ಕೊಂಕ್ಣಿ ಭಾಶಾ ಮಂಡಳ್, ಮಹಾರಾಷ್ಟ ಅಗೋಸ್ತ್ 20 ತಾರಿಕೆರ್, ಸಾಂಜೆಚ್ಯಾ 6.00 ವ್ಹರಾಂಚೆರ್, ಸೇನಾಪತಿ ಬಾಪಟ್ ಮಾರ್ಗ್, ಮಾಹಿಮ್, ಮುಂಬಯ್ ಹಾಂಗಾಸರ್ ಆಸ್ಚ್ಯಾ ಸಾರಸ್ವತ್ ವಿದ್ಯಾ ಮಂದಿರ್ ಹೈಸ್ಕೂಲ್ ಸಭಾಂಗ್ಣಾಂತ್ , ಆಪ್ಲ್ಯಾ ಸ್ಥಾಪನೆಚೊ 81 ವೊ ವರ್ಸುಗೆ ದೀಸ್ ಆನಿ ಕೊಂಕ್ಣಿ ಮಾನ್ಯತಾ ದೀಸ್ ಸಾಂಗಾತಾ ಆಚರಣ್ ಕರ್ತಾತ್.
ಹ್ಯಾ ಕಾರ್ಯಾಕ್ ಮುಕೆಲ್ ಸೊಯ್ರೆ ಜಾವ್ನ್ ದೊ| ಡೆವಿಡ್ ತೋಮಸ್ ಆಲ್ವಾರೆಸ್, ಜೋಡ್ ಆಯುಕ್ತ್, ಜಿ.ಎಸ್.ಟಿ, ಮಹಾರಾಷ್ಟ್ರ ಆನಿ ಮಾನಾಚೆ ಸೊಯ್ರೆ ಜಾವ್ನ್ ಶ್ರೀಮತಿ ಜೀನ್ ಮೊಸೆಸ್ ಗೋಮ್ಸ್, ಪ್ರಾಚಾರ್ಯ್ ಆನಿ ವಿಶ್ವಸ್ಥ್, ಸಾಂ. ಮೈಕಲ್ ಹೈ ಸ್ಕೂಲ್ ಹಾಜರ್ ಆಸ್ತೆಲಿಂ.
ಕಾರ್ಯಾಂತ್ ಜುಲೈ 23 ವೆರ್ ಭಾಶಾ ಮಂಡಳಾನ್ ಮಾಂಡುನ್ ಹಾಡ್ಲೆಲ್ಯಾ ತಾಲೆಂತ್ ಸ್ಪರ್ಧ್ಯಾಚ್ಯಾ ವಿಜೇತಾಂಕ್ ತಶೆಂ, ಭಾರಾವೆಂತ್ 85% ಪ್ರಾಸ್ ಚಡಿತ್, ಪದ್ವೆಂತ್ 80% ಪ್ರಾಸ್ ಚಡಿತ್ ಆನಿ ಪದ್ಯುತ್ತರ್ ಪರೀಕ್ಶೆಂತ್ 75% ಪ್ರಾಸ್ ಚಡಿತ್ ಅಂಕ್ ಜೊಡ್ಲೆಲ್ಯಾಂಕ್ 2023 ವ್ಯಾ ವರ್ಸಾಚೊ ಪ್ರತಿಭಾ ಪುರಸ್ಕಾರ್ ಪಾಟಯ್ತಾಲೆ. ಹ್ಯಾ ಸುವಾಳ್ಯಾರ್ 90% ಪ್ರಾಸ್ ಚಡಿತ್ ಅಂಕ್ ಜೊಡ್ಲೆಲ್ಯಾ ಸಾಧ್ಕಾಂಕ್ ದೊ| ಮೆನಿನೊ ದ ಸೊಜಾ ಪುರಸ್ಕಾರ್ ಪಾಟವ್ನ್ ಮಾನ್ ಕರ್ಚೆಂ ಕಾರ್ಯೆಂಯ್ ಚಲ್ತಲೆಂ.
ಗೊಂಯಾ ಥಾವ್ನ್ ಪ್ರಕಾಶಿತ್ ಜಾಂವ್ಚೆಂ ಕೊಂಕ್ಣಿ ಮಯ್ನ್ಯಾಳೆಂ ಗುಲೊಬ್ ಆನಿ ಮುಂಬಯ್ ಥಾವ್ನ್ ಪ್ರಕಾಶಿತ್ ಜಾಂವ್ಚೆಂ ದ ಗೋವನ್ ರಿವ್ಯೂ ಹಾಚೊ ಸಂಪಾದ್ಪಿ ಶ್ರೀ ಫಾವುಸ್ತೊ ವಿ. ದ ಕೋಸ್ತಾ ಹಾಂಕಾ, ತಾಣಿ ಕೊಂಕ್ಣಿ ಭಾಸ್, ಕಲಾ ಆನಿ ಸಂಸ್ಕೃತಿ ಖಾತಿರ್ ದಿಲ್ಲ್ಯಾ ಸೆವೆಕ್ ಕೊಂಕ್ಣಿ ಭಾಶಾ ಮಂಡಳಾನ್ ವರ್ಸಾವಾರ್ ಪಾಟಂವ್ಚೊ ಜಿಣ್ಯೆ ಸಾಧನ್ ಪುರಸ್ಕಾರ್ ಪಾಟಯ್ತಲೆ.
ವೆದಿ ಕಾರ್ಯಾ ಉಪ್ರಾಂತ್ ಪದಾಂ, ನಾಚ್ ಆನಿ ನಾಟ್ಕುಳ್ಯಾಂನಿ ಭರ್ಪೂರ್ ಮನೊರಂಜನ್ ಕಾರ್ಯೆಂ ಆಸೊನ್, ಜೆವ್ಣಾಸವೆಂ ಅಕೇರ್ ಜಾತೆಲೆಂ.
ಚಡಿತ್ ವಿವರಾ ಖಾತಿರ್ ಕೊಂಕ್ಣಿ ಭಾಶಾ ಮಂಡಳಾಚೊ ಕಾರ್ಯದರ್ಶಿ ಮಾನೆಸ್ತ್ ಲೊರೆನ್ಸ್ ಡಿ ಸೊಜಾ, ಕಮಾನಿ ಹಾಂಕಾ 9821308750 ಹ್ಯಾ ನಂಬ್ರಾಚೆರ್ ಸಂಪರ್ಕ್ ಕರ್ಯೆತ್ ಮ್ಹಣ್ ಕೊಂಕ್ಣಿ ಭಾಶಾ ಮಂಡಳ್ ಮಹಾರಾಷ್ಟ್ರ ಹಾಣಿ ಪತ್ರಾ ಪರ್ಗಟ್ಣೆಂತ್ ಕಳಯ್ಲಾಂ.
