ಜೆಜುನ್ ದೋನ್ ಹಜಾರ್ ವರ್ಸಾಂ ಆದಿಂಚ್ ಏಕ್ ಉತರ್ ಸಾಂಗ್‌ಲ್ಲೆಂ, ಪ್ರವಾದ್ಯಾಂಕ್ ಆಪ್ಲ್ಯಾ ಸ್ವಂತ್ ಗಾಂವಾಂತ್ ಮಾನ್ ನಾ. ಪ್ರವಾದಿ ಜಾಯ್ಜೆ ಜಾಲ್ಯಾರ್ – ತಾಣೆ ಪ್ರವಾದ್ಪಣ್‌‌ಚ್ ಕರಿಜಾಯ್ ಮ್ಹಣೊನ್ ನಾ, ಲೊಕಾ ಉಪ್ಕಾರಾಕ್ ಪಡ್ಚಿಂ ಬರಿಂ ಕಾಮಾಂ ಕೆಲ್ಯಾರೀ ಪಾವ್ತಾತ್!
ಕರ್ನಾಟಕಾಂತ್ಲ್ಯಾ ರಾಜಕೀಯಾ ಕುಶಿಕ್ ಏಕ್ ದೀಶ್ಟ್ ಘಾಲಿ ತರ್, ಆದಿಂ ಥಾವ್ನ್ ಆತಾಂ ಮ್ಹಣಾಸರ್ ಕ್ರೀಸ್ತಾಂವ್ ಮುಕೆಲಿ ಉಬ್ಜಲ್ಲೆ ಬೋವ್ ಥೊಡೆ – ಬೊಟಾಂನಿ ಮೆಜ್ಚೆ ತಿತ್ಲೆ ಮ್ಹಣ್ಯೆತ್. ಥೊಡೆ ಆಪ್ಲ್ಯಾ ಖುದ್ ತಾಂಕಿನ್ ವಯ್ರ್ ಆಯ್ಲೆ ತರ್, ಆನಿ ಥೊಡೆ ಸಮಾಜೆಚ್ಯಾ ಲೊಕಾಚ್ಯಾ ಸಹಕಾರಾನ್. ಥೊಡ್ಯಾಂಕ್ ‘ಲೀಡರ್’ ಕೆಲೆ ತರ್ ಥೊಡೆ ಆಪ್ಲ್ಯಾ ಮ್ಹಿನತೆನ್ ಕಾಮ್ ಕರ್ನ್ ಮುಕೆಲಿ ಜಾಲೆ. ಪೂಣ್ ಖಂಯ್ಚ್ಯಾಯ್ ಕ್ರಿಸ್ತಾಂವ್ ಮುಕೆಲ್ಯಾಂನಿ ಆಪ್ಲ್ಯಾ ಸಮಾಜೆಕ್ ಸೊಡ್ನ್ ಘಾಲುಂಕ್ ನಾ.
ದೇಶಾಚೊ ಮಹಾನ್ ಮುಕೆಲಿ ಜೋರ್ಜ್ ಫೆರ್ನಾಂಡಿಸಾ ಥಾವ್ನ್ ಆರಂಭ್ ಕರುನ್ ಪ್ರಸ್ತುತ್ ಗ್ರಾಮ ಪಂಚಾಯ್ತ್ ಮುಕೆಲ್ಯಾಂ ಮ್ಹಣಾಸರ್ ಚಡಾವತ್ – ಆಮ್ಚ್ಯಾ ಸಮಾಜೆಚ್ಯಾ ಲೊಕಾಕ್ ಆನಿ ಇಗರ್ಜಾಂಕ್ ಬರೆಂ ಕೆಲ್ಲೆ, ಕಾಮಾಂ ಕರ್ನ್ ದಿಲ್ಲೆ, ಆನಿ ದಿಂವ್ಚೆಚ್ ಜಾವ್ನಾಸಾತ್. ಪೂಣ್ ಆಮ್ಚಿ ಕ್ರೀಸ್ತಾಂವ್ ಸಮಾಜ್ ಮಾತ್ರ್ ಪಕ್ಷಪಾತಿ. ಪ್ರತೇಕ್ ಜಾವ್ನ್ ಪುರ್ವಿತ್ ಆನಿ ದೊರ‍್ಯಾ ಭಿತರ್ಲೆ ಲೀಡರ್ ಎಕಾ ಪಾಡ್ತಿಚ್ಯಾ ಏಜೆಂಟಾ ಪರಿಂ ಕರುನ್ ಆಸಾತ್. ಕಾಮ್ ಜಾತಾ ಮ್ಹಣಾಸರ್, ಪಯ್ಶೆ ಹಾತಾಕ್ ಮೆಳ್ತಾ ಮ್ಹಣಾಸರ್ ಹಜಾರ್ ಫೊನಾಂ, ತುಮಿ ಆಮ್ಚೆಚ್ ಮ್ಹಳ್ಳಿಂ ಧೋರಣಾಂ, ಓಫಿಸಾಂತ್ ಕಾಫಿ – ಫಳಾರ್, ಪಕ್ವಾನಾಂ ಖಾತಿರ್ ಆಮಂತ್ರಣಾಂ. ಪಯ್ಶೆ ಹಾತಾಕ್ ಯೆತಾನಾ ಸರ್ಕಾರಿ ಅಧಿಕಾರಿಂನಿ ಕಮಿಷನ್ ಯಾ ಲೋಂಚ್ ವಿಚಾರ್ಲೊ ತರ್ ಪರ್ತ್ಯಾನ್ ಪ್ರಾರ್ಥನಾಂ … ಇತ್ಲೆಂ ಸಗ್ಳೆಂ ಕರುನ್ ಆಮಾ ಪಾಸುನ್ ವಿನಂತಿ ಕೆಲ್ಲ್ಯಾಕ್ ವಿಸ್ರೊನ್ ಸೊಡ್ಲೆಂ ತರ್ ತಾಂಕಾ ನಯ್ ತರ್ ತಾಂಚ್ಯಾ ಸಾಂಗಾತ್ಯಾಂಚಾ ಕಾಳ್ಜಾಕ್ ದುಖಾನಾ?
ಆಮ್ಚಾಂಕ್ ಲೀಡರ್ ಕರಾ, ಆಮ್ಚ್ಯಾ ಲೊಕಾಕ್ ಮುಕಾರ್ ಹಾಡಾ, ವೊಟಾಕ್ ರಾವಯಾ – ಅಶೆಂ ಸಬಾರ್ ರಿತಿನ್ ಬೋಬ್ ಮಾರ್ಚ್ಯಾ ಪುರ್ವಿತಾಂನೊ ಆನಿ ಆಮ್ಚೆಂ ರಾಜಕೀಯ್ ಸಂಚಾಲನ್ ಮ್ಹಣ್ಚ್ಯಾ ಕಥೊಲಿಕ್ ಸಭೆಚ್ಯಾ ಮುಕೆಲ್ಯಾಂನೋ, ತುಮಿ ಶೀದಾ ಶೀದಾ ಸಾಂಗೊನ್ ಸೊಡಾ “ಆಮಿ ಕೊಂಗ್ರೆಸಾಂತ್ ಲೀಡರ್ ಜಾಲ್ಲ್ಯಾಂಕ್ ಮಾತ್ರ್ ಆಮ್ಚ್ಯಾ ಕಾರ್ಯಾಂಕ್ ಆಪಂವ್ಚೆಂ ಆನಿ ಮುಕೆಲ್ ಸಯ್ರೆ, ಮಾನಾಚೆ ಸಯ್ರೆ ಕರ್ಚೆಂ ! ತಾಂಕಾ ಮಾತ್ರ್ ಆಮ್ಚೊ ಸಪೋರ್ಟ್, ಉರ್‌ಲ್ಯಾ ಪಾಡ್ತಿಚ್ಯಾ ಆಮ್ಚ್ಯಾ ಕ್ರಿಸ್ತಾಂವ್ ಲೀಡರ್ಸಾಂಕ್ ಆಮಿ ಫಕತ್ ‘ಯೂಸ್’ ಕರ್ಚೆಂ ಮಾತ್, ಆಮ್ಚೆಂ ಕಾಮ್ ಜಾಲ್ಲೆಂಚ್ ‘ತೊ ಕೋಣ್ ಮ್ಹಣ್ ಹಾಂವ್ ನೆಣಾ’ ಮ್ಹಣ್ ಪೆದ್ರುನ್ ಜೆಜುಕ್ ನೆಗಾರ್ಲೆಲೆ ಬರಿಂ ನೆಗಾರ್ಚೆಂ” – ಸಂಪದ್ಲೆಂ!
ಕೊಂಬ್ಯಾಸಾದ್ ಆನಿ ಪೆದ್ರುಚೊ ಪಶ್ಚಾತ್ತಾಪ್
ವಿಪರ್ಯಾಸ್ ಮ್ಹಳ್ಯಾರ್ – ಪೆದ್ರುಕ್ ತಿಸ್ರೆ ಪಾವ್ಟಿಂ ನೆಗಾರ್ತಾನಾ ತರೀ ಜೆಜುಚ್ಯಾ ಉತ್ರಾಂಚೊ ಉಡಾಸ್ ಆಯ್ಲೊ ಆನಿ ಆಪ್ಣಾಚ್ಯಾ ಚುಕಿಖಾತಿರ್ ಪಶ್ಚಾತ್ತಾಪ್ ಪಾವೊನ್ ತೊ ಗಳ್ಗಳ್ಯಾಂನಿ ರಡ್ಲೊ. ಪುಣ್ ಹೆ ಮಾತ್ರ್ ಪೆದ್ರುಪರಿಂ ನೆಗಾರ್ತಾತ್ ಮಾತ್ರ್ ನಯ್ ಜುದಾಸಾಪರಿಂ ವಿಕ್ರಿತ್ ಕರ್ತಾತ್. ಕಾಮ್ ಜಾಲ್ಲೆಂಚ್ ತಾಂಚಿ ಜಾಪ್ ಅಶಿ ಆಸ್ತಾ – “ಹೊ ತಾಣೆ ಕಿತೆಂ ಕೆಲಾಂ? ಆಮಿ ಫೈಲ್ ರೆಡಿ ಕೆಲ್ಲೆಂ, ಸರ್ಕಾರಾಕ್ ದಾಡುನ್ ದಿಲ್ಲೆಂ, ದಸ್ತಾವೆಜಾಂ ಸಮಾ ಆಸ್‌ಲ್ಲಿಂ, ದೆಕುನ್ ಪಯ್ಶೆ ಆಯ್ಲ್ಯಾತ್. ಪುಣ್ ಶೆಂಬೊರಾನಿಂ ಮೆಳ್ಚ್ಯಾ ಸರ್ಕಾರಾಚ್ಯಾ ಮಾಸಿಕ್ ಪಿಂಚಣಿ ಖಾತಿರ್ ಯಾ ಸ್ಕೊಲರ್‌ಶಿಪ್ಪಾ ಖಾತಿರ್ ಡೊಕ್ಯುಮೆಂಟಾ ಘೆವ್ನ್ ಸರ್ಕಾರಿ ದಫ್ತರಾಂ ಭಂವ್ಲೆಲ್ಯಾಂಕ್ ಬರ‍್ಯಾನ್ ಕಳಿತ್ ಆಸಾ – ಲಾಕಾಂನಿ ಅನುದಾನ್, ತೇಂಯ್ ಥೊಡ್ಯಾ ಫಿರ್ಗಜೆಂಕ್ ದೊದೋನ್ – ತಿತೀನ್ ಪಾವ್ಟಿಂ ಹಾಡುನ್ ದೀಜಾಯ್ ತರ್ ಕಿತ್ಲೆ ಕಷ್ಟ್ ಆಸಾತ್ ಮ್ಹಣೊನ್!
ಥೊಡ್ಯಾ ದಿಸಾಂ ಆದಿಂ ಮಾಹೆತ್ ಹಕ್ಕ್ ಕಾಯ್ದ್ಯಾಖಾಲ್ ಆಮ್ಚ್ಯಾ ಇಗರ್ಜಾಂಕ್ ಆನಿ ಕ್ರೀಸ್ತಾಂವಾಂನಿ ಚಲಂವ್ಚ್ಯಾ ಸಂಸ್ಥ್ಯಾಂಕ್ ಮೆಳ್ಳೆಲ್ಯಾ ಅನುದಾನಾವಿಶಿಂ ಮಾಹೆತ್ ಆಪ್ಣಾಯ್ಲಿ (ಮ್ಹಜೆಲಾಗಿಂ ದಸ್ತಾವೇಜ್ ಆಸಾ) ಪಳೆವ್ನ್ ಹಾಂವ್ ಶಿರಿಂ ಚುಕ್ಲೊಂ. ಆದ್ಲ್ಯಾ ಖಂಯ್ಚ್ಯಾಯ್ ಸರ್ಕಾರಾನ್ ಯಾ ಮಂತ್ರಿನ್ ಯೆದೊಳ್ ತಿತ್ಲೆಂ ಅನುದಾನ್ ದೀಂವ್ಕ್ ನಾತ್ಲೆಂ. ಹಾಚೆ ವಿಶಿಂ ಸಮೀಕ್ಷಾ ಕರ್ಯಾಂ ಮ್ಹಳ್ಳ್ಯಾ ಇರಾದ್ಯಾನ್ ಥೊಡ್ಯಾ ಫಿರ್ಗಂಜೆಚ್ಯಾ ಲೊಕಾಚೊ ಸಂಪರ್ಕ್ ಕೆಲೊ. ಥೊಡೆಕಡೆ ಹಾಂವ್ ಖುದ್ ಗೆಲೊಂ. ಪಯ್ಶಾಂಚೊ ವಿಭಾಡ್ ಜಾಲ್ಲೊ ದಿಸ್ಲೊ. ಥೊಡೆ ಕಡೆ ಮೋಸ್‌ಯಿ ಝಳ್ಕಾಲೊ. ಸಬಾರ್ ಕಡೆ ಕಾಮ್ ಸಂಪಲ್ಲೆಂ. ಉಗ್ತಾವಣಾಚಿಂ ಕಾರ್ಯಿಂ ಗದ್ದಾಳಾಯೆನ್ ಜಾಲ್ಲಿಂ. ಪುಣ್ ಮಾರ್ಬಾಲಾರ್ ನಾಂವ್ ಜಾಂವ್ದಿ, ಕಾರ್ಯಾಚೊ ಮುಕೆಲ್ ಸಯ್ರೊ ಜಾವ್ನ್ – ಅನುದಾನ್ ದಿವಯಿಲ್ಯಾ ಪ್ರಮುಕ್ ಮನ್ಶಾಚೆಂ ನಾಂವ್ ನಾತ್ಲೆಂ … ಕಿತ್ಯಾಕ್ ತೊ ಕೊಂಗ್ರೆಸಾಚೊ ನಯ್ ಆಸ್ಲೊ!
ಕ್ರೀಸ್ತಾಂವಾಂಕ್ ಆತಾಂ ಏಕ್‌ಚ್ ಭರ್ವಸೊ – ಲೋಬೊ
ಕರ್ನಾಟಕಾಂತ್ ಪ್ರಸ್ತುತ್ ಚುನಾವ್ ತಕ್ಲೆರ್ ಆಸಾ. ದ. ಕ ಜಿಲ್ಯಾಂತ್, ಮಂಗ್ಳುರಾಂತ್ – ಜೆ. ಆರ್. ಲೋಬೊಕ್ ಸೊಡ್ಲ್ಯಾರ್ ಕೊಂಗ್ರೆಸಾ ಥಾವ್ನ್ ಕ್ರೀಸ್ತಾಂವಾಂಕ್ ದುಸ್ರಿ ಸೀಟ್ ನಾ. ತೆಂಚ್ ಬೊಂಟಾಂಚ್ಯಾಂಕ್ ಕೊಂಗ್ರೆಸಾಂತ್ 3, ಬಿಜೆಪಿಂತ್ 3 – ಸಂಕ್ಯಾಂನ್ ಆಮ್ಚೆ ವರ್ನಿ ಮೊಸ್ತ್ ಉಣೆ, ಪುಣ್ ಸಿಟಿ ಆಮ್ಚೆ ವರ್ನಿ 5 ಚಡ್. ಕಿತ್ಯಾಕ್ ಮ್ಹಳ್ಯಾರ್ ತಾಂಚೊ ಲೋಕ್ ತಾಂಕಾ ದೊನೀ ಪಾಡ್ತಿಂನಿ ಸಪೋರ್ಟ್ ಕರ್ತಾ. ಪುಣ್ ಆಮಿ … ಕೊಂಗ್ರೆಸಾಂತ್ಲ್ಯಾ ಕ್ರಿಸ್ತಾಂವಾಂಕ್ ಮಾತ್ರ್! ಆಶೆಂ ಕಿತ್ಯಾಕ್ ?
ಜೆ. ಆರ್. ಲೋಬೊಕ್ ಸೀಟ್ ಜಾಂವ್ಚ್ಯಾ ಖಾತಿರ್ ಸಾಯ್ಬಾಚ್ಯಾ ಘರಾ ಸಬಾರ್ ಮೀಟಿಂಗಾ ಜಾಲ್ಲಿಂ ತೆಂ ಹಾಂವ್ ಜಾಣಾಂ. ಆನಿ ಹಿ ಬರಿ ವಾಡಾವಾಳ್, ಹಾಂತು ಕಾಂಯ್ ವಾಯ್ಟ್ ನಾ. ಪೂಣ್ – ತ್ಯಾಚ್ ಪರಿಂ ಉರ್ಲೆಲ್ಯಾ ಕ್ರಿಸ್ತಾಂವ್ ಲೀಡರಾಂ ಖಾತಿರ್‌ಯೀ ಜಾಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ತೆಂ ? ಲೋಬೊಕ್ ಜಿಕಂವ್ಚ್ಯಾ ಖಾತಿರ್ ಸಬಾರ್ ಮಿಟಿಂಗಾ ಜಾತಾತ್, ಬರೆಂಚ್! ಮುಲ್ಕಿ ಮೂಡುಬಿದ್ರಿಂತ್ ಅಲ್ಫೋನ್ಸ್ ಫ್ರಾಂಕೋಕ್ ಜಿಕಂವ್ಕ್ ಕಾಯ್ ಇಲ್ಲೆಂ ಪ್ರಯತ್ನ್ ಚಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ತೆಂ ? ತೋಯ್ ಕ್ರೀಸ್ತಾಮ್ವ್ ಮುಕೆಲಿ ನಯ್ ?
ಅಲ್ಫೋನ್ಸ್ ಫ್ರಾಂಕೋ – ಬಿದ್ರ್ಯಾಂತ್ ಕ್ರೀಸ್ತಾಂವ್ ಅಭ್ಯರ್ಥಿ
ಅಲ್ಪೋನ್ಸ್ ಫ್ರಾಂಕೋ ಏಕ್ ಶಾತಿವಂತ್ ಲೀಡರ್! ಕಥೊಲಿಕ್ ಸಭಾ ಪ್ರಾಂತೀಯ್ ಅಧ್ಯಕ್ಷ್ ಜಾವ್ನ್ ಸೆವಾ ದಿಲ್ಲೊ ಮನಿಸ್. ಕಥೊಲಿಕ್ ಸಭೆಂತ್ ಸಬಾರ್ ಹುದ್ದೆ ತಾಣೆ ಬೋವ್ ಯಶಸ್ವಿ ರಿತಿನ್ ಸಾಂಬಾಳ್ಳ್ಯಾತ್. ಕ್ರಿಸ್ತಾವಾಂಚೆರ್ ಹಲ್ಲೊ ಜಾತಾನಾ, ಮತಾಂತರ್ ಕಾನುನ್ ಯೆತಾನಾ, ಇಗರ್ಜಾಂಚೆರ್ ಧಾಡ್ ಜಾತಾನಾ – ಹರ್ಯೆಕ್ ಪಾವ್ಟಿಂ ಹ್ಯಾ ಮನ್ಶ್ಯಾನ್ ಧಯ್ರಾನ್ ಮುಕೆಲ್ಪಣ್ ಘೆತ್ಲಾಂ. ಉಗ್ತ್ಯಾನ್ ಖಂಡನ್ ಕೆಲಾಂ, ರಸ್ತ್ಯಾಕ್ ಧೆಂವೊನ್ ಝುಜ್ಲಾ ಆನಿ ಪ್ರಮುಕ್ ವೆದಿಂನಿ ಆಪ್ಲೊ ಪ್ರಖರ್ ವಾದ್ ಮಾಂಡ್ಲಾ. ಮನವ್ಯೊ ದಿಲ್ಯಾತ್. ಆಪ್ಲ್ಯಾ ಪಾಡ್ತಿ ತರ್ಫೆನ್ ಕಿತೆಂ ಕರುಂಕ್ ಜಾತಾ ತೆಂ ಸರ್ವ್ ಅಲ್ಪೋನ್ಸ್ ಫ್ರಾಂಕೋನ್ ಕೆಲಾಂ. ( ಹ್ಯಾ ಲಗ್ತಿ ತಾಚೆ ಜಾಯ್ತೆ ಯೂ ಟ್ಯೂಬ್ ವಿಡಿಯೊ ಆಸಾತ್)
ಆಪ್ಲ್ಯಾ ವ್ಯಾಪ್ತಿಂತ್ಲ್ಯಾ ಸರ್ವ್ ಫಿರ್ಗಜಾಂಕ್ ಭೆಟ್ ದೀವ್ನ್ ವಿಗಾರಾಂಕ್ ಮೆಳೊನ್ ತಾಣೆ ಸಹಕಾರ್ ಆನಿ ಪಾಟಿಂಬೊ ವಿಚಾರ್ಲಾ. ಪುಣ್ ಕಥೊಲಿಕ್ ಸಭಾ ಮೂಡುಬಿದ್ರಿ ಆತ್ಮಿಕ್ ನಿರ್ದೆಶಕ್ ಯಾಜಕ್ ಮಾತ್ ಕೊಂಗ್ರೆಸ್ ಅಭ್ಯರ್ಥಿನ್ ನಾಮ್ ಪತ್ರ್ ದಾಕಲ್ ಕರ್ತಾನಾ ಸರ್ವಾಂ ಪ್ರಾಸ್ ಮುಕಾರ್, ಅಭ್ಯರ್ಥಿಚ್ಯಾ ಕುಟ್ಮಾಸಾಂಗಾತಾ ಪಯ್ಲ್ಯಾ ಫಂಗ್ತೆರ್ ಬಸ್ಲಾ. ಪೂಣ್ ಅಲ್ಪೋನ್ಸ್ ಫ್ರಾಂಕೋನ್ ನಾಮಿನೇಷನ್ ಘಾಲ್ತಾನಾ ಕಥೊಲಿಕ್ ಸಭೆಚೆ ಕೊಣೀ ‘ಲೀಡರ್’ ದಿಸೊಂಕ್ ನಾಂತ್. ಕಿತ್ಯಾಕ್ ? ಅಲ್ಪೋನ್ಸ್ ಫ್ರಾಂಕೋ ಕ್ರಿಸ್ತಾಂವ್ ನಯ್‌ಗೀ ? ಹ್ಯಾ ವಿಶಯಾಚೆರ್ ಆಮ್ಚೆ ಪುರ್ವಿತ್ ಕಿತೆಂ ಮ್ಹಣ್ತಾತ್ ? ತುಮಿ ಕಿತ್ಯಾಕ್ ಫ್ರಾಂಕೋಕ್ ಪಾಟಿಂಬೊ ದೀನಾಂತ್ ? ತೊ ಕೊಂಗ್ರೆಸ್ ಪಾಡ್ತಿಂತ್ ನಾ ಮ್ಹಣೊನ್‌ಗೀ ? ಯಾ ತುಮಿ (ಯಾ ಆಮ್ಕಾಂಯ್ ಸೆರ್ವುನ್) ಸರ್ವ್ ಕಥೊಲಿಕ್ ಸಮುದಾಯ್ ಕೊಂಗ್ರೆಸಾಚ್ಯಾ ಸ್ವಾದೀನ್ ಬರವ್ನ್ ದಿಲಾಗೀ ?
ಕೊಂಗ್ರೆಸ್ ಅಭ್ಯರ್ಥಿ ನಾಮಪತ್ರ್ ಸಭೆಂತ್ ಕ. ಸ. ಆತ್ಮೀಕ್ ನಿರ್ದೇಶಕ್
ಪ್ರವಾದ್ಯಾಂಕ್ ಆಪ್ಲ್ಯಾ ಗಾಂವಾಂತ್ ಮಾನ್ ನಾ ಮ್ಹಳ್ಳಿಂ ಬೈಬಲಾಂತ್ಲಿಂ ಉತ್ರಾಂ ಸತ್ ಜಾವ್ನ್ ಉರ್ಚ್ಯಾ ಖಾತಿರ್ ದೆವಾನ್‌ಚ್ ಆಮ್ಚ್ಯಾ ಕ್ರಿಸ್ತಾಂವ್ ಸಮಾಜೆಚೆರ್ ಘಾಲ್ಲೊ ಶಿರಾಪ್‌ಗೀ ವಾ ಆಮ್ಚ್ಯಾ ಪುರ್ವಿತಾಂನಿ ಆನಿ ಇಗರ್ಜೆಚ್ಯಾ ದೊರ‍್ಯಾ ಭಿತರ್ಲ್ಯಾ ಮಹಾನ್ ಲೀಡರ್ಸಾಂಚೆಂ ‘ಕಾಮ್ ಜಾಲೆಂ ವಯ್ಜ್ ಮೆಲೊ’ ಮ್ಹಳ್ಳೆಂ ಧೋರಣ್‌ಗೀ ಯಾ ತ್ಯಾ ದೊರ‍್ಯಾ ಭಿತರ್ಲ್ಯಾ ಕ್ರಿಸ್ತಾಂವ್ ಲೀಡರಾಂಕ್, ಭಾಯ್ಲ್ಯಾ ವ್ಹಡ್ ಲೀಡರಾಂಕ್ ಆಪಯ್ಲ್ಯಾರ್ ಆಮ್ಕಾಂ ಮೆಳ್ಚ್ಯಾ ಮರ್ಯಾದಿಕ್ ಕಾಂಯ್ ಉಣೆಂ ಜಾಯ್ತ್ ಮ್ಹಳ್ಳೆಂ ಬ್ಯೆಂಗೀ ? ಮ್ಹಾಕಾ ಸಮ್ಜಾನಾ. ಪೂಣ್ ಅಸಲಿ ಪಕ್ಶಪಾತಿ ಮನಾಸ್ಥಿತಿ ಸಮುದಾಯಾಚ್ಯಾ ಭಲಾಯ್ಕೆಕ್ ಬರಿ ನಯ್.
– ವಿನೋದ್ ಪಿಂಟೊ, ತಾಕೊಡೆ
