ಕಾಲ್ ಸನ್ವರಾ, ಇಸ್ರಾಯೆಲ್-ಅಮೆರಿಕಾ ಜುಂತಾನ್ ಇರಾನಾ ವಯ್ರ್ ಮಾಂಡ್ಲೆಲ್ಯಾ ಝುಜಾಕ್ ದೋನ್ ಹಫ್ತೆ ಭರ್ಲೆ. ಪೈಲ್ಯಾ ದಿಸಾಚ್, ಇರಾನಿ ಸುಪ್ರೀಮ್ ಲೀಡರ್ ಅಯತೊಲ್ಲಾ ಅಲಿ ಖಮೇನಿಕ್ ತಾಚ್ಯಾ ಸೀನಿಯರ್ ಮಂತ್ರಿಂ ಆನಿಂ ಮಿಲಿಟರಿ ಕಮಾಂಡರಾಂ ಸಾಂಗಾತಾ, ಟೆಹರಾನಾಂತ್ ಲಗಾಡ್ ಕಾಡ್ಲೆಲೆಂ. ತಕ್ಲಿಚ್ ಕಾಪುನ್ ಕಾಡ್ಲಿ ತರ್, ವಿಕಾಳ್ ಸರೊಪ್ ವೆಗಿಂಚ್ ಮೊರ್ತಲೊ ಮ್ಹಣ್ ಜುಂತಾಚ್ಯೆಂ ಚಿಂತಾಪ್. ವೆನೆಜುವೆಲಾಂತ್ ಪ್ರೆಸಿಡೆಂಟ್ ಮಧುರೊಚೆಂ ಅಪಹರಣ್ ಕರ್ನ್, ರಾಜ್ವಟ್ ಬದ್ಲಿಲೆಂ ತಶೆಂ.
ಇರಾನ್ ರಾಜ್ವಟ್ಕಾಯ್ ಸರ್ವಾಧಿಕಾರಿ ತರ್ಯೀ mosaic doctrine ಮ್ಹಳ್ಳಿ ವಿಕೇಂದ್ರಿತ್ ಶಾಸನ್ ಪದ್ದತ್ ಚಲಯ್ತಾ. ಮ್ಹಣ್ಜೆ, ತಕ್ಲಿ ಕಾಪ್ಲ್ಯಾರ್ಯೀ ಜಿವ್ದಾಳ್ ಮೊರೊಂಕ್ ನಜೊ. ದೇಸಾಚ್ಯಾ ಲಾಂಭಾಯೆಕ್ ಆನಿಂ ರುಂದಾಯೆಕ್ ತಿಸಾಂಕ್ ಮಿಕ್ವೊನ್ ರಾಜ್ವಟ್ಕಾಯೆಚ್ಯೆ ಶಾಖೆ ಆಸಾತ್ ತೆ ಝುಜ್ ಆನಿಂ ದೇಸ್ ಚಲವ್ನ್ ವರ್ತೆಲೆ. ದೆಕುನ್ ಇರಾನ್ ಭಾಗ್ವಲೆಂ ನಾಂ. ಬದ್ಲೆಕ್, ಜುಂತಾನ್ ಚಿಂತುಂಕ್ ನಾಂ ತಿತ್ಲ್ಯಾ ಬಳಾನ್ ಪ್ರತಿ ಆಕ್ರಮಣ್ ಇರಾನ್ ಕರಿತ್ತ್ ಆಯ್ಲಾಂ.
ಝುಜ್ ವೆಗಿಂಚ್ ಸಂಪ್ತೆಲೆಂ ಮ್ಹಣ್ತಾ ಟ್ರಂಪ್:
ಟ್ರಂಪ್ ಧುಂದ್ಲೆಬಾಜಿ ಆನಿ ವಿರೋಧಭಾಶಿ ಮ್ಹಣ್ ಆಮಿ ಜಾಣಾಂವ್. ಘಡಿಯೆಕ್ ಏಕ್ ಪಾವ್ಟಿಂ, ತೊಂಡಾಕ್ ಆಯಿಲ್ಲ್ಯಾ ಭಾಶೆನ್ ಉಲಂವ್ಚಿ ತಾಚಿ ಸವಯ್. “ಇರಾನ್ ಝುಜ್ ಆಪುಣ್ ಜಿಕ್ಲಾಂ. ಪೂಣ್, ಫಾವೊತೆಂ ತಿತ್ಲೆಂ ನಹಿಂ. ಇರಾನಾಂತ್ ಬೊಂಬ್ ಘಾಲುಂಕ್ ಚಡಿತ್ ಕಾಂಯ್ ಉರೊಂಕ್ನಾಂ” ಮ್ಹಳಾಂ ತಾಣೆಂ. ಹಾಚೊ ಅರ್ಥ್ ಕಿತೆಂ? ಫಾವೊತಿ ತಯಾರಿ ಕರಿನಾಸ್ತಾನಾಂ, ಹ್ಯಾ ಝುಜಾಕ್ ತಾಣೆಂ ಉಡ್ಕಿ ಮಾರ್ಲ್ಯಾ ತಶೆಂ ದಿಸ್ತಾ. ಕಿತ್ಯಾಕ್, ಇರಾನ್ ಇಸ್ರಾಯೆಲಾ ವಯ್ರ್ ಆನಿಂ ಪ್ರಾದೆಶಿಕ್ ಅಮೆರಿಕಿ ಥಳಾಂ ವಯ್ರ್ ಮಾತ್ರ್ ಧಾಡ್ ಘಾಲ್ತೆಲೆಂ ಮ್ಹಣ್ ತಾಕಾ ಸಲಹಾ ದಿಲ್ಲಿ ಅಸ್ತೆಲಿ. ಇರಾನಾಚಿ ಮಿಲಿಟರಿ ರಾಜ್-ನೀತ್ ಬೊಲ್ತಿಚ್.
ಕುವೈತ್, ಬಾಹ್ರೇನ್, ಖತಾರ್, ಸಾವ್ದಿ, ಯುಏಇ ಆನಿ ಒಮಾನ್ ತಸ್ಲೆ ಶೆಜಾರಿ ದೇಸ್ ಹ್ಯಾ ಝುಜಾಂತ್ ಮೆತೆರ್ ಜಾಂವ್ಕ್ ತಯಾರ್ ನಾತ್ಲೆ. ಮ್ಹಣ್ತಚ್ ಇರಾನ್ ಪ್ರತಿ ಆಕ್ರಮಣ್ ಕರ್ಚ್ಯೆಂ ನಾಂ ಮ್ಹಳ್ಳಿ ಫಟ್ಕಿರಿ ಪಾತ್ಯೆಣಿ ದವರ್ನ್ ತೆ ಆಸ್ಲೆ. ಪೂಣ್, ತಾಂಚ್ಯೆ ಭುಮಿಚ್ಯೆರ್ ಅಮೆರಿಕಿ ಲಶ್ಕರಿ ಥಳಾಂ ಆಸಾತ್. ಹಿಂ ನಾಸ್ ಕರಿಜೆ ಮ್ಹಳ್ಳ್ಯಾ ನೀಬಾನ್, ತಾಂಚ್ಯೆರ್ ಮಿಸ್ಸಾಯ್ಲಾಂ ಆನಿ ಡ್ರೋನಾಂಚೊ ಪಾವ್ಸ್ಚ್ ಇರಾನಾನ್ ವೊತ್ಲಾ. ಹಿಂ ಆಕ್ರಮಣಾಂ ಕಾಯ್ದ್ಯಾಚಿಂ ಮ್ಹಳಾಂ ತಾಣೆಂ.
ಆಮ್ ನಾಗ್ರಿಕ್ ಆನಿ ಮೂಳಾವ್ಯಾ ಸವ್ಲತೆಂ ವಯ್ರ್ ಧಾಡ್:
ದುಬೈ, ಅಬು-ಧಾಬಿ, ಕುವೈತ್, ಬಾಹ್ರೆಯ್ನ್ ವಿಮಾನ್ ಥಳಾಂ, ತಾಂಚಿಂ ಲಕ್ಸರಿ ಹೊಟ್ಲಾಂ, ಆನಿ ಗ್ರೇಸ್ತ್ ನಿವಾಸಿ ವಠಾರಾಂ ಇರಾನಿ ಮಿಸ್ಸಾಯ್ಲಾಂ ವ ಡ್ರೋನ್ ಧಾಡಿಂಕ್ ಬಲಿ ಜಾಲ್ಯಾಂತ್.
ಉರ್ಜಾ ವಿಸ್ಕಳೀತ್ ಕರ್ಚ್ಯೆಂ (Energy disruption) ಇರಾನಾಚಿ ರಣನೀತ್. ಪ್ರತ್ಯೇಕ್ ಜಾವ್ನ್ ಸಾವ್ದಿಚಿ ರಸ್ ತನುರಾ ರಿಫಯ್ನರಿ, ಖತಾರಿ ರಸ್ ಲಫನ್ LNG ಸುವಿಧಾಂ ಆನಿ ತಾಂಚಿ ಏಕ್ ಮಾತ್ರ್ ಮೆಸಾಯಿದ್ ರಿಫಯ್ನರಿ, ಬಾಹ್ರೇನಿ ಏಕ್ ಮಾತ್ರ್ ರಿಫಯ್ನರಿ, ಕುವೈತ್ ತೆಲಾಂ ಕಂಪ್ಣ್ಯೊಂ, ಫುಜೈರಾ ತೇಲ್ ಟಾಂಕಿಯೊ, ಒಮಾನಿ ದುಕ್ಮ್ ವ್ಯಾಪಾರಿ ಬಂದರ್ ಇತ್ಯಾದಿ ಇರಾನಾನ್ ಧಾಡ್ ಘಾಲುಂಕ್ ವಿಂಚ್ಲ್ಯಾತ್. ಪೆಟ್ಲೆಲ್ಯಾ ಉಜ್ಯಾಂತ್ ದೇಸಿ ನಾಗ್ರಿಕಾಂಚ್ಯೆ ಜೀವ್ ವಚೊಂಕ್ನಾಂತ್. ಪುಣ್, ಉತ್ಪಾಧನ್ ಬಂಧ್ ಕೆಲಾಂ.
ಅಧಿಕ್ ಮಹತ್ವಾಚಿ ಗಜಾಲ್ ಮ್ಹಳ್ಯಾರ್ Strait of Hormuz ಕಲ್ವ್ಯಾಚ್ಯೆರ್ ನೇವಿ ಧಾಡ್. ಹೊ ಕಲ್ವೊ ಬಂಧ್ ಜಾಲಾ. ಹ್ಯಾ ವರ್ವಿಂ ಕಚ್ಚಾ ತೇಲ್, LPG ಸಮೇತ್ ರಿಫಯ್ನರಿ ತೇಲಾಂ, ಆನಿಂ LNG ನಿರ್ಯಾತ್ ಬಂಧ್ ಜಾಲಾ. ಜಾಗತಿಕ್ ಕಚ್ಚಾ ತೇಲಾಚೊ 20% ಹಿಸೊ ಹ್ಯಾ ಕಲ್ವ್ಯಾ ಮುಖಾಂತ್ರ್ ವಾಳ್ತಾ.
ದುಬೈಂತ್ ಕಾಂಯ್ ತೇಲ್ ನಾಂ. ತರ್ಯೀ, ಥೈಂಚ್ಯಾ ಶೇಕಾಂನಿಂ ಆರ್ಥಿಕ್ ಆಚರ್ಯೆಂ ರಚ್ಲಾಂ. ಮ್ಹಾ-ಗಿರೆಸ್ತ್ಕಾಯೆಚ್ಯೆಂ ಆನಿ ಐಶ್ಯಾ-ಆರಾಮಾಚ್ಯೆಂ ದುಸ್ರೆಂ ನಾಂವ್ ದುಬೈ. ಜಾಗತಿಕ್ ಶೆರ್; ಅರಬ್-ಪತಿ, ದಲಾಲ್, ಫಾಮಾದ್ ವ್ಯಕ್ತಿ ಹಾಂಗಾಚ್ಯಾ ಕುದ್ರ್ಯಾಂನಿಂ ಬೊಂಗ್ಲೆ ಘೆವ್ನ್ ವಸ್ತಿ ಕರ್ತಾತ್. ಟೇಕ್ಸ್ ನಾಂ, ಚೊರಾಂಚಿ ಫಿಕಿರ್ ನಾಂ. ರಾಜಕೀಯ್ ಅಭಿಪ್ರಾಯ್ ಮಾತ್ರ್ ಉಚಾರುಂಕ್ ನಜೊ. ತೊಂಡಾಕ್ ಬೀಗ್ ಘಾಲ್ಶಿ ತರ್ ಕಸ್ಸಲಿ ಭಿರಾಂತ್ ನಾಂ. ಅಸಲ್ಯಾ ಸರ್ಗಾಕ್ ಇರಾನಾನ್ ಉಜೊ ಪೆಟವ್ನ್ ಆರ್ಥಿಕ್ ಶೊಕ್ ದಿಲಾ.
ಅಶೆಂ ಜಾಂವ್ಕ್ ಆಸ್ಲೆಂ; ತೆಂ ಅನಿವಾರ್ಯ್. everything is fair in love and war. ಟ್ರಂಪ್ ಮಾತ್ರ್ ಇರಾನಿ ಆಕ್ರಮಣ್ biggest surprise ಮ್ಹಣ್ ವಾಖಣ್ತಾ!
ತೇಲಾಕ್ ಉಜೊ ಪೆಟ್ಲಾ:
ಪ್ರಸ್ತುತ್ ಮೋಲಾಂ ಪ್ರತಿ ಬೆರೆಲಾಕ್ (2026 ಮಾರ್ಚ್ 14, 2026 ಸಕಾಳಿಂ ಇಕ್ರಾ ವ್ಹರಾರ್): Brent ಕ್ರೂಡ್ 104 ಡೊಲರ್, WTI (ಅಮೆರಿಕಿ ಕ್ರೂಡ್): 99 ಥಾವ್ನ್ 103 ಡೊಲರ್. 2026 ಫೆಬ್ರವರಿ 28 ವೆರ್ ಝುಜ್ ಸುರ್ವಾತ್ಲೆಲ್ಯಾ ವ್ಹರಾ ಥಾವ್ನ್ ಆಜ್ ಮೆರೆನ್ ಮೋಲಾಂ 40%ಕ್ ಮಿಕ್ವೊನ್ ವಾಡ್ಲ್ಯಾಂತ್. ಝುಜ್ ಮಟ್ವೆಂ ಜಾಲೆಂ ತರ್, ಮೋಲಾಂ 120 ಡೊಲರ್ ಜಾತಿತ್. ಝುಜ್ ಮಹಿನೊ ವ ಚಡಿತ್ ಚಲತ್, 150 ಡೊಲರ್ ಮಿಕ್ವತ್ ಮ್ಹಣ್ ಜಾಣ್ತೆಂ ಬೊಲ್ಮೆಂ ಸಾಂಗ್ತಾತ್.
Strait of Hormuz ಕಲ್ವೊ ಬಂಧ್ ದವರ್ತೆಲ್ಯಾಂವ್ ಮ್ಹಣ್ ಇರಾನಿ Islamic Revolutionary Guard Corps (IRGC) ಹಾಣಿಂ ಧಮ್ಕಿ ದಿಲ್ಯಾ. ಕಚ್ಚಾ ತೇಲಾಚ್ಯೆಂ ಮೋಲ್ 200 ಡೊಲರ್ ಮಿಕ್ವಾಜೆ ಮ್ಹಳಾಂ. ಅಶೆಂ ಜಾಯ್ತ್, ರಶಿಯಾಕ್ ಮಾತ್ರ್ ನಹಿಂ, ಅಮೇರಿಕಾಕ್ ಸಯ್ತ್ ಫಾಯ್ದೊಚ್ ಫಾಯ್ದೊ!
IRGC ಇರಾನಿ “deep state” power ಜಾವ್ನಾಸಾ. ಸುಪ್ರೀಮ್ ಲೀಡರ್ ಹ್ಯೆ ಲಶ್ಕರಿ ಫವ್ಜೆಕ್ ಡಿರೆಕ್ಟ್ ಕಂಟ್ರೊಲ್ ಕರ್ತಾ. ದೇಸಾ ಭಿತರ್ ಪ್ರತಿರೋಧ್ ದಿಸ್ಲೊ ವ ಉಪ್ರಾಟಿ ಖುಣಾಂ ದಿಸ್ಲಿಂ ತಾಂಕಾಂ ದಾಂಬುನ್ ದವರುಂಕ್ ಹಾಂಕಾಂ ಅಧಿಕಾರ್ ಆಸಾ. ವಿದೇಶಾಂತ್ ತಶೆಂ ರಾಷ್ಟ್ರಾ ಭಿತರ್ ಜಾಸೂಸಿ ಕರ್ಚಿ ಹಾಂಚಿ ಡ್ಯೂಟಿ. Strait of Hormuz ಕಲ್ವೊ ಲಾಂಬ್ ಕಾಳಾಕ್ ಬಂಧ್ ದವರ್ಚಿ ಜವಾಬ್ದಾರಿ ಸಯ್ತ್ ಹಾಂಚಿಂ.
ಹ್ಯಾ ಝುಜಾಂತ್ ಆಮ್ಚಿ ಫಜಿಂತ್:
ಹ್ಯಾ ನಿರಂತರ್ ಸಂಘರ್ಷಾಂತ್ ಆಮ್ಕಾಂ ಸಂಕಟ್ ಉಬ್ಜಲಾ. ಪೆಟ್ರೊ-ಇಂಧನಾ ಖಾತಿರ್ ಗಲ್ಫ್ ಪ್ರದೇಶ್ ಆಮ್ಕಾಂ ಮಹತ್ವಾಚ್ಯೆ. ತಿತ್ಲೆಂಚ್ ನಹಿಂ, ಅತಿ ವ್ಹಡ್ ವಿದೇಶಿ ಸಮುದಾಯ್ ಥೈಂ ಆಸಾ ತಾಂಚಿ ಜತನ್ ಆನಿ ಸುರಕ್ಷತಾ ದೇಸಾಚಿ ಜವಾಬ್ದಾರಿ.
ಆಮಿಂ 90% ಮಿಕ್ವೊನ್ LPG ಆನಿಂ LNG, ಆನಿಂ 50% ಮಿಕ್ವೊನ್ ಕಚ್ಚಾ ತೇಲ್ ಹ್ಯಾ ವಠಾರಾ ಥಾವ್ನ್ ಆಯಾತ್ ಕರ್ತಾಂವ್. ಹಿಂ ತೆಲಾಂ ಸಾಗ್ಸುಂಚಿಂ ಆಮ್ಚಿಂ ತಾರ್ವಾಂ Strait of Hormuz ಕಲ್ವ್ಯಾ ಮುಖಾಂತ್ರ್ ಪಯಣ್ ಕರ್ತಾತ್. ಆತಾಂ ಹೊ ಕಲ್ವೊ ಬಂಧ್ ಕೆಲಾ. ಇರಾನಾನ್ ಮ್ಹಳಾಂ ಕಿ ಇಂಡಿಯಾ ಮಿತ್ರ್ ರಾಷ್ಟ್ರ್ ದೆಕುನ್ ಭಾರತೀಯ್ ಧ್ವಜ್ ಉಬಂವ್ಚಿ ತಾರ್ವಾಂ ಕಳ್ವೊ ವಾಪ್ರುಂಕ್ ಸಕ್ತಾತ್. ಹೆಂ ಕಿತ್ಲೆಂ ವಾಸ್ತವಿಕ್ ತೆಂ ಕಳಿತ್ ನಾಂ.
ಘರೇಳು ಅಂತರ್ಜಾಲ್ LPG: 2026 ಮಾರ್ಚ್ 14 ವ್ಯೆರ್, ದಿಲ್ಲಿಂತ್ 14.2 ಕಿಲೊ ಘರಾಳು ಸಿಲಿಂಡರ್ 913 ರುಪೈ ಮೋಲಾಕ್ ಸರ್ಕಾರಿ ಕಂಪ್ಣ್ಯೊಂ ಬುಕ್ಕಿಂಗ್ ಕರ್ತಾತ್. 25 ದೀಸಾಂಕ್ ಏಕ್ ಸಿಲಿಂಡರ್ ರೇಶನ್. ಬೊಂಬಯ್ತ್ ಕಾಳೊ ಬಜಾರ್ ಭಾರಿಚ್ ಚಲ್ತಾ. ಘರಾಳು ಸಿಲಿಂಡರ್ 1500 ರುಪೈ ಆನಿ ಹೊಟ್ಲಾಂಕ್ 47.5 ಕಿಲೊ ಸಿಲಿಂಡರ್ 4350 ರುಪೈ. ಬುಕ್ಕಿಂಗ್ ಮೇಳಾನಾಂ ದೆಕುನ್ ಜಾಯಿತ್ತಿಂ ಹೊಟ್ಲಾಂ ಗೇಸ್ ನಾಸ್ತಾನಾಂ ಬಂಧ್ ಪಡ್ಲ್ಯಾಂತ್ ವ ಹೋಮ್ ಡಿಲಿವರಿ ಒರ್ಡರಾಂ ಘೆನಾಂತ್!
ಅನ್ಯೇಕ್ ಪರಿಣಾಮ್ ಆಮ್ಚ್ಯಾ ರುಪಿಯಾಚ್ಯೆಂ ಮೋಲ್. ಪಾಟ್ಲ್ಯಾ ವರ್ಸಾ ಥಾವ್ನ್ ಲಗಾತರ್ ರುಪೈ ಕೊಸ್ಳಾತ್ತ್ ಆಯ್ಲಾ. ಡೊಲರಾ ಬರೋಬರ್ 92 ಉತ್ರೊನ್ ಆತಾಂ ಸೆಂಚುರಿ ಮಾರ್ತಾ ಕೊಣ್ಣಾ. ರುಪೈ ವೆಗಿಂಚ್ 120 ಜಾಯ್ತ್ ಮ್ಹಣ್ತಾತ್ ಜಾಣಾರಿ. ಹಾಚಿಂ ಖುಣಾಂ ಆಮ್ಚ್ಯಾ ಹಿಷ್ಯಾ ಬಜಾರಾಂತ್ ದಿಸ್ತಾತ್. ಯೆದೊಳ್ಚ್ 10% ಕೊಸ್ಳಾಲಾ.
ವಿಶ್ವಗುರು ಮೋದಿ ಕಿತ್ಯಾಕ್ ಉಲಯ್ನಾ?
ಇರಾನ್ ಆಮ್ಚೊ ಮಿತ್ರ್ ದೇಸ್. ಅಮೇರಿಕಾಚಿ ಇಷ್ಟಾಗತ್ ಸಯ್ತ್ ಜಾಯ್ ಆಮ್ಕಾಂ. ವಯ್ಲ್ಯಾನ್, ಝುಜ್ ಚಾಲು ಜಾಂವ್ಚ್ಯಾ ಕೇವಲ್ ದೋನ್ ದೀಸಾಂ ಪೈಲೆಂ ಇಸ್ರಾಯೆಲಾಚ್ಯಾ ರಾಜ್ಯ್ ಭೊಂವ್ಡೆರ್ ಮೋದಿ ವಚೊನ್ ಆಯ್ಲಾ. ಬಿಬಿಕ್ ಆರಾಂಟುನ್ ವೆಂಗ್ ಮಾರ್ಲೆಲಿ ತಸ್ವೀರ್ ಸಕ್ಟಾಂನಿಂ ಪಳೆಲ್ಯಾ. ಬಾವ್ಡೊ, ವೊಗೊ ರಾವಾನಾಸ್ತನಾಂ, ಆನಿಂ ಕಿತೆಂ ಕರ್ತಲೊ?
ಅಯತೊಲ್ಲಾ ಖಮೇನಿಚ್ಯೆ ಖುನಿಯೆಚಿ ಸಯ್ತ್ ನಿಂದಾ ಕರುಂಕ್ ಆಮ್ಕಾಂ ಧಯ್ರ್ ಮೆಳೊಂಕ್ ನಾಂ. ಸ ದೀಸಾಂ ನಂತರ್ ವಿದೇಶಿ ಮಂತ್ರಾಲಯಾಚೊ ಸಚಿವ್ ಇರಾನಿ ಎಂಬೆಸ್ಸಿಕ್ ವಚೊನ್ ಶೋಕ್ ಬುಕಾಂತ್ ದಸ್ಕತ್ ಕರ್ನ್ ಆಯ್ಲೊ. ಮೋದಿನ್ ಸಂತಾಪ್ ಉಚಾರ್ಲ್ಯಾರ್ ಬರೆಂ ಆಸ್ಲೆಂ. ತಶೆಂ ತಾಣೆಂ ಕರುಂಕ್ನಾಂ. ವಿಶ್ವಗುರು ಮ್ಹಣ್ ಆಪ್ಣಾಕ್ಚ್ ಲೇಬಲ್ ದಿಲ್ಲ್ಯಾ ಮೋದಿಕ್ ಕಸಲೆಂ ಭ್ಯೆಂ ಧೊಸ್ತಾ? Silence is not neutral; its abdication ಮ್ಹಣ್ ಸೋನಿಯಾ ಗಾಂಧಿನ್ ತಾಚಿ ನಿಂದಾ ಕೆಲ್ಯಾ ತಿ ವಾಜ್ಬಿಚ್!
WW-III ತಿಸ್ರೆಂ ಜಾಗತಿಕ್ ಮ್ಹಾ-ಝುಜ್ ವೆಗಿಂಚ್?
ರಶಿಯಾ ಯುಕ್ರೇನಾಂತ್ ಶಿರ್ಕಲಾಂ. ಯುರೋಪಿಯನಾಂ ಮಧೆಂ ಹ್ಯಾ ಝುಜಾಚಿ ವ್ಹಡ್ ಆಸಕ್ತ್ ನಾಂ. ಚೀನ್ ಹ್ಯಾ ಝುಜಾಂತ್ ವಾಂಟೆಲಿ ಜಾಯ್ನಾ ಕಿತ್ಯಾಕ್ ತಾಂಕಾಂ ತೈವಾನ್, ಟಿಬೆಟ್ ಆನಿ ಇಂಡಿಯಾ ತಸ್ಲೆ ಹೆರ್ ಧೊಸಿ ಆಸಾತ್. ರಶಿಯಾಕ್ ತೇಲಾಚಿ ಜೋಡ್ ವಾಡ್ತಾ. ಚೀನಾಕ್ ಆಪ್ಲಿ ಮಿಲಿತರಿ ಉಪಕರಣಾಂ ಆನಿ ತೆಕ್ನೊಲೊಜಿ ಇರಾನಾಕ್ ವಿಕುಂಕ್ ಸರ್ಗಾರ್ ಥಾವ್ನ್ ಪಡ್ಲೆಲೆಂ ಮನ್ನಾ. ಅಪ್ರತೀಮ್ ಏಕ್ ಸಂಧರ್ಬ್. ದೆಕುನ್, ಸದ್ದ್ಯಾಕ್ ತಿಸ್ರೆಂ ಜಾಗತಿಕ್ ಝುಜ್ ಅಸಂಭವ್. ಪೂಣ್, ಜಶೆಂ ಹಾಂವೆಂ ಪೈಲೆಂ ಕಿಟಾಳಾರ್ ಬರಯ್ಲಾಂ: ಫುಡಾರಾಚಿ ಭವಿಶ್ಯ್ ವಾಣಿ ಕರುಂಕ್ ಆಸಾಧ್ಯ್!
■ ಫಿಲಿಪ್ ಮುದಾರ್ಥ್
