ಭುಂಯ್ಕಾಂಪ್

473

ಪ್ರಕೃತಿ ಮ್ಹಳ್ಯಾರ್ ಸಮಷ್ಠಿ ರಚ್ಣಿ, ಏಕ್ ಕೂಡ್ ಜಶೆಂ. ಮಾಗಿರ್ ತಾಂತು, ಆಕಾಸ್, ಭುಂಯ್, ದರ್ಯೊ, ಸುರ್ಯೊ ಸಗ್ಳೆ ವಿಸ್ವೆ – ತ್ಯಾ ಸಮಷ್ಠಿ ಕುಡಿಚೆ. ಜೆನ್ನಾಂ ಪರ್ಯಾಂತ್ ಸರ್ವ್ ವಿಸ್ವೆ ಎಕಾಮೆಕಾ ಸೊಡ್‌ದೊಡಿಂತ್ ಆನಿ ಸಹಕಾರಾಂತ್ ಕಾಮ್ ಕರುನ್ ಆಸ್ತಾತ್, ಸರ್ವ್ ಸೊಂಪೆಂ. ಏಕ್ ವಿಸ್ವೊ ಜರಿ ಜಖಂ ಜಾಲೊ ಆನಿ ಕಾಮ್ ಕರ್ಚೆಂ ರಾವಯ್ಲೆಂ ವಾ ಉಪ್ರಾಟ್ಲೊ ತರೀ – ಭುಂಯ್ಕಾಂಪ್, ವಾದಾಳ್, ಸುನಾಮಿ ಸುರು, ಸಮಷ್ಠಿ ರಚ್ಣೆಂತ್.

ಪ್ರಕೃತಿ ಮ್ಹಳ್ಯಾರ್ ಜೀವ್ – ಮನಿಸ್, ಮೊನ್ಜಾತ್, ಸುಕ್ಣಿಂ – ಸಾವ್ಜಾಂ ವ ರೂಕ್ ಝಾಡಾಂಚೊಂ ಸಯ್ತ್.

ಪ್ರಕೃತಿ ಮ್ಹಳ್ಯಾರ್ ಸಂಬಂದ್ – ಮನ್ಶ್ಯಾಂ – ಮನ್ಶ್ಯಾಂ ಮಧ್ಲೆ. ಮೋಗ್ ಆನಿ ವಿಶ್ವಾಸ್ ಹ್ಯಾ ಜಿವಾಚೆ ಪ್ರಮುಕ್ ವಿಸ್ವೆ. ಹಾಂಗಾಸರೀ ಎಕಾ ವಿಸ್ವ್ಯಾಕ್ ಜರಿ ಜಖಂ ಜಾಲಿ – ನಾಚ್ ಸುರು. ಪಾವ್ಟಿಂಚ್ಯಾಕ್ ನಾಚ್ ಸುರು ಜಾಲೊ, ಮಾಗೀರ್ ಖಂಯ್ಚೊ ಗರ್ಭ್ – ಖಂಯ್ಚಿಂ ಬಾಳಾಂ ? ದೆಕುನ್ ಕವಿತಾ ಮ್ಹಣ್ತಾಗಾಯ್ – ಹಿಚೆ ಪಾಂಯ್ ರಾವ್ಲೆನಾಂತ್, ನಾಚ್ ಥಾಂಬ್ಲೊ ನಾಂ , ಗರ್ಭ್ ಆಪ್ಲ್ಯಾಚ್ ಬಾಳಾಂಕ್ ಗಿಳ್ತಾನಾ . . .

ರುಪ್ಣೆಂ ಏಕ್ ಮುಕಾರ್ ದವರುನ್, ರುಪಾಂ ಅನೇಕ್ ದರ್ಶಾಂವ್ಚಿಂ ಅಪ್ರೂಪ್ ಕವಿತಾ.

ಹಿಂವಾಳ್ಯಾ ದಿಸಾಚಾ ತಯಾರಾಯೆಂತ್ ಬುಡ್ಲೆಲ್ಯಾ ಭುಂಯ್ಕ್
ಆಯ್ಲಿ ಎಕಾಚ್ಚಾಣೆ ನಾಚ್ಪಾಚಿ ವೋಡ್
ಮನಿಸ್ ನಿದೆಂತ್ ಆಸಾತ್ ತರೀ ಪರ್ವಾ ನಾಂ
ಸಂಗೀತಾವಿಣೆಂಚ್ ಹಿಚೊ ನಾಚ್ ಸುರು

ಹಿಚ್ಯಾ ಭರ್ಲೆಲ್ಯಾ ಜಿವಾಚ್ಯಾ ಪಯ್ಲ್ಯಾ ನಾಚ್ಪಾ ಮೆಟಾಕ್
ಥರ್ಥಲ್ಲೆಂ ಅಂಗಣ್, ಆಕ್ಲಾಸಾನ್ ತೋಂಡ್ ಉಗ್ಡುನ್
ತರೀ ಹಿಚೆ ಪಾಂಯ್ ರಾವ್ಲೆನಾಂತ್, ನಾಚ್ ಥಾಂಬ್ಲೊ ನಾಂ
ಗರ್ಭ್ ಆಪ್ಲ್ಯಾಚ್ ಬಾಳಾಂಕ್ ಗಿಳ್ತಾನಾ

ತಾಳ್ ಚುಕ್ಲೆಲೆ ಹಿಚೆ ಪಾಂಯ್ ಮಸ್ತೆನ್ ನಾಚ್ತಾನಾ
ಪಡ್ಲಿಂ ಮೊಡಿಂ ನಾಸ್ತಾಂ ಮರ್ಣಾಚಿ ಖಬಾರ್
ನಾಚಾಚೊ ಹೊರ್ಬೊಸ್ ತಕ್ಲೆಕ್ ಚಡ್ತಾನಾ
ಆಸ್ರೊ ನಾಸ್ತಾನಾ ಗೆಲಿಂ ಕುಟ್ಮಾಂ ಹಜಾರ್

ನಾಚ್ತಾ ನಾಚ್ತಾ ಧರ್ತಿ ಕಮರ್ ಹಾಲಾಯ್ತಾ
ರಂಗಾಳ್ ಸುಂರ್ಗಾರ್ ಲೆಪುನ್ ಸೊಭಾಯೆನ್ ಉಬಿಂ ರಾವ್ಲೆಲ್ಯಾ
ಬುರುಜಾಂಚಿ ಪೆಂಕ್ಡಾಂಚ್ ಮೊಡುನ್ ಧೂಳ್ ಜಾತಾ
ರುದಾನ್ ಕರ್ತೆಲ್ಯಾಂಚಿ ಗತ್ ನಾಸ್ತಾಂ.

ಶೆಕಿಂ, ಕಾರಣ್ ನಾಸ್ತಾಂ ನಾಚೊಂಕ್ ಲಾಗ್ಲೆಲಿ ಧರ್ತಿ
ನಾಚ್ ರಾವೊನ್ ಗೆಲಿ ಮುಕಾರ್
ಚೀರ್ ಪಡ್ಲೆಲೆಂ ಆಪ್ಲೆಂ ನಾಚ್ಪಾ ವಸ್ತುರ್ ಸಾಂಡುನ್
ಮರ್ಣಾ ಪಾಂಯ್ಜಾಣಾಂ ಸಾಂಡುನ್ ಸಗ್ಳ್ಯಾನಿಂ

■ ಡಯಾನಾ ಶರಲ್ ಲೋಬೊ