾ. ತಾಂಚೆಂ ಉಲವ್ಣೆಂ, ಭಾವಾರ್ಥಾಂತ್ ಕಶೆಂ ಜಿಯೆಂವ್ಚೆಂ, ಲೋಕಾಕ್ ಕಶೆಂ ಸಾರ್ಕೆಂ ಸಾಂಭಾಳ್ಚೆಂ, ತಾಕ್ತೆವಂತ್ ಮ್ಹನ್ಶಾಂಚೊ ಯಾ ಆದ್ಲ್ಯಾ ರಿವಾಜಿಂಚೊ ದಬಾವ್ ಕಸೊ ಫುಡ್ ಕರ್ಚ್ಯಾ ಸಂಗ್ತಿಂತ್ಲೊ ನೀಜ್ ತಫಾವತ್ ಉಗ್ತಾಯ್ತಾತ್.
ಆಪ್ಲ್ಯಾ ಭಿತರ್ಲ್ಯಾ ತೀರ್ಲಾಂತ್ , ‘ಚಿರಿ’ ಸಕ್ಡಾಂಕ್ ಆಪಡ್ಚಿಂ ವ್ಹಡ್ಲಿ ಪೂಣ್ ಸೊಂಪಿ ಸವಾಲಾಂ ಉಟಯ್ತಾ. ಖರೊ ಭಾವಾರ್ಥ್ ಮ್ಹಳ್ಯಾರ್ ಕಿತೆಂ? ಜರ್ಧರ್ ದುಬ್ಳ್ಯಾಂಕ್ ಆನಿ ಅಸ್ಕತ್ಯಾಂಕ್ ವಿಸರ್ತಾ ತರ್ ತಸಲ್ಯಾ ಧರ್ಮಾಕ್ ಅರ್ಥ್ ಆಸಾಗಿ? ಖರಿ ಪಾತ್ಯೆಣಿ ಮ್ಹಳ್ಯಾರ್ – ಮಾಂಡಾವಳ್ ಘಡ್ಬಡ್ಲ್ಯಾರೀ – ನ್ಯಾಯ್, ದಯಾ ಆನಿ ಸಮಾನ್ಪಣಾಕ್ ಉಕಲ್ನ್ ಧರ್ಚೆಂ ಮ್ಹಣ್ ಹೊ ನಾಟಕ್ ದಾಕಯ್ತಾ. ಚೂಕಿಂ ವಿರೋಧ್ ವೊಗೆಚ್ ರಾವ್ಚೆಂ, ಸಮಾಧಾನ್ ಸಾಂಭಾಳ್ಚ್ಯಾ ಪಾಸತ್ ಆಮ್ಚ್ಯಾ ಮವ್ಲ್ಯಾಂಕ್ ಬದ್ಲುಂಚೆ ಬರ್ಯಾಚ್ಯಾಕೀ ಚಡಿತ್ ವಾಯ್ಟ್ ಕರುಂಕ್ ಪಾವ್ತಾ ಮ್ಹಣ್ ಆಮ್ಕಾಂ ಬಾರಿಚ್ ನಾಜೂಕಾಯೆನ್ ಸಮ್ಜಾಯ್ತಾ. ಸುಖಾವಯ್ರ್ ಪಾಶಾಂವ್ ವಿಂಚುನ್ ಅನ್ಯಾಯಾಚ್ಯಾ ವಿರುಧ್ ಆನಿ ಪೊಕೊಳ್ ಸಂಪ್ರದಾಯಾ ವಿರುಧ್ ಜೆಜು ಕಸೊ ಸಕ್ತೆನ್ ಉಬೊ ರಾವ್ಲೊ ಮ್ಹಳ್ಳೆಂ ಸಾಂಗ್ತಾ ಆನಿ ಪ್ರೇಕ್ಷಕಾಕ್ ಚಿಂತುಂಕ್ ಲಾಯ್ತಾ : ಆಜ್ ಆಮಿಂಯ್ ಅಶೆಂ ಕರ್ಚೆಂ ಧಯ್ರ್ ಆಪ್ಣಾಯ್ತಾಂವ್ಗೀ?
ಪೂಣ್ ಹ್ಯೊ ಜಡಾಯೆಚ್ಯೊ ಸಂಗ್ತಿ ಶೆರ್ಮಾಂವಾಂಬರಿಂ ನಾಟಕಾಂತ್ ಸಾಂಗಾನಾಂತ್. ಬದ್ಲಾಕ್ ದೋನ್ ಚಾಲ್ತ್ಯಾ ಮ್ಹನ್ಶ್ಯಾಂಚ್ಯಾ ಭಾಸಾಭಾಸೆಂತ್ ಆಯ್ಕಾತಾತ್. ಕಾಳ್ಜಾಗೂಂಡಾಯೆಂತ್ಲೆ ಪ್ರಾಮಾಣಿಕ್ ಮಾಗ್ಣೆಂ, ಭ್ಯೆಂ ದಿಸ್ಲಾರೀ ಚೂಕಿವಿರುಧ್ ಸವಾಲಾಂ ಕರ್ಚೆಂ, ಕಾಂಯ್ ಎಕಾ ಖಿಣಾಕ್ ಇಗರ್ಜ್ಮಾತೆಂತ್ಲ್ಯಾ ಸ್ತ್ರೀಯಾಂವಿಶ್ಯಾಂತ್ಲ್ಯಾ ಪರ್ನ್ಯಾ ಧೋರಣಾಂಕೀ ಸವಾಲ್ ಘಾಲ್ತಾ.
ಪೂಣ್ ಹ್ಯಾ ನಾಟಕಾಕ್ ವಿಸ್ರುಂಕ್ ಜಾಯ್ನಾತಲ್ಲೊ ಕರುಂಕ್ ಹ್ಯಾ ನಾಟಕಾಚೊ ನಿರ್ದೇಶಕ್ ಆನಿ ಮುಖೇಲ್ ನಟ್ ಕ್ರಿಸ್ಟೋಫರ್ ನೀನಾಸಂ, ಆಮ್ಚ್ಯಾ ಮೊಗಾಚ್ಯಾ ಕ್ರಿಸ್ಟಿಚೆಂ ಮ್ಯಾಜಿಕ್ ಮ್ಹಣ್ ಸಾಂಗಾಜೇಚ್.
ಬಾಪ್ ಸೆರಾವೊಸವೆಂ, ಅಸ್ಥಿತ್ವ ಬೊಂದೆರಾಖಾಲ್ ಕ್ರಿಸ್ಟಿನ್ ಮಂಗ್ಳೂರಿ ರಂಗ್ಮಾಂಚಿಯೆಕ್ ನವೊ ಉಸ್ವಾಸ್ ಫುಂಕ್ಲಾ. ಭರ್ವಸ್ಯಾಚಿಂ ಒಕ್ತಾಂ ತೊಪ್ಲ್ಯಾಂತ್. ಎಕಾ ತೆಂಪಾರ್ ಥೊಡ್ಯಾ ಅಮ್ಕ್ಯಾಚ್ ಪರ್ನ್ಯಾ ಸಾಂಪ್ರಾದಾಯಿಕ್ ಫೊರ್ಮುಲಾಂಚೆರ್ ಆಡ್ಕಳುನ್ ಉರಲ್ಲಿ ತಿ ಆಜ್ ನವ್ಯಾನ್ ಧಯ್ರಾದೀಕ್, ಜೀವಾಳ್ ಆನಿ ಕ್ರಾಂತಿಕಾರಿ ಜಾವ್ನ್ ಉಟ್ಲ್ಯಾ. ಕ್ರಿಸ್ಟಿಚೆಂ ನಿರ್ದೇಶನ್ ನಾಟಕಾಚೆಂ ದರ್ ಏಕ್ ಖಿಣ್ ಜಿತೆಂಚ್ ದವರ್ತಾ. ಖಡ್ಪ್, ಸಿಂತಿಮೆಂತಾಳ್ ಆನಿ ಸತ್ತಿ. ಏಕ್ ನಟ್ ಜಾವ್ನ್ ಪ್ರೇಕ್ಷಕಾಂತ್ ಸೀದಾ ವಿಗಾರಾಚ್ಯಾ ಅಂತರ್ಝುಜಾಂತ್ ವೋಡ್ನ್ ವರ್ಚೆಸವೆಂ ತೊ ಆಪ್ಲ್ಯಾ ಕಿರ್ದಾರಾಂತ್ ನಪಂಯ್ಚ್ ಜಾತಾ ಆನಿ ಅಶೆಂ ಕೆಲ್ಲ್ಯಾನ್ ಮಾಂಚಿ ಜೀವಾಳ್ ಜಾತಾ ಆನಿ ಪಳಯ್ತಲ್ಯಾಂಕ್ ಅಲ್ಕಂದಾಯ್ತಾ.
ಆನಿ ಆಸಾ ಹೊ ಕ್ಲ್ಯಾನ್ವಿನ್ ಫೆರ್ನಾಂಡಿಸ್ – ಏಕ್ ಅಪ್ರತಿಮ್ ತಾಲೆಂತಾಚೊ ನಟ್. ಕಸಲ್ಯಾಯ್ ಕಿರ್ದಾರಾಂಕ್ ತ್ಯೊ ಇತ್ಲ್ಯಾ ಸೊಂಪ್ಯಾನ್ ರಿಗ್ತಾ ತೆಂ ಪಳೆತಾನಾ ಅಜ್ಯಾಪ್ಶೆಂ ಭಗ್ತಾ. ಜೆನ್ನಾಂ ಕ್ರಿಸ್ಟಿ ಆನಿ ಕ್ಲ್ಯಾನ್ವಿನ್ ಮಾಂಚ್ಯೆರ್ ಸಾಂಗಾತಾ ಮೆಳ್ತಾತ್ ತೆನ್ನಾಂ ಥಂಯ್ಸರ್ ನಿತಳ್ ಮ್ಯಾಜಿಕ್ ಘಡ್ತಾ. ದರ್ ಏಕ್ ದೀಸ್ಟ್, ಎಕೇಕ್ ಮೊನೆಳಾಚೆಂ ಖಿಣ್, ಹರ್ ಏಕ್ ಸಬ್ದ್, ತನಾವ್ ಆನಿ ಸಿಂತಿಮೆಂತಾಂ ಬಾಂಧುನ್ ಹಾಡ್ತಾತ್. ದೊಗೀ ಸಾಂಗಾತಾ, ಆಮ್ಚಿಂ ದರ್ ಏಕ್ ಇಂದ್ರಿಯಾಂಕ್ ಆಪಡ್ಚಿಂ ಆನಿಂ ಸದಾಂಕಾಳ್ ಆಮ್ಚೆಸವೆಂ ಉರ್ಚಿಂ ಲ್ಹೊಂವ್ ಉಬಿಂ ಜಾಂವ್ಚಿಂ ಖಿಣಾಂ ಆಮ್ಕಾಂ ಬಾಂಧುನ್ ದಿತಾತ್.
ಹೆ ತೇಗ್ ಮಾನಾಯ್- ಏಕ್ ದಾರ್ಶನಿಕ್ ಬರವ್ಪಿ ಬಾಪ್ ಸೆರಾವೊ, ಓಜಸ್ವಿ ನಿರ್ದೇಶಕ್ ಆನಿ ನಟ್ ಕ್ರಿಸ್ಟಿ , ಆನಿ ಏಕ್ ಮಾಸ್ಟರ್ ಕಲಾಕಾರ್ ಕ್ಲ್ಯಾನ್ವಿನ್- ಆಜ್ ಮಂಗ್ಳೂರಿ ರಂಗ್ಮಾಂಚ್ಯೆಚೆ ಯುಗಪ್ರವರ್ತಕ್ ತೆ ಜಾಲ್ಯಾತ್ ಮ್ಹಳ್ಯಾರ್ ಅತಿರೇಕ್ ಜಾಂವ್ಚೊ ನಾಂ. ಸಳ್ಗಿ, ಝುಜ್ ಆನಿ ಆತಾಂ ಚಿರಿ ತಸಲ್ಯಾ ನಾಟಕಾಂದ್ವಾರಿ ತೆ ದರ್ ಏಕ್ ಪಾವ್ಟಿಂ ಹೊ ಮಾಪ್ ಆನಿಕೀ ವಯ್ರ್ ಉಬಾರ್ತಾತ್. ಕಾಲೆತ್ ನಾತಲ್ಲ್ಯೊ ಕಾಣಿಯೊ, ಫುಂರ್ಗೆಲ್ಲೆಂ ಹಾಸ್ಯ್ ಆನಿ ಥಕುನ್ ಗೆಲ್ಲ್ಯಾ ನಟನಾಂಕ್ ಒಳ್ಸಾಲ್ಲ್ಯಾ ಪ್ರೇಕ್ಶಕಾಂಕ್, ಶಿಕುಂಕ್ ಕರ್ಚ್ಯಾ, ಸವಾಲಾಂ ಉಡಂವ್ಚ್ಯಾ ಆನಿ ವಯ್ರ್ ಉಬಾರ್ಚ್ಯಾ ತಾಂಚ್ಯಾ ಕೃತಿಯಾಂದ್ವಾರಿಂ ತಾಣಿಂ ಕೊಂಕ್ಣಿ ನಾಟಕಾಂಚಿಂ ನಕ್ಶ್ಯಾಬದಲ್ಲ್ಯಾ.
ಚಿರಿ ಫಕತ್ ಏಕ್ ನಾಟಕ್ ನಂಯ್; ಕೊಂಕ್ಣಿ ರಂಗ್ಮಾಂಚಿ, ಗಂಭೀರ್, ಸಾಂಧರ್ಬಿಕ್ ಆನಿ ಗೂಂಡಾಯೆನ್ ಹಾಲಂವ್ಚೆ ತಸಲಿ ಜಾವ್ಯೆತ್ ಮ್ಹಳ್ಳ್ಯಾಚಿ ಗವಾಯ್. ಆಯ್ಚ್ಯಾ ಕಾಳಾರ್ ಮಂಗ್ಳೂರಿ ರಂಗ್ಮಾಂಚ್ಯೆಕ್ ಹೆ ಮಾನಾಯ್ ಅನ್ಮೋಲಿಕ್ ಆಸ್ತ್. ಮುಕೇಲ್ಪಣ್ ಘೇಂವ್ಕ್ ಆನಿ ಪ್ರೇರಣ್ ದೀಂವ್ಕ್ ತೆ ಲಾಂಬ್ ಕಾಳ್ ಹಾಂಗಾಸರ್ ಉರ್ತಲೆ.
ಹೊ ನಾಟಕ್ ಫಕತ್ ಧಾರ್ಮಿಕ್ ವ್ಯವಸ್ಥೆಚ್ಯಾ ವಿರುಧ್ ಮಾತ್ ನಂಯ್ ಬಗಾರ್ ಸಂಸ್ಥ್ಯಾಚೆರ್ಚ್ ತೊ ಏಕ್ ತೀಕ್ ಆನಿ ತ್ರಾಸಾದಾಯೆಕ್ ಪ್ರಹಾರ್. ವಿಗಾರ್ ಆನಿ ಕಾಜಿತೊರಾಮಧ್ಲೆಂ ಉಲವ್ಣೆಂ, ತೆಂ ಫಕತ್ ಭಾಸಾಭಾಸ್ ನಂಯ್. ತಿ ಚರ್ಚಾ – ಫ್ರೋಯ್ಡಾಂಚ್ಯಾ ವಿಚಾರಾಂಬರಿಂ – ಕಠೀಣ್ ಸಾಂಸ್ಥಿಕ್ ರೆಗ್ರೊ ಆನಿ ಮ್ಹನ್ಶ್ಯಾಚ್ಯಾ ಮುಳಾವ್ಯಾ ಭಗ್ಣಾಂ ಆನಿ ಉದ್ವೇಗಾಮಧ್ಲ್ಯಾ ಭಿತರ್ಲ್ಯಾ ಸಂಘರ್ಶಾಂಚೆರ್ ಪಡ್ಬಿಂಬ್ ಘಾಲ್ತಾ . ಆನಿ ಹೆಂ ಝುಜ್ ಕಥೊಲಿಕ್ ಇಗರ್ಜೆಚ್ಯಾ ಭಿತರ್ಲ್ಯಾ ಗೂಂಡ್ ಸಮಸ್ಯಾಂಚೆರ್ ಉಜ್ವಾಡ್ ಫಾಂಕಯ್ತಾ.
ತೊ ಉಪೇಕ್ಷಿತ್ ವರ್ಗಾಕ್ ಧರ್ಮಾಚ್ಯಾ, ಭಾವಾರ್ಥಾಚ್ಯಾ ಆನಿ ಸಮಾಜೆಚ್ಯಾ ಕಾಳ್ಜಾಂತ್ ಚೆಪುಂಕ್ ಒತ್ತಾಯ್ ಕರ್ತಾ. ಹೊ ವಿಚಾರ್ ಗುಸ್ತಾಹ್ವೊ ಗೂಟೆಹ್ರೆಝ್ ತಸಲ್ಯಾ ಚಿಂತ್ಪ್ಯಾಂಚ್ಯಾ ‘ಲಿಬರೇಶನ್ ಥಿಯೋಲಜಿ’ಕ್ ಲಗ್ತಿ ಜಾತಾ. ತಾಣೆಂ ಖರೆಂ ಕ್ರಿಸ್ತಾಂವ್ಪಣ್ ಮ್ಹಳ್ಯಾರ್ ಫಕತ್ ಪೊಕೊಳ್ ರಿವಾಜಿ ಆನಿ ಸಂಪ್ರದಾಯ್ ಜಾಯ್ನಾಸ್ತಾಂ ದಲಿತಾಂಕ್ ಪಾಟಿಂಬೊ ದಿಂವ್ಚೆ ತಸಲೆಂ ಜಾಯ್ಜೆ ಮ್ಹಣ್ ವಿಚಾರ್ ಮಾಂಡ್ಲ್ಲೊ. ಬಾಪ್ ಸೆರಾವೊ ಇಗರ್ಜೆಂತ್ಲೆ ದಾದ್ಲ್ಯಾಕೇಂದ್ರಿತ್ ಮಾಂಡಾವಾಳೆಕ್ಚ್ ಸಂಪವ್ಚೆ ತಸಲೊ ಏಕ್ ಪೊಂತ್ ಘಾಲುನ್ ಏಕ್ ಮೆಟ್ ಮುಕಾರ್ಚ್ ವೆತಾಶೆಂ ದಿಸ್ತಾ.
ಬಹುಸಂಖ್ಯಾತಾಂಕ್ ಕಿತೆಂ ಜಾಯ್ ಮ್ಹಳ್ಳ್ಯಾಚೆರ್ ನ್ಯಾಯ್ ಹೊಂದೊನ್ ಆಸಾನಾ ಮ್ಹಳ್ಳೊ ವಿಚಾರ್ ಆಮ್ಚ್ಯಾ ದೇಶಾಚ್ಯಾ ಅಂಬೇಡ್ಕರಾಥಾವ್ನ್ ಪ್ರೇರಿತ್ ಸಂವಿಧಾನಾಚೊ ಪಡ್ಸಾದ್. ಹಾಂಗಾಸರ್ ಸಂಖ್ಯಾಂಪ್ರಾಸ್ ಸಮಾನತಾ ಪ್ರಮುಖ್ ಜಾತಾ. ಹೊ ವಿಚಾರ್ ಸಾಂವಿಧಾನಿಕ್ ಹಕ್ಕಾಂ ಬಹುಸಂಖ್ಯಾತಾಚ್ಯಾ ಅಭಿಪ್ರಾಯೆಸವೆಂ ಚಡಾವತ್ ತಕ್ರಾರಾರ್ ಆಸ್ಚ್ಯಾ ಆಮ್ಚ್ಯಾ ದೇಶಾಚ್ಯಾ ಆತಾಂಚ್ಯಾ ಪರಿಗತೆಂತ್ ಬೋವ್ ಪ್ರಾಸ್ತಾವಿಕ್ ಭಗ್ತಾತ್.
ಸೊಂಪ್ಯಾನ್ ಸಮ್ಜೊಣಿ ಕರ್ನ್ ಘೇಂವ್ಕ್ ವಿರುಧ್ಸುಂಚ್ಯಾ ಕಾಜಿತೋರಾಚೆಂ ಧೋರಣ್ ನೀಜ್ ಬದ್ಲಾಪಾಕ್ ದಬಾವ್ ಘಾಲ್ಚೆಂ ದಾಕಯ್ತಾ. ರೂಲಿ ರೆಗ್ರಾಂ ಮಧೆಂ ಆನಿ ವಿಚಾರಾಂಮಧ್ಲಿ ವಿಗಾರಾಚಿ ಸೊಸ್ಣಿಕ್ ರೀತ್ ಏಕ್ ಸೊಂಪೊ ಮಾರೊಗ್ ಪ್ರತಿನಿಧಿತ್ವ್ ಕರ್ತಾ. ಹ್ಯಾ ದೋಗಾಂ ಮಧ್ಲೊ ಹೊ ದ್ವಂಧ್ವ್ ಖಂಯ್ಚ್ಯಾಯ್ ಮಾಂಡಾವಳೆಕ್ ಕುರ್ಡೆಪಣಿಂ ಪಾತ್ಯೆಂವ್ಚ್ಯಾ ವಿರುಧ್ ಜಾಗ್ವಣಿ ಉಟಯ್ತಾ. ಚೂಕಿ ಘಡ್ಚ್ಯಾ ಸಂದರ್ಭಾರ್ ಮೊನೆಳ್ ಪಾಂಗರ್ಚೆಂ ‘banality of evil’ -ಮ್ಹಳ್ಯಾರ್ ಸದಾಂಚ್ಯಾ ಕಾಮಾಂತ್ ಗುಮಾನ್ ನಾಸ್ತಾಂಚ್ ಅನೀತಿಕ್ ಮುಕಾರುಂಕ್ ಅವ್ಕಾಸ್ ದಿಂವ್ಚೆಂ – ಹ್ಯಾ ಪರಿಗತೆಕ್ ಪಾವಯ್ತಾ.
ಪೂಣ್ ಹೆ ಸರ್ವ್ ಗಂಭೀರ್ ಆನಿ ಜಡಾಯೆಚೆ ವಿಚಾರ್ ಕೊಲೆಜಿಚ್ಯಾ ಲೆಕ್ಚರಾಬರಿಂ ಯಾ ಕಠೀಣ್ ಶೆರ್ಮಾಂವಾಂವಿಣೆಂ ವಿಗಾರ್ ಆನಿ ಕಾಜಿತೋರಾಂ ಮಧ್ಲ್ಯಾ, ಮಧೆಂ ಮಧೆಂ ಹಾಶ್ಯಾಂಚಿ ಲ್ಹಾರಾಂ ಉಟಂವ್ಚ್ಯಾ ಭಾಸಾಭಾಶೆಂತ್, ತಾಂಚ್ಯಾ ಸುಲಲಿತ್, ಸಂಯ್ಭಿಕ್ ನಟನಾಂತ್ ಪ್ರೇಕ್ಷಕಾಂ ಮುಕಾರ್ ಪ್ರಸ್ತುತ್ ಕರ್ಚಿ ರೀತ್ ಹ್ಯಾ ನಾಟಕಾಚಿ ತಾಂಕ್. ಖಂಯ್ಸರೀ ಏಕ್ ಉತರ್ ಚಡ್ ಯಾ ಉಣೆಂ ಜಾಲೆಂ ಮ್ಹಣ್ ಭಗಾನಾಂ. ಕ್ರಿಸ್ಟಿ ಆನಿ ಕ್ಲ್ಯಾನ್ವಿನಾಕ್ ಸಾಂಗಾತಾ ಮಾಂಚ್ಯೆರ್ ಪಳೆಂವ್ಚೆಂಚ್ ದೊಳ್ಯಾಂಕ್ ಏಕ್ ಫೆಸ್ತ್. ಹೆಳ್ಲ್ಲೊ ಕಲಾಕಾರ್ ಒಲ್ವಿನ್ ಸಿ.ವೇಗಸ್ ಪೆರ್ಮನ್ನೂರ್ ಆಪ್ಲೊ ಕಿರ್ದಾರ್ ಬೋವ್ ಜಾಪ್ದಾರೆನ್ ಆನಿ ಶಾತ್ಯೆನ್ ಸಾದರ್ ಕರ್ತಾ ತರ್ ಲ್ಹಾನ್ಶ್ಯಾ ಕಿರ್ದಾರಾಂತ್ ತರೀ ಸ್ವೀಡಲ್ ಡಿ’ಸೋಜಾ ಸಕ್ಡಾಂಚೆ ಗುಮಾನ್ ವೊಡ್ತಾ. ಭರ್ತಿ ದೋನ್ ವರಾಂ ಸಕ್ಡಾಂಕ್ ಏಕ್ ಅಥ್ವ್ಯಾಚ್ ಸಂಸಾರಾಚೊ ಭಂವಾಡೊ ಕಾಡಯ್ತಾ. ಪಾಟಥಳಾರ್ ಬೊಂದೆಲ್ಚ್ಯಾ ಜೇಸನ್ ಲೋಬೊಚ್ಯಾ ಮ್ಹೊಂವಾಳ್ ತಾಳ್ಯಾನ್ ವ್ಹಾಳ್ಚಿಂ ಕಾಂತಾರಾಂ ನಾಟಕಾಂತ್ ಆನ್ಯೇಕ್ ಕಿರ್ದಾರಾಚೊ ಕಾಮ್ ಕರ್ತಾತ್.
ಮ್ಹಜ್ಯಾ ವಯುಕ್ತಿಕ್ ಅಭಿಪ್ರಾಯೆಂತ್ ಸಾಂವಿಧಾನಿಕ್ ರೀತಿರ್ ಜಾಂವ್ಚೆಂ ನಾಟಕಾಚೆಂ ಅಂತ್ ಗರ್ಜೆಪ್ರಾಸ್ ಚಡ್ ನಾಟಕೀಯ್ ಜಾಲೆಂ. ಪರಸ್ಪರ್ ವಿರೋಧಿ ಧೋರಣಾಚೆಂ ವಿಗಾರ್ ಆನಿ ಕಾಜಿತೋರ್ ಫಕತ್ ಏಕ್ ಸವಾಲ್ ಸಾಂಗಾತಾ ಫುಡ್ ಕೆಲ್ಲೆ ಫರಾ ಪಟ್ಲುನ್ ಧರ್ಚೆ ತಿತ್ಲೆ ಮೊಗಾಳ್ ಇಶ್ಟ್ ಜಾಂವ್ಚೆಂ ಜಿರಂವ್ಕ್ ಇಲ್ಲೆ ಕಶ್ಟ್. ವಿಗಾರಾಚಿ ಕಾತ್ ಎದೊಳ್ಚ್ ದಾಟೆವ್ನ್ ದಾಡ್ಡಿ ಜಾಲ್ಲಿ ಆಸಾ. ತಿ ತಿತ್ಲ್ಯಾ ಸೊಂಪ್ಯಾನ್ ಪಾತಳ್ ಜಾಂವ್ಚಿ ಮ್ಹಾಕಾ ದಿಸಾನಾಂ. ತಶೆಂಚ್ ಕಠೀಣ್ ಧೋರಣಾಂಚೊ ತರ್ನೊ ವಿಗಾರ್ ಎಕಾ ಸಮಸ್ಯಾಕ್ ವಿಗಾರಾಸವೆಂ ಹಾತ್ ಮೆಳಯ್ತ್, ಪೂಣ್ ಪೊಟ್ಲುನ್ ಧರ್ಚೆ ತಿತ್ಲೊ ಮೋವ್ ಪಡ್ಚೊ ನಾಂ. ಕೋಣ್ ಜಾಣಾಂ ವಿಗಾರಾನ್ ಸಾಂಗಲ್ಲೆಬರಿಂ ಮುಕಾರ್ ವೆತಾಂ ವೆತಾಂ ತಾಚಿ ಕಾತ್ಯ್ ದಾಟೆವ್ನ್ ಯೇತ್. ತೋಯ್ ಸುಧಾರ್ಸುನ್ ವರ್ಚಿ ಮನೋಗತ್ ಆಪ್ಣಾಯ್ತ್. ಪೂಣ್ ನಾಟಕಾಚೆ ಪರಿಧೆಭಿತರ್ ನಾಟಕಾಕ್ ಏಕ್ ರಾಜಾಂವೀಕ್ ಅಂತ್ ದಿಂವ್ಚೆ ಪಾಸತ್ ಅಶೆಂ ಕೆಲಾಸ್ತಲೆಂ ಮ್ಹಣ್ ಮ್ಹಜಿ ಪಾತ್ಯೆಣಿ. ಪೂಣ್ ಗಜಾಲ್ ತಿತ್ಲ್ಯಾರ್ಚ್ ಸಂಪಾನಾ, ಪೂಣ್ ಮುಕಾರುನ್ ವೆತಾ ಮ್ಹಳ್ಳೊ ವಾಜ್ಬಿ ಸಿನೊಲ್ ನಾಟಕ್ ದಿತಾ.
ಸುಟ್ಕಾ ದಬಾವಾಂತ್ ಆಸ್ಚ್ಯಾ ಹ್ಯಾ ಪ್ರಸ್ತುತ್ ಸಂಸಾರಾಂತ್ ಬಾಪ್ ಸೆರಾವೊಚೊ ನಾಟಕ್ ಬದ್ಲಾಪಾಕ್ ಕ್ರಿಸ್ತಾಚೊ ಉಲೊ ಮಾತ್ ನಂಯ್, ಆಮ್ಚ್ಯಾ ಆಳ್ಸಾಯೆಕ್ ಆನಿ ಚಿಂತ್ಪಾವೀಣ್ ಸುಧಾರ್ಸುನ್ ವರ್ಚ್ಯಾ ನಿರ್ವಿಕಾರಾಕ್ ಏಕ್ ಆರ್ಸೊ ಧರ್ತಾ. ಆಮಿ ಅಧಿಕಾರ್, ಭಾವಾರ್ಥ್ ಆನಿ ಪ್ರಗತಿ ಕಶಿ ಫುಡ್ ಕರ್ತಾಂವ್ ಮ್ಹಣ್ ಸವಾಲ್ ಕರ್ತಾ. ಏಕ್ ಸುಖಾಳ್ ಅನ್ಭೋಗಾಪ್ರಾಸ್ ಹಾಸವ್ನ್ ಹಾಸವ್ನ್ ಚಿಮ್ಟೆ ಕಾಡುನ್ ಆಮ್ಕಾಂ ಅಸ್ವಸ್ಥ್ ಕರ್ತಾ ತರ್, ಏಕ್ ತಾಕ್ತಿವಂತ್ ಮಾಂಚ್ಯೆನ್ ಕರಿಜೆ ಜಾಲ್ಲೆಂ ಸಾರ್ಕೆ ರಿತಿನ್ ಕರ್ತಾ.
ಕೊಂಕ್ಣಿ ರಂಗ್ಮಾಂಚ್ಯೆಚೊ ಹೊ ಕ್ರಾಂತಿಕಾರಿ ಬದ್ಲಾವ್ ಖರೊ ಆನಿ ತೊ ನಿಜಾಯ್ಕೀ ಸೊಭಿತ್.
• ಕಿಶೂ, ಬಾರ್ಕುರ್
