“ಸಾಗೊಳಿ ಮನ್ಶ್ಯಾಕುಳಾನ್‌ ಆದಾರ್‌ಲ್ಲಿ ಪಯ್ಲಿ ವೃತ್ತಿ, ಫಕತ್‌ ಶೆತಾಂತ್‌ ಘೊಳ್ಚೆಂ ಮಾತ್ರ್‌ ಸಾಗೊಳಿ ನ್ಹಯ್‌, ಸಾಗೊಳೆಕ್‌ ಲಾಗೊನ್‌ ರೂಪಿತ್‌ ಜಾಲ್ಲಿ ಮನ್ಶ್ಯಾ ಸಂಸ್ಕೃತಿಯ್‌ ಸಾಗೊಳೆಚೊ ಏಕ್ ವಾಂಟೊ. ಜೆದ್ನಾಂ ಆಮಿ ಹಿ ವೃತ್ತಿ ಸಾಂಡ್ಲಿ, ತಾಕಾ ಲಾಗೊನ್‌ ಸಾಗೊಳೆಕ್‌ ಸಂಬಂಧ್‌ ಜಾಲ್ಲೆ ಸಬ್ದ್, ಸಂಸ್ಕೃತಿ ನಾಸ್‌ ಜಾಂವ್ಕ್ ಲಾಗ್ಲಿ. ಹಾಕಾ ಲಾಗೊನ್‌ ಭಾಸ್‌ಯಿ ಅಸ್ಕತ್‌ ಜಾಲಿ” – ಅಶೆಂ ಮ್ಹಣಾಲೊ ಕೊಂಕಣಿ, ಕಾನಡಿ, ತುಳು ತ್ರಿಭಾಶಾ ಲೇಖಕ್‌ ವಲ್ಲಿ ಬೋಳಾ.
ತೊ ಸಾಂ ಲುವಿಸ್‌ ಪರಿಗಣಿತ್‌ ವಿಶ್ವ್‌ ವಿದ್ಯಾಲಯಾಚ್ಯಾ ಕೊಂಕಣಿ ಸಂಸ್ಥ್ಯಾನ್‌ ಮ್ಹಯ್ನ್ಯಾವಾರ್‌ ಚಲಂವ್ಚ್ಯಾ ʻಬೊಲ್ಕಾಂವ್ʼ ಸಾಹಿತಿಕ್‌ ಸಂವಾದ್ ಕಾರ್ಯಾವೆಳಾರ್ ʻಸಾಗೊಳಿ ಆನಿ ಸಾಹಿತ್ಯ್‌ʼ ಮ್ಹಳ್ಳ್ಯಾ ವಿಷಯಾಚೆರ್‌ ಉಲಯ್ತಾಲೊ. ಲಗ್ಬಗ್‌ 45 ಮಿನುಟಾಂ ತಾಣೆ ಸಾಗೊಳಿ ಆನಿ ಸಾಹಿತ್ಯಾಕ್‌ ಪೂರಕ್ ಜಾಲ್ಲ್ಯೊ ಸಂಗ್ತಿ ಆನಿ ತಾಕಾ ಸಂಬಂದಿತ್ ತಾಚ್ಯಾ ಜಿಣ್ಯೆಂತ್ಲಿಂ ಘಡಿತಾಂ ವಿವರಿಲಿಂ.
ಸಂವಾದಾ ವೆಳಾರ್‌ ಲೇಖಕ್‌, ಕೊಂಕಣಿ ಸಂಸ್ಥ್ಯಾಚೊ ದಿರೆಕ್ತೊರ್ ಮೆಲ್ವಿನ್‌ ಪಿಂಟೊ, ನೀರುಡೆನ್‌ ವಲ್ಲಿ ಬೋಳಾಚ್ಯಾ ಉತ್ತೀಮ್‌ ಉಲವ್ಪಾಕ್‌ ಉಲ್ಲಾಸುನ್ ʻಜೆದ್ನಾಂ ಆಮ್ಚ್ಯಾ ಕೊಂಕಣಿ ಕಥೊಲಿಕ್‌ ಸಮುದಾಯಾನ್‌ ಕೃಶಿ ಸಾಂಡ್ಲಿಗೀ ತವಳ್‌ಥಾವ್ನ್‌ ಆಮ್ಚ್ಯಾ ಸುತ್ತುರಾಂತ್ಲ್ಯಾ ಹೆರ್‌ ಸಮುದಾಯಾಂಸಂಗಿಂ ಆಸ್‌ಲ್ಲೊ ಮೊಗಾ-ಮಾಯ್ಪಾಸಾಚೊ ಬಾಂದ್‌ಯಿ ಉಣೊ ಜಾಯಿತ್ತ್‌ ಆಯ್ಲೊ. ಸಾಗೊಳಿ ಎಕಾ ರಿತಿನ್ ಸರ್ವ್’ಧರ್ಮ್ ಸಮನ್ವಯಾಕ್ ಪೂರಕ್ ಜಾತಾಲಿ. ಆಜ್ ಕರಾವಳೆಂತ್ ಮತೀಯತಾ ವಾಡ್ಲ್ಯಾ ತರ್, ಹಾಂಗಾಚೊ ಲೋಕ್ ಸಾಗೊಳೆ ಥಾವ್ನ್ ಪಯ್ಸ್ ಗೆಲ್ಲೆಂಯೀ ಏಕ್ ಕಾರಣ್ ಜಾಂವ್ಕ್ ಪುರೊʼ ಅಶೆಂ ತಾಂಣಿ ಅಭಿಪ್ರಾಯ್ ವ್ಯಕ್ತ್ ಕೆಲಿ.
ಲೇಖಕ್‌ ಚಾರ್ಲ್ಸ್‌ ಲೋಬೊ ಹಾಂಣಿ ಮಾನೆಸ್ತ್‌ ವಲ್ಲಿ ಬೋಳಾಕ್ ಸಾಗ್ವಳೆಕ್‌ ಸಂಬಂದಿತ್ ಕಳಿತ್‌ ಅಸ್ಚೆ ಜಾಯ್ತೆ ಸಬ್ದ್ ಶ್ಹೆರಾಂತ್ಲ್ಯಾ ಬರವ್ಪ್ಯಾಂಕ್‌ ಕಳಿತ್‌ ನಾಂತ್‌ ದೆಕುನ್‌ ಚಿತ್ರಾಂ ಸವೆಂ ಹ್ಯಾ ಸಬ್ದಾಂಚೊ ಬೂಕ್‌ ಫಾಯ್ಸ್‌ ಕರುಂಕ್‌ ಸಲಹಾ ದಿಲಿ. ದೊ| ವಿಲ್ಲಿ ಡಿʼಸಿಲ್ವಾನ್‌ ʻಸಾಗೊಳಿ ಸಂಬಂದಿತ್ ಸಬ್ದ್/ಉತ್ರಾಂ ಗಾಂವಾಥಾವ್ನ್‌ ಗಾಂವಾಕ್‌ ಬದ್ಲಾತಾತ್‌ ಮ್ಹಳ್ಳೆಂಯ್‌ ಗುಮಾನಾಂತ್‌ ದವರಿಜೆʼ ಮ್ಹಳೆಂ.
ಕಾರ್ಯಾಚ್ಯಾ ಸುರ್ವೆರ್‌ ಮೆಲ್ವಿನ್‌ ಪಿಂಟೊ ನೀರುಡೆನ್‌ ಗುಲೊಬ್‌ ದೀವ್ನ್‌ ವಲ್ಲಿ ಬೋಳಾಕ್ ಸ್ವಾಗತ್‌ ಮಾಗ್ಲೊ. ʻಬೊಲ್ಕಾಂವ್ʼ ಕಾರ್ಯಾಕ್ರಮಾಚಿ ಫುಡ್ಕಾಯ್‌ ಘೆತ್‌ಲ್ಲೊ ಲೇಖಕ್‌ ಎಚ್ಚೆಮ್‌ ಪೆರ್ನಾಳಾನ್‌ ಧನ್ಯವಾದ್‌ ಅರ್ಪಿಲೆ.
ಮೇ ಮಯ್ನ್ಯಾಚೆಂ ಬೊಲ್ಕಾಂವ್ ಕಾರ್ಯೆಂ ಆಯ್ತಾರಾ 4 ತಾರಿಕೆರ್, ಸಕಾಳಿಂಚ್ಯಾ 9.30 ವ್ಹರಾಂಚೆರ್ ಚಾ – ಫಳ್ಹಾರಾ ಸಾಂಗಾತಾ ಸುರು ಜಾವ್ನ್ 10.00 ಥಾವ್ನ್ 11.00 ಪಾಸುನ್ ಚಲ್ತಾಲೆಂ.
Have any thoughts?
Share your reaction or leave a quick response — we’d love to hear what you think!
-
0
-
0
-
0
-
0
-
0
-
0
1 comment
Very informative talk on Farming and literature.. Thoroughly enjoyed listening to Valli Bola sir.. Thanks to St. Aloysius Konkani Institute for organizing Bolkaum Talk episodes by eminent konkani writers and artists.. Thanks to HM Pernal for this unique thought if conducting these talks in a special seating arrangement called Bolkaum.. Hope more and more talks will be held in the future for the benefit of konkani people on arts, literature, education, Farming and variety of issues that enrich our knowledge and also it provides a special platform to meet and great konkani people.. Jai Bolkaum…