“ಭಾರತಾಚಾ ಹಜಾರೊಂ ಭಾಸಾಂ ಪಯ್ಕಿ ಕೊಂಕ್ಣಿ ಭಾಷೆಕ್ ಭಾರತಾಚಾ ಸಂವಿಧಾನಾಂತ್ ಮಾನ್ಯತಾ ದೀವ್ನ್ ಅಧಿಕೃತ್ ಜಾವ್ನ್ 1992 ಅಗೋಸ್ತ್ 20ವೆರ್ ಪರ್ಗಟ್ಲಾಂ. ಗೊಂಯ್ ರಾಜ್ಯಾಚಿ ಅಧಿಕೃತ್ ರಾಜ್ಯ್ ಭಾಸ್ ಕೊಂಕ್ಣಿ. ತೀನ್ ರಾಜ್ಯಾಂನಿ ಕೊಂಕ್ಣಿ ಉಲವ್ಪಿ ಲೋಕ್ ಆಸಾ. ಕೊಂಕ್ಣಿ ಆಮಿಂ ಉರವ್ನ್ ಮುಕ್ಲ್ಯಾ ಪಿಳ್ಗೆಕ್ ಪಾವಂವ್ಚಿ ಜವಾಬ್ದಾರಿ ಸರ್ವಾಂಚಿ” ಮ್ಹಣ್ ಸಾಹಿತಿ ಆನಿ ಬರವ್ಪಿ ಮಾನೆಸ್ತ್ ಜ್ಯೊ ಕ್ವಾಡ್ರಸ್ ಸಾಂಗಿಲಾಗ್ಲೊ.
ಕಥೊಲಿಕ್ ಸಭಾ ಮೌಂಟ್ ರೋಜರಿ ಘಟಕಾನ್ ಪಯಿಲ್ಲೆ ಪಾವ್ಟಿಂ ಕೊಂಕ್ಣಿ ಮಾನ್ಯತಾ ದಿವಸ್ ಆಯ್ತಾರಾ 24 ಅಗೋಸ್ತ್ 2025ವೆರ್ ಸಾಕಾಳಿಂ 9.30ಕ್ ಫಿರ್ಗಜ್ ಮಿನಿಹೊಲಾಂತ್ ಸಂಭ್ರಮ್ಲೊ. ಫಿರ್ಗಜೆಂತ್ಲ್ಯಾ ಮಾಲ್ಗಡ್ಯಾ ಸ ಜಣಾಂ ಕೊಂಕ್ಣಿ ಸಾಹಿತಿಂಕ್, ಬರವ್ಪ್ಯಾಂಕ್, ಫಿರ್ಗಜ್ ಪತ್ರ್ ರೊಜಾರಿಚೊ ಗಾಂಚ್ ಆದ್ಲ್ಯಾ ಆನಿ ಆತಾಂಚಾ ಸಂಪಾದಕಾಂಕ್ ತಾಂಚಾ ಕೊಂಕ್ಣಿ ಭಾಷೆ ಖಾತಿರ್ ದಿಲ್ಲ್ಯಾ ದೆಣ್ಗ್ಯಾ ಖಾತಿರ್ ಮಾನ್ ಕೆಲೊ.
ವೆದಿರ್ ಸಹಾಯಕ್ ವಿಗಾರ್ ಬಾಪ್ ರೋಹನ್ ಮಸ್ಕರೇನ್ಹಸ್, ಮಾಲ್ಗಡೊ ಸಾಹಿತಿ ಜೋ ಕ್ವಾಡ್ರಸ್, ಕಥೊಲಿಕ್ ಸಭಾ ಅಧ್ಯಕ್ಷ್ ಅರ್ಚಿಬಲ್ಡ್ ಫುರ್ಟಾಡೊ, ಕಾರ್ಯದರ್ಶಿ ಮಾರ್ಗರೇಟ್ ರೆಬೆಲ್ಲೊ, ಖಜನ್ದಾರ್ ವಿಲ್ಮಾ ರೇಗೊ, ನಿಕಟ್ ಪೂರ್ವ್ ಅಧ್ಯಕ್ಷ್ ಎಲಿಯಾಸ್, ನಿಯೋಜಿತ್ ಅಧ್ಯಕ್ಷ್ ರೂಬನ್ ರೆಬೆಲ್ಲೊ, ಕ.ಸ.ವಾರಾಡೊ ಅಧ್ಯಕ್ಷಿಣ್ ರೋಜಿ ಕ್ವಾಡ್ರಸ್, ಗೊವ್ಳಿಕ್ ಮಂಡಳಿ ಉಪಾಧ್ಯಕ್ಷ್ ಲೂಕ್ ಡಿಸೋಜ, ಕಾರ್ಯದರ್ಶಿ ಪ್ರಿಯ ಫುರ್ಟಾಡೊ ಹಾಜರ್ ಆಸ್ಲಿಂ.
ಆಪ್ಲ್ಯಾ ಪ್ರಾಸ್ತಾವಿಕ್ ಸಂದೇಶಾಂತ್ ಅಧ್ಯಕ್ಷ್ ಮಾನೆಸ್ತ್ ಅರ್ಚಿಬಲ್ಡ್ ಫುರ್ಟಾಡೊನ್ ಫಿರ್ಗಜೆಂತ್ ಪಯ್ಲ್ಯಾ ಪಾವ್ಟಿಂ ಕಥೊಲಿಕ್ ಸಭೆನ್ ಕೊಂಕ್ಣಿ ಮಾನ್ಯತಾ ದೀಸ್ ಆಚರಣ್ ಕರ್ಚಾ ಮಹತ್ವಾವಿಶಿಂ ಮಾಹೆತ್ ದಿಲಿ. ಕಥೊಲಿಕ್ ಸಭಾ ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿ ಉರಂವ್ಚಾ ವಿಶಿಂ ವಿಶೇಸ್ ಸಾಧನ್ ಕರುನ್ ಆಸಾ. ದೆಕುನ್ ಕೊಂಕ್ಣಿ ಭಾಷೆಕ್ ದೇಣ್ಗಿ ದಿಲ್ಲ್ಯಾಂಕ್ ಗೌರವ್ ಪಾಟಂವ್ಚೆಂ ಗರ್ಜೆಚೆಂ ಮ್ಹಣ್ ತಾಣಿಂ ಸಾಂಗ್ಲೆಂ
ಸಹಾಯಕ್ ವಿಗಾರಾನಿಂ ಆಪ್ಲ್ಯಾ ಸಂದೇಶಾಂತ್ ಮಾಯ್ ಭಾಷೆಥಂಯ್ ಆಮ್ಚೊ ಮೋಗ್ ಸದಾಂಚ್ ಆಸೊನ್, ಭುರ್ಗ್ಯಾಂಕ್ ಕೊಂಕ್ಣಿ ಶಿಕಂವ್ಕ್ ಉಲೊ ದಿಲೊ.
ಮಾನೆಸ್ತಿಣ್ ಪ್ರಮೀಳಾ ಡಿಸೋಜಾನ್ ಹೆಂ ಕಾರ್ಯೆಂ ಚಲವ್ನ್ ವರ್ನ್ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ.
