ರಚನಾ, ಕ್ಯಾಥೋಲಿಕ್ ಚೇಂಬರ್ ಆಫ್ ಕಾಮರ್ಸ್ ಆಂಡ್ ಇಂಡಸ್ಟ್ರಿ ಹಾಣಿ ಅಪ್ಲ್ಯಾ ಸಾಂದ್ಯಾಂಕ್, ಆಯ್ತಾರಾ ಮೇ 28 ವೆರ್, ಮಂಗ್ಳುರ್ ಕ್ಲಬ್ಬಾಂತ್ , ಸಾಂಜೆಚ್ಯಾ 7 ವ್ಹರಾಂಚೆರ್ ಅನಿವಾಸಿ ಭಾರತೀಯ್ ಉದ್ಯಮಿ, ರಚನಾ ವರ್ಸಾಚೊ ಅನಿವಾಸಿ ಉದ್ಯಮಿ ಪ್ರಶಸ್ತಿ ವಿಜೇತ್ ಶ್ರೀ ಮೈಕೆಲ್ ಡಿಸೋಜಾ ಹಾಂಚೆ ಥಾವ್ನ್ ‘ಉದ್ಯಮ್ – ವ್ಹವಹಾರಾಂತ್ ಅಡ್ಚಣ್ಯೊ ಫುಡ್ ಕರ್ಚೆ ಕಶೆಂ?’ ವಿಶಯಾಚೆರ್ ಉಪನ್ಯಾಸ್ ಆನಿ ಸಂವಾದ್ ಕಾರ್ಯೆಂ ಮಾಂಡುನ್ ಹಾಡ್‌ಲ್ಲೆಂ.
ಶ್ರೀ ಮೈಕಲ್ ಡಿಸೋಜಾ ಹಾಣಿ ವೆಪಾರ್ – ಉದ್ಯಮಾಂತ್ ಆಪ್ಲ್ಯಾ ಸ್ವಂತ್ ಅನ್ಭೊಗಾಚ್ಯಾ ಆದಾರಾಚೆರ್ ಪರಿಶ್ರಮಾಚಿ ಸಕತ್ ಆನಿ ವ್ಯವಹರಾಂತ್ ಅಡ್ಚಣ್ಯೊ ನಿವಾರ್ಚೆ ಕಶೆಂ? ಮ್ಹಳ್ಳೆವಿಶ್ಯಾಂತ್ ನಿದರ್ಶನಾಂ ಸವೆಂ ಆಪ್ಲೆ ವಿಚಾರ್ ಮಾಂಡ್ಲೆ.
ಆಪ್ಲ್ಯಾ ವ್ಯಾಪಾರ್ ವಯ್ವಾಟಾಂತ್ ಪತಿಣ್ ಶ್ರೀಮತಿ ಫ್ಲೇವಿ ಹಿಚೊ ಕುಮ್ಕೆಹಾತ್ ಉಲ್ಲೇಕ್ ಕೆಲ್ಲ್ಯಾ ಶ್ರೀ ಮೈಕಲ್ ಡಿಸೋಜಾ ಹಾಣಿ ಯುವ ಉದ್ಯಮಿಂಕ್ “ತುಮ್ಚ್ಯಾ ವ್ಯವಹಾರಾಂತ್ ಆರ್ಥಿಕ್ ಪಾರದರ್ಶಕತಾ ಸಾಂಬಾಳುಕ್ ಜಾಯ್. ಕಠೀಣ್ ಪರಿಶ್ರಮಾ ಸಾಂಗಾತಾ ತುಮ್ಚ್ಯಾ ಕಾಮಾವಿಶ್ಯಾಂತ್ ತುಮ್ಕಾಂ ಸಂಪೂರ್ಣ್ ಗಿನ್ಯಾನ್ ಆಸುಂಕ್ ಜಾಯ್. ದುಡ್ವಾಬದ್ಕಾಚೆಂ ನಿರ್ವಹಣ್ ವ್ಯವಹಾರಾಚ್ಯಾ ಯಶಸ್ವೆಕ್ ಪ್ರಮುಕ್ ಕಾರಣ್ ದೆಕುನ್ ತೆ ವಿಶ್ಯಾಂತ್ ವಿಶೇಸ್ ಗುಮಾನ್ ದೀಂವ್ಕ್ ಜಾಯ್. ತುಮ್ಚೊ ವ್ಯವಹಾರ್ ವಿಫಲ್ ಜಾಲ್ಯಾರೀ ತುಮ್ಚೆಂ ನಾಂವ್ ಚಲಾವಣೆರ್ ಆಸುಂಕ್ ಜಾಯ್” ಮ್ಹಣ್ ಸಲಹಾ ದಿಲಿ.
ರಚನಾ ಅಧ್ಯಕ್ಷ್ ಶ್ರೀ ವಿನ್ಸೆಂಟ್ ಕುಟಿನ್ಹಾ ಹಾಣಿ ಯೆವ್ಕಾರ್ ಮಾಗ್ಲೊ. ಉಪಾಧ್ಯಕ್ಷ್ ಶ್ರೀ ರುಡೊಲ್ಫ್ ರೊಡ್ರಿಗಸ್ ಹಾಣಿ ಸಭೆಕ್ ಸಯ್ರ್ಯಾಂಚಿಂ ಒಳಕ್ ಕರುನ್ ದಿಲಿ.
ಆಡಳ್ತ್ಯಾ ಮಂಡಳೆಚೊ ಸಾಂದೊ ಶ್ರೀ ಲೆಸ್ಲಿ ರೇಗೊ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ. ಖಜನ್ದಾರ್ ಶ್ರೀಮತಿ ಯುಲಾಲಿಯಾ ಡಿಸೋಜಾ ಹಾಣಿ ದಿನ್ವಾಸ್ ಪಾಟಯ್ಲೆ.
