ಫಾಲ್ಯಾಂ, 22 ವೆರ್ ‘ಮೋಗ್ ಆನಿ ಬಲಿದಾನ್’ ಲೊಕಾರ್ಪಣ್

63

ಮಂಗ್ಳಾರಾ, ಜುಲಾಯ್ 22 ವೆರ್, ಸಾಂಜೆಚ್ಯಾ 5.00 ವರಾಂಚೇರ್ ಅನುಗ್ರಹ ಸಭಾಸಾಲಾಂತ್ ಉಡುಪಿ ದಿಯೆಸೆಜಿಚೊ ಮಾಲ್ಘಡೊ ಸಾಹಿತಿ, ಇತಿಹಾಸ್ ಶಾಸ್ತ್ರಾಚೊ ಪ್ರಾಧ್ಯಾಪಕ್ ಆನಿ ಸಂಶೋಧಕ್, ನಾಟಕಿಸ್ತ್  ಡೊ| ಎವ್ಜಿನ್ ಡಿ ಸೊಜಾ, ಬೊಳಿಯೆ ಹಾಂಚಿ ಕಾದಂಬರಿ ಮೋಗ್ ಆನಿ ಬಲಿದಾನ್ ಉಡುಪಿ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ ಹಾಂಚ್ಯಾ ಹಸ್ತುಕಿಂ ಲೊಕಾರ್ಪಣ್ ಜಾತೆಲಿ.

ಪಾಂಚ್ ದಶಕಾಂ ಆದಿಂ ಭಾರತ್ – ಪಾಕಿಸ್ಥಾನ್, ಭಾರತ್ – ಚೀನಾ ಝುಜಾಂಚ್ಯಾ ಪಾಟಿಥಳಾರ್ ಬರಯಿಲ್ಲಿ ಹಿ ಕಾದಂಬರಿ ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಕ್ಲಾಸಿಕ್ಸ್ ಉಪಕ್ರಮಾಂತ್ ಫಾಯ್ಸ್ ಜಾಂವ್ಚೆಂ ಪಯ್ಲೆಂ  ಪುಸ್ತಕ್ ಜಾವ್ನಾಸಾ. ಮೋಗ್ ಆನಿ ಬಲಿದಾನ್ – ಹ್ಯಾ ಕಾದಂಬರಿಂತ್ ಎಕುಣ್ 13 ಅವಸ್ವರ್ ಆಸೊನ್, ತೆಂ ರಡ್ಲೆಂ ಆನಿ ಮೊಗಾಚ್ಯೆ ಸೊಧ್ನೆರ್ ಅಶೆಂ ದೋನ್ ಭಾಗ್ ಅಸಾತ್. 140 ಪಾನಾಂಚ್ಯಾ ಕಾದಂಬರಿಕ್ ಆಮ್ಚೊ ಸಂದೇಶ್ ಪತ್ರಾಚೊ ಸಂಪಾದಕ್ ವಿಲ್‌ಫ್ರೆಡ್ ಲೋಬೊ ಪಡೀಲ್ ಹಾಣೆ ಸುರ್ವಿಲೆಂ ಉತರ್ ಬರಯಿಲ್ಲೆಂ ಆಸುನ್, “ಕ್ಲಾಸಿಕ್ ಮ್ಹಣ್ಚೆ ತಸಲ್ಯಾ ವರ್ಗಾಚೆಂ ಸಾಹಿತ್ಯ್ ವಾಚ್ಲೆಲ್ಯಾನ್ ಆಮ್ಕಾಂ ಫಕತ್ ತ್ಯಾ ಕಾಳಾಚಿ ಸಮಾಜಿಕ್ ಪರಿಸ್ಥಿತಿ, ಕುಟ್ಮಾ ವೆವಸ್ತಾ, ಆಚಾರ್ – ವಿಚಾರ್, ಸಂಸ್ಕೃತಿ ಮಾತ್ ನ್ಹಯ್, ಕೊಂಕ್ಣಿ ಸಾಹಿತ್ಯಾಂತ್ಲಿ (ತ್ಯಾ ಕಾಳಾಚಿ) ಶೈಲಿ, ಅಭಿವೆಕ್ತಿ ಆನಿ ವಿಚಾರ್ ಮಂಡನ್ ಸಮ್ಜುಂಕ್, ಶಿಕೊಂಕ್ ಸಾಧ್ಯ್ ಜಾತಾ. ಎಕ್ಯೆ ಭಾಶೆಚ್ಯಾ ಸಾಹಿತಿಕ್ ವಾಡಾವಳೆಚ್ಯಾ ದಿಶ್ಟಿನ್ ಕ್ಲಾಸಿಕ್ ಸಾಹಿತ್ಯಾಚೆಂ ಅಧ್ಯಯನ್ ಗರ್ಜೆಚೆಂ” ಅಶೆಂ ಮ್ಹಣ್ತಾ, ವಿಲ್‌ಫ್ರೆಡ್ ಲೋಬೊ ಪಡೀಲ್.

ಬೆಳ್ಳೆವಿಶನ್. ಕೊಮ್ ಆನಿ ಉಡುಪಿ ದಿಯೆಸೆಜಿಚ್ಯಾ ಸಮಾಜಿಕ್ ಸಂಪರ್ಕ್ ಸಾಧನಾಂ ಆಯೋಗಾಚ್ಯಾ ಜೋಡ್ ಆಸ್ರ್ಯಾಖಾಲ್ ಮಾಂಡುನ್ ಹಾಡ್ಲೆಲ್ಯಾ ಹ್ಯಾ ಕಾರ್ಯಾಕ್ ವಿಶನ್ ಕೊಂಕಣಿ ಪುಸ್ತಕ್ ಅನುದಾನ್ ಯೆವ್ಜಣೆಚೊ ಸ್ಥಾಪಕ್ ಆನಿ ಪ್ರವರ್ತಕ್ ಶ್ರೀ ಮೈಕಲ್ ಡಿ ಸೊಜಾ ಆನಿ ವಿಶನ್ ಕೊಂಕಣಿ ಸಲಹಾ ಸಮಿತಿಚೆಂ ಸಾಂದೆ ಹಾಜರ್ ಆಸೊನ್, ವಿಶ್ವ ಕೊಂಕಣಿ ಕೇಂದ್ರಾಚ್ಯಾ ಮುಕೆಲ್ಪಣಾರ್ ಚಲ್ಚ್ಯಾ ಹ್ಯಾ ಪುಸ್ತಕ್ ಅನುದಾನಾವಿಶಿಂ ಉಡುಪಿ ವಠಾರಾಚ್ಯಾ ಬರವ್ಪ್ಯಾಂಕ್ ಮಾಹೆತ್ ದಿತಲೆ. ರುಪಯ್ 40  ಲಾಕ್ ಖರ್ಚಾರ್ 100 ದರ್ಜೆದಾರ್ ಕೊಂಕ್ಣಿ ಸಾಹಿತ್ಯ್ ಪುಸ್ತಕಾಂ ಫಾಯ್ಸ್ ಕರ್ಚೊ ಉದ್ದೇಶ್ ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ (MDVK) ಹ್ಯಾ  ಉಪಕ್ರಮಾಕ್ ಆಸೊನ್ ಎದೊಳ್ಚ್ಯಾಕ್ 25 ಬೂಕ್ ಫಾಯ್ಸ್ ಜಾಲ್ಯಾತ್ ಆನಿ 15 ಪುಸ್ತಕಾಂ ಫಾಯ್ಸ್ ಜಾಂವ್ಕ್ ವಿಂಚೊನ್ ಆಯ್ಲ್ಯಾಂತ್. ಕನ್ನಡ, ದೇವ್‌ನಾಗರಿ, ರೋಮಿ ಖಂಯ್ಚ್ಯಾಯ್ ಲಿಪಿಯೆಂತ್ ಫಾಯ್ಸ್ ಜಾಂವ್ಚಿಂ ಪುಸ್ತಕಾಂ ಹ್ಯಾ ಯೆವ್ಜಣೆಚೊ ಫಾಯ್ದೊ ಜೊಡುಂಕ್ ಸಕ್ತಾತ್.

ಉಡುಪಿ ಆಸ್‌ಪಾಸ್ ವಸ್ತಿ ಕರುನ್ ಆಸ್ಚ್ಯಾ ಕೊಂಕ್ಣಿ ಸಾಹಿತಿ, ಬರಯ್ಣಾರ್, ಫಿರ್ಗಜ್ ಪತ್ರಾಂಚ್ಯಾ ಸಂಪಾದಕಾಂನಿ – ಕಾರ್ಯಾಕ್ ಹಾಜರ್ ಜಾವ್ನ್ ಮಾಲ್ಘಡ್ಯಾ ಲೇಖಕಾಚ್ಯಾ ಸಂತೊಸಾಂತ್ ವಾಂಟೆಲಿ ಜಾಯ್ಜೆ ಆನಿ ವಿಶನ್ ಕೊಂಕಣಿ ಪುಸ್ತಕ್ ಅನುದಾನ್ ಯೆವ್ಜಣೆವಿಶಿಂ ಮಾಹೆತ್ ಆಪ್ಣಾವ್ನ್, ಯೆವ್ಜಣೆಚೊ ಫಾಯ್ದೊ ಜೋಡ್ನ್ ಘೆಜಾಯ್ ಮ್ಹಣ್ ಕಾರ್ಯಾಚ್ಯಾ ಆಯೋಜಕಾಂನಿ ವಿನಂತಿ ಕೆಲ್ಯಾ.

ದೊತೊರ್ ಎವ್ಜಿನ್ ಡಿಸೋಜಾ ಗಾಂವಾನ್ ಬೊಳಿಯೆಚೊ. 1973 ಇಸ್ವೆಂತ್ ಇತಿಹಾಸ್ ಶಾಸ್ತ್ರಾಂತ್ ಸ್ನಾತಕೋತ್ತರ್ ಪದ್ವಿ ಜೊಡ್‌ಲ್ಲ್ಯಾ ತಾಣೆ 1986 ಇಸ್ವೆಂತ್ ಮುಂಬಯ್ ವಿಶ್ವವಿದ್ಯಾಲಯಾಥಾವ್ನ್ ದೊತೊರ್ ಸನದ್‌ಯೀ ಜೊಡ್ಲಿ. ಮುಂಬಯ್ ಥಾಣೆಚ್ಯಾ ವಿ.ಪಿ.ಎಮ್. ಆರ್ಟ್ಸ್ & ಕಾಮರ್ಸ್ ಕೊಲೆಜಿಂತ್ 1974 ಥಾವ್ನ್ 2005 ಮ್ಹಣಾಸರ್ ಪ್ರಾಧ್ಯಾಪಕ್ ಆನಿ ಇತಿಹಾಸ್‌ಶಾಸ್ತ್ರ್ ವಿಭಾಗಾಚೊ ಮುಖ್ಯಸ್ಥ್ ಜಾವ್ನ್ ತಶೆಂಚ್ ಮುಂಬಯ್ ವಿಕ್ರೋಲಿಚಾ ಅಶ್ಮಿತಾ ಕೊಲೆಜ್ ಆಫ್ ಆರ್ಟ್ಸ್ & ಕಾಮರ್ಸ್ ಹಾಂಗಾಸರ್ 2005 ಆನಿ 2006 ಪರ್ಯಾಂತ್ ಪ್ರಾಂಶುಪಾಲ್ ಜಾವ್ನ್ ಸೆವಾ ದಿಲ್ಯಾ.

ಮುಂಬಯ್ ವಿಶ್ವವಿದ್ಯಾಲಯಾಚಾ ಇತಿಹಾಸ್‌ಶಾಸ್ತ್ರ್ ವಿಭಾಗಾಂತ್ ಸ್ನಾತಕೋತ್ತರ್ ವಿಭಾಗಾಚೊ ಪ್ರಾಧ್ಯಾಪಕ್, ಎಮ್.ಫಿಲ್ ಸಮಿತಿಚೊ ಸಾಂದೊ, ಶಿಕ್ಪಾ ಮಂಡಳಿಚೊ ಸಾಂದೊ, ಸ್ನಾತಕೋತ್ತರ್ ವಿಭಾಗಾಕ್ ಪಠ್ಯಕ್ರಮ್ ಸಮಿತಿಚೊ ಸಂಚಾಲಕ್ ಜಾವ್ನ್ ಸೆವಾ ದಿಂವ್ಚ್ಯಾ ಸವೆಂ ಮುಂಬಯ್ಚ್ಯಾ ಸೈಂಟ್ ಝೇವಿಯರ್ ಕೊಲೆಜಿಂತ್ ದೊತೊರ್ ಸನದ್ ಶಿಕ್ಪಾರ್ಥಿಂಚೊ ಪಿ.ಹೆಚ್.ಡಿ. ಗೈಡ್ ಜಾವ್ನ್ ಚವ್ಗಾಂ ವಿದ್ಯಾರ್ಥಿಂಕ್ ದೊತೊರ್ ಸನದ್ ಜೊಡುಂಕ್ ಮಾರ್ಗದರ್ಶನ್ ತಾಣೆ ದಿಲಾಂ. ಕೊಲೆಜಿಂತ್ ಪ್ರಾಧ್ಯಾಪಕ್ ಜಾವ್ನಾಸ್ತಾನಾ ಸುಮಾರ್ ಬಾವೀಸ್ ವರ್ಸಾಂ ಎನ್‌ಸಿಸಿ ಆಫಿಸರ್, ಲೆಫ್ಟಿನೆಂಟ್ ಕಮಾಂಡರ್ ಜಾವ್ನ್ ಸೆವಾ ದಿಲ್ಲೊ ಅನ್ಬೊಗ್‌ಯೀ ತಾಕಾ ಆಸಾ.

ಇಂಡಿಯನ್ ಹಿಸ್ಟರಿ ಕಾಂಗ್ರೆಸಾಚೊ ಜಿಣಿಯೆ ಸಾಂದೊ ಜಾವ್ನ್ ಆಸ್ಚ್ಯಾ ದೊತೊರ್ ಎವ್ಜಿನ್ ಡಿಸೋಜಾನ್ ಸಬಾರ್ ಸಂಸೊಧಿಕ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಮಾತ್ರ್ ನ್ಹಯ್, ವಿಶ್ವವಿದ್ಯಾಲಯಾಚ್ಯಾ ಸ್ನಾತಕ್ ತಶೆಂ ಸ್ನಾತಕೋತ್ತರ್ ವಿಭಾಗಾಕ್ ಸಬಾರ್ ಪಾಠ್‌ಬುಕ್‌ಯೀ ಲಿಕ್ಲ್ಯಾತ್.

ಆಪ್ಲ್ಯೆ ಯುವಪ್ರಾಯೆ ಥಾವ್ನ್ಂಚ್ ಏಕ್ ಕೊಂಕ್ಣಿ ಲೇಖಕ್ ತಶೆಂಚ್ ನಾಟಕಿಸ್ತ್ ಜಾವ್ನ್ ತಾಣೆ ಜೆಜುರಾಯ್, ಪಯ್ಣಾರಿ, ರಾಕ್ಣೊ, ಮಿತ್ರ್, ಝೆಲೊ, ಕಾಣಿಕ್, ವಾವ್ರಾಡ್ಯಾಂಚೊ ತಾಳೊ ಇತ್ಯಾದಿ ಪತ್ರಾಂನಿ ಸಬಾರ್ ಮಟ್ವ್ಯೊ ಕಾಣಿಯೊ, ಲೇಖನಾಂ ಪ್ರಗಟ್ ಕೆಲ್ಯಾಂತ್. ’ಲಿಪ್‌ಲ್ಲೊ ಚಂದ್ರ್’ ಝೆಲೊ ಪತ್ರಾರ್ ಸಾಂಕಳ್ ಕಾಣಿಯೆ ರುಪಾರ್ 1970 – 71 ಇಸ್ವೆಂತ್ ಪ್ರಗಟ್ ಜಾಲ್ಲಿ ತಾಚಿ ಲೊಕಾಮೊಗಾಳ್ ಕಾದಂಬರಿ. ‘ತೆಂ ರಡ್ಲೆಂ’, ‘ಮೊಗಾಚೆ ಸೊಧ್ನೆರ್’, ‘ಅಂಧ್ಕಾರಾಂತ್ಲೊ ಆವಾಜ್’, ‘ಚಂದ್ರಾ ವಯ್ಲೆಂ ಮೋಡ್’, ‘ಪುತಾ ಖಾತಿರ್’, ‘ಜಿವಿತಾಚೊ ತಾಳೊ’, ‘ಮೃತ್ಯುಚಿ ಸಾವ್ಳಿ’, ‘ಸ್ವಪಣ್ ಖರೆಂ ಜಾಲೆಂ’, ‘ಲಗ್ನಾಚೊ ಮೋಗ್’, ‘ದಾರ್ ಉಗ್ತೆಂ ಜಾಲೆಂ’ ತಾಚ್ಯೊ ಪ್ರಗಟ್ ಜಾಲ್ಲ್ಯೊ ಕೊಂಕ್ಣಿ ಕೃತಿಯೊ. ‘ರಗ್ತಾಚೆಂ ಖತ್’, ‘ಬರಯ್ಣಾರ್’, ‘ಗರ್ಲ್‌ಫ್ರೆಂಡ್’, ‘ಜಿವಿತಾಚಿ ಸಾಂಜ್’ ತಾಚೆ ಲೊಕಾಮೊಗಾಳ್ ನಾಟಕ್.  ಉಡುಪಿ ದಿಯೆಸೆಜಿಚಾ ದಶಮಾನೋತ್ಸವಾ ಸಂದರ್ಭಿಂ ಉಡುಪಿಚಾ ಗೊವ್ಳಿಬಾಪಾಚ್ಯಾ ಸೂಚನಾ ಪರ್ಮಾಣೆ, ಫಾರ್ಮೇಟಿವ್ ಇಯರ್ಸ್ – ಹಿಸ್ಟರಿ ಆಫ್ ಉಡುಪಿ ಡಯಾಸಿಸ್, ಉಡುಪಿ ಡಯಾಸಿಸ್ – ಹಿಸ್ಟರಿ ಆಫ್ ಪ್ಯಾರಿಶಸ್ ಮ್ಹಳ್ಳೆ ದೋನ್ ಬೂಕ್ ತಾಣೆ ಲಿಕ್ಲ್ಯಾತ್.

ಪ್ರಸ್ತುತ್ ‘ಸಂಪದ’ಚ್ಯಾ ನಿರ್ದೇಶಕ್ ಮಂಡಳಿಚೊ ಸಾಂದೊ, ‘ಎಡ್ಯುಕೇರ್’ ಸಮಿತಿಚೊ ಸಾಂದೊ ಜಾವ್ನ್ ಸೆವಾ ದಿಂವ್ಚೊ ದೊತೊರ್ ಎವ್ಜಿನ್ ಡಿಸೋಜಾ ಬೆಳ್ಳೆವಿಷನ್.ಕೊಮಾಚೊ ಸಂಯೋಜಕ್ ಜಾವ್ನ್‌ಯೀ ವಾವ್ರ್ ದಿತಾ.