ನಿರ್ಧಾರ್!

43

ಆಜ್ ಮ್ಹಜ್ಯಾ ಪತಿಣಿಚೆಂ ಸಾತ್ವ್ಯಾ ದಿಸಾಚೆಂ ಮೀಸ್, ತಶೆಂ ಜಾವ್ನ್ ಮಿಸಾ ಉಪ್ರಾಂತ್ ಸರ್ವ್ ಲಾಗ್ಸಿಲಿಂ ಕುಟ್ಮಾದಾರಾಂ ಜಮ್‌ಲ್ಲಿಂ!. ಆಜ್‌ಚ್ ಸಾಂಜೆರ್ ಮ್ಹಜೊ ಪೂತ್ ಆನಿ ತಾಚೆಂ ಕುಟಾಮ್ ಪಾಟಿಂ ಕೆನಡಾಕ್, ಧುವ್ ಆನಿ ತಾಚೆಂ ಕುಟಾಮ್ ಪಾಟಿಂ ದುಬಾಯಾಕ್ ವಚೊಂಕ್ ಆಯ್ತಿಂ ಜಾಲ್ಲಿಂ. ಆಯ್ಚೆಂ ಹೆಂ ಜೆವಾಣ್ ತಾಂಕಾ ಆದೇವ್ಸ್ ಕರ್ಚೆಂ ನಿಮಾಣೆ ಜೆವಾಣ್ ಕೊಣ್ಣಾ?. ಹಾಂವ್ ಚಿಂತ್ನಾನಿಂ ಮತಿ ಭ್ರಷ್ಟ್ ಜಾಲ್ಲೊಂ, ಮ್ಹಜೆಂ ಮುಕ್ಲೆಂ ಪ್ಲ್ಯಾನ್ ಕಸೆಂ ಹಾಂಚೆ ಸಮೊರ್ ಉಗ್ಡಾಪೆಂ ಕರ್ಚೆಂ ಮ್ಹಳ್ಳೆಂ ಚಿಂತುನ್. “ಮಾಮ್ಮಿ ಸಿರಿಯಸ್ ಆಸಾ, ನಿಮಾಣ್ಯಾ ಘಡ್ಯೆಕ್ ರಾಕ್ತಾ ತಸೆಂ ಲಾಗ್ತಾ, ತುಮಿ ವೆಗಿಂಚ್ ಯೇಂವ್ಕ್ ಜಾಯ್” ಫೊನಾರ್ ಕೆಲ್ಲ್ಯಾ ಆದೇಶಾಕ್ ತಾಣಿ ತ್ವರಿತ್ ಸಯ್ ಘಾಲ್ಲಿ. ತಿಂ ಪಾವೊನ್ ಥೊಡ್ಯಾಚ್ಚ್ ಘಡ್ಯೆನಿಂ ಮ್ಹಜ್ಯಾ ಪತಿಣೆನ್ ನಿಮಾಣೊ ಶ್ವಾಸ್ ಸೊಡ್‌ಲ್ಲೊ ತ್ಯಾ ಆಸ್ಪತ್ರೆಚ್ಯಾ ಖಟ್ಲ್ಯಾರ್!

ಹಾಂವೆ ಆನಿ ಪತಿಣೆನ್ ಆಮ್ಚೊ ಪೂತ್ ಆನಿ ಧುವ್ ತಾಂಚೊ ಫುಡಾರ್ ಸೊಧುನ್ ಆಪಾಪ್ಲ್ಯಾ ಸಂಸಾರಾಂತ್ ಮಗ್ನ್ ಜಾತಾನಾ ಏಕ್ ನಿರ್ಧಾರ್ ಕೆಲ್ಲೊ, “ಆಮ್ಚ್ಯಾ ಮಾತಾರ್ಪಣಾರ್ ಭುರ್ಗ್ಯಾಂಕ್ ಆಪ್ಲ್ಯಾ ಆವಯ್-ಬಾಪಯ್ಕ್ ಪೊಸ್ಚಿ ಯಾ ಸಾಂಬಾಳ್ಚಿ ಜವಾಬ್ದಾರಿ ದೀಂವ್ಕ್ ನ್ಹಜೊ, ಆಮಿಂ ಜಾಂವ್ನ್ಂಚ್ ಆಮ್ಚೆಂ ಮಾತಾರ್ಪಣ್ ಸೊಂತೊಸಾನ್ ಸಾಂಗಾತಾ ಎಕಾ ವ್ರಧ್ದಾಶ್ರಮಾಂತ್ ಸಾರ್ಚೆಂ; ಕಿತ್ಯಾಕ್ ಆಮಿಂ ಕಾಳಾ ತೆಕಿತ್ ಬದ್ಲೊಂಕ್ ನ್ಹಜೊ?, ’ಬದ್ಲಾವಣ್’ ಹ್ಯಾ ಸಂಸಾರಾಂತ್ ನಿರಂತರ್ ಆಸಾ. ಕಾಳ್ ಯೆತಾನಾ ಬದ್ಲಾವಣ್ ಸ್ವೀಕಾರ್ ಕರುಂಕ್ ಜಾಯ್. ಭುರ್ಗ್ಯಾಂಕ್‌ಯ್ ತಾಂಚಿ ಜವಾಬ್ದಾರಿ ಆಸಾ, ತಾಂಚಿ ಭುರ್ಗಿಂ ಆಸ್ತಾತ್ ಆನಿ ತಾಂಚ್ಯಾ ಫುಡರಾಚಿ ರಾಟಾವಳ್ ವಿಂಗಡ್. ಫುಡರಾಚ್ಯಾ ರಾಟಾವಳಿಂ ಮಧೆಂ ಮಾತಾರ‍್ಯಾಂಚಿ ಜವಾಬ್ದಾರಿ ತಾಂಚಾ ವಾಟೆರ್ ಕಾಂಟೊ ಜಾಂವ್ಕ್ ನ್ಹಜೊ. ಅನ್ಯೇಕ್ ಕಾರಣ್‌ಯ್ ಆಸಾ; ಆಮ್ಚಿಂ ಮೊಗಾಚಿಂ ಭುರ್ಗಿಂ ಆಮ್ಚ್ಯಾ ಉತರ್ ಪ್ರಾಯೆರ್ ಕಿತೆಂ ತರಿ ಬಂದಬಸ್ತ್ ಕರ್ತೆಲಿಂಚ್ ಮ್ಹಳ್ಳೊ ಭರ್ವಾಸೊ ಮಾಕಾ ದೊಸ್ತಾಲೊ ಖರೆಂ, ಪುಣ್ ಎದೊಳ್ ಆಮ್ಕಾಂ ಜಾಲ್ಲ್ಯಾ ಅನುಭವಾ ಪರ್ಮಾಣೆ ಕಸಲೆಂ ಧಯ್ರ್ ತಾಂಚೆ?”. ಆಮ್ಚ್ಯಾ ಲ್ಹಾನ್‌ಪಣಾರ್ ಕುಟ್ಮಾಂ ಸಾಗೊಳಿ ಕರುನ್ ದೀಸ್ ಕಾಡ್ತಾಲಿಂ ಆನಿ ಘರಾಂನಿ ಜಣಾಂ ಆಸ್ತಾಲಿಂ, ಆವಯ್-ಬಾಪಯ್ಕ್ ತಾಂಚಾ ಉತರ್ ಪ್ರಾಯೆರ್ ಘರಾಚ್ ಚಾಕ್ರಿ ಕರ್ತಾಲಿಂ.

ಪೂತಾನ್ ಆನಿ ಧುವೆನ್ ಆವಯ್ಚೆಂ ಮರಣ್ ದುಖಾಂಚೊ ಸಾಗೊರ್‌ಚ್ ವ್ಹಾಳೊವ್ನ್ ಸಂಪಯಿಲ್ಲೆಂ. ಪೂಣ್ ಮ್ಹಜಿಂ ದುಖಾಂ ಭಾಯ್ರ್ ಪಡಾನಾತ್ಲಿಂ ಕಿತ್ಯಾಕ್ ಪತಿಣೆಚೆಂ ವಳ್ವಳೆ ಪಳೆವ್ನ್ ದೊಳ್ಯಾಂತ್ಲಿ ದುಖಾಂ ಗಿಮಾಂತ್ ಸುಕ್ಚ್ಯಾ ನ್ಹಂಯ್ ಬರಿಂ ಸುಕ್‌ಲ್ಲಿಂ.! ಮ್ಹಜಿ ಪತಿಣ್ ಕೆದ್ನಾಂಯ್ ಸಾಂಗ್ತಾಲಿಂ “ಆಮ್ಚಿಂ ಭುರ್ಗಿಂ ಆಮ್ಚೆಂ ಸರ್ವಸ್ವ್, ತಾಂಚೆ ಖುಶೆ ಕಾತಿರ್ ಕಿತೆಂ ಸರ್ವ್ ಆಮ್ಕಾಂ ಕರುಂಕ್ ಸಾಧ್ಯ್ ಜಾತಾ ತೆಂ ಕರುಂಕ್ ಜಾಯ್”. ತ್ಯಾ ಘಡಿಯೆರ್ ಸಯ್ತ್ ತಿಚ್ಚ್ ಅಲೊಚನ್ ಮಾಕಾ ಧೊಸ್ತಾಲಿ.

ಆಜ್ ಆಮ್ಗೆರ್ ಜೆವಾಣ್ ಪೆಂಟೆಂತ್ ಆಸ್‌ಲ್ಲ್ಯಾ ವ್ಹಡ್ ಹೊಟೆಲಾಂತ್ಲೆಂ! ಹಾಂವೆಂಯ್ ಹೊಟೆಲಾಂತ್ಲೆಂ ಜೆವಾಣ್ ಖಾವ್ನ್ ಕಾಂಯ್ ವರ್ಸಾಂ ಜಾಲ್ಲಿಂ. ಪೂಣ್ ಆಜ್ ಕಿತ್ಯಾಕ್‌ಗೀ ಭಾಯ್ಲ್ಯಾ ಜೆವ್ಣಾಚಿ ವೋಡ್ ಲಾಗ್‌ಲ್ಲಿ. ನ್ಹಯ್, ಮಾಕಾ ಆನಿ ಮ್ಹಜ್ಯಾ ಪತಿಣಿಕ್ ಭಾಯ್ಲೆಂ ಜೆವಾಣ್ ಹಾಡೊಂವ್ಕ್ ತಾಂಕ್ ನಾತ್‌ಲ್ಲಿ, ಪೂಣ್ ಆಮ್ಚಿ ಭಲಾಯ್ಕಿ ಆಮಿಂ ಸಾಂಬಾಳುಂಕ್ ಜಾಯ್ ಆಸ್‌ಲ್ಲಿ. ದಾಕ್ತೆರಾಚೆ ಹಿಶಾರ‍್ಯಾಖಾಲ್ ಆಮಿಂ ಹೆಂ ಕರುಂಕ್ ಜಾಯ್ ಆಸ್ಲೆಂ ಕಿತ್ಯಾಕ್ ಥೊಡಿಂ ವರ್ಸಾಂ ಚಡ್ ಜಿಯೆಂವ್ಚಿ ಆಶಾ!. ಮ್ಹಜ್ಯಾ ಕಾಜರಾ ಆದಿಂ ಭಾಯ್ಲೆಂ ಜೆವಾಣ್ ಮಾಕಾ ಸದಾಂಚೆಂ. ಪೂಣ್ ಕಾಜರಾ ಉಪ್ರಾಂತ್ ಮ್ಹಜ್ಯಾ ಪತಿಣೆಚೆಂ ರಾಂದ್‌ಲ್ಲೆಂ ಜೆವಾಣ್ ಶಿವಾಯ್, ಭಾಯ್ಲೆಂ ಖಿಂಚೇಯ್ ಜೆವಾಣ್-ಖಾಣ್ ಮಾಕಾ ಸ್ವಾಧಿಷ್ಟ್ ಆನಿ ರೂಚಿಕ್ ಲಾಗನಾತ್ಲೆಂ. ಆನಿ ಆಜ್ ಕಿತ್ಯಾಕ್‌ಗೀ ಮಾಕಾಯ್ ಭಾಯ್ಲೆಂ ಜೆವಾಣ್ ಖಾಂವ್ಯಾ ಮ್ಹಣ್ ಭಗ್ಲೆಂ!. ಭುರ್ಗ್ಯಾಂಚೆಂ ಮನ್ ದುಕೊಂವ್ಕ್ ನಾಕಾ ಆಸ್ಲೆಂ ಆನಿ ತಾಂಚೆಂ ಬರೆಂ ಮನ್ ಮಾಕಾಯ್ ದಾದೊಸ್ಕಾಯ್ ದಿತಾಲೆಂ, ಮ್ಹಣೊನ್ ತಾಂಚಾ ಪಸಂದೆಚೆಂ ಜೆವಾಣ್ ಒರ್ಡರ್ ಕೆಲ್ಲೆಂ!

***

“ಹಾಂವ್ ರೊನಾಲ್ಡ್ ಮತಾಯಸ್, ದೆವಾಚಿ ಸಾಕ್ಸ್ ಘೆವ್ನ್ ತುಕಾ ಜೆಸ್ಸಿ ಡಿ ಸೊಜಾಕ್ ಮ್ಹಜಿ ಪತಿಣ್ ಮ್ಹಣ್ ಸ್ವೀಕಾರ್ ಕರ್ತಾಂ”, ಫಿರ್ಗಜೆಚ್ಯಾ ವಿಗಾರಾ ಮುಕಾರ್, ಹಾಂವೆಂ ಜೆಸ್ಸಿಕ್, ಆನಿ ಜೆಸ್ಸಿನ್ ಮಾಕಾ, ಪತಿ ಆನಿ ಪತಿಣ್ ಜಾವ್ನ್ ಸ್ವೀಕರ್ ಕೆಲ್ಲೆಂ. ಆಮ್ಚೆಂ ಕಾಜರ್ ಮ್ಹಜ್ಯಾ ಮಾಮಾನ್ ಕೆಲ್ಲ್ಯಾ ಸಯ್ರಿಕೆ ವರ್ವಿಂ ಜಾಲ್ಲೆಂ. ಮ್ಹಜ್ಯಾ ಸಂಗಿ ಮ್ಹಜ್ಯಾ ವ್ಹಡಿಲಾನ್‌ಯೀ ಬರ‍್ಯಾ ಕುಟ್ಮಾಂತ್ಲೆ ಸುನೆಕ್, ಧುವ್ ಜಾವ್ನ್ ಸ್ವೀಕರ್ ಕೆಲ್ಲೆಂ.

ಸಾಗೊಳಿ ಆಸ್‌ಲ್ಲೆಂ ಘರಾಣೆ ಆಮ್ಚೆಂ, ತೀನ್ ಎಕ್ರೆ ಜಾಗ್ಯಾರ್ ಥೊಡೆ ಗಾದೆ, ಕುಮೆರ್ ಆನಿ ಥೊಡೆಂ ಮಾಡ್-ಮಾಡಿಯಾಂಚೆ ತೋಟ್. ಮಾಲ್ಗಡ್ಯಾ ಥಾವ್ನ್ ಆಯಿಲ್ಲೊ ಜಾಗೊ ತೊ. ಮ್ಹಜ್ಯಾ ಬಾಬಾನ್ ಥೊಡ್ಯಾ ಗಾದ್ಯಾನಿಂ ಮಾಡ್-ಮಾಡಿ ದವರ್ನ್ ಆಮ್ಚಿ ಹುಟ್ವಳ್ ವಾಡಯಿಲ್ಲಿ. ಹಾಂವ್ ತಾಂಚೊ ಏಕ್ಲೊಚ್ಚ್ ಪೂತ್ ಜಾಲ್ಲ್ಯಾನ್ ದೇವ್ ಭಿರಾಂತೆನ್ ತಾಣಿಂ ಮಾಕಾ ಪೊಸ್‌ಲ್ಲೆಂ. ಮ್ಹಜಿಂ ಆವಯ್ ಬಾಪುಯ್ ತಾಂಚ್ಯಾ ಉತರ್ ಪ್ರಾಯೆರ್ ಆಮ್ಚ್ಯಾ ಸಾಂಗಾತಾ ಜಿಯೆಲಿಂ ಆನಿ ಪ್ರತೇಕ್ ಜಾವ್ನ್ ಮ್ಹಜ್ಯಾ ಪತಿಣಿಚ್ಯಾ ಬರ‍್ಯಾ ಸೆವೆ ವರ್ವಿಂ ಸುಖಾನ್ ಆನಿ ಸುಶೆಗಾನ್ ದೆವಾದಿನ್ ಜಾಲ್ಲಿಂ.

ತಾಂಚ್ಯಾ ಆಶೀರ್ವಾದಾನ್ ಕೊಣ್ಣಾ ಆಮ್ಕಾಂಯ್ ದೊಗಾಂ ಭುರ್ಗಿಂ ದೆವಾನ್ ಫಾವೊ ಕೆಲ್ಲಿಂ. ಮಾಲ್ಗಡೊ ಪೂತ್ ಕೊನಿ ಆನಿ ಲ್ಹಾನ್ ಧುವ್ ರೊಜಿ. ಆಬಾ ವಡ್ಲಿಮಾಂಯ್ಚೊ ಬರ್ಪೂರ್ ಮೋಗ್ ತಾಂಕಾ ಮೆಳ್‌ಲ್ಲೊ. ಹಾಂವ್ ಸಾಗೊಳೆ ಕಾಮಾಂತ್ ಆಸ್ತಾನಾ ತಾಣಿಂಚ್ ತಾಂಕಾ ತಾಂಚ್ಯಾ ಸಾವ್ಳೆಂತ್ ವಾಡಾಯ್‌ಲೆಲೆಂ. “ಹ್ಯಾ ಸಾಗೊಳೆ ಕಾಮಾಂತ್ ಕಿತೆಂ ಆಸಾ? ಆತಾಂಚಿ ಪರಿಸ್ತಿಥಿ ಪಳೆತಾನಾ, ಹಾತಾಂತ್ಲೆಂ ತೋಂಡಾಕ್ ವಚನಾ, ಕಾಮಾಕ್ ಆಳ್ ಮೆಳನಾ, ಮಜೂರಿ ಚಡ್ ಪೀಕ್ ಉಣೆ; ಸಾಗೊಳಿ ಕರುನ್ ಆತಾಂ ಪೋಟ್ ಭರನಾ” ಮ್ಹಣೊನ್ ಭುರ್ಗ್ಯಾಂಕ್ ಬರೊ ಫುಡಾರ್ ದಿಂವ್ಚಿ ಜವಾಬ್ದಾರಿ ಆಮಿಂ ವ್ಹಯ್ಶಿಲ್ಲಿ. ತಾಂಚ್ಯಾ ನಾಂವಾರ್ ಆಮಿಂ ವ್ಹಡಿಲಾನಿಂ ಗಾಂವಾರ್ ನಾಂವ್ ಜೊಡುಂಕ್ ಜಾಯ್ ಮ್ಹಳ್ಳ್ಯಾ ಆಶೆಕ್ ಬಲಿ ಜಾವ್ನ್ ದುಡ್ವಾಚಿ ಪರ್ವಾಂ ಕರಿನಾಸ್ತಾಂ ತಾಂಕಾ ಉಂಚ್ಲೆ ಶಿಕಾಪ್ ದಿಲ್ಲೆಂ. ಪೂತ್ ಕೊನಿ ಸೊಫ್ಟ್‌ವೇರ್ ಎಂಜಿನಿಯರ್ ಆನಿ ಧುವ್ ರೊಜಿ ಎಮ್‌ಕೊಮ್ ಶಿಕ್‌ಲ್ಲಿಂ.

ಪೂತ್ ಕೆನಡಾಂತ್ ಉಂಚ್ಲೆಂ ಶಿಕಾಪ್ ಕರುಂಕ್ ತಯಾರ್ ಜಾಲ್ಲೊ, ಆನಿ ಆಮ್ಚೆ ಥಾವ್ನ್ ದುಡ್ವಾ ಸಹಾಯ್ ಆಶೆತಾನಾ ಆಮಿಂ ಕಿತ್ಲೆ ಕಷ್ಟ್ ತರೀ ಪಾಟಿಂ ಪಳೆಲೆನಾಂ. ಆಸ್‌ಲ್ಲ್ಯಾ ಜಾಗ್ಯಾಂತ್ಲೊ ಇಲ್ಲೊ ವಾಂಟೊ ಆಡವ್ ದವ್ರುನ್ ತರೀ ತಾಕಾ ಕೆನಡಾ ದಾಡ್ಲೊ. ಧುವ್ ಎಮ್ ಬಿ ಎ ಕರುಂಕ್ ಬೆಂಗ್ಳುರ್ ನಾಂವಾಡ್ದಿಕ್ ಕಾಲೆಜಿಂತ್ ವಿಂಚೊನ್ ಆಯಿಲ್ಲೆಂ. ಆಮ್ಕಾಂ ವರ್ತೊ ಸಂತೊಸ್ ಜಾಲ್ಲೊ ಆಮ್ಚಿ ಭುರ್ಗಿಂ ಆಮ್ಚೆಂ ನಾಂವ್ ಗಾಂವಾರ್‌ಚ್ಚ್ ನ್ಹಯ್ ಸಗ್ಳ್ಯಾ ಫಿರ್ಗಜೆಂತ್ ನಾಂವಾಡ್ತಾಲಿ ಮ್ಹಳ್ಳೆಂ.

“ಅಳೆ, ರೊನಿಚೊ ಬಾಪುಯ್ ಯೆತಾ” ಮ್ಹಣ್ ಹಾಂವ್ ಚಲ್ತಾನಾ ಲೊಕ್ ಉಲಯ್ತಾತ್ ಮ್ಹಣ್ ಪತಿಣೆ ಲಾಗಿಂ ಸಾಂಗ್ತಾನಾ, “ಪಳೆ ಎಮ್ ಬಿ ಎ ಕರ್ಚ್ಯಾ ರೊಜಿಚಿ ಆವಯ್” ಮ್ಹಣ್ ಮಾಕಾ ಆಪಯ್ತಾತ್ ಮ್ಹಣ್ತಾಲಿ ತಿ. ಹೆಂ ಆಯ್ಕಾತಾನಾ ಆಮ್ಚಿ ಖುಶಿ ದೊಡ್ತಿ ಜಾತಾಲಿ ಆನಿ ಭುರ್ಗ್ಯಾಂ ವಯ್ರ್ ಗರ್ವ್ ಆಮ್ಕಾಂ ಭಗ್ತಾಲೊ!

ಆತಾಂ ಸಾಗೊಳೆಚೆಂ ಕಾಮ್ ಕರುಂಕ್ ಆಮ್ಕಾಂ ಕಷ್ಟ್ ಲಾಗ್ತಾಲೆ, ಕಾಮ್ ಕರುಂಕ್ ಆಮ್ಕಾ ತಾಂಕ್ ನಾ ತ್ಯಾ ಭಾಯ್ರ್ ಕಾಮಾಕ್ ಮನಿಸ್ ಮೆಳನಾಂತ್, ಮೆಳ್ಳ್ಯಾರೀ ತಾಂಚಿ ಮಜೂರಿ ಪಳೆವ್ನ್ ನಿರಾಸ್ ಭಗ್ತಾ. ಆಶೆಂ ಜಾವ್ನ್ ಚಾರ್ ಹಳ್ಟಾಚೆ ಗಾದೆ ಆಸ್‌ಲ್ಲೆ ತೇಯ್ ಬಂಜಾರ್ ದವರಿಜಾಯ್ ಪಡ್ಲೆ. ದುಡ್ವಾಕ್ ತಿತ್ಲೆ ಕಷ್ಟ್ ನಾತ್‌ಲ್ಲೆ ಕಿತ್ಯಾಕ್ ಕೊನಿ ಕೆನಡಾ ಥಾವ್ನ್ ಆಮ್ಕಾ ಮಹಿನ್ಯಾ-ಮಹಿನ್ಯಾಕ್ ಖರ್ಚಾಕ್ ದಾಡ್ತಲೊ.

ಧುವ್ ರೊಜಿ ಎಮ್ ಬಿ ಎ ಕರುನ್ ಬೆಂಗ್ಳುರ್‌ಚ್ ನವ್ಕರೆಕ್ ಲಾಗ್‌ಲ್ಲೆಂ. “ಬರಿ ಕಂಪೆನಿ ಆನಿ ಬರೊ ಸಾಂಬಳ್ ಆಸಾ” ಮ್ಹಣ್ ತಾಚೆ ಖುಶೆಕ್ ಆನಿ ತಾಣೆ ಜಾವ್ನ್ ವಿಂಚ್ಚ್ಯಾ ಫುಡರಾಕ್ ಆಮಿ ನಾ ಮ್ಹಳೆನಾ. ಪಯ್ಲೆಂ ಥೊಡೆ ದೀಸ್ ಮಹಿನ್ಯಾಕ್ ಏಕ್ ಪಾವ್ಟಿಂ ತರೀ ರೊಜಿ ಘರಾ ಯೇವ್ನ್ ವಚೊನ್ ಆಸ್‌ಲ್ಲೆಂ. ದೀಸ್ ದಾಂವ್ತಾನಾ “ಕಾಮ್ ಮಸ್ತ್ ಚಡ್ ಆಸಾ ಪಪ್ಪಾ ಘರಾ ಯೇವ್ನ್ ವಚೊಂಕ್ ಟಾಯ್ಮ್ ಮೆಳನಾ” ಮ್ಹಣ್ ಸ ಮಹಿನ್ಯಾಕ್ ಏಕ್ ಪಾವ್ಟಿಂ ಯಾ ವರ್ಸಾಕ್ ಏಕ್ ಪಾವ್ಟಿಂ ಯೇಂವ್ಕ್ ಲಾಗ್ಲೆಂ. ಆಮಿಂಯ್ ತಾಕಾ ತಾಚ್ಯಾ ಕಾಮಾಂತ್ ಆಡ್ಕಳ್ ಜಾಂವ್ಕ್ ನ್ಹಜೊ ಮ್ಹಣ್ ಚಡ್ ವತ್ತಾಯ್ ಕೆಲಿನಾ ಯಾ ಕಸ್ಲೊಚ್ಚ್ ವಿಚಾರ್ ಕೆಲೊನಾ ಕಿತ್ಯಾಕ್ ತಾಕಾಯೀ ತಾಚೆಂಚ್ ಮ್ಹಳ್ಳೆಂ ಸ್ವತಂತ್ರ್ ಆಸಾ.

“ಪಪ್ಪಾ ಹಾಂವ್ ಹಾಂಗಾಸರ್ ಎಕಾ ಮಂಗ್ಳುರಿ ಚಲ್ಯೆಲಾಗಿಂ ಸಿಲ್ವಿನಾಸಂಗಿ ಲಗ್ನ್ ಜಾಲಾಂ. ಸಿಲ್ವಿನಾ ಹಾಂಗಾಸರ್ ವ್ಹಡ್ಲ್ಯಾ ಸೊಫ್ಟ್‌ವೇರ್ ಕಂಪೆನಿಂತ್ ಉಂಚ್ಲ್ಯಾ ಹುದ್ದ್ಯಾರ್ ಆಸಾ. ಥೊಡ್ಯಾ ತೆಂಪಾ ಥಾವ್ನ್ ಆಮಿಂ ಎಕಾಮೆಕಾ ಮೊಗಾರ್ ಆಸ್‌ಲ್ಲ್ಯಾಂವ್ ಆನಿ ಆಮಿಂ ಎಕಾಮೆಕಾಕ್ ಸಮ್ಜೊನ್ ಘೆವ್ನ್, ದೊಗಾಯ್ನೀ ಮೆಳೊನ್ ಹೊ ನಿರ್ಧಾರ್ ಕೆಲಾ” -ತ್ಯಾ ಎಕಾ ರಾತಿಕ್ ಆಚಾನಕ್ ಕೊನಿನ್ ಫೊನಾರ್ ಸಾಂಗ್‌ಲ್ಲೆಂ. ಧಖೊ ಮಾಕಾಯೀ ಬಸ್ಲೊ ಆನಿ ನಿರಾಸ್ಲೆಲಿ ಪತಿಣ್ ಚಾರ್ ದೀಸ್ ರಡೊನ್ ಬಸ್ಲಿ. “ಜೆಸ್ಸಿ, ಆಮ್ಚೊ ಪೂತ್ ಆತಾಂ ವ್ಹಡ್ ಜಾಲಾ, ಖುಧ್ ಆಪ್ಲೆ ನಿರ್ಧಾರ್ ಕರುಂಕ್ ಜಾಣಾ, ತ್ಯಾ ಭಾಯ್ರ್ ತೊ ಆಪ್ಲ್ಯಾಚ್ ಪಾಂಯಾನಿ ಉಭೊ ಆಸಾ, ಮ್ಹಣ್ತಾನಾ ಆಮಿಂ ಖುಶಿ ಜಾಯ್ಜಾಯ್ ಆನಿ ಬರೆಂ ಮಾಗಾಜಾಯ್ ಶಿವಾಯ್ ರಡೊನ್ , ದುಕಾಂ ಗಳವ್ನ್ ಬಸ್ಲ್ಯಾರ್ ಕಾಂಯ್ ಸಮಾ ಜಾತಾ? ಆಮಿಂಯೀ ಹೆಂಚ್ ಆಶೆತೆಲ್ಯಾಂವ್ ನ್ಹಯ್..?” ಬಾಯ್ಲೆಕ್ ಸಮ್ಜಾಯ್ತಾಲೊಂ. “ಕಸೆಂ ಹಾಂವ್ ಆಮ್ಚ್ಯಾ ಸೆಜರಾ, ಸಯ್ರ್ಯಾಂಕ್ ತೋಂಡ್ ದಾಖಂವ್? ಆಸ್‌ಲ್ಲೊ ಏಕ್ ಪೂತ್, ತಾಣೆಂಯ್ ಆಮ್ಚೊ ಉಗ್ಡಾಸ್ ದವರ್ಲೊನಾ, ತಾಚೆಂ ಬೊರೆಂ ಫಾಲೆಂ ಪಳೆಂವ್ಕ್ ಸಯ್ತ್ ಆಮ್ಕಾಂ ಆಪಯ್ಲೆನಾ”… ಮ್ಹಣ್ ಬೆಜಾರಾಯ್ ಉಚರ್ತಾಲಿ. ಪುಣ್ ಆಮಿಂ ಆಮ್ಚ್ಯಾ ಭುರ್ಗ್ಯಂಚ್ಯಾ ಬರ‍್ಯಾ ಫುಡರಾಕ್ ಸದಾಂ ಮಾಗ್ತಲ್ಯಾಂವ್ ಶಿವಾಯ್ ತಾಂಚೆ ವಾಯ್ಟ್ ಕೆದಿಂಚ್ ಚಿಂತ್‌ಲ್ಲೆನಾ.

ಪುತಾಚ್ಯಾ ಕಾಜರಾಚಿ ಬೆಜಾರಾಯ್ ಆಮ್ಚೆ ಥಾವ್ನ್ ಪಯ್ಸ್ ದಾಂವ್ತಾಲಿ ತಿತ್ಲಿಚ್ಚ್; ಆಚಾನಕ್ ಆನ್ಯೆಕ್ ಖಬರ್ ಆಮ್ಕಾಂ ಗಡ್ಗಡೊ ಮಾರುನ್ ಚಲ್ಲಿ! ಬೆಂಗ್ಳುರ್ ಆಸ್‌ಲ್ಲೆಂ ರೊಜಿ ಆಮ್ಚಿ ಧುವ್, ತಾಚ್ಯಾಚ್ ಕಂಪೆನಿಂತ್ ಕಾಮ್ ಕರ್ಚ್ಯಾ ಚಲ್ಯಾ ಸಂಗಿಂ ಲಗ್ನ್ ಜಾವ್ನ್ ದುಬಾಯ್ ಪಾವ್‌ಲ್ಲೆಂ. ಚೆಡ್ಯಾಕ್ ಉಂಚ್ಲ್ಯಾ ಹುದ್ದ್ಯಾಚೆಂ ನಾಂವಾಡ್ದಿಕ್ ದುಬಾಯ್ಚ್ಯಾ ಕಂಪೆನಿಂತ್ ಕಾಮ್ ಜಾಲ್ಲೆಂ. ಆಮ್ಕಾಂ ಕಿತೆಂಚ್ ಕಳಿತ್ ಕರಿನಾಸ್ತಾಂ, ಆಪ್ಲ್ಯಾಚ್ ಖುಶೆನ್ ತಾಣೆಂಚ್ ನಿರ್ಧಾರ್ ಕೆಲ್ಲೊ! ಆಮ್ಚಿ ಧುವ್‌ಯ್ ಆತಾಂ ವ್ಹಡ್ ಜಾಲ್ಲಿ! ಆಪ್ಲೆ ನಿರ್ದಾರ್ ಖುಧ್ ಕರ್ಚೆ ತಿತ್ಲಿ ಪ್ರಬುದ್ಧ್ ಜಾಲ್ಲಿ!

ಪತಿಣಿನ್ ಪುತಾಚಿ ಖಬರ್ ತರ್‌ಯ್ ಜಿರ್ವಣ್ ಕೆಲ್ಲಿ ಪುಣ್ ಧುವ್ ರೊಜಿಚೆ ಖಬ್ರೆನ್ ತಿಕಾ ಹೊಸ್ಪಿಟ್ಲಾಚ್ಯಾ ಬೆಡ್ಡಾರ್ ನಿದಾಯಿಲ್ಲೆಂ! ಹಾಂವ್‌ಯ್ ಆತಾಂ ಪುರ್ತೊ ಸಲ್ವಲ್ಲೊಂ. ಆಡೊವ್ ದವರ್‌ಲ್ಲೊ ಜಾಗೊಯ್ ಗೆಲೊ ಆನಿ ಬಂಜಾರ್ ಆಸ್ಲೆಲೆ ಗಾದೆ ವಿಕೊನ್ ಗೆಲೆ ಪತಿಣಿಚ್ಯಾ ವಕ್ತಾಕ್. ಆತಾಂ ಆಮ್ಚೆಂ ಮ್ಹಳ್ಳೆಂ ಘರ್ ಆನಿ ಘರಾ ಮುಕ್ಲೊ ಇಲ್ಲೊಸೊ ಜಾಗೊ ಉರ್‌ಲ್ಲೊ. ಪತಿಣೆನ್ ತಿಚಿ ಖಬರ್ ಭುರ್ಗ್ಯಾಂಕ್ ದೀಂವ್ಕ್ ಮಾಕಾ ಆಡ್ವರ್ಲೆಲೆಂ; ಹಾಂವೆಂಯ್ ಭುರ್ಗ್ಯಾಂಕ್ ಹಿ ಖಬರ್ ದಿಲಿನಾ…ಕೊಣಾಕ್ ಪಾತ್‌ಯೇಂವ್? ಆತಾಂ ತಿ ತಾಂಕ್ ಮ್ಹಜೆಕಡೆಯ್ ನಾತ್‌ಲ್ಲಿ.!

ದೋನ್ ಮಹಿನ್ಯಾನಿಂ ಪತಿಣ್ ಘರಾ ಪಾವ್ಲಿ ತರೀ ಭಲಾಯ್ಕಿ ಪಾಡ್ ಜಾಲ್ಲಿ ಪರತ್ ಸಾರ್ಕಿ ಜಾಲಿನಾ!. ಆತಾಂ ತಿಕಾ ಮ್ಹಜ್ಯಾ ಆದಾರಾ ಶಿವಾಯ್ ಕಾಂಯ್ ಕರುಂಕ್ ಜಾಯ್ನಾತ್ಲೆಂ. ಖಂತ್ ತಿಕಾ ಮತಿಂತ್ ಖರ್ಗಯ್ತಾಲಿ, ಪುಣ್ ಮ್ಹಜೆ ಮುಕಾರ್ ದಾಖಯ್ನಾತ್ಲಿ.

ವರ್ಸಾಂ ಆಟ್ ಸಂಪ್‌ಲ್ಲಿಂ, ಪೂತ್ ಕೆನಡಾಂತ್ ತಾಚ್ಯಾಚ್ಚ್ ಸಂಸಾರಾಂತ್ ಮಸ್ತ್ ಆಸ್‌ಲ್ಲೊ, ತಾಚೊ ಸಂಸಾರ್ ತಾಣೆ ಬಾಂದ್ಲಾ ತೆಂ ಆಮ್ಕಾಂ ಖುಶಿ. ಧುವ್‌ಯ್ ಆಪ್ಲ್ಯಾಚ್ ಸಂಸಾರಾಂತ್ ಕುಟ್ಮಾ ಸವೆಂ ಮಗ್ನ್. ದುಬಾಯಾಂತ್ ರೊಜಿಕ್‌ಯ್ ಏಕ್ ಚೆಡುಂ ಭುರ್ಗೆಂ, ಆಮ್ಕಾಂ ನಾತ್, ಜಾಲ್ಲೆಂ. ಭುರ್ಗ್ಯಾನಿಂ ಆಪಾಪ್ಲೊ ಸಂಸಾರ್ ಬಾಂದುನ್ ಜಾಲ್ಲೊ, ಆಮಿಂ ಹಾಂಗಾಸರ್ ರಾತ್ ದೀಸ್ ತಾಂಚಾ ಯೆಣ್ಯಾಕ್ ರಾಕ್ತಾಲ್ಯಾಂವ್ ಸದಾಂ ವಾಟ್ ಪಳೆವ್ನ್. ಭುರ್ಗ್ಯಾಂಚ್ಯಾ ಖಂತಿನ್ಂಚ್ ಕೊಣ್ಣಾ ಆಮಿಂ ಪ್ರಾಯೆಚ್ಯಾಕೀ ಚಡ್ ಮಾತಾರಿ ಜಾಲ್ಲ್ಯಾಂವ್!.

ಆನಿ ಆಚಾನಕ್ ತ್ಯಾ ದಿಸಾ, ಮ್ಹಜಿ ಪತಿಣ್ ತಕ್ಲಿ ಗುಂವಳ್ ಯೇವ್ನ್ ಘರಾಚ್ಚ್ ಪಡ್ತಾನಾ ಸೆಜರ‍್ಯಾಕ್ ಆಪವ್ನ್ ತಿಕಾ ಆಸ್ಪತ್ರೆಕ್ ದಾಖಲ್ ಕರಿಜಾಯ್ ಪಡ್ಲೆಂ. ಭುರ್ಗ್ಯಾಂಕ್ ಕೂಡ್ಲೆ ಫೊನಾದ್ವಾರಿಂ ಖಬರ್ ಪಾಟಯ್ಲಿ. ಭುರ್ಗಿಂ ಪಾವ್ಲಿಂ ಆವಯ್ಕ್ ಪಳೆಂವ್ಕ್, ತರೀ ಆಸ್ಪತ್ರೆ ಥಾವ್ನ್ ಪತಿಣ್ ಪರತ್ ಪಾಟಿಂ ಆಪ್ಲ್ಯಾ ಘರಾ ಜೀವ್ ಪಾವ್ಲಿನಾ!

***

“ಟ್ರೀಂ.” ದಾರಾರ್ ಬೆಲ್ಲ್ ವಾಜ್ಲಿ. ಪುತಾನ್ ಯೇವ್ನ್ ದಾರ್ ಉಘಡ್ತಾನಾ ಹೊಟೆಲ್‌ವಾಲೊ ಚೆಡೊ ಜೆವ್ಣಾಚಿ ಪೊಟ್ಲಿ ಘೆವ್ನ್ ಉಬೊ ಆಸ್‌ಲ್ಲೊ.

“ಪಪ್ಪಾ, ಯೆ ಹಾಂಗಾ ಬಸ್”, ಧುವೆ ರೊಜಿನ್ ಮೆಜಾರ್ ಪ್ಲೇಟ್ ದವ್ರುನ್ ಮಾಕಾ ಉಲೊ ದಿಲೊ. ಮೆಜಾಚ್ಯಾ ಮುಖ್ಲ್ಯಾ ಕುಶಿಕ್ ಮ್ಹಜೆಂ ಕದೆಲ್ ಮಾಂಡ್‌ಲ್ಲೆಂ. ಹಾಂವ್ ಬಸ್ತಾನಾ ಸರ್ವಾಂಯ್ ಬಸ್ಲಿಂ ಆಪಾಪ್ಲಿ ಪ್ಲೇಟ್ ಘೆವ್ನ್.

ಪುತಾನ್ ಎಕಾ ಗ್ಲಾಸಾಂತ್ ಏಕ್ ಪೆಗ್ಗ್ ವೊತುನ್ ಮ್ಹಜೆ ತೆವ್ಶಿಂ ವೊಡ್ಡಯ್ಲೊ, ಆನಿ ಆಪ್ಣಾಕ್‌ಯ್ ಏಕ್ ಪೆಗ್ಗ್ ಘೆವ್ನ್, ಉಲವ್ಣ್ಯಾಕ್ ಸುರ್ವಾತ್ ಕೆಲಿ. “ಪಪ್ಪಾ ತುಂ ಆಮ್ಚೆಂ ಸಂಗಿ ಕೆನಡಾ ಯೆತಾಯ್, ತುಜಿ ಟಿಕೆಟ್ ಹಾಂವೆ ಕೆಲ್ಯಾ, ಆಮಿಂ ಸಾಂಗಾತಾ ಆಜ್ ರಾತಿಕ್ ವೆಚೆಂ.”

“ನಾಂ ಪುತಾ, ಮಾಕಾ ಥಂಯ್ ತ್ಯಾ ಹಿಂವಾಳ್  ವಾತಾವರಣಾಂತ್ ಜೀವನ್ ಸಾರುಂಕ್ ಕಷ್ಟ್ ಜಾತೆಲೆ, ಹಾಂವ್ ಹಾಂಗಾಚ್ಚ್ ಖುಶಿ-ಖುಶಿ ಚಾರ್ ದೀಸ್ ಕಾಡ್ತೊಲೊಂ. ತುಮಿಂ ಮ್ಹಜೆ ವಿಶಿಂ ಖಂತ್ ಕರಿನಾಕಾತ್, ಹಾಂವ್ ಆಜೂನ್ ಘಟ್ಟ್ ಆಸಾಂ. ಮಾಮ್ಮಿ ನಾ ತರೀ ತಿಚಿ ಯಾದ್ ಕರುನ್ ದೀಸ್ ಕಾಡ್ತಾಂ.” ಗ್ಲಾಸ್ ತೊಂಡಾರ್ ಲಾವ್ನ್ ಹಾಂವೆ ಜವಾಬ್ ದಿಲಿ.

“ಅರೆ, ಪಪ್ಪಾ, ತುಕಾ ಎಕ್ಲ್ಯಾಕ್ ಆಮಿಂ ಹಾಂಗಾಸರ್ ಸೊಡಿನಾಂವ್. ಆಮ್ಕಾಂ ಆಮ್ಚ್ಯಾ ಫುಡರಾಕ್ ಜಾಯ್ತೆ ಕಷ್ಟ್ ತುಮಿ ಕಾಡ್ಲ್ಯಾತ್ ಆನಿ ಆತಾಂ ತರೀ ತುಜ್ಯಾ ಉತರ್ ಪ್ರಾಯೆರ್ ಮ್ಹಜಿ ಜವಾಬ್ದಾರಿ ಸಾಂಬಾಳುಂಕ್ ಆವ್ಕಾಸ್ ದೀ, ತುಂ ಕಸಲಿಚ್ ಖಂತ್ ಕರಿನಾಕಾ” ಮ್ಹಣಾಲೊ ಪೂತ್.

ಮ್ಹಜ್ಯಾ ತೊಂಡಾಂತ್ ಥಾವ್ನ್ ಉತ್ರಾಂ ಸುಟ್ಲಿನಾಂತ್!.

ಹಾಂವ್ ಹ್ಯಾ ಘರ್ಚೆಂ ನಿಮಾಣೆಂ ಜೆವಾಣ್ ಸಂಪವ್ನ್ ಉಟೊಂಕ್ ಹಾತ್ ತೆಂಕ್ತಾನಾ, ಪರತ್ ದಾರಾರ್ ಟೊಕೆ ಪಡ್ಲೆ…

“ಡೆಡಿ, ಅಂಬುಲೆನ್ಸ್ ಫ್ರೊಮ್ ’ಓಲ್ಡ್ ಯೇಜ್ ಹೋಮ್’ ಇಸ್ ಹಿಯರ್”…. ಮ್ಹಜೊ ನಾತು ಧಾಂವುನ್ ವಚೊನ್ ದಾರ್ ಉಗ್ತೆಂ ಕರುನ್ ಆಪ್ಲ್ಯಾ ಬಾಪಯ್ಕ್ ಹಿಶಾರೊ ಕರುನ್ ಸಾಂಗ್ತಾನಾ, ಸಕ್ಡಾಂಚಿ ದೀಷ್ಟ್ ಮ್ಹಜೆರ್ ಪಡ್ಲಿ.

“ಭುರ್ಗ್ಯಾನೊಂ, ಚೇಂಜ್ ಈಸ್ ಕೋನ್‌ಸ್ಟೆಂಟ್ ಇನ್ ದಿಸ್ ವರ್ಲ್ಡ್..,” ಬದ್ಲಾವಣ್ ಆಮ್ಕಾಂ ಜಿಣ್ಯೆಂತ್ ಯಶಸ್ವಿ ಜೊಡುಂಕ್ ಶಿಕಯ್ತಾ. ತುಜ್ಯಾ ಮಾಮ್ಮಿನ್ ಆನಿ ಹಾಂವೆ ಮೆಳೊನ್ ಏಕ್ ನಿರ್ಧಾರ್ ಘೆತ್‌ಲ್ಲೊ, ಆಮಿಂ ಸಮಾಜೆಂತ್ ಬದ್ಲಾವಣೆಕ್ ಸುರ್ವಾತ್ ಕರುಂಕ್ ಜಾಯ್, ಆಮಿಂ ಆಮ್ಚ್ಯಾ ಉತರ್ ಪ್ರಾಯೆರ್, ತುಮ್ಚೊ ಫುಡಾರ್ ಬಾಂದ್ಲ್ಯಾ ಉಪ್ರಾಂತ್ ಸ್ವ-ಖುಶೆನ್ ವ್ರದ್ಧಾಶ್ರಮಾಂತ್ ಜಿಯೆಂವ್ಚೆ; ಕಿತ್ಯಾಕ್ ತುಮ್ಕಾಂ ತುಮ್ಚೊಚ್ ಸಂಸಾರ್ ಆಸಾ, ರಾಟಾವಳ್ ಆಸಾ, ತುಮ್ಚಿ ಮುಕ್ಲಿ ಜವಾಬ್ದಾರಿ ತುಮ್ಚಿಂ ಭುರ್ಗಿಂ, ತುಮಿಂ ತುಮ್ಚೊ ಸಂಸಾರ್ ಖುಶೆನ್ ಆನಿ ಖುಶಾಲಾಯೆನ್ ಮಾಂಡುನ್ ಹಾಡುಂಕ್ ಜಾಯ್. ಆಜ್ ಕಾಲ್ ಭುರ್ಗಿಂ ಆಪ್ಲ್ಯಾ ಉತರ್ ಪ್ರಾಯೆಚ್ಯಾ ವ್ಹಡಿಲಾಂಕ್ ಆಶ್ರಮಾನಿಂ ಘಾಲ್ತಾತ್, ಮ್ಹಳ್ಳಿ ಗಜಾಲ್ ಆಮ್ಚ್ಯಾ ಸಮಾಜೆಂತ್ ಬೋವ್ ಪ್ರಚಲಿತ್ ಜಾಲ್ಯಾ. ಹೆಂ ಆಮ್ಚೆಂ ಲಾಚಾರ್ಪಣ್ ಜಾಂವ್ಕ್ ಪುರೊ. ಪುಣ್ ಆಮಿಂ ವ್ಹಡಿಲಾಂ ’ಭುರ್ಗ್ಯಾಂನಿಂಚ್ ಆಮ್ಕಾಂ ಪಳೆಂವ್ಕ್ ಜಾಯ್’ ಮ್ಹಣ್ ಜಿದ್ದ್ ಕರುನ್ ಆಸಾಂವ್, ಕಿತ್ಯಾಕ್ ಆಮಿಂ ಭುರ್ಗ್ಯಾಂಕ್ ಆಮ್ಚ್ಯಾ ಕಷ್ಟಾ-ಸಂಕಷ್ಟಾನಿಂ ಸಯ್ತ್ ಬೋವ್ ಮೊಗಾನ್ ದೆಕ್ಲಾಂ. ತಶೆಂ ಜಾವ್ನ್ ಆಮ್ಚ್ಯಾ ಮಾತಾರ‍್ಪಣಾರ್ ತಾಂಚೊ ಕಾಯ್ದೊ ಜಾವ್ನಾಸಾ ಮೊಗಾನ್ ಆವಯ್-ಬಾಪಯ್ಕ್ ಪೊಸ್ಚೊ!. ಪುಣ್ ಕಾಳ್ ಬದಲ್ತಾನಾ ಆಮಿಂಯ್ ಬದ್ಲೊಂಕ್ ಜಾಯ್, ಆಮಿಂ ಆಮ್ಚಿಂ ಜವಾಬ್ದಾರಿ ಸ್ವ-ಖುಶೆನ್ ಸ್ವೀಕರ್ ಕರುಂಕ್ ಜಾಯ್. ಉತರ್ ಪ್ರಾಯೆರ್ ಮನಿಸ್ ಲಾಚಾರ್ ಜಾತಾ ವ್ಹಯ್ ಪುಣ್ ಬೆಜವಾಬ್ದಾರ್ ನ್ಹಯ್. ತ್ಯಾ ಉತರ್‌ಪ್ರಾಯೆಸ್ತಾಂಚ್ಯಾ ಘರಾನಿಂ ವಸ್ತಿ ಕರ್ಚ್ಯಾ ಸಭಾರ್ ಎಕ್ಸುರ‍್ಯಾಂಕ್ ಸಾಂಗಾತ್ ದೀಂವ್ಚ್ಯಾ ಇರಾದ್ಯಾನ್ ಹಾಂವೆ ಆಸ್‌ಲ್ಲೊ ಇಲ್ಲೊಸೊ ಜಾಗೊ ತ್ಯಾ ವ್ರದ್ಧಾಶ್ರಮಾಕ್ ದಾನ್ ಕೆಲಾ ಆನಿ ಹಾಂವ್ ಜಿವಂತ್ ಆಸ್ತಾಂ ಪರ್ಯಾಂತ್ ಥಂಯ್ಸರ್ ಆಸ್‌ಲ್ಲ್ಯಾ ಸಭಾರ್ ಆನಾಥ್ ಪ್ರಾಯೆಸ್ತಾಂ ಸವೆಂ ಹಾಸೊನ್ ಖೆಳೊನ್ ತಾಂಚಾ ಸಾಂಗಾತಾಂತ್ ಖರ್ಚುಂಕ್ ನಿರ್ಧಾರ್ ಕೆಲಾ. ಮ್ಹಜೊ ಹೊ ಬದ್ಲಾವಣೆಚೊ ನಿರ್ಧಾರ್ ತುಮಿಂ ಸ್ವೀಕರ್ ಕರ್ತೆಲ್ಯಾತ್ ಮ್ಹಣ್ ಹಾಂವ್ ಭರ್ವಸ್ತಾಂ. ದೆವಾಚೆಂ ಬೆಸಾಂವ್ ಆನಿ ಮ್ಹಜೆಂ ಆಶೀರ್ವಾದ್ ತುಮ್ಚೆರ್ ಸದಾಂ ಆಸ್ತೆಲೆಂ”, ಮ್ಹಣೊನ್ ತಾಂಕಾ ಪೊಟ್ಲುನ್ ಧರುನ್ ನಾತ್ರಾಂಚೆರ್ ಉಮ್ಯಾಂಚೊ ಶಿಂವರ್ ವೊತುನ್ ಹಾಂವೆ ವ್ರಧ್ದಾಶ್ರಮಾಚಿ ವಾಟ್ ಧರ್ಲಿ, ದೊಳ್ಯಾ ಖಾಂಚಿ ಮದ್ಲಿಂ ದುಕಾಂ ಪುಸಿತ್ತ್!. ಪುಣ್, ತ್ಯಾ ಘಡ್ಯೆ ಮ್ಹಜ್ಯಾ ಭುರ್ಗ್ಯಾಂಚ್ಯಾ ದೊಳ್ಯಾಂನಿ ಭರ್‌ಲ್ಲಿಂ ದುಕಾಂ ಮ್ಹಜ್ಯಾ ನದ್ರೆ ಥಾವ್ನ್ ಚುಕ್ಲಿನಾಂತ್!

■ ಪ್ರಸನ್ನ್, ನಿಡ್ಡೊಡಿ