ಖಾಡಿಗಾಂವಾಂತ್ಲ್ಯಾ ಸಾಂಸ್ಕೃತಿಕ್ – ಸಮಾಜಿಕ್ ಸಂಘಟನಾಂ ಪಯ್ಕಿ ಪ್ರಮುಕ್ ಮಂಗ್ಳುರ್ ಕೊಂಕಣ್ಸ್ ದುಬಯ್ ಹಾಚ್ಯಾ 37 ವರ್ಸಾಂಚ್ಯಾ ಚರಿತ್ರೆಂತ್ ಪಯ್ಲೊ ತರ್ನೊ ಅಧ್ಯಕ್ಷ್ ಜಾವ್ನ್ ಅವಿರೋದ್ ವಿಂಚೊನ್ ಯೇವ್ನ್ ವಾಮಂಜೂರ್ ಪಿರ್ಗಜೆಚ್ಯಾ ಸ್ಟೀಫನ್ ಮಿನೇಜಸಾನ್ ದಾಕ್ಲೊ ರಚ್ಲಾ.
ಮಾರ್ಚ್ 18 ತಾರಿಕೆರ್ ಕರಾಮಾ ವಿನ್ನೀಸ್ ರೆಸ್ಟೋರೆಂಟಾಂತ್ ಚಲ್ಲೆಲ್ಯಾ ವಾರ್ಷಿಕ್ ಜೆರಾಲ್ ಜಮಾತೆಂತ್ ಜೇಮ್ಸ್ ಮೆಂಡೋನ್ಸಾ ಹಾಂಚ್ಯಾ ಅಧ್ಯಕ್ಷತೆರ್ ಹಿ ವಿಂಚವ್ಣ್ ಜಾಲಿ. ಉಪಾಧ್ಯಕ್ಷ್ ಜಾವ್ನ್ ಕುಲ್ಶೇಕರ್ ಫಿರ್ಗಜೆಚೊ ರಾಜೇಶ್ ಸಿಕ್ವೇರಾ, ಕಾರ್ಯದರ್ಶಿ ಜಾವ್ನ್ ಉಡುಪಿ ದಿಯೆಸೆಜಿಚ್ಯಾ ಪೆರಂಪಳ್ಳಿ ಫಿರ್ಗಜೆಚಿ ಎನ್‌ಗ್ರಿಡ್ ಗೋಲ್ಡೀನಾ ಡಿ ಸೊಜಾ, ಖಜಾನಿ ಜಾವ್ನ್ ಬೆಂದುರ್ ಫಿರ್ಗಜೆಚೊ ಮೆಲ್‌ರೊಯ್ ಕ್ಲೆಮೆಂಟ್ ಪಿಂಟೊ ಆನಿ ಮಾಧ್ಯಮ್ ಸಮನ್ವಯಿ ಜಾವ್ನ್ ಮೊಡಂಕಾಪ್, ಬಂಟ್ವಾಳ್ ಫಿರ್ಗಜೆಚೊ ಅಶಿತ್ ಪಿಂಟೊ ವಿಂಚೊನ್ ಆಯ್ಲ್ಯಾತ್.
ಮಂಗ್ಳುರ್ ದಿಯೆಸೆಜಿಚ್ಯಾ ಸಾಂ. ಜುಜೆ ಕಾಮೆಲಿ ಫಿರ್ಗಜ್ ವಾಮಂಜೂರ್ಚೊ ಸ್ಟೀಫನ್ ಮಿನೇಜ್ ಕೊಂಕ್ಣಿ ಸಾಹಿತ್ಯ್, ಕಲಾ ಆನಿ ಸಾಂಸ್ಕೃತಿಕ್ ಶೆತಾಂತ್ ಸ್ಟೀಫನ್ ವಾಮಂಜೂರ್ ಮ್ಹಳ್ಳ್ಯಾ ನಾಂವಾನ್ ಫಾಮಾದ್ ಆಸಾ. ಕೊಂಕ್ಣಿ ನಾಟಕ್ ಸಭಾ ಧರುನ್ ಜಾಯ್ತ್ಯಾ ನಾಚ್ ಆನಿ ನಟನ್ ಸ್ಪರ್ಧ್ಯಾಂನಿ ತಾಣೆ ಇನಾಮಾಂ ಜೊಡ್ಲ್ಯಾಂತ್. 2024 ದಸೆಂಬರಾಂತ್ ದುಬಂಯ್ತ್ ಆಯೋಜನ್ ಕೆಲ್ಲ್ಯಾ ಫ್ಯಾಮಿಲಿ ಫಿಯೆಸ್ತಾ ಕಾರ್ಯಕ್ರಮಾಚ್ಯಾ ಯಶಸ್ವೆ ಪಾಟ್ಲೊ ರೂವಾರಿ ತೋ ಜಾವ್ನಾಸ್ಲೊ. ಹ್ಯಾ ಕಾರ್ಯಕ್ರಮಾಕ್ ದೋನ್ ಹಜರಾಂ ವಯ್ರ್ ಲೋಕ್ ಜಮ್‌ಲ್ಲೊ. ಪ್ರಸ್ತುತ್ ರೀಚ್ ಮಿ ಮ್ಹಳ್ಳ್ಯಾ ಜಾಯ್ರಾತ್ ಕಂಪೆನಿಚೊ ಆಡಳ್ತ್ಯಾ ನಿರ್ದೇಶಕ್ ತೋ ಜಾವ್ನಾಸಾ.
ಜೇಮ್ಸ್ ಮೆಂಡೋನ್ಸಾ, ಆಲ್ವಿನ್ ಪಿಂಟೊ, ಸೊನಾಲಿ ಫೆರ್ನಾಂಡಿಸ್, ಫ್ಲೊಯ್ಡ್ ಕಿರಣ್ ಮೊರಾಸ್, ಆಗ್ನೆಲ್ ಪೆರ್ನಾಂಡಿಸ್ ಆನಿ ರೋಶನ್ ಡಿ ಸಿಲ್ವ – ಹೆ ಸಲಹಾ ಸಮಿತಿಚೆ ಸಾಂದೆ ಜಾವ್ನ್ ವಿಂಚೊನ್ ಆಯ್ಲ್ಯಾತ್.
