ಸತ್ ಆಸ್‌ಲ್ಲೆ‌ಕಡೆ ಮೋಗ್ ಆಸಾ – ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ

14

“ಸದಾಂಚ್ ಸತಾಚ್ಯಾ ಪಾಡ್ತಿನ್ ರಾವಾ. ಖಂಯ್ಸರ್ ಸತ್ ಆಸಾ ಥಂಯ್ಸರ್ ಮೋಗ್ ಆಸಾ. ಆನಿ ಜಂಯ್ ಮೋಗ್ ಆಸಾ ಥಂಯ್ ಸತ್ ಆಸಾ” – ಮ್ಹಣಾಲೊ ಮಂಗ್ಳುರ್ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ.

ದೊ| ಸಲ್ಡಾನ್ಹಾ ; ಕೊಂಕಣಿ ಕಥೊಲಿಕ್ ವಕೀಲಾಂಚ್ಯಾ ಸಂಘಾಚ್ಯಾ ಹುದ್ದೆ ಸ್ವೀಕಾರ್ ಸುವಾಳ್ಯಾರ್ ಜೆಪ್ಪು, ಸಾಂತ್ ಅಂತೊನ್ ಆಸ್ರ್ಯಾಚಾ ಕೊಪೆಲಾಂತ್ ಪ್ರಧಾನ್ ಜಾವ್ನ್ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟವ್ನ್ ಪ್ರಸಂಗ್ ದಿತಾಲೊ. ದೊ| ಸಲ್ಡಾನ್ಹಾನ್ ಕೊಂಕಣಿ ಕಥೊಲಿಕ್ ವಕೀಲಾಂಕ್ ದೇವ್ ಸಾಲ್ಮಾಂವ್ ರಾಯಾಚ್ಯಾ ಜಾಣ್ವಾಯೆನ್ ಆನಿ ಪವಿತ್ ಆತ್ಯಾಚ್ಯಾ ಕುರ್ಪೆನ್ ಭರುಂ ಮ್ಹಣ್ ಹ್ಯಾ ಸುವಾಳ್ಯಾರ್ ಬರೆಂ ಮಾಗ್ಲೆಂ. ಧರ್ಮಾಧ್ಯಕ್ಷಾ ಸಾಂಗಾತಾ ದಿಯೆಸೆಜ್ ಆನಿ ಮಿಶೊನರಿ ಮೆಳಾಚ್ಯಾ ಹೆರ್ ನೋವ್ ಯಾಜಕಾಂನಿ ಸಂಭ್ರಮಿಕ್ ಮಿಸಾಚಿ ಸಹಭೆಟವ್ಣಿ ಕೆಲಿ.

ಮಿಸಾಚ್ಯಾ ಬಲಿದಾನಾ ಉಪ್ರಾಂತ್ ಸಂಭ್ರಮ್ ಸಾಲಾಂತ್ ಗೊವ್ಳಿ ಬಾಪಾನ್ ಪ್ರತಿಜ್ಞಾವಿಧಿ ಚಲವ್ನ್ ವೆಲಿ. 2025 ತೆ 2027 ವ್ಯಾ ಆವ್ಧೆಕ್ ಸಂಘಾಚೊ ಅಧ್ಯಕ್ಷ್ ಜಾವ್ನ್ ಸುಶಾಂತ್ ಸಿ.ಎ. ಸಲ್ಡಾನ್ಹಾ, ಉಪಾಧ್ಯಕ್ಷ್ ಜಾವ್ನ್ ಅಲೋಶಿಯಸ್ ಎಸ್ ಲೋಬೊ ಆನಿ ರಿಚರ್ಡ್ ಕೋಸ್ಟಾ ಎಂ. ಕಾರ್ಯದರ್ಶಿ ಜಾವ್ನ್ ಲೋಲಿನಾ ಡಿ ಸೊಜಾ, ಸಹ ಕಾರ್ಯದರ್ಶಿ ಜಾವ್ನ್ ಜೀಟಾ ಪ್ರಿಯಾ ಮೊರಾಸ್, ಖಜಾನ್ದಾರ್ ಜಾವ್ನ್ ರಾಕೇಶ್ ಮಸ್ಕರೇನ್ಹಸ್, ಸಾಂಸ್ಕೃತಿಕ್ ಕಾರ್ಯದರ್ಶಿ ಜಾವ್ನ್ ರೇಶ್ಮಾ ಪ್ರಿಯಾ ಡಿಸೊಜಾ, ಲಿತುರ್ಜಿ ಕಾರ್ಯದರ್ಶಿ ಜಾವ್ನ್ ಭ| ಲಿನೆಟ್ ಪ್ರಿಯಾ ಡಿ ಸೊಜಾ ಹಾಣಿ ಕಾರ್ಯಕಾರಿ ಸಮಿತಿ ಸಾಂದ್ಯಾಂ ಸಾಂಗಾತಾ, ಸಮುದಾಯಾಕ್ ಸೆವಾ ದಿಂವ್ಚ್ಯಾ ದಿಶೆನ್ ಹುದ್ದ್ಯಾಚಿ ಪ್ರತಿಜ್ಞಾ ಘೆತ್ಲಿ.

ಧರ್ಮಾಧ್ಯಕ್ಷ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ದಿವೊ ಪೆಟವ್ನ್ ಕಾರ್ಯಾಕ್ ಚಾಲನ್ ದಿಲೆಂ ಆನಿ ಹುದ್ದೆದಾರಾಂ ಸಾಂಗಾತಾ ವಕೀಲಾಂಚೊಂ ಪಾತ್ರೊನ್ ಸಾಂತ್ ಸಾಂ. ತೋಮಾಸ್ ಮೋರ್ ಹಾಂಚ್ಯಾ ಫಾಯ್ನೆಳಾಕ್ ಫುಲಾಂ ಅರ್ಪುನ್ ನಮಾನ್ ಪಾಟಯ್ಲೊ.

ಹ್ಯಾ ಸಂದರ್ಭಾರ್ ಭರತನಾಟ್ಯಮಾಂತ್ ವಿಶ್ವ ದಾಕ್ಲೊ ರಚ್ಲೆಲ್ಯಾ ಕು| ರೆಮೊನಾ ಇವೆಟ್ ಪಿರೇರಾ, ದಕ್ಷಿಣ ಕನ್ನಡ ಜಿಲ್ಲ್ಯಾಚ್ಯಾ ವಕೀಲಾಂಚೊ ಸಂಘ್ ತಶೆಂ ಬಂಟ್ವಾಳ್ ವಕೀಲಾಂಚ್ಯಾ ಸಂಘಾಚೊ ಅಧ್ಯಕ್ಷ್ ಜಾವ್ನ್ ಚುನಾಯಿತ್ ಜಾಲ್ಲ್ಯಾ ರಿಚರ್ಡ್ ಕೋಸ್ತಾ ಎಮ್, ಪ್ರಧಾನ್ ಸರ್ಕಾರಿ ವಕೀಲ್ ಜಾವ್ನ್ ನೇಮಕ್ ಜಾಲ್ಲ್ಯಾ ಎಮ್. ಪಿ. ನೊರೊನ್ಹಾ – ಹಾಂಕಾ ಶೊಲ್, ಫಳಾಂ – ಫುಲಾಂ, ಮಾನ್ ಪತ್ರ್ ಆನಿ ಯಾದಿಸ್ತಿಕಾ ದೀವ್ನ್ ಮಾನ್ ಕೆಲೊ. ತಶೆಂಚ್ ಪಾಟ್ಲಿಂ ದೋನ್ ವರ್ಸಾಂ ಸಂಘಾಚೊ ಅಧ್ಯಕ್ಷ್ ಜಾವ್ನ್ ಸಂಘ್ ಚಲಯಿಲ್ಲ್ಯಾ ಸಂತೋಷ್ ಪೀಟರ್ ಡಿ ಸೊಜಾ ಹಾಂಚೊಯ್ ಮಾನ್ ಕೆಲೊ.

ಆಪ್ಲ್ಯಾ ಮುಕೆಲ್ ಸಯ್ರ್ಯಾಚ್ಯಾ ಉಲವ್ಪಾಂತ್ ಎಮ್.ಪಿ. ನೊರೊನ್ಹಾ ಹಾಣಿ “ಎಕಾ ಕಾಳಾರ್ ವಕೀಲಿ ವೃತ್ತೆ ವಿಶ್ಯಾಂತ್ ಕಥೊಲಿಕ್ ಸಮುದಾಯಾಂತ್ ಬರಿ ಅಭಿಪ್ರಾಯ್ ನಾತ್ಲಿ. ವಕೀಲ್ ಮ್ಹಳ್ಯಾರ್ ಸತ್ ಆಸ್ಲೆಂ ಫಟಿ ಕರ್ಚೆ ಮನಿಸ್ ಮ್ಹಣ್ ಥೊಡ್ಯಾ ಯಾಜಕಾಂನಿ ಶೆರ್ಮಾಂವಾರ್ ಸಯ್ತ್ ಸಾಂಗ್‌ಲ್ಲೆಂ ಆಯ್ಕೊನ್, ಆಪ್ಣೆ ಕಿತ್ಯಾಕ್ ವಕೀಲಿ ಶಿಕಪ್ ವಿಂಚ್ಲೆಂಗಾಯ್ ಮ್ಹಣ್ ಚುರ್ಚುರೆ ಭೊಗ್‌ಲ್ಲೆ ಆಸಾತ್. ಪೂಣ್ ಸವ್ಕಾಸ್ ಚಿತ್ರಣ್ ಕಶೆಂ ಬದಲ್ಲೆಂ ಮ್ಹಳ್ಯಾರ್ ಆತಾಂ ಯಾಜಕ್ ಆನಿ ಧರ್ಮ್‌ಭಯ್ಣಿಚ್ ವಕೀಲ್ ಜಾತೇ ಆಸಾ. ದೇಶಾಚ್ಯಾ ಸಂವಿದಾನಾನ್ ಸಮಾಜೆಕ್ ಆನಿ ಪ್ರತೇಕ್ ಜಾವ್ನ್ ಆಮ್ಚ್ಯಾ ಸಮುದಾಯಾಕ್ ದಿಲ್ಲಿಂ ಹಕ್ಕಾಂ ರಾಕುಂಕ್ ನ್ಯಾಯಾಂಗಾಂತ್ ಆಮ್ಚೆಂ ಕಾರ್ಯಾಳ್ ಮೆತೆರ್ಪಣ್ ಬೋವ್ ಗರ್ಜೆಚೆಂ. ಶಾಸಕಾಂಗ್, ಕಾರ್ಯಾಂಗ್ ಆನಿ ನ್ಯಾಯಾಂಗ್ – ಹ್ಯಾ ತೀನ್ ಕುಂದ್ಯಾಚೇರ್ ರಾಷ್ಟ್ರಾಚೆಂ ನಿರ್ಮಾಣ್ ಜಾಲಾಂ ಆಸ್ತಾ, ಶಾಸಕಾಂಗಾಂತ್ ಆನಿ ಕಾರ್ಯಾಂಗಾಂತ್ ವೆವೆಗ್ಳ್ಯಾ ಕಾರಣಾಂಕ್ ಲಾಗೊನ್, ಹ್ಯಾ ದಿಸಾಂನಿ ಆಮ್ಚ್ಯಾ ಸಮುದಾಯಾಚೆಂ ಮೆತೆರ್ಪಣ್ ಆಶೆಲ್ಲೆಂ ತಿತ್ಲೆಂ ನಾಂ ಜಾಲಾಂ. ಅಸಲ್ಯಾ ಕಾಳಾರ್ ಆಮ್ಚಿಂ ಹಕ್ಕಾಂ ರಾಕುಂಕ್ ಏಕ್‌ಚ್ ವಾಟ್ ಉರ್ತಾ – ನ್ಯಾಯಾಂಗ್. ಥಿರಾಸಣೆನ್ ಶಿಕಪ್ ಜೋಡ್ನ್ ಅಭ್ಯಾಸ್ ಕೆಲ್ಯಾರ್ ನ್ಯಾಯಾಂಗಾಂತ್ ವೆವೆಗ್ಳ್ಯಾ ಸ್ಥರಾಂನಿ ಆಮ್ಚ್ಯಾ ಸಮುದಾಯಾಚಿ ರಾಕೊಣ್ ಕರುಂಕ್ ಆಮ್ಕಾಂ ಜಾತಾ. ಇತ್ಲೆಂ ಮಾತ್ ನಯ್, ಉದ್ಯೋಗಾಚ್ಯಾ ದಿಶ್ಟಿನ್ ಪಳಯ್ಲ್ಯಾರೀ, ಆಜ್ ಕೊರ್ಪೊರೇಟ್ ಕಾನೂನ್ ಶಾಸ್ತ್ರ್ ಶಿಕೊನ್ ಭಾಯ್ರ್ ಯೆತಾನಾಂಚ್ ಮಯ್ನ್ಯಾಕ್ ಲಾಕಾಂನಿ ಸಾಂಬಾಳಾಚಿ ನವ್ಕರೀಯ್ ಲಾಭ್ತಾ. ದೆಕುನ್ ಆಯ್ಚ್ಯಾ ಯುವಜಣಾಂಕ್ ವಕಾಲತ್ ಏಕ್ ಬರಿ ವ್ಯಾಪ್ತ್ ವಿಂಚವ್ಣ್ ಮ್ಹಣುಂಯೆತಾ” ಮ್ಹಳೆಂ.

ಸಾಂತ್ ಅಂತೊನ್ ಆಸ್ರ್ಯಾಚೊ ದಿರೆಕ್ತೊರ್ ತಶೆಂ ದಿಯೆಸೆಜಿಚ್ಯಾ ಲಾಯಿಕ್ ಆಯೋಗಾಚೊ ನಿರ್ದೇಶಕ್ ಮಾ| ಬಾ| ಜೆ. ಬಿ. ಕ್ರಾಸ್ತಾ ಕಾರ್ಯಾಕ್ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸೊನ್ ನವ್ಯಾನ್ ಚುನಾಯಿತ್ ಜಾಲ್ಲ್ಯಾ ಆಡಳ್ತ್ಯಾ ಸಮಿತಿಕ್ ತಶೆಂ ಸಾಂದ್ಯಾಂಕ್ ಬರೆಂ ಮಾಗ್ಲೆಂ ಆನಿ ಆಪ್ಲೊ ಭರ್ಪೂರ್ ಸಹಕಾರ್ ಭಾಸಾಯ್ಲೊ. ಕಾರ್ಯಾಚೊ ಅಧ್ಯಕ್ಷ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ನವ್ಯಾನ್ ಚುನಾಯಿತ್ ಜಾಲ್ಲ್ಯಾ ಆಡಳ್ತ್ಯಾ ಮಂಡಳೆಕ್ ಬರೆಂ ಮಾಗ್ಲೆಂ.

ಸಾಂ ಲುವಿಸ್ ಶಿಕ್ಪಾ ಸಂಸ್ತ್ಯಾಂಚೊಂ ರೆಕ್ಟರ್ ಮಾ| ಬಾ| ಮೆಲ್ವಿನ್ ಪಿಂಟೊ, ಜೆ.ಸ, ಎಂ.ಸಿ.ಸಿ. ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊ ಆನಿ ದಿರೆಕ್ತೊರ್, ಕೊರ್ಪೊರೇಟರ್ ನವೀನ್ ಡಿ ಸೊಜಾ, ಪೋರ್ ವಿಂಡ್ಸ್ ಕಮ್ಯುನಿಕೇಶನ್ ಹಾಚೊ ಮ್ಹಾಲಕ್ ಎಲಿಯಾಸ್ ಸೊಜ್ ಆನಿ ಹೆರ್ ಮಾನೆಸ್ತ್ ಕಾರ್ಯಾಕ್ ಹಾಜರ್ ಆಸ್ಲೆ.

ಸಂಘಾಚೊ ಅಧ್ಯಕ್ಷ್ ಸುಶಾಂತ್ ಸಿ. ಎ. ಸಲ್ಡಾನ್ಹಾ ಹಾಣೆ ಯೆವ್ಕಾರ್ ಮಾಗ್ಲೊ. ಕಾರ್ಯದರ್ಶಿ ಲೋಲಿನಾ ಡಿ ಸೊಜಾ ಹಿಣೆ ದಿನ್ವಾಸ್ ಪಾಟಯ್ಲೆ. ಮಾ| ಬಾ| ವಿನೋದ್ ಮಸ್ಕರೇನ್ಹಸ್ ಹಾಣಿ ಜೆವ್ಣಾಚೆರ್ ಆಶೀರ್ವಾದ್ ಮಾಗ್ಲೆಂ.