ದಾಯ್ಜಿ ದುಬಾಯ್” ಯು.ಎ.ಇಂತ್ಲ್ಯಾ ಕೊಂಕ್ಣಿ ಲೇಖಕಾಂಚೆಂ ಸಂಘಟನ್ ಆಪ್ಲ್ಯಾ ಆಸ್ಥಿತ್ವಾ ಥಾವ್ನ್ , ಗಾಂವಾಂತ್ ಥಾವ್ನ್ ಆಯಿಲ್ಲ್ಯಾ ಕೊಣೀ ಕೊಂಕ್ಣಿ ಸಾಹಿತಿಲಾಗಿಂ , ಕವಿಲಾಗಿಂ ತಶೆಂಚ್ ಕಲಾಕಾರಾಲಾಗಿಂ ಸಂವಾದ್ ಚಲೊವ್ನ್ ತಾಂಚೊ ಆನ್ಭೊಗ್ ವಾಂಟುನ್ ಕಾಣ್ಘೆಂವ್ಚೊ , ತಾಣಿಂ ಝರಯಿಲ್ಲಿ ಸಾಹಿತಿಕ್ ವಾಟ್ ಜಾಣಾ ಜಾಂವ್ಚಿ ಸಾಂಗಾತಾಚ್ಚ್ ತಾಂಕಾ ಮ್ಹಾನ್ ಕರ್ಚೊ ಸಂಪ್ರದಾಯ್ ಪಾಳುನ್ ಆಸಾ.
ದುಬಾಯಾಂತ್ಲ್ಯಾ ಸೈಂಟ್ ಮೇರಿಸ್ ಇಗರ್ಜೆಂತ್ ಮೊಂತಿ ಮಾಯೆಚ್ಯಾ ಫೆಸ್ತಾಕ್ ತಯಾರಾಯ್ ಜಾವ್ನ್ ನೊವೆನ್ ಚಲೊಂವ್ನ್ ವ್ಹರುಂಕ್ ದುಬಾಯ್ ಪಾವ್‌ಲ್ಲ್ಯಾ ಕೊಂಕ್ಣಿ ಸಾಹಿತಿ , ಸಂಪಾದಕ್ ತಶೆಂ ಕೊಂಕ್ಣಿ ವಾವ್ರಾಡಿ ಮಾ. ಬಾ. ಚೇತನ್ ಲೋಬೊ ಹಾಚ್ಯಾ ಸಂಗಿ ದಾಯ್ಜಿ ದುಬಾಯ್ ಹಾಣಿ ದಾಯ್ಜಿ ಮಂದಿರ್ ಸಂಗಿ ಮೆಳೊನ್ “ಏಕ್ ಸಾಹಿತಿಕ್ ಸಂವಾದ್” ಕಾರ್ಯೆಂ ಸಪ್ತೆಂಬರಾಚ್ಯಾ 3 ತಾರಿಕೆರ್ ದುಬಾಯ್ ಕರಾಮಾಂತ್ಲ್ಯಾ ವಿನ್ನಿಸ್ ರೆಸ್ಟೊರೆಂಟ್ ಹಾಂಗಾಸರ್ ಮಾಂಡುನ್ ಹಾಡ್‌ಲ್ಲೆಂ.
ದಾಯ್ಜಿ ಸಾಂದೊ ತಶೆಂಚ್ ಕಾರ್ಯಾಚೊ ಕಾರ್ಯ ನಿರ್ವಾಹಕ್ ಆನಿಲ್ ಪಿಂಟೊ ಕುಲ್ಶೆಕರ್ ಹಾಚ್ಯಾ ಸಾಂಪ್ರದಾಯಿಕ್ ಸ್ವಾಗತಾ ಉಪ್ರಾಂತ್ ದಾಯ್ಜಿ ದುಬಾಯ್ ಸಂಚಾಲಕ್ ನಾನು ಮರೋಲ್ ತೊಟ್ಟಾಮ್ , ದಾಯ್ಜಿ ದುಬಾಯ್ ಸ್ಥಾಪಕ್ ಸಾಂದೊ ತಶೆಂಚ್ ಸ್ಥಾಪಕ್ ಸಂಚಾಲಕ್ ಡಯಾನ್ ಡಿ’ಸೋಜಾ ಮುಕಾಮರ್ ಆನಿ ಮಾಲ್ಘಡೊ ಬರೊವ್ಪಿ ತಶೆಂಚ್ ದಾಯ್ಜಿ ದುಬಾಯ್ ಮಾಜಿ ಸಂಚಾಲಕ್ ಸ್ಟ್ಯಾನ್ ಆಗೇರಾ ಮುಲ್ಕಿ ಹಾಣಿಂ ಸಾಂಗಾತಾ ಮೆಳೊನ್ ಮುಖೆಲ್ ಸಯ್ರೊ ತಶೆಂಚ್ ಪ್ರಮುಖ್ ಉಲೊವ್ಪಿ ಮಾ.ಬಾ.ಚೇತನ್ ಲೋಬೊ ಕಾಪುಚಿನ್ ಹಾಕಾ ವೇದಿರ್ ಆಪೊವ್ನ್ ಹಾಡ್ಲೆಂ. ಸ್ಟ್ಯಾನ್ ಆಗೇರಾ ಹಾಣೆ ಮಾ.ಬಾ.ಚೇತನ್ ಲೋಬೊ ಹಾಂಕಾಂ ಫುಲಾಂಚೊ ತುರೊ ದೀವ್ನ್ ಸ್ವಾಗತ್ ಕೆಲೊ.
ನಾನು ಮರೋಲ್ ತೊಟ್ಟಾಮ್ ಹಾಣೆ ಆಪ್ಲ್ಯಾ ಸ್ವಾಗತ್ ಭಾಷಣಾಂತ್ ಮಾ. ಬಾ. ಚೇತನ್ ಲೋಬೊ ಹಾಂಕಾಂ ಸ್ವಾಗತ್ ಕರ್ಚ್ಯಾ ಸಾಂಗಾತಾ ತಾಣಿಂ ಬರಂವ್ಕ್ ಧರ್ಲೆಲ್ಯಾ ಸುರ್ವೆರ್ ಥಾವ್ನ್ ತಾಂಚ್ಯಾ ಬರ್ಪಾಂನಿ ಪಯ್ಸಾದೀಶ್ಟ್ ಆನಿ ವೈಚಾರಿಕತಾ ಆಸ್‌ಲ್ಲಿ ತೆಂ ತಾಚ್ಯಾ ಕಾಣಿಯಾಂಚೆಂ ಉದಾಹರಣ್ ದೀವ್ನ್ ಸಾಂಗ್ಲೆಂ. ಹಾಜರ್ ಆಸ್‌ಲ್ಲ್ಯಾ ದಾಯ್ಜಿ ದುಬಾಯ್ಚ್ಯಾ ಪೋಷಕಾಂಕ್ ತಶೆಂಚ್ ಆಭಿಮಾನಿಂಕ್ ತಾಣೆ ಗೌರವಾಚೊ ಸ್ವಾಗತ್ ಮಾಗ್ಲೊ ಆನಿ ಮಾ. ಬಾ. ಚೇತನ್ ಲೋಬೊ ಹಾಚಿ ಮಟ್ವಿ ವ್ಹಳೊಕ್ ಸ್ಟ್ಯಾನ್ ಆಗೇರಾ ಹಾಣೆ ಕರ್ನ್ ದಿಲಿ.
ಆಪ್ಲ್ಯಾ ಉಲೊವ್ಪಾಂತ್ ತಾಣೆ ಮಾ. ಬಾ. ಚೇತನ್ ಲೋಬೊ ಹಾಚ್ಯಾ ಜಲ್ಮಾವಿಶಿಂ ಆನಿ ಕುಟ್ಮಾವಿಶಿಂ ತಿಳ್ಶಿಲೆಂ. ತಾಂಚ್ಯಾ ಕಾಣಿಯಾಂ ವಿಶಿಂ , ತಾಂಚ್ಯಾ ಸಾಹಿತಿಕ್ ವಾವ್ರಾವಿಶಿಂಯ್ ಸಾಂಗ್ಲೆಂ. ಏಕ್ ಸಂಪಾದಕ್ ಜಾವ್ನ್ ತಾಣಿಂ ದಿಲ್ಲಿ ಸೆವಾ , ಮಾಂಡುನ್ ಹಾಡ್‌ಲ್ಲಿಂ ವಿಚಾರ್ ಸಾತಿಂ , ನವ್ಯಾ ಬರೊವ್ಪ್ಯಾಂಕ್ ತಿದ್ವುನ್ , ಮೊಗಾ ಮಯ್ಪಾಸಾನ್ ದಿಂವ್ಚೆಂ ಮಾರ್ಗದರ್ಶನ್ ಹಾಚೆ ವಿಶಿಂ ಸ್ಟ್ಯಾನ್ ಆಗೇರಾ ಉಲಯ್ಲೊ. ಮಾ. ಬಾ. ಚೇತನ್ ಲೋಬೊ ಹಾಣಿಂ ದಾಯ್ಜಿ ದುಬಾಯ್ ಸಂಘಟನಾಕ್ ದಿಲ್ಲೊ ಮೊಟೊ ಸಹಕಾರ್ ಉಡಾಸ್ ಕರುನ್ ದಾಯ್ಜಿ ದುಬಾಯ್ ಸಂಘಟನಾಕ್ ಮಂಗ್ಳೂರಾಂತ್ ಆನಿ ವಿಶೇಷ್ ಜಾವ್ನ್ ಉಡುಪಿ ದಿಯೆಸೆಜೆಂತ್ ಲೊಕಾ ಪರ್ಯಾಂತ್ ಪಾವಯಿಲ್ಲಿ ಕೀರ್ತ್ ಮಾ. ಬಾ. ಚೇತನ್ ಲೋಬೊ ಹಾಂಕಾಂ ವೆತಾ ಮುಣೊನ್ ತಾಣೆ ಸಾಂಗ್ಲೆಂ.
ಮುಕೆಲ್ ಉಲೊವ್ಪಿ ಮಾ. ಬಾ. ಚೇತನ್ ಲೋಬೊ ಹಾಣಿ “ದಾಯ್ಜಿ ದುಬಾಯ್” ಸಂಘಟನಾಕ್ ದೇವ್ ಬೊರೆಂ ಕರುಂ ಮ್ಹಣ್ಚ್ಯಾ ಮಾರಿಫಾತ್ ಆಪ್ಲೆಂ ಉಲೊವ್ಣೆ ಆರಂಭ್ ಕೆಲೆಂ. ದಾಯ್ಜಿ ದುಬಾಯ್ ಆಪ್ಣಾಕ್ ಕಾಳ್ಜಾಕ್ ಲಾಗ್ಶಿಲೆಂ. ಆಪ್ಲ್ಯಾ ಸರ್ವ್ ಕೊಂಕ್ಣಿ ವಾವ್ರಾಕ್ ದಾಯ್ಜಿಚೊ ಮೊಟೊ ಹಾತ್ ಆಸಾ. ರೆಸಾಚ್ಯಾ ಮೈದಾನಾರ್ ಕೊಣೀ ಧಾಂವ್ಯೆತ್. ಪುಣ್ ಪಯ್ಲಿಂ ಮೆಟಾಂ ಕಾಡುಂಕ್ ಕೊಣೆ ತರೀ ಹಾತ್ ಧರುಂಕ್ ಜಾಯ್ ಆನಿ ತೆಂ ಕಾಮ್ ದಾಯ್ಜಿ ದುಬಾಯ್ನ್ ಕೆಲಾಂ. ಹೆಂ ಕೇವಲ್ ಪಯ್ಶ್ಯಾಂನಿ ಮಾತ್ರ್ ನ್ಹಂಯ್ ಆಸ್ತಾಂ ಆಗಾದ್ ಉತ್ತೇಜನ್ ಆನಿ ಸಹಕಾರ್ ಮುಖಾಂತ್ರ್ ತಾಣಿಂ ಕೆಲಾಂ. ಪರ್ಕಿ ಗಾಂವಾಂತ್ ಆಸೊನ್ ಆಪ್ಲ್ಯಾ ಆನಿ ಆಪ್ಲ್ಯಾ ಕುಟ್ಮಾಚ್ಯಾ ರಾಟಾವಳಿಂ ಸಾಂಗಾತಾ ಕಿತೆಂಚ್ ಪ್ರತಿಫಳ್ ಆಶೆನಾಸ್ತಾಂ ಆಸಲೆಂ ಕಾಮ್ ಕರ್ಚೆಂ ಹೊಗ್ಳಿಕೆಕ್ ಫಾವೊ. ತ್ಯಾ ದೆಕುನ್ ದಾಯ್ಜಿ ದುಬಾಯ್ ಸಂಘಟನಾಕ್ ಆಪ್ಣಾ ತರ್ಫೆನ್ ತಶೆಂಚ್ ಹೆರ್ ಸರ್ವಾಂ ತರ್ಫೆನ್ ದೇವ್ ಬೊರೆಂ ಕರುಂ.
ಹಾಂವ್ ಸಾಹಿತಿ ಮ್ಹಣೊನ್ ಲೆಖುಂಕ್ ನಾ ಬಗಾರ್ ಹಿ ಆಪ್ಲಿ ಸಾಮಾಜಿಕ್ ಜವಾಬ್ದಾರಿ ಮ್ಹಣೊನ್ ಲೆಕ್ಲಾಂ. ಯಾಜಕ್ ಜಾವ್ನ್ ಲಗ್ಭಗ್ 25 ವರ್ಸಾಂ ಶಿಕೊನ್ ತೆಂ ತಕ್ಲೆಂತ್‌ಚ್ ಉರ್ಲ್ಯಾರ್ ತೆಂ ವ್ಹಾಳಯ್ ಖಾವ್ನ್ ವೆತಾ. ತೆಂ ವಾಂಟ್ಚಿ ಗರ್ಜ್ ಆಸಾ. ಸಕ್ಟಾಂಕಿ ಮತಿಂತ್ ಕಿತೆಂ ಆಸಾ ತೆಂ ಉತ್ರಾಂನಿ ಸಾಂಗೊಂಕ್ ಜಾಯ್ನಾ. ಸಾಹಿತ್ಯ್ ರಚ್ಚೆಂ ಮುಳ್ಳ್ಯಾರ್ ಜೆಂ ಕಿತೆಂ ಆಮ್ಚೆಲಾಗಿಂ ಆಸ್‌ಲ್ಲೆಂ, ಆಮ್ಚೆ ಜಿಣಿಯೆಂತ್ ಘಡ್‌ಲ್ಲೆಂ , ಆಮಿಂ ಪಳಯಿಲ್ಲೆಂ , ಆಮಿಂ ಬರಯಿಲ್ಲೆಂ , ಆಮಿ ವಾಚ್‌ಲ್ಲೆಂ ಆನಿ ಆಮಿ ಆನ್ಭೊಗ್ ಕೆಲ್ಲೆಂ ಜಾವ್ನಾಸಾ.
ಸಾಹಿತ್ಯ್ ಆಮ್ಕಾಂಚ್ ಆಮಿ ಆಭಿವ್ಯಕ್ತ್ ಕರುಂಕ್ ಬೊರೆಂ ಮಾಧ್ಯಮ್. ವಿಶೇಷ್ ಕರುನ್ ಸ್ತ್ರೀಯಾಂಕ್ ಏಕ್ ಭೊವ್ ಬೊರೆಂ ಮಾಧ್ಯಮ್. ಸ್ತ್ರೀಯಾಂಚ್ಯಾ ತಕ್ಲೆಂತ್ ಘುಂವ್ಚೆಂ ತಿತ್ಲೆ ವಿಶಯ್ ದಾದ್ಲ್ಯಾಂಚ್ಯಾ ತಕ್ಲೆಂತ್ ಘುಂವಾನಾಂತ್. ತಕ್ಲೆಂತ್ ಆಸ್‌ಲ್ಲೆಂ ಸಾಂಗಾನಾಸ್ತಾನಾ ರಾವ್ಲ್ಯಾರ್ ಆಮ್ಕಾಂಚ್ ಆಮಿಂ ಆನ್ಯಾಯ್ ಕರ್ತಾಂವ್ , ಪೆಲ್ಯಾಕ್ ಆನ್ಯಾಯ್ ಕರ್ತಾಂವ್ ಆನಿ ಸಂಸಾರಾಕ್ ನಷ್ಟ್ ಕರ್ತಾಂವ್.
ಆಜ್ ಆಮ್ಕಾಂ ಸಾಮಾಜಿಕ್ ಮಾಧ್ಯಮಾಂನಿ ಸಂಪೂರ್ಣ್ Democratic ಕರುನ್ ಸೊಡ್ಲಾಂ. ಪಯ್ಲೆಂ ಸಂಪಾದಕಾಚ್ಯಾ ಕುರ್ಪೆನ್ ಆಮ್ಚೆಂ ಸಾಹಿತ್ಯ್ , ಆಮ್ಚೆ ಸಾಹಿತಿ ಜಿಯೆವ್ನ್ ಆಸ್ಲೆ. ಪುಣ್ ಆಜ್ ಪರಿಸ್ಥಿತಿ ತಶಿ ನಾ. ಆಮ್ಕಾಂ ಭಗ್ಲೆಂ ತೆಂ ಆಮಿ ಶೀದಾ ಸಾಮಾಜಿಕ್ ಮಾಧ್ಯಮಾಂನಿ ಪ್ರಚಾರ್ ಕರ್ಯೆತ್. ಪುಣ್ ಹಾಂತುಂ ಆಪಾಯ್ ಜಾಲ್ಯಾರೀ ಜಾಯ್ತೆ ಆಸ್ತಾತ್. ಸಭಾರ್ ಸಂಗ್ತ್ಯೊ ಆಪ್ಣೆ ಎಕ್ ಯಾಜಕ್ ಜಾವ್ನ್ ಸಾಂಗೊಂಕ್ ಜಾಯ್ನಾ ತಸಲ್ಯೊ ತ್ಯೊ ಹಾವೆಂ ಮ್ಹಜ್ಯಾ ಕಾಣಿಯಾಂನಿ ಆನಿ ಬರ್ಪಾಂನಿ ಪ್ರಸ್ತುತ್ ಕೆಲ್ಯಾತ್. ಸಾಹಿತ್ಯ್ ಆಮ್ಚ್ಯಾ ಜಿಣಿಯೆಕ್ ಜಾಲ್ಯಾರಿ ಮೊಸ್ತು Relief ದಿತಾ. ಸಾಹಿತ್ಯಾಕ್ ಮುಕಾರ್ ವರ್ಚಿ ಜವಾಬ್ಧಾರಿ ಆಮ್ಚ್ಯಾ ಭಿತರ್ ಆಸ್ಚ್ಯಾ Passion ಂತ್ ಆಸಾ.
Entertainement Culture ಲಾಗೊನ್ ಮನ್ಶ್ಯಾನ್ ವಾಚ್ಚೆಂ ರಾವಾಯ್ಲಾಂ ಆನಿ Reading Culture ಮಾಯಾಗ್ ಜಾಲಾಂ. ಹೆಂ ಬಾಶೆಕ್ Danger ನ್ಹಂಯ್ , ಸಂಸ್ಕ್ರತಿಕ್ danger ನ್ಹಂಯ್ ಬಗಾರ್ ಮನ್ಶ್ಯಾಚ್ಯಾ Existence ಕ್‌ಚ್ Danger , ಕಿತ್ಯಾಕ್ ಮ್ಹಳ್ಳ್ಯಾರ್ ಆಮ್ಚಿ ವಿಶ್ಲೇಶಣ್ ಸಕತ್ Zero ಜಾಲ್ಯಾ ಆನಿ ಹಾಕಾ ಕಾರಣ್ ಆಮಿಂ ವಾಚ್ಚೆಂ ರಾವಾಯ್ಲಾಂ. ಕೆದಾಳಾ ಪರ್ಯಾಂತ್ ಆಮಿಂ ಮನ್ಶ್ಯಾಚೆಂ ಉತರ್ ವಾಚ್ತಾಂವ್ ತೆದಾಳಾ ಮಾತ್ರ್ ದೆವಾಚೆಂ ಉತಾರ್ ಪರಿಣಾಮ್‌ಕಾರಿ ಜಾತಾ. ಹೆಂ ಕೊಂಕ್ಣೆಂತ್ ಮಾತ್ರ್ ನ್ಹಂಯ್ ಬಗಾರ್ ಸರ್ವ್ ಭಾಸಾಂಕ್ ಲಾಗು ಜಾತಾ. ಜೆವಾಣ್ ಜಾಲ್ಯಾರೀ ಸೊಡಾ , ವಾಚಾಪ್ ಸೊಡಿನಾಕಾತ್. ವಾಚಾಪ್ ಸೊಡ್‌ಲ್ಲ್ಯಾ ದಿಸಾ ಥಾವ್ನ್ ಆಮ್ಚೆಂ down fall trend ಸುರು ಜಾತಾ. ಆಮ್ಚೆಂ Attention Span ಉಣೆಂ ಜಾಲಾಂ ಕಿತ್ಯಾಕ್ ಮ್ಹಳ್ಳ್ಯಾರ್ ಸಿನೆಮಾ , ವಿಡಿಯೊ , ಯೂ ಟ್ಯೂಬ್ ಉಣೆಂ ಜಾವ್ನ್ Reels ಸಂಸ್ಕ್ರತಿ ಆಯ್ಲ್ಯಾ. ಆಶೆಂ Attention Span 7-8 ಸೆಕೆಂಡ್ಸಾಂಕ್ ದೆಂವ್ಲಾಂ ಆನಿ ಹಾಚೊ ಪರಿಣಾಮ್ ಜಾವ್ನ್ ಆಮ್ಚಿ ವಾಚ್ಪಾ ಸಕತ್ ಸಯ್ತ್ ದೆಂವ್ಲ್ಯಾ.
ಕೊಂಕ್ಣೆಚೆ ವಾಚ್ಪಿ ಚಡ್ ಉಣೆಂ 50 ವರ್ಸಾಂ ವ್ಹಯ್ಲೆ. ಯುವಜನಾಂಗಾಕ್ ಆಕರ್ಶಿತ್ ಕರುಂಕ್ ಆಮ್ಚಿಂ ಕೊಂಕ್ಣಿ ಮಾಧ್ಯಮಾಂ ಸಕೊಂಕ್ ನಾಂತ್. ಕಿತ್ಯಾಕ್ ಮ್ಹಳ್ಳ್ಯಾರ್ ಯುವಜಣಾಂಕ್ ಜಾಯ್ ಆಸ್‌ಲ್ಲೆಂ ವಾಚಪ್ ದೀಂವ್ಕ್ ಆಮ್ಚಿಂ ಪತ್ರಾಂ ಸಕೊಂಕ್ ನಾಂತ್. ಆಮ್ಚ್ಯಾ ಪತ್ರಾಂಚೆಂ ವಾಚ್ಪಾ ರೂಪ್ ವೇಳಾ ಕಾಳಾ ಪರ್ಮಾಣೆ ಬದ್ಲುಂಕ್ ಜಾಯ್. ಹಿ ಎಕ್‌ಚ್ ಪಾವ್ಟಿಂ ಜಾಂವ್ಚಿ ಪ್ರಕ್ರಿಯಾ ನ್ಹಂಯ್ ಬಗಾರ್ ಸವ್ಕಾಸಾಯೆನ್ ಬದ್ಲಾವಣೆ ಸಂಗಿಂ ಜಾಂವ್ಚಿ ಪ್ರಕ್ರಿಯಾ. ಬರಯ್ಣಾರಾಂನಿ ಖಂಯ್ಚ್ಯಾಂತ್ ಆಪುಣ್ ಪ್ರವೀಣ್ ಆಸಾತ್ ತಾಂತುಂ ಮಾತ್ರ್ ಬರಯ್ಜೆ ಶಿವಾಯ್ ಸಗ್ಳ್ಯಾಂತೀ ಮಾತೆಂ ಘಾಲುಂಕ್ ಪ್ರಯತ್ನ್ ಕರ್ಚೆಂ ನ್ಹಂಯ್. ಅಶೆಂ ಕೆಲ್ಯಾರ್ ತಸಲ್ಯಾಂಚೆಂ ಬರಪ್ ಧ್ರಡಿಕ್ರತ್ ಜಾತಾ. ತರ್ನೆ ಬರವ್ಪಿ ಉಣೆ ಜಾಲ್ಯಾತ್. ಕಿತ್ಯಾಕ್ ಮ್ಹಳ್ಳ್ಯಾರ್ ಆಮ್ಚೆಂ ಸಾಹಿತ್ಯ್ ಸರ್ವ್ ಲೇಖಕಾಂನಿ Hobby ಜಾವ್ನ್ ಘೆತ್ಲಾಂ ಶಿವಾಯ್ Profession ಜಾವ್ನ್ ಘೆಂವ್ಕ್ ನಾ. Profession ಜಾವ್ನ್ ಘೆತ್ಲ್ಯಾರೀ ಬರೆಂ ಜಿವಿತ್ ಜಿಯೆಂವ್ಕ್ ಪ್ರತಿಫಳ್ ಮೆಳಾನಾ.
ಮಂಗ್ಳುರಾಂತ್ ಸಾಹಿತ್ಯ್ ವಿಶಿಂ ಉಲಾಯ್ತಾನಾ ಖುಶೆಚಿ ಖೊಬರ್ ಕಿತೆಂಗೀ ಮುಳ್ಳ್ಯಾರ್ ಕವಿತಾ ಶೆತ್ ಪರ್ಜಳೊನ್ ಆಸಾ. ಪುಣ್ ಹೆ ಹೆರ್ ಪ್ರಕಾರಾಂನಿ ದಿಸೊನ್ ಯೆನಾಂ. ಆಶೆಂ ಕೆಲ್ಯಾರ್ ಕಾಂಯ್ ಕೊಂಕ್ಣೆಚಿ ಪರಿಗತ್ ಆನಿಕೀ ಬರಿ ಜಾತಿ ಕೊಣ್ಣಾ. ಆಜ್ ಕೊಂಕ್ಣಿ ಶಿಕಾಪ್ , ಕೊಂಕ್ಣಿ ಡಿಪ್ಲೊಮಾ ಫಕತ್ ಮಾರ್ಕ್ಸ್ ಕಾಡುಂಕ್ ಮಾತ್ರ್ ಸೀಮಿತ್ ಜಾವ್ನ್ ಗೆಲ್ಯಾತ್. ತಾಚೆ ಉಪ್ರಾಂತ್ ತ್ಯಾ ಶೆತಾಂತ್ ಕೊಣೀ ಮುಕಾರ್ ವಚಾನಾ , ಕಿತ್ಯಾಕ್ ಮ್ಹಳ್ಳ್ಯಾರ್ ಆರ್ಥಿಕ್ ಪ್ರತಿಫಳ್ ಕೊಂಕ್ಣಿ ಸಮಾಜೆ ಥಾವ್ನ್ ಮೆಳಾನಾ.
ಆಮಿಂ ಕಿತೆಂ ಬರಯ್ತಾಂವ್ ತೆಂ ಪರ್ತುನ್ ತಜ್ವೀಜ್ ಕರ್ನ್ ಆಮಿಂಚ್ಚ್ ವಾಚ್ಚೆಂ ವಾ Check ಕರ್ಚೆಂ ಭೋವ್ ಗರ್ಜೆಚೆಂ. ಸಾಂಗಾತಾಚ್ಚ್ ವಿಮರ್ಶ್ಯಾಂಕ್ ಮಾನುನ್ ಘೆಂವ್ಚೆಂ ಆವಶ್ಯ್ ಜಾವ್ನಾಸಾ. ಹರ್ಯೆಕ್ ಸಾಹಿತ್ಯಾಚ್ಯಾ ವಾಡಾವಳಿಂತ್ ವಿಮರ್ಸೊ ಮಹತ್ತರ್ ಪಾತ್ರ್ ಖೆಳ್ತಾ.
ಲೇಖಕಾಂನಿ ಸದಾಂಚ್ ಉಗ್ಡಾಸ್ ದವರಿಜೆ ಕಿ ಆಪ್ಲೆಂ ಬರಪ್ ಪಾಯ್ಸ್ ಜಾಲ್ಲ್ಯಾ ಉಪ್ರಾಂತ್ ತೆಂ ತಾಚೆಂ ಜಾವ್ನ್ ಉರಾನಾ. ತೆಂ ಸರ್ವಜನಿಕ್ ಜಾತಾ. ತೆಂ ವಾಚ್ಪ್ಯಾಚ್ಯಾ ಆಲೋಚನೆಂಚೆಂ ಭಂಡಾರ್ ಜಾತಾ. ಆನಿ ಹೆಂ ಲೇಖಕಾಂನಿ ಮಾನುನ್ ಘೆಂವ್ಕ್ ಜಾಯ್.
ಮಾ. ಬಾ. ಚೇತನ್ ಲೋಬೊ ಪ್ರಿಂಟಿಂಗ್ ಕ್ಷೇತ್ರಾಂತ್ ಆಸ್ಚ್ಯಾ ಕಷ್ಟಾಂ ವಿಶಿಂ ಸಯ್ತ್ ವಿಸ್ತಾರ್ ರಿತಿನ್ ಉಲಯ್ಲೊ. ಆಮ್ಚಿಂ ಪ್ರಕಾಶನಾಂ , ಆಮ್ಚಿಂ ಫಿರ್ಗಜ್ ಪತ್ರಾಂ ಸಾರ್ಕೆ ಪೋಷಕ್ ನಾಸ್ತಾನಾ , ಸಾರ್ಕೊ ಪ್ರಚಾರ್ ನಾಚ್ತಾನಾ , ಸಾರ್ಕೆಂ Marketing ನಾಸ್ತಾನಾ ಕಶಿಂ ಆಡ್ಚತಾತ್ ತೆಂ ಉದಾಹರಣಾಂ ಸಮೇತ್ ವಿವರ್ಸಿಲೆಂ. ಆಶೆಂ ಮಾ. ಬಾ. ಚೇತನ್ ಲೋಬೊ ಹರ್ಯೆಕ್ ಸಂಗ್ತಿಂನಿ ಭೊವ್ ವಿಸ್ತಾರ್ ರಿತಿನ್ ಉಲೊವ್ನ್ ತಾಕಾ ಜಾಯ್ ಜಾಲ್ಲ್ಯಾ ಪೂರಕ್ ಉದಾಹರಣಾಂ ಮುಖಾಂತ್ರ್ ಹಾಜರ್ ಆಸ್‌ಲ್ಲ್ಯಾಂಕ್ ಸಮ್ಜಾ ಸಾರ್ಕೆಂ ಸರಳ್ ರಿತಿನ್ ಉಲಯ್ಲೊ.
ಆಪ್ಲ್ಯಾ ಉಲೊವ್ಪಾ ಉಪ್ರಾಂತ್ ಹಾಜರ್ ಆಸ್ಲೆಲ್ಯಾಂಚ್ಯಾ ಸಾಹಿತ್ಯಾಕ್ ಸಂಬಂದಿತ್ ಸವಾಲಾಂಕ್ ಜೊಕ್ತಿ ಜಾಪ್ ದೀವ್ನ್ ತಾಂಚೆ ಥಂಯ್ ಆಸ್ಲೆಲ್ಯಾ ದುಬಾವಾಂಕ್ ಜೊಕ್ತೊ ಪರಿಹಾರ್ ದಿಲೊ.
ಮಾ. ಬಾ. ಚೇತನ್ ಲೋಬೊ ಹಾಕಾ ಯಾದಿಸ್ತಿಕಾ ಆನಿ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮ್ಹಾನ್ ಕೆಲೊ. ದಾಯ್ಜಿ ದುಬಾಯ್ ಸಂಸ್ಥ್ಯಾಚೆ ಪೋಷಕ್ ತಶೆಂಚ್ ಆಭಿಮಾನಿ ಶ್ರೀ ಜೇಮ್ಸ್ ಮೆಂಡೊನ್ಸಾ ಆನಿ ಶ್ರೀ ಜೊಸೆಫ್ ಮಥಾಯಸ್ ಮಾನ್ ಕರುಂಕ್ ವೇದಿರ್ ಹಾಜರ್ ಆಸ್ಲೆ. ದಾಯ್ಜಿ ದುಬಾಯ್ ಸಂಸ್ಥಾಪಕ್ ಶ್ರೀ ಡಯಾನ್ ಡಿ’ಸೋಜಾ ಮುಕಾಮರ್ ಹಾಣೆ ದಿನ್ವಾಸ್ ಪಾಟಯ್ಲೆ. ಮಾ. ಬಾ. ಚೇತನ್ ಲೋಬೊ ಹಾಚೊ ಉಗ್ದಾಸ್ ಪರತ್ ಕಾಡುನ್ ತಾಣಿಂ ದಾಯ್ಜಿ ದುಬಾಯ್ ಸಂಘಟನಾಚ್ಯಾ ಸಾಹಿತಿಕ್ ಸಂಬಂದಿತ್ ವಾವ್ರಾಂತ್ ದಿಲ್ಲ್ಯಾ ಸರ್ವ್ ಸಹಕಾರಾಂಕ್ ಉಪ್ಕಾರ್ ಆಟಯ್ಲೊ.
ದಾಯ್ಜಿ ಸಾಂದೊ ಆನಿಲ್ ಪಿಂಟೊ ಕುಲ್ಶೇಕರ್ ಹಾಣೆ ಆರ್ಥಾಭರಿತ್ ರಿತಿನ್ ಕಾರ್ಯೆಂ ಚಲೊವ್ನ್ ವೆಲೆಂ.
■ ವರ್ದಿ / ತಸ್ವಿರ‍್ಯೊ : ನಾನು ಮರೋಲ್ ತೊಟ್ಟಮ್
