ಮಾಂಡ್ ಸೊಭಾಣ್ ಪ್ರಸ್ತುತ್ ಕೊಂಕ್ಣಿ ಚಲ್‍ಚಿತ್ರ್/ಪಿಂತುರ್ ಆಮ್ಚ್ಯಾ ಧಾಕ್ಟುಲ್ಯಾ ಕೊಂಕ್ಣಿ ಸಂಸಾರಾಂತ್ ನಿಜಾಕಿ ಏಕ್ ನವಲ್. ಮಹಾರಾಷ್ಟ್ರಾಚ್ಯಾ ರತ್ನಾಗಿರಿ ಥಾವ್ನ್ ಕೇರಳಾಚ್ಯಾ ಕೊಚ್ಚಿ ಪರ್ಯಾಂತ್ ಶಿಂಪಡ್ಲಲ್ಯಾ ವಿವಿಂಗಡ್ ಕೊಂಕ್ಣಿ ಲೊಕಾಂಕ್ ಎಕಾಚ್ ಪಿಂತುರಾಂತ್ ಹಾಡ್ಲಲ್ಲ್ಯಾ ಬಾಬ್ ಎರಿಕ್ ಓಝೆರಾಕ್ ಆನಿ ಮಾಂಡ್ ಸೊಭಾಣ್ ಪಂಗ್ಡಾಕ್ ಹೊಗ್ಳಿಕ್ ಫಾವೊ. ಕೊಂಕ್ಣಿ ಉಲೊವ್ಪಿ ಸಿದ್ದಿ, ಖಾರ್ವಿ, ಕುಣ್ಬಿ, ನವಾಯ್ತ್ (ನಾಯ್ತೆ) ಆನಿ ತಾಂಚಿ ಸಂಸ್ಕೃತಾಯ್ ಭೊವ್ ಬರ್‍ಯೆ ರಿತಿನ್ ಹ್ಯಾ ಚಲ್‍ಚಿತ್ರಾಂತ್/ಪಿಂತುರಾಂತ್ ಪ್ರದರ್ಶಿತ್ ಕೆಲ್ಯಾ. ಹೆಂ ಪಿಂತುರ್ “ಕೊಂಕ್ಣಿ ಅಸ್ಮಿತಾಯೆಚ್ಯಾ ಸೊದ್ನೆರ್ ಆಸಾ” ಮ್ಹಣ್ತಾನಾ ಹಾಂಗಾ ಕೊಣಾಚಿ ಅಸ್ಮಿತಾಯ್ ದಾಕಯ್ಲ್ಯಾ ಮ್ಹಳ್ಳೆಂ ಸವಾಲ್ ಉದೆತಾ. ಕಾರಣ್ ಹ್ಯಾ ಪಿಂತುರಾಂತ್ ಚಡಾವತ್ ಕೆನರಾಚ್ಯಾ ಕೊಂಕ್ಣಿ ಕ್ರಿಸ್ತಾಂವಾಂ ವಿಶಿಂ ದೆಕಾವೆ (scenes) ಆಸಾತ್. ತಶೆಂಚ್ ಬಾಲ್ತು ಪೈ, ಆಲ್ಬುಕೆರ್ಕ್ ಪೈ, ಪೆರೆಸ್ ಭಟ್ ಹಿಂ ದೊಂಡ್ತಿಂ ಆಲ್ಕುಂಜಾಂ, ಕ್ರಿಸ್ತಾಂವಾಂ ಮದೆಂ ಆಸ್ಚ್ಯೆ ವಯ್ಲ್ಯೆ ಜಾತಿಚ್ಯಾ ಲೊಕಾಂಚಿ ಕಥಾ ಆನಿ ವ್ಯಥಾ ಮ್ಹಣ್ ಭೊಗ್ತಾ. ತಾಚ್ಯೆ ವಯ್ಲ್ಯಾನ್ ಕೊಂಕ್ಣಿ ಲೋಕ್, ತಾಂಚಿ ಭಾಸ್ ಆನಿ ರಿತಿ-ರಿವಾಜಿ ಸರಸ್ವತಿ ನ್ಹಂಯ್ ತಡಿ ಥಾವ್ನ್ ಉಬ್ಜಲ್ಯಾತ್ ಮ್ಹಣ್ ದಾಕಯ್ಲಾಂ. ಪೂಣ್ ವಿಜ್ಞಾನಿಕ್, ಅನುವಂಶಿಕ್ (genetic), ಭಾಸಾಶಾಸ್ತ್ರಿಕ್ (linguistic) ಆನಿ ತಸಲೆಂಚ್ ಹೆರ್ ರಿತಿಚೆಂ ಸಂಶೋಧನ್ ಆತಾಂ ಜಾಲ್ಲೆಂ ಆಸ್ತಾಂ ಆಮ್ಕಾಂ ಏಕ್ ವೆಗ್ಳೆಂಚ್ ಚಿಂತ್ರಣ್ ದಿತಾ.
ಹ್ಯಾ ಪಿಂತುರಾಂತ್ ಆಸ್ಲಲೆ ಥೊಡೆ ದೆಕಾವೆ ಆಮ್ಕಾಂ ಏಕ್ ಚೂಕ್ ಸಮ್ಜಣಿ ದಿಂವ್ಕ್ ಸಕ್ತಾತ್. ಕೊಂಕ್ಣಿ ಕಾತೊಲಿಕಾಂ ಮದೆಂ ಆಪ್ಣಾಂಕ್ ಬಾಮಣ್ ಆನಿ ಚಾರೊಡಿ (ಚಾರ್ಡೆ) ಮ್ಹಣ್ ಲೆಕ್ತಾಲೆ ಜಾಯ್ತೆ ಆಸಾತ್ ಆನಿ ಆಪ್ಣಾಚೊ ಸಂಬಂದ್ ಕೊಂಕ್ಣಿ ಸಾರಸ್ವತಾಂ ಕಡೆ ಆಸಾ ಮ್ಹಣ್ ತಿ ಸದಾಂಚ್ ಪಾಚಾರ್‍ತಾತ್. ಹೆಂ ದಾಕೊಂವ್ಚ್ಯಾಕ್ “ಭಾಯ್ಲೆ ಆಯ್ಲೆ, ಧರ್ಮಾಂತರಾಂ ಜಾಲಿಂ, ಭುಂಯ್-ಭಾಟ್ ನಶ್ಟ್ ಜಾಲೆ, ಆಮ್ಚೊ ಲೋಕ್ ಪಳ್ಳೊ” ಮ್ಹಳ್ಳೆಂ ಸೂತ್ರ್ ಆದಿಂ ಥಾವ್ನ್ ತಾಂಚ್ಯೆ ಮದೆಂ ಘೊಳ್ತಾ. ಹ್ಯಾ ಪಿಂತುರಾಂತ್‍ಯಿ ತೆಂಚ್ ಚಿತ್ರಾಯ್ಲಾಂ. ಪಿಯುಸ್ ಫಿಡೆಲಿಸ್ ಪಿಂಟೊ, ಕ್ರಾಂತಿ ಫರ್ಯಾಸ್, ವಿ. ಕೆ. ಕುಡ್ವಾ ತಸಲ್ಯಾ ಇತಿಹಾಸ್ಕಾರಾಂನಿ ಸಯ್ತ್ ಕೊಂಕ್ಣಿ ಲೊಕಾಂಚೊ ಇತಿಹಾಸ್ ಬರೊಂವ್ಕ್ ಹೆಂಚ್ ಸೂತ್ರ್ ಪಾಳ್ಳಾಂ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ಗೊಂಯ್ಚ್ಯಾ ಇಂಕ್ವಿಜಿಸಾಂವಾಕ್ ಲಾಗುನ್ ಲೋಕ್ ಪಳ್ಳೊ (ನಿರ್ಗಮನ್) ಆನಿ ಮಾಗಿರ್ ಟಿಪ್ಪುಚ್ಯಾ ಹಾತಾ ಖಾಲ್ ಪರ್ತುನ್ (ಬಂಡದ್) ಶಿರ್ಕಲೊ ಮ್ಹಳ್ಳಿಂ ತಾಂಚಿ ಪಾತ್ಯೆಣಿ. ಕೊಂಕ್ಣಿ ಲೊಕಾಂಚೊ ಇತಿಹಾಸ್ ಸಂಕೀರ್ಣ್. ಧರ್ಮಾಂತರಾಂಕ್ (religious conversion) ಲಾಗುನ್ ಸಗ್ಳೆ ಕಶ್ಟ್ ನಶ್ಟ್ ಸೊಸ್ಚೆ ಪಡ್ಲೆ ಮ್ಹಳ್ಳ್ಯೊ ಕಾಣಿಯೊ ಆಮ್ಕಾಂ ಆತಾಂ ಉಪ್ಕಾರ‍ಾಕ್ ಪಡ್ಚ್ಯೊ ನಾಂತ್. ಹ್ಯಾ ಆಧುನಿಕ್ ಕಾಳಾರ್ ಆಮ್ಕಾಂ ದಾಕ್ಲೆ ಜಾಯ್, ಪುರಾವೆ ಜಾಯ್. ಆಸ್ಲಲೆ ದಾಕ್ಲೆ ಪಳೆತಾನಾ ವಯ್ಲ್ಯೆ ಜಾತಿಚ್ಯಾ ಲೊಕಾಂನಿ, ಹಿಂದು ತಶೆಂಚ್ ಕ್ರಿಸ್ತಾಂವಾಂನಿ, ಫ್ರಿಂಗ್ಯಾಂಕ್ ಆಪ್ಲೊ ಆಧಾರ್ ದಿವ್ನ್ ವೆಪಾರಾಂತ್ ಅವ್ವಲ್ ಸ್ಥಾನ್ ಜೊಡ್ಲೆಂ ಮ್ಹಳ್ಳೆಂ ಆಮ್ಕಾಂ ಸ್ಪಶ್ಟ್ ಜಾತಾ.
ತರ್ ಹ್ಯಾ ಪಿಂತುರಾಂತ್ ಕಿತೆಂ ಚುಕ್ಲಾಂ ವಾ ಕಿತೆಂ ಚುಕಯ್ಲಾಂ? ಗೊಂಯ್ಚ್ಯಾ ಫಾಮಾದ್ ಇತಿಹಾಸ್ಕಾರ್ ಪಾಂಡುರಂಗ್ ಪಿಸುರ್ಲೆಂಕಾರಾನ್ ಬರಯ್ಲಲಿಂ ದೋನ್ ಪುಸ್ತಕಾಂ – “Portuguese Marhatta relations” ಆನಿ “Agentes da Diplomacia Portuguesa Na India – Hindus, Muculmanos, Judeus E Parses” ಗೊಂಯ್ಚ್ಯಾ ಕೊಂಕ್ಣಿ ಲೊಕಾಂಚ್ಯಾ ಜಿವಿತಾಂತ್ಲಿಂ ಮುಖೆಲ್ ಘಡಿತಾಂ ದಾಕಲ್ ಕರ‍್ತಾತ್. ತಶೆಂಚ್ ಉರ್ಮಿಳಾ ಪಾಟಿಲಾಚೆಂ ಸಾರಸ್ವತಾಂಚೆರ್ ಲಿಕ್ಲಲೊ ಪ್ರಬಂದ್, ಪರಾಗ್ ಪರ್ಬೊಚೊ ಪ್ರಬಂದ್, ಜಾಂತುಂ ತಾಣೆಂ ಗೊಂಯಾಂತ್ ಆಸ್ಲಲ್ಯಾ ಜಾತಿಂಚೆಂ ಘರ್ಶಣ್ ಪುರಾವೆ ಸಯ್ತ್ ದಿಲಾಂ ಆನಿ ಎಲನ್ ಮಚಾಡೊಚಿಂ Goa’s Inquisition: Facts, fiction, factoids ಆನಿ Slaves of Sultans ಹಿಂ ದೋನ್ ಪುಸ್ತಕಾಂ ಕೊಂಕ್ಣಿ ಲೊಕಾಂಚೊ ಇತಿಹಾಸ್ ಜಾಣಾ ಜಾಂವ್ಕ್ ಕಾಂಯ್ ವೆಂಚಿಕ್ ದಾಕ್ಲೆ ದಿತಾತ್. ಪುರ್ತುಗೆಜ್ ಗೊಂಯಾಂತ್ ಯೆಂವ್ಕ್ ನಾಂತ್, ತಾಂಕಾಂ ಕೊಚ್ಚಿ ಥಾವ್ನ್ ಗೊಂಯಾಂತ್ ವೆರ್ಣೆಚ್ಯಾ ಮ್ಹಾಲ್ ಪೈ ಆನಿ ಹೊನ್ನಾವರಾಂತ್ ಆಸ್ಲಲ್ಯಾ ತಿಮೋಯ್ಯ ನಾಯಕಾನ್ ಆಪಯ್ಲಲೆ. ತ್ಯಾ ಸಮಾಜಾಚೊ ಲೋಕ್ ಸದಾಂಚ್ ಪುರ್ತುಗೆಜಾಂಚ್ಯಾ ಸಾಂಗಾತಾ ಆಸ್ಲೊ. ತಾಂಚ್ಯೆ ಮದ್ಲ್ಯಾ ಎಕ್ಲ್ಯಾಕ್ ಫ್ರಿಂಗ್ಯಾಂನಿ 1540 ವರ್ಸಾ, ಕೃಷ್ಣ ಶಣೈಕ್ ಸರ್ದಾರ್ಕಿ (knighthood) ಪದ್ವಿ ದಿಲಿ. ತ್ಯಾ ಕಾಳಾರ್ ಬಾಮಣ್ ಸಮಾಜಾಚೊ ಲೋಕ್ ಪುರ್ತುಗೆಜ್ ಆಡಳ್ತೆ ಖಾಲ್ ತಾಂಚೆ ಭಾಶಾಂತರ್ ಕರ‍್ಪಿ, ಸುಂಕಾಗಾರ್, ರಾಜ್‍ನಾಯಿಕ್, ರಾಜ್‍ಕಾರ್ಬಾರಿ, ಸೇನಾಪತಿ ಜಾವ್ನ್ ಆಪ್ಲಿ ಸೆವಾ ದಿವ್ನ್ ಆಸ್ಲೊ ಮ್ಹಳ್ಳೆ ಸಬಾರ್ ದಾಕ್ಲೆ ಆಸಾತ್. 80% ಸುಂಕ್ ತೆ ಪುರ್ತುಗೆಜಾಂ ಖಾತಿರ್ ವಸುಲ್ ಕರ್ತಾಲೆ. ಇಂಕ್ವಿಜಿಸಾಂವ್ ರಾವ್ಳೆರಾಂತ್ ತರ್ ತೆ ಕುಡಾಂ ಭಾಡ್ಯಾಕ್ ದಿವ್ನ್ ಪಯ್ಶೆ ವಸುಲ್ ಕರ್ತಾಲೆ. ಅಸಲ್ಯೆ ಪರಿಸ್ಥಿತಿಂತ್ ಅಸ್ಮಿತಾಯ್ ಚಲ್‍ಚಿತ್ರಾಂತ್ ತ್ಯಾಚ್ ಸಮಾಜಾಚ್ಯಾ ಲಕ್ಷ್ಮಣ್ ಶಿರೋಡಿ ಪೈಕ್ ಲಾಸುನ್ ಜಿವೆಶಿಂ ಮಾರ‍್ಚೆಂ ಇತಿಹಾಸಿಕ್ ನದ್ರೆನ್ ಕಿತ್ಲೆಂ ಸಾರ್ಕೆಂ? ಎಲನ್ ಮಚಾಡೊಚ್ಯಾ ದಾಕ್ಲ್ಯಾ ಪರ್ಮಾಣೆಂ 12,000 ಕೆಶಿ ಇಂಕ್ವಿಜಿಸಾಂವಾ ವೆಳಾರ್ ದಾಕಲ್ ಜಾಲ್ಯಾತ್. ತಾಂತುಂ ಏಕ್‍ಯಿ ಹಿಂದು ಮನ್ಶಾಕ್ ಲಾಸುನ್ ಉಡಯ್ಲ್ಯೆ ವಿಶಿಂ ದಾಕ್ಲೊ ನಾ. ಜಾಂವ್ಕ್.ಯಿ ಸಾಧ್ಯ್ ನಾ. ಕಾರಣ್ ಇಂಕ್ವಿಜಿಸಾಂವ್ ಫಕತ್ ಕ್ರಿಸ್ತಾಂವಾಂಕ್ ಮಾತ್ರ್ ಲಾಗು ಜಾತಾಲೆಂ.
ಇಂಕ್ವಿಜಿಸಾಂವಾಕ್ ಲಾಗುನ್ ಧರ್ಮಾಂತರಾಂ ಜಾತಾಲಿಂ ಆನಿ ಧರ್ಮಾಂತರಾಂಕ್ ಲಾಗುನ್ ಲೋಕ್ ಪಳ್ನ್ ಗೆಲೊ ಮ್ಹಳ್ಳೆಂ ಹ್ಯಾ ಪಿಂತುರಾಂತ್ ದಾಕಯ್ಲಾಂ. ಎಲನಾಚ್ಯಾ ಪುಸ್ತಕಾಂತ್, ಆಯ್ಲೆವಾರ್ ಮೆಳ್ಳಲ್ಯಾ ದಾಕ್ಲ್ಯಾಂಚ್ಯಾ ಆಧಾರಾನ್ ಇಂಕ್ವಿಜಿಸಾಂವ್ ಕಿತೆಂ ಆನಿ ಕೊಣಾ ಖಾತಿರ್ ಮ್ಹಳ್ಳೆಂ ಸ್ಪಶ್ಟ್ ಸಾಂಗ್ಲಾಂ. ಧರ್ಮಾಂತರಾಂಚೊ ಆನಿ ಇಂಕ್ವಿಜಿಸಾಂವಾಚೊ ಕಸಲೊಚ್ ಸಂಬಂದ್ ಹಾಂಗಾ ದಿಸನಾ. ಕ್ರಿಸ್ತಾಂವ್ ಧರ್ಮ್ ಆಪ್ಣಾಯ್ಲಲ್ಯಾ ಲೊಕಾನ್ ತೊ ಧರ್ಮ್ ಸೊಡ್ಚೊ ನ್ಹಯ್ ಆನಿ ಅಕ್ರಿಸ್ತಿ ರಿತಿ-ರಿವಾಜಿ ಥಾವ್ನ್ ಪಯ್ಸ್ ರಾಂವ್ಚ್ಯೆ ಖಾತಿರ್ ಇಂಕ್ವಿಜಿಸಾಂವ್ ಸ್ಥಾಪ್ಲಲೆಂ. ಗುನ್ಯಾಂವ್ಕಾರಾಂಕ್ ಮೆಳ್ಚಿ ಶಿಕ್ಷಾ ಸಯ್ತ್ ಅಧ್ಯಾತ್ಮಿಕ್ ರಿತಿಚಿ ಆಸ್ಲಿ. 1650-1806 ವರ್ಸಾ ಮದ್ಗತ್ 8,250 ಮನ್ಶಾಂಕ್ ಇಂಕ್ವಿಜಿಸಾಂವ್ ಅಧಿಕಾರಿಂನಿ ಧರ್‍ಲೆಂ. ಪೂಣ್ ತಾಂತು ಫಕತ್ 94 ಜಣಾಂಕ್ ಮರ‍್ಣಾಚೆಂ ಫರ್ಮಾಣ್ ಲಾಬ್ಲೆಂ. ಅಶೆಂ ಆಸ್ತಾನಾ ಇಂಕ್ವಿಜಿಸಾಂವ್ ಖರೆಂಚ್ “ಮಾರೆಕಾರ್”? ಮ್ಹಳ್ಳೆಂ ದುಸ್ರೆಂ ಸವಾಲ್ ಉದೆತಾ.
ಪುರ್ತುಗೆಜ್ ಕಾಳಾರ್ ಫಕತ್ ಧರ್ಮಾಂತರಾಂ ಜಾತಾಲಿಂ ಆನಿ ತೆಂಯ್ ಬಳಾನ್, ಮ್ಹಳ್ಳೊ ವಾದ್ ಪಾರ್ಕುಂಕ್ ಜಾಯ್. ಹೆಂ ಸಮ್ಜುಂಕ್ ಗೊಂಯಾಂತ್ ಘಡ್ಲಲಿಂ ಕಾಂಯ್ ಇತಿಹಾಸಿಕ್ ಘಡಿತಾಂ ಆಮಿ ಪಳೆಂವ್ಚಿಂ ಪಡ್ತಲಿಂ. ಪುರ್ತುಗೆಜಾಂನಿ ಪಯ್ಲೆಂ ಗೊಂಯ್ ಶಾರ್ (ಆತಾಂಚೆಂ ಓಲ್ಡ್ ಗೊವಾ) ಆನಿ ಮಾಗಿರ್ ಶೆಜಾರ್‍ಚೆ ಜುಂವೆಂ/ ಕುದ್ರೆ ಕಾಬಿಜ್ ಕೆಲೆ. ಉಪ್ರಾಂತ್ ಅಟ್ರಾವ್ಯಾ ಶೆಕ್ಡ್ಯಾಚ್ಯಾ ದುಸ್ರ್ಯಾ ಅರ್ದಾಂತ್ ಖೇಮ್‍ಸಾವಂತಾಚ್ಯಾ ಹಾತಾ ಖಾಲ್ ಆಸ್ಲೆ ಗಾಂವ್ (1783 ವರ್ಸಾ) ಆನಿ ದಕ್ಷಿಣೆಕ್ ಸೊಂಡೆಕಾರ್ ರಾಯಾಚ್ಯಾ ಹಾತಾ ಖಾಲ್ ಆಸ್ಲಲೆ ಗಾಂವ್ (1788 ವರ್ಸಾ) ಪುರ್ತುಗೆಜಾಂಕ್ ಮೆಳ್ಳೆ. ಹಾಂಗಾ ವಿಚಿತ್ರ್ ಮ್ಹಳ್ಯಾರ್, ತಾಣಿಂಚ್ ಹೆ ಜಾಗೆ ಪುರ್ತುಗೆಜಾಂಕ್ ದಿಲ್ಲೆ. ಸೊಂಡೆಕಾರ್ ರಾಯಾಚ್ಯಾ ವಂಶಾಕ್ ಪುರ್ತುಗೆಜಾಂಚೆಂ ವಿಶೇಸ್ ರಕ್ಷಣ್ ಮೆಳ್ಳೆಂ ಆನಿ ತಾಚಿ ಪಿಳ್ಗಿ ಗೊಂಯಾಂತ್‍ಚ್ ಉರ‍್ಲಿ. ಹಾಕಾ ಧಾರ್ಮಿಕ್ ಅತ್ಯಾಚಾರ್ ಮ್ಹಣ್ಚೆಂ ವ್ಹಯ್? ಕಾರಣ್ ಇಂಕ್ವಿಜಿಸಾಂವಾಚ್ಯಾ ಕಾಳಾರ್ (1560-1812 ವರ್ಸಾ) ಹೆಂ ಜಾಲೆಂ ಆನಿ ದೋಗ್‍ಯಿ ರಾಯ್ ಹಿಂದು. ಹಿಂದ್ವಾಂಚೆ ದೇವಸ್ಥಾನಾಚೆ ಕಾಯ್ದೆ “Regulamento das Mazanias”, ಪುರ್ತುಗೆಜಾಂಚ್ಯಾ ಆಧಾರಾನ್‍ಚ್ ವಯ್ಲ್ಯೆ ಜಾತಿಚ್ಯಾ ಬಾಮ್ಣಾಂನಿ ಬರೊವ್ನ್ ತೆ ಥಂಯ್ಚೆ ಮಹಾಜನ್ ಜಾಲೆ. ಪುರ್ತುಗೆಜ್ ಆನಿ ವಯ್ಲ್ಯೆ ಜಾತಿಚ್ಯಾ ಲೊಕಾಂಚಿ ಕಿತ್ಲಿ ಸಳಾವಳ್ ಆಸ್ಲಿ ತೆಂ ಆಮ್ಕಾಂ ಹಾಂಗಾ ದಿಸ್ತಾ. ಏಕ್ ಮಾತ್ರ್ ಖರೆಂ, ಪುರ್ತುಗೆಜಾಂಕ್ ಲಾಗುನ್ ಗೊಂಯಾಂತ್ ಜಾಯ್ತಿ ಬದ್ಲಾವಣ್ ಜಾಲಿ. ಗಾಂವಾಂನಿ ದಿವ್ಳಾಂ ವರ್ವಿಂ ಜೊ ಆದಾಯ್ ಮೆಳ್ತಾಲೊ ತೊ ಆತಾಂ ಬಂದ್ ಜಾಲೊ, ಬಾಮಣ್/ಪುರ್ವಿತ್ ವೆಪಾರಾಂತ್ ರಿಗ್ಲೆ. ಲೋಕ್ ಖಾಣಾಂತ್ ಫ್ರಿಂಗ್ಯಾಂನಿ ಹಾಡ್ಲಲೆ ಬಟಾಟೆ, ತೊಮಾಟೆ, ಮಿರ್ಸಾಂಗೊ ವಾಪ್ರುಂಕ್ ಲಾಗ್ಲೊ, ನ್ಹೆಸ್ಣಾಂತ್ ಪ್ಯೆಂಟ್ ಶರ್ಕ್ ಘಾಲುಂಕ್ ಲಾಗ್ಲೊ, ಮೆಜಾಂ ಆನಿ ಬಸುಂಕ್ ಕದೆಲಾಂ ವಾಪ್ರುಂಕ್ ಲಾಗ್ಲೊ. ಹಿ ಬದ್ಲಾವಣ್ ಬರಿ ವಾ ವಾಯ್ಟ್? ಕ್ರಿಸ್ತಾಂವಾಂನಿ ಫ್ರಿಂಗ್ಯಾಂಚೊ ಧರ್ಮ್ ಆಪ್ಣಾಯ್ಲೊ, ಪೂಣ್ ಜಾತಿ ವೆವಸ್ಥಾ ಸೊಡುಂಕ್ ನಾ.
ವೆಗಿಂಚ್ ಇಂಕ್ವಿಜಿಸಾಂವಾ ವಿಶಿಂ ಏಕ್ database ತಯಾರ್ ಜಾಂವ್ಚೊ ಆಸಾ. ಇಂಕ್ವಿಜಿಸಾಂವಾ ವಿಶಿಂ ಆಸ್ಲೊ ಗಯ್ರ್-ಸಮಜ್ ಪಯ್ಸ್ ಕರುಂಕ್ ಹೆಂ ಜರುರ್ ಉಪ್ಕಾರ‍್ತಲೆಂ. ದಾಕ್ಲ್ಯಾಂ ಪರ್ಮಾಣೆಂ ಇಂಕ್ವಿಜಿಸಾಂವಾಕ್ ಆನಿ ಕೊಂಕ್ಣಿ ಲೊಕಾಂಚೆಂ ಕೆನರಾ ವಠಾರಾಂತ್ ದೆಂವುಂಕ್ ಕಸಲೊಚ್ ಸಂಬಂದ್ ನಾ. ಕಾರಣ್ ಚಡಾಂತ್ ಚಡ್ ಗೊಂಯ್ಚೊ ಲೋಕ್ 1684-1739 ವರ್ಸಾ ಕೆನರಾ ಪಾವ್ಲೊ. ಪೂಣ್ ತ್ಯಾ ಕಾಳಾರ್ ಇಂಕ್ವಿಜಿಸಾಂವಾಚಿ ನದರ್ ಮುಂಬಯ್ ವಠಾರಾಚೆರ್ (Provincia do Norte) ಆಸ್ಲಿ, ಜೆಂ ಆಮ್ಕಾಂ ದಾಕ್ಲೆ ಪಳೆತಾನಾ ರುಜಿ ಜಾತಾ. ಸ್ಥಳಾಂತರಾಂ ಚಡ್ ಕರುನ್ ಬಾರ್ದೆಸಾಂತ್ಲ್ಯಾನ್ ಜಾಲಿಂ. ಮರಾಠಾ ಆನಿ ಭೊಸ್ಲೆ ರಾಯ್ ಪರತ್ ಪರತ್ ಗೊಂಯ್ಚೆರ್ ಘುರಿ ಘಾಲುನ್ ಆಸ್ಲೆ. ಹಾಕಾ ಲಾಗುನ್ ಗೊಂಯ್ಚಿ ಆರ್ಥಿಕ್ ಸ್ಥಿತಿ ಭಿಗಡ್ಲಿ. ಪುರ್ತುಗೆಜ್ ಸರ್ಕಾರಾನ್ ಸುಂಕ್ ವಾಡಯ್ಲೆಂ. ದುಕಳ್ ಆನಿ ಪೆಸ್ತ್ ಪಿಡೆಕ್ ಲಾಗುನ್ ಥಂಯ್ ಜಿಯೆಂವ್ಕ್ ಕಶ್ಟ್ ಮಾರ್‍ತಾಲೆ. ಹಾಕಾ ಲಾಗುನ್ ಲೋಕ್ ಥಂಯ್ ಥಾವ್ನ್ ಪಳುನ್ ಕೆನರಾ ಪಾವ್ಲೊ. ಕೆನರಾಂತ್ ಹೊ ಲೋಕ್ ಕೃಶಿ ಕರುಂಕ್ ಲಾಗ್ಲೊ, ಥಳಾವ್ಯಾ ರಾಯಾಂಚ್ಯಾ ಸಯ್ನ್ಯಾಂತ್ ಭರ್‍ತಿ ಜಾಲೊ, ವೆಪಾರ್ ಕರಿಲಾಗ್ಲೊ, ಇತ್ಯಾದಿ.
ವಯ್ಲ್ಯೆ ಜಾತಿಚ್ಯಾ ಲೊಕಾಂ ಸಾಂಗಾತಾ ಹೆರ್ ಲ್ಹಾನ್ ಜಾತಿಚೊ ಲೋಕ್ ಗೊಂಯ್ ಸೊಡುನ್ ಹೆರ್ ಗಾಂವಾಂನಿ ಪಾವ್ಲೊ. ದಾಕ್ಲ್ಯಾಕ್ ಕೇರಳಾಂತ್ ಕುಣ್ಬಿ ಲೋಕ್ ತಾಂಚ್ಯಾ ಬಾಮಣ್ ಜಾತಿಚ್ಯಾ ಧನಿಯಾಂ ಸಾಂಗಾತಾ ಯೆವ್ನ್ ಕೇರಳಾಂತ್ ರಾವ್ಲೊ. ಸೊನಾರ್-ಶೇಟ್ ಸಮುದಾಯಾಚೊ ಲೋಕ್ (ಆತಾಂ ದೈವಜ್ಞ ಬ್ರಾಹ್ಮಣ್) ಕೆನರಾಚ್ಯಾ ದೇವಸ್ಥಾನಾಂನಿ ದೆವ್ಳಾಂ ಸಜೊಂವ್ಕ್ ಪಾವ್ಲೊ. ತಾಂಕಾಂ ಕೆನರಾಚ್ಯಾ ರಾಯಾಂನಿ ಆಪೊವ್ಣೆಂ ದಿಲ್ಲೆಂ. ಗೊಂಯಾ ಥಾವ್ನ್ ಕ್ರಿಸ್ತಾಂವಾಂನಿ ಕಾಳಿ ನ್ಹಂಯ್ (ಕಾರ್‍ವಾರ್) ಉತ್ರುನ್ ಕೆನರಾ ಕಿತ್ಯಾಕ್ ಯೆಜೆ? ಕಾರಣ್ ತ್ಯಾ ಕಾಳಾರ್ (ಆದ್ಲ್ಯಾ ಕಾಬಿಜಾಂತ್) ಕುಂಕಳಿಂ ಗಾಂವ್ ಗೊಂಯ್ ಆನಿ ಕೆನರಾ ಮದ್ಲಿ ಗಡ್ ಜಾವ್ನ್ ಆಸ್ಲಿ. ತಶೆಂಚ್ ಗೊಂಯ್ಚೆ ಹಿಂದು ಬಾಮಣ್ ಮಂಗ್ಳುರಾಂತ್ ಆನಿ ಕೊಚ್ಚಿಂತ್ ಧರ್ಮಾಂತರಾಂಕ್ ಭಿಯೆವ್ನ್ ಆಯ್ಲಲೆ ಮ್ಹಣ್ ಕಶೆಂ ಸಾಂಗುಂಕ್ ಜಾತಾ? ಕಾರಣ್ ತ್ಯಾ ವಠಾರಾಂತ್‍ಯಿ ಪುರ್ತುಗೆಜ್ ಆಸ್ಲೆ. “ಜಿ.ಎಸ್.ಬಿ” ಹೆಂ ನಾಂವ್ ತಾಣಿಂ ವಿಸಾವ್ಯಾ ಶೆಕ್ಡ್ಯಾಂತ್ ಘೆತ್ಲಲೆಂ. ಮ್ಹಣ್ತಚ್ ಜಿ.ಎಸ್.ಬಿ ಕೊಂಕ್ಣಿ ಕ್ರಿಸ್ತಾಂವಾಂಚೆ ಪುರ್ವಜ್ ಮ್ಹಣ್ಚೆಂ ಚುಕ್ತಾ. ತರ್.ಯಿ ಹ್ಯಾ ಚಲ್‍ಚಿತ್ರಾಂತ್ ಕೊಂಕ್ಣಿ ಸಾರಸ್ವತ್ ಆನಿ ಮೂಟ್‍ಭರ್ ಕ್ರಿಸ್ತಾಂವ್ ಬಾಮ್ಣಾಂಚೆ ಪುರ್ವಜ್ ಏಕ್‍ಚ್ ಮ್ಹಣ್ ದಾಕೊಂವ್ಚೊ ಪ್ರಯತ್ನ್ ಬರೊ ಆಸಾ. ಹಾಕಾ DNA ಸಾಕ್ಸ್ ದಿತಾ. ಪೂಣ್ ಮಂಗ್ಳುರಾಂತ್ ಆಸ್ಚೊ ಎಕ್ಲೊ ಕ್ರಿಸ್ತಾಂವ್ ಗೊಂಯ್ಚ್ಯಾ ಎಕಾ ಗಾಂವ್ಚೊ ವಾರಿಸ್ದಾರ್ ಮ್ಹಣ್ ಜೆಂ ದಾಕಯ್ಲಾಂ ತೆಂ ಚುಕ್ತಾ. ಕಾರಣ್ ಗೊಂಯಾಂತ್ ಭುಂಯ್ ಭಾಟ್ ಗಾಂವ್ಕಾರಿ/ ಗಾಂವ್ಕಾರಾಂಚ್ಯಾ ಹಾತಾಂತ್ ಆಸ್ಲಿ. ತಿ ಖಾಸ್ಗಿ ಆಸ್ತ್ ನ್ಹಯ್.
ಚಲ್‍ಚಿತ್ರಾಂ/ಪಿಂತುರಾಂ ವರ್ವಿಂ ಜಾಯ್ತೆಂ ಶಿಕುಂಕ್ ಜಾತಾ. ತೆಂ ಮನೋರಂಜನಾಚೆಂ ಏಕ್ ವರ್ತೆಂ ಸಾಧನ್. ಪೂಣ್ ಇತಿಹಾಸಿಕ್ ಘಡಿತಾಂ ಆಮಿ ಸಾರ್ಕಿಂ ದಾಕಯ್ನಾಂವ್ ಜಾಲ್ಯಾರ್ ಮೂಳ್‍ವಾದಿಂಕ್ (fundamentalists) ಅವ್ಕಾಸ್ ಕರುನ್ ದಿಲ್ಲ್ಯೆ ಪರಿಂ. ಬಡಿ ದಿವ್ನ್ ಮಾರ್ ಖೆಲ್ಲ್ಯೆ ಪರಿಂ! ಚುನಾವಣ್ ಹುಂಬ್ರಾರ್ ಆಸ್ತಾನಾ ಜಾಗ್ರುತ್ ರಾಂವ್ಚೆಂ ಚಡ್ ಬರೆಂ. ಪಿಂತುರ್ ನಕ್ಕಿ ಪಳೆಂವ್ಚೆಂ ತಸ್ಲೆಂ. ಮಾಂಡ್ ಸೊಭಾಣ್ ಪಂಗ್ಡಾಕ್ ಶಾಬಾಸ್ಕಿ!
5 comments
The Article shows research historical truth about events,which is important for truthful message in any production of arts
Good eye opener for wrongly held misconceptions. Arguments put forward by the article are tenable and constitute a reason for migration of both GSB and Christians. Migration happened over a period of time and not at once. What happens over a period of time cannot be called as a mass exodus. The reasons for this migrations are various and varied. Most of us tend to go with popular history and think our view is the right view. But history is history and there is nothing called popular history.
Film is a film. A material for consumption. But as Jason said when doing a historical film, producers have to work on historical facts and not popular facts. The article is somewhere near clearing misconceptions. May be a series on the subject will help resolve a contentious historical facts.
Good research & effort to set the right historic facts. Very surprised that how it was missed out to do a thorough research specially when the movie was trying to show the history of Konkani language, and dipicting few scenes so vividly which would only add oil to the fire based on possibly so true history??
Amazing analysis Fr. Jason. The movie seemed to be an deliberate attempt made to disfigure the face of the Church. It was indeed disheartened to see that wrong information was employed for a help that had great expectations. Empathetic towards those those viewers who are apparently mislead by false history.
Inquisition is wrongly depicted in the movie. No known burnt incidents had happened. Inquisition is to those who went wayward from church teachings. Since many places it is shown in church premises we are spreading wrong information about us ourselves.