ಸ್ವತಂತ್ರ್ ಭಾರತಾಚ್ಯಾ ಸಂವಿದಾನ್ ರಚ್ಣುಕೆಂತ್ ಮಹತ್ವಾಚೊ ವಾವ್ರ್ ಕೆಲ್ಲೊ, ಮುಳಾನ್ ಮುಲ್ಕಿಚೊ – ಜೆಜ್ವಿತ್ ಯಾಜಕ್ ಬಾ| ಜೆರೊಮ್ ಡಿ’ಸೊಜಾಚೆಂ ಜಿವಿತ್ ಆನಿ ಸ್ವತಂತ್ರ್ ಭಾರತ್ ಬಾಂದುನ್ ಹಾಡ್ಚ್ಯಾಂತ್ ತಾಂಚೆ ಯೋಗ್‌ದಾನ್ ಹೆ ವಿಶ್ಯಾಂತ್ ಸವಿಸ್ತಾರ್ ಆನಿ ಸಚಿತ್ರ್ ವಿವರ್ ಆಟಾಪ್ಚೆಂ, ಸಾಂ. ಲುವಿಸ್ ಕೊಲೆಜಿಚೊ ಪ್ರಾಧ್ಯಾಪಕ್ ಪ್ರೊ| ಎಡ್ಮಂಡ್ ಜೆ. ಬಿ. ಫ್ರ್ಯಾಂಕ್ ಹಾಣಿ ಬರಯಿಲ್ಲೆಂ Pride of Kanara, True son of India – Fr Jerome D’ Souza, S.J. ಪುಸ್ತಕ್, ಅಗೋಸ್ತ್ 7 ತಾರಿಕೆರ್ ಸಾಂಜೆಚ್ಯಾ 3.00 ವ್ಹರಾರ್ ಸಾಂ. ಲುವಿಸ್ ಕೊಲೆಜಿಚ್ಯಾ ಎರಿಕ್ ಮಥಾಯಸ್ ಹೊಲಾಂತ್, ಮಂಗ್ಳುರ್ ಧರ್ಮ್‌ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಂಚ್ಯಾ ಹಸ್ತುಕಿಂ ಲೊಕಾರ್ಪಣ್ ಜಾತೆಲೆಂ.
ಕಾರ್ಯಾಕ್ ಸಾಂ. ಲುವಿಸ್ ಶಿಕ್ಪಾ ಸಂಸ್ತ್ಯಾಂಚೊಂ ರೆಕ್ಟರ್ ಮಾ| ಬಾ| ಮೆಲ್ವಿನ್ ಪಿಂಟೊ, ಆಪೊಸ್ತಲಿಕ್ ಕಾರ್ಮೆಲಿತ್ ಧಾರ್ಮಿಕ್ ಮೆಳಾಚಿ ಕರ್ನಾಟಕ ಪ್ರಾಂತೀಯ್ ವ್ಹಡಿಲ್ನ್ ಭ| ಮರಿಯಾ ಶಮಿತ, ಮುಲ್ಕಿ ಫಿರ್ಗಜೆಚೊ ವಿಗಾರ್ ಮಾ| ಬಾ| ಸಿಲ್ವೆಸ್ಟರ್ ಡಿ’ಕೊಸ್ಟಾ ಆನಿ ಫಾ| ಜೆರೊಮಾಚ್ಯಾ ಕುಟ್ಮಾಚೊ ಪ್ರತಿನಿಧಿ ಜಾವ್ನ್ ಎಡ್ವಿನ್ ಡಿ’ಸೊಜಾ ಹಾಜರ್ ಆಸ್ತಲೆ ಮ್ಹಣ್ ಮಂಗ್ಳುರ್ಚ್ಯಾ ಪ್ರೆಸ್ ಕ್ಲಬ್ಬಾಂತ್ ಆಪಯಿಲ್ಲ್ಯಾ ಪತ್ರಿಕಾಗೋಷ್ಟಿಂತ್ , ಸಾಂ. ಲುವಿಸ್ ಕೊಲೆಜಿಚೊ ಪ್ರಾಚಾರ್ಯ್ ಮಾ| ದೊ| ಪ್ರವೀಣ್ ಮಾರ್ಟಿಸ್ ಹಾಣಿ ಮಾಹೆತ್ ದಿಲಿ.
“ಸಂವಿದಾನಾಚ್ಯಾ ಮೂಳ್ ಪ್ರತಿಯೆಚೆರ್ ಆಪ್ಲಿ ರುಜು ಕೆಲ್ಲೊ ಬಾ| ಜೆರೊಮ್ ಸ್ವತಂತ್ರ್ ಭಾರತಾಚ್ಯಾ ಪಯ್ಲ್ಯಾ ಸಂವಿದಾನ್ ಸಭೆಚೊ ಸಾಂದೊ ಜಾವ್ನ್ ಆಸೊನ್ ಉಣ್ಯಾಸಂಕ್ಯಾತಾಂಚಿಂ ಹಕ್ಕಾಂ ಆನಿ ಸಂರಕ್ಶಣಾ ಖಾತಿರ್ ತಾಣೆ ಸದನಾಂತ್ ಚರ್ಚಾ ಚಲಯ್ಲ್ಯಾ. 1952 ವ್ಯಾ ವರ್ಸಾ ಪರ್ಯಾಂತ್ ತೋ ಮದ್ಯಂತರ್ ಪಾರ್ಲಿಮೆಂಟಾಚೊ ಸಾಂದೊ ಜಾವ್ನಾಸ್ಲೊ. 1947 ತೆ 1957 ಪಾಸುನ್ ಸಂಯುಕ್ತ್ ರಾಷ್ಟ್ರ್ ಸಂಘಾಂತ್ ಭಾರತೀಯ್ ನಿಯೋಗಾಚೊ ಸಾಂದೊ ಜಾವ್ನ್ ತಾಣೆ ಕಾಮ್ ಕೆಲಾಂ. 1997 ವ್ಯಾ ವರ್ಸಾ ತಾಚ್ಯಾ ಜಲ್ಮಾ ಶತಾಬ್ದೆ ಸುವಾಳ್ಯಾರ್ ಭಾರತ್ ಸರ್ಕಾರಾನ್ ವಿಶೇಸ್ ತಪ್ಪಾಲ್ ಚೀಟ್ ಛಾಪುನ್ ತಾಕಾ ಮಾನ್ ಕೆಲ್ಲೊ ಆಸಾ. ಆಪುರ್ಬಾಯೆಚೊ ಉಲವ್ಪಿ ಜಾವ್ನಾಸ್‌ಲ್ಲೊ ಫಾ। ಜೆರೊಮ್ ಜೆಜ್ವಿತ್ ಯಾಜಕ್ ಮ್ಹಣೊಂಕ್ ಆಮ್ಕಾಂ ವರ್ತೊ ಅಭಿಮಾನ್ ” ಮಾ| ದೊ| ಮಾರ್ಟಿಸ್ ಮ್ಹಣಾಲೆ.
“ಫಾ| ಜೆರೊಮಾಕ್ ಹಾಂವ್ ಬೋವ್ ಲಾಗ್ಶಿಲ್ಯಾನ್ ಒಳ್ಕಾತಾಂ. ಮದ್ರಾಸಾಂತ್ ಹಾಂವ್ ಅರ್ಥಶಾಸ್ತ್ರಾಂತ್ ಸ್ನಾತಕೋತ್ತರ್ ಶಿಕಪ್ ಜೊಡುನ್ ಆಸ್ತಾನಾ, ತೋ ಥಂಯ್ಸರ್ ಇಂಗ್ಲಿಶ್ ಸಾಹಿತ್ಯ್ ಶಿಕಯ್ತಾಲೊ. ಸದಾಂಯ್ ಮ್ಹಳ್ಳೆಪರಿಂ ಆಮಿ ಮೆಳ್ತೆಲ್ಯಾಂವ್. ತಾಣೆ ಮಜೆಲಾಗಿಂ ವಾಂಟುನ್ ಘೆತ್‌ಲ್ಲ್ಯಾ ಅನ್ಭೊಗಾಂಚೆರ್ ಹೆಂ ಪುಸ್ತಕ್ ಹಾಂವೆ ಬರಯ್ಲಾಂ. ಹ್ಯಾ ಪುಸ್ತಕಾಂತ್ ಹಾಂವೆ ಬರಯಿಲ್ಲ್ಯಾ ಸರ್ವ್ ಸಂಗ್ತಿಂಕ್ ಉಲ್ಲೇಕ್ ಆಸಾತ್.”
“ಆಪುರ್ಬಾಯೆಚೊ ಉಲವ್ಪಿ ಜಾವ್ನಾಸ್‌ಲ್ಲೊ ಫಾ| ಜೆರೊಮ್ ಪಯ್ಲ್ಯಾ ಮ್ಹಾಝುಜಾ ವೆಳಾರ್ ಕೊಡ್ಯಾಳ್ ಸಾಂ. ಲುವಿಸ್ ಕೊಲೆಜಿಂತ್ ಆಸ್‌ಲ್ಲೊ ಆನಿ ಸದಾಂ ಸಕಾಳಿಂ ಮಂಗ್ಳುರ್ ರಯ್ಲ್ ನಿಲ್ದಾಣಾಕ್ ವಚೊನ್ ಮದ್ರಾಸ್ ಮೇಯ್ಲಾರ್ ಯೆಂವ್ಚೆಂ ದ ಹಿಂದೂ ಪತ್ರ್ ವ್ಹಡಾ ತಾಳ್ಯಾನ್ ಸಗ್ಳ್ಯಾಂಕ್ ವಾಚುನ್ ಸಾಂಗ್ತಾಲೊ. ತಶೆಂಚ್ ದುಸ್ರ್ಯಾ ಮ್ಹಾ ಝುಜಾವೆಳಾರ್ ತೋ ಮದ್ರಾಸ್ ಆಸ್‌ಲ್ಲೊ ಆನಿ ಥಂಯ್ಸರೀ ಝುಜಾಚೊ ವಿವರ್ ತೋ ಸರ್ವಜಣಿಕಾಂಕ್ ದಿತಾಲೊ. ತಾಚೆ ಥಂಯ್ ಆಸ್ಚೆಂ ಹೆಂ ಉಲವ್ಪಾಚೆಂ ವಿಶೇಸ್ ದೆಣೆಂ ಪಳೆವ್ನ್ ರಾಜಾಜಿನ್ ತಾಕಾ ಸಂವಿದಾನ್ ಸಭೆಕ್ ವಿಂಚ್ಲೊ. ಗಾಂದಿ ಮಾಡ್ತಿರ್ ಮೆಲ್ಲ್ಯಾ ದಿಸಾ ತಾಕಾ ಗಾಂದಿಕ್ ಮೆಳೊಂಕ್ ಆಸ್‌ಲ್ಲೆಂ ತರೀ, ಗಾಂದೀಜಿಚಿ ಹತ್ಯಾ ಜಾಲ್ಲ್ಯಾನ್ ತಾಕಾ ಮೆಳೊಂಕ್ ಜಾಂವ್ಕ್ ನಾ. ಪೂಣ್ ಗಾಂದೀಜಿಕ್ ಸದನಾಂತ್ ಶೃದ್ದಾಂಜಲಿ ದೀಂವ್ಕ್ ನೆಹರೂನ್ ಫಾ| ಜೆರೊಮಾಕ್ ವಿಂಚ್ಲೊ. ತಾಕಾ ಉಲಂವ್ಚೆಂ ವಿಶೇಸ್ ದೆಣೆಂ ಆಸ್ಲೆಂ. ಇತ್ಲೆಂ ಮಾತ್ ನ್ಹಯ್, ರೋಮ್ ಆನಿ ಭಾರತಾಮಧೆಂ ಏಕ್ ಸಾಂಕೊವ್ ತಶೆಂ ತಾಣೆ ಕಾಮ್ ಕೆಲಾಂ. ನೆಹರೂನ್ ತಾಕಾ ಹ್ಯಾ ಲಗ್ತಿಂ ವಿಶೇಸ್ ಜವಾಬ್ದಾರಿ ದಿಲ್ಲಿ. ಅಸಲೆ ಜಾಯ್ತ್ಯೊ ಸಂಗ್ತಿಂ ಹ್ಯಾ ಬುಕಾಂತ್ ಆಟಾಪ್ಲ್ಯಾತ್. ಆಮ್ಚ್ಯಾಚ್ ಗಾಂವಾಂತ್, ಮುಲ್ಕಿಂತ್ ಜಲ್ಮೊನ್, ಹಾಂಗಾಚ್ ಸಾಂ. ಲುವಿಸ್ ಕೊಲೆಜಿಂತ್ ಶಿಕೊನ್ ಆಮ್ಚ್ಯಾ ಗಾಂವಾಂಕ್ ಕೀರ್ತ್ ಹಾಡ್‌ಲ್ಲ್ಯಾ ಫಾ। ಜೆರೊಮಾವಿಶಿಂ ಸಮ್ಜೊಂಕ್ ಹೊ ಬೂಕ್ ಉಪ್ಕಾರ್ತಾಲೊ. ಸದ್ದ್ಯಾಕ್ ಇಂಗ್ಲಿಶಾಂತ್, ಉಪ್ರಾಂತ್ ಕೊಂಕ್ಣೆಂತ್ ತಶೆಂ ಕನ್ನಡಾಂತ್, ತಮಿಳ್ ಭಾಶೆಂತೀ ಹೊ ಬೂಕ್ ಉಜ್ವಾಡಾಕ್ ಯೆತಲೊ” ಮ್ಹಣ್ ಪುಸ್ತಕಾಚೊ ಬರಯ್ಣಾರ್ ಪ್ರೊ| ಎಡ್ಮಂಡ್ ಜೆ.ಬಿ. ಫ್ರ್ಯಾಂಕ್ ಹಾಣಿ ಆಪ್ಲಿ ಅಭಿಪ್ರಾಯ್ ಉಚಾರ್ಲಿ.
ಪತ್ರಿಕಾ ಗೋಷ್ಠಿಂತ್ ಕೊಂಕ್ಣಿ ಲೇಕಕ್ ಆನಿ ಪತ್ರ್‌ಕರ್ತ್ ಎಚ್ಚೆಮ್, ಪೆರ್ನಾಲ್ ಹಾಜರ್ ಆಸೊನ್, ಹೊ ಆಪುರ್ಬಾಯೆಚೊ ಬೂಕ್ ಕೊಂಕ್ಣೆಂತ್ ಹಾಡ್ಚೆವಿಶ್ಯಾಂತ್ ತಾಣೆ ಮಾಹೆತ್ ವಾಂಟುನ್ ಘೆತ್ಲಿ.
Have any thoughts?
Share your reaction or leave a quick response — we’d love to hear what you think!
-
0
-
0
-
0
-
0
-
0
2 comments
ನಿಜಾಕೀ ಹಿ ಆಮ್ಕಾಂ ಕ್ರಿಸ್ತಾಂವಾಂಕ್ ಏಕ್ ಅಭಿಮಾನಾಚಿ ಗಜಾಲ್.
I have seen this great man. Fr Jerome was an orator. His elder brother Fr Boniface was Jesuit Provincial, younger brother Fr John was rector of St Joseph’s Seminary for some years and the youngest was a diocesan priest.