ಕರ್ನಾಟಕ ರಾಜ್ಯಾಚೆ ವೆವೆಗಳೆ ಶಾಳಾ, ಕಾಲೇಜು ಆನಿ ಸ್ನಾತಕೋತ್ತರ ವಿಭಾಗಾಂತ ಕೊಂಕಣಿ ಶಿಕೊವಚೆ ಶಿಕ್ಷಕಾಂಕ ವಿಶ್ವ ಕೊಂಕಣಿ ಕೇಂದ್ರಾಂತ ಏಕ ವಿಶೇಷ ರೀತೀನ ಶಿಕ್ಷಕ ದಿನಾಚರಣ ಆಚರಣ ಕೆಲೆಂ. ಪ್ರತಿ ಏಕ ಶಿಕ್ಷಕಾಂಕ ಪಾಂಚ ಹಜಾರ ರೂಪಾಯಿ ಆನಿ ಯಾದಸ್ತಿಕಾ ದೀವನು ಮಾನ ದಿಲೆಂ, ಸ್ನಾತಕೋತ್ತರ ವಿಭಾಗಾಚೆ ವಿದ್ಯಾರ್ಥಿಂಕ ಧಾ ಹಜಾರ ರೂಪಾಯಿ ವಿದ್ಯಾರ್ಥಿ ವೇತನ ವಾಂಟುನ ಕೊಂಕಣಿ ಶಿಕಚಾಕ ಸಂಪೂರ್ಣ ಪ್ರೋತ್ಸಾಹ ದಿಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ನಾಮಾನೆಚೆ ಲೇಖಪರೀಕ್ಷಕ ಮಾನೆಸ್ತ ನಂದಗೋಪಾಲ ಶೆಣೈ ಹಾನ್ನಿ ಅಧ್ಯಕ್ಷಪಣ ಘೆವನು ಕೊಂಕಣಿ ಶಿಕ್ಷಣ ಅಭಿವೃದ್ಧಿ ಕರಚಾಂತ ಶಿಕ್ಷಕಾಂಗೆಲೊ ಮಹಾನ ವಾವ್ರಾಕ ಪ್ರಶಂಶಾ ದಿಲೆಂ. ತಶೀಂಚಿ ಆನಿ ಮುಖಾರಿ ಕೇಂದ್ರಾಚೆ ವತೀನ ಕೊಂಕಣಿ ಭುರ್ಗ್ಯಾಂಗೆಲೊ ಉತ್ಸವಯ್ ಆಯೋಜನ ಕರಚೆ ಬದ್ದಲ ವಿವರಣ ದಿಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಕೊಂಕಣಿ ಶಿಕ್ಷಣ ಯೋಜನೆಚೆ ಮಾನೆಸ್ತ ಡಾ. ಕಸ್ತೂರಿ ಮೋಹನ ಪೈ ಹಾನ್ನಿ ಕೇಂದ್ರಾಚೆ ಸಹಕಾರಾನ ಕರ್ನಾಟಕ ಕೊಂಕಣಿ ಶಾಲಾ ಶಿಕ್ಷಣ ವಾಡುನ ಆಯಿಲೆಂ ವಿಷಯ್ ವಿವರ ಜಾವನು ತಿಳಿಸಿಲೆಂ. ತಶೀಂಚಿ ಮಂಗಳೂರು ವಿಶ್ವ ವಿದ್ಯಾನಿಲಯಾಂತ ಸ್ನಾತಕೋತ್ತರ ಎಮ್. ಎ ಕೊಂಕಣಿ ವಿಭಾಗಾಚೆ ಸ್ಥಾಪನ ಆನಿ ಮಾಗಶಿ ಸಾತ ವರಸಾಚೆ ವಾವರ ಬದ್ದಲ ಕೇಂದ್ರಾಚೆ ಸಂಶೋಧನಾ ವಿಭಾಗಾಚೆ ನಿರ್ದೇಶಕ ಡಾ ಬಿ. ದೇವದಾಸ ಪೈ ಹಾನ್ನಿ ವಿವರಣ ದಿಲೆಂ. ಪ್ರೊ. ಜಯವಂತ ನಾಯಕ ಹಾನ್ನಿ ಕೊಂಕಣಿ ಅಧ್ಯಯನ ಪೀಠಾಚೆ ವೆವೆಗಳೆ ಯೋಜನೆಚೆ ಬದ್ದಲ ಮಾಹಿತಿ ದಿಲೆಂ.
ಕೇಂದ್ರಾಚೆ ಉಪಾಧ್ಯಕ್ಷ ಮಾನೆಸ್ತ್ ಗಿಲ್ಬರ್ಟ್ ಡಿಸೋಜಾ, ಖಜಾಂಚಿ ಬಿ. ಆರ್ ಭಟ್, ಟ್ರಸ್ಟಿ ಡಿ. ರಮೇಶ ನಾಯಕ್, ಮೆಲ್ವಿನ್ ರೊಡ್ರಿಗಸ್, ಗೋಕುಲ್ ನಾಥ ಪ್ರಭು ಉಪಸ್ಥಿತ ಆಶಿಲಿಂಚಿ. ರತ್ನಾಕರ ಕುಡ್ವಾ ಹಾನ್ನಿ ದೇವು ಬರೆಂ ಕೊರೊ ಸಾಂಗಲೆಂ. ಟ್ರಸ್ಟಿ ಶಕುಂತಲಾ ಆರ್ ಕಿಣಿ ಹಾನ್ನಿ ಕಾರ್ಯಕ್ರಮ ನಿರೂಪಣ ಕೆಲೆಂ.
