ʻಸಂಗೀತ್ ಘರ್‌ʼ ಬ್ಯಾನರಾಖಾಲ್ ತಯಾರ್‌ ಜಾಂವ್ಚೆಂ ಯೊಡೆಲಿಂಗ್ ಕಿಂಗ್ ಮೆಲ್ವಿನ್‍ ಪೆರಿಸ್ ಆನಿ ನಿರ್ದೇಶಕ್‌ ಜೋಯಲ್ ಪಿರೇರಾ ಹಾಂಚೆಂ ಪಯ್ಲೆಂ ಫಿಲ್ಮ್ ‘ಪಯಣ್’ ಹಾಚೆಂ ದುಸ್ರೆಂ ಪೋಸ್ಟರ್ ಜುಲಾಯ್‌ 28 ತಾರಿಕೆರ್ ಪುತ್ತೂರಾಂತ್ಲ್ಯಾ ರೊಟರಿ ಮನೀಷಾ ಹೊಲಾಂತ್ ಮಾಯ್‌ ದೆ ದೇವುಸ್‌ ಫಿರ್ಗಜಿಚ್ಯಾ ಗೊವ್ಳಿಕ್‌ ಪರಿಷದೆಚೊ ಉಪಾಧ್ಯಕ್ಷ್‌ ಜೆರಾಲ್ಡ್ ಡಿಕೊಸ್ತಾ, ಡೊನ್ ಬೊಸ್ಕೊ ಕ್ಲಬಾಚೊ ಅಧ್ಯಕ್ಷ್ ಆಂಟನಿ ಒಲಿವೆರಾ ಆನಿ ಕಾರ್ಯದರ್ಶಿ ಜ್ಯೋ ಡಿ’ಸೊಜ ಹಾಂಚ್ಯಾ ಹಸ್ತುಕಿಂ ಮೊಕ್ಳಿಕ್‌ ಕೆಲೆಂ.
ಹ್ಯಾ ವೆಳಾರ್ ಉಲಯಿಲ್ಲೆ ಆಂಟನಿ ಒಲಿವೆರಾ ಹಾಂಣಿ “ಆಮ್ಚೊಚ್ ಬ್ರಾಯನ್ ಸಿಕ್ವೇರಾ ಹಾಣೆ ಮುಖೆಲ್‌ ಪಾತ್ರ್‌ ಖೆಳ್‌ಲ್ಲೆಂ ಸಿನೆಮಾ ಸರ್ವಾಂನಿ ಪಳೆಂವ್ಚೆ ಮಾರಿಫಾತ್‌ ಆಮ್ಚ್ಯಾ ತರ್ನ್ಯಾ ಪ್ರತಿಭೆಕ್ ಪ್ರೋತ್ಸಾಹ್‌ ದೀಜೆ. ತ್ಯಾ ವರ್ವಿಂ ಕೊಂಕ್ಣಿ ಭಾಶೆಚೆಂ ಅಸ್ತಿತ್ವ್ ಫುಡ್ಲೆ ಪಿಳ್ಗೆ ಮೆರೆನ್ ಪಾವೊಂವ್ಕ್‌ ಜಾಯ್ʼ ಅಶೆಂ ಮ್ಹಳೆಂ.
ನಟ್, ಉಧ್ಯಮಿ ಆನಿ ಸಂಘಟಕ್ ಲೆಸ್ಲಿ ರೆಗೊ ಫಿಲ್ಮ್ ಪಂಗ್ಡಾ ತರ್ಫೆನ್ ಉಲವ್ನ್, “ಆಪ್ಲ್ಯಾ ಸಮಾಜ್‌ ಸೆವೆ ಪಾಸತ್‌ ಪುತ್ತೂರ್ಚ್ಯಾ ಡೊನ್‌ಬೊಸ್ಕೊ ಕ್ಲಬ್ಬಾಚೆಂ ನಾಂವ್‌ ಪಾಮಾದ್‌ ಜಾಲಾಂ. ಅಲೆಕ್ಸ್ ಮಾಡ್ತಾ ತಸಲ್ಯಾ ಕೊಂಕ್ಣೆಂತ್ಲ್ಯಾ ಮ್ಹಾಲ್ಘಡ್ಯಾ ಸಂಗೀತ್ಗಾರಾಚೆಂ ಕುಳ್ವಾರ್‌ ಜಾವ್ನಾಸ್ಚೆಂ ಪುತ್ತೂರ್‌ ದೆಣ್ಯಾವಂತ್‌ ಕಲಾಕಾರಾಂಚಿ ಭುಂಯ್. ‘ಅಸ್ಮಿತಾಯ್’ ಕೊಂಕ್ಣಿ ಸಿನೆಮಾಂತ್ ಪುತ್ತೂರಾಚೊ ಕಿಶೊರ್ ಫೆರ್ನಾಂಡಿಸ್ ಆನಿ ಪ್ರವೀಣ್ ಪಿಂಟೊ ಹಾಂಣಿ ನಟನ್‌ ಕೆಲ್ಲೆಂ ಆಸಾ. ಆತಾಂ ಬ್ರಾಯನ್ ಸಿಕ್ವೇರಾ ಪಯಣ್ ಫಿಲ್ಮಾಂತ್‌ ಮುಖೆಲ್‌ಪಾತ್ರ್ ಖೆಳ್ಳಾ. ಸರ್ವಾಂನಿ ‘ಪಯಣ್’ ಸಿನೆಮಾಚೊ ಪ್ರೀಮಿಯರ್ ಶೊ ಪಳೆವ್ನ್ ಹ್ಯಾ ಯುವ ತಾಲೆಂತಾಕ್‌ ಪ್ರೋತ್ಸಾಹ್‌ ದೀಜೆ ಮ್ಹಣ್‌ವಿನಂತಿ ಕೆಲಿ.
ಪಯಣ್ ಫಿಲ್ಮಾಚೊ ನಿರ್ದೇಶಕ್‌ ಸಂಗೀತ್ ಗುರು ಜೊಯೆಲ್ ಪಿರೇರಾ ವೆದಿರ್‌ ಆಸೊನ್‌ ಫಿಲ್ಮಾಚ್ಯೊ ನಾಯಿಕಾ ಕು| ಶಾಯ್ನಾ ಡಿ’ಸೋಜ, ಕು| ಕೇಟ್ ಪಿರೇರಾ ಆನಿ ಹೆರಾಂಚಿ ಒಳೊಕ್ ಕರ್ನ್ ದಿಲಿ.
ಪಯಣ್ ಸಿನೆಮಾ ಸೆನ್ಸರ್ ಪಾಂವ್ಡ್ಯಾರ್ ಪಾವ್ಲಾಂ. ಸಪ್ಟೆಂಬರ್ ಮ್ಹಯ್ನ್ಯಾಂತ್ ಮಂಗ್ಳೂರ್ ಆನಿ ಭೊಂವ್ತಣಿಚ್ಯಾ ಪ್ರದೇಶಾಂನಿ ಎಕಾಚ್ ವೆಳಾರ್ ಪ್ರದರ್ಶಿತ್ ಜಾತಲೆಂ.
ಪಯಣ್ ಫಿಲ್ಮಾಂತ್‌ ಬ್ರಾಯಾನ್ ಸಿಕ್ವೇರಾ, ಜಾಸ್ಮಿನ್ ಡಿಸೋಜಾ ಆನಿ ಕೇಟ್ ಪಿರೇರಾ ಮುಖೆಲ್‌ ಪಾತ್ರಾಂತ್‌ ಆಸಾತ್‌ ತರ್‌, ಶೈನಾ ಡಿಸೋಜಾ, ರೈನೆಲ್‌ ಸಿಕ್ವೇರಾ, ಲೆಸ್ಲಿ ರೆಗೊ, ಜೆರಿ ರಸ್ಕಿನ್ಹಾ, ವಾಲ್ಟರ್ ನಂದಳಿಕೆ, ಆಲ್ಬರ್ಟ್ ಪೆರಿಸ್, ಜೀವನ್ ವಾಸ್, ಮೆಲಿಶಾ ಪಿಂಟೊ ಮತ್ತು ಜೋಸ್ಸಿ ರೇಗೊ, ಹೆರ್‌ ಪಾತ್ರ್‌ ಖೆಳ್ತಲೆ.
ತಾಂತ್ರಿಕ್ ಸಿಬ್ಬಂದಿ : ಛಾಯಾಗ್ರಹಣ್: ವಿ ರಾಮಾಂಜನೇಯ, ಸಂಕಲನ್ ಆನಿ ಸಹ-ನಿರ್ದೇಶನ್: ಮೆವಿಲ್ ಜೋಯಲ್ ಪಿಂಟೊ. ಸಂಗೀತ್: ರೋಶನ್‌ಡಿʼಸೋಜ, ಆಂಜೆಲೊರ್. ನಿರ್ಮಾಪಕಿ: ನೀಟಾ ಜೋನ್‌ಪೆರಿಸ್.
