ಆದಿಂ ಏಕ್ ಕಾಳ್ ಆಸ್‌ಲ್ಲೊ ಆನಿ ಹಾಂವ್ ತಾಕಾ ‘ಸತ್ತ್ಯಾಚೊ ಕಾಳ್’ ಮ್ಹಣ್ಂಚ್ ಆಪಯ್ತಾಂ. (ಮ್ಹಜಿ ಚೂಕ್ ಜಾಂವ್ಕ್‌ಯ್ ಪುರೊ) ತ್ಯಾ ಕಾಳಾರ್ ಉಬಿ ದೊತೊರ‍್ನ್ ಆಡ್ ದೊತೊರ‍್ನ್ ಮಾತ್ರ್ ಚಲ್ತಾಲಿ. ತ್ಯಾ ಕಾಳಾರ್ ರೆತಿರೊ ಚಲಂವ್ಚೆಂ, ಯೂಟ್ಯೂಬಾರ್ ಮಿಸಾಂ ಘಾಲ್ಚಿಂ, ಶೆರ‍್ಮಾಂವ್ ರೆಕಾರ‍್ಡ್ ಕರ್ನ್ ವಾಟ್ಸಾಪಾರ್ ವಾಂಟ್ಚೆಂ, ಪಾಸ್ಟರಲ್ ಪ್ಲ್ಯಾನ್, ಕಾರಿಸ್ಮಾತಿ, ಅಗಿಯಾರಿಮೆಂತೊ, ಬಾತ್ತೀಸ್ ಕಮೀಶನಾಂ ಹೆಂ ಸಕ್ಕಡ್ ನಾತ್‌ಲ್ಲೆಂಚ್. ಕೊಂತ್, ಬೆಂತಿಣ್, ತೇರ‍್ಸ್ ಆನಿ ವಿಗಾರಾಚೆಂ ಲಾಂಬ್ ಖಾಡ್ ಆನಿ ತಾಂತ್ಲ್ಯಾನ್ ಉಸಾಳ್ಚೆ ಶೆರ‍್ಮಾಂವ್ ಸೊಡ್ಲ್ಯಾರ್ ಲೊಕಾಕ್ ಹೆರಾ ಖಂಚ್ಯಾಚಿಯ್ ಖಂತ್ ನಾತ್‌ಲ್ಲಿಚ್.
ತಸಲ್ಯಾ ಕಾಳಾರ್ ಘರ‍್ಚಿ ಧನಿನ್ ಎಕ್ಲಿ ರೊಜಾರಿಚೆಂ ಕೊಂತ್ ಘೆವ್ನ್ ತೇರ‍್ಸ್ ರೊಜಾರ್ ಕರ‍್ತಾನಾಂ, ಘರ್ ಕಾಮಾಕ್ ರಾವ್‌ಲ್ಲ್ಯಾ ಆಳಾಂಚ್ಯಾ ಬಾಯ್ಲೆನ್ ’ಮ್ಹಾಕಾಯ್ ರೊಜಾರ್ ಶಿಕಯ್ ಬಾಯೆ’ ಮ್ಹಣ್ ಆಡ್ದೊಸ್ ಮಾಗ್ತಾನಾಂ ಧನಿನೆನ್, ’ತುಕಾ ಕಾಲೆಂಗೋ ರೊಜಾರ್, ಮಾಂಡ್ ಕುರ‍್ಪೊಣ್ ಪಾವ್ ದೆವಾ ಮ್ಹಳ್ಯಾರ್ ಪುರೊ ತುವೆಂ’ ಮ್ಹಣ್ ಸಮ್ಜಯ್ಲೆಂ ಖಂಯ್ ಆನಿ ’ಮಾಂಡೊ ಕುರ‍್ಪೊಣ್ ಪಾವ್ ದೆವಾ’ ಮ್ಹಣ್ಂಚ್ ತೆಂ ಸತ್ತಿ ಚಾಕರ‍್ನ್ ಸರ‍್ಗಾಕ್ ಪಾವ್ಲೆಂ ಖಂಯ್. ತಿತ್ಲೊ ಸತ್ತಿ ಕಾಳ್ ತೊ.
ತಸಲ್ಯಾ ಕಾಳಾರ್ ವ್ಹಾಳ್ ಉತರ‍್ನ್, ಘಾಟಿ ಚಡುನ್, ಗುಡೆ ದೆಂವುನ್ ಲೋಕ್ ಮಿಸಾಕ್ ಯೆತಾಲೊ. ಹೊನ್ನಾವರ್ ಸೊಡ್ಲ್ಯಾರ್ ಗಂಗೊಳ್ಳಿ, ಹೆಣೆಂ ಕುಂದಾಪುರ್ ಮಾಗಿರ್ ಕಲ್ಯಾಣ್ಪುರ್, ಥಂಯ್‌ಥಾವ್ನ್ ಶಿರ‍್ವಾಂ, ಘಜ್ನಿ, ಆಯ್ಕೊಳ್, ಪೆಜಾರ್, ಹೊಸ್ಪೆಟ್, ರುಜಾಯ್ ಮಿಲಾರ್, ಪಾಣೀರ್, ಆಗ್ರಾರ್, ಮೊಡಾಂಕಾಪ್ ಮ್ಹಣ್ ಸೊಡ್ಲ್ಯಾರ್ ಇಗರ‍್ಜೊಯ್ ಉಣ್ಯೊ ಇಗರ‍್ಜೊ ಆಸಾತ್ ಮ್ಹಣ್ ಸಕ್ಡಾಂನಿ ಸಕ್ಡಾಕ್ ವೆಚೆಪರಿಂಯ್ ನಾತ್‌ಲ್ಲೆಂಮೂಂ. ಘರಾಮುಳಾಂತ್ ಆಸ್ಚಿ ಇಗರ‍್ಜ್ ಪಾದ್ರುವಾದೊ ಜಾಲ್ಯಾರ್ ಪ್ರೊಪಗಾಂದಾಚ್ಯಾಂನಿ ಥಂಯ್ ವೆಚೆಪರಿಂ ನಾಂ ಬಾರಾ ಮಯ್ಲಾಂ ಪಯ್ಸ್ ಆಸ್ಚ್ಯಾ ಪ್ರೊಪಗಾಂದಾಚ್ಯಾ ಇಗರ‍್ಜೆಕ್‌ಚ್ ವಚಾಜೆ.
ಅಶೆಂ ಆಮ್ಚ್ಯಾ ಲೊಕಾಕ್ ಪಯ್ಸ್ ಪಯ್ಸ್ ಮಿಸಾಂಕ್ ವಚಾಜೆ. ಗಾಂವಾರ್ ಆಸ್‌ಲ್ಲ್ಯಾ ದೋನ್ ತೀನ್ ಸಾವ್ಕಾರಾಂಲಾಗಿಂ ಘೊಡೊಗೀ, ಬೋಯ್ಲ್‌ಗೀ ಬಾಂದ್‌ಲ್ಲ್ಯೊ ಗಾಡಿಯೋ ಆಸ್ತಾಲ್ಯೊ. ಉರ‍್ಲಲ್ಯಾಂನಿ ವೊರಾಂವೊರಾಂ ಪಯ್ಲೆಂಚ್ ಘರಾಥಾವ್ನ್ ಮಿಸಾಕ್ ಭಾಯ್ರ್ ಸರ‍್ಚಿ ಗರ‍್ಜ್ ಆಸ್‌ಲ್ಲಿ. ಪೆಂಕ್ಡಾಕ್ ಏಕ್ ಕಾಷ್ಟಿ, ಮಾತ್ಯಾರ್ ಏಕ್ ಕಾಷ್ಟಿ ಬಾಂದುನ್ ದಾದ್ಲೆ ಸುಟ್ತಾಲೆ. ಬಾಯ್ಲಾಂ ಗಾಗ್ರ್ಯಾರ್ ವೊರ‍್ಲಾಚೆ ಕುಡ್ಕೆ, ಕಮ್ಮಾಯ್, ವೋಯ್ಲ್, ಕಾಂಬ್ಳಿ, ವೊಲಿ ನ್ಹೆಸುನ್ ವೆತಾಲಿಂ ಗ್ರೇಸ್ತಾಂಚ್ಯಾ ಸ್ತ್ರೀಯಾಂಲಾಗಿಂ ಕಾಪ್ಡಾಂ ಕಿರ‍್ಗ್ಯೊ, ಬಾಜ್ವೊ ಆಸ್ತಾಲ್ಯೊ. (ಕೊಣೆಂಗೀ ಆಮ್ಚೆಪಯ್ಕಿ ಭೋವ್ ಥೊಡಿಂ ವ್ಹಡಾಂ ಸಂಭ್ರಮಿಕ್ ಕಾರ‍್ಯಾಂನಿ ನ್ಹೆಸ್ತಾಲಿಂ ತೆಂ ಕುತಾಂವ್ ತೊಡಪ್, ಉರ‍್ಮಾಲ್ ಕಿರ‍್ಗಿಬಾಜು ನ್ಹೆಸಪ್‌ಚ್ ಆಮ್ಚ್ಯಾ ಲೊಕಾಚೆಂ ಸದಾಂಚೆಂ ನ್ಹೆಸಪ್ ಮ್ಹಣ್ ಚಿತ್ರಯ್ಲಾಂ, ಖರ‍್ಯಾನ್ ಆಮ್ಚೆ ಮ್ಹಾಲ್ಘಡೆ ತ್ಯಾ ಕಾಳಾರ್ ಕಾಷ್ಟೆಲೇಸ್ ಆನಿ ವೊರ‍್ಲಾಚೆಂ ನ್ಹೆಸಪ್ ಸದಾಂ ನ್ಹೆಸ್ತಾಲಿಂ ಆನಿ ತಿತ್ಲ್ಯಾಕ್‌ಚ್ ಆಮ್ಕಾಂ ಗಾಂವಾರ್ ಬಾಯಮ್ಮ-ಪರ‍್ಬುಲು ಮ್ಹಣ್ತಾಲೆ)
ಸನ್ವಾರಾಚ್ ಸಕ್ಕಡ್ ಮುಸ್ತಾಯ್ಕಿ ಧುವ್ನ್ ನಿತಳ್ ಕರ‍್ತಾಲಿಂ, ಗರ‍್ಜೆಚಿ ಮುಸ್ತಾಯ್ಕಿ ದೊದೋನ್ ಘೆತಾಲಿಂ. ಕಿತ್ಯಾಕ್? ವಾಟೆರ್ ವ್ಹಾಳೊ ಉಪ್ಯೆತಾನಾಂ ಏಕ್ ಭಿಜ್ತಾ ತೆಂ ಪೀಳ್ನ್ ಆನ್ಯೇಕ್ ನ್ಹೆಸ್ಚೆಂ. ಫಾಂತ್ಯಾರ್ ಭಾಯ್ರ್ ಸರ್‌ಲ್ಲಿಂ ಆಮ್ಚಿಂ ಮ್ಹಾಲ್ಘಡಿಂ ಖಾಲಿಪಾಂಯಾಂನಿ ಕಾಂಟೆಕುಂಟೆ, ರಾನ್ ವಾಟೊ, ಗುಡೆ ಬೆಟಾಂ, ತೋಡ್, ವ್ಹಾಳೆ ಉತ್ರುನ್ ಇಗರ‍್ಜೆ ಬಾಗ್ಲಾರ್ ಪಾವ್ತಾಲಿಂ. ಸಭಾರಾಂ ಇಗರ‍್ಜೆಚಿ ತೋರ್, ಘಾಂಟಿ ತೋರ್, ಖುರಿಸ್ ದಿಷ್ಟಿಕ್ ಪಡ್‌ಲ್ಲೆ ಕೂಡ್ಲೆ ಥಂಯಿಂಚ್ ದಿಂಬ್ಯೆರ್ ಪಡುನ್ ‘ಇನೊಮಿನೆ ಪಾತ್ರೆ’ (ಬಾಪಾಚೆ ಪುತಾಚೆ) ಕಾಡ್ತಾಲಿಂ.
ಕುಮ್ಗಾರ್ ಸೆಂವ್ಚ್ಯಾ ವೆಕ್ತಿನ್ ಆದ್ಲ್ಯಾ ಸಾಂಜೆಥಾವ್ನ್ ಉಪಾಸ್ ರಾವಾಜೆ ಮ್ಹಣ್ ಘಟ್ ಪಾತ್ಯೆಣಿ ಆಮ್ಚ್ಯಾ ಮ್ಹಾಲ್ಘಡ್ಯಾಂಚಿ ಆಸ್‌ಲ್ಲಿ ದೆಕುನ್ ಸನ್ವಾರಾ ಸಾಂಜೆಥಾವ್ನ್ಂಚ್ ತಿಂ ಉಪಾಶಿಂ ರಾವ್ತಾಲಿಂ. ಅನ್‌ಉದಕ್ ಸಯ್ತ್ ಆಪಡ್ನಾಶೆಂ ತಿಂ ಪಯ್ಣಾರ್ ವೆತಾಲಿಂ. ಮೀಸ್‌ಯ್ ಲಾಂಬ್‌ಚ್ ಆನಿ ಖಾಂವ್ಚೆಂ ಕಿತೆಂ ಆಸ್ಲ್ಯಾರೀ ಮಿಸಾ ಉಪ್ರಾಂತ್‌ಚ್ ಜಾಲೆಂ. ದೆಕುನ್ಂಚ್ ಹರ‍್ಯೆಕಾ ಇಗರ‍್ಜೆ ಬಾಗ್ಲಾರ್ ಏಕ್ ಹೊಟೇಲ್ ವಾಡುನ್ ಆಯಿಲ್ಲೆಂ ಆಮಿ ಪಳೆತಾಂವ್. ಆಜೂನ್ ನಾಡಾಂನಿ ಹರ‍್ಯೆಕಾ ಇಗರ‍್ಜೆ ಮುಕಾರ್ ಏಕ್ ಬಸ್ಟ್ಯಾಂಡ್ ಆಸಾ ಆನಿ ಬಸ್ಟ್ಯಾಂಡಾ ಬಾಗ್ಲಾರ್ ಏಕ್ ಹೊಟೇಲ್ ಆಸಾ.
ತಿತ್ಲೆ ಕಷ್ಟ್ ಕಾಡ್ನ್ ಆಯಿಲ್ಲ್ಯಾಂಚೆಂ ಮೀಸ್ ಜಾಲ್ಯಾರೀ ಕಶೆಂ. ಮೀಸ್ ಆಸ್ತಾ ಮ್ಹಣ್ ಖಂಡಿತ್ ನಾತ್‌ಲ್ಲೆಂ. ವಿಗಾರಾಕ್ ಶೆಳ್ ಜಾಲ್ಯಾರ್, ತಾಪ್ ಆಯ್ಲ್ಯಾರ್, ಮೀಸ್ ನಾಂ, ಮಿರೊಣ್ ಯೇವ್ನ್ ಲೊಕಾಂಕ್ ’ಆಜ್ ಮೀಸ್ ನಾಂ ತುಮಿಂ ತೇರ‍್ಸ್, ದೊತೊರ‍್ನ್ ಸಾಂಗುನ್ ಘರಾ ವಚಾ’ ಮ್ಹಣ್ತಾಲೊ. ಸತ್ಯಾಚೊ ಕಾಳ್ ತೊ ಲೋಕ್ ಸಕ್ಕಡ್ ದಿಂಬಿ ಘಾಲ್ನ್ ಮಿರ‍್ಣಿಚ್ಯಾ ಮುಕೇಲ್ಪಣಾರ್ ಭಕ್ತಿನ್ ತೇರ‍್ಸ್ ಸಾಂಗುನ್ ಘರಾ ವೆತಾಲೊ. ಎಕಾದವೆಳಾ ವಿಗಾರಾನ್ ಸನ್ವಾರಾ ರಾತಿಂಥಾವ್ನ್ ಮಿಸಾ ಪರ್ಯಾಂತ್ ಚುಕುನ್ ಕಾಂಯ್ ಏಕ್ ಘೊಟ್ ಉದಕ್ ಪಿಯೆವ್ನ್ ಜಾಲಾಂ ತರ್‌ಯ್ ಮೀಸ್ ಆಸಾನಾತ್‌ಲ್ಲೆಂ. ಕುಮ್ಸಾರಾಂ ಮಾತ್ರ್ ಆಸ್ತಾಲಿಂ. ಪಯ್ಶಿಲ್ಯಾ ಹೆರ್ ಫಿರ‍್ಗಜೆಚೊ ಹಾಂಗಾ ಮೀಸ್ ಸಾಂಗುಂಕ್ ಯೆತಾ ಆನಿ ಕಾರಣಾಂತರ್ ತೊ ಯೇವ್ನ್ ಪಾವೊನಾಂ, ವಾಟೆರ್ ಕಾಂಯ್ ಅನಾಪತ್ತ್ ಜಾಲಾಂ ತವಳ್‌ಯ್ ಲೊಕಾಕ್ ಮೀಸ್ ನಾಂ.
ವಿಗಾರ್ ಆಸಾ ತರ್, ಮೀಸ್ ಆಸಾ ತರ್ ಪಯ್ಲೆಂ ಕುಮ್ಸಾರಾಂ. ಉಪ್ರಾಂತ್ ಲೊಕಾಖಾತಿರ್ ಮಿಸಾಚಿ ಮಾಂಡಾವಳ್. ಆತಾಂಚೆಪರಿಂ ಲೊಕಾಸವೆಂ ಮಿಸಾಚೆಂ ಚಿಂತಪ್ ನಾತ್‌ಲ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ಮೀಸ್ ಸಕ್ಕಡ್ ಯಾಜಕ್‌ಚ್ ಚಲಯ್ತಾಲೊ. ಲೊಕಾಕ್ ಪಾಟ್ ಕರ್ನ್ ಆಲ್ತಾರಿಕ್ ಮುಕ್ ಕರ್ನ್ ಮೀಸ್ ಚಲ್ತಾಲೆಂ. ಮಿಸಾಚಿ ಸಗ್ಳಿ ವೆವಸ್ತಾ ಲಾತ್ಯಾ ಭಾಶೆನ್ ಆಸ್‌ಲ್ಲಿ ಜಾಲ್ಲ್ಯಾನ್ ಸಾಕ್ರಿಸ್ತಾಂವ್ (ಮಿರೊಣ್) ಆನಿ ವಿಗಾರಾಕ್ ಮಾತ್ರ್ ಮೀಸ್ ಉರ್‌ಲ್ಲಿಂ ಜೊರಾನ್ ತೇರ‍್ಸ್ ಸಾಂಗುನ್ಂಚ್ ಆಸ್ತಾಲಿಂ. ಕಾಂಯ್ ಲಾತೆಂ ಶಿಕ್‌ಲ್ಲೊ ಭೋವ್ ಥೊಡೊ ಲೋಕ್ ಜಾಪಿ ದಿತಾಲೊ. ಲಾಂಬ್ ಕಂತಾರಾಂ ಆನಿ ಮಿಸಾಚಿಂ ಮಾಗ್ಣಿಂ ಆಸ್‌ಲ್ಲಿಂ, ವಿಗಾರಾಚೆಂ ಆನಿ ಮಿರೊಣಿಚೆಂ ಸೊಡ್ಲ್ಯಾರ್ ಮಿಸಾಂತ್ ಕಂತಾರಿಸ್ತಾಂಚೆಚ್ ಕಾರ‍್ಬಾರ್; ಏಕ್ ಗ್ಲೋರಿಯಾ ಪಂದ್ರಾ ಮಿನುಟಾಂ ಕಾಡ್ತಾಲೆಂ. ಹರ‍್ಯೆಕ್ ಸಂದರ‍್ಭಾರ್ ಸಂಗೀತ್ ಲೊಕಾಕ್ ಸಮಾಧಾನ್ ದಿಂವ್ಚ್ಯಾಕ್ ವಾಪಾರ‍್ತಾಲೆ. ಪಾತೆರ್ ನೊಸ್ತೆರ್ (ಆಮ್ಚ್ಯಾ ಬಾಪಾ) ಸಾಂಕ್ತುಸ್ ಸಾಂಕ್ತುಸ್ (ಪವಿತ್ರ್ ಪವಿತ್ರ್), ಕಿರಿಯೇ ಎಲೆಇಸೋನ್ ( ಸೊಮಿಯಾ ಕಾಕ್ಳುತ್ ಕರ್) ಹೆಂ ಸಕ್ಕಡ್ ಗಾಯನ್ ಜಾತಾನಾಂ ಲೋಕ್ ಉರ‍್ಭೆನ್ ಭರುನ್ ಗಾಯ್ತಾಲೊ. ಫ್ರಾದ್ ಸಾಯ್ಭ್ ಮಿಲಾರ್ ವಿಗಾರ್ ಆಸ್ತಾನಾಂ ತೊ ಫ್ರೆಂಚ್ ಪ್ರಭಾವಾಚೊ ದೆಕುನ್ ಪುಡ್ತುಗೇಝ್ ಆನಿ ಲಾತ್ಯಾ ಲಾಂಬಾಯೆಥಾವ್ನ್ ಮೀಸ್ ತಿಕ್ಕೆಶೆ ಮೊಟ್ವೆಂ ಕರ‍್ಯಾಂ ಮ್ಹಣ್ ತಾಣೆಂ ಕೆಲ್ಲ್ಯಾ ಪ್ರೇತನಾಕ್ ತಾಕಾ ವಿಪ್ರೀತ್ ವಿರೋಧ್ ಸೊಸುಂಕ್ ಮೆಳ್ಳೊ.
ಇತ್ಲ್ಯಾ ಸರ‍್ವ್ ಕಷ್ಟಾಂಮಧೆಂಯ್ ಸಾಯ್ಭ್ ಉಕಲ್ತಾನಾಂ ಆನಿ ಸಾಯ್ಭಾಕ್ ಸೆವ್ತಾನಾಂ ಲಾಬ್ತಾಲೊ ತೊ ಉಲ್ಲಾಸ್ ಆನಿ ಸಂತೊಸ್ ವರ‍್ಣುಂಕ್ ಜಾಯ್ನಾತ್‌ಲ್ಲೊ. ಪೂಣ್ ಜ್ಯಾ ಕೊಣೆಂ ಆದ್ಲ್ಯಾ ರಾತಿಂಥಾವ್ನ್ ಮೀಸ್ ಸುರ‍್ವಾತ್ತಾಂ ಪರ್ಯಾಂತ್ ಕಾಂಯ್ ಸೆವ್ಲಾಂ, ವಾ ಉದಕ್ ಪಿಯೆಲಾಂ ಜಾಲೆಂ ತೊ ಕುಮ್ಗಾರ್ ಸ್ವೀಕಾರ್ ಕರ‍್ನಾತ್‌ಲ್ಲೊ, ತಾಕಾ ವಾ ತಿಕಾ ಫಕತ್ ಮೀಸ್ ಮಾತ್ರ್. ತ್ಯಾ ಉಪ್ರಾಂತ್ ಪಾದ್ರ್ಯಾಬಾನ್ ಫರ‍್ಮಾಯಿಲ್ಲೆಂ ಸಕ್ಕಡ್ ಆಯ್ಕುನ್ ತೆಂ ಪಾಳ್ಚ್ಯಾಕ್ ತಯಾರ್ ಜಾವ್ನ್ ಬೆಸಾಂವ್ ಘೆವ್ನ್, ಪಾದ್ರ್ಯಾಬಾಕ್ ಇಗರ‍್ಜೆ ಭಾಯ್ರ್ ಭೆಟುನ್ ಪರ‍್ತ್ಯಾನ್ ತಾಚಿಂ ಬೆಸಾಂವಾಂ ಘೆವ್ನ್ ಹೊಟ್ಲಾಂತ್ ಚಾ’ತಿಂಡಿ ಮುಗ್ದುನ್ ಆಪಾ’ಪ್ಲ್ಯಾ ಬಿಡಾರಾಕ್ ಪಾಟಿಂ ವೆತಾಲೊ.
ಭಾಗೆವಂತ್ ಹಫ್ತ್ಯಾಂತ್ ಚಡ್‌ಶೆಂ ಲೊಕಾಚೊ ವೇಳ್ ಇಗರ‍್ಜೆಂತ್‌ಚ್ ಕಂತಿಗೊ ಗಾಂವ್ಚ್ಯಾಂತ್, ಖುರ‍್ಸಾವಾಟೊ ಕರ‍್ಚ್ಯಾಂತ್ ಆನಿ ನಿಯಾಳ್ ಶೆರ‍್ಮಾಂವ್ ಆಯ್ಕೊಂಚ್ಯಾಂತ್ ಖರ‍್ಚಿತಾಲೆ. ಘರ್ ಪಯ್ಸ್ ಆಸಾ ತರ್ ನಿಮಾಣ್ಯಾ ಬ್ರೇಸ್ತಾರಾ ಆಯಿಲ್ಲೊ ಲೋಕ್ ಪಾಸ್ಖಾಂಚ್ಯಾ ಸಕಾಳಿಂ ಪರ್ಯಾಂತ್ ಇಗರ‍್ಜೆ ಆಂಗ್ಣಾಂತ್‌ಚ್ ವಸ್ತಿ ಕರ‍್ಚ್ಯಾಕ್ ವೆವಸ್ತಾ ಕರ್ನ್ ಯೆತಾಲೆ. ನಿಮಾಣ್ಯಾ ಸುಕ್ರಾರಾ ತರೀ ಇಗರ್ಜೆಂತ್ ದೀಸ್‌ಭರ್ ಭಕ್ತಿಕ್ ಲಿತುರ‍್ಜಿ. ಸಾಕ್ರಾಮೆಂತಾಚೆಂ ಆರಾಧನ್, ವಿಶೆವಾಚ್ಯಾ ಆಲ್ತಾರಿಚಿ ಭೆಟ್, ಖುರ‍್ಸಮೊಳೊ ಕರ್ನ್ ಕೂಡ್ ಚಡಂವ್ಚಿ, ಕೂಡ್ ದೆಂವಂವ್ಚಿ ಮ್ಹಣುನ್ ಅಖ್ಖೊ ದೀಸ್ ಇಗರ್ಜೆಂತ್.
ತಶೆಂ ಮ್ಹಣುನ್ ಆಮ್ಚೊ ಲೋಕ್ ಫಕತ್ ಧಾರ‍್ಮಿಕ್ ಜಿವಿತಾಕ್ ಮಾತ್ರ್ ಪಿಸ್ವಾಲ್ಲೊ ಮ್ಹಣಾನಾಂಯೆ. ಆಪ್ಲ್ಯಾ ಸುಖಿ ಸಂಸಾರಿ ಜಿವಿತಾಕ್ ಕಾಂಯ್ ಉಣೊ ಮಹತ್ವ್ ತಾಣಿಂ ದಿಲ್ಲೊ ನಾಂ. ತಾಂಚ್ಯಾ ರೊಸಾಂಕ್, ಖರಾರಾಂಕ್ ಆನಿ ಹೆರ್ ಕುಟ್ಮಾ ಕಾರ‍್ಯಾಂಕ್ ಆಯ್ಚೆಪರಿಂ ಲಾಂಬ್ ಲಾಂಬ್ ನಿಯಾಳ್ ನಾತ್‌ಲ್ಲೆ, ಕಾರ‍್ಯೆಂ ಸೊಭಾಣಾಂಚ್ಯಾ ಮಾಗ್ಣ್ಯಾಂಚೊ ಬೂಕ್ ತಾಂಚೆಲಾಗಿಂ ನಾತ್‌ಲ್ಲೆ ತರೀ ವೆಳಾರ್ ರೋಸ್ ಕಾಜಾರಾಂ ಜಾತಾಲಿಂ ಆನಿ ಘರ್‌ಭರ್ ಭುರ‍್ಗಿಂ ಜನ್ಮಾತಾಲಿಂ. ವೊಲಾಂ ರೆಸ್ಪೆರಾಂ ಜಾತಾಲಿಂ ದರಬಸ್ತ್ ದೇವ್ ಆಪೊವ್ಣಿಂಯ್ ಆಸ್‌ಲ್ಲಿಂ.
ಬದ್ಲಾಪ್ ಆಯ್ಲೆಂ ದುಸ್ರೆ ವಾತಿಕಾನ್ ವಿಶ್ವಸಭೆ ಉಪ್ರಾಂತ್. ಬಿಸ್ಪ್ ಬಾಜಿಲಾನ್ ಹಾಡ್‌ಲ್ಲೆಂ ನವೆಸಾಂವ್ ಚಡ್ ವಾಂಟೊ ಲೊಕಾಂನಿ ಸ್ವೀಕಾರ್ ಕೆಲೆಂ ನಾಂ. ಬದ್ಲಾಪಾ ವಿರೋಧ್ ಪಾದ್ರಿ ಮಾದ್ರಿ ಆನಿ ಸಾಧೆ ಭಾವಾಡ್ತಿಯ್ ಉಬೆ ಜಾಲ್ಲೆ. ಕಾಜಿತೊರಾನ್ ಕೊಂಕ್ಣಿ ಮೀಸ್ ಕೆಲೆಂ ’ಆನಿ ಹಾಂಗಾ ಆಸ್ಲ್ಯಾರ್ ಕೊಂಕ್ಣಿ ಮೀಸ್ ಆಯ್ಕುನ್ ಮ್ಹಜೊ ಅತ್ಮೊ ಯಮ್ಕೊಂಡಾಚ್ಯಾ ಉಜ್ಯಾಂತ್ ಭಾಜತ್’ ಮ್ಹಣುನ್ ವಿಗಾರ್ ಫಿರ‍್ಗಜ್ ಸೊಡ್ನ್ ಪೆಲ್ಯಾ ಇಗರ‍್ಜೆಕ್ ವಚುನ್ ಲಿಪುನ್ ಬಸ್‌ಲ್ಲೊ. ಏಕ್ ಕಾಜಿತೊರ್ ಮಾದ್ರಿಂಲಾಗಿಂ ನವೆಸಂವಾಚೆಂ ಧರ‍್ಮ್‌ಶಾಸ್ತ್ರ್ ಉಲೊಂವ್ಕ್ ಗೆಲ್ಲ್ಯಾಕ್ ’ತೊ ಆಂಚೆಲಾಗಿಂ ಹೆರೆಜ್ ಉಲಯ್ತಾ’ ಮ್ಹಣ್ ಗಾಬ್ ಕೆಲ್ಲೊ ಕಾಳ್ ತೊ. ನವೆಸಾಂವಾ ಉಪ್ರಾಂತ್‌ಯ್ ಎಕಾ ಫಿರ‍್ಗಜೆಂತ್ ಲೋಕ್ ಮಿಸಾಕ್ ಯೆತಾನಾಂ ದೀಸ್ ರಾತ್ ಉಪಾಸ್ ಕರ್ನ್ ಯೆತಾ ಮ್ಹಣುನ್ ಕಳ್‌ಲ್ಲೆಂಚ್ ವಿಗಾರಾನ್ ’ಆನಿ ಮುಕಾರ್ ಕುಮ್ಗಾರ್ ಸೆಂವ್ಚ್ಯಾ ಎಕಾ ವೊರಾ ಪಯ್ಲೆಂ ಉಪಾಸ್ ಆಸ್ಲ್ಯಾರ್ ಪುರೊ’ ಮ್ಹಣ್ ಸುಚಯ್ಲೆಂ, ಲೋಕ್ ಉಪಾಸ್ ಸೊಡುಂಕ್ ತಯಾರ್ ನಾಂ, ನಿಮಾಣೆಂ ಪಾದ್ರ್ಯಾಬಾನ್ ಇಗರ‍್ಜೆ ಬಾಗ್ಲಾರ್ ಕೊಳ್ಶ್ಯಾಂತ್ ಉದಕ್ ಆನಿ ಲೊಟೊ ದವರ‍್ನ್ ಮಿಸಾಕ್ ಯೆತಲ್ಯಾಂನಿ ಏಕ್ ಲೊಟೊ ಬೆಂಜಾರ್ ಕೆಲ್ಲೆಂ ಉದಕ್ ಪಿಯೆವ್ನ್ಂಚ್ ಮಿಸಾಕ್ ಯೇಜೆ ಮ್ಹಣ್ ಕಟ್ನಿಟ್ ಕೆಲೆಂ. ಮೀಸ್ ಕಶೆಂಯ್ ದೇಡ್ ವೊರಾಂಚೆಂ ನ್ಹಂಯ್‌ಗೀ?
ಬದ್ಲಾವಣ್ ಹಾಡುಂಕ್ ಪೆಚಾಡ್‌ಲ್ಲ್ಯಾ ಬಿಸ್ಪ್ ಬಾಜಿಲಾಚಿ ವೀದ್‌ವಾವ್ಳಿ ಕಸಲಿ ಜಾಲ್ಯಾ ಆಸ್ಯೆತ್. ಎಕಾ ಕುಶಿನ್ ತುವೆಂ ಹಾಡ್‌ಲ್ಲೆಂ ನವೆಸಾಂವ್ ಚಡ್ ಜಾಲೆ ಮ್ಹಣ್ ಬೊಬಾಟ್ಚೆ ಮ್ಹಾಲ್ಘಡೆ ಅನ್ಭವಿ, ಆನಿ ಆನ್ಯೇಕಾ ಕುಶಿನ್ ತುವೆಂ ಹಾಡ್‌ಲ್ಲೆಂ ನವೆಸಾಂವ್ ಕಾಂಯ್ ಪಾವಾನಾಂ ಮ್ಹಣ್ ಕರ‍್ಕರ್ ಕರ‍್ಚೆ ತವಳ್ಚೆ ತರ‍್ನೆ ಜಾಣಾರಿ. ಹ್ಯಾ ದೊಗಾಂಯ್‌ಥಾವ್ನ್ ತಾಣೆಂ ಭೊಗ್‌ಲ್ಲೆಂ ಲೆಕಾವ್ಹರ‍್ತೆಂ. ತೆಂ ಸಕ್ಕಡ್ ಹಾಂಗಾ ನಾಕಾ ಲೆಕಾವ್ಹರ‍್ತೆಂ ಜಾಂವ್ಕ್ ಆಸಾ. ಆನ್ಯೇಕ್‌ಚ್ ಲೇಕನ್ ಭೋವ್ಶಾ ಆನಿ ಥೊಡ್ಯಾ ತೆಂಪಾ ಉಪ್ರಾಂತ್ ಯೇಂವ್ಕ್ ಪುರೊ.
(ವಾಚುನ್ ಆನಿ ಮ್ಹಾಲ್ಘಡ್ಯಾಂಥಾವ್ನ್ ಆರಾವ್ನ್ ನೆರಾವ್ನ್ ಸಂಗಿ ಘಾಲ್ಲೆಂ)
■ ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
3 comments
Beautiful narration, Sir is writing such beautiful articles, we are happy to have this, enjoyed reading.
ಬರೇಂ ಬರಯ್ಲಾಂಯ್ ಪ್ರಾಧ್ಯಾಪಕಾ ತುಂವೆಂ! ಆಯ್ಲೊ ಉಗ್ಡಾಸ್ ಆದ್ಲೊ, ಲಾತಿನ್ ಮೀಸಾಂತ್ ಪಾತ್ರ್ ಘೆತ್ ಲ್ಲೊ. ಬರಯ್, ಬರಯ್ ಕೊಣೆಂಚ್ ಬರಯ್ನಾಸ್ಚೆಂ!!
ಬೊಯ್ಲಾಂ ಗಾಡ್ಯೆಚೆಂ ಚಿತ್ರ್ ಬಹುತ್ ಪಸಂದ್ ಜಾಲೆಂ.
50 -60 ವರ್ಸಾಂ ಆದಿಂ ಮಂಗ್ಳೂರ್ ದಿಯೆಸೆಜಿಂತ್ಲ್ಯಾ ಪರ್ಬುಂಚಿ ಆನಿಂ ಬಾಯಮ್ಮಾಂಚಿ ಜೀವನ್, ದೇವಾಸ್ಪನ್ ಆನಿಂ ನ್ಹೆಸ್ನಾ ವಿಶಂತ್ ಸವಿವರ್ ದೀವ್ನ್ ಆತಾಂಚಾ ಪಿಳ್ಗೆಗ್ 5 ದಶಕಾಂ ಪೊಯ್ಲೆಂಚಿ ದೃಶ್ಯಾಂ ದಾಖೈಲ್ಯಾರ್, ಆಮ್ಕಾಂ ಬೇಬಿ ಬ್ಲೂಮರ್ಸಾಂಕ್ ತಿಕ್ಕೆ nostalgia ಉಡಾಸ್ ಕೆಲೊ ಹ್ಯಾ ಲೇಖನಾ ದ್ವಾರಿಂ. ದೇವ್ ಬೊರೆಂ ಕರುಂ ತುಕಾ ಶ್ರೀ ಸ್ಟೀವನ್ ಕ್ವಾಡ್ರಸ್ . ಹೆಂ ಸಕ್ಕಡ್ ಬದ್ಲಾವಣ್ ಸುಮಾರ್ ಆಮ್ಚಾ ಪೊಯ್ಲ್ಯಾ ಕುಮ್ಗಾರಾ ವರ್ಸಾ ಜಾರ್ಯೆಕ್ ಹಾಡ್ಲೆಲೆಂ ಜಾವ್ನಾಸಾ. ಸಗ್ಳೆ ಮೀಸ್ ಯಾಜಕಾನ್ ಲೋಕಾಕ್ ಪಾಟ್ ಕರ್ನ್ ಲಾತ್ಯಂತ್ ಭೆಟೊಂವ್ಚೆಂ ಆತಾಂಯೀ ಉಡಾಸ್ ಆಸಾ. ಲಾತ್ಯಂತ್ಲ್ಯಾ ಮಾಗ್ಣ್ಯಾಚೊ ಆರ್ಥ್ ಸೊಮ್ಜಾಲ್ಲೊ ಕೊಂಕ್ಣೆಂತ್ ಯಾ ಕನ್ನಡಾಂತ್ ಮೀಸ್ ಭೆಟೊಂವ್ಕ್ ಆವ್ಕಾಸ್ ದಿಲ್ಲಾ ಉಪ್ರಾಂತ್. ಕನ್ನಡಾಚೆಂ ಮೀಸ್ ಆಯ್ಕಾತಾನಾ ಹಾಸೊಂಕ್ ಯೇತಾಲೆಂ. ಚಡೀತ್ ಆಮ್ಚಾ ಯಾಜಕಾಂಕೀ ಕನ್ನಡಾಚಿ ಜಾಣ್ವಾಯ್ ಚಡ್ ನಾತ್ಲಿ. ಲಾತ್ಯಾಂತ್ ದೊಮಿನೊಸ್ಕೊ,…(ಸೊಮಿ ತುಮ್ಚಾ ಸವೆಂ ಆಸೊಂ) ಮುಳ್ಳೆಂ ಆಮ್ಚಾ ಬುರ್ಗ್ಯಾಂಚಾ ತೊಂಡಾರ್ ಪಾದ್ರ್ಯಾಬಾನ್ ಸೊಡ್ಲಿ ಪುಸ್ಕಿ ಮುಣ್ ರೂಪಾಂತರ್ ಜಾತೆಲೆಂ. ಕೀರಿಯೆ ಲೈಸುನ್ ..ಲ್ಹೊಸುನ್ ಜಾತೆಲೆಂ. ಭಾಸ್ ಯಾ ಉತ್ರಾಂಚೊ ಆರ್ಥ್ ಸೊಮ್ಜನಾತ್ಲೊ ತರೀ ಆಯ್ಕೊಂಕ್ ಖುಶಿ ಜಾತೆಲೆಂ. ಸ್ತ್ರೀಯೊ ಆನಿಂ ಚಲಿಯೊ ಮಾತ್ಯಾಕ್ ದೊವೊ ಲೇಸ್ ಯಾ ಕಾಪ್ಡಾಚೊ ಪಾಲೊಂವ್ ದಾಂಪ್ತಾಲಿಂ. ಪಾದ್ರ್ಯಾಬ್ ಚಡೀತ್ ಕಾಳೋ ಲೋಬ್ ನ್ಹೆಸ್ತಾಲೆ ಆನಿಂ ಬುರ್ಗಿಂ ಪೊಳೊವ್ನ್ ಭಿಯೆತಾಲಿಂ.. ಮ್ಹಕಾ ಪೊಯ್ಲ್ಯಾ ಕುಮ್ಗಾರಾಚಿ ದುತೊನೆಚಾ ವೆಳಾರ್ ಎಕ್ಲೊ ಪೀಂತ್ ಮುಣ್ ವಿಗಾರ್. ಸಗ್ಲ್ಯಾ ಕುಟಾಮ್ ಮುಳ್ಳ್ಯಾ ಪಾಟ್ಲಾಮೆ ಸಾಂಗಾತಾ (7-8 ಜಣಾ) ಫಿರ್ಗಂಜೆಂತ್ ವಸ್ತಿ ಕರ್ತಾಲೊ. ಕಾಳ್ಯಾ ಲೋಬಾರ್ ತಾಕಾ ಪೊಳೆತಾನಾ ಹಾಂವ್ಂ ಕಾಂಪ್ತಾಲೊಂ. ಮುಕಾರ್ dracula ಪಿಕ್ಚರ್ ಪೊಳೆತಾನಾ ತಾಚೊ ಉಡಾಸ್ ಯೇತಾಲೊ. ದುತೊನೆ ವ್ಹೆಳಾರ್ ಆಮ್ಚಿಂ ಖೆಳ್ಕುಲಾಂ ಕರ್ಚೆಂ, ಆವ್ಮಾನ್ ಕರ್ಚೆಂ, ಕೊಡಿಯೊ ಕಾಡ್ಚೆಂ, ಮಾರ್ಚೆಂ ಸದಾಂಚೆ ಜಾವ್ನ್ ಆಸ್ಲೆಂ. ತವೊಳ್ ತಾಚ್ಯೊ ದುವ್ಡಿಯೊ ಕಟಕಟ ಹಾಸೊನ್ ಆಮ್ಚಾ ಗಾಯಾಕ್ ಮೀಟ್ ಸರಯ್ತಾಲಿಂ. ಏಕ್ ಪಾವ್ಟಿಂ ದುತೊನ್ ಹಾಂವೆಂ ಚೂಕ್ ಮುಳ್ಳ್ಯಾಕ್ ತಾಚೆ ಮೊಚೆ ಗಾಲ್ಲೆ ದೊನೀ ಪಾಯ್ ಮ್ಹೊಜಾ ಮಾತ್ಯಾ ವಯ್ರ್ ಹಾಡ್ಲೆ. ತ್ಯಾ ದೀಸಾ ತಾವ್ನ್ ಪಾದ್ರ್ಯಾಬಾಂಚೆ ಭೆಂ ತಿರಸ್ಕಾರ್ ಜಾವ್ನ್ ಬದಾಲ್ಲೆಂ. ರಡೊನುಂಚ್ ಫರಾ ಯೇವ್ನ್ ಮಾಂಯ್ ಕಡೆನ್ ತ್ಯಾ ಪಾದ್ರ್ಯಾಬಾಚೆ ದೊಳೆ ಫುಟ್ತಾಲೆ ಮ್ಹುಣ್ ಶಿರಾಪ್ ಗಾಲ್ಲೊ ಆತಾಂಯಿ ಉಡಾಸ್ ಆಸಾ. ಅಸಾಲ್ಯಾ ಸಂಗ್ತಿನಿ ಹಾಂವ್ ಪಾತ್ಯೆನಾ ತರೀ ತುಂ ಕೊಸೊ ಜಿಯೆತಾಯ್ ತಸೊ ಮೊರ್ತಾಯ್ ಮುಣ್ಚೆಂ ವಾಜ್ಬಿ ಜಾವ್ನ್ ಆಸಾ. ಥೊಡ್ಯಾ ವರ್ಸಾಂ ಉಪ್ರಾಂತ್ ತೊ ಯಾಜಕ್ ಕುರ್ಡೊ ಜಾಲ್ಲೊಯೀ ಖರೆಂ. ಡಯಬಿಟೀಸ್ ಪಿಡೆಂತ್ ಆಸೊಂಕ್ ಪುರೊ. ಮಾಗಿರ್ ಆಯಿಲ್ಲೆ ಯಾಜಕ್ ಚಡೀತ್ ಮೊನ್ಶಾಪೊಣಾಚೆ. ತರೀ ಕಾಳ್ಜಾಂತ್ ಕಂಸುಲ್ಲೊ ತಿರಸ್ಕಾರ್ ಪುಸುನ್ ಕಾಡ್ಚಾ ತಿತ್ಲಿ ದೇಖ್ ತಾಣಿಂ ದಾಕೊವ್ನಾ. ಕಿತೆಂಯ್ ಜಾಂವ್ ಭಾಗೆವೊಂತ್ ಹಾಪ್ತೊ ಚಡುಣೆ ಸಗ್ಳೊ ಇಗರ್ಜೆಂತ್ ಖರ್ಸಿಲ್ಲೊ ಆಸಾ. ನಿಮಾಣ್ಯ ಬ್ರೆಸ್ತಾರಾ ತಾವ್ನ್ ನಿಮಾಣ್ಯ ಸುಕ್ರಾರ್ ಪರ್ಯಾಂತ್ ಆಲ್ತಾರ್ ಬುರ್ಗ್ಯಾಂಕ್ ಇಗರ್ಜೆಂತ್ ಪಾದ್ರ್ಯಾಬಾಚಾ ಫರಾ ವಸ್ತಿ. ಕಾಣ್ಯೊ ಲಾಂಬ್ ಆಸಾತ್. ಹಾಂಗಾ ನಾಕಾ. ಬೈಬಲಾ ಪ್ರಾಸ್ ಚಾಲ್ತಿ ಮಾಗ್ಣಿಂ ಬೂಕ್ ಚಡ್ ಗರ್ಜೆಚೊ. ಪಾತ್ಕಾಂಚಿ ಲಿಸ್ಟ್ ಸೈತ್ ತ್ಯಾ ಬುಕಾಂತ್ ಆಸ್ಲಿ. ತೊಡ್ಯಾ ಪಾತ್ಕಾಂಚೊ ಆರ್ಥ್ ಸೈತ್ ಕಳಿತ್ ನಾತ್ಲೊ. ಕುಮ್ಸಾರ್ ಜಾತಾನಾ ಸದಾಂಚಿಂ ಫೊಟಿ ಮಾರ್ಲ್ಯೊ, ಸೊರ್ಲಾಂ, ವೊಡಾಂಕ್ ಪಾಟಿಂ ಉಲೈಲಾಂ, ಆಲ್ಸಾಯ್ ಕೆಲ್ಯಾ ಪಾತ್ಕಾಂ ಸಾಂಗೊನ್ ಬೋರ್ ಜಾತಾನಾ ಚಾಲ್ತಿ ಮಾಗ್ಣ್ಯಾಂತ್ಲಿ ತೊಡಿಂ , ಪ್ರದುವಾರ್ ಕೆಲಾ ಮುಣ್ ನವಿಂ ಪಾತ್ಕಾಂ ಸಾಂಗ್ ಲ್ಲೆಂ ಆಸಾ. ವೊಡ್ ಜಾಲ್ಯಾ ಉಪ್ರಾಂತ್ ಆರ್ಥ್ ಸೊಮ್ಜಾತಾನಾ ರಡ್ಚೆಂಗಿ ಹಾಸ್ಚೆಂಗಿ ಮ್ಹುಣ್ ಕಳೊನಾ.
ಶಭಾಸ್ಗಿ ತುಕಾ ಏಕಾ ಬೊರ್ಯಾ ಲೇಖನಾ ಖಾತಿರ್.