ಆಯ್ತಾರಾ ; ಜುಲೈ 14 ವೆರ್ ಸಕ್ಲೇಶ್‌ಪುರ್ ಸಾಂ. ಜುಜೆ ಇಸ್ಕೊಲಾಚ್ಯಾ ಸಾಲಾಂತ್ ಅಖಿಲ್ ಭಾರತೀಯ್ ಕೊಂಕಣಿ ಪರಿಶದ್ ಹಾಣಿ ಕಥೊಲಿಕ್ ಕೊಂಕಣಿ ರಾಕಣ್ ಸಂಚಲನ್, ಚಿಕ್‌ಮಗ್ಳುರ್ – ಹಾಸನ್, ಸಕ್ಲೇಶ್‌ಪುರ್ ಘಟಕಾಚ್ಯಾ ಆಸ್ರ್ಯಾಖಾಲ್ 86 ವೊ ಸ್ಥಾಪನಾ ದೀಸ್ ವ್ಹಡಾ ದಬಾಜ್ಯಾನ್ ಮಾನಾಯ್ಲೊ.
ಗೊಂಯ್ ವಿದ್ಯಾಪೀಠಾಚಿ ವಿಶ್ರಾಂತ್ ಡೀನ್, ಮಾಲ್ಘಡಿ ಸಾಹಿತಿ ಅನಿ ಸಂಶೋಧಕಿ ಪ್ರೊ| ಡೊ| ಕಿರಣ್ ಬುಡ್ಕುಲೆ ಕಾರ್ಯಾಕ್ ಮುಕೆಲ್ ಸಯ್ರಿ ಜಾವ್ನ್ ಹಾಜರ್ ಆಸ್ಲಿ.
“ಮಾದವ್ ಮಂಜುನಾಥ್ ಶಾನಭಾಗ್ ತಸಲೊ ಸ್ಪಶ್ಟ್ ದಿಶ್ಟಾವ್ಯಾಚೊ ಮುಕೆಲಿ ಕೊಂಕ್ಣೆಕ್ ಫಾವೊ ಜಾಲ್ಲ್ಯಾನ್ ಆಜ್ ಕೊಂಕ್ಣಿ ಭಾಸ್ ಏಕ್ ಸಮೃದ್ದ್ ಭಾಸ್ ಜಾವ್ನ್ ವಾಡ್ಲ್ಯಾ. ತಾಣೆ ಆನಿ ತಾಚೆ ಉಪ್ರಾಂತ್ ಆಯಿಲ್ಲ್ಯಾ ಸಾಹಿತಿ, ಸಂಘಟಕ್ ಆನಿ ಕಾರ್ಯಕರ್ತಾಂನಿ ಕಾಡ್‌ಲ್ಲ್ಯಾ ವಾಂವ್ಟಿನ್ ಕೊಂಕ್ಣಿ ಭಾಶೆಕ್ ಸಾಹಿತ್ಯ ಅಕಾಡೆಮಿಂತ್ ಏಕ್ ಸಾಹಿತಿಕ್ ಭಾಸ್ ಮ್ಹಣ್ ಆನಿ ಸಂವಿದಾನಾಚ್ಯಾ ಅಟ್ವ್ಯಾ ವಳೆರಿಂತ್ ರಾಷ್ಟ್ರ್ ಭಾಸ್ ಮ್ಹಣ್ ಮಾನಾಚೊ ಜಾಗೊ ಫಾವೊ ಜಾಲಾ, ಗೊಂಯ್- ಕರ್ನಾಟಕ – ಕೇರಳ್ ರಾಜ್ಯಾಂನಿ ಕೊಂಕ್ಣಿ ಅಕಾಡೆಮಿ ಸ್ಥಾಪನ್ ಜಾಲ್ಯಾತ್, ಶಾಳೆಂನಿ, ವಿಶ್ವವಿದ್ಯಾಲಯಾಂನಿ ಭುರ್ಗಿಂ ಕೊಂಕ್ಣೆಂತ್ ಶಿಕ್ತಾತ್, ಅಧ್ಯಯನ್ – ಸಂಸೋದ್ ಕರ್ತಾತ್. ಹರ್ ಮನ್ಸ್ಯಾನ್ ಆಪ್ಲ್ಯಾ ತಾಂಕಿಪುರ್ತೆಂ ಕಾಮ್ ಕೊಂಕ್ಣಿ ಭಾಶೆಖಾತಿರ್ ಕೆಲೆಂ ಜಾಲ್ಯಾರ್ ಆಮಿ ಆಮ್ಚ್ಯಾ ಮಾಂಯ್‌ಭಾಶೆಚಿ ಸೆವಾ ಕೆಲ್ಲೆಪರಿಂ ಜಾತೆಲೆಂ. ತರ್ನಾಟ್ಯಾಂನಿ ತಂತ್ರಜ್ಞಾನ್ ವಾಪಾರ್ನ್ ಸಯ್ತ್ ಹೆಂ ಕಾಮ್ ಕರುಂಯೆತಾ.” ಮ್ಹಣ್ ಕಾರ್ಯಕ್ರಮಾಕ್ ಚಾಲನ್ ದೀವ್ನ್ ಪ್ರೊ| ಡೊ| ಕಿರಣ್ ಬುಡ್ಕುಲೆ ಮ್ಹಣಾಲಿ.
ಕಥೊಲಿಕ್ ಕೊಂಕಣಿ ರಾಕಣ್ ಸಂಚಲನ್, ಚಿಕ್‌ಮಗ್ಳುರ್ – ಹಾಸನ್ ಹಾಚೊ ಅಧ್ಯಕ್ಷ್ ಶ್ರೀ ಜೋಕಿಮ್ ಡಿ ಸೊಜಾ ಹಾಣಿ ಚಿಕ್‌ಮಗ್ಳುರ್ – ಹಾಸನಾಂತ್ ಲಿತುರ್ಜೆಂತ್ ಕೊಂಕ್ಣಿ ಹಾಡ್ಚ್ಯಾಕ್ ಕಾಡ್‌ಲ್ಲಿ ವಾಂವ್ಟ್ ಆನಿ ಕೊಂಕ್ಣಿ ಮಿಸಾಂ ಖಾತಿರ್ ಸಂಚಲನಾನ್ ಕೆಲ್ಲ್ಯಾ ವಾವ್ರಾಚಿ ಝಳಕ್ ದೀವ್ನ್, ಆತಾಂ ಝುಜ್ ಬೆಂಗ್ಳುರ್ ಉಂಚ್ಲ್ಯಾ ಕೊಡ್ತಿ ಪರ್ಯಾಂತ್ ಪಾವ್ಲಾಂ ಮ್ಹಳ್ಳಿ ಮಾಹೆತ್ ದೀವ್ನ್ ಸಯ್ರ್ಯಾಂಕ್ ಯೆವ್ಕಾರ್ ಮಾಗ್ಲೊ. ಕಥೊಲಿಕ್ ಕೊಂಕಣಿ ರಾಕಣ್ ಸಂಚಲನ್, ಚಿಕ್‌ಮಗ್ಳುರ್ – ಹಾಸನ್, ಸಕ್ಲೇಶ್‌ಪುರ್ ಘಟಕಾಚೊ ಅಧ್ಯಕ್ಷ್ ಶ್ರೀ ಪ್ರದೀಪ್ ಡಿ ಸೊಜಾ ಹಾಣೆ ಮುಕೆಲ್ ಸಯ್ರಿ ಪ್ರೊ| ಡೊ| ಬುಡ್ಕುಲೆಕ್ ಫುಲಾಂಚೊ ತುರೊ ದೀವ್ನ್ ಮಾನಾಚೊ ಯೆವ್ಕಾರ್ ಮಾಗ್ಲೊ.
ಪಣ್ತಿ ಪೆಟವ್ನ್ ಸ್ಥಾಪನಾ ದೀಸ್ ಉಗ್ತಾಯ್ಲೊ ಆನಿ ಪರಿಷದೆಚೊ ಸ್ಥಾಪಕ್ ಮಾದವ್ ಮಂಜುನಾಥ್ ಶಾನಭಾಗ್ ಹಾಂಚ್ಯಾ ತಸ್ವಿರೆಕ್ ಫುಲಾಂ ಅರ್ಪುನ್ ಮಾನ್ ಕೆಲೊ.
ಆಪ್ಲ್ಯಾ ಪ್ರಾಸ್ತಾವಿಕ್ ಉಲವ್ಪಾಂತ್ ಪರಿಶದೆಚೊ ಕಾರ್ಯಾಧ್ಯಕ್ಷ್ ಮಾನೆಸ್ತ್ ಚೇತನ್ ಆಚಾರ್ಯ ಹಾಣಿ “ಕೊಂಕ್ಣಿ ಉಲವ್ಪಿ ಲೋಕ್ ವ್ಹಡಾ ಸಂಖ್ಯಾನ್ ಆಸ್ಚ್ಯಾ ಪ್ರದೇಶಾಂನಿ ವಚೊನ್ ಸ್ಥಾಪನಾ ದೀಸ್ ಆಚರಣ್ ಕರ್ಚಿ ರಿವಾಜ್ ಪರಿಷದ್ ಪಾಳುನ್ ಆಯ್ಲ್ಯಾ. ದೆಶಾಚ್ಯಾ ವೆವೆಗ್ಳ್ಯಾ ಪ್ರದೇಶಾಂನಿ ವಸ್ತಿ ಕರುನ್ ಆಸ್ಚ್ಯಾ ಕೊಂಕ್ಣಿ ಲೊಕಾಕ್ ಮೆಳೊನ್, ಸಾಂಗಾತಾ ಕೊಂಕ್ಣೆ ಖಾತಿರ್ ವಾವುರ್ಚೊ ಪರಿಷದೆಚೊ ಶೆವೊಟ್ ಆಸಾ. ಸಕ್ಲೇಶ್‌ಪುರ್ ಆಯ್ಲ್ಯಾ ಉಪ್ರಾಂತ್ ಹಾಂಗಾಸರ್ ಕೊಂಕ್ಣಿ ಲೋಕ್ ಆಪ್ಲ್ಯಾ ಮಾಂಯ್‌ಭಾಶೆಂತ್ ಮಿಸಾಂ ಭೆಟಂವ್ಚ್ಯಾ ಮುಳಾವ್ಯಾ ಹಕ್ಕಾ ಥಾವ್ನ್ ವಂಚಿತ್ ಜಾಲಾ ತೆಂ ಕಳೊನ್ ಆಯ್ಲೆಂ. ಆಮಿ ಕೊಂಕ್ಣಿ ಲೋಕ್ ಜಾವ್ನ್ ತಾಂಕಾ ಸಾಂಗಾತ್ ದಿಂವ್ಚಿ ಗರ್ಜ್ ಆಸಾ” ಮ್ಹಳೆಂ.
ಕಾರ್ಯಾಂತ್ ಮಾಲ್ಘಡೊ ಕೋಶ್‌ಕಾರ್ ಶ್ರೀ ಸುರೇಶ್ ಬೋರ್ಕಾರ್ ಹಾಂಕಾಂ ಮಾದವ್ ಮಂಜುನಾಥ್ ಶಾನಭಾಗ್ ಜಿವಿತಾವ್ಧಿ ಪುರಸ್ಕಾರ್ ಪಾಟವ್ನ್ ಮಾನ್ ಕೆಲೊ. ಶ್ರೀ ಮಂಗಲ್‌ದಾಸ್ ಭಟ್ ಹಾಣಿ ಮಾನ್ ಪತ್ರ್ ವಾಚ್ಲೆಂ. ನಾಭಲಾಯ್ಕೆಕ್ ಲಾಗೊನ್ ಶ್ರೀ ಬೋರ್ಕಾರ್ ಹಾಂಕಾ ಕಾರ್ಯಾಕ್ ಹಾಜರ್ ಜಾಂವ್ಕ್ ಸಾಧ್ಯ್ ಜಾಂವ್ಕ್ ನಾ ದೆಕುನ್, ತಾಂಚ್ಯಾ ವತೀನ್ ಶ್ರೀ ಅನಿಲ್ ಪೈ ಹಾಣಿ ಪುರಸ್ಕಾರ್ ಸ್ವೀಕಾರ್ ಕೆಲೊ. ಹ್ಯಾ ವೆಳಿಂ ಶ್ರೀ ಬೋರ್ಕಾರ್ ಹಾಂಚ್ಯಾ ಉಪ್ಕಾರಾಚ್ಯಾ ಉತ್ರಾಂಚಿಂ ವಿಡಿಯೊ ಪ್ರದರ್ಶಿತ್ ಕೆಲಿ.
ಕಾರ್ಯಕ್ರಮಾಂತ್ ಅಖಿಲ್ ಭಾರತೀಯ್ ಕೊಂಕ್ಣಿ ಪರಿಶದೆನ್ ಪರ್ಗಟ್ ಕೆಲ್ಲೊ, ಕವಿ ವಿಲ್ಸನ್ ಕಟೀಲ್ ಹಾಚೊ ಚಿತುರ್ಲೆಚೆ ಅಚ್ಚೇ ದಿನ್ ಕವಿತಾ ಸಂಗ್ರಹ್ ಮುಕೆಲ್ ಸಯ್ರಿ ಪ್ರೊ| ಡೊ| ಕಿರಣ್ ಬುಡ್ಕುಲೆ ಹಾಣಿ ಮೊಕ್ಳಿಕ್ ಕೆಲೊ. ಸಾಹಿತ್ಯ ಅಕಾಡೆಮಿ, ನವಿ ದಿಲ್ಲಿ ಕೊಂಕಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಹ್ಯಾ ವೆಳಿಂ ವೆದಿರ್ ಸಾಂಗಾತ್ ದಿಲೊ.
ಭ| ಲತಾ ಹಿಚ್ಯಾ ಮಾರ್ಗದರ್ಶನಾಚೆರ್ ಸಾಂ. ಜುಜೆ ಇಸ್ಕೊಲಾಚ್ಯಾ ಭುರ್ಗ್ಯಾಂನಿ ಅಪುರ್ಬಾಯೆಚೊ ಸ್ವಾಗತ್ ನಾಚ್ ಸಾದರ್ ಕೆಲೊ. ಸಕ್ಲೇಶ್‌ಪುರ್, ಮೂಡಿಗೆರೆ ಘಟಕಾಚ್ಯಾ ಸಾಂದ್ಯಾಂನಿಂ, ವಿಶೇಸ್ ಕರುನ್ ಭುರ್ಗ್ಯಾಂನಿಂ ಆಪುರ್ಬಾಯೆಚಿಂ ಕೊಂಕ್ಣಿ ಪದಾಂ ಆನಿ ನಾಚ್ ಸಾದರ್ ಕೆಲೆ.
ಸಾಂಸ್ಕೃತಿಕ್ ಕಾರ್ಯಕ್ರಮಾ ಮಧೆಂ “ಮಲ್ನಾಡಾಂತ್ ಕೊಂಕ್ಣಿ ಚಳ್ವಳ್ – ವರ್ತಮಾನ್ ಆನಿ ಫುಡಾರ್” ಹ್ಯಾ ವಿಶಯಾಚೆರ್ ಪರಿಸಂವಾದ್ ಚಲ್ಲೊ. ಪರಿಸಂವಾಂದಾಂತ್ ಶಿಕ್ಷಕ್ ಶ್ರೀ ವಿವಿಯನ್ ಡಿ ಸೊಜಾ ಕೂವೆ, ಶ್ರೀಮತಿ ಅನಿತಾ ಪಾಯ್ಸ್, ಸಂಘಟಕ್ ಶ್ರೀ ಸಿರಿಲೊ ರೆಬೆಲ್ಲೊ ಆನಿ ಶ್ರೀ ರಾಕೇಶ್ ಮಿನೇಜಸ್ ಹಾಣಿ ವಾಂಟೊ ಘೆತ್ಲೊ. ಪತ್ರ್‌ಕರ್ತ್ ಆನಿ ಸಾಹಿತಿ ಶ್ರೀ ಎಚ್ಚೆಮ್, ಪೆರ್ನಾಲ್ ಹಾಣೆ ಸಂವಾದ್ ಚಲವ್ನ್ ವೆಲೊ.
ಚಿಕ್‌ಮಗ್ಳುರ್ – ಹಾಸನ್ ವಠಾರಾಂತ್ ಕೊಂಕ್ಣೆ ಖಾತಿರ್ ವಾವುರ್ಪಿ ಶ್ರೀ ಸ್ಟೇನಿ ಡಿ ಸಿಲ್ವ, ಶ್ರೀಮತಿ ಮೆಟಿಲ್ಡಾ ಡಿ ಸಿಲ್ವ, ಶ್ರೀ ಪ್ರಮೋದ್ ಪಿಂಟೊ (ಅನುಪಸ್ಥಿತ್) ಜೆ. ವಿ. ಕಾರ್ಲೊ, ಶ್ರೀ ಲವ್ರೆಂತ್ ಆನಿ ಶ್ರೀ ಜೋಕಿಮ್ ಡಿ ಸೊಜಾ ಹಾಂಕಾ ಕೊಂಕ್ಣಿ ರಾಯ್‌ಭಾರಿ ಬಿರುದ್ ದೀವ್ನ್ ಮಾನ್ ಕೆಲೊ.
ಹ್ಯಾಚ್ ಸುವಾಳ್ಯಾರ್ ಕಾರ್ಯಕ್ರಮಾಕ್ ಸಹಕಾರ್ ದಿಲ್ಯ್ಯಾ ತಶೆಂಚ್ ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾ ಖಾತಿರ್ ಸೆವಾ ದಿಂವ್ಚ್ಯಾ ಕೊವೆಂತಾಚಿ ವ್ಹಡಿಲ್ನ್ ಭ| ಐಡಾ, ಘಟಕಾಚೊ ಅಧ್ಯಕ್ಷ್ ಶ್ರೀ ಪ್ರದೀಪ್ ಡಿ ಸೊಜಾ, ಶ್ರೀ ಸಿರಿಲ್ ರೆಬೆಲ್ಲೊ, ಶ್ರೀ ರೊನಾಲ್ಡ್ ಮೊನಿಸ್ ಹಾಸನ್, ಶ್ರೀ ಫಾವೊಸ್ತಿನ್ ಪಿರೇರಾ, ಮಾಗುಂಡಿ ಆನಿ ಶ್ರೀ ಪ್ರಕಾಶ್ ಗ್ರೆಗೊರಿ ಫೆರ್ನಾಂಡಿಸ್ ಹಾಂಕಾ ಮಾನಾಚೊ ಶಾಲೊ ಆನಿ ಗುಲೊಬ್ ದೀವ್ನ್ ವೆದಿರ್ ಮಾನ್ ಕೆಲೊ.
ವೆದಿ ಕಾರ್ಯೆಂ ನಾಮ್ನೆಚೊ ಸೂತ್ರ್ ಸಂಚಾಲಕ್ ಪ್ರಾಧ್ಯಾಪಕ್ ಅನಂತ್ ಅಗ್ನಿ ಹಾಣಿ ಚಲವ್ನ್ ವ್ಹೆಲೆಂ ತರ್, ಸನ್ಮಾನ್ ಆನಿ ಸಾಂಸ್ಕೃತಿಕ್ ಕಾರ್ಯಕ್ರಮ್ ಶ್ರೀ ವಿನ್ಸೆಂಟ್ ಫಾಯ್ಸ್ ಆನಿ ಶ್ರೀಮತಿ ಸರಿತಾ ಮಿನೇಜಸ್ ಹಾಣಿ ಚಲವ್ನ್ ವ್ಹೆಲೆಂ.
ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ವಿಜೇತ್ ಡೊ। ಜಯಂತಿ ನಾಯ್ಕ್, ಶ್ರೀಮತಿ ಮಾಯಾ ಖರಂಗಟೆ, ಪ್ರೊ। ಬುಡ್ಕುಲೆ, ಸಂಘಟಕ್ – ಕಾರ್ಯಕರ್ತ್ ಶ್ರಿ ಪ್ರಶಾಂತ್ ನಾಯ್ಕ್ ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಯೋಜನಾಚೊ ಸಾಂದೊ ಶ್ರೀ ಟೈಟಸ್ ನೊರೊನ್ಹಾ, ಕವಿತಾ ಟ್ರಸ್ಟ್ ಅಧ್ಯಕ್ಶ್ ಶ್ರೀ ಕಿಶೂ, ಬಾರ್ಕೂರ್, ಸಾಂದೊ ಶ್ರೀ ಆಂಟನಿ ಬಾರ್ಕೂರ್, ದಾಯ್ಜಿವಲ್ದ್ ಟಿ.ವಿ. ನಿರ್ದೇಶಕ್ ಶ್ರೀ ಸ್ಟ್ಯಾನಿ ಬೆಳಾ, ಕಾರ್ಯಕ್ರಮ್ ಸಂಯೋಜಕ್ ಶ್ರೀ ಸಂಜಯ್ ಜೋನ್ ರೊಡ್ರಿಗಸ್, ಕಾರ್ಯೆಂ ನಿರ್ವಾಹಕ್ ಶ್ರೀ ಮನೋಜ್ ಫೆರ್ನಾಂಡಿಸ್, ಇಂಗ್ಲಿಶ್ ಲೇಖಕ್ ಶ್ರೀ ವಿಲಿಯಮ್ ಫಾಯ್ಸ್, ಪತ್ರಿಕಾ ಪ್ರತಿನಿಧಿ ಅಲ್ಪೋನ್ಸ್ ಪಾಂಗ್ಳಾ ಆನಿ ಜಾಯ್ತೆ ಮಾನೆಸ್ತ್ ಕಾರ್ಯಾಕ್ ಉಪಸ್ಥಿತ್ ಆಸ್ಲೆ.
ಸಗ್ಳ್ಯಾ ಕಾರ್ಯಕ್ರಮಾಚೊ ಸಂಯೋಜಕ್ ಶ್ರೀ ಸಿಲ್ವೆಸ್ಟರ್ ಸಲ್ಡಾನ್ಹಾ ಹಾಣೆ ಸಯ್ರ್ಯಾಂಚೊಂ ತಶೆಂ ಹಾಜರ್ ಜಾಲ್ಲ್ಯಾ ಸಮೆಸ್ತಾಂಚೊಂ ಉಪ್ಕಾರ್ ಭಾವುಡ್ಲೊ.
ಸಕಾಳಿಂ ನೋವ್ ವ್ಹರಾಂಚೆರ್ ಕಾಪಿ – ಫಳ್ಹಾರಾಸವೆಂ ಆರಂಭ್ ಜಾಲ್ಲೆಂ ಕಾರ್ಯೆಂ, ಲವ್ದಾತೊ ಗಾಯನ್ ಆನಿ ಸಹಬೋಜನಾಸವೆಂ ದೋನ್ ವ್ಹರಾಂಚೇರ್ ಸಂಪನ್ನ್ ಜಾಲೆಂ.
ಚಿಕ್‌ಮಗ್ಳುರ್, ಮೂಡಿಗೆರೆ, ಹಾಸನ್, ಮಂಗ್ಳುರ್, ಬೆಂಗ್ಳುರ್ ಆನಿ ಗೊಂಯಾಂ ಥಾವ್ನ್ ತಿನ್ಶಿಂ ಕೊಂಕ್ಣಿ ಲೋಕ್ ಕಾರ್ಯಾಕ್ ಹಾಜರ್ ಆಸ್ಲೊ.
■ ತಸ್ವಿರ‍್ಯೊ : ಅಲ್ಪೋನ್ಸ್ ಪಾಂಗ್ಳಾ
