ಮಂಗ್ಳುರ್ ದಿಯೆಸೆಜಿಚೆಂ ಲಾಯಿಕಾಂಚೆಂ ಪ್ರಮುಕ್ ಸಂಘಟನ್ ಕಥೊಲಿಕ್ ಸಭಾ ಮಂಗ್ಳುರ್ ಪ್ರದೇಶ್ (ನೊ) – 2023-24 ವ್ಯಾ ವರ್ಸಾಕ್ ಪಾನೀರ್ ಫಿರ್ಗಜೆಚೊ, ಸಮಾಜಿಕ್ ಕಾರ್ಯಕರ್ತ್ ಆನಿ ವಾವ್ರಾಡಿ ಶ್ರೀ ಆಲ್ವಿನ್ ಡಿ’ಸೊಜಾ ಬಹುಮತಾನ್ ವಿಂಚೊನ್ ಆಯ್ಲಾ. ಕೊಡಿಯಾಳ್‌ಬಯ್ಲ್ ಧರ್ಮಾಧ್ಯಕ್ಶ್ಯಾಚ್ಯಾ ನಿವಾಸಾಂತ್ ಕಥೊಲಿಕ್ ಸಭೆಚೊ ಆತ್ಮಿಕ್ ನಿರ್ದೇಶಕ್ ಮಾ| ದೊ| ಜೆ. ಬಿ. ಸಲ್ದಾನ್ಹಾ ಹಾಂಚ್ಯಾ ಉಪಸ್ಥಿತೆಂತ್ ಚಲ್ಲೆಲ್ಲ್ಯಾ ಎಲಿಸಾಂವಾಂತ್ ಹಿ ವಿಂಚವ್ಣ್ ಜಾಲಿ.
ಕಾರ್ಯದರ್ಶಿ ಜಾವ್ನ್ ದೆರೆಬಯ್ಲ್ ಫಿರ್ಗಜೆಚಿ ಶ್ರೀಮತಿ ವಿಲ್ಮಾ ಮೊಂತೆರೊ, ಉಪಾಧ್ಯಕ್ಷ್ ಜಾವ್ನ್ ಸುರತ್ಕಲ್ ಫಿರ್ಗಜೆಚೆ ಶ್ರೀ ನೊರ್ಬರ್ಟ್ ಮಿಸ್ಕಿತ್ ಆನಿ ಲೋರೆನ್ಸ್ ಡಿಸೋಜ, ಸಹ ಕಾರ್ಯದರ್ಶಿ ಜಾವ್ನ್ ಸೂರಿಕುಮೇರು ಫಿರ್ಗಜೆಚೊ ಶ್ರೀ ರೋಷನ್ ಬೊನಿಫಾಸ್ ಮಾರ್ಟಿಸ್, ಖಜನ್ದಾರ್ ಜಾವ್ನ್ ತಲಪಾಡಿ ಫಿರ್ಗಜೆಚೊ ಶ್ರೀ ಫ್ರಾನ್ಸಿಸ್ ಮೊಂತೆರೊ ಆನಿ ಸಹ ಖಜನ್ದಾರ್ ಜಾವ್ನ್ ಬಜ್ಪೆ ಫಿರ್ಗಜೆಚೊ ಶ್ರೀ ಸಂತೋಷ್ ಡಿಸೋಜಾ ವಿಂಚೊನ್ ಆಯ್ಲ್ಯಾತ್.
ನಿಕಟ ಪೂರ್ವ್ ಅಧ್ಯಕ್ಷ್ ಜಾವ್ನ್ ಶ್ರೀ ಸ್ಟ್ಯಾನಿ ಲೋಬೊ ಆನಿ ಆತ್ಮೀಕ್ ನಿರ್ದೇಶಕ್ ಜಾವ್ನ್ ಮಾ| ದೊ| ಜೆ.ಬಿ.ಸಲ್ಡಾನ್ಹಾ ನಿಯುಕ್ತ್ ಜಾಲ್ಯಾತ್.
ವಿಂಚುನ್ ಆಯಿಲ್ಲ್ಯಾ ಹುದ್ದೆದಾರಾಂಕ್ ಕಥೊಲಿಕ್ ಸಭೆಚೊ ಆದ್ಲೊ ಕೇಂದ್ರೀಯ್ ಅಧ್ಯಕ್ಶ್ ಶ್ರೀ ರೊಲ್ಫಿ ಡಿಕೋಸ್ತಾ ಹಾಣಿ ಅಭಿನಂದನ್ ಪಾಟಯ್ಲಾಂ. ನವ್ಯಾನ್ ವಿಂಚೊನ್ ಆಯಿಲ್ಲ್ಯಾ ಹುದ್ದೆದಾರಾಂನಿ ಶ್ರೀ ರೊಲ್ಫಿ ಡಿಕೋಸ್ತಾಚ್ಯಾ ಮುಕೆಲ್ಪಣಾರ್ ಕರ್ನಾಟಕ ವಿದಾನ್ ಸಭೆಚೊ ಸಭಾಧ್ಯಕ್ಷ್ ಮಾನೆಸ್ತ್ ಯು. ಟಿ . ಖಾದರ್ ಹಾಂಕಾ ಭೆಟೊನ್ ಶುಭಾಶಯ್ ಪಾಟಯ್ಲೆ.
ತಶೆಂಚ್ ಕಥೊಲಿಕ್ ಸಭೆಚೊ ಆದ್ಲೊ ಕೇಂದ್ರೀಯ್ ಅಧ್ಯಕ್ಷ್, ಪ್ರಸ್ತುತ್ ಎಂ.ಸಿ.ಸಿ. ಬ್ಯಾಂಕಾಚೊ ಅಧ್ಯಕ್ಷ್, ಯುವ ಮುಕೆಲಿ ಶ್ರೀ ಅನಿಲ್ ಲೋಬೊ, ಫೆರ್ಮಾಯ್ ಹಾಂಚಿ ಬ್ಯಾಂಕಾಚ್ಯಾ ಆಡಳ್ತ್ಯಾ ದಫ್ತರಾಂತ್ ಭೆಟ್ ಕರುನ್ ಕಥೊಲಿಕ್ ಸಭೆಚ್ಯಾ ಕಾರ್ಯಸೂಚಿ ವಿಶ್ಯಾಂತ್ ಚರ್ಚಾ ಕೆಲಿ.
