ತೆ ಆನಿ ಆಮಿ

75

ಹಾಂವ್ ಲ್ಹಾನ್ ಆಸ್ತಾನಾ, ಮ್ಹಳ್ಯಾರ್.. ಭಂವ್ತಿಲ್ಯಾ ಸಂಸ್ರಾಚಿ ರೀತ್ ನೀತ್ ಮ್ಹಜೆ ಭಿತೆರ್ ದಾಖಲ್ ಜಾಂವ್ಕ್ ಸುರು ಜಾವ್ನ್ ಆಸ್ಚಾ ವಗ್ತಾ ಮ್ಹಾಕಾ ಕಳೊಂಕ್ ಸುರು ಜಾಲ್ಲಿ ಸಂಗತ್ ಮ್ಹಳ್ಯಾರ್, ಸಕ್ಕಡ್ ಮ್ಹನಿಸ್ ರೂಪಾನ್ ಸಮಾನ್ ತರೀ, ಎಕಾಮೆಕಾ ಸರಿ ಸಮಾನ್ ನ್ಹಯ್! ಜಾತಿಚೆ ಪೆಟೆ, ಕಂತ್ರಿ ಪೆಟೆ ಆಸುಲ್ಲೆ ಬರಿಂ! ಜಾತಿಚಾ ಪೆಟ್ಯಾಂಕ್ ಘರಾ ಭಿತೆರ್, ಬೆಡ್ ರೂಮಾ ಪರ್ಯಾಂತ್ ರೀಗ್ ಸಲೀಸ್! ಕಂತ್ರಿ ಪೆಟ್ಯಾಂಕ್ ಗೆಟಿ ಭಾಯ್ರ್! ಆಮ್ಚಾ ಸಮಾಜಿಂತ್ ಚಡುಣೆ ಕಂತ್ರಿ ಪೆಟ್ಯಾಂಚಾ ಸ್ಥಾನಾರ್ ಜಾತಿನ್ ಅಸ್ಪೃಶ್ಯ್ ಜಾವ್ನಾಸ್ಲೊ ಏಕ್ ಮ್ಹನ್ಶಾ ವರ್ಗ್ ಆಸುಲ್ಲೊ, ಆನಿ ಆರ್ವಿಲ್ಯಾ ವರ್ಸಾಂನಿಂಯ್ ತೊ ವರ್ಗ್ ತಸೊಚ್ ಆಸಾ. ಹಾಂಚೆ ಮಧೆಂ ವಿವಿಧ್ ಶ್ರೇಣಿ ಆಸಾತ್ ತರೀ ಜೆರಾಲ್ ಥರಾನ್ ಹಾಂಕಾ ಆಮ್ಚೆ ತೆಣೆ ತಾಂಕಾ ಮ್ಹಾರ್ (ವ ಮಹರ್) ಮ್ಹಣೊನ್ ಅಪಯ್ತಾತ್. ಹಾಂಕಾ ಚಡ್ ಮ್ಹಳ್ಯಾರ್ ಸವರ್ಣೀಯ್ ಲೊಕಾಚಾ ಅಂಗಣಾ ಪರ್ಯಾಂತ್ ಪ್ರವೇಶ್ ಆಸ್ತಾಲೊ. ಹಾಂಕಾ ಗಾಂಧಿನ್ ‘ದಲಿತ್’ ಮ್ಹಣೊನ್ ನವೆಂ ನಾಂವ್ ದಿಲೆಂ ತರೀ ಸಮಾಜಿಂತ್ ತಾಂಚೊ ಸ್ತರ್ ಕಾಂಯ್ ವಯ್ರ್ ಚಡ್ಲೊ ನಾ. ಶೇಕ್ಸ್‍ಪಿಯರಾನ್ ಮ್ಹಳ್ಳೆ ಬರಿಂ, ಗುಲೊಬಾಕ್ ಕಸಲ್ಯಾ ನಾಂವಾನ್ ಅಪಯ್ಲ್ಯಾರೀ ತಾಚಾ ಪರ್ಮಳಾಂತ್ ವೆತ್ಯಾಸ್ ಜಾಯ್ನಾ ತಶೆಂ ಅಸ್ಪ್ರಶ್ಯಾಕ್ ಕಸಲ್ಯಾ ನವ್ಯಾ ನಾಂವಾನ್ ಅಪಯ್ಲ್ಯಾರೀ ಸಮಾಜಿಂತ್ ತಾಚಾ ಸ್ಥಾನ್‍ಮಾನಾಚೆರ್ ವಿಶೇಸ್ ಪ್ರಭಾವ್ ಪಡೊಂಕ್‍ಚ್ ನಾ ಮ್ಹಣ್ಯೆತ್.

ಮ್ಹಜೊ ಪಪ್ಪಾ ಎಕಾ ಬ್ರಿಟಿಶಾಂಚಾ ಕಾಫ್ಯೆ ತೊಟಾಂತ್ ರೈಟರ್ ಜಾವ್ನಾಸ್ಲೊ. ತೊ ಉರ್ಲೆಲ್ಯಾಂ ರೈಟರಾಂ ವರ್ನಿ ಚಿಕ್ಕೆ ಚಡ್ ಶಿಕ್ಪಿ ಜಾಲ್ಲೊ ಜಾಲ್ಲ್ಯಾನ್ ತಾಕಾ ಚಡಾವತ್ ಒಫಿಸಾಚೆಂ ಕಾಮ್ ಕರುಂಕ್ ಪಡ್ತಾಲೆಂ. ತಶೆಂ ಜಾಲ್ಲ್ಯಾನ್ ತಾಕಾ ‘ಒಫಿಸ್ ರೈಟರ್’ ಮ್ಹಣ್ತಾಲೆ. ಆಮಿಂ ಆಸ್ಚಾ ತೋಟಾಂತ್ ಚಡುಣೆ ತೀಸ್ ಕಾಯಾಮ್ ಕಾಮ್ಗಾರಾಂ ಆಸುಲ್ಲಿಂ ಆನಿ ಹಾಂಚೆ ಖಾತಿರ್ ವಸ್ತೆ ಘರಾಂ ಆಸುಲ್ಲಿಂ. ಹಾಂಕಾ ‘ಲೈನಾಂ’ ಮ್ಹಣ್ತಾಲಿಂ. ರೈಟರಾಂಕ್ ವೊರೆಂ ವಿಂಗಡ್ ಥೊಡ್ಯಾ ಅಂತರಾರ್ ಇಂಡಿಪೆಂಡೆಂಟ್ ಘರಾಂ ಆಸುಲ್ಲಿಂ ತರ್ ಹಿಂ ಲೈನಾಂ ಮ್ಹಣ್ಚಿಂ, ಬೊಂಬಯಾಂತ್ chawl ಮ್ಹಣ್ತಾತ್ ತಶಿಂ ಆಸುಲ್ಲಿಂ. ರೈಲಾ ಬರಿಂ ಲಾಂಬ್ ಆಸೊನ್ ಎಕೇಕ್ ಸಾಲ್, ತಾಕಾ ಲಾಗೊನ್ ರಾಂದ್ಚೆಂ ಕೂಡ್ ಆನಿಂ ಪಾಟ್ಲ್ಯಾನ್ ಥೊಡೊ ಜಾಗೊ ಆಸ್ತಾಲೊ. ಥೈಂ ಆಡೋಸ್ ಕರ್ನ್ ನ್ಹಾಂವ್ಕ್ ಆನಿ ಕುಡಿಚಾ ಗರ್ಜೆಕ್ ಪೃಕೃತಿ. ತ್ಯಾ ವಿಶಿಂ ಬ್ರಿಟಿಶಾಂಕ್ ಯೀ ಕಾಕುಸ್ ಇತ್ಯಾದಿ ಭಾರತೀಯಾಂಕ್ ಗರ್ಜ್ ಮ್ಹಣ್ ಬೋವ್ಶಾ ಭಗುಂಕ್ ನಾ!

ಮ್ಹಾಕಾ ಆತಾಂ ಸಾರ್ಕೊ ಉಡಾಸ್ ನಾ. ಕಾಮೆಲ್ಯಾಂಚಾ ವಸ್ತೆಂತ್ ತೀನ್ ವಿಭಾಗ್ ಆಸುಲ್ಲೆ. ಎಕಾ ವಿಭಾಗಾಂತ್ ದಕ್ಷಿಣ್ ಕನ್ನಡಾಚೆ ಕಾಮೆಲಿ ರಾವ್ತಾಲೆ. ತಾಂತು ದಕ್ಷಿಣ್ ಕನ್ನಡಾಚೆ ದಲಿತ್ (ಬೋವ್ಶಾ ಕೊರ್ಗಾರ್ ಮ್ಹಣ್ತಾತ್ ತೆ).

ದುಸ್ರ್ಯಾ ಲೈನಿರ್ ತಮಿಳ್ ಉಲವ್ಚಿ ದಲಿತ್ ಆನಿ ತಿಸ್ರ್ಯಾ ವಿಭಾಗಾಂತ್ ದೋನ್ ತೀನ್ ಪರ್ಬುಗೆಲಿಂ ಕುಟ್ಮಾಂ. (ಹಾಂತ್ಲ್ಯಾ ಥೊಡ್ಯಾಂಕ್ ದಕ್ಷಿಣ್ ಕನ್ನಡಾಚೆ ‘ನಾಗೆರ್’ ಆನಿ ಥೊಡ್ಯಾಂಕ್ ‘ಪರ್ಬುಲು’ ಮ್ಹಣ್ ಅಪಯ್ತಾಲಿಂ) ಥೊಡಿಂ ದಿವ್ರಾಂಚಿ,

ರೈಟರಾಂಚಾ ಘರಾಂನಿ ವೀಜ್, ನಳ್ ಸೊಡ್ಲ್ಯಾರ್ (ತೆದ್ನಾ ವೀಜ್ ಮಲ್ನಾಡಾಂತ್ಲ್ಯಾತ್ಯಾ ಅಟ್ಟಾಂಗ್ ರಾನಾಂಕ್ ಯೇಂವ್ಕ್ ನಾತ್ಲಿ) ಸಕ್ಕಡ್ ಸವ್ಲತಾಯ್ ಆಸುಲ್ಲಿ. ಲಾಂಕ್ಡಾಂ ದರಬಸ್ತ್ ಮೆಳ್ತಾಲಿಂ. ರೈಟರಾಂ ತಸಲ್ಯಾ ಪ್ರತಿಷ್ಠಿತ್ ವರ್ಗಾಕ್ ವರ್ಸಾನ್ ವರಸ್, ‘ಬೋರರ್’ ಮ್ಹಣ್ಚಾ ಕಿಡ್ಯೆಕ್ ಲಾಗೊನ್ ಹುಮ್ಟುನ್ ಕಾಡ್ಚೆ, ಜಳವಾಕ್ ಸಾಂಗುಲ್ಲೆ ಕಾಫ್ಯೆಚೆ ಬಡ್ಡೆ ತರ್, ಆಳಾಂಕ್, ರೂಕ್ ಕಸಿ ಕರ್ತಾನಾ ಮೆಳ್ಚೆಂ, ವಿಕುನ್ ಉರ್ಲೆಲೆಂ ನಾಕಾರಿ, ಪೊಂಗೆರೆಂ, ರುಮ್ಡಾಂ ರೂಕಾಚೆಂ ಲಾಂಕುಡ್! (ತಾಣಿ ಚೋರ್ನ್ ವೆಲ್ಲೆಂ ಲೇಕ್ ನಾ!)

ಆಮ್ಕಾಂ ವೀಜ್ ನಾತ್ಲೆ ವರ್ವಿಂ ಉದಾಕ್ ವ್ಹಾವೊನ್ ಹಾಡಿಜೆ ಪಡ್ತಾಲೆಂ. ರೈಟರಾಂಕ್ ತಶೆಂ ತೊಟಾಂತ್ಲ್ಯಾ ಆಳಾಂಕ್ ಎಕ್‍ಚ್ ಬಾಂಯ್ ಆಸುಲ್ಲಿ ಆನಿ ತೀ ವೀ ಆಳಾಂಚಾ ಲೈನಾಂ ಮಧೆಂಚ್. ರೈಟರಾಂಚಾ ಘರಾಂಕ್ ಉದಾಕ್ ಭರುಂಕ್ ಸಾಂಜೆ ವೆಳಾ ತೊಟಾಚಾ ಲೆಖಾರ್ ಆಳಾಂಕ್ ಸೊಡ್ಚಿ ರಿಯಾಯ್ತ್ ಆಸುಲ್ಲಿ. ಆಮ್ಚಾ ಘರಾ ನ್ಹಾಣ್ಯೆಚಾ ಬಾಣಾಕ್ ಆನಿ ಎಕಾ ಬ್ಯಾರೆಲಾಕ್ ಆಳಾಂ ಉದಾಕ್ ಭರ್ತಾಲಿಂ ತರ್, ಪಿಯೆಂವ್ಚೆ ಆನಿ ರಾಂದ್ಚೆಂ ಉದಾಕ್ ಮಾತ್ರ್ ಮ್ಹಜಿಂ, ಭಯ್ಣಿ ವ್ಹಾವೊನ್ ಹಾಡ್ತಾಲಿಂ! ತೆಂ ದಲಿತಾಂ ಕರ್ನಾ ಅಶುದ್ಧ್ ಜಾತಾ ಮ್ಹಣೊನ್ ಅಡ್ವಾರ‍್ಲೆಂ.

ಬಾಣಾಕ್ ಉದಾಕ್ ಹಾಡ್ನ್ ಆಯಿಲ್ಲ್ಯಾ ಮ್ಹಾರಾಂಕ್ ನಿಮಾಣೆ ಗೊಡಾಚಿ ಕೊಫಿ ದಿಂವ್ಚಿ ರಿವಾಜ್ ಆಸುಲ್ಲಿ. ತಾಂಚೆ ಖಾತಿರ್‌ಚ್ ಮ್ಹಣೊನ್ ಪಾಕ್ಯಾ ಪಂದಾ ತಾಸುನ್ ಕೆಲ್ಲ್ಯೊ ಕಟ್ಟ್ಯೊ, ಆನಿ ಥೊಡ್ಯಾಂಕ್ ಅಲ್ಯುಮಿನಿಯಮಾಚೆ ಗೊಬ್ಳೆ ಆಸ್ತಾಲೆ. ತೆ ತಿಂ ಘೆವ್ನ್ ರಾವ್ತಾಲಿಂ! ಕೊಣಾಕೀ ಉದಾಕ್ ಜಾಯ್ ತರ್ ತಿಂ ತಾಂಚೆ ದೊನೀ ತಳ್ ಹಾತ್ ಮೆಳವ್ನ್, ತೊಂಡಾಕ್ ತೆಂಕುನ್ ಬಾಗ್ವೊನ್ ರಾವ್ತಾಲಿಂ ಆನಿ ಉದಾಕ್ ವಯ್ರ್ ಥಾವ್ನ್ ವೊತ್ಚೆಂ ಆಸುಲ್ಲೆಂ. ಖಾಂವ್ಕ್ ದಿಂವ್ಚೆ ತಸಲೆಂ ಅಸ್ಲ್ಯಾರ್ ಘರಾ ಪಾಟ್ಲ್ಯಾನ್ ಆಸ್ಚಾ ಕೆಳ್ಬ್ಯಾಂಚೊ ಖೊಲೊಗಿ, ಪೊಲ್ಸಾಚೊ (ಮುತ್ತುಗ) ಖೊಲೊಗೀ ಘೆವ್ನ್ ಯೆತಾಲೆ. ಹೆಂ ಸಗ್ಳೆಂ ಪಳೆವ್ನ್ ಆಸ್ಲೆಲ್ಯಾ ಆಮ್ಕಾಂ ಭುರ್ಗ್ಯಾಂಕ್ ಏಕ್ ತಮಾಸೊ ಕಸೊ ದಿಸ್ತಾಲೆಂ. ಪುಣ್ ಹಿ ಚಾಲ್ತಿ ರಿವಾಜ್ ಮೊಡುಂಕ್ ಕೊಣ್‍ಂಚ್ ಪ್ರಯತನ್ ಕರಿನಾತ್ಲೆ!

ಮ್ಹಾರಾಂಚಾ ಭುರ್ಗ್ಯಾಂ ಸವೆಂ ಭರ್ಸೊಂಕ್ ವ ಖೆಳೊಂಕ್ ಆಮ್ಕಾಂ ಅಡ್ವಾರ್‍ಲ್ಲೆಂ. ಆಮಿಂ ಆಸ್ಚಾ ಎಸ್ಟೆಟಿ ಥಾವ್ನ್ ತೀನ್ ಕಿ.ಮೀ., ಪಯ್ಸ್ ಸರ್ಕಾರಿ ಪ್ರಾತಮಿಕ್ ಇಸ್ಕೊಲ್ ಆಸುಲ್ಲೆಂ. ಹಾಂವ್ ಆನಿ ಮ್ಹಜೆಂ ಭಯ್ಣ್ ಧರುನ್ ಎಸ್ಟೆಟಿಂತ್ಲಿ ತಶೆಂ ಭಂವ್ತಿಲಿಂ ಸಬಾರ್ ಭುರ್ಗಿಂ ತ್ಯಾಚ್ ಇಸ್ಕೊಲಾಕ್ ವೆತಾಲ್ಯಾಂವ್. ಆಮಿಂ ಥೊಡಿಂ ಕ್ರಿಸ್ತಾಂವಾಂ, ಲಿಂಗಾಯತ್, ಒಕ್ಕಲಿಗ ಗೌಡ, ದಲಿತ್ ಇತ್ಯಾದಿ ಭುರ್ಗ್ಯಾಂಚೊ ವ್ಹಡ್ಲೊ ಹಿಂಡ್ ಘರಾ ಥಾವ್ನ್ ಪಯ್ಸ್ ಪಾವ್‍ಲ್ಲೆಂಚ್ ಜಾತ್ ಕಾತ್ ವಿಸ್ರೊನ್ ಒಟ್ಟುಕ್ ಜಾತಾಲ್ಯಾಂವ್!

ಭಾರತಾಂತ್ ಜಾತ್ ಅಶಿ ರೊಂಬೊನ್ ಗೆಲ್ಯಾಕೀ ದಲಿತ್ ಖಂಯ್ಚಾ ಧರ್ಮಾಕ್ ಗೆಲ್ಯಾರೀ, ಕ್ರಿಸ್ತಾಂವ್ ಜಾಲ್ಯಾರೀ ತೆ ದಲಿತ್ ವ ಚಿಕ್ಕೆ rude ಜಾವ್ನ್ ಸಾಂಗ್ಚೆ ತರ್ ‘ಮ್ಹಾರ್’! ವ ನವೆ ಕ್ರಿಸ್ತಾಂವ್ (ಪಪ್ಪಾ ಕಾಮ್ ಕರ್ನ್ ಆಸ್ಚಾ ಕೊಫಿ ತೊಟಾಂತ್ ಗೊರ್ಯಾ ಸಾಯ್ಬಾಚೊ ಡ್ರೈವರ್, ಜಾನ್ ನಾಂವಾಚೊ ತಮಿಳ್ ಜಾವ್ನಾಸ್ಲೊ. (ಹಾಂವೆ ಪಳೆಲ್ಲೆ ಫರ್ಮಾಣೆ ಗೊರ್ಯಾಂಚೆ ಡ್ರೈವರ್ ತಶೆಂ ಬೊಟ್ಲೆರ್ ಚಡಾವತ್ ತಮಿಳ್ ಜಾವ್ನಾಸ್ಲ್ಯಾರ್ ರೈಟರ್ ಪೊರ್ಬು, ಬೊಣ್ಕೆ, ಆನಿ ಕೂರ್ಗಿ ಜಾವ್ನಾಸ್ತಾಲೆ. ತಾಂಚಾ ಶಿಬಂಧೆಂತ್ ಸ್ಥಳೀಯ್ ಕನ್ನಡಾ ಲೋಕ್ ನಾತುಲ್ಲೊಚ್ ಮ್ಹಣ್ಯೆತ್!.

ಆಮ್ಚಾ ತೊಟಾಚಾ ಗೊರ‍್ಯಾ ಮೆನೆಜರಾಚೊ ಡ್ರೈವರ್ ಜಾವ್ನಾಸ್ಲೊ ಜಾನ್. ತೊ ತಮ್ಳಾಂಚೊ. ಪುನ್ ತಾಕಾ ಜಾನ್ ನಾಂವಾನ್ ಕೊಣಂಚ್ ವಳ್ಕಾನಾತ್ಲೆ. ತೊ ‘ತಂಬಿ’ ನಾಂವಾನ್ ಸಕ್ಡಾಂಕ್ ವಳ್ಕಿಚೊ ಜಾಲ್ಲೊ. ತೆದ್ನಾ ಆಮ್ಚಿ ಫಿರ್ಗಜ್ ಜಾವ್ನಾಸ್ಲಿ ಸಕ್ಲೇಶ್ಪುರ್. ಮೊಯ್ನ್ಯಾಕ್ ಏಕ್ ಪಾವ್ಟಿಂ ಎಸ್ಟೆಟಿಚಾ ರಜೆ ದೀಸ್ ಸಕ್ಲೇಶ್ಪುರ್ ಥಾವ್ನ್ ಪಾದ್ರ್ಯಾಬ್ ಆಮ್ಗೆರ್ ಯೇವ್ನ್ ಮೀಸ್ ಭೆಟಯ್ತಾಲೊ. ಎಸ್ಟೆಟಿಚೆ ನಯ್ ಆಸ್ತಾಂ ಹೆಣೆತೆಣೆಚೊ ಕ್ರಿಸ್ತಾಂವ್ ಲೋಕ್ ಆಮ್ಗೆರ್ ಯೆತಾಲೊ. ಸಕ್ಕಡ್ ಪರ್ಭುಂ ಮಧೆಂ ಡ್ರೈವರ್ ತಂಬಿಕ್ ಪಳೆವ್ನ್ ಮಜಾ ಮಮ್ಮಾಕ್ ಅಜಾಪ್. ಎಸ್ಟೆಟಿಂತ್ ತಮಿಳ್ ಉಲಯ್ತೆಲೆ ಸಕ್ಕಡ್ ಮಹರ್ ಜಾವ್ನಾಸ್ಲೆ. ಹೊ ಕಸೊ ಮೀಸಾಕ್ ಆಯ್ಲಾ?! ಕೊಂಕ್ಣಿ ಉಲಯ್ತೆಲೆ ಮಾತ್ರ್ ಕ್ರಿಸ್ತಾಂವ್ ಮಣೊನ್ ತಿಣೆ ಚಿಂತಲ್ಲೆಂ! ಸಬಾರ್ ತೇಂಪ್ ಪರ್ಯಾಂತ್ ತಂಬಿ ಕ್ರಿಸ್ತಾಂವ್ಚೊ ಮಣ್ ತಿ ಪಾತ್ಯೆಲಿಚ್ ನಾ!

ತಶೆಂಚ್ ಆಮ್ಚಾ ಎಸ್ಟೆಟಿಂತ್ ಮಂಗ್ಳೂರ್ ಮೂಳಾಚೊ ದಲಿತ್ ಪಜಿಲ ಆಸುಲ್ಲೊ. ಎಸ್ಟೆಟಿಂತ್ ಸೊಮಾರಾ ದೀಸ್ ಹಫ್ತ್ಯಾಚೊ ಸಾಂಬಾಳ್, ಮುಂಗ್ಳಾರಾ ರಜಾ. ಹಫ್ತ್ಯಾಚಿ ಕೂಲ್ ಘೆತ್ಲೆ ದೀಸ್ ಪಜಿಲ ಟೈಟ್ ಜಾತಾಲೊ. ಅಶೆಂ ಟೈಟ್ ಜಾಲ್ಲ್ಯಾ ವೆಳಾರ್ ತಾಣೆಂಚ್ ಆಮ್ಕಾಂ ಸಾಂಗ್ ಲ್ಲೆಂ ಕೀ ತಾಕಾ ಕೊಣೆಂಗಿ ಪಾದ್ರಿನ್ ಕ್ರಿಸ್ತಾಂವ್ ಕೆಲ್ಲೊ ಖಂಯ್. ತೊ ಪಾದ್ರಿ ವರ್ಗ್ ಜಾವ್ನ್ ಗೆಲ್ಲೊಚ್, ಆಯಿಲ್ಲ್ಯಾ ನವ್ಯಾ ಪಾದ್ರಿನ್ ತಾಚೆರ್ ತಿತ್ಲಿ ಹುಮೆದ್ ದಾಕಂವ್ಕ್ ನಾತ್ಲಿ ಆನಿ ತೊ ‘ಘರ್ ವಾಪ್ಸಿ’ ಜಾಲ್ಲೊ. ತಾಚೆಂ ನಾಂವ್ ಪಾಸ್ಕು ಜಾವ್ನಾಸ್ಲೆಂ ಖಂಯ್. ತೊ ಮಣ್ತಾಲೊ, “ಪರಿನಾಗ ಪಾಸ್ಕು, ಇಜ್ಜಾಂಡ ಪುಸ್ಕು!’ ಆಮಿ ಭುರ್ಗಿಂ ಹಟ್ಟಾರ್ ಪಡೊನ್ ತಾಚೆ ಕರ್ನಾ ‘ಆಮ್ಚಾ ಬಾಪಾ’ ಮಣಯ್ತೆಲ್ಯಾಂವ್ ಆನಿ ತೊ ಆಮ್ಚೆ ವರ್ನಿ ಬರೆಂ ಕರ್ನ್ ಮಣ್ತಾಲೊ!

ಅಸ್ಪೃಶ್ಯಾತಾ ದಲಿತಾಂ ವಯ್ರ್ ಮಾತ್ರ್ ನ್ಹಯ್ ಮಜೆರ್ ಯೀ ಜಾಲ್ಲೊ ಅನ್ಭೋಗ್ ಮ್ಹಾಕಾ ಪಯ್ಲೆಂ ಪಾವ್ಟಿಂ ಚವ್ತೆ ಕ್ಲಾಸಿಂತ್ ಜಾಲ್ಲೊ. ಆಮ್ಚಾ ಘರಾ ಥಾವ್ನ್ ಚಡುಣೆ ತೀನ್ ಕಿ.ಮೀ., ಪಯ್ಸ್ ಮೂಗಲಿ ಮಳ್ಳೆಲ್ಯಾ ಗಾಂವಾಂತ್ಲ್ಯಾ ಸರ್ಕಾರಿ ಇಸ್ಕೊಲಾಂತ್ ಹಾಂವ್ ಆನಿ ಮಜೆಂ ಭಯ್ಣ್ ಶಿಕೊನ್ ಆಸ್ಲೆಲ್ಯಾಂವ್. ಚಾರ್ ಕ್ಲಾಸಿಂಕ್ ಎಕ್ಲೊಚ್ ಮಾಸ್ತೆರ್. ತೊ ಆಮ್ಚೊ ಮೊಗಾಚೊ ಸಾಂಪ್ರಾದಾಯಿಕ್ ಮಾಸ್ತೆರ್. ಕಾಳೊ ಕೋಟ್ ಆನಿ ಧವೆಂ ಪುಡ್ವೆಂ ತಾಚೆಂ ಸದಾಂಚೆ ನೆಸಾಣ್ ಜಾವ್ನಾಸ್ಲೆಂ. ತೊ ಸಕ್ಲೇಶ್ಪುರ್ ಥಾವ್ನ್ ಬಸ್ಸಾರ್ ಯೆತಾಲೊ. ಸಗ್ಳಿಂ ಭುರ್ಗಿಂ ತಾಕಾ ಮಾಂದ್ತಾಲಿಂ. ಆಮಿಂ ಆಸ್ಲ್ಯಾ ಎಸ್ಟೆಟಿ ಥಾವ್ನ್ ಚಡುಣೆ ದೋನ್ ಕಿ.ಮೀ. ಪಯ್ಸ್ ಮೂಗಲಿಕ್ ವೆಚಾ ವಾಟೆರ್ ಸಕ್ಲೇಶ್ಪುರ್ ಥಾವ್ನ್ ಬೇಲೂರ್ ವೆಚೆಂ ಬಸ್ಸ್ ಥಾಂಬ್ತಾಲೆಂ. ಥೈಂ ಥಾವ್ನ್ ಮೂಗಲಿಕ್ ಏಕ್ ಕಿ.ಮೀ. ಆಮಿಂ ಭುರ್ಗಿಂ ಸಕ್ಲೇಶ್ಪುರ್ಚೆಂ ಬಸ್ಸ್ ಯೇಂವ್ಕ್ ರಾಕೊನ್ ರಾವ್ತೆಲ್ಯಾಂವ್. ಮಾಸ್ತೆರ್ ದೆಂವ್ಲ್ಲೊಚ್ ತಾಚಾ ಹಾತಾಂತ್ಲ್ಯೊ ಪೊಟ್ಲ್ಯೊ ಘೆಂವ್ಕ್ ಆಮ್ಕಾಂ ಭುರ್ಗ್ಯಾಂ ಮಧೆಂ ಪೈಪೋಟಿ ಚಲ್ತಾಲಿ. ಏಕ್ ದೀಸ್ ಮಜಾ ಹಾತಾಕ್ ತಾಚ್ಯೊ ದುಸ್ರ್ಯೊ ವಸ್ತು ಕಾಂಯ್ ಮೆಳಾನಾಸ್ತಾನಾ ಹಾಂವೆ ತಾಚಾ ಹಾತಾಂತ್ಲೆಂ ಭುತಿ ಆಸ್ಲೆಲೆಂ ಬೇಗ್ ಘೆವ್ಯಾಂ ಮಣ್ ಧರ್ಚೆಂಚ್ ತಡವ್ ಕೆದ್ನಾಮಯ್ ಸೌಮ್ಯ್ ಸಬಾವಾಚೊ ಮಾಸ್ತೆರ್ ಮ್ಹಜೆರ್ ಎಕ್ದಂ ಚಿಡ್ಲೊ. ತಾಚೆಂ ಸಾವ್ಳೆಂ ತೋಂಡ್ ಪುರ್ತೆಂ ಕಾಳ್ಶೆಲೆಂ. ತಾಣೆ ಮಾಕಾ ಅಸೊ ದೆಂಕ್ಣೊ ಘಾಲೊ ಕೀ ಹಾಂವ್ ಉಡೊನ್ ಪಡ್ಲೊಂ. ಹಾತಾಂತ್ ಬೇತ್ ಆಸ್ಲೆಂ ತರ್ ತೊ ಖಂಡಿತ್ ಮಾರ್ನ್ ಬಡಯ್ತೊ ಕೊಣ್ಣಾ! ಸಕ್ಕಡ್ ಭುರ್ಗಿಂ ಝಗ್ಲಾಣೆ ಮಾರ್ಲೆಲೆ ಬರಿಂ ಎಕ್ದಂ ಥಂಡ್ ಜಾಲಿಂ. ತ್ಯಾ ದೀಸ್ ದನ್ಪರಾ ಮಾಸ್ತೆರ್ ಜೆವ್ಲೊ ನಾ. ತಾಣೆ ಭುತಿಯೆಂತ್ಲೆ ಜೆವಾಣ್ ಭಾಯ್ರ್ ವೊಮ್ತಿಲೆಂ ಮಣೊನ್ ಕಳ್ಳೆಂ! ಹಾಂವೆ, ಶೂದ್ರಾನ್, ತಾಚಾ ಭುತಿಯೆಕ್ ಹಾತ್ ಲಾವ್ನ್ ತಾಚೆಂ ಜೆವಾಣ್ ‘ಮೈಲಿಗೆ’ ಕೆಲ್ಲೆಂ!

ಹಾಸನ್ ಜೆಜ್ವಿತಾಂಚಾ ಬೋರ್ಡಿಂಗಾಂತ್ ಆಸ್ತಾನಾ ಏಕ್ ವಿಭಿನ್ನ್ ‘ಮೈಲಿಗೆ’ ಚೆಂ ಉದಾಹರಣ್ ದೆಕೊಂಕ್ ಮೆಳ್ಳೆಂ. ಆಮ್ಕಾಂ ಬೋರ್ಡಿಂಗಾಂತ್ ಹರ್ಯೆಕಾ ಅಯ್ತಾರಾ ಸಾಂಜೆರ್ ಭಂವೊಂಕ್ ಆಮ್ಕಾಂ ವಾರ್ಡನ್ ಭಾಯ್ರ್ ವ್ಹರ್ತಾಲೊ. ಆಮಿಂ ಭುರ್ಗೆ ಲಾಯ್ನಿರ್ ಶ್ಹೆರಾ ಭಾಯ್ರ್ ವೆತಾಲ್ಯಾಂವ್. ಉಗ್ತ್ಯಾ ಜಾಗ್ಯಾನಿಂ ವಿವಿಧ್ ಖೆಳ್ ಖೆಳೊನ್ ಕಾಳೊಕ್ ಪಡ್ತಾನಾ ಪಾಟಿಂ ಲಾಯ್ನಿರ್ ಬೋರ್ಡಿಂಗಾಕ್ ಯೆತಾಲ್ಯಾಂವ್. ಏಕ್ ಪಾವ್ಟಿಂ ಹಾಸನ್ಚಾ ಎಕಾ ಬ್ರಾಹ್ಮಣ್ ಬೀದಿರ್ ವೆತೆ ಆಸ್ತಾನಾ ಪಬ್ಲಿಕ್ ನಳಾ ಪಂದಾ ಧವರ್ಲೊಲ್ಲೊ ಏಕ್ ಅಮ್ಸಾಣ್ ಪುಸುನ್ ಪಳ ಪಳ ಪೊಲಿಶ್ ಕೆಲ್ಲೊ ತಾಂಬ್ಯಾಚೊ ಕೊಳ್ಸೊ ಉದಾಕ್ ಭರೊನ್ ವೊಮ್ತೊತಾಲೊ. ನಳ್ ಉಗ್ತೊ ಆಸೊನ್ ಉದಾಕ್ ಬೆಷ್ಟೆಂಚ್ ಚರಂಡೆಕ್ ವಾಳ್ತಾಲೆಂ. ಭಂವ್ತಿ ಕೊಣಂಚ್ ದಿಸಾನಾತ್ಲಿಂ. ಆಮ್ಚಾ ಮಧ್ಲ್ಯಾ ಎಕಾ ಚೆರ್ಕ್ಯಾನ್ ಉದಾಕ್ ಬೆಷ್ಟೆಂಚ್ ಚರಂಡೆಕ್ ವ್ಹಾಳೊನ್ ವೆಚೆಂ ದೆಕೊನ್ ವಚೊನ್ ತೊ ನಳ್ ಬಂಧ್ ಕೆಲೊ. ತಿತ್ಲ್ಯಾರ್ ಖಂಯ್ ಆಸುಲ್ಲಿಗಿ ಎಕ್ಲಿ ತಾಂಬ್ಡೆ ಕಪಾಡ್ ನ್ಹೆಸ್‍ಲ್ಲಿ ಬೋರ್ ಮ್ಹಾಂಡೊ ಮ್ಹಾತಾರಿ, ತೊಂಡಾಂತ್ ಉಜೊ ವೊಂಕುನ್, ‘ಸಂಸ್ಕಾರ ಇಲ್ಲದ್ ದರಿದ್ರ ಶೂದ್ರ್ ಮುಂಡೇವು…ಇವ್ರ್…” ಮ್ಹಣಾತ್ತ್ ಭಾಯ್ರ್ ಧಾಂವ್ನ್ ಆಯ್ಲಿ. ತಿಣೆ ಕೊಳ್ಸೊ ಉಕಲ್ನ್ ತಾಂತ್ಲೆಂ ಉದಾಕ್ ಚರಂಡೆಕ್ ಖಾಲಿ ಕೆಲೆಂ ಆನಿ ಕೊಳ್ಸೊ ಪರ್ತ್ಯಾನ್ ಘಾಸುಂಕ್ ಸುರು ಕೆಲೊ ಮಾತ್ರ್ ನೈಂ ನಳ್ ಯೀ ಘಾಸುಂಕ್ ಸುರು ಕೆಲೊ ಆನಿ ಪರ್ತ್ಯಾನ್ ಉದಾಕ್ ಭರುಂಕ್ ಸುರು ಕೆಲೆಂ! ಉದಾಕ್ ಪಾಡ್ ಜಾಂವ್ಚೆಂ ಆಡಾಯ್ಲೆಂ ಮ್ಹಳ್ಳ್ಯಾ ಹೆಮ್ಮ್ಯಾನ್ ಸಂತುಷ್ಟ್ ಜಾಲ್ಲೊ ಆಮ್ಚೊ ಸಾಂಗಾತಿ ಬಾವ್ಡೊ ಎಕ್ದಂ ಬಾವೊನ್ ಗೆಲೊ!

ಪ್ರಾತಮಿಕ್ ಇಸ್ಕೊಲಾಂತ್ ಸೊಡ್ಲ್ಯಾರ್ ಮ್ಹಾಕಾ ವಯುಕ್ತಿಕ್ ಜಾವ್ನ್ ಅಸ್ಪೃಶ್ಯತಾಚಿ ಝಳಕ್ ವಿಚಿತ್ರ್ ಥರಾನ್ ಜಾಲ್ಲಿ. ಕೊಲೆಜಿಂತ್ ಆಸ್ತಾನಾ.

ಹಾಂವ್ ಆನಿ ಮ್ಹಜೊ ಈಶ್ಟ್ ಮಂಜುನಾಥ ದತ್ತ (ಹಾಸನ್ಚೊ ಫಾಮಾದ್ ರಯ್ತ್ ಮುಕೆಲಿ ತಶೆಂ ‘ಜನತಾ ಮಾಧ್ಯಮ’ ದಿಸಾಳ್ಯಾ ಪತ್ರಾಚಾ ಸ್ಥಾಪಕಾಂ ಪೈಕಿ ಎಕ್ಲೊ) ಏಕ್ ಪಾವ್ಟಿಂ ಆಮ್ಚಾ ಎಕಾ ಯುವ ರಾಜಕಾರಣಿ ಮಿತ್ರಾಕ್ ಚನ್ನರಾಯಪಟ್ಟಣಾಚಿ ವಿಧಾನ್ ಸಭಾ ಟಿಕೆಟ್ ದಿವಂವ್ಕ್ ಶಿಫಾರಾಸ್ ಕರಂವ್ಕ್ ಮ್ಹಣೊನ್ ‘ಸ್ವತಂತ್ರ ಪಾರ್ಟಿ’ಚೊ ಪ್ರಮುಕ್ ಹುದ್ದೆದಾರ್ ಜಾವ್ನಾಸ್ಲ್ಯಾ ಹಾರ್ಲೆ ಗಣಪಯ್ಯಾಕ್ ಮೆಳೊಂಕ್ ಸಾಕಾಳಿಂ ಫುಡೆಂಚ್ ತಾಚಾ ಸಕ್ಲೇಶ್ಪುರಾ ಲಾಗ್ಸಿಲ್ಯಾ ಹಾರ್ಲೆ ಎಸ್ಟೆಟಿಕ್ ಗೆಲ್ಯಾಂವ್. ಹಾರ್ಲೆ ಗಣಪಯ್ಯಾ ಕೆದೊ ವಡ್ ಗ್ರೇಸ್ತ್‍ಗಿ ತಿತ್ಲೊಚ್ ಸಾದೊ ಮನಿಸ್. ಆಮ್ಕಾಂ ತಾಣೆ ಆತ್ಮೀಯ್ ಸ್ವಾಗತ್ ಕರ್ನ್ ನಾಸ್ಟ್ಯಾಚೊ ವೇಳ್ ಜಾಲ್ಲ್ಯಾನ್ ಶೀದಾ ತಾಚಾ ಜೆವ್ಣಾ ಸಾಲಿಕ್ ಅಪವ್ನ್ ವ್ಹೆಲೆಂ. ಥೈಂ ಡೈನಿಂಗ್ ಟೇಬಲ್ ನಾತ್ಲೆಂ. ಎಕೆಕ್ಲ್ಯಾನ್ ಬಸ್ಚಾ ಮಾಂದ್ರೆರ್ ಬಸವ್ನ್ ತೊಯ್ ಆಮ್ಚೆ ಸಾಂಗಾತಾ ತ್ಯಾ ದಿಸಾಚೊ ಫಳಾರ್ ಪೊಳೆ ಖಾಂವ್ಕ್ ಸಕಯ್ಲ್ ಬಸ್ಲೊ. ನಾಸ್ಟೊ ತಿರ್ಸೊನ್ ಯೇಂವ್ಕ್ ಕೀ ತಾಕಾ ಫೋನ್ ಯೇಂವ್ಕ್ ಯೀ ಸಾರ್ಕೆಂ ಜಾಲೆಂ. ಲ್ಯಾಂಡ್ ಫೋನಾಂಚೊ ಕಾಳ್ ತೊ. ‘ತುಮಿಂ ಕೊಫಿ ತಿರ್ಸುನ್ ಯೆಯಾ,’ ಮ್ಹಣೊನ್ ತೊ ಉಟೊನ್ ಗೆಲೊ. ಆಮಿಂ ಕೊಫಿ ಪಿಯೆವ್ನ್ ಉಟ್ಲ್ಯಾಂವ್. ಬಹುಶಃ, ಆಮಿಂ ಶೂದ್ರ್ ಮ್ಹಣೊನ್ ಎದೊಳ್‍ಚ್ ಗಣಪಯ್ಯಾಚಾ ರಾಂದ್ಪ್ಯಾನ್ ಪಾರ್ಕಿಲ್ಲೆಂ. ಉಟೊನ್ ಭಾಯ್ರ್ ಸರ್ಚಾ ಆಮ್ಕಾಂ ರಾಂದ್ಪಿ ಆಮ್ಕಾಂ ‘ತುಮ್ಚ್ಯೊ ಉಶ್ಟ್ಯಾಚ್ಯೊ ಶಿರೊತಿ ಭಾಯ್ರ್ ಉಡವ್ನ್ ವಚಾ!’ ಮಣೊನ್ ಎಕಾ ನಮುನ್ಯಾಚಾ ಕಾಂಠಾಳ್ಯಾನ್ ಸಾಂಗಾಲಾಗ್ಲೊ. ಹಾಂವ್ ಚಿಕ್ಡೆ ಭಿಂವ್ಕುರೊ. ಎಕಾ ಕಾನ್ಸುಲಾಕ್ ಮಾರ್ಲ್ಯಾರ್ ದುಸ್ರೊಯ್ ದಾಕಯ್ ಮಳ್ಳಿ ದೊತೊರ್ನ್ ಆಯ್ಕೊನ್ ಆಯ್ಕೊನ್ ಪಯ್ಲೆಂಚ್ ತಯಾರ್ ಜಾಲ್ಲೊಂ ವೆಕ್ತಿ. ಮಜಿ ಶಿರೊತಿ ಕಾಡುಂಕ್ ಮಣೊನ್ ಬಾಗ್ವೊಂಚಾರ್ ಆಸುಲ್ಲೊಂ. ದತ್ತಾನ್ ಮ್ಹಾಕಾ ಆಡಾಯ್ಲೆಂ ಆನಿ ರಾಂದ್ಪ್ಯಾಕ್ ಏಕ್ ಪಾವ್ಟಿಂ ಘುರ್ಕುನ್ ಪಳೆಲೆಂ ಆನಿ ಆಮಿಂ ರಾಂದ್ಚಾ ಕೂಡಾ ಥಾವ್ನ್ ಭಾಯ್ರ್ ಆಯ್ಲ್ಯಾಂವ್!

ಭಾರತಾಂತ್ ಅಸ್ಪೃಶ್ಯತಾ ಕಾಂಯ್ ವ್ಹಡ್ಲಿ ಸಂಗತ್ ವ ನವಿ ನ್ಹಯ್. ಇತ್ಲೆಂ ಬರಂವ್ಕ್ ಕಾರಣ್, ಆಯ್ಲೆವಾರ್ ಹಾಂವೆ ವಾಚ್ಲೊಲೊ ಬೂಕ್ ‘ಕರುಕ್ಕು’ ಕರುಕ್ಕು ಮ್ಹಳ್ಯಾರ್ ತಮಿಳಾಂತ್ ದೊನೀ ಪೊಂತಾನಿಂ ಖೊರ್ವೊಂತಾ ಬರಿಂ ಪಾನಾಂ ಆಸ್ಚೊ ತಾಳ್ಟ್ಯಾ ಜಾತಿಚೊ ರೂಕ್.( Palmyra) ಹ್ಯಾ ಪುಸ್ತಕಾಚಿ ಲೇಕಕಿ ದಲಿತ್ ಸಮುದಾಯಾಚಿ ಬಾಮಾ ಹಿಚಿ ಆತ್ಮಕತಾ ಮ್ಹಣ್ಯೆತ್. ಹೆಂ ಪುಸ್ತಕ್ ತಮಿಳ್ ಥಾವ್ನ್ ಲಕ್ಷ್ಮಿ ಹೊಮ್‍ಸ್ಟ್ರೊಮ್ (Laskshmi Holmstrom) ಹಿಣೆ ಅನುವಾದ್ ಕೆಲಾ. ಹ್ಯಾ ಪುಸ್ತಕಾಕ್ ದೋನ್ ಪಾವ್ಟಿಂ (2001-07) Crossword ಅನುವಾದ್ ಪ್ರಶಸ್ತಿ ಲಾಬೊನ್ ತೆಲುಗು, ಮಲೆಯಾಳಂ ನ್ಹಯ್’ಸ್ತಾಂ ಜರ್ಮನ್, ಫ್ರೆಂಚ್ ತಶೆಂ ಇಂಗ್ಲಿಷ್ ಭಾಸಾಂನಿ ಅನುವಾದಿತ್ ಜಾಲಾ.

‘ಕರುಕ್ಕು’ ತಮಿಳ್‍ನಾಡುಂತ್ಲ್ಯಾ ಪಶ್ಚಿಮ್ ಘಾಟಾಂ ಮಧೆಂ ಆಸ್ಚಾ ಎಕಾ ಹಳ್ಳೆಂತ್ಲೆಂ ಜಿವಿತ್ ಪಿಂತ್ರಾಯ್ತಾ. ವಿಶೇಸ್ ಜಾವ್ನ್ ದಲಿತ್ ಸಮಾಜೆಚೆಂ ದಿಸ್ಪಡ್ತೆಂ ಜಿವಿತ್ ಪಿಂತ್ರಾಯ್ತಾ. ಭಾರತಾಂತ್ಲ್ಯಾ ಸಾಮಾನ್ಯ್ ಹಳ್ಳೆಂ ಬರಿಂ ಹಾಂಗಾಯ್ ವಿವಿಧ್ ಜಾತಿಂಚೊ ಲೋಕ್ ತಾ’ತಾಂಚಾ ಅಲಗ್ ಬೀದಿನಿಂ ಜಿಯೆವ್ನ್ ಆಸಾ. ಹಾಂಗಾಚಾ ಜಾತಿ ವ್ಯವಸ್ಥೆಂತ್ ನಾಯ್ಕರ್ ಜಾತ್ ನಿಸ್ಣಿಚಾ ವಯ್ಲ್ಯಾ ಪಾಂವ್ಡ್ಯಾರ್ ಆಸ್ಲ್ಯಾರ್ ಸಕಯ್ಲ್ಯಾ ಪಾಂವ್ಡ್ಯಾರ್ ಲೇಕಕಿಚಿ ದಲಿತ್ ಜಾತ್.

‘ಕರುಕ್ಕು’ ತಮಿಳ್‍ನಾಡುಂತ್ಲ್ಯಾ ತ್ಯಾ ಹಳ್ಳೆಂತ್ಲ್ಯಾ ಏಕ್ ದಲಿತ್ ತಶೆಂ ಅಸ್ಪರ್ಶ್ಯ್ ಸಮುದಾಯಾಚಾ ಜಿವಿತಾ ವಿಶಿಂ ವಿವರಿತಾ ಮ್ಹಳ್ಯಾರ್ ತ್ಯಾ ಸಂಗ್ತೆಕ್ ಕಿತೆಂ ವಿಶೇಸ್? ಭಾರತಾಂತ್ ಅಸ್ಪ್ರಶ್ಯತಾ ಕಾಂಯ್ ಘುಟಾಚಿ ವ ಲಜೆಚಿ ಗಜಾಲ್ ಬಿಲ್ಕುಲ‍್ ನ್ಹಯ್! ಕರುಕ್ಕು, ವ ದಲಿತ್ ಸಾಹಿತ್ ತಮಿಳಾಂತ್ ನವೆಂಚ್ ತರೀ ಮರಾಠಿಂತ್ ತಶೆಂ ಕನ್ನಡಾಂತ್ ದಲಿತ್ ಸಾಹಿತಾಚಿ ದರಬಸ್ತ್ ಕೃಶಿ ಜಾಲ್ಯಾ. ತರ್, ‘ಕರುಕ್ಕುಂತ್ ಕಿತೆಂ ವಿಶೇಸ್ ಮ್ಹಳ್ಳೆಂ ಸವಾಲ್ ಉದೆತಾ.

‘ಕರುಕ್ಕು’ ಎಕಾ ರೋಮನ್ ಕಥೊಲಿಕ್ ದಲಿತ್ ಸಮಾಜೆಚಿ ಜಿಣ್ಯೆ ಕತಾ ತರೀ ಫಕತ್ ಧಾರ್ಮಿಕ್ ಪಾತ್ಯೆಣೆಚಿ ರೀತ್ ರಿವಾಜ್ ಮಾತ್ರ್ ಬದ್ಲೊನ್ ಸಾಮಾಜಿಕ್ ಜಾವ್ನ್ ಅಸ್ಪ್ರಶ್ಯ್ ಸಮುದಾಯ್ ಜಾವ್ನ್ಂಚ್ ಉರ್ಲೆಲ್ಯಾಂಚಿ ಧಾರುಣ್ ಕತಾ. ತ್ಯಾ ಹಳ್ಳೆಂತ್ಲೆ ಸಕ್ಕಡ್ ದಲಿತ್ ಕ್ರಿಸ್ತಾಂವ್ ತರೀ ತೆ ಅಸ್ಪ್ರಶ್ಯ್ ಕ್ರಿಸ್ತಾಂವ್! ಸದಾಂ ಮಾಗ್ಣೆ, ರಜಾರ್ , ಮೀಸ್, ಕುಮ್ಗಾರ್, ಕುಮ್ಸಾರ್, ನತಾಲ್ ಪಾಸ್ಕ್ , ಸಂಭ್ರಮುಂಚೆ ಅಸ್ಪ್ರಶ್ಯ್ ಕ್ರಿಸ್ತಾಂವ್!

ದಲಿತ್ ಜಿವಿತ್ ಕಿತ್ಲೆಂ ಧಾರುಣ್ ಜಾವ್ನಾಸ್ಲ್ಯಾರಿ, ಬಾಮಾ ಹಟ್ಟಾನ್ ಶಿಕಾಪ್ ಜೊಡ್ತಾ. ಇಂಗ್ಲಿಷ್ ಸಾಹಿತ್ಯಾಂತ್ ಪದ್ವಿ ಅಪ್ಣಾಯ್ತಾ. ಭಾರತಾಂತ್ ದಲಿತ್ ವಯ್ರ್ ಯೇಜೆ ತರ್ ಶಿಕಾಪ್ ಗರ್ಜ್ ಆನಿ ಅಪುಣ್ ಮಾದ್ರ್ ಜಾಲ್ಯಾರ್ ಆಪ್ಲ್ಯಾ ಸಮುದಾಯಚಿ ಸೆವಾ ಕರ್ಯೆತ್ ಮಳ್ಳ್ಯಾ ಚಿಂತ್ಪಾನ್ ಕೊವೆಂತಾಕ್ ಭರ್ತಿ ಜಾತಾ. ಪುಣ್ ಕೊವೆಂತಾಂತೀ ಜಾತಿಯತಾ ದೆಕ್ತಾನಾ ತಿಚಿ ಸಪ್ನಾಂ ಪಿಡ್ಡ್ಯಾರ್ ಜಾತಾತ್. ಸಾತ್ ವರ್ಸಾಂ ನಂತರ್ ತಿ ಮಾದ್ರಿಚೊ ಭೆಸ್ ಸಾಂಡುನ್ ಪಾಟಿಂ ಗಾಂವಾಕ್ ಪರ್ತಾತಾ ಆನಿ ಏಕ್ ಸಾಮಾನ್ಯ್ ಟಿಚೆರ್ ಜಾವ್ನ್ ನವಿ ಜಿಣಿ ಸುರು ಕರ್ತಾ.

■ ಜೆ.ವಿ.ಕಾರ್ಲೊ