“ವಾಸ್ತವಿಕ್ ಸಂಸಾರ್ ಆನಿ ಕಲ್ಪನಾಸಕ್ತೆಚ್ಯಾ ಮಿಸ್ಳಾಪಾನ್ ಸಾಹಿತ್ಯ್ ಸೃಷ್ಠಿ ಜಾತಾ. ಆಮಿ ಜಿಯೆಂವ್ಚ್ಯಾ ಪರಿಸರಾಚ್ಯಾ ಪ್ರಭಾವಾನ್ ಆಮಿ ರಚ್ಚ್ಯಾ ಸಾಹಿತ್ಯಾಕ್ ರೂಪಕಾಂಚೆಂ ಬಳ್ ಆನಿ ಸಂವೇದನಾಚಿಂ ಸಕತ್ ಲಾಭ್ತಾ. ಆದ್ಲ್ಯಾ ಕಾಳಾರ್ ತೊಂಡ್ಪಾಶಿಂ ಸಾಹಿತ್ಯ್ ಪಿಳ್ಗೆ ಥಾವ್ನ್ ಪಿಳ್ಗೆಕ್ ವ್ಹಾಳೊನ್ ಆಯಿಲ್ಲೆಂ. ಪೂಣ್ ಆಜ್ ಪುಸ್ತಕ್ ರುಪಾರ್ ಸಾಹಿತ್ಯ್ ಸಾಂಬಾಳ್ಚೆಂ ವರ್ತ್ಯಾ ಗರ್ಜೆಚೆಂ. ಹ್ಯಾ ದಿಶೆನ್ ಆಮ್ಚ್ಯಾ ಬರಯ್ಣಾರಾಂನಿ ಕಾರ್ಯಾಪ್ರವೃತ್ತ್ ಜಾಯ್ಜೆ” ಮ್ಹಣಾಲೊ ಶ್ರೀ ಜಿಯೋ ಅಗ್ರಾರ್.
ಸಾಹಿತ್ಯ ಅಕಾಡೆಮಿ, ನವೀ ದಿಲ್ಲಿ ಆನಿ ಭಾರತೀಯ್ ಕಥೋಲಿಕ್ ಯುವ ಸಂಚಾಲನ್ ನಿರ್ಕಾಣ್ ಘಟಕಾಚ್ಯಾ ಜೋಡ್ ಆಸ್ರ್ಯಾಖಾಲ್ ನಿರ್ಕಾಣ್ ಇಸ್ಕೊಲಾಚ್ಯಾ ಸಭಾಸಾಲಾಂತ್ ಆಯ್ತಾರಾ ಅಗೋಸ್ತ್ ತೆರಾವೆರ್ ಆಯೋಜನ್ ಕೆಲ್ಲ್ಯಾ ಗ್ರಾಮಲೋಕ ಸಾಹಿತಿಕ್ ಕಾರ್ಯಾಂತ್ ಅಧ್ಯಕ್ಷ್ ಜಾವ್ನ್ ತೋ ಉಲಯ್ತಾಲೊ.
ಮುಕಾರುನ್ ತಾಣಿ ಮ್ಹಳೆಂ ” ಸಾಹಿತ್ಯಾಕ್ ಆನಿ ಸಮಾಜಾಕ್ ಬೋವ್ ಲಾಗ್ಶಿಲೊ ಸಂಬಂದ್ ಆಸಾ. ಮನ್ಯಾಂ ಮೊಲಾಂ ಉಕಲ್ನ್ ಧರ್ಚೆಂ ಸಾಹಿತ್ಯ್ ಮಾತ್ ಲಾಂಬ್ ತೆಂಪಾಕ್ ಬಾಳ್ವತಾ. ದೆಕುನ್ ಬರಯ್ಣಾರಾಂನಿ ಚಡ್ ಆನಿ ಚಡ್ ಸಮಾಜ್ ಸಂವೇದಿ ಜಾಯ್ಜೆ”
ರಾಷ್ಟ್ರಗೀತ್ ಗಾಯಾನಾಸವೆಂ ಸುರ್ವಾತ್ಲೆಲ್ಯಾ ಕಾರ್ಯಾವಳಿಂತ್, ಸಾಹಿತ್ಯ್ ಅಕಾಡೆಮಿ ಕೊಂಕಣಿ ಭಾಶಾ ಸಲಹಾದಾರ್ ಸಮಿತಿ ಸಾಂದೊ ಎಚ್ಚೆಮ್ ಪೆರ್ನಾಲ್ ಹಾಣಿ ಸಾಹಿತ್ಯ್ ಅಕಾಡೆಮಿಚಿ ಸುರ್ವಾತ್, ವಾವ್ರ್, ಕಾರ್ಯಕ್ರಮಾಂಚೆರ್ ಸಂಕ್ಶಿಪ್ತ್ ವಿವರ್ ದಿಲೊ ಆನಿ ‘ಗ್ರಾಮಲೋಕ’ ಕಾರ್ಯಾವಳಿಚ್ಯಾ ಸುರುಪಾಚೆರ್ ಮಾಹೆತ್ ದಿಲಿ. ಸಾಹಿತ್ಯ ಅಕಾಡೆಮಿಚ್ಯಾ ಹರ್ ಕಾರ್ಯಕ್ರಮಾಂಕ್ ತಾಚೀಚ್ ಮ್ಹಳ್ಳಿ ಮರ್ಯಾದಾ ಆನಿ ಚವ್ಕಟ್ ಆಸಾ ಮ್ಹಳ್ಳ್ಯಾ ತಾಣಿ ‘ಗ್ರಾಮಲೋಕ’ ಕಾರ್ಯಕ್ರಮಾಚೊ ಶೆವೊಟ್ ಗ್ರಾಮೀಣ್ ಪ್ರದೇಶಾಂನಿ ಭಾಸ್ ಆನಿ ಸಾಹಿತ್ಯಾಚೊ ಫರ್ಮಳ್, ತ್ಯಾ ಭಾಶೆಂತ್ಲ್ಯಾ ನಾಮ್ನೆಚ್ಯಾ ಬರಯ್ಣಾರಾಂಚ್ಯಾ ಕೃತಿಯಾಂದ್ವಾರಿಂ ದಿಂವ್ಚೊ ಜಾವ್ನಾಸಾ ಮ್ಹಳೆಂ.
ಸಾಹಿತ್ಯ ಅಕಾಡೆಮಿಂತ್ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಆನಿ ಕಾರ್ಯಕಾರಿ ಮಂಡಳಾಚೊ ಸಾಂದೊ ಕವಿ ಮೆಲ್ವಿನ್ ರೊಡ್ರಿಗಸ್ ಆನಿ ಐಸಿವೈಎಮ್ ನಿರ್ಕಾಣ್ ಘಟಕಾಚಿ ಅಧ್ಯಕ್ಶಿಣ್ ಸ್ವೀಡಲ್ ರೊಡ್ರಿಗಸ್ ಹಾಣಿ ಕಾರ್ಯಾಚೊ ಅಧ್ಯಕ್ಶ್ ಜಿಯೋ ಅಗ್ರಾರ್, ಕವಿ ಬಿ. ಸುರೇಶ ಬಾಳಿಗ, ಕಿರಣ್, ನಿರ್ಕಾಣ್, ಕಥಾಕಾರ್ ಪಂಚು, ಬಂಟ್ವಾಳ್ ಆನಿ ಪಾಳ್ಣ್ಯಾಗಿತಾಂ ಪ್ರಸ್ತುತ್ ಕರ್ಚಿ ಶ್ರೀಮತಿ ರೋಸಲಿನ್ ಮೊರಾಸ್ ಹಾಂಕಾ ಗುಲೊಬ್ ದೀವ್ನ್, ವೆದಿಕ್ ಆಪಯ್ಲೆಂ.
ಕಾರ್ಯಾಂತ್ ಕವಿ, ಗೀತ್‌ಕಾರ್, ಸಾಹಿತಿ ಸುರೇಶ್ ಬಾಳಿಗಾ ಹಾಣಿಂ ಪೋಸ್ಟರ್ ಲಾಂವ್ಚೊ ಮನೀಸ್, ಭಾಯ್ರ್ ಪಡ್‌ಲ್ಲಿ ಕವಿತಾ ಆನಿ ಕಾರ್ಡಾಂನಿಂ ಮನ್ಶ್ಯಾಚಿ ಒಳಕ್ ಹ್ಯಾ ವಿಶಯಾಚೆರ್ ತೀನ್ ಕವಿತಾ ಪೇಶ್ ಕೆಲ್ಯೊ. ಬಾಳಿಗಾಚ್ಯಾ ಕವಿತೆಂನಿ ಮನ್ಶ್ಯಾಚಿಂ ಸೊಧ್ನಾಂ ಅಭಿವೆಕ್ತ್ ಜಾಲಿಂ.
ಪಂಚು ಬಂಟ್ವಾಳ್ ಹಾಣಿ ‘ಕೊಬಾಚೊ ಗಾದೊ’ ಮಟ್ವಿ ಕಥಾ ವಾಚ್ಲಿ. ರಯ್ತಾಂಚ್ಯಾ ಕುಟ್ಮಾಂತ್ ದನಿ ಆನಿ ಒಕ್ಲಾಂ ಮಧೆಂ ಚಲ್ಚೆಂ ಘರ್ಷಣ್ ಆನಿ ದಣ್ಸೊಣೆಂ ಕಾಣಿಯೆಂತ್ ತಾಣೆ ಬಾಂದುನ್ ದಿಲೆಂ.
ಶಿಕ್ಷಕಿ ಜಾವ್ನ್ ಸುಮಾರ್ ಚಾಳಿಸ್ ವರ್ಸಾಂ ಸೆವಾ ದಿಲ್ಲ್ಯಾ ಶ್ರೀಮತಿ ರೋಸಲಿನ್ ಮೊರಾಸ್ ಹಿಣೆ ವೀಣಾ ಮೋರಾಸ್ ಹಿಚೆ ಸಾಂಗಾತಾ ಪ್ರಸ್ತುತ್ ಕೆಲ್ಲ್ಯಾ ಪಾಳ್ಣ್ಯಾಗಿತಾಂನಿ ಭುರ್ಗ್ಯಾಂಕ್ ನಿದಾಯ್ತಾನಾ ಆನಿ ಖೆಳಯ್ತಾನಾ ಗಾಂವ್ಚ್ಯಾ ಗಿತಾಂಚ್ಯಾ ವಿವಿಧತೆಚಿ ಝಳಕ್ ದಿಲಿ.
ಕವಿ ಕಿರಣ್ ನಿರ್ಕಾಣ್ ಹಾಣೆ – ಮಾಂಯ್, ಬಿಡಿಯೆಚೆಂ ಸುಪ್ ಆನಿ ಬಾಯ್ಲ್ ಅಶೆಂ ತೀನ್ ಕವಿತಾ ಸಾದರ್ ಕೆಲ್ಯೊ. ಪಯ್ಲ್ಯಾ ಕವಿತೆಂತ್ ವ್ಹಡ್ಲಿಮಾಂಯ್ ಮ್ಹಳ್ಯಾರ್ ಆಜಿ, ದುಸ್ರ್ಯಾ ಕವಿತೆಂತ್ ಮಾಂಯ್ ಮ್ಹಳ್ಯಾರ್ ಆವಯ್ ಆನಿ ತಿಸ್ರ್ಯಾ ಕವಿತೆಂತ್ ಬಾಯ್ಲ್ ಮ್ಹಳ್ಯಾರ್ ಪತಿಣ್ – ಅಶೆಂ ನಾರಿಚಿಂ ತೀನ್ ಮೊಗಾಚಿಂ ರುಪಾಂ ಸಭಿಕಾಂ ಮುಕಾರ್ ದವರ್ಲಿಂ.
ಕಾರ್ಯಾಚೊ ಅಧ್ಯಕ್ಷ್ ಜಿಯೋ ಅಗ್ರಾರ್ ಹಾಣಿ ಕಾರ್ಯಾಂತ್ ಸಾದರ್ ಕೆಲ್ಲ್ಯಾ ಸಾಹಿತ್ಯಾವಿಶಿಂ ಮಟ್ವೊ ವಿಮರ್ಸೊ ದಿಲೊ ಆನಿ ಕವಿ, ಕಥಾಕಾರ್ ಆನಿ ಪಾಳ್ಣ್ಯಾಗಿತಾಂ ಸಾದರ್ ಕೆಲ್ಯ್ಯಾ ಕಲಾಕರಾಂಕ್ ದಿನ್ವಾಸ್ ಪಾಠಯ್ಲೆ. ಆಪ್ಲಿ ಜೆವ್ಣಾ ಸಾಲ್ ಕವಿತಾ ಸಾದರ್ ಕರುನ್ ಕಾರ್ಯಾಕ್ ತಾಣಿ ಸಮಾರೊಪ್ ದಿಲೊ.
ಐಸಿವೈಎಮ್ ನಿರ್ಕಾಣ್ ಘಟಕಾಚಿ ಅಧ್ಯಕ್ಷಿಣ್ ಸ್ವೀಡಲ್ ರೊಡ್ರಿಗಸ್ ಹಿಣೆ ಸರ್ವಾಂಕ್ ಧನ್ಯವಾದ್ ಅರ್ಪಿಲೆ. ವೆದಿರ್ ಆಸ್‌ಲ್ಲ್ಯಾ ಸಯ್ರ್ಯಾಂಕ್ ಸಾಹಿತ್ಯ ಅಕಾಡೆಮಿ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್, ಕಾರ್ಯಕಾರಿ ಮಂಡಳಾಚೊ ಸಾಂದೊ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ.
ಐಸಿವೈಎಂ ಬಂಟ್ವಾಳ್ ವಾರಾಡ್ಯಾಚೆ ಅಧ್ಯಕ್ಷ್ ಆನಿ ಸಾಂದೆ, ಸೆಜಾರಿ ಫಿರ್ಗಜ್ಯೊ ಜಾವ್ನಾಸ್‌ಲ್ಲ್ಯಾ ಅಲ್ಲಿಪಾದೆ, ಫರ್ಲಾ ಆನಿ ನೈನಾಡ್ ಫಿರ್ಗಜೆಚೆ ಐಸಿವೈಎಂ ಘಟಕಾಚೆ ಪ್ರತಿನಿಧಿ ಕಾರ್ಯಾಕ್ ಹಾಜರ್ ಆಸ್‌ಲ್ಲೆ.
ನಿರ್ಕಾಣ್ ಫಿರ್ಗಜೆಚೊ ಉಪಾಧ್ಯಕ್ಷ್ ತಶೆಂ ಐಸಿವೈಎಮ್ ಎನಿಮೇಟರ್ ಶ್ರೀ ವಿನ್ಸೆಂಟ್ ಬೆನ್ನಿಸ್, ಸಾಹಿತ್ಯ್ ಅಕಾಡೆಮಿ ಸಲಹದಾರ್, ಕವಿ ಸ್ಟ್ಯಾನಿ ಬೆಳಾ, ಕೊಂಕ್ಣೆಚೆ ಇತರ್ ಸಾಹಿತಿಕ್ ವಾವ್ರಾಡಿ ಅಲ್ಫೊನ್ಸ್ ಪಾಂಗ್ಳಾ, ವಿನ್ಸಿ ಆಂಜೆಲೊರ್, ರೋಶು ಬಜ್ಪೆ, ವಿಲ್ಸನ್ ಕಟೀಲ್, ಫೆಲ್ಸಿ ದೆರೆಬೈಲ್, ಫ್ಲಾವಿಯಾ ಪುತ್ತೂರ್, ರೋಬರ್ಟ್ ಮಡಂತ್ಯಾರ್ ಆನಿ ಸಭಾರ್ ಕೊಂಕ್ಣಿ ಸಾಹಿತ್ಯಾಸಕ್ತ್ ಕಾರ್ಯಾಕ್ ಹಾಜರ್ ಆಸ್ಲೆ.
■ ತಸ್ವಿರ‍್ಯೊ / ವರ್ದಿ : ಅಲ್ಪೋನ್ಸ್, ಪಾಂಗ್ಳಾ
1 comment
Very good development. Fantastic 😍
I really appreciate your time and effort for the cause of Konkani 🙏