ಮೋದಿನ್ ದಿಲ್ಲಿಕ್ ದಗ್ದಿಲೆಂ ಅನಿಂ ಜಯ್ತ್ ಜೊಡ್ಲೆಂ

15

ಹ್ಯಾ ಫೆಬ್ರೆರ್ 5 ವ್ಯೆರ್ ದಿಲ್ಲಿ ರಾಜಧಾನಿ ಶೆತಾಚ್ಯಾ ಶಾಸಕಾಂಗ್ ಸಭೆಚ್ಯೆಂ ಎಲಿಸಾಂವ್ ಚಲ್ಲೆಂ. ಫೆಬ್ರೆರ್ 8 ವ್ಯೆರ್ ಫಲಿತಾಂಶ್ ಜಾಹಿರ್ ಜಾಲೆಂ. ಪಾಟ್ಲ್ಯಾ ಧಾ ವರ್ಸಾಂ ಥಾವ್ನ್ ಪದ್ವೆರ್ ಆಸ್ಲೆಲಿ ಆಮ್ ಆದ್ಮಿ ಪಾಡ್ತ್ (AAP) ಸಲ್ವಾಲಿ. ಮೋದಿಚ್ಯಾ ಅಕ್ರಮಣಕಾರಿ ಲ್ಹಾರಾಂತ್, ಸತ್ತಾವೀಸ್ ವರ್ಸಾಂ ಉಪ್ರಾಂತ್ ಭಾಜಪಾ (BJP) ಪದ್ವೆರ್ ಆಯ್ಲಿ.

Government of National Capital Territory of Delhi Act, 1991 ಮುಖಾಂತ್ರ್ ದಿಲ್ಲಿ ರಾಜಧಾನಿ ಶೆತಾಚಿ ಶಾಸಕಾಂಗ್ ಸಭಾ ಅಸ್ತಿತ್ವಾಂತ್ ಆಯ್ಲಿ. ಹ್ಯೆ ಸಭೆಂತ್ ಜುಮ್ಲಾ 70 ಸಾಂದೆ ಪಾಂಚ್ ವರ್ಸಾಂಚ್ಯೆ ಆವ್ಧೆಕ್ ವಿಂಚೊನ್ ಯೇತಾತ್. 1993 ಇಸ್ವೆಂತ್ ಪಯ್ಲೊ ಚುನಾವ್ ಜಾಲೊ ತೆದ್ನಾಂ ಭಾಜಪಾ 49 ಸಿಟಿ ಜಿಕೊನ್ ಪದ್ವೆರ್ ಆಯ್ಲಿ. ಕೊಂಗ್ರೆಸ್ ಪಾಡ್ತ್ 14 ಸಿಟಿ ಜಿಕೊನ್ ಅಧಿಕ್ರತ್ ಪ್ರತಿಪಕ್ಶ್ ಜಾಲಿ.

ಉಪ್ರಾಂತ್ಲ್ಯಾ ತೀನ್ ಚುನಾವಾಂನಿಂ ಕೊಂಗ್ರೆಸ್ ಪಾಡ್ತಿಕ್ ಬಹುಮತ್ ಮೆಳ್ಳೊ. ಮಾಲ್ಘಡಿ ಕೊಂಗ್ರೆಸ್ ರಾಜಕಾರಣಿ ಶೀಲಾ ದೀಕ್ಶಿತ್ ಹಿಣೆಂ ಪಂದ್ರಾ ವರ್ಸಾಂ ಮುಖೆಲ್ ಮಂತ್ರಿಚಿ ಪದ್ವಿ ಸಾಂಬಾಳ್ಳಿ. ತಿಣೆಂ ಭಾರಿಚ್ ವ್ಹಡ್ ಮಾಫಾನ್ ದಿಲ್ಲಿಚಿ ಅಭಿವ್ರದ್ಧಿ ಕೆಲಿ. ಕೊಮನ್ ವೆಲ್ತ್ ಗೇಮ್ಸ್ ಯಶಸ್ವಿಪಣಾನ್ ಆಯೋಜಿತ್ ಕೆಲ್ಲಿ ಕೀರ್ತ್ ತಿಚಿ. ಮಾತ್ರ್, CWG Scam ಮ್ಹಣ್ ನಾಂವ್ ಪಡ್ಲೆಲೊ ಭ್ರಶ್ಟಾಚಾರಾಚೊ ತಿಬೊ ತಿಚ್ಯಾ ಆಡಳ್ತ್ಯಾಕ್ ಲಾಗ್ಲೊ.

2013 ದಸೆಂಬ್ರಾಂತ್ ಚುನಾವ್ ಜಾತನಾಂ, ನವಿಚ್ ಜನ್ಮಾಲ್ಲಿ ಆಮ್ ಆದ್ಮಿ ಪಾಡ್ತ್ (ಆಪ್) ಭ್ರಶ್ಟಾಚಾರ್ ವಿರುದ್ಧ್ ಆಂದೋಲನಾಚ್ಯೆ ಸಾವ್ಳೆಂತ್ ಸ್ಪರ್ಧ್ಯಾಕ್ ದೆಂವ್ಲಿ. ಆಪಾಚೊ ಸಂಸ್ಥಾಪಕ್ ಅರವಿಂದ್ ಕೇಜ್ರಿವಾಲ್ India Against Corruption (IAC) ಆಂದೋಲನಾಚೊ ತಾಂಡೆಲಿ. ಆಪ್ 28 ಸಿಟಿ ಜಿಕ್ಲಿ. ಭಾಜಪಾಕ್ 31 ಸಿಟಿ ಮೆಳ್ಳ್ಯೊ ತರೀ ಸರ್ಕಾರ್ ಘಡುಂಕ್ ನರ್ಗಾಲಿ. ಕೇಜ್ರಿವಾಲಾನ್ 8 ಸಿಟಿ ಜಿಕ್ಲೆಲ್ಯಾ ಕೊಂಗ್ರೆಸ್ ಪಾಡ್ತಿಚೊ ಸಹಕಾರ್ ಘೆವ್ನ್ ಅಲ್ಫ್-ಸಂಖ್ಯಾಕ್ ಸರ್ಕಾರ್ ಘಡ್ಲೊ. 49 ದಿಸಾಂ ಉಪ್ರಾಂತ್, ಜನ್ ಲೋಕಪಾಲ್ ಮಸೂದೊ ಮಂಜೂರ್ ಕರುಂಕ್ ಹೆರ್ ಪಾಡ್ತಿಂನಿಂ ಸಹಕಾರ್ ದೀವ್ನಾ ಮ್ಹಳ್ಳೆಂ ಕಾರಣ್ ದೀವ್ನ್ ಕೇಜ್ರಿವಾಲಾನ್ ರಾಜಿನಾಮೊ ದಿಲೊ. ದಿಲ್ಲಿಂತ್ ರಾಷ್ಟ್ರಪತಿ ಶಾಸನ್ ಲಾಗು ಜಾಲೆಂ.

2014 ಮಾಯ್ ಮಹಿನ್ಯಾಂತ್ ಚಲ್ಲೆಲ್ಯಾ ಲೋಕ್-ಸಭೆಚ್ಯಾ ಚುನಾವಾಂತ್ ಭಾಜಪಾಕ್ ಬಹುಮತ್ ಮೆಳ್ಳೊ. ನರೇಂದ್ರ ಮೋದಿ ಪ್ರಧಾನ್ ಮಂತ್ರಿ ಜಾಲೊ. ಮೋದಿನ್ 2015 ಫೆಬ್ರೆರಾ ಪರ್ಯಾಂತ್ ದಿಲ್ಲಿಂತ್ ರಾಷ್ಟ್ರಪತಿ ಶಾಸನ್ ಮುಂದರುನ್ ವೆಲೆಂ.

2015 ಫೆಬ್ರೆರ್ ಚುನಾವಾಂತ್ ಚಮತ್ಕಾರಿ ರೀತಿನ್ ಆಪ್ 67 ಸಿಟಿ ಜಿಕ್ಲಿ. ಭಾಜಪಾಕ್ ಕೇವಲ್ 3 ಸಿಟಿ ಆನಿಂ ಕೊಂಗ್ರೆಸಾಕ್ ಶೂನ್ಯ್. ಪಾಂಚ್ ವರ್ಸಾಂಚೊ ಸರ್ಕಾರ್ ಚಲಯಿಲ್ಲಿ ಆಪ್ 2020 ಚುನಾವೆಂತ್ ಪರತ್ 62 ಸಿಟಿ ಜಿಕೊನ್ ಪದ್ವೆರ್ ಆಯ್ಲಿ. ಹ್ಯಾ ಪಾಂಚ್ ವರ್ಸಾಂಚ್ಯೆ ಆವ್ಧೆಂತ್ ಮಾತ್ರ್ ಭ್ರಶ್ಟಾಚಾರಾಚೊ ತಿಬೊ ಆಪ್, ಕೇಜ್ರಿವಾಲ್ ಆನಿಂ ತಾಚ್ಯಾ ಸರ್ಕಾರಾಕ್ ಲಾಗ್ಲೊ. ಕೇಜ್ರಿವಾಲ್ ಜೈಲಾಕ್ ಸಯ್ತ್ ಗೆಲೊ.

ಆಪ್ ಮಹಾ ಭ್ರಶ್ಟಾಚಾರಿ ಪಾಡ್ತ್ ಮ್ಹಣ್ ಭಾಜಪಾನ್ ಪ್ರಚಾರ್ ಕೆಲೊ. 2025 ಫೆಬ್ರೆರ್ 5 ವ್ಯೆರ್ ಚಲ್ಲೆಲ್ಯಾ ಚುನಾವಾಂತ್ ಆಪ್ ಕೇವಲ್ 22 ಸಿಟಿ ಜಿಕೊಂಕ್ ಸಕ್ಲಿ. ಭಾಜಪಾಕ್ 48 ಸಿಟಿ ಲಾಭ್ಲ್ಯಾತ್. ವೆಗಿಂಚ್ ಭಾಜಪಾಚೊ ಸರ್ಕಾರ್ ಸೊಪುತ್ ಘೆತಲೊ.

ದಿಲ್ಲಿ ರಾಜಧಾನಿ ವಠಾರ್ ನಾಂವಾಕ್ ಮಾತ್ರ್ ಏಕ್ ರಾಜ್ಯ್. ಹಿ ಏಕ್ ಸಂಪೂರ್ಣ್ ಯುನಿಯನ್ ಟೆರಿಟರಿ. ಆಡಳ್ತೆಂ ಚಲಂವ್ಚೊ ಅಧಿಕಾರ್ ಕೇಂದ್ರ್ ಸರ್ಕಾರಾನ್ ನೆಮ್ಲೆಲ್ಯಾ ಉಪ-ರಾಜ್ಯಪಾಲಾಚ್ಯಾ (LG) ಹಾತಿಂ ಆಸಾ. ಸಿವಿಲ್ ಸರ್ವಿಸ್ ಅಧಿಕಾರಿ ತಾಕಾ ರಿಪೊರ್ಟ್ ಕರ್ತಾತ್, ಮಂತ್ರಿಂಕ್ ನಹಿಂ. ದಿಲ್ಲಿ ಪೊಲಿಸ್ ಕೇಂದ್ರ್ ಸರ್ಕಾರಾಚ್ಯಾ ಘರ್-ಖಾತ್ಯಾಕ್ ಖಾಲ್ತೆ ಜಾತಾತ್. ಮುನ್ಸಿಪಾಲಿಟಿಂಕ್ ಲೆಗುನ್ ಕೇಂದ್ರ್ ಸರ್ಕಾರಾ ಥಾವ್ನ್ ತಾಕಿದ್ ಮೇಳ್ತಾ.

ಮೋದಿ ಎಕ್ಲೊ ಸರ್ವಾಧಿಕಾರಿ, ಕಠುರ್ ಆನಿಂ ಭುರ್ಸೊ ರಾಜಕಾರಣಿ. ಪದ್ವೆ ಖಾತಿರ್ ಕಿತೇಂಯ್ ಕರುಂಕ್ ತೊ ತಯಾರ್. ದಿಲ್ಲಿಂತ್ ತಾಕಾ ಸಲ್ವಾಯಿಲ್ಲ್ಯಾ ಲೋಕಾಕ್ ಕಷ್ಟುಂಕ್ ಆನಿಂ ದಗ್ದುಂಕ್ ತಾಣೆಂ ಫಿತೂಳ್ ರಚ್ಲಿ.

ಗುಜರಾತ್ ಮೂಳಾಚೊ ತಾಚೊ ಸಾಂಗಾತಿ ಭಾಜಪಾ ರಾಜಕಾರಣಿ ವಿನಯ್ ಕುಮಾರ್ ಸಕ್ಸೆನಾ ಮ್ಹಳ್ಳ್ಯಾ ಖಟ್ಟರ್ ಖಳ್-ನಾಯಕಾಕ್ ದಿಲ್ಲಿಚೊ ಉಪರಾಜ್ಯಪಾಲ್ ಜಾವ್ನ್ ತಾಣೆಂ ನೆಮ್ಲೊ. ಹೊ ಮನಿಸ್ ಬ್ರಿಟಿಶ್ ವಯ್ಸ್-ರೋಯ್ ಪ್ರಾಸ್ ಕಠುರ್. ದಿಲ್ಲಿಚ್ಯಾ ಸಿವಿಲ್ ಸರ್ವಿಸ್ ಅಧಿಕಾರಿಂಕ್ ಆಪ್ಲ್ಯಾ ಮುಠಿಂತ್ ಘೆಂವ್ಚ್ಯಾ ಇರಾದ್ಯಾನ್ ತಾಂಚ್ಯೆಂ ಪೋಸ್ಟಿಂಗ್, ಟ್ರಾನ್ಸ್-ಫರ್, ಸಾಂಬಾಳಾಂತ್ ಭಡ್ತಿ ಆನಿಂ ಪ್ರಮೋಶನ್ ಅಸಲಿ ಸರ್ವ್ ಪದ್ವಿ ತಾಣೆಂ ಆಪ್ಲ್ಯಾ ಹಾತಿಂ ದವರ್ಲಿ. ಹ್ಯಾ ವರ್ವಿಂ ಅಧಿಕಾರಿ ಆಮ್ ಆದ್ಮಿ ಸರ್ಕಾರಾಕ್ ಖಾಲ್ ಜಾಲೆನಾಂತ್. ಬಗಾರ್ ಕೇಂದ್ರ್ ಸರ್ಕಾರಾನ್ ಉಪ-ರಾಜ್ಯಪಾಲಾ ಮುಖಾಂತ್ರ್ ದಿಲ್ಲೆ ಸರ್ವ್ ಆದೇಸ್ ಮಾತ್ರ್ ತಾಣಿಂ ಪಾಳ್ಳೆ.

ಹೊ ಅನ್ನ್ಯಾಯ್ ಕೇಜ್ರಿವಾಲ್ ಆನಿಂ ತಾಚಿ ಪಾಡ್ತ್ ಕಶೆಂ ಸೊಸ್ತೆಲಿ? ತಾಣಿಂ ಸುಪ್ರೀಂ ಕೋಡ್ತಿಚ್ಯೆಂ ದಾರ್ ಬಡಯ್ಲೆಂ. ದಿಲ್ಲಿ ಸರ್ಕಾರ್ ಮ್ಹಳ್ಯಾರ್ ಕೋಣ್ ಮ್ಹಳ್ಳೆಂ ಸವಾಲ್ ಕೊಡ್ತಿಂತ್ ಉಠ್ಲೆಂ: ದಿಲ್ಲಿಚೊ ಲೋಕಾನ್ ವಿಂಚ್ಲಲೊ ಸರ್ಕಾರ್ ಗೀ ವ ಕೇಂದ್ರ್ ಸರ್ಕಾರಾನ್ ನೆಮ್ಲಲೊ ಉಪ-ರಾಜ್ಯಪಾಲ್? ಲೋಕಾನ್ ವಿಂಚ್ಲಲೊ ಸರ್ಕಾರ್ ಮಾತ್ರ್ ದಿಲ್ಲಿಚೊ ಸರ್ಕಾರ್ ಮ್ಹಣ್ ಸುಪ್ರೀಂ ಕೊಡ್ತಿನ್ ಠರಾಯ್ಲೆಂ. ಉಪ-ರಾಜ್ಯಪಾಲಾನ್ ದಿಲ್ಲಿ ರಾಜ್ಯ್ ಸರ್ಕಾರಾಚ್ಯಾ ಮಂತ್ರಿಂನಿಂ ದಿಲ್ಲ್ಯಾ ಸಲಹೆ ಪ್ರಮಾಣೆಂ ಕಾಮ್ ಕರಿಜೆ ಮ್ಹಣ್ ತಾಕಿದ್ ದಿಲಿ.

ಸುಪ್ರೀಂ ಕೊಡ್ತಿಂತ್ ಮೆಳ್ಳೆಲಿ ಹಿ ಸಲ್ವಣಿ ಸರ್ವಾಧಿಕಾರಿ ಮೋದಿಕ್ ಸೊಸುಂಕ್ ಅಸಾಧ್ಯ್ ಜಾಲೆಂ. ಖುಬ್ಳೊನ್ ತಾಣೆಂ, ಆಪ್ಲೊ ಅಧಿಕಾರ್ ವಾಪ್ರುನ್ ಒರ್ಡಿನೆನ್ಸ್ ಜಾಹಿರ್ ಕೆಲೆಂ: ದಿಲ್ಲಿ ಸರ್ಕಾರ್ ಮ್ಹಳ್ಯಾರ್ ಉಪ-ರಾಜ್ಯಪಾಲ್ ಶಿವಾಯ್ ರಾಜ್ಯ್ ಮಂತ್ರಿ ಮಂಡಳ್ ನಹಿಂ! ಅಶೆಂ, ದಿಲ್ಲಿ ಸರ್ಕಾರಾಕ್ ನಪುಂಸಕ್ ಕರ್ನ್ ಸೊಡ್ಲೆಂ. ಹೊ ನವೊ ಅಧಿಕಾರ್ ಯೇತಚ್ ಉಪರಾಜ್ಯಪಾಲಾನ್ ದಿಲ್ಲಿಚ್ಯಾ ಲೋಕಾಕ್ ದಗ್ದುಂಕ್ ಜಾಯಿತ್ತಿಂ ಮೇಟಾಂ ಘೆತ್ಲಿಂ.

ಪರಿಣಾಮ್? ಮುನಿಸಿಪಾಲಿಟಿಚ್ಯಾ ಕರ್ಮಚಾರಿಂನಿಂ ನಿತಳಾಯೆಚ್ಯೆಂ ಕಾಮ್ ಕರಿನಾ ತರ್ ವಿಚಾರಾಪ್ ಕರುಂಕ್ ಆಪ್ ಸರ್ಕಾರಾಕ್ ಅಧಿಕಾರ್ ನಾಂ. ಕಚ್ರೊ ಆರಾವ್ನ್ ಸಾಗ್ಸುಂಚಿ ಡ್ಯೂಟಿ (waste management duty) ತಾಂಚಿಂ. ಡ್ಯೂಟಿ ಪಾಳಿನಾಂ ತರ್ ತಾಂಚಿ ಝಡ್ತಿ ಕೆಲ್ಯಾರ್ ಉಪ-ರಾಜಪಾಲ್ ತಾಂಕಾಂಚ್ ಸಪೊರ್ಟ್ ಕರ್ತಾ. ಹೌಸ್ ಕೀಪಿಂಗ್, ನಿತಳಾಯ್ ಆನಿಂ ನೈಮಲ್ಯ ತಸ್ಲ್ಯಾಂ ಮೂಳಾವ್ಯಾ ಕಾಮಾಂತ್ ಸಡಿಳಾಯ್ ದಾಕಯ್ಲಿ ತರ್ ವಿಚಾರಪ್ ಕರುಂಕ್ ದಿಲ್ಲಿ ಸರ್ಕಾರಾಕ್ ಅಧಿಕಾರ್ ನಾಂ. ಕೇವಲ್ ಜವಾಬ್ದಾರಿ ಮಾತ್ರ್ ತಾಂಚ್ಯಾ ಮಾತ್ಯಾರ್. ಉದ್ಕಾಚಿ ಸಪ್ಲಯ್ ಕರ್ಚಿ ಜವಾಬ್ದಾರಿ ಆಸ್ಚ್ಯೆ ಆಧಿಕಾರಿ ಮನ್ ಆಯಿಲ್ಲ್ಯಾ ಪರಿಂ ಬಂಧ್ ಕರ್ತಾಲೆ. ಫೊಂಡ್ಕುಳೆ ಭರೊನ್ ಗೆಲ್ಲೆ ರಸ್ತೆ ರಿಪೇರ್ ಜಾಲೆನಾಂತ್. ಮೊಹಲ್ಲ ಕ್ಲಿನಿಕಾಂಕ್ ವಕ್ತಾಂ ಆನಿಂ ಉಪಕರಣಾಂ ಸಪ್ಲಯ್ ಕರ್ತೆಲ್ಯಾಂಚಿ ಬಿಲ್ಲಾಂ ಪಾಸ್ ಕೆಲಿನಾಂತ್. ಅಶೆಂ ಮೂಳಾವ್ಯೊ ಸವ್ಲತ್ಯೊ ಲೋಕಾಕ್ ಮೇಳಾನಾಂತ್ ಜಾಲ್ಯೊ. ಆಮ್ ಆದ್ಮಿ ಪಾಡ್ತಿಚೊ ಸರ್ಕಾರ್ ಬೆ-ಜವಬ್ದಾರ್. ಭಾಜಪಾಕ್ ವೋಟ್ ದಿಯಾ, “ಡಬಲ್ ಏಂಜಿನ್ ಸರ್ಕಾರ್” ಪದ್ವೆರ್ ಹಾಡಾ ಆನಿಂ ಹ್ಯಾ ಸರ್ವ್ ತಕ್ಲೆ ಪಡಾಫಡಿ ಥಾವ್ನ್ ಸುಟ್ಕಾ ಮೆಳ್ತೆಲಿ ಅಶೆಂ ಗುಮಟ್ ಬಡಯ್ಲೆಂ. ಹೊ ಫಟ್ಕಿರೊ ಪ್ರೊಪಗಾಂಡಾ ಮ್ಹಣ್ ಸತ್ ಲೋಕಾಕ್ ಪಾವಂವ್ಚ್ಯೆಂ ಕಶೆಂ? ಮಾದ್ಯಮಾಂ ಮೋದಿಚ್ಯಾ ಕಂಟ್ರೊಲಾಂತ್ ಆಸಾತ್ ದೆಕುನ್ ಹ್ಯಾ ಗಲೀಜ್ ರಾಜಕಾರಣಾಚಿ ಝಳಕ್ ಲೋಕಾಕ್ ದಿಸ್ಲಿ ನಾಂ.

ಪ್ರೊಪಗಾಂಡಾ ಝುಜಾಂತ್ ಜಿಕೊಂಕ್ ಭಾಜಪಾ ಕಡೆಂ ದುಡು ಆಸ್ಲೊ. RSS ಆನಿಂ ಸರ್ವ್ saffron ಕರ್ಮಚಾರಿ ಆಸ್ಲೆ. ತಾಂಚ್ಯೆ ಗುಂಡಾ ಆಸ್ಲೆ. ಉಜ್ವ್ಯಾ ಪಂಥಿಚೊ ಪ್ರಚಾರ್ ಕರ್ತೆಲಿಂ ಮಾಧ್ಯಮಾಂ ಆಸ್ಲಿಂ. 7th Pay Commssion ಬಸವ್ನ್ ಸರ್ಕಾರಿ ಅಧಿಕಾರಿಂಚೊ ಸಾಂಬಾಳ್ ಮೋದಿ ಸರ್ಕಾರಾನ್ ಚಡಯ್ಲೊ. ಯೂನಿಯನ್ ಬಜೆಟಾ ಮುಖಾಂತ್ರ್ ಮಧ್ಯಮ್ ವರ್ಗಾಕ್ ಇನ್ಕಂ ಟ್ಯೇಕ್ಸ್ ರಿಯಾಯ್ತ್ ದಿಲಿ. ಅಸಲ್ಯಾ ಕ್ರೂರ್ ಆನಿಂ ಹಲ್ಕಟ್ ರಾಜಕಾರಾಣಾಕ್ ಕೇಜ್ರಿವಾಲ್ ಆನಿಂ ತಾಚಿ ಪಾಡ್ತ್ ಬಲಿ ಜಾಲಿ.

ಕೇಜ್ರಿವಾಲಾನ್ ರಾಜಕಾರಣಿ ಖೆಳಾಂತ್ ಚೂಕಿ ಕರುಂಕ್ ನಾಂತ್ ಮ್ಹಣೊಂಕ್ ಜಾಯ್ನಾ. ತೊ ರಾಜಕಾರಣ್ ಬದ್ಲುಂಕ್ ಪದ್ವೆರ್ ಆಯಿಲ್ಲೊ. ಪೂಣ್, ರಾಜಕಾರಣ್ ಏಕ್ ಭುರ್ಸೊ ಖೆಳ್ ಮ್ಹಣ್ ಸಮ್ಜೊನ್ ತಾಣೆಂ ತೊಚ್ ಖೆಳ್ ಹಾತಿಂ ಘೆತ್ಲೊ. ಸರ್ವಾಧಿಕಾರಿ ಮೋದಿ ಕಿತ್ಲ್ಯಾ ಮಟ್ಟಾಕ್ ದಿಲ್ಲಿಕ್ ದಗ್ದಿತ್ ಆನಿಂ ಆಪ್ಲ್ಯಾಚ್ ಪರ್ಜ್ಯೆಕ್ ನಿರಾಶೆಚ್ಯಾ ಫೊಂಡಾಂತ್ ಘಾಲಿತ್ ಮ್ಹಣ್ ಅಂದಾಜ್ ಕೇಜ್ರಿವಾಲ್ ಸರ್ಕಾರಾಕ್ ಜಾಲ್ಲೊ. ಪೂಣ್, ಹ್ಯಾ ಭುರ್ಸ್ಯಾ ರಾಜಕಾರಣಾಂತ್ ತಾಚ್ಯೆಂ ಬಲಿಪಶುತ್ವ್ ರಾಜಕಾರಣ್ (politics of victimhood) ಸಲ್ವಾಲೆಂ. ಹಾಂತು ನವಾಲ್ ನಾಂ!

■ ಫಿಲಿಪ್ ಮುದಾರ್ತ್