ಸಾಹಿತ್ಯಾಚೆಂ ಕಾಮ್ ‘ಕನೆಕ್ಟ್’ ಕರ್ಚೆಂ – ಮಾ| ಬಾ| ಡೇನಿಯಲ್ ವೇಗಸ್

190

ಶ್ರೀಮತಿ ಪ್ರೆಸಿಲ್ಲಾ ಫೆರ್ನಾಂಡಿಸ್ ಹಿಣೆ ಬರವ್ನ್, ತಿಚ್ಯಾ ಲಲ್ಲಕ್, ಮ್ಹಳ್ಯಾರ್ ವರ್ಸಾ ಆದಿಂ ಅಂತರ್ಲೆಲೊ ತಿಚೊ ಪತಿ ಲೊರೆನ್ಸ್ ಪ್ಯಾಟ್ರಿಕ್ ಫೆರ್ನಾಂಡಿಸ್ ಹಾಕಾ ಸಮರ್ಪಿಲ್ಲೊ ಮಟ್ವ್ಯಾ ಕಾಣಿಯಾಂಚೊಂ ಪುಂಜೊ ಸುಖಾಂತ್ ತಶೆಂ ದುಖಾಂತ್, ಬುದ್ವಾರಾ, ಸಪ್ತೆಂಬರ್ 6 ವೆರ್, ಅಶೋಕನಗರ ಸಾಂ. ದುಮಿಂಗ್ ಫಿರ್ಗಜ್ ಸಾಲಾಂತ್, ವರ್ಸಾಚ್ಯಾ ಉಡಾಸಾಚ್ಯಾ ಮಿಸಾ ಉಪ್ರಾಂತ್, ಫಿರ್ಗಜ್ ವಿಗಾರ್ ಮಾ| ಬಾ| ಡೇನಿಯಲ್ ವೇಗಸ್, ಸಹಾಯಕ್ ವಿಗಾರ್ ಮಾ| ಬಾ| ದಿಲೀಪ್ ವೇಗಸ್ – ಪೂತ್ ಪ್ರದೀಪ್, ಸುನ್ ಜೆನ್ನಿ ಆನಿ ತಾಂಚಿಂ ಭುರ್ಗಿಂ ಆಂಜೆಲಾ ಆನಿ ಆನ್ಯ, ಧುವ್ ಪ್ರಮೀಳಾ (ಜಾಂವಯ್ ಓಸ್ಗರ್ ರೆಬೆಲ್ಲೊ ವಾವ್ರಾ ನಿಮ್ತಿಂ ಪರ್ಗಾಂವಾಂತ್ ಆಸ್‌ಲ್ಲ್ಯಾನ್ ಹಾಜರ್ ಜಾಂವ್ಕ್ ನಾ) ಆನಿ ತಾಂಚಿಂ ಭುರ್ಗಿಂ ಡೇನಿಯಲ್ ಆನಿ ಕ್ರಿಸ್ ಹಾಂಚ್ಯಾ ಹಾಜ್ರೆಂತ್ ಲೊಕಾರ್ಪಣ್ ಕೆಲೊ.

ವರ್ಸಾಚ್ಯಾ ಮಿಸಾಕ್ ಆಯಿಲ್ಲ್ಯಾಂಕ್ ಹೆರ್ ಕಸಲೀಯ್ ಕಾಣಿಕ್ ದಿಂವ್ಚ್ಯಾ ಬದ್ಲಾಕ್, ಪಾಟ್ಲ್ಯಾ ಧಾ ವರ್ಸಾಂನಿ ತಿಣೆ  ವೆವೆಗ್ಳ್ಯಾ ಪತ್ರಾಂಕ್ ಬರವ್ನ್ ಇನಾಮಾಂಯ್ ಜೊಡ್ಲೆಲ್ಯಾ 25 ಮಟ್ವ್ಯಾ ಕಾಣಿಯಾಂಚೊಂ ಜಮೊ ‘ಸುಖಾಂತ್ ತಶೆಂ ದುಖಾಂತ್’ ವಾಂಟ್ಲೊ. ಹ್ಯಾ ಪುಂಜ್ಯಾಂತ್ ಕುಟ್ಮಾಜಿವಿತಾಂತ್ಲೆ ಸುಖ್ ಆನಿ ದೂಖ್, ಮೋಗ್ ಆನಿ ಮಾಯ್ಪಾಸ್ ಆನಿ ಹೆರ್ ಸಮಾಜಿಕ್ ಗಜಾಲಿಂಚೆರ್ ಬಾಂದುನ್ ಹಾಡ್ಲೆಲ್ಯೊ 25 ಆಪುರ್ಬಾಯೆಚ್ಯೊ ಕಾಣ್ಯೊ ಆಸಾತ್.

ಬೂಕ್ ಉಗ್ತಾವ್ನ್, ಸಭೆಂತ್ ಹಾಜರ್ ಆಸ್ಲೆಲ್ಯಾ ಸಮೇಸ್ತಾಂಚ್ಯಾ ನಾಂವಿ ಬರೆಂ ಮಾಗೊನ್ ಉಲಯಿಲ್ಲ್ಯಾ ಮಾ| ಬಾ| ಡೇನಿಯಲ್ ವೇಗಸ್ ಹಾಣಿ “ಬುಕಾಂತ್ಲಿ ಪಯ್ಲಿ ಕಾಣಿ ‘ಜೀವ್’ ಹಾಚಿ ಸುರ್ವಾತ್ ವಾಚ್ತಾನಾಂಚ್ ಆಪುಣ್ ಮ್ಹಜೊ ಗಾಂವ್ ಬಂಟ್ವಾಳ್ ಆನಿ ಬಾಳಿಗಾ ವಸ್ತುರಾಚ್ಯಾ ಆಂಗ್ಡಿಕ್ ಪಾವ್ಲೊಂ. ಸಾಹಿತ್ಯಾಚೆಂ ಕಾಮ್ ‘ಕನೆಕ್ಟ್’ ಕರ್ಚೆಂ. ಮ್ಹಜೆಪರಿಂಚ್ ಕಿತ್ಲೆಶೆ ವಾಚ್ಪಿ ಪ್ರೆಸಿಲ್ಲಾಬಾಯೆಚ್ಯೊ ಕಾಣಿಯೊ ವಾಚ್ತಾನಾ ಮನ್ಶಾಪಣಾಂತ್ ಕನೆಕ್ಟ್ ಜಾತೆಲೆ ತೆಂ ಖಂಡಿತ್. ಪ್ರೆಸಿಲ್ಲಾಬಾಯೆಥಾವ್ನ್ ಅನಿಕೀಯ್ ಬರ‍್ಯೊ ಕಾಣಿಯೊ ವಾಚ್ಪ್ಯಾಂಕ್ ವಾಚುಂಕ್ ಮೆಳೊಂ” ಮ್ಹಣ್ ಬರೆಂ ಮಾಗ್ಲೆಂ.

ಆಪ್ಲೊ ಪತಿ ಲಲ್ಲ ವಿಶ್ಯಾಂತ್, ತಾಚ್ಯಾ ಫುಲಾಂ ಝಾಡಾಂಚ್ಯಾ ಮೊಗಾ ವಿಶ್ಯಾಂತ್, ನವಿ ವಕಲ್ ಜಾವ್ನ್  ಆಯಿಲ್ಲೆ ತವಳ್  ತಾಣೆ ಲಾಯ್ಲೆಲ್ಯಾ ಝಾಡಾಂತ್ ಫುಲ್‌ಲ್ಲೊ ಗುಲೊಬ್, ತಾಕಾ ವಿಚಾರಿನಾಸ್ತಾನಾ ಪಾಂತಿಯೇರ್ ಮಾಳ್ನ್ ದಫ್ತರಾಕ್ ಗೆಲ್ಲೆವೆಳಾರ್,  ಸಾಂಜೆರ್ ತೋ ಘರಾ ಪರ್ತಾಲ್ಲೊಚ್ “ಝಡಾರ್ ಆಸ್‌ಲ್ಲೊ ತರ್ ಧಾ ದೀಸ್ ಆಸ್ತೊ, ತುಜ್ಯಾ ಕೆಸಾಂನಿ ಪಳೆ ತೊ ಭಾವೊನ್ ಗೆಲಾ” ಮ್ಹಣ್ ಸಾಂಗ್ಲೆಲ್ಯಾ ಶೀದಾ ಉಲೊಣ್ಯಾ ವಿಶ್ಯಾಂತ್, ಆನಿ ಆತಾಂ ತಾಚ್ಯಾ ಗಯ್ರ್ ಹಾಜ್ರೆಂತ್ ತಾಚ್ಯಾ ಫುಲಾಂಚ್ಯಾ ವೊಡ್ತಾಂತ್ ತಾಚೊ ಸಾಂಗಾತ್ ಭೊಗ್ಚ್ಯಾಂತ್, ತಾಣೆ ಲಾಯಿಲ್ಲ್ಯಾ ಝಾಡಾಂಚೊಂ ಪೋಸ್ ಕರುನ್ ದಾದೊಸ್ಕಾಯ್ ಜೊಡ್ಚೆ ವಿಶ್ಯಾಂತ್ ಮಾರ್ಮಿಕ್ ಥರಾನ್ ಉಲವ್ನ್, ಲೇಖಕಿ ಪ್ರೆಸಿಲ್ಲಾ ಫೆರ್ನಾಂಡಿಸ್ ಹಿಣೆ, ಬೂಕ್ ಉಜ್ವಾಡಾಂವ್ಕ್ ಸಾಂಗಾತ್ ದಿಲ್ಲ್ಯಾ ಸರ್ವಾಂಚೊಂ ಉಪ್ಕಾರ್ ಭಾವುಡ್ಲೊ ಆನಿ ಬುಕಾಚಿ ಪಯ್ಲಿ ಪ್ರತಿ ಲೇಖಕಿ ಪ್ರೆಸಿಲ್ಲಾ ಫೆರ್ನಾಂಡಿಸ್ ಹಿಣೆ ತಿಕಾ ಬರಂವ್ಕ್ ಉತ್ತೇಜನ್ ದಿಲ್ಲಿ, ಫಿರ್ಗಜೆಚಿ ಬೋವ್ ಮಾಲ್ಘಡಿ ವಾಚ್ಪಿ 95 ವರ್ಸಾಂ ಪ್ರಾಯೆಚ್ಯಾ ಶ್ರೀಮತಿ ಲೂಸಿ ಮೊಂತೇರೊ ಹಿಕಾ ದೀವ್ನ್ ಮಾನ್ ಕೆಲೊ.

‘ಸುಖಾಂತ್ ತಶೆಂ ದುಖಾಂತ್’ ಏಕ್ ಸಂಪೂರ್ಣ್ ಸಾಹಿತ್ಯ್ ಕೃತಿ ತರೀ, ವಿಕ್ರ್ಯಾಕ್ ಮೆಳಾನಾ. ಲಲ್ಲಚ್ಯಾ ವರ್ಸಾಚ್ಯಾ ಮಿಸಾಕ್ ಹಾಜರ್ ಜಾಲ್ಲ್ಯಾಂಕ್ ಕುಟ್ಮಾಕ್ ಎಕಾ ಲೆಕಾನ್, ಲೇಖಕಿನ್ ಪ್ರತಿ ವಾಂಟ್ಲ್ಯಾ.

ಪುಸ್ತಕಾಕ್ ಫಾಮಾದ್ ಇಂಗ್ಲಿಶ್ ಲೇಖಕ್ ಜೊನ್ ಬಿ. ಮೊಂತೇರೊ ಹಾಣಿ ಪಯ್ಲಿಂ ಉತ್ರಾಂ ಬರಯ್ಲ್ಯಾಂತ್. ಕಂಕ್ನಾಡಿ ಅಸ್ಪತ್ರೆಚೊ ಫಾಮಾದ್ ವಯ್ಜ್ ದೊ| ಲೊರೆನ್ಸ್ ಫೆರ್ನಾಂಡಿಸ್ ಹಾಂಚ್ಯಾ ಭಾವಾಚೊ ನಾತು, ತಿಚೊ ಪತಿ ಲೊರೆನ್ಸ್ ಫೆರ್ನಾಂಡಿಸ್, ಲೇಖಕಿ ಪ್ರೆಸಿಲ್ಲಾಬಾಯೆಕ್ ಲಲ್ಲ ಕಸೊ ಜಾಲೊ? ತಾಚಿ ತಿ ಸೊಸ್ಣಿಕಾಯ್, ದುಬ್ಳ್ಯಾ ಧಾಕ್ಟ್ಯಾಂಥಂಯ್ ತಾಕಾ ಆಸ್‌ಲ್ಲೊ ಮೋಗ್, ಪ್ರಾಯ್ವಂತಾಂಕ್ ಗರ್ಜಾಂಕ್ ಪಾಂವ್ಚೊ ಗೂಣ್ ಹ್ಯಾ – ವಿಶ್ಯಾಂತ್ ಲೇಖಕಿನ್ ಥೊಡ್ಯೊ ಗಜಾಲಿ ಪುಸ್ತಕಾಚ್ಯಾ ಸುರ್ವಾತೆರ್ ಬರಯ್ಲ್ಯಾತ್ ಆನಿ ಪೂತ್ ಆನಿ ಧುವೆಚ್ಯಾ ಕುಟ್ಮಾಚೆ ಆನಿ ಲಲ್ಲಚ್ಯಾ ಗಾಯನಾಚೆ ಥೊಡ್ಯೊ ರಂಗೀನ್ ತಸ್ವಿರ‍್ಯೊ ಬುಕಾಂತ್ ಛಾಪ್ಲ್ಯಾತ್.