“ಕರ್ನಾಟಕ ರಾಜ್ಯಾಚಾ ಲೊಕಾಕ್ ಜೆರಾಲ್ ಥರಾನ್ ಆನಿ ಮಂಗ್ಳುರ್ಚ್ಯಾ ಲೊಕಾನ್ ಪ್ರತೇಕ್ ಥರಾನ್ ಪ್ರಸ್ತುತ್ ಎಲಿಸಾಂವ್ ಬೋವ್ ನಿರ್ಣಾಯಕ್ ಜಾವ್ನಾಸಾ. ಹ್ಯಾ ದೆಶಾಚ್ಯಾ ಸಂವಿದಾನಾನ್ ನಾಗರಿಕಾಂಕ್ ದಿಲ್ಲ್ಯಾ ಹಕ್ಕಾಂಚಿಂ ರಾಕೊಣ್ ಕರ್ಚ್ಯಾಂತ್, ಕಾನುನ್ ವೆವಸ್ಥಾ ಸಾಂಬಾಳ್ಚ್ಯಾಂತ್ ಪ್ರಸ್ತುತ್ ಸರ್ಕಾರ್ ಸಂಪೂರ್ಣ್ ಸಲ್ವಾಲಾ. ಪ್ರದೇಶಾಚಿ ಅಬಿವೃದ್ದಿ ಪಾಟಿಂ ಉರ್ಲ್ಯಾ. ಪ್ರದೇಶಾಚಿ ಅಬಿವೃದ್ದಿ ಜಾಯ್ಜೆ ಜಾಲ್ಯಾರ್ – ಸಮಾಜೆಂತ್ ಶಾಂತಿ ಸಮಾದಾನ್ ಆಸಜೆ. ಶಾಂತಿ ಸಮಾದಾನ್ ಪಾಟಿಂ ಯೇಜೆ ಜಾಲ್ಯಾರ್ ಬದ್ಲಾವಣ್ ಅನಿವಾರ್ಯ್ ಮ್ಹಣ್ಚೆ ತಸಲಿ ಪರಿಸ್ಥಿತಿ ಆಜ್ ಪ್ರದೇಶಾಂತ್ ನಿರ್ಮಾಣ್ ಜಾಲ್ಯಾ” ಮ್ಹಣಾಲೊ ಕೊಂಗ್ರೆಸ್ ಪಾಡ್ತಿಚೊ ಮಂಗ್ಳುರ್ (ದಕ್ಶಿಣ್) ಕ್ಶೇತ್ರಾಚೊ ಉಮೆದ್ವಾರ್ ಶ್ರೀ ಜೆ. ಆರ್. ಲೋಬೊ.
ನಿವೃತ್ತ್ ಕೆ.ಎ.ಎಸ್. ಅದಿಕಾರಿ ಆನಿ ಎಕಾ ಅವ್ಧೆಕ್ ಮಂಗ್ಳುರ್(ದಕ್ಶಿಣ್) ಶಾಸಕ್ ಜಾವ್ನ್ ಮಂಗ್ಳುರಾಂತ್ ಜಾಯ್ತ್ಯಾ ಅಬಿವೃದ್ದಿ ಕಾರ್ಯಾಂಚಿಂ ಸುರ್ವಾತ್ ಕೆಲ್ಲೊ ಶ್ರೀ ಲೋಬೊ, ಕದ್ರಿ ಜಿಮ್ಮೀಸ್ ಸುಪರ್ ಮಾರ್ಕೆಟಿ ಮುಕಾರ್ ಓರೇನಿಯ ವೆಪಾರಿ ಸಂಕೀರ್ಣಾಂತ್ ಪಾಡ್ತಿಚ್ಯಾ ಚುನಾವಿ ದಫ್ತರ್ ಉಗ್ತಾವಣಾ ಸಂದರ್ಬಾರ್ ಉಲಯ್ತಾಲೊ.
“ಮಂಗ್ಳುರಾಂತ್ ಉಂಚ್ಲ್ಯಾ ಶಿಕ್ಪಾಚೆ ಇತ್ಲೆ ಸಂಸ್ಥೆ ಆಸೊನೀ, ಆಮ್ಚ್ಯಾ ತರ್ನಾಟ್ಯಾಂಕ್ ಕಾಮಾಚೆ ಅವ್ಕಾಸ್ ನಾ ಜಾಲ್ಯಾತ್. ತಾಂಣಿ ಕಾಮಾಚ್ಯಾ ಸೊಧ್ನೆರ್ ಗಾಂವ್ ಸೊಡ್ನ್ ವಚಜೆ ಜಾಲ್ಲಿ ಪರಿಸ್ಥಿತಿ ಆಸಾ. ಪರಿಸ್ಥಿತಿ ಬದ್ಲಜೆ ತರ್, ಬರೊ ಸರ್ಕಾರ್ ಯೇಜೆ. ಬರೊ ಸರ್ಕಾರ್ ಆಸ್ಲ್ಯಾರ್, ಗಾಂವಾರ್ ಸೌಹಾರ್ದತೆಚೆಂ ವಾತವರಣ್ ರುತಾ ಜಾತಾ. ಸಮಾಜೆಂತ್ ಸೌಹಾರ್ದತಾ ಆಸ್ಲ್ಯಾರ್ ಉದ್ಯಮಾಂ ಯೆತಾತ್. ಉದ್ಯಮಾಂ ಆಯ್ಲ್ಯಾರ್ ಉದ್ಯೋಗ್ ಸೃಷ್ಠಿ ಜಾತಾತ್” ಮ್ಹಣ್ ಶ್ರೀ ಲೋಬೊನ್ ಆಪ್ಲಿ ಅಭಿಪ್ರಾಯ್ ಉಚಾರ‍್ಲಿ.
ಪಾಡ್ತಿಚೆ ಮಾಲ್ಗಡೆ ಕಾರ್ಯಕರ್ತ್ ಪದ್ಮನಾಭ ಆನಿ ಸದಾಶಿವ ಹಾಣಿ ದಿವೊ ಪೆಟವ್ನ್ ದಫ್ತರ್ ಉಗ್ತಾಯ್ಲೆಂ. ಪಂ| ವಿಶ್ವನಾಥ ಭಟ್, ಮೌ| ರಿಯಾಜ್ ಫೈಜಿ ಆನಿ ಫಾ| ರೊನ್ಸನ್ ಪಿಂಟೊ ಹಾಣಿ ಆಶೀರ್ವಚನ್ ದಿಲೆಂ.
ಪಾಡ್ತಿಚೊ ಮಾಲ್ಘಡೊ ಮುಕೆಲಿ ಶ್ರೀ ಕೆ. ಎಸ್. ಮಸೂದ್ ಹಾಣಿ ಪಾಡ್ತಿಚ್ಯಾ ಕಾರ್ಯಕರ್ತಾಂಕ್ ಎಕಾ ಮನಾನ್ ಶ್ರೀ ಲೋಬೊ ಖಾತಿರ್ ವಾವುರ್ನ್, ತಾಕಾ ಜಿಕಂವ್ಕ್ ಉಲೊ ದಿಲೊ.
ಎಐಸಿಸಿ ಜೆರಾಲ್ ಕಾರ್ಯದರ್ಶಿ ಆನಿ ಆದ್ಲೊ ಎಮ್ಮೆಲ್ಸಿ ಶ್ರೀ ಐವನ್ ಸೊಜಾನ್ ಯೆವ್ಕಾರ್ ಮಾಗ್ಲೊ. ಸಮಾಜಿಕ್ ಕಾರ್ಯಕರ್ತ್ ತಶೆಂ ಕೊಂಗ್ರೆಸ್ ಮುಕೆಲಿ ಶ್ರೀ ಎಂ. ಜಿ. ಹೆಗ್ಡೆ ಹಾಣಿ ಕಾರ್ಯೆಂ ಚಲಯ್ಲೆಂ.
ಕಾರ್ಯಾಂತ್ ಮಾಲ್ಘಡೆ ಕಾಂಗ್ರೆಸ್ ಮುಕೆಲಿ ಶ್ರೀ ಸುರೇಶ್ ಬಲ್ಲಾಳ್, ಶ್ರೀ ಶಶಿದರ ಹೆಗ್ಡೆ, ಮಂಗ್ಳುರ್ ಪಾಲಿಕೆಂತ್ ವಿರೋದ್ ಪಾಡ್ತಿಚೊ ಮುಕೆಲಿ ಶ್ರೀ ನವೀನ್ ಆರ್ ಡಿ’ಸೊಜಾ, ಕೊಂಗ್ರೆಸ್ ಕೊರ್ಪೊರೇಟರ್, ಕಾರ್ಯಕರ್ತ್ ಆನಿ ಶ್ರೀ ಲೋಬೊಚೆ ಅಬಿಮಾನಿ ವ್ಹಡಾ ಸಂಕ್ಯಾನ್ ಹಾಜರ್ ಆಸ್ಲೆ.
