‘ಮೈ ಡಿಯರ್ ಫಾದರ್’ ಪದಾಂ ಲೋಕಾರ್ಪಣ್, ಪ್ರೀಮಿಯರ್ ಶೋ ಥಾವ್ನ್ ‘ಸ್ಕೊಲರ್ ಶಿಪ್’

14

ಬೋವ್ ನಿರೀಕ್ಷಿತ್ “ಮೈ ಡಿಯರ್ ಫಾದರ್” ಕೊಂಕ್ಣಿ ಫಿಲ್ಮ್ ಎದೊಳ್‌ಚ್ಚ್ ವ್ಹಡ್ ಆವಾಜ್ ಕರುನ್ ಫುಡೆಂ ವಚುನ್ ಆಸಾ. ಧಾರ್ಮಿಕಾಂ ಖಾತಿರ್ ಆಸಾ ಕೆಲ್ಲ್ಯಾ ಗೌರವ್ ಪ್ರದರ್ಶನಾಂತ್ ವ್ಹಡ್ ಯಶಸ್ವಿ ಜೊಡುನ್ ಉಪ್ರಾಂತ್ ಪುತ್ತೂರಾಂತ್ ಪಯ್ಲ್ಯಾ ಪ್ರೀಮಿಯರ್ ಶೋಂ’ತ್ ಪ್ರೇಕ್ಷಕಾಂ ಥಾವ್ನ್ ಬರ್ಪೂರ್ ಶಾಭಾಸ್ಕಿ ಜೊಡ್ಲಲ್ಯಾನ್ ಲೊಕಾ ಥಂಯ್ “ಮೈ ಡಿಯರ್ ಫಾದರ್” ಫಿಲ್ಮಾ ವಯ್ರ್ ಆತುರಾಯ್ ವಾಡೊನ್ ಆಯ್ಲ್ಯಾ.

ಆದ್ಲ್ಯಾ ಆಯ್ತಾರಾ 2025 ಅಗೋಸ್ತ್ 31 ತಾರಿಕೆರ್ ದೇರಳಕಟ್ಟೆಂತ್ ಚಲ್ಲಲ್ಯಾ ದೊಡ್ಯಾ ಪ್ರೀಮಿಯರ್ ಪ್ರದರ್ಶನಾನಿ ಸಕ್ಕಡ್ ಪ್ರೇಕ್ಷಕಾಂ ಥಾವ್ನ್ ವ್ಹಡ್ ಹೊಗ್ಳಿಕ್ ಫಾವೊ ಜಾಲಿ. ಎಕಾ ಪ್ರದರ್ಶನಾಚಿ ಜವಾಬ್ದಾರಿ “ಮನೋರಂಜನ್ ಮಂಗ್ಳುರ್” ಪಂಗ್ಡಾನ್ ಘೆತ್’ಲ್ಲಿ ತರ್ ದುಸ್ರ‍್ಯಾ ಪರ್ದ್ಯಾರ್ “ಸಾಂಗೊಡಿ ಪೆರ್ಮನ್ನೂರ್” ಪಂಗ್ಡಾನ್ ಪ್ರದರ್ಶನ್ ಆಯೋಜನ್ ಕೆಲ್ಲೆಂ. ದೊನೀ ಸಿನೆಮಾ ಸಾಲಾನಿ ಲೋಕ್ ಭರ್ತಿ ಜಾಲ್ಲೊ.

ಪ್ರದರ್ಶನಾ ಪಯ್ಲೆಂ ವಿಶೇಷ್ ಸಾಧಕಿ ಸಬಿತಾ ಮೋನಿಸ್ ಹಿಣೆ “ಮೈ ಡಿಯರ್ ಫಾದರ್” ಫಿಲ್ಮಾಚಿಂ ಅಪುರ್ಬಾಯೆಚಿಂ ಪದಾಂ ಲೋಕಾರ್ಪಣ್ ಕೆಲಿಂ. ಫಿಲ್ಮಾಚ್ಯಾ ಪದಾಂಚ್ಯಾ ಗಾವ್ಪ್ಯಾಂ ಪಯ್ಕಿಂ ರೊಬಿನ್ ಸಿಕ್ವೇರಾನ್ ಸಾಂಗಾತ್ ದಿಲೊ. ಹ್ಯಾ ವೆಳಾರ್ ಅವಿಲ್ ಡಿಕ್ರೂಜ್ ಮುಖೆಲ್ಪಣಾಚ್ಯಾ ಅರ್ಬನ್ ಗ್ರೂವ್ ಪಂಗ್ಡಾ ಥಾವ್ನ್ ಫಿಲ್ಮಾಚ್ಯಾ ಶಿರೋನಾಮೆ ಗೀತಾಕ್ ಅಪುರ್ಬಾಯೆಚೊ ನಾಚ್ ಸಾದರ್ ಜಾಲೊ. “ಮೈ ಡಿಯರ್ ಫಾದರ್” ಫಿಲ್ಮಾಚಿಂ ಪದಾಂ ಹರ್ಯೆಕಾ ಪ್ರಮುಖ್ ಮಾಂಡಾನಿ ಲಭ್ಯ್ ಆಸಾತ್ ಮ್ಹಣೊನ್ ಕಾರ್ಯಾಚೊ ಸುಂಕಾಣ್ದಾರ್ ಆಲ್ವಿನ್ ದಾಂತಿನ್ ಕಳಯ್ಲೆಂ.

ಸಯ್ರ‍್ಯಾ ಪಯ್ಕಿಂ ವಿಜಯ್ ವೇಗಸ್ ಪೆರ್ಮನ್ನೂರ್, ಡಿಯಲ್ ಜೆರ್ಮಿ ಮೊಂತೇರೊ, ಶ್ರೀಮತಿ ಜೀನ್ ಮೊಂತೇರೊ ಮಂಜೇಶ್ವರ್, ರೂಡಿ ಡಿಸೋಜ ಪೆರ್ಮನ್ನೂರ್, ಸಾಂಗೊಡಿ ಪೆರ್ಮನ್ನೂರ್ ಪ್ರಮುಖ್ ರುಡೋಲ್ಫ್ ಆ್ಯಂಟನಿ ಡಿಸೋಜ ಆನಿ ಕೊಮಿಡಿ ಕಂಪೆನಿ ತರ್ಫೆನ್ “ಮೈ ಡಿಯರ್ ಫಾದರ್” ಫಿಲ್ಮಾಚೊ ಛಾಯಾಗ್ರಾಹಕ್ ಡೇನಲ್ ಜೇಸನ್ ವೆದಿರ್ ಉಪಸ್ಥಿತ್ ಆಸ್’ಲ್ಲೆ.

ಸಾಂಗೊಡಿ ಪೆರ್ಮನ್ನೂರ್ ಪಂಗ್ಡಾನ್ ಆಯೋಜನ್ ಕೆಲ್ಲ್ಯಾ ಪ್ರದರ್ಶನಾ ಥಾವ್ನ್ ಉರುಲ್ಲ್ಯಾ ಐವಜಾ ಥಾವ್ನ್ ಕೊಮಿಡಿ ಕಂಪೆನಿಚ್ಯಾ ಸಾಂಗಾತ್ಪಣಾನ್ ಚೊವ್ಗಾಂ ಭುರ್ಗ್ಯಾಂಕ್ ಶಿಕ್ಪಾ ಕುಮಕ್ ಜಾವ್ನ್ ಸ್ಕೊಲರ್ ಶಿಪ್ ವಿತರಣ್ ಕೆಲೆಂ. ಹ್ಯಾ ವಿಶೇಷ್ ಕಾರ್ಯಾಕ್ ಸಾಕ್ಸ್ ಜಾವ್ನ್ “ಸಾಂಗೊಡಿ” ಪಂಗ್ಡಾಚೆ ಕಾರ್ಬಾರಿ ಲೂಕಸ್ ಡಿಸೋಜ, ಆಲ್ಫ್ರೆಡ್ ಡಿಸೋಜ, ಡೆಮೆಟ್ರಿಯಸ್ ಡಿಸೋಜ, ಗೊಡ್ಫ್ರಿ ಡಿಸೋಜ ಆನಿ ಪೆರ್ಮನ್ನೂರ್ ಗೊವ್ಳಿಕ್ ಪರಿಷದೆಚೊ ಉದಾಧ್ಯಕ್ಷ್ ಅರುಣ್ ಡಿಸೋಜ ಹಾಜರ್ ಆಸ್’ಲ್ಲೆ. ಕಾರ್ಯಾಂತ್ “ಫಾದರ್” ಫಿಲ್ಮಾಚೊ ನಿರ್ದೇಶಕ ನೆಲ್ಲು ಪೆರ್ಮನ್ನೂರ್’ಕ್ ಮಾಂಯ್ ಗಾಂವ್ಚೊ ಸನ್ಮಾನ್ ಆಸಾ ಕೆಲ್ಲೊ.

ಕಲಾಕಾರಾಂ ಪಯ್ಕಿಂ ಪ್ರಕಾಶ್ ಕೆ., ರಾಜೇಶ್ ಮಿಯಾಪದವು, ಜಾಸ್ಮಿನ್ ಡಿಸೋಜ, ವೆನೆಸ್ಸಾ ಮೋರಸ್, ಸುಶಾಂತ್ ಡಿಸೋಜ, ಡೆರಿಲ್ ಡಿಸೋಜ, ಕಲಾ ನಿರ್ದೇಶಕ್ ಜೋಸೆಫ್ ಮೊಂತೇರೊ, ಡ್ರೋನ್ ಮಾಂತ್ರಿಕ್ ಅಮರ್ ವೇಗಸ್, ಪ್ರೊಡಕ್ಷನ್ ಮ್ಯಾನೇಜರ್ ಮರಿಯ ಜೊಯ್ಸ್, ಸಂಕಲನ್‌ಕಾರ್ ರವೀನ್ ಮಾರ್ಟಿಸ್ ಆನಿ ಫಿಲ್ಮಾಂತ್ಲಿ ಅತೀ ಜಾಂಟಿ ಕಲಾಕಾರ್ನ್ 85 ವರ್ಸಾಂಚಿ ಶ್ರೀಮತಿ ಸೆಲೆಸ್ತಿನ್ ಮೊಂತೇರೊ ಹಾಜರ್ ಆಸ್‌ಲ್ಲಿಂ.

ಆಲ್ವಿನ್ ಸಿ. ವೇಗಸಾನ್ ದನ್ಯವಾದ್ ಪಾಟಂವ್ಚ್ಯಾ ಮಾರಿಫಾತ್ ಕಾರ್ಯೆಂ ಅಕೇರ್ ಜಾಲೆಂ. ಫಿಲ್ಮ್ ಪಳೆಲ್ಯಾ ಉಪ್ರಾಂತ್ ಸರ್ವ್ ಪ್ರೇಕ್ಷಕಾನಿ ಫಿಲ್ಮಾ ವಿಶ್ಯಾಂತ್ ಪ್ರಸಂಶಾ ಉಚಾರ್ಲಿ.

ಹ್ಯಾಚ್ಚ್ ಸಪ್ತೆಂಬ್ರಚ್ಯಾ 24 ತಾರಿಕೆರ್ ‘ಮೈ ಡಿಯರ್ ಫಾದರ್’ ಫಿಲ್ಮ್ ಸರ್ವ್ ಭಾರತ್ ಸಿನೆಮಾಸ್ ಮಲ್ಟಿಪ್ಲೆಕ್ಸಾನಿ ಪ್ರದರ್ಶನಾಕ್ ಪಡ್ತಲೆಂ ಮ್ಹಣ್ ಆಯೋಜಕಾನಿ ಕಳಯ್ಲೆಂ.