ಕಾಳ್ಜಾಕುಡ್ಕೊ ಧಾಡ್ನ್ ದಿಲ್ಲೊ ಸುನಂದ್

337

ತೆದ್ನಾಂ ಹಾಂವ್ ಹೈಸ್ಕೂಲಾಂತ್ ಶಿಕ್ತಾಲೊಂ. ಗಿಮೆಚಿ ರಜಾ ಮೆಳ್ಳಿಚ್ ಖಂಯ್ ಜಾಲ್ಯಾರೀ ಚಲ್ತಾ ಥಂಯ್ ಖೆಳೊಂಕ್ ವೆಚೆಂ, ವಾ ರಾನಾಂತ್ ಭೊಂವ್ಚೆಂ ವಾ ಸಾಯ್ಕಲ್ ಘೆವ್ನ್ ಇಷ್ಟಾಂ ಸಾಂಗಾತಾ ಭೊಂವೊಂಕ್ ವೆಚೆಂ. ಮೇ ಮಹಿನೊ, ಧಾ ದೀಸ್ ಉತರ‍್ಲ್ಯಾತ್ ಆಸ್ಯೆತ್, ಪಾವ್ಸ್ ಸುರು ಜಾಲೊಚ್. ಜಾಲಿ ಅವಸ್ಥಾ, ಆತಾಂ ಖೆಳೊಂಕ್ ವಚೊಂಕ್ ಜಾಯ್ನಾ. ತರೀ ಘರಾ ಬಸೊನ್ ಕಿತೆಂ ಕರ‍್ಚೆಂ ?

ತಕ್ಷಣ್ ಮ್ಹಜಿ ದೀಷ್ಟ್ ಮೆಜಾಚೆರ್ ಆಸ್‌ಲ್ಲ್ಯಾ ಥೊಡ್ಯಾ ಬುಕಾಂ ವಯ್ರ್ ಪಡ್ಲಿ. ತೆ ಬೂಕ್ ಮ್ಹಾಕಾ ಇನಾಮ್ ಜಾವ್ನ್ ರಾಕ್ಣೊ ದಫ್ತರಾಥಾವ್ನ್ ಮೆಳ್‌ಲ್ಲೆ. ಮ್ಹಾಕಾ ಪಯ್ಲೆಂಥಾವ್ನ್‌ಯೀ ಸಬ್ದಾಂ ಗೊಂದೊಳ್, ಪೊಕ್ರಿ ಮುನ್ನಾ ಆನಿ ಹೆರ್ ಸ್ಪರ್ಧ್ಯಾಂನಿ ಭಾಗ್ ಘೆವ್ನ್ ಇನಾಮಾಂ ಜೊಡ್ಚೆಂ ಮ್ಹಳ್ಯಾರ್ ವ್ಹಡ್ ಆಸಕ್ತ್. (ಹಿ ಆಸಕ್ತ್ ಅತಾಂಯ್ ವಚೊಂಕ್ ನಾ ದಿಸ್ತಾ). ತಶೆಂ ಮ್ಹಾಕಾ ರಾಕ್ಣೊ ಪತ್ರಾಚಾ ಸಬ್ದಾಂ ಗೊಂದೊಳ್ ಸ್ಪರ್ಧ್ಯಾಂತ್ ಏಕ್‌ಪಾವ್ಟಿಂ ತಿಸ್ರೆಂ ಇನಾಮ್ ಮೆಳ್ಳೆಂ ಆನಿ ಪೊಕ್ರಿ ಮುನ್ನಾ ಸ್ಪರ್ಧ್ಯಾಂತ್ ದುಸ್ರೆಂ ಇನಾಮ್. ಇನಾಮ್ ಜಾವ್ನ್ ಮೆಳ್‌ಲ್ಲೆ ಮ್ಹಾಕಾ ಬೂಕ್ ಜೆ ಜಾವ್ನಾಸ್‌ಲ್ಲೆ, ‘ರಾಯ್ ಉಂದಿರ್’, ‘ವಿಂಕಲಾಚಿ ಕಥಾ’, ‘ಮ್ಹೊಂವ್ ಆನಿ ರಗತ್’, ‘ಶೆತ್ ಭಾಂಗ್ರಾಳೆಂ’. ಹೆ ಬೂಕ್ ಮೆಳ್‌ಲ್ಲೆ ಮಹಿನ್ಯಾ ಆದಿಂ ತರೀ ಹಾಂವೆಂ ವಾಚ್ಚೆಂ ಮನ್ ಕರುಂಕ್ ನಾತ್‌ಲ್ಲೆಂ. ಅತಾಂ ಕಸೊಯ್ ಪಾವ್ಸ್ ವೊತ್ತಾನೆ, ಭಾಯ್ರ್ ಖೆಳೊಂಕ್ ಜಾಯ್ನಾ, ತಶೆಂ ಉಪಾವ್ ನಾಸ್ತಾಂ ಆಸ್‌ಲ್ಲ್ಯಾ ಬುಕಾಂಪಾಯ್ಕಿ ಚಡ್ ಪಾತಳ್ ಆಸ್ಚೊ ‘ವಿಂಕಲಾಚಿ ಕಥಾ’ ಹಾತಿಂ ಧರ‍್ಲೊ ಆನಿ ವಾಚುಂಕ್ ಸುರು ಕೆಲೆಂ. ಹಾಚೊ ಮೂಳ್ ಬರಯ್ಣಾರ್ ವೊಶಿಂಗ್ಟನ್ ಇರ್ವಿಂಗ್  ಆನಿ ಕೊಂಕ್ಣೆಕ್ ಲಿಯಾಬಾನ್ ತರ್ಜುಮೊ ಕೆಲ್ಲೊ.

ವಿಂಕಲಾಚಿ ಕಥಾ ಭುರ್ಗ್ಯಾಂಕ್ ಬರಯಿಲ್ಲಿ ಮಟ್ವಿ ಕಾದಂಬರಿ. ಧರ್ಣಿರ್ ನಿದೊನ್ ಬೂಕ್ ವಯ್ರ್ ಧರ‍್ನ್ ವಾಚುಂಕ್ ಸುರು ಕೆಲಿ. ವಾಚ್ತಾಂ ವಾಚ್ತಾಂ ಇತ್ಲಿ ಕುತೂಹಲ್ ಜಾಲಿ ಕೀ ಮೆಜುನ್ ತೀನ್ ದಿಸಾಂ ಭಿತರ್ ಹಾಂವೆಂ ತಿ ವಾಚುನ್ ಕಾಡ್ಲಿ. ಹ್ಯಾ ಕಾದಂಬರಿಥಾವ್ನ್ ಮ್ಹಜೆಥಂಯ್ ವಾಚ್ಚೆಂ ಭಿಂ ಪಡ್ಲೆಂ ವಾ ಪಿಸಾಯ್ ಸುರು ಜಾಲಿ ಮ್ಹಣ್ಯೆತ್. ಮ್ಹಾಕಾ ಅನ್ಯೇಕ್ ಬೂಕ್ ವಾಚ್ಯಾಂ ಮ್ಹಣ್ ಜಾಲೆಂ. ತೆದ್ನಾಂ ಹಾಂವೆಂ ವಿಂಚ್‌ಲ್ಲೊ ಬೂಕ್ ‘ರಾಯ್ ಉಂದಿರ್’. ಹಾಚೊ ಮೂಳ್ ಲೇಖಕ್ ‘ಜೇಮ್ಸ್ ಕ್ಲ್ಯಾವೆಲ್’ ಆನಿ ಕೊಂಕ್ಣೆಕ್ ತರ್ಜುಮೊ ಕೆಲ್ಲೊ ಜಾವ್ನಾಸಾ ಸುನಂದ್.

ಬೂಕ್ 396 ಪಾನಾಂಚೊ ದಾಟ್ ಆಸ್‌ಲ್ಲೊ, ಮ್ಹಜ್ಯಾನ್ ವಾಚುನ್ ಕಾಬಾರ್ ಜಾಯ್ತ್‌ಗೀ ಮ್ಹಳ್ಳೊ ದುಬಾವ್ ಮ್ಹಾಕಾ ಧೊಸ್ಲೊ. ವಯ್ಲ್ಯಾನ್ ಹೆಂ ರಾಯ್ ಉಂದಿರ್ ನಾಂವ್ ಸಯ್ತ್ ಮ್ಹಾಕಾ ಮಾತ್ಶೆಂ ಘುಸ್ಪೊಡ್ ತಶೆಂ ಭೊಗ್ಲೆಂ. ವಾಚುನ್ ಚಡ್ ಅನ್ಭೊಗ್ ನಾತ್‌ಲ್ಲ್ಯಾ ಮ್ಹಾಕಾ ಹೊ ಕಾಂಯ್ ಉಂದ್ರಾ ವಯ್ರ್ ಬರಯ್ಲಾ ಆಸ್ತಲೊ ಮ್ಹಣ್ ಹಾಂವೆಂ ಚಿಂತ್ಲೆಂ. ತರೀ ವಾಚುಂಕ್ ಧರ‍್ಲೊ. ಜಶೆಂ ಆಯಾಸ್ಕಾಂತ್ ಲೊಂಕ್ಡಾಕ್ ಅಂಟುನ್ ರಾವ್ತಾಗೀ, ತಶೆಂ ಹಾಂವ್ ‘ರಾಯ್ ಉಂದಿರ್’ ವಾಚುಂಕ್ ಧರ್‌ಲ್ಲ್ಯಾ ದಿಸಾಥಾವ್ನ್ ಮ್ಹಾಕಾಚ್ ಕಳಿತ್ ನಾತ್‌ಲ್ಲೆಬರಿಂ ತಾಕಾ ಅಂಟುನ್ ರಾವ್ಲೊಂ.

ಹಿ ಕಾಣಿ ದುಸ್ರ್ಯಾ ಮಹಾಝುಜಾಚಿ ಜಾವ್ನಾಸ್‌ಲ್ಲಿ. ಜಪಾನ್ ಹೆಂ ಝುಜ್ ಲಗ್ಭಗ್ ಜಿಕೊನ್ ಆಯಿಲ್ಲೆಂ. ಆನಿ ತಾಣಿಂ ಅಮೇರಿಕಾ ಆನಿ ತಾಚಾ ಮಿತ್ರ್ ರಾಷ್ಟ್ರಾಂಚಾ ಸೊಜೆರಾಂಕ್ ಧರ‍್ನ್ ಎಕಾ ಕ್ಯಾಂಪಾಂತ್ ಬಂಧೆಂತ್ ಘಾಲ್ಲ್ಯಾ ಉಪ್ರಾಂತ್ ಥಂಯ್ಚರ್ ಆಸ್‌ಲ್ಲ್ಯಾ ಕಿಂಗ್ ಆನಿ ಪೀಟರ್ ಆನಿ ಹಾಂಚ್ಯಾ ಇಷ್ಟಾಗತೆರ್ ವಿಣ್ಲಲಿ ಭೋವ್ ಸುಂದರ್ ಕಥಾ ತಿ ಜಾವ್ನಾಸ್‌ಲ್ಲಿ. ಹಾಚೆಸಂವೆಂ ದುಸ್ರ್ಯಾ ಮಹಾಝುಜಾಚಿಂ ಘಡಿತಾಂ, ಸತಾಂ ಆನಿ ಇತಿಹಾಸ್, ಹಾಚೆ ಬರಾಬರ್ ಕ್ಯಾಂಪಸಾಂತ್ ಖೈದ್ಯಾನಿಂ ಜಿಯೆಂವ್ಚಿ ರೀತ್, ಕೊಲ್ಕತ್ತಾ ರೇಡಿಯೊಚೆಂ ಉಲ್ಲೇಖ್ ಅಶೆಂ ಮ್ಹಣ್ತಾನಾ ಹಿ ಕಾದಂಬರಿ ಮ್ಹಜ್ಯಾ ಶಿರಾಶಿರಾನಿಂ ವ್ಹಾಳೊನ್ ಮ್ಹಾಕಾ ಸಾಹಿತ್ಯಾಚಿ ಧಾದೊಸ್ಕಾಯ್ ದೀಂವ್ಕ್ ಲಾಗ್ಲಿ. ತಶೆಂಚ್ ಹ್ಯಾ ಕಾದಂಬರಿಚಿ ಸಮಾಪ್ತಿ ಸಯ್ತ್ ಮ್ಹಜೆ ತಸಲ್ಯಾ ವಾಚ್ಪ್ಯಾಚಾ ಮತಿಕ್ ಆನಿ ದೊಳ್ಯಾಂಕ್ ಝಡಾಯ್ ಜಾಲಿ.

ರಾಯ್ ಉಂದಿರ್ ವಾಚ್ಲ್ಯಾ ನಂತರ್ ಜಾಯ್ತೊ ಕಾಳ್ ಮ್ಹಣ್ಚ್ಯಾಕೀ ಅತಾಂಯ್ ತೊ ಮ್ಹಜ್ಯಾ ಮತಿ ಪಡ್ದ್ಯಾರ್ ಜಿವೊ ಆಸಾ ಮ್ಹಣ್ಯೆತ್. ಹ್ಯಾ ನಂತರ್ ಆನಿಕೀ ಚಡ್ ಬೂಕ್ ವಾಚುಂಕ್ ಹಾಂವ್ ಪೆಚಾಡ್ಲೊಂ. ತಿತ್ಲೆಂಚ್ ನ್ಹಯ್ ಹ್ಯಾ ಬುಕಾವಿಶಿಂ ಮ್ಹಜ್ಯಾ ಘರ‍್ಚ್ಯಾ ಸಾಂದ್ಯಾಲಾಗಿಂ ಸಯ್ತ್ ಹಾಂವೆಂ ಪ್ರಸ್ತಾಪ್ ಕೆಲ್ಲೊ ಆಸಾ. ರಾಯ್ ಉಂದಿರ್ ಬುಕಾ ಸಾಂಗಾತಾ ‘ಸುನಂದ್’ ಮ್ಹಳ್ಳೊ ಅನ್ಯೇಕ್ ವ್ಯಕ್ತಿ ಸಯ್ತ್ ತ್ಯಾ ದಿಸಾಥಾವ್ನ್ ಮ್ಹಜ್ಯಾ ಕಾಳ್ಜಾಚಾ ಖಂಚ್ಯಾಗೀ ಎಕಾ ಕೊನ್ಶಾಂತ್ ಜಾಗೊ ಘೆಂವ್ಕ್ ಪಾವ್ಲೊ ಮ್ಹಣ್ಯೆತ್.

ಕೋಣ್ ಹೊ ಸುನಂದ್, ಖಂಯ್ ರಾವ್ತಾ, ತಾಚೆ ಬಾಕಿಚೆ ಬೂಕ್ ಆಸಾತ್‌ಗೀ, ತಾಕಾ ಮೆಳ್ಯೆತ್‌ಗೀ, ಅಸಲ್ಯಾ ಲೇಖಕಾಂಕ್ ಆಮ್ಕಾಂ ಮೆಳೊಂಕ್ ಜಾತಾಗೀ ಅಸಲಿ ಆನಿ ಹೆರ್ ಸಬಾರ್ ಸವಾಲಾಂ ತೆದಾಳಾ ನೊವೆ ಕ್ಲಾಸಿಂತ್ ಶಿಕ್ಚ್ಯಾ ಮ್ಹಜ್ಯಾ ಮತಿಂತ್ ಉದೆಲ್ಲಿಂ ಸಹಜ್ ಮ್ಹಣ್ಯೆತ್. ಹೊ ಬೂಕ್ ಮ್ಹಾಕಾ ಇತ್ಲೊ ಪಸಂದ್ ಜಾಲೊಗೀ ಥೊಡ್ಯಾ ಮಹಿನ್ಯಾ ಉಪ್ರಾಂತ್ ಹಾಂವೆಂ ತೊ ಪರತ್ ವಾಚ್ಲೊ. ಹ್ಯಾ ಬುಕಾವರ್ವಿಂ ಝುಜಾ ಸಂಬಂಧಿತ್ ಬೂಕ್ ವಾಚ್ಚಿ ಸಯ್ತ್ ಪಿಸಾಯ್ ಜಾಲಿ. ದೆಕುನ್ ಹಾಚೆ ಸಾಂಗಾತಾ ಮೆಳ್‌ಲ್ಲೊ ಅನ್ಯೇಕ್ ಬೂಕ್ ‘ಮ್ಹೊಂವ್ ಆನಿ ರಗತ್’ ಲೇಖಕ್ ಎಡ್ವಿನ್ ಜೆ,. ಎಫ್. ಖಸೋಜಾ, ತೊಯ್ ವಾಚುನ್ ಕಾಡ್ಲೊ. ‘ಮ್ಹೊಂವ್ ಆನಿ ರಗತ್’ 1992 ಇಸ್ವೆಂತ್ ಚಲ್‌ಲ್ಲ್ಯಾ ಗಲ್ಫ್ ಝುಜ್ ಆನಿ ಹ್ಯಾ ವೆಳಾರ್ ಖುದ್ಧ್ ಕುವೇಯ್ಟಾಂತ್ ಆಸೊನ್ ಝುಜಾವರ್ವಿಂ ಕಷ್ಟಾಲ್ಲ್ಯಾ ಲೇಖಕಾಚಿ ನೀಜ್ ಕಾಣಿ ಮ್ಹಣ್ಯೆತ್. ಹೊಯ್ ಪುಸ್ತಕ್ ಮ್ಹಜೆಥಂಯ್ ಜಾಯ್ತೊ ಪ್ರಭಾವ್ ಘಾಲುಂಕ್ ಸಕ್ಲೊ.

ಮ್ಹಜಿ ವಾಚ್ಚಿ ಉರ್ಬಾ ದಿಸಾನ್ ದೀಸ್ ವಾಡ್ಲಿ. ಉಪ್ರಾಂತ್ ಸವ್ಕಾಸ್ ಹಾಂವೆಂಯ್ ಬರಂವ್ಕ್ ಧರ‍್ಲೆಂ. ಇಲ್ಲೆಂ ಇಲ್ಲೆಂ ಬರವ್ನ್ ಆಜ್ ಇತ್ತುನ್ (ಕಿತ್ತುನ್ ಮ್ಹಣ್ ವಾಚ್ಪ್ಯಾನಿಂ ಸಾಂಗಾಜೆ) ಪಾವ್ಲಾಂ ಮ್ಹಣ್ಯೆತ್. ಹಾಂವ್ ಜಾಯ್ತ್ಯಾ ಹೆರ್ ಲೇಖಕಾಂಬರಿಂ ಲ್ಹಾನ್ ಆಸ್ತಾನಾ ಚಂದಮಾಮಾ ವಾ ಬಾಲಮಂಗಳ ವಾ ಹೆರ್ ಕೊಮಿಕ್ಸ್ ವಾಚಿನಾತ್‌ಲ್ಲೊಂ. ಭುರ್ಗ್ಯಾಂಖಾತಿರ್ ಆಮ್ಗೆರ್ ತೆದ್ನಾಂ ಯೆತಾಲೊ ಬೂಕ್ ಮ್ಹಳ್ಯಾರ್ ‘ಜೆಜುರಾಯ್’. ತೊ ಹಾಂವ್ ವಾಚ್ತಾಲೊಂ. ಮ್ಹಜ್ಯಾ ಘರಾ ಆಮಿಂ ನೋವ್ ಜಣಾಂ ಭುರ್ಗಿಂ. ಮ್ಹಜ್ಯಾ ಸಕ್ಕಡ್ ಭಾವಾಂ-ಭಯ್ಣಿಂಕ್ ವಾಚ್ಚಿ ಪಿಸಾಯ್ ಆಸ್‌ಲ್ಲಿ. ಹಾಂವ್ ನಿಮಾಣೊ ಜಾಲ್ಲ್ಯಾನ್ ಆನಿ ಸಕ್ಡಾನಿಂ ಮ್ಹಜೊ ಕೊಂಡಾಟೊ ಕೆಲ್ಲ್ಯಾನ್ ಜಾವ್ಯೆತ್ ಹಾಂವ್ ಚಡ್ ಖೆಳೊಂಕ್ ಆನಿ ಮಝಾ ಮಾರುಂಕ್‌ಚ್ ಖರ್ಚಿತಾಲೊಂ. ಅಶೆಂ ಮ್ಹಜೆಂ ಬಾಳ್ಪಣ್ ಮಝೆನ್ ಪಾಶಾರ್ ಜಾಲಾಂ ಮ್ಹಣ್ಯೆತ್.

ರಾಯ್ ಉಂದಿರ್ ಹಾಂವೆಂ ವಾಚ್ಲೊ ಮಾತ್ರ್ ನ್ಹಯ್ ಹೆರಾಂನಿ ವಾಚುಂಕ್ ಒತ್ತಾಯ್ ಕೆಲಿ. ತ್ಯಾ ವೆಳಾರ್ ಮ್ಹಾಕಾ ಸಾಹಿತ್ಯಾಚೆ ಕೊಣೀ ಜೊಕ್ತೆ ಮಿತ್ರ್ ನಾತ್‌ಲ್ಲೆ ಮ್ಹಣ್ಯೆತ್. ದುಬ್ಳಿಕಾಯ್ ಆಸ್‌ಲ್ಲ್ಯಾ ತ್ಯಾ ಕಾಳಾರ್ ಮೊಲಾಕ್ ಬೂಕ್ ಘೆವ್ನ್ ವಾಚ್ಚಿ ಸವ್ಲತಾಯ್ ಮ್ಹಾಕಾ ನಾತ್‌ಲ್ಲಿ. ಮ್ಹಜೆ ಭಾವ್ ಪಯ್ಣಾರಿ, ರಾಕ್ಣೊ, ಕಾಣಿಕ್ ತಸಲ್ಯಾ ಪತ್ರಾಂನಿ  ಯೆಂವ್ಚ್ಯೊ ಬುಕಾ ರುಪಾಚ್ಯೊ ಕಾದಂಬರಿ ಜಮೊ ಕರ‍್ನ್ ಉಪ್ರಾಂತ್ ಬೂಕ್ ಕರ‍್ನ್ ಸಾಂಬಾಳ್ನ್ ದವರ‍್ತಾಲೆ ಆನಿ ಹೆರಾಂಕ್ ವಾಚುಂಕ್ ದಿತಾಲೆ. ಮ್ಹಜೊ ರಾಯ್ ಉಂದಿರ್ ಬೂಕ್‌ಯೀ ಹಾಂವೆಂ ಏಕ್ ದೀಸ್ ಅಸೊಚ್ ವಾಚುಂಕ್ ಮ್ಹಣ್ ಹೆರಾಂಕ್ ದಿಲೊ. ಅಸೊ ದಿಲ್ಲೊ ತೊ ಪರತ್ ಮ್ಹಜ್ಯಾ ಹಾತಾಕ್ ಪಾಟಿಂ ಮೆಳೊಂಕ್ ನಾ. ಹಾಂವೆಂ ಕೊಣಾಕ್ ದಿಲ್ಲೊಗೀ ತಾಣೆಂ ವಾಚುಂಕ್ ಅನ್ಯೇಕ್ಲ್ಯಾಕ್ ದಿಲಾ, ಪೊರ್ವಾಂ ಪಾಟಿಂ ದಿತಾಂ ಮ್ಹಳ್ಳಿ ಜಾಪ್ ಆಯ್ಲಿ. ಅಶೆಂ ಹೆರ್ ಬೂಕ್ ವಾಚ್ತಾಂ ವಾಚ್ತಾಂ ರಾಯ್ ಉಂದಿರ್ ಹೊಗ್ಡಾಯಿಲ್ಲೊ ಮ್ಹಾಕಾ ಕಳ್ಳೆಂಚ್ ನಾ. ಏಕ್ ದೀಸ್ ಸಕ್ಕಡ್ ಕೊಂಕ್ಣಿ ಬೂಕ್ ಜಮೊ ಕರ‍್ನ್ ವೊರೆವಿಂಗಡ್ ಮಾಂಡುನ್ ದವರ‍್ಯಾಂ ಮ್ಹಣ್ತಾನಾ ಮ್ಹಾಕಾ ರಾಯ್ ಉಂದಿರ್ ಬುಕಾಚೊ ಉಗ್ಡಾಸ್ ಆಯ್ಲೊ. ಸುರು ಜಾಲಿ ತನ್ಕಿ. ಕೊಣೆಂ ಸಕ್ಕಡ್ ಮ್ಹಜೆ ಬೂಕ್ ವೆಲ್ಲೆಗೀ ತಾಂಚೆಕಡೆನ್ ವಿಚಾರ‍್ಲೆಂ. ಪೂಣ್ ರಾಯ್ ಉಂದಿರ್ ಮೆಳೊಂಕ್ ನಾ.

ಹಾಂವೆಂ ಚಿಂತ್ಲೆಂ, ರಾಯ್ ಉಂದಿರ್ ವಿಚಾರ‍್ನ್ ವೆಚೆಂ ಭೆಷ್ಟೆಂ, ಹಾಂವ್ ಏಕ್ ಪ್ರತಿ ಮೊಲಾಕ್ ಘೆತಾಂ ಮ್ಹಣ್ ಶೀದಾ ಪಾವ್ಲೊಂ ರಾಕ್ಣೊ ದಫ್ತರಾಕ್. ತೆದ್ನಾಂ ಹಾಂವೆ ಡಿಗ್ರಿ ಶಿಕಾಪ್ ಸಂಪಯಿಲ್ಲೆಂ. ಪೂಣ್ ರಾಕ್ಣೊ ದಫ್ತರಾಥಾವ್ನ್ ಮ್ಹಾಕಾ ನಿರಾಶಾ ಲಾಭ್ಲಿ. ತಾಂಚೆಲಾಗಿಂ ಆಸ್ಚೆ ಥೊಡ್ಯೆಚ್ ಪ್ರತಿಯೊ ಪೂಣ್ ತೆ ಮೊಲಾಕ್ ವಿಕಿನಾಂತ್. ಚಡ್ತಿಕ್ ಪ್ರತಿಯೊ ತಾಂಚೆಲಾಗಿಂಯ್ ನಾಂತ್. ಹಾಂವೆಂ ಮ್ಹಜ್ಯಾ ಸಾಹಿತಿಕ್ ಇಷ್ಟಾಂಲಾಗಿಂ ವಿಚಾರ‍್ಲೆಂ. ತಾಂಚೆಲಾಗಿಂಯ್ ನಾಂತ್. ಸಾಂ. ಲುವಿಸ್ ಕೊಲೇಜ್, ಕೊಂಕ್ಣಿ ಸಂಸ್ಥ್ಯಾಕ್ ಗೆಲೊಂ. ತಾಂಚೆಲಾಗಿಂ ತೀನ್ ಚಾರ್ ಪ್ರತಿಯೊ ದಿಸ್ಲ್ಯೊ ಪೂಣ್ ತೆ ವಿಕ್ರ್ಯಾಕ್ ನಾಂತ್. ತುಕಾ ಜಾಯ್ ತರ್ ಥಂಯ್ಚ್ ಬಸೊನ್ ವಾಚುನ್ ಪಾಟಿಂ ದೀವ್ನ್ ಯೇಜೆ. ಉಪ್ರಾಂತ್ ಹೆರ್ ಥೊಡ್ಯಾ ಲೈಬ್ರೆರಿಂತ್ ಸೊಧ್ನಾಂ ಕೆಲಿಂ. ಪೂಣ್ ನಿರಾಶಾಚ್. ಹಾಂವ್ ಸೊಧ್ನಾಂ ಕರ‍್ನ್ ಖಂಯ್ ಮ್ಹಣಾಸರ್ ಪಾವ್ಲೊಂಗೀ ಮ್ಹಳ್ಯಾರ್ ಕೊಡ್ಯಾಳ್ಚ್ಯಾ ಜ್ಯೋತಿ ಆಸ್ಚ್ಯಾ ‘ಅತ್ರಿ ಬುಕ್ ಸೆಂಟರ್’ ತಶೆಂಚ್ ‘ಸಪ್ನಾ ಬುಕ್ ಹೌಸಾಂತ್’ ಕಾಂಯ್ ಏಕ್ ಪ್ರತಿ ಮೆಳಾತ್‌ಗೀ ಮ್ಹಣ್‌ಯ್ ಗೆಲ್ಲೊಂ ಆಸಾಂ.

ಜಾಲೆಂ, ರಾಯ್ ಉಂದಿರ್ ಕಸೊಯ್ ಮೆಳೊಂಕ್ ನಾ. ಆತಾಂ ಸುನಂದಾಕ್ ಪುಣೀ ಸೊಧ್ಯಾಂ ಮ್ಹಣ್ ಭಾಯ್ರ್ ಸರ‍್ಲೊಂ. ಹೊ ಸುನಂದ್ ಮ್ಹಳ್ಯಾರ್ ಕೋಣ್ ? ಹಾಚೆಂ ನೀಜ್ ನಾಂವ್ ಕಿತೆಂ ? ಮಂಗ್ಳುರಾಂತ್ ಖಂಯ್ ರಾವ್ತಾ ? ಅಶೆಂ ಪರತ್ ಮ್ಹಜ್ಯಾ ಸಾಹಿತಿಕ್ ಇಷ್ಟಾಂಲಾಗಿಂ ಸವಾಲಾಂ ಆರಂಭ್ ಕೆಲಿಂ. ಜಾಯ್ತ್ಯಾಂನಿ ಮ್ಹಾಕಾ ಸಮಾಧಾನೆಚಿ ಜಾಪ್ ದೀಂವ್ಕ್ ನಾ. ಥೊಡ್ಯಾಂನಿ ತೊ ಹಾಂಗಾ ನಾ ಸಾಯ್ಬಾ, ತೊ ಆತಾಂ ಬರಯ್ನಾ ಸಾಯ್ಬಾ ಮ್ಹಳ್ಳ್ಯೊ ಜಾಪಿ ದಿಲ್ಯೊ. ಹ್ಯೊ ಕಿತ್ಲ್ಯೊ ಸತ್ ವಾ ಫಟ್ ಮ್ಹಣ್ ಮ್ಹಾಕಾ ಕಳೊಂಕ್ ನಾ. ಕಿತ್ಯಾಕ್ ಮ್ಹಳ್ಯಾರ್ ‘ಸುನಂದ್’ವಿಶಿಂ ಜಾಣಾ ಜಾಯ್ಜೆ ತರ್ ಕೊಂಕ್ಣೆಂತ್ಲ್ಯಾ ವ್ಹಡ್ ವಾ ಹೆಳ್‌ಲ್ಲ್ಯಾ ಖಂಚ್ಯಾಯ್ ಲೇಖಕಾಚಿಂ ಒಳಕ್ ಮ್ಹಾಕಾ ಗರ್ಜ್ ಆಸ್‌ಲ್ಲಿ ಆನಿ ತಸಲ್ಯಾ ಖಂಚ್ಯಾಯ್ ಲೇಖಕಾಚಿ ಮ್ಹಾಕಾ ತೆದ್ನಾಂ ಒಳಕ್ ನಾತ್‌ಲ್ಲಿ. ಕೊಂಕ್ಣೆಂತ್ ತೆದ್ನಾಂ ನಾಂವಾಡ್ದಿಕ್ ಮ್ಹಣ್ಚೆ ಎಡ್ವಿನ್ ಜೆ.ಎಫ್. ಡಿಸೋಜಾ, ಮೆಲ್ವಿನ್ ರೊಡ್ರಿಗಸ್, ಎಚ್ಚೆಮ್ ಪೆರ‍್ನಾಲ್, ಮಾವ್ರಿಸ್ ಡೆಸಾ ತಸಲ್ಯಾಂಕ್ ಒಳಕ್ ಕರ‍್ನ್ ಉಲಂವ್ಚೆಂ ತಿತ್ಲೆಂಯ್ ಧಯ್ರ್ ಮ್ಹಾಕಾ ನಾತ್‌ಲ್ಲೆಂ.

ಉಪ್ರಾಂತ್ ಹಾಂವೆಂಯ್ ವಳೂ ವಳೂ ಕೊಂಕ್ಣೆಂತ್ ಮಿಶಿ ರಿಗಯ್ಲಿ. ಎಚ್ಚೆಮ್ ಪೆರ‍್ನಾಲ್, ಮೆಲ್ವಿನ್ ರೊಡ್ರಿಗಸ್ ತಸಲ್ಯಾಂಚಿ ಒಳಕ್ ಕೆಲಿ. ಪೂಣ್ ತಾಂಚಿಂ ಒಳಕ್ ಕೆಲ್ಯಾ ಉಪ್ರಾಂತ್ ಆಮಿ ಸಾಹಿತ್ಯಾಚಾ ಗಜಾಲಿಂ ವಯ್ರ್, ಬರ‍್ಪಾಚಾ ಸುದಾರಣ್ ಆನಿ ಪರಿಣಾಮ್‌ಕಾರಿ ಸಾಹಿತ್ಯಾ ವಯ್ರ್ ಚಡ್ ಉಲಯ್ಲ್ಯಾಂವ್ ಜಾಲ್ಲ್ಯಾನ್ ಮ್ಹಜಿ ಮತ್ ಬರೆಂ ಆನಿ ಪರಿಣಾಮ್‌ಕಾರಿ ಸಾಹಿತ್ಯ್ ರಚ್ಚ್ಯಾವಿಶಿಂ ಚಿಂತುಂಕ್ ಲಾಗ್ಲೆಂ. ತ್ಯಾ ನಂತರ್ ಹಾಂವೆಂ ಜಾಯ್ತಿಂ ಕವಿತಾ, ವಿನೋದ್, ಮಟ್ವ್ಯ್ಯೊ ಕಾಣಿಯೊ ಬರಯ್ಲ್ಯೊ. ಅಶೆಂ ಸುನಂದ್ ಮತಿ ಪಡ್ದ್ಯಾರ್‌ಥಾವ್ನ್ ನಿಸರ‍್ಲೊ ಮ್ಹಣ್ಯೆತ್. ಹ್ಯಾ ಸಂದರ್ಭಾರ್ ಸುನಂದ್ ಉಡಾಸಾಥಾವ್ನ್ ಮಾಜ್ವೊಂಕ್ ಅನ್ಯೇಕ್ ಕಾರಣ್ ಮ್ಹಳ್ಯಾರ್, ಕೊಂಕ್ಣೆಂತ್ ಕಾದಂಬರಿ ಬರವ್ಪಿ ಉಣೆ ಜಾಲೆ ವಾ ನಾಂಚ್ ಜಾಲೆ ಮ್ಹಣ್ಯೆತ್. ತಶೆಂ ಆಸ್ತಾಂ ಕಾದಂಬರಿ ವಯ್ರ್ ಚರ್ಚಾ ವಾ ಕಾಮಾಸಾಳ್ ಜಾಯ್ನಾತ್‌ಲ್ಲೆವರ್ವಿಂ ಸುನಂದ್ ಪಯ್ಸ್ ಪಾವ್ಲೊ ಮ್ಹಣ್ಯೆತ್.

ಸುಮಾರ್ ತೀನ್ ವರ್ಸಾಂ ಆದಿಂ ಮೆಲ್ವಿನ್ ರೊಡ್ರಿಗಸ್ ಹಾಣಿಂ ಏಕ್ ದೀಸ್ ಮ್ಹಾಕಾ ಅಚಾನಕ್ ಏಕ್ ಬರಿ ಖಬರ್ ದಿಲಿ. ತಿ ಜಾವ್ನಾಸ್‌ಲ್ಲಿ ಸುನಂದ್ ವಿಶಿಂ. ತಾಚೆಂ ಕೊಂಟ್ಯಾಕ್ಟ್ ಮ್ಹಾಕಾ ಜಾಲೆಂ, ತೊ ಆಸ್ಟ್ರೇಲಿಯಾ ಆಸಾ. ಸುನಂದಾಚಿ ಖಬರ್ ಮೆಳ್‌ಲ್ಲಿಚ್ ಮ್ಹಾಕಾ ನಿಜಾಯ್ಕಿ ಸಂತೊಸ್ ಜಾಲೊ. ಹ್ಯಾ ಮಾರಿಫಾತ್ ಮ್ಹಜೆ ಭಿತರ‍್ಲೊ ‘ರಾಯ್ ಉಂದಿರ್’ ಪರತ್ ಜೀವ್ ಜಾಲೊ ಮ್ಹಣ್ಯೆತ್. ಪೂಣ್ ಹ್ಯಾ ಖಬ್ರೆ ಸಾಂಗಾತಾ ಏಕ್ ಬೆಜಾರಾಯೆಚಿ ಖಬರ್ ಮ್ಹಳ್ಯಾರ್ ತೊ ಆಸಾ ಆಸ್ಟ್ರೇಲಿಯಾ ಖಂಯ್. ಆತಾಂ ಆಸ್ಟ್ರೇಲಿಯಾ ಆಸ್‌ಲ್ಲ್ಯಾ ಮನ್ಶಾಕ್ ಕಸೊ ಸಂಪರ್ಕ್ ಕರ‍್ಚೊ. ಉಪ್ರಾಂತ್ ಥೊಡ್ಯಾ ಮಹಿನ್ಯಾ ನಂತರ್ ಮೆಲ್ವಿನ್ ಬಾಬಾನ್ ಸುನಂದ್ ಹಾಣಿಂ ಬರಯಿಲ್ಲ್ಯಾ ಎಕಾ ನವ್ಯಾ ಕಾದಂಬರಿವಿಶಿಂ ವಾಚುನ್ ಅಭಿಪ್ರಾಯ್ ದಿಂವ್ಚ್ಯಾಕ್ ಮ್ಹಾಕಾ ಫೋನ್ ಕೆಲೆಂ ಆನಿ ಕಾದಂಬರಿ ಸಯ್ತ್ ಧಾಢ್ಲಿ. ಪಯ್ಲೆಂಚ್ ಸುನಂದ್ ಮ್ಹಣ್ತಾನಾ ವಾಚುಂಕ್ ಅತ್ರೆಗಾನ್ ಆಸ್‌ಲ್ಲೊಂ ಹಾಂವ್, ತಾಚಿ ಕಾದಂಬರಿ ಮೆಳ್‌ಲ್ಲ್ಯಾ ದಿಸಾಥಾವ್ನ್ಂಚ್ ವಾಚುಂಕ್ ಧರ‍್ಲಿ. ತಿ ಜಾವ್ನಾಸ್‌ಲ್ಲಿ ‘ಭುಂಯ್‌ಕಾಂಪ್’. ತಿಯ್ ತಾಣೆಂ ತರ್ಜುಮೊ ಕೆಲ್ಲಿ ಕಾದಂಬರಿ. ಮೂಳ್ ಬರವ್ಪಿ ಚೈನಾಚೊ ‘ಜೋಗ್ ಲಿಂಗ್’. ಹಿ ಏಕ್ ಭೋವ್ ಅಪುರ್ಬಾಯೆಚಿ ಆನಿ ದೊಳ್ಯಾನಿಂ ದುಕಾಂ ಹಾಡಂವ್ಚಿ ಕಾದಂಬರಿ. ವಾಚ್ತಾಂ ವಾಚ್ತಾಂ ಕಾಳ್ಜಾಕ್ ಸುಶೆಗ್ ದೀಂವ್ಕ್ ಪಾವ್ಲಿ. ಹ್ಯಾ ಕಾದಂಬರಿ ಮುಕಾಂತ್ರ್ ‘ರಾಯ್ ಉಂದಿರ್’ ಕಾಳ್ಜಾದಾರ್ ಕುಟ್ಟಿಲಾಗ್ಲೊ. ಹಿ ಕಾದಂಬರಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಆದ್ಲ್ಯಾ ಸಪ್ತೆಂಬರಾಂತ್ ಪರ್ಗಟ್ ಕೆಲ್ಲಿ ಆಸಾ. ಸಾಹಿತ್ಯಾಚಿ ಅಭಿರೂಚ್ ಆಸ್ಚ್ಯಾ ಹರ‍್ಯೇಕ್ಲ್ಯಾನಿಂ ವಾಚಿಜಾಯ್ ಜಾಲ್ಲಿಚ್ ಕಾದಂಬರಿ ಅಶೆಂ ಹಾಂವ್ ಲೆಕ್ತಾಂ.

ಹ್ಯಾ ನಂತರ್ ಸುನಂದ್ ಉಲಂವ್ಕ್ ಮೆಳೊಂಕ್ ನಾಂ ತರೀ ಗರ‍್ಯೆಕ್ ಶಿರ್ಕಾಲಾ ಮ್ಹಳ್ಳಿ ದಾದೊಸ್ಕಾಯ್ ಮ್ಹಾಕಾ ಆಸ್‌ಲ್ಲಿ. ಆನಿ ಅಖ್ರೇಕ್ ಆರಾಧನಾ ಫಿಲ್ಮಾಂತ್ ಶರ್ಮಿಳಾ ಠಾಗೋರಾಚಾ ದೀಗ್ ಸೊಸ್ಣಿಕಾಯೆ ನಂತರ್ ತಿಕಾ ಪರತ್ ರಾಜೇಶ್ ಖನ್ನಾ ಮೆಳ್ಚ್ಯಾಬರಿಂ ಮ್ಹಾಕಾ ಅಖ್ರೇಕ್ ತರೀ ಸುನಂದ್ ಹಾಚೆಂ ವಾಟ್ಸಾಪ್ ನಂಬರ್ ಮೆಳ್ಳೆಂ. ಹಾಂವೆಂ ತಕ್ಷಣ್ ತಾಂಕಾಂ ಮೆಸೆಜ್ ಕೆಲಿ. ಪೂಣ್ ತೆಯ್ ಮ್ಹಾಕಾ ವ್ಹಡಾ ಅತ್ರೆಗಾನ್ ಉಲಂವ್ಕ್ ರಾಕೊನ್ ಆಸ್‌ಲ್ಲೆ ದಿಸ್ತಾ, ತಾಣಿಂ ತಕ್ಷಣಾ ಆಸ್ಟ್ರೇಲಿಯಾಥಾವ್ನ್ ವಾಟ್ಸಾಪಾರ್ ವಿಡಿಯೋ ಕಾಲ್ ಕೆಲೆಂ ಆನಿ ಆಮಿ ರಾಯ್ ಉಂದಿರ್‌ಥಾವ್ನ್, ಭುಂಯ್‌ಕಾಪ್ ಮ್ಹಣಾಸರ್ ಜಾಯ್ತ್ಯೊ ಗಜಾಲಿ ಉಲಯ್ಲ್ಯಾಂವ್. ಉಪ್ರಾಂತ್ ರಾಯ್ ಉಂದಿರ್ ಬೂಕ್ ಮ್ಹಾಕಾ ಮೆಳ್ಲೆಲಿ ಆನಿ ಹಾಂವೆಂ ತೊ ಹೊಗ್ಡಾಯಿಲ್ಲಿ ಕಾಣಿ ತಾಕಾ ಸಾಂಗ್ಲಿ. ತಾಂಚೆಲಾಗಿಂ ಉಲಯ್ತಾನಾಂಯ್ ಹಾಂವೆಂ ತಿ ಮ್ಹಜಿ ಆದ್ಲಿ ವಿನಂತಿ ಪರತ್ ದವರ‍್ಲಿ. ತುಮ್ಚೆಲಾಗಿಂ ಪ್ರತಿಯೊ ಪುಣೀ ಆಸಾತ್‌ಗೀ ಸರ್. ಪೂಣ್ ತಾಣಿಂಯ್ ನಿರಾಶೆಚಿ ಜಾಪ್ ದಿಲಿ. ತಾಂಚೆಲಾಗಿಂ ತಾಂಚಿ ಏಕ್ ಪ್ರತಿ ಸೊಡ್ಲ್ಯಾರ್ ಹೆರ್ ನಾಂತ್ ಮ್ಹಣಾಲೆ. ತುಕಾ ಜಾಯ್ ತರ್ ಮ್ಹಜಿ ಭಯ್ಣ್ ಮಂಗ್ಳುರ್ ಆಸಾ, ತಿಚೆಕರ‍್ನಾ ದಿಂವ್ಚಿ ವಿಲೆವಾರಿ ಕರ‍್ತಾಂ ಮ್ಹಣಾಲೊ. ಮಾತ್ರ್ ನ್ಹಯ್ ತ್ಯಾ ಕಾಳಾರ್ ಬೂಕ್ ಕಾಡ್ತಾನಾ ಕಸಲೆ ಸಕ್ಕಡ್ ಸಮಸ್ಸೆ ಅಸ್ತಾಲೆ, ಆನಿ ಪ್ರತಿಯೊ ಕಶ್ಯೊ ಕಾಬಾರ್ ಜಾತಾಲ್ಯೊ, ಆನಿ ಕಿತ್ಯಾಕ್ ಕೊಣೀ ಸಾಂಬಾಳ್ನ್ ದವರಿನಾತ್‌ಲ್ಲ್ಯಾವಿಶಿಂ ತಾಣಿಂ ಮ್ಹಾಕಾ ವಿವರ್ ದಿಲೊ.

ಸುನಂದ್ ಮೆಳ್ಳೊ ಖಂಯ್ ಆನಿ ರಾಯ್ ಉಂದಿರ್ ಮೆಳಾನಾಂಗೀ ಮ್ಹಣ್ ಹಾಂವ್ ಮ್ಹಜೆ ಭಿತರ್‌ಚ್ ಸಂತೊಸ್ ಪಾವೊನ್ ಆಸ್‌ಲ್ಲೊಂ. ಸುನಂದಾನ್ ಸಾಂಗ್‌ಲ್ಲ್ಯಾದಿಸಾ ತಾಚಾ ಭಯ್ಣಿಕ್ ಮೆಳ್ಚೆಂ ಆನಿ ರಾಯ್ ಉಂದಿರ್ ಘೆಂವ್ಚ್ಯಾವಿಶಿಂ ರಾಕೊನ್ ಆಸ್‌ಲ್ಲೊಂ. ಹಾಂವ್ ಏಕ್‌ ದೀಸ್ ಕಾಮಾ ನಿಮ್ತಿಂ ಭಾಯ್ರ್ ಗೆಲ್ಲೊಂ ದೊನ್ಪರಾಂ ಘರಾ ಪಾವ್ತಾನಾ ಹೊಕಾಲ್ ಮ್ಹಣಾಲಿ ತುಕಾ ಏಕ್ ಆಸ್ಟ್ರೇಲಿಯಾಥಾವ್ನ್ ಪಾರ್ಸಲ್ ಆಯ್ಲಾಂ. ಆಸ್ಟ್ರೇಲಿಯಾಥಾವ್ನ್ ಖಂಚೆಂ ಪಾರ್ಸಲ್ ಜಾವ್ಯೆತ್ ಮ್ಹಣ್ ಅಜಾಪ್ ಪಾವೊನ್ ಪಳಯ್ತಾನಾ ಕಿತೆಂ ದೆಖ್ಚೆಂ ಸುನಂದಾನ್, ‘ರಾಯ್ ಉಂದಿರ್’ ಬುಕಾಚಿ ತಾಚಿಚ್ ಪ್ರತಿ ಮ್ಹಾಕಾ ಧಾಡ್ನ್ ಸರ್‌ಪ್ರೈಸ್ ದಿಲಾಂ. ಹಾಂವ್ ನಿಜಾಯ್ಕಿ ವಿಜ್ಮಿತ್ ಪಾವ್ಲೊಂ. ಮ್ಹಾಕಾ ಭೋವ್ ವರ್ತೊ ಸಂತೊಸ್ ಭೊಗ್ಲೊ. ಕೂಡ್ಲೆ ಹಾಂವೆಂ ಸುನಂದ್ ಹಾಂಕಾಂ ಫೋನ್ ಕೆಲೆಂ. ತೊ ತಾಚಾ ನಾತಿಚಾ ಜಲ್ಮಾ ದಿಸಾಚಾ ಪಾರ್ಟೆಂತ್ ಆಸ್‌ಲ್ಲೊ. ತರೀ ಮ್ಹಜೆಲಾಗಿಂ ಖೂಬ್ ಉಲಯ್ಲೊ. ಹಾಂವೆಂ ತಾಂಕಾಂ ಮ್ಹಳೆಂ ‘ತುಮಿ ಧಾಡ್ನ್ ದಿಲ್ಲೊ ಹೊ ಬೂಕ್ ನ್ಹಯ್, ಬಗಾರ್ ತುಮ್ಚ್ಯಾ ಕಾಳ್ಜಾಕುಡ್ಕೊಚ್ ತುಮಿ ಧಾಡುನ್ ದಿಲಾ”  ತಾಕಾ ತಾಣಿಂ ದಿಲ್ಲಿ ಜಾಪ್ ‘ತುಕಾ ಖುಶಿ ಜಾಲಿನೇ, ತಿತ್ಲೆಂಚ್ ಮ್ಹಾಕಾ ಪುರೊ.’

ಆತಾಂ ಹಾಂವ್ ತವಳ್ ತವಳ್ ಸುನಂದ್‌ಲಾಗಿಂ ವಿಡಿಯೊ ಕಾಲ್ ಕರ‍್ನ್ ಉಲಯ್ತಾಂ. ತಾಂಚಿ ಅನ್ಯೇಕ್ ಅಪುರ‍್ಬಾಯೆಚಿ ದೀಗ್ ಕಾದಂಬರಿ ‘ಲೂಟ್’ ಕೊಂಕ್ಣೆಂತ್ ವೆಗಿಂಚ್ ಬುಕಾ ರುಪಾರ್ ಪರ್ಗಟ್ ಜಾಂವ್ಚ್ಯಾರ್ ಆಸಾ. ಹಾಂವೆಂ ಎದೊಳ್‌ಚ್ ತಿ ವಾಚ್ಲ್ಯಾ. ಉತ್ತೀಮ್ ಶೈಲಿ ಆನಿ ಭಾಸ್ ತಶೆಂಚ್ ಭೋವ್ ಅಪುರ‍್ಬಾಯೆನ್ ಬಾಂಧುನ್ ಹಾಡ್‌ಲ್ಲಿ ರೀತ್. ವಾಚ್ಪ್ಯಾಕ್ ಧರ‍್ನ್ ದವರ‍್ಚಿ ಕಾದಂಬರಿ. ಹ್ಯಾ ಕಾದಂಬರಿ ಖಾತಿರ್ ತಾಣಿಂ ಜಾಯ್ತ್ಯಾ ದಿಸಾಂಚಿ ವಾಂವ್ಟ್ ಕಾಡ್ಲ್ಯಾ ಆನಿ ಮ್ಹಿನತ್ ಕೆಲ್ಯಾ. ವಿಶೇಸ್ ರಿತಿಚಿ ಸೊಸ್ಣಿಕಾಯ್ ಸಾಂಬಾಳ್ಳ್ಯಾ. ಹಿ ತಾಂಚಿ ಸ್ವಂತ್ ಕಾದಂಬರಿ ಜಾವ್ನಾಸೊನ್, ಕೊಂಕ್ಣೆಂತ್ ವಾಚುಂಕ್ ಮೆಳ್ಚಿ ಆಮ್ಚೆಂ ಭಾಗ್ ಮ್ಹಣ್ಯೆತ್.

ಸುನಂದ್‌ಯೀ ಮೆಳ್ಳೊ, ರಾಯ್ ಉಂದಿರ್‌ಯೀ ಮೆಳ್ಳೊ. ಅತಾಂ ಆಮಿ ಸಾಹಿತ್ಯಾಚಾ ಗಜಾಲಿನಿಂ ಸದಾಂಯ್ ಭೆಟ್ತಾಂವ್. ಹೆಂ ಲೇಖನ್ ಬರಯ್ತಾನಾ ಮ್ಹಜ್ಯಾ ಮತಿಂತ್ ಝಳ್ಕಾಲ್ಲ್ಯೊ ಚಾರ್ ಗಜಾಲಿ ಮ್ಹಳ್ಯಾರ್ ಜರ್ ತ್ಯಾ ದಿಸಾ ಮ್ಹಾಕಾ ಇನಾಮ್ ಜಾವ್ನ್ ಬೂಕ್ ಮೆಳೊಂಕ್ ನಾತ್‌ಲ್ಲೆ ತರ್ ಹಾಂವ್ ಸಾಹಿತ್ಯ್ ಮ್ಹಳ್ಳ್ಯಾ ದಿರ್ವ್ಯಾಚಿ ರೂಚ್ ಚಾಕೊಂಕ್ ವಂಚಿತ್ ಜಾತೊಂ ಕೊಣ್ಣಾ. ದುಸ್ರೆಂ ಕೊಂಕ್ಣೆಂತ್ ಬರ‍್ಯಾ ಕಾದಂಬರಿಂಕ್ ಸುಕಿಧಾಡ್ ಆಸ್ಚ್ಯಾ ಹ್ಯಾ ಕಾಳಾರ್ ಸುನಂದ್ ಹಾಣಿಂ ಅತಾಂಯ್ ಬರಂವ್ಚ್ಯೊ ಕಾದಂಬರಿ ಸಾಹಿತ್ಯಾಕ್ ಜಿವೆಂ ದವ್ರುಂಕ್ ಸಕ್ಲ್ಯಾತ್. ತಿಸ್ರೆಂ ಆಮ್ಚ್ಯಾ ಪ್ರಾಯೆ ಮಧೆಂ ಜಾಯ್ತೊ ಅಂತರ್ ಆಸ್ಲ್ಯಾರೀ ಖಾಲ್ತೆಂಪಣ್ ಆಸ್ಲ್ಯಾರ್ ಹಾಂವ್ ಆನಿ ಸುನಂದ್ ಜಾಂವ್ ವಾ ಹಾಂವ್ ಆನಿ ಹೆರ್ ಕೊಣೀ ಜಾಂವ್ ಸಮಾಸಮ್ ಜಾಂವ್ಕ್ ಸಾಧ್ಯ್ ಆಸಾ. ಚವ್ತಿ ಆನಿ ವಿಶೇಸ್ ಗಜಾಲ್. ಹಾಂವೆಂ ರಾಯ್ ಉಂದಿರ್ ಬುಕಾವಿಶಿಂ ಆನಿ ಸುನಂದ್‌ವಿಶಿಂ ಇತ್ಲೆಂ ಸಕ್ಕಡ್ ಬರವ್ನ್ ಅಖೇರ್ ಕೆಲೆಂ ತರ್ ತಿ ಫಕತ್ ವರ್ದಿ ಜಾಯ್ತ್. ಪೂಣ್ ರಾಯ್ ಉಂದಿರ್ ಪರತ್ ಮೆಳ್‌ಲ್ಲ್ಯಾ ಖುಶೆಕ್ ಕಾಂಯ್ ತರೀ ವಿಶೇಸ್ ಘುಂವ್ಡಿ ವಾ ಪರಿಣಾಮ್ ದೀಜಾಯ್. ದೆಕುನ್ ರಾಯ್ ಉಂದಿರ್ ಪರತ್ ಮೆಳ್ಳಾ, ಸುನಂದ್ ಹಾಣಿಂ ತಾಂಚೊ ಕಾಳ್ಜಾಕುಡ್ಕೊ ಮ್ಹಾಕಾ ಧಾಡುನ್ ದಿಲಾಂ, ಪೂಣ್ ಹೆಂ ಆನಿ ಮುಕಾರ್ ಹೊಗ್ಡಾವ್ನ್ ವೆಚೆಂ ಬಿಲ್ಕುಲ್ ನಾಕಾ. ದೆಕುನ್ ರಾಯ್ ಉಂದಿರ್ ಆನಿಂ ಥೊಡ್ಯಾಚ್ ದಿಸಾನಿಂ ಗೂಗಲ್ ಪ್ಲೇ ಬುಕ್ಸಾಂತ್ ಭರ‍್ತಿ ಜಾತಲೊ. ಹ್ಯಾ ಮಾರಿಫಾತ್ ರಾಯ್ ಉಂದಿರ್ ಕೊಣಾಯ್ಕಿ, ಸಂಸರಾಚಾ ಖಂಚ್ಯಾಯ್ ಮುಲ್ಯಾಂತ್, ಮೊಬಾಯ್ಲಾರ್‌ಚ್ ವಾಚುಂಕ್ ಮೆಳ್ತಲೊ. ಎಕಾಚ್ ಉತ್ರಾನ್ ಸಾಂಗ್ಚೆಂ ತರ್ ರಾಯ್ ಉಂದಿರ್ ಸಾಸ್ಣಾಕ್ ಉರ‍್ತಲೊ.

ಗೂಗಲ್ ಪ್ಲೇ ಬುಕ್ಸ್ ಲಿಂಕ್ :  https://play.google.com/store/books/details?id=J1TKEAAAQBAJ

ಮ್ಹಜೊ ‘ಫೆಲಿಸ್ ನವಿಡಾಡ್’ ಆಯ್ಲೆವಾರ್‌ಚ್ ಗೂಗಲ್ ಪ್ಲೇ ಬುಕ್ಸಾಂತ್ ಭರ‍್ತಿ ಜಾಲ್ಲೊ. ಸುನಂದ್ ಹಾಂಕಾಂ ಹಾಂವೆಂ ಹಿ ಗಜಾಲ್ ಸಾಂಗ್ಲಿ ಆನಿ ‘ರಾಯ್ ಉಂದಿರ್’ ಬೂಕ್ ಗೂಗಲ್ ಪ್ಲೇ ಬುಕ್ಸಾಂತ್ ಘಾಲ್ಲ್ಯಾಂ ಮ್ಹಳೆಂ. ತಾಣಿಂ ಹೊ ಬೂಕ್ ಪರತ್ ಬರವ್ನ್, ಹಫ್ತ್ಯಾ ಭಿತರ್ ಮ್ಹಾಕಾ ಧಾಡ್ನ್ ದಿಲೊ. ಕುಲ್ಶೇಕರ‍್ಚೊ ಸಾಫ್ಟ್‌ವೇರ್ ಇಂಜಿನಿಯರ್, ಮಾನೆಸ್ತ್ ಕೇರೊನ್ ಮಾಡ್ತಾ, ಕೊಂಕ್ಣಿ ಬೂಕ್ ಗೂಗಲ್ ಪ್ಲೇ ಬುಕ್ಸಾಂತ್ ಘಾಲ್ಚೊ ವಾವ್ರ್ ಕರುನ್ ಆಸಾ. ಎದೊಳ್‌ಚ್ ಪಾಂಚ್ ಬೂಕ್ ತಾಣೆ ಭರ‍್ತಿ ಕೆಲ್ಯಾತ್. ‘ರಾಯ್ ಉಂದಿರ್’ ಸವೊ ಬೂಕ್ ಜಾತಲೊ. ರಾಯ್ ಉಂದಿರ್ ಮೆಳ್ಳೊ. ತಾಕಾ ಪರತ್ ನೆಟಯ್ಲಾ, ಪರತ್ ಸುಂರ‍್ಗಾರಾಯ್ಲಾ. ಆನಿ ಆಮ್ಚೆಂ ಮೊಬಾಯ್ಲ್ ಪುಣೀ ಭಾಯ್ರ್ ಪಡ್ಲ್ಯಾರೀ, ರಾಯ್ ಉಂದಿರ್ ಬಿಲ್ಕುಲ್ ಭಾಯ್ರ್ ಪಡ್ಚೊನಾ.