“ಫಾದರ್ ಆಮಿ ಸರ್ವಧರ್ಮ ಮೊಂತಿ ಫೆಸ್ತ್ ಆಚರಣ್ ಕರ‍್ಯಾಂಗೀ?” ಮ್ಹಣ್ತಾನಾ ವಿಗಾರ್ ‘ಹೆ ಹೆ ಹೆ’ ಕರ‍್ನ್ ಜೋರಾನ್ ಹಾಸಾಲಾಗ್ಲೊ. ತೆದ್ನಾಂ ಮ್ಹಾಕಾ ಉಪಾಧ್ಯಕ್ಷಾನ್ ಸಾಂಗ್‌ಲ್ಲ್ಯಾ ಉತ್ರಾಂಚೊ ಉಡಾಸ್ ಆಯ್ಲೊ. ಜರ್ ವಿಗಾರ್ ಜೋರಾನ್ ‘ಹೆ ಹೆ ಹೆ’ ಕರ‍್ನ್ ಹಾಸ್ತಾ ತರ್ ತಾಚೊ ರಾಗ್ ತಳ್ಮಾಟ್ಯಾಕ್ ಚಡ್ಲಾ ಮ್ಹಣ್ ಅರ್ಥ್. ಬಾಬ್‌ರೇ ಬಾಬ್. ಛೆ. ಮ್ಹಜೊ ಬಾಬ್ ಪಯ್ಲೆಂಚ್ ಪುಕ್ಕೆಲಾ ಜಾಲ್ಲ್ಯಾನ್ ತಾಚೆಂ ನಾಂವ್ ಕಾಡ್ನ್ ಧಯ್ರ್ ಮೆಳಾತ್ ಮ್ಹಣ್ ಗ್ಯಾರಂಟಿ ನಾತ್‌ಲ್ಲಿ. ಅತಾಂ ಕರ‍್ಚೆಂ ಕಿತೆಂ. ದುಸ್ರೊ ಉಪಾಯ್ ನಾಸ್ತಾಂ ಹಾಂವ್‌ಯೀ ಜೋರಾನ್ ‘ಹೆ ಹೆ ಹೆ’ ಕರ‍್ನ್ ಹಾಸಾಲಾಗ್ಲೊಂ.
ಹಾಂವ್‌ಯೀ ‘ಹೆ ಹೆ ಹೆ’ ಕರ‍್ನ್ ಹಾಸ್ಚೆಂ ಪಳೆವ್ನ್ ವಿಗಾರಾನ್ ಕಿತೆಂಗೀ ಚಿಂತ್ಲೆಂ ಆನಿ ತೊ ಮಾತ್ಸೊ ಶಾಂತ್ ಜಾವ್ನ್ ಯೆಂವ್ಚೊ ದಿಸ್ಲೊ. ತೊ ಮ್ಹಾಕಾಚ್ ಪಳೆಂವ್ಚ್ಯಾರ್ ಪಡ್ಲೊ. ಇಸ್ಕೊಲಾಂತ್ ಮೈನಸ್ ಮೈನಸ್ ಇಸ್ ಇಕ್ವಲ್ ಟು ಪ್ಲಸ್ ಮ್ಹಣ್ ಆಯ್ಕಾಲ್ಲೆಂ. ತಶೆಂ ಮ್ಹಜೊ ರಾಗ್ ಆನಿ ವಿಗಾರಾಚೊ ರಾಗ್ ಸಾಂಗಾತಾ ಮೆಳೊನ್ ಶಾಂತ್ ವಾತಾವರಣ್ ರುತಾ ಜಾಲೆಂ ಜಾಯ್ಜಯ್. ಪೂಣ್ ಮ್ಹಾಕಾ ರಾಗ್ ಖಂಯ್ ಆಯಿಲ್ಲೊ? ಹಾಂವ್ ಭಿಯೆಲ್ಲೊಂ.
“ಹೆಂ ಸರ್ವಧರ್ಮ ಮೊಂತಿಫೆಸ್ತ್ ಕಿತ್ಯಾಕ್ ಜಾಯ್ ಆಮ್ಕಾಂ? ಹಾಚಿ ಗರ್ಜ್ ತರೀ ಕಿತೆಂ? ಸಾಂಗಾತಾ ಜೇವ್ನ್ ಸಾಂಗಾತಾ ವಾಯ್ ಸೊಡಿಜೆ ಮ್ಹಣ್ಚೆಂಗೀ ತುವೆಂ. ಅಶೆಂ ಕೆಲೆಂ ತರ್ ಯೆಂವ್ಚಿ ಘಾಣ್ಂಚ್”
“ತಶೆಂ ನ್ಹಯ್ ಫಾದರ್. ಹರ‍್ಯೇಕಾ ವರ್ಸಾ ಆಮ್ಚೆ ಸಮಡ್ತಿ ಭಿತರ್‌ಚ್ ಮೊಂತಿ ಫೆಸ್ತ್ ಆಚರಣ್ ಕರ‍್ನ್ ತೆಂಚ್ ರಾಜಾಂವ್ ಜಾಲಾಂ. ಹ್ಯಾ ಪಾವ್ಟಿಂ ಆಮಿ ಏಕ್ ಮೇಟ್ ಮುಕಾರ್ ವಚೊನ್ ಹೆರ್ ಧರ್ಮಾಂಚ್ಯಾ ಸಾಂಗಾತಾ ಆಚರಣ್ ಕರ‍್ನ್ ಇತಿಹಾಸ್ ರಚ್ಯಾಂ.” ಹಾಂವೆಂ ಮ್ಹಜೆ ಚಾರ್ ವಿಚಾರ್ ವಿಗಾರಾ ಮುಕಾರ್ ಉಚ್ಚಾರ್ ಕೆಲೆ.
“ತುಂ ಮ್ಹಣ್ತಾಯ್ ವ್ಹಯ್ ಸಾಯ್ಬಾ. ಫಾಲ್ಯಾಂ ಕಿತೆಂಯ್ ಚಡುಣೆಂ ಘಡಾತ್ ತರ್ ಉಪ್ರಾಂತ್ ಕೊಣಾಕ್ ಜಾಯ್ ಹೆ ರಗ್ಳೆ?”
“ತಶೆಂ ಕಾಂಯ್ ಘಡ್ಚೆಂ ನಾ ಫಾದರ್. ವಯ್ಲ್ಯಾನ್ ತುಮ್ಚೆಂ ಹ್ಯಾ ಫಿರ್ಗಜೆಂತ್ ಅಖ್ರೇಚೆಂ ವರಸ್ ನೇ, ಕಾಂಯ್ ಚಡುಣೆಂ ಘಡ್ಲೆಂ ತರ್ ಏಕ್ ವರಸ್ ಕಶೆಂಯ್ ಲೊಳೊನ್ ನವ್ಯಾ ಯೆಂವ್ಚ್ಯಾ ವಿಗಾರಾಚಾ ಮಾತ್ಯಾರ್ ಘಾಲ್ಯಾಂ.”
“ಮ್ಹಣ್ಜೆ ಚಡುಣೆ ಜಾಂವ್ಚೊ ಸಂಭವ್ ಆಸಾ ಮ್ಹಣ್ಚೊ ತುವೆಂ”
“ಬಿಲ್ಕುಲ್ ನಾ. ತಶೆಂ ಆಮ್ಕಾಂ ಮರಿ ಮಾಂಯ್ ರಾಕ್ತೆಲಿ ಫಾದರ್. ಸಕ್ಕಡ್ ಜಾತಿಚೆ ತಾಂಚಿ ಫೆಸ್ತಾಂ ಹೆರ್ ಜಾತಿಚ್ಯಾಸಂಗಿಂ ಆಚರ‍್ಸಿತಾನಾ ಆಮಿ ಬಿಲ್ಕುಲ್ ಪಾಟಿಂ ಉರಾನಾಯೆ.” ಅತಾಂ ಮ್ಹಜೊ ತಾಳೊ ವ್ಹಡ್ ವ್ಹಡ್ ಜಾವ್ನ್ ಯೆತಾಲೊ.
ತಿತ್ಲ್ಯಾರ್ ವಿಗಾರಾನ್ ಮೆಜಾವಯ್ಲೆಂ ಮೊಡ್ತೆಲ್ ಕಾಡ್ನ್ ಹಾತಿಂ ಧರ‍್ಲೆಂ ಆನಿ ಮ್ಹಾಕಾಚ್ ಪಳೆವ್ನ್ ಸಾಂಗಿಲಾಗ್ಲೊ
“ಅಳೆ ಸಿಕೇರಾಮಾ, ಹಿಂ ಫೆಸ್ತಾಂ ಆಚರಣ್ ಭೆಷ್ಟಿಂ. ಮನ್ಶಾನ್ ಫಕತ್ ಹ್ಯಾ ಸಂಸರಾಂತ್ ಜಿಯೆಲ್ಯಾರ್ ಜಾಲೆಂ. ಗರ್ಜೆಭಾಯ್ಲಿಂ ಗಮ್ಮತಾಂ ಆಡಾಯ್ಜಯ್”
ವಿಗಾರಾಚ್ಯಾ ಹಾತಾಂತ್ ಮೊಡ್ತೆಲ್ ಆನಿ ತಾಣೆಂ ಉಲಂವ್ಚೆಂ ಪಳೆವ್ನ್ ವಿಚಾರ‍್ಲೆಂ “ಫಾದರ್, ತುಮಿ ಕಮ್ಯುನಿಷ್ಟ್‌ಗೀ?”
ವಿಗಾರಾಚೆ ದೊಳೆ ತಾಂಬ್ಡೆ ತಾಂಬ್ಡೆ ಜಾಲೆ
“ಸಿಕೇರಾಮಾ ತುಂ ಮಿಸಾಕ್ ಯೆತಾಯ್‌ಮೂ? ಕ್ರಿಸ್ತಾಂವ್‌ಮೂ? ಹಾಂವ್ ಇತ್ಲ್ಯಾ ವರ್ಸಾಂಥಾವ್ನ್ ಹ್ಯಾ ಇಗರ್ಜೆಂತ್ ಕಿತೆಂ ಸಾಂಗೊನ್ ಆಸಾಂ?”
“ತೆಂಚ್ ಫಾದರ್ ಹೊಲಾಕ್ ದಾನ್ ದಿಯಾ, ಇಸ್ಕೊಲಾಕ್ ದಾನ್ ದಿಯಾ, ಫುಲಾಂ ಉಡಂವ್ಚ್ಯಾ ಭುರ್ಗ್ಯಾಂಕ್ ಮಿಟಾಯ್ ದಿಯಾ”
“ಮ್ಹಣ್ಜೆ ತುವೆಂ ಮಿಸಾಕ್ ಯೆಂವ್ಚೆಂ ‘ಆಯ್ಕಾ’ ಎನಾಂವ್ಸ್ ಕರ‍್ತಾನಾಂಗೀ? ತಾಚ್ಯಾ ಪಯ್ಲೆಂ ತುವೆಂ ಕಿತೆಂಚ್ ಆಯ್ಕೊಂಕ್ ನಾಂಯ್‌ಗೀ?”
“ತಾಚ್ಯಾ ಪಯ್ಲೆಂ ತುಮಿಂ ಖಂಚ್ಯಾ ವಾಡ್ಯಾಂತ್ ‘ವಾಡ್ಯಾ ಜಮತಿ’ ಆಸ್ತಾತ್ ಮ್ಹಣ್ ಸಾಂಗ್ಚೆಂ ನೇ ಫಾದರ್?”
“ಹೆಂಚ್, ಹೆಂಚ್ ಆಮ್ಚೆಂ ಉಣೆಂಪಣ್. ಆಮಿ ಖಂಯ್ಚ್ಯಾಕ್ ಗುಮಾನ್ ದೀಜಾಯ್‌ಗೀ ತಾಕಾ ದೀನಾಂವ್, ಖಂಯ್ಚೆಂ ಆಯ್ಕಾಜೆಗೀ ತೆಂ ಆಯ್ಕಾನಾಂವ್. ಗರ್ಜ್ ನಾತ್‌ಲ್ಲ್ಯಾ ಸಂಗ್ತಿಂಕ್ ಆಂಗಾರ್ ವೋಡ್ನ್ ಘೆತಾಂವ್.” ಅಶೆಂ ಮ್ಹಣ್ ತಾಣೆಂ ತಾಚ್ಯಾ ಹಾತಾಂತ್ ಆಸ್‌ಲ್ಲೆಂ ಮೊಡ್ತೆಲ್ ದಿವೊಡ್ ಹಾತಾಂತ್ಲೊ ಉಡಯಿಲ್ಲ್ಯಾಬರಿಂ ಉಡಯ್ಲೆಂ. ಉಪ್ರಾಂತ್ ತಾಣೆಂ ಬೊಲ್ಸಾಂತ್ ಹಾತ್ ಘಾಲೊ ಆನಿ ಕೋಂತ್ ಭಾಯ್ರ್ ಕಾಡ್ಲೆಂ.
“ಹಾಂವೆಂ ತೇರ‍್ಸ್ ಮ್ಹಣ್ಚೊ ವೇಳ್ ಜಾಲೊ. ಹಾಂವ್ ತುಜೆಲಾಗಿ ಉಪ್ರಾಂತ್ ಉಲಯ್ತಾಂ.” ವಿಗಾರ್ ಚುಕಾರಿ ಮಾರುಂಕ್ ಸೊಧ್ತಾಲೊ.
ತಿತ್ಲ್ಯಾರ್ ಮ್ಹಜೆಂ ಫೋನ್ ವಾಜ್ಲೆಂ. ಹಾಂವೆಂ ತೆಂ ಫೋನ್ ಕಾಡಿಜೆಚ್ ಪಡ್ಲೆಂ. ದುಸ್ರೊ ಉಪಾವ್ ನಾತ್‌ಲ್ಲೊ. ಹಾಂವೆಂ ಫೋನಾರ್ “ನಾಕಾ ನಾಕಾ ಸಾಯ್ಬಾ. ಆಮ್ಕಾಂ ಧಾ ಲಾಖ್ ನಾಕಾತ್. ಫಿರ್ಗಜ್ ವಿಗಾರ್ ಸರ್ವಧರ್ಮ ಮೊಂತಿ ಫೆಸ್ತ್ ಆಚರ‍್ಸುಂಕ್ ಪರ್ವಣ್ಗಿ ದಿತೇ ನಾ. ದೆಕುನ್ ಹೆಂ ಪ್ರೊಜೆಕ್ಟ್ ಕ್ಯಾನ್ಸಲ್ ಕರ‍್ಚೆಂ ಬರೆಂ. ಐ ಎಮ್ ಸೊರ್ರಿ” ಮ್ಹಣೊನ್ ಫೋನ್ ದವರ‍್ಲೆಂ.
ಮ್ಹಜಿಂ ಉತ್ರಾಂ ಆಯ್ಕೊನ್ ವಿಗಾರ್ ಥಂಯ್ಚ್ ಸ್ಟ್ಯಾಚು ಜಾಲೊ. ಉಪ್ರಾಂತ್ ಪಾಟಿಂ ಘುಂವ್ಲೊ ಆನಿ ಮ್ಹಜೆಸರ್ಶಿಂ ಆಯ್ಲೊ.
“ಸಿಕೇರಾಮಾ ಹೆಂ ಕಿತೆಂ ತುಂ ಉಲವ್ನ್ ಆಸ್‌ಲ್ಲೊಯ್. ಸರ್ವಧರ್ಮ ಮೊಂತಿಫೆಸ್ತ್ ಆಚರಣ್ ಕೆಲ್ಯಾರ್ ಆಮ್ಕಾಂ ಧಾ ಲಾಖ್ ಮೆಳ್ತಾತ್‌ಗೀ? ಕೋಣ್ ದಿತಾ?”
“ವ್ಹಡ್ ನಾ ಫಾದರ್, ತುಮ್ಕಾಂ ತೆರ‍್ಸಾಕ್ ವೇಳ್ ಜಾಲೊ ನೇ. ಆಮಿಂ ಉಪ್ರಾಂತ್ ಉಲವ್ಯಾಂ.”
“ತಶೆಂ ಮರಿ ಮಾಂಯ್ಕ್ ಬೆಜಾರ್ ಕರ‍್ನ್ ತೇರ‍್ಸ್ ಭೆಟಯ್ಲೊ ತರ್ ತಿಕಾ ತೊ ಮಾಂದ್ಚೊನಾ. ತಿಚಿ ಆಶಾ ಹ್ಯಾ ಪಾವ್ಟಿಂ ಸರ್ವಧರ್ಮ ಮೊಂತಿ ಫೆಸ್ತ್ ಆಚರಣ್ ಕರ‍್ಚಿ ತರ್ ತಿ ಆಮಿ ಜರೂರ್ ಜ್ಯಾರಿಯೆಕ್ ಹಾಡಿಜಾಯ್.”
“ತಶೆಂ ತರ್ ಪರ್ವಣ್ಗಿ ಮೆಳ್ತಾಗೀ ಫಾದರ್?”
“ಪರ್ವಣ್ಗಿ ದೀಜೆ ತರ್ ಹಾಂವೆಂ ಗೊವ್ಳಿಕ್ ಮಂಡಳಿಂತ್ ಹೊ ವಿಶಯ್ ದವ್ರಿಜಾಯ್. ಪೂಣ್ ತಾಂಕಾಂ ಹಾಂವ್ ವ್ಹಯ್ ಕರ‍್ತಾಂ. ತುಂ ಹೆಂ ಸಾಂಗ್ ಹೆ ಧಾ ಲಾಖ್ ಕೋಣ್ ದಿತಾ?”
“ತೆಂ ಫಾದರ್ ಸರ್ಕಾರಾನ್ ಆಮಿ ಖಂಚೆಯ್ ಫೆಸ್ತ್ ಸರ್ವಧರ್ಮ ಸಾಂಗಾತಾ ಆಚರಣ್ ಕೆಲೆಂ ತರ್ ಧಾ ಲಾಖ್ ದಿತಾ ಮ್ಹಣ್ ಭಾಸಾಯ್ಲಾಂ. ಕರಿನಾ ತರ್ ದಿಂವ್ಚೆನಾಂತ್.”
“ವ್ಹಯ್‌ಗೀ ಕಿತೆಂ. ತಶೆಂ ತರ್ ಆಜ್‌ಚ್ ಸಾಂಜೆರ್ ಮೀಟಿಂಗ್ ಆಪವ್ನ್ ಹೊ ವಿಶಯ್ ಇತ್ಯರ್ಥ್ ಕರ‍್ಯಾಂ. ಪೂಣ್ ಸಿಕೇರಾಮಾ ಏಕ್ ವಿಶಯ್ ಮ್ಹಜೆ ಆನಿ ತುಜೆ ಮಧೆಂ ಮಾತ್ರ್ ಆಸೊಂದಿ. ಆಮಿ ಅನಾವಶ್ಯಕ್ ಕಿತೆಂಚ್ ಖರ್ಚ್ ಕರ‍್ಚೊ ನಾಕಾ. ಖರ್ಚ್ ದೋನ್-ತೀನ್ ಲಾಖಾಂ ಭಿತರ್‌ಚ್ ಆಸೊಂದಿ. ಬಾಕಿಚ್ಯಾ ಪಯ್ಶಾನಿಂ ಆಮ್ಚೊ ಪುರಾತನ್ ಗ್ರೊಟ್ಟೊ ನವೊ ಕರ‍್ನ್ ಬಾಂಧ್ಯಾಂ. ಹ್ಯಾ ಮೊಂತಿ ಫೆಸ್ತಾ ವೆಳಾರ್ ಹೊ ಏಕ್ ಭಾಂಗ್ರಾಳೊ ಆವ್ಕಾಸ್ ಆಮ್ಕಾಂ.”
“ಜಾಯ್ತ್ ಫಾದರ್, ತುಮಿಂ ತುರ‍್ತ್ ಮೀಟಿಂಗ್ ಆಪಯಾ. ಹಾಂವ್ ಸರ್ವಧರ್ಮ ಮೊಂತಿ ಫೆಸ್ತಾಚಿ ತಯಾರಾಯ್ ಕರ‍್ತಾಂ.”
***
ಸಾಂಜೆರ್ ಪಾಂಚ್ ವೊರಾರ್ ಗೊವ್ಳಿಕ್ ಮಂಡಳಿಚೆಂ ಮೀಟಿಂಗ್ ಆರಂಭ್ ಜಾಲೆಂ. ವಿಗಾರಾನ್ ಸಿಕೇರಾಮಾನ್ ದಿಲ್ಲೊ ಪ್ರಸ್ತಾಪ್ ಮಂಡಳೆರ್ ದವರ‍್ಲೊ. ಸಿಕೇರಾಮ್ ಅತಾಂ ಆಸ್ಚ್ಯಾ ಸರ್ಕಾರಾಚ್ಯಾ ಪಾಡ್ತಿಚೊ ಖಾಸ್ ವ್ಯಕ್ತಿ ಆನಿ ಮಿನಿಸ್ಟರಾಸಂಗಿಂ ತಾಚೆಂ ಉಟ್ಚೆಂ, ಬಸ್ಚೆಂ, ಚಾಬ್ಚೆಂ, ಲೆಂವ್ಚೆಂ ಆಸ್‌ಲ್ಲ್ಯಾನ್ ತಾಣೆಂ ಸಾಂಗ್ಚ್ಯಾ ಉತ್ರಾಂಚೆರ್ ಸರ್ವಾಂಕ್ ಪಾತ್ಯೆಣಿ ಆಸ್‌ಲ್ಲಿ. ವಿಶಯ್ ಆಯ್ಕೊನ್ ಮುಕ್ಕಾಲ್ ಮಂಡಳೆಕ್ ಹೆಂ ಸರ್ವಧರ್ಮ ಮೊಂತಿ ಫೆಸ್ತ್ ನಾಕಾ ಮ್ಹಣ್ ಭೊಗ್ಲೆಂ. ಕಿತ್ಯಾಕ್ ಕಾಂಯ್ ಚಡುಣೆಂ ಘಡ್ಲೆಂ ತರ್, ಗಲಾಟೊ ಜಾಲೊ ತರ್, ಕೋಮುವಾದಾಚೊ ಉಜೊ ಪೆಟ್ಲೊ ತರ್ ಮಾರ್ ಪಡ್ತಿತ್ ಮ್ಹಣ್ ಭಿಯೆಲೆ. ತಾಣಿಂ ‘ಹೆಂ ಪೂರಾ ಕಚ್ಚಾಟ್ ಆಮ್ಕಾಂ ನಾಕಾ ಫಾದರ್’ ಮ್ಹಣ್ತಾನಾ ವಿಗಾರಾಕ್ ತಾಂಚೆರ್ ರಾಗ್ ಉಬ್ಜಾಲೊ. ಹೆ ಸಕ್ಕಡ್ ಗೊವ್ಳಿ ನಾತ್‌ಲ್ಲ್ಯಾ ಶೆಳಿಯಾಂಬರಿಂ ಆಸಾತ್ ಮ್ಹಣ್ ತಾಕಾ ಭೊಗ್ಲೆಂ. ತಾಚಿ ದೀಷ್ಟ್ ಭಾಯ್ರ್ ಗೆಲಿ ತೆದ್ನಾಂ ತಾಕಾ ಪಯ್ಸ್ ಪರ್ನೊ ಇಗರ್ಜೆಚೊ ಗ್ರೊಟ್ಟೊ ದಿಸ್ಲೊ. ಹ್ಯಾ ಸರ್ವಧರ್ಮಚ್ಯಾ ನಾಂವಾನ್ ಮರಿಯೆಕ್ ಏಕ್ ಗ್ರೊಟ್ಟೊ ಆಸಾ ಕರ‍್ಯೆತ್ ಮ್ಹಳ್ಳಿ ತಾಚಿ ಆಶಾ ಜಾಗಿ ಜಾಲಿ. ತೊ ಮ್ಹಣಾಲೊ.
“ಆಯ್ಕಾ ಮೊಗಾಚ್ಯಾನೊಂ. ಆಮಿಂ ಅಶೆಂ ಭಿಂಯಾನ್ ಬಸ್ಲ್ಯಾರ್ ಜಾಯ್ನಾ. ಇಲ್ಲೆಂ ಧಯ್ರ್ ಕಾಣ್ಘೆಯಾಂ. ಮರಿ ಮಾಂಯ್ ಆಮ್ಕಾಂ ರಾಕ್ತೆಲಿ. ಆಮಿಂ ಸಮಾಜೆಂತ್ ಜಿಯೆವ್ನ್ ಆಸ್ತಾನಾ ಬಾವ್-ಬಾಂಧವ್ಪಣಾಬರಿಂ ಆಸಾಜೆ. ವಯ್ಲ್ಯಾನ್ ಆಮಿ ಶಾಂತಿಚೆ ಮನಿಸ್. ಕಿತೆಂಯ್ ಜಾಲ್ಯಾರ್ ಸಮಾಧಾನ್ ಸಾಂಬಾಳ್ಯಾಂ. ಎಕಾ ಪೊಲ್ಯಾರ್ ಮಾರ‍್ಲ್ಯಾರ್ ಅನ್ಯೇಕ್ ಪೊಲೊ ದಾಕವ್ಯಾಂ.”
ತಿತ್ಲ್ಯಾರ್ ಎಕ್ಲೊ ಮಾನೇಸ್ತ್ ಮಧೆಂಚ್ ಮ್ಹಣಾಲೊ “ತಶೆಂ ಮ್ಹಣೊನ್ಂಚ್ ಆಮ್ಚೆ ಪೊಲೆ ತಾಂಬ್ಡೆ ತಾಂಬ್ಡೆ ಜಾವ್ನ್ ಪುಗ್ಲ್ಯಾತ್ ಫಾದರ್. ಆನಿ ಆಮಿಂಯ್ ಪಾಟಿಂ ದಿಂವ್ಚೊ ವೇಳ್ ಆಯ್ಲಾ.”
ತಾಕಾ ವಿಗಾರ್ ಮ್ಹಣಾಲೊ “ತಶೆಂ ತರ್ ಆಮ್ಚ್ಯಾ ಪೊಲ್ಯಾಕ್ ಮಾರ‍್ಲ್ಯಾರ್ ಪಾಟಿಂ ದಿಂವ್ಚಿ ಜವಾಬ್ದಾರಿ ತುಜಿ. ಕಿತೆಂ ಮ್ಹಣ್ತಾಯ್?”
ತಾಕಾ ತೊ ಮಾನೇಸ್ತ್ ಮ್ಹಣಾಲೊ “ತಶೆಂ ಕಾಂಯ್ ಜಾಂವ್ಚೆಂ ನಾ ಫಾದರ್. ಆಮಿ ಶಾಂತಿಚೆ ಮನಿಸ್. ಶಾಂತಿ ಸಾಂಬಾಳ್ಯಾಂ. ಮ್ಹಾಕಾಯ್ ಬಾಯ್ಲ್ ಭುರ್ಗಿಂ ಆಸಾತ್.”
ತೊ ಅಶೆಂ ಉಲಯಿಲ್ಲೊ ಪಳೆವ್ನ್ ಬಾಕಿಚ್ಯಾ ಕೊಣಾಯ್ಕಿ ಕಸಲೆಂಚ್ ಸವಾಲ್ ವಿಚಾರುಂಕ್ ಧಯ್ರ್ ಪಾವ್ಲೆಂ ನಾ. ಉಪಾಧ್ಯಕ್ಷಾಕ್ ಸಿಕೇರಾಮಾನ್ ಪಯ್ಲೆಂಚ್ ವಿಶಯ್ ಕಳಯಿಲ್ಲ್ಯಾನ್ ತೊ ವಿಗಾರಾಚಾ ಪಕ್ಷೆನ್ಂಚ್ ಆಸ್‌ಲ್ಲೊ. ಅಖ್ರೇಕ್ ಹ್ಯಾ ವರ್ಸಾಚೆಂ ಮೊಂತಿ ಫೆಸ್ತ್ ಸರ್ವಧರ್ಮ ಮೊಂತಿ ಫೆಸ್ತ್ ಜಾವ್ನ್ ಆಚರ‍್ಸುಂಕ್ ನಿರ್ಧಾರ್ ಘೆತ್ಲೊ.
***
ತೆಣೆಂ ಇಗರ್ಜೆಂತ್ ಗೊವ್ಳಿಕ್ ಮಂಡಳೆಚ್ಯಾ ಮೀಟಿಂಗಾರ್ ಸರ್ವಧರ್ಮ ಮೊಂತಿಫೆಸ್ತ್ ಖಂಡಿತ್ ಪಾಸ್ ಜಾತೆಲೆಂ ಆನಿ ಆಪ್ಣಾಚೆಂ ಸೊಪಾಣ್ ಜ್ಯಾರಿ ಜಾತೆಲೆಂ ಮ್ಹಳ್ಳ್ಯಾ ಖುಶೆನ್ ಸಿಕೇರಾಮ್ ಸಂತೊಸಾನ್ಂಚ್ ನಾಚೊನ್ ನಾಚೊನ್ ಘರಾ ಆಯ್ಲೊ. ಪೂಣ್ ಘರಾ ಪಾವ್ತಚ್ ತಾಚ್ಯಾ ಬಾಯ್ಲೆನ್ ವ್ಹಡ್ ಏಕ್ ಧೆಂಕ್ಣೊ ಘಾಲ್ನ್ ಸಿಕೇರಾಮಾಚಿಂ ಮೆಟಾಂ ಚುಕಯ್ಲಿಂ ಆನಿ ಸಿಕೇರಾಮ್ ಘರ‍್ಚ್ಯಾ ಜಾಲಾಂತ್ ರಾಸ್ ಕೆಲ್ಲ್ಯಾ ಬೆಂಡಾಂಚ್ಯಾ ವ್ಹಡ್ ರಾಶಿಚೆರ್‌ಚ್ ಪಡ್ಲೊ.
ಮ್ಹಜಿಂ ಲೇಡಿಸ್ ಫಿಂಗರಾಂ, ಮ್ಹಜಿಂ ಲೇಡಿಸ್ ಫಿಂಗರಾಂ ಮ್ಹಣ್ ಸಿಕೇರಾಮಾಚ್ಯಾ ಲೇಡಿನ್ ಆಪ್ಣಾಚೆಂ ಫಿಗರ್ ಲೆಕಿನಾಸ್ತಾಂ ಸಿಕೇರಾಮಾಚ್ಯಾ ಕಾನಾಕ್ ಧರ‍್ನ್ ಉಕಲ್ಲೆಂ ಆನಿ ಬೊಬಾಟ್ಲಿ.
“ಕಿತೆಂಗಾ, ಹ್ಯಾ ಕಾಳಾರ್ ಭಾಂಗಾರಾಚ್ಯಾಕೀ ಚಡ್ ರೇಟ್ ಆಸ್ಚ್ಯಾ ಹ್ಯಾ ಬೆಂಡಾಂಚೆರ್ ತುಂ ಅಸೊಯೀ ಪಡೊನ್ ಮ್ಹಜಿಂ ಬೆಂಡಾಂ ಪಾಡ್ ಕರ‍್ಶಿ ತರ್ ತುಜೆಂ ಬೇಂಡ್ ಫುಂಕೊಂಕ್ ಆಸಾಂ.”
“ಸಾಯ್ಭಿಣಿ ಮ್ಹಜೆಂ ಬೇಂಡ್ ಆನಿ ಖಂಡಿತ್ ಫುಕ್ತೆಲೆಂಯ್, ಮ್ಹಜೆಂ ಸೊಪಾಣ್ ಜ್ಯಾರಿ ಜಾಂವ್ಚ್ಯಾರ್ ಆಸಾ.”
“ವ್ಹಯ್‌ಗೀ ಖಂಚೆಂ ಸೊಪಾಣ್ ತೆಂ? ಪೇಪರಾರ್ ಫೋಟೊ ಯೆಂವ್ಚೆಂಗೀ?”
“ಪೇಪರಾರ್ ಫೋಟೊ ಯೆಂವ್ಚೆಂಚ್, ಪೂಣ್ ತುವೆಂ ಅಶೆಂ ಬೊಬಾಟ್ಲ್ಯಾರ್ ಅತಾಂಚ್ ಸಗ್ಳ್ಯಾ ವಾಡ್ಯಾಕ್ ಕಳೊನ್ ಪೇಪರ್ ಪಿಂದುಂಕ್ ಆಸಾ”
“ತಶೆಂ ತರ್ ಹಾಂವ್ ವೊಗೆಚ್ ರಾವೊಂಕ್ ಪ್ರೇತನ್ ಕರ‍್ತಾಂ. ಅತಾಂ ಸಾಂಗ್ ಜೀವ್ ಆಸ್ತಾನಾಂಚ್ ತುಜಿ ಫೋಟೊ ಯೆತೆಲಿ ಮೂ?”
“ತುಂ ಪಯ್ಲೆಂ ಬಿಂಗ್ರಿ ಉಲಂವ್ಚೆಂ ಬಂಧ್ ಕರ್ ಸಾಯ್ಭಿಣಿ.”
“ಬಿಂಗ್ರಿ ಹಾಂವ್ ನ್ಹಯ್ ತುಂ ಉಲಯ್ತಾಲೊಯ್. ವೊಡೊಲ್ ಸಾಂಜೆರ್ ಫೋನ್ ಕರ‍್ತಾನಾ ತುಂ ಕಿತೆಂಗೀ ಬಿಂಗ್ರಿ ಉಲಯ್ತಾಲೊಯ್”
“ಹಾಂವ್ ಕೆದಾಳಾ ಬಿಂಗ್ರಿ ಉಲಯ್ಲೊಂ ಸಾಯ್ಭಿಣಿ?”
“ತೆಂಚ್ ಎಕಾ ಘಾಂಟ್ಯಾ ಆದಿಂ ತುಕಾ ಹಾಂವೆಂ ಫೋನ್ ಕೆಲ್ಲೆಂ, ತುಂ ಕಿತೆಂಗೀ ‘ನಾಕಾ ನಾಕಾ ಸಾಯ್ಬಾ. ಆಮ್ಕಾಂ ಧಾ ಲಾಖ್ ನಾಕಾತ್. ಫಿರ್ಗಜ್ ವಿಗಾರ್ ಸರ್ವಧರ್ಮ ಮೊಂತಿ ಫೆಸ್ತ್ ಆಚರ‍್ಸುಂಕ್ ಪರ್ವಣ್ಗಿ ದಿತೇ ನಾ. ದೆಕುನ್ ಹೆಂ ಪ್ರೊಜೆಕ್ಟ್ ಕ್ಯಾನ್ಸಲ್ ಕರ‍್ಚೆಂ ಬರೆಂ. ಐ ಎಮ್ ಸೊರ್ರಿ’ ಮ್ಹಣ್ ಬೊಗೊಳ್ತೊಲೊಯ್. ಖಂಚೆಂ ಧಾ ಲಾಖ್, ಖಂಚೆಂ ಮೊಂತಿ ಫೆಸ್ತ್ ಆನಿ ಖಂಚೊ ಸಾಯ್ಬ್.”
“ಓ, ತೆಂ ಹಾಂವ್ ವೊಡೊಲ್ ಜಾಳ್ ಘಾಲ್ನ್ ಮಾಸ್ಳಿ ಧರ‍್ನ್ ಆಸ್‌ಲ್ಲೊಂ”
“ಅರೇ, ಮಾಸ್ಳಿ ಧರುಂಕ್ ತುಂ ಕಿತೆಂ ಪಾಗಿ ಗೀ, ತುಂ ಕಮರ್ಶಿಯಲ್ ರೈತ್ ನೇ ಸಾಯ್ಬಾ”
“ತಶೆಂ ನೇ ಹಾಂವ್ ವಿಗಾರಾಕ್ ಜಾಳಾಂತ್ ಸಾಂಪ್ಡಾಂವ್ಕ್ ಗೆಲ್ಲೊಂ, ತಾಚಿ ಪಾಗಿ ಕರ‍್ತಾಲೊಂ”
“ಕೊಣೀ ವಿಗಾರ್ ಮನ್ಶಾಂಚೆ ಪಾಗಿ ಕರ‍್ತಾತ್, ತುಂ ಉಲ್ಟಾ ತಾಚಿ ಪಾಗಿ ಕರುಂಕ್ ಗೆಲಾಯ್, ಕಾಂಯ್ ಪುಣೀ ಉಲ್ಟಾ ಘಡ್ಚ್ಯಾರ್ ಆಸಾಗೀ?”
“ತಶೆಂ ನ್ಹಯ್ ಸಾಯ್ಭಿಣಿ, ಹಾಂವ್ ಮ್ಹಜೆಂ ಸೊಪಣ್ ವರ‍್ನ್ ತಾಚೆರ್ಶಿಂ ಗೆಲ್ಲೊಂ”
“ವಿಗಾರಾಕ್ ಸಾಂಪ್ಡಾಯ್ಲ್ಯಾರ್ ಆಮ್ಚೆಂ ಖಂಚೆಂ ಸೊಪಾಣ್ ಜ್ಯಾರಿ ಜಾಯ್ತ್ ಸಾಯ್ಬಾ, ತಾಣೆಂ ಇಗರ್ಜ್ ವಿಕ್ಲ್ಯಾರೀ ಆಮ್ಕಾಂ ಮೆಳ್ಚಿ ಸಿಮಿಸ್ತ್ರ್‌ಚ್”
“ತುಕಾ ಪೊರ‍್ವಾಂ ಆಮ್ಚೆಂ ರಾಜ್ಯಾಚೆಂ ಫೆಸ್ತ್ ಆಸಾನೇ, ತ್ಯಾ ದೀಸ್ ಕಳ್ತೆಲೆಂ.”
“ಹೆಂ ಮೊಂತಿ ಸಾಯ್ಭಿಣಿಚೆಂ ಫೆಸ್ತ್ ಕರ್ನಾಟಕ್ ರಾಜ್ಯಾಚೆಂ ಫೆಸ್ತ್ ಮ್ಹಣ್ ಘೋಷಿತ್ ಕೆಲೆಂಗೀ?”
‘ಮೊಂತಿ ಫೆಸ್ತ್ ನ್ಹಯ್ ಸಾಯ್ಭಿಣಿ, ನವೆಂಬರ್ ಎಕಾ ತಾರಿಕೆರ್ ಆಮ್ಚೆಂ ಕರ್ನಾಟಕ ರಾಜ್ಯೋತ್ಸವ, ತ್ಯಾ ದೀಸ್ ರಾಜ್ಯೋತ್ಸವ ಪ್ರಶಸ್ತಿ ಘೋಷಿತ್ ಕರ‍್ತಾತ್ ಆನಿ ಮ್ಹಾಕಾಯ್ ಮೆಳ್ಚ್ಯಾರ್ ಆಸಾ”
“ತುಕಾ ಖಂಚ್ಯಾ ಖಾತಿರ್? ಹಿ ಪ್ರಶಸ್ತಿ ವಿಗಾರ್ ದಿತಾತ್‌ಗೀ. ರಾಜ್ಯವಾರ್, ಜಿಲ್ಲ್ಯಾವಾರ್ ಆಯ್ಕಾಲ್ಯಾ. ಫಿರ್ಗಜೆವಾರ್‌ಯೀ ರಾಜ್ಯೋತ್ಸವ ಪ್ರಶಸ್ತಿ ಆಸಾಗೀ?”
“ಅಳೆ, ಹಾಂವೆಂ ಹ್ಯಾ ಪಾವ್ಟಿಂ ಜಾಯ್ತಿ ರಾಂದ್ವಯ್ ಕೆಲ್ಯಾ. ತ್ಯಾ ಖಾತಿರ್ ಕೃಷಿ ಶೆತಾಂತ್ ರಾಜ್ಯೋತ್ಸವ ಪ್ರಶಸ್ತಿ ಮ್ಹಾಕಾ ಮೆಳ್ಚ್ಯಾರ್ ಆಸಾ”
“ಫಕತ್ ರಾಂದ್ವಯ್ ಕೆಲ್ಯಾರ್‌ಯೀ ಪ್ರಶಸ್ತಿ ದಿತಾತ್‌ಗೀ?”
“ಅಳೆ ಮ್ಹಾಕಾ ಏಕ್ ಪ್ರಶಸ್ತಿ ಜಾಯ್ ಮ್ಹಣ್ ಜಾಯ್ತ್ಯಾ ವರ್ಸಾಂಥಾವ್ನ್ ಸರ್ಕಾರಾಚೆಂ ಪಾಂಯ್ ದವರ‍್ನ್ ಆಸ್‌ಲ್ಲೊಂ. ಪೂಣ್ ಪಾಂಯ್ ದರ‍್ನ್ಂಚ್ ಆಸ್ಲ್ಯಾರ್ ತಾಂಕಾಂ ಆಮ್ಚ್ಯಾ ಪಾಂಯಾಂಚಿ ಒಳಕ್ ಮೆಳಾನಾ. ದೆಕುನ್ ಹ್ಯಾ ಪಾವ್ಟಿಂ ಹಾಂವೆಂ ತಾಂಚೊ ಮಾಂಡ್ಡೊ ಧರ‍್ಲೊ. ಹಾಂವೆಂ ಮ್ಹಳೆಂ, ಹ್ಯಾ ವರ್ಸಾ ಹಾಂವೆಂ ಜಾಯ್ತಿ ರಾಂದ್ವಯ್ ಕೆಲ್ಯಾ, ತರ್ ಮ್ಹಾಕಾ ಕೃಷಿ ಶೆತಾಂತ್ ಏಕ್ ಪ್ರಶಸ್ತಿ ದಿಯಾ ಮ್ಹಳೆಂ. ತಾಕಾ ತೆ ಮ್ಹಣಾಲೆ, ಫಕತ್ ರಾಂದ್ವಯ್ ಕೆಲಿ ತರ್ ಪ್ರಶಸ್ತಿ ದೀಂವ್ಕ್ ಜಾಯ್ನಾಂ. ಬಗಾರ್ ತುಂ ಏಕ್ ಸರ್ವಧರ್ಮ ಸಭೆ ಕರ್ ಆನಿ ಹಿ ರಾಂದ್ವಯ್ ಸಕ್ಕಡ್ ಧರ್ಮಾಂಚ್ಯಾಕ್ ಫುಂಕ್ಯಾಕ್ ಖಾವಯ್. ತೆದ್ನಾಂ ತುಂ ಏಕ್ ಸರ್ವಧರ್ಮ ಚಿಂತ್ಪಿ ಮ್ಹಣ್ ಠರಾವ್ನ್ ತುಕಾ ಹಿ ಪ್ರಶಸ್ತಿ ದಿವ್ಯೆತ್.”
“ಆನಿ ತುಂ ಮೊಂತಿ ಫೆಸ್ತ್‌ಚ್ ಸರ್ವಧರ್ಮ ರಿತಿನ್ ಆಚರಣ್ ಕರ‍್ನ್ ಸರ್ವಧರ್ಮಚ್ಯಾಂಕ್ ನವೆಂ ಜೆವಾಣ್ ದೀವ್ನ್ ಹಿ ರಾಂದ್ವಯ್ ತಾಂಕಾಂ ಖಾವವ್ನ್ ಸರ್ಕಾರಾಥಾವ್ನ್ ರಾಜ್ಯೋತ್ಸವ ಪ್ರಶಸ್ತಿ ಜೊಡ್ಚ್ಯಾಕ್ ವಿಗಾರಾಕ್ ಜಾಳಾಂತ್ ಸಾಂಪ್ಡಾಂವ್ಕ್ ಗೆಲ್ಲೊಯ್. ವ್ಹಯ್‌ಮೂ?”
“ಸಾರ್ಕೆಂ ಸಾಂಗ್ಲೆಂಯ್ ತುವೆಂ ಡಾರ್ಲಿಂಗ್. ಅನ್ನಾಡಿ ಆಲೋಚನ್ಯೊ ತುಜ್ಯಾ ಮತಿಕ್ ತುರ‍್ತಾನ್ ರಿಗ್ತಾತ್”
“ತರ್ ಹ್ಯಾ ಪಾವ್ಟಿಂಚಿ ರಾಜ್ಯೋತ್ಸವ ಪ್ರಶಸ್ತಿ ಆಮ್ಕಾಂ, ಹುರ್ರೇ. ಹಾಂವ್ ಅತಾಂಚ್ ಆಮ್ಚ್ಯಾ ಫಿರ್ಗಜ್ ಪತ್ರಾಚಾ ಸಂಪಾದಕಾಕ್ ಫೋನ್ ಕರ‍್ನ್ ಬಾಯ್ಲೆಂ ಕವರ್ ಪೇಜ್ ತುಜಿ ಫೋಟೊ ಘಾಲ್ನ್ ಅಭಿನಂದನ್ ಪಾಟಂವ್ಚ್ಯಾಕ್ ಅಮಾನತ್ ಕರ‍್ನ್ ದವರ‍್ತಾಂ. ಮಾಗಿರ್ ದುಸ್ರೆ ಬುಕ್ ಕರ‍್ತಿತ್ ಜಾಲ್ಯಾರ್ ಭೇಸ್.”
“ಹೇಯ್ ನಾನ್‌ಸೆನ್ಸ್, ಅತಾಂಚ್ ತಾಕಾ ಖಬರ್ ದಿಲಿಯ್ ತರ್ ತಿ ವಿಗಾರಾಕ್ ಕಳೊನ್ ಆಮ್ಚೆಂ ಪ್ಲ್ಯಾನ್ ಫ್ಲಾಪ್ ಜಾಯ್ತ್. ಕಿತೆಂಯ್ ಕರುಂಕ್ ಆಸಾ ತರ್ ತೆಂ ಹಾಂವ್ ಕರ‍್ತಾಂ. ತುವೆಂ ತೆದೊಳ್ ಮ್ಹಣಾಸರ್ ಮೌನ್ ಸಾಂಬಾಳ್ನ್ ಮ್ಹಾಕಾ ಸಹಕಾರ್ ದಿಲ್ಯಾರ್ ಪುರೊ.”
“ಪೂಣ್ ತುವೆಂ ಎದೊಳ್‌ಚ್ ವಿಗಾರಾಕ್ ಧಾ ಲಾಖ್ ಸರ್ಕಾರಾಥಾವ್ನ್ ಮೆಳ್ತಾತ್ ಮ್ಹಳ್ಯಾಯ್ ನೇ. ತಾಕಾ ಕಿತೆಂ ಕರ‍್ತಾಯ್?”
“ಏಕ್‌ಪಾವ್ಟಿಂ ಸರ್ವಧರ್ಮ ಮೊಂತಿ ಫೆಸ್ತ್ ಜಾಂವ್ದಿ, ಮಾಗಿರ‍್ಚೆಂ ಮಾಗಿರ್.”
***
ಫೆಸ್ತಾ ದಿಸಾ ಗಾಂವ್ಚೊ ಲೋಕ್ ದಾಲಿಂತ್ಲ್ಯಾ ಫುಲಾಬರಿಂ ಬಾವಾ ಬ್ಯಾರಿನ್ ಘಾಲ್ಲ್ಯಾ ಮಾಟ್ವ್ಯಾ ಪಂದಾ ಇಗರ್ಜೆಂತ್ ಮಯ್ದಾನಾರ್ ಸೊಭ್ತಾಲೊ. ಮೀಸ್ ಜಾಲ್ಲೆಂಚ್ ಸರ್ವಧರ್ಮ ಮೊಂತಿಫೆಸ್ತ್ ಆಚರ‍್ಸುಂಕ್ ಲೋಕ್ ಜಾತ್ ಕಾತ್ ಲೆಕಿನಾಸ್ತಾಂ ಜಮ್‌ಲ್ಲೊ. ಅನ್ಯ್ ಜಾತಿಚೆ, ಆಮ್ಚ್ಯಾ ಕ್ರಿಸ್ತಾಂವ್ ಲೋಕಾಂಕ್ ಮೊಂತಿ ಫೆಸ್ತಾಚೆ ಉಲ್ಲಾಸ್ ಪಾಟವ್ನ್ ಆಸ್‌ಲ್ಲೆ. ಇತ್ಲೊ ಲೋಕ್ ಪಳೆವ್ನ್ ಆನಿ ಹೆರ್ ಜಾತಿಚ್ಯಾ ಲೋಕಾಂಚಿ ಭಕ್ತ್ ಪಳೆವ್ನ್ ಮರ‍್ಯೇಕ್‌ಯೀ ವಾತಿ ಪೆಟವೆಂವ್ಚೆಂ ಏಕ್ ಸ್ಟೋಲ್ ಘಾಲ್ಲೆಂ ತರ್ ಬರೆಂ ಆಸ್ತೆಂ ಆನಿ ತ್ಯಾ ಪಯ್ಶಾನಿಂ ಗ್ರೊಟ್ಟ್ಯಾಕ್ ಇಂಪೋರ‍್ಡೆಡ್ ಮರ‍್ಯೆಚಿ ಇಮಾಜ್ ಹಾಡವ್ಯೆತಿ ಮ್ಹಣ್ ವಿಗಾರಾಕ್ ಭೊಗ್ಲೆಂ. ಪೂಣ್ ವೇಳ್ ಉತರ್‌ಲ್ಲ್ಯಾನ್ ಚುರ್ಚುರ್ ಭೊಗ್ಲೆ. ರಾಂದ್ವಯೆಚೆಂ ಜೆವಾಣ್ ಎದೊಳ್‌ಚ್ ತಯಾರ್ ಜಾಲ್ಲೆಂ. ಚಡ್ತಾವ್ ಹರ‍್ಯೇಕ್ ರಾಂದ್ವಯ್ ಸಿಕೇರಾಮಾಚಿಚ್ ಆಸ್‌ಲ್ಲಿ. ಜಾತ್ ಕಾತ್ ಲೆಕಿನಾಸ್ತಾಂ ಗಾಂವ್ಚ್ಯಾ ಲೋಕಾಂಚೊ ಎಕ್ವಟ್ ಪಳೆವ್ನ್ ಬೋಜ ಶೆಟ್ಟಿನ್ ಫುಂಕ್ಯಾಕ್ ಜೆವ್ಣಾ ಉಪ್ರಾಂತ್ ಸಕ್ಕಡ್ ಲೋಕಾಂಕ್ ಕೊಬು ದಿತಾ ಮ್ಹಳೆಂ ಆನಿ ಘಡ್ಯೆನ್ ಕೊಬಾಂಚಿ ರಾಸ್ ಆಸ್ಚ್ಯೊ ಲೊರಿಯೊ ಇಗರ್ಜೆ ಭಾಯ್ರ್ ತಯಾರ್ ಜಾಲ್ಲ್ಯೊ. ಜೆವ್ಣಾ ಉಪ್ರಾಂತ್ ಗೊಡ್ಶೆಂ ಮ್ಹಜ್ಯಾ ಲೆಕಾರ್ ಮ್ಹಣ್ ಅಬ್ದುಲ್ ಭಾಯಿನ್ ಸಾಂಗ್‌ಲ್ಲ್ಯಾನ್ ರಿಯಾಜ್, ನಿಯಾಜ್ ಸಕ್ಕಡ್‌ಯೀ ಜಮ್‌ಲ್ಲೆ.
ಸರ್ವಧರ್ಮ ಮೊಂತಿಫೆಸ್ತಾಚಿ ಸುರ‍್ವಾತ್ ಜಾಲಿ. ಮಟ್ವೆಂ ವೆದಿ ಕಾರ್ಯೆಂ ಚಲ್ಲೆಂ. ತಾಂತುನ್ ವಿಗಾರಾನ್ ಹೆರ್ ಜಾತಿಂಚ್ಯಾ ಮುಖೆಲ್ಯಾಂಕ್ ಕನ್ಶ್ಯೊ ವಾಂಟ್ಲ್ಯೊ. ಸರ್ಕಾರಿ ಅಧಿಕಾರೀ ಸಿಕೇರಾಮಾಚ್ಯಾ ಒತ್ತಾಯೆಕ್ ಲಾಗೊನ್ ಆಯಿಲ್ಲೆ. ತಾಂಕಾಂಯ್ ಮಾನ್ ಕೆಲೊ. ತಾಣಿಂ ಸಿಕೇರಾಮಾಕ್ ಖೂಬ್ ಹೊಗೊಳ್ಸಿಲೆಂ. ಲೋಕ್ ಪಯ್ಲೆಂಚ್ ಭುಕೆಲ್ಲೊ ಜಾಲ್ಲ್ಯಾನ್ ಘಳಾಯ್ ಕರಿನಾಸ್ತಾಂ ಜೆವ್ಣಾಚಿ ವಿಲೆವಾರಿ ಸುರು ಕೆಲಿ. ಜಾಯ್ತೊ ಲೋಕ್ ಆಸ್‌ಲ್ಲ್ಯಾನ್ ಪಯ್ಲ್ಯಾ ಪಂಗ್ತಿರ್ ಪಾವಾನಾಸ್ತಾಂ ಉಪ್ರಾಂತ್ ದೋನ್ ಪಂಗ್ತಿ ಘಾಲ್ಚೊ ನಿರ್ಧಾರ್ ಕೆಲೊ. ಪಯ್ಲ್ಯಾ ಪಂಗ್ತಿಚೊ ಲೋಕ್ ಘಟ್ಟ್ ಜೇವ್ನ್ ಆಸ್‌ಲ್ಲೊ. ವೆವೆಗ್ಳ್ಯಾ ರಾಂದ್ವಯೆಚಿಂ ನಿಸ್ತಿಂ ಖಾತಾನಾ ಲೋಕ್ ಧಾದೊಶಿ ಜಾಲೊ. ಸಿಕೇರಾಮಾಕ್ ಲೋಕ್ ಥರಾವಳ್ ಸವಾಲಾಂ ವಿಚಾರ‍್ನ್ ತಾಕಾ ಹೊಗೊಳ್ಸುನ್ ಆಸ್‌ಲ್ಲೆ. ಇತ್ಲಿ ರಾಂದ್ವಯ್ ತುಕಾ ಕರುಂಕ್ ಜಾಗೊ ಖಂಯ್ಸರ್ ಮೆಳ್ಳೊ ಮ್ಹಳ್ಳ್ಯಾ ಎಕ್ಲ್ಯಾಚಾ ಸವಾಲಾಕ್ ಸಿಕೇರಾಮಾನ್ ಅಶಿ ಜಾಪ್ ದಿಲಿ.
“ಮ್ಹಜೆಂ ಮೂಳ್ ಕಾಮ್ ಫಾತ್ರಾಂಚೆಂ. ಹಾಂವೆಂ ಜಾಯ್ತೇ ಫಾತೊರ್ ಕಾಡ್‌ಲ್ಲ್ಯಾನ್ ಕಲ್ಪನಿಂ ಜಾಲಿಂ. ಇತ್ಲಿಂ ಕಲ್ಪನಿಂ ಜಾಲಿಂ ಕೀ ಸರ್ಕಾರಾಕ್ ಲೇಕ್ ಮೆಳ್ಳ್ಯಾರ್ ಚಡಿತ್ ಟ್ಯಾಕ್ಸ್ ಭರಿಜೆ ಪಡಾತ್ ಮ್ಹಣ್ ಹಾಂವೆಂ ತಿಂ ಭರ‍್ನ್ ತಾಂಚೆರ್ ರಾಂದ್ವಯ್ ಕೆಲಿ. ಅತಾಂ ತಿಂ ಫುಂಕ್ಯಾಕ್ ಲೋಕಾಂಕ್ ವಾಂಟ್ತೇ ಆಸಾಂ. ಆಮ್ಕಾಂ ಸಕ್ಕಡ್ ಜಾಯ್ ಪಳೆ.”
ಧಾ ಲಾಖ್ ಮೆಳ್ತಾತ್ ಮ್ಹಳ್ಳ್ಯಾ ಆಶೆನ್ ವಿಗಾರ್ ಸಂತೊಸಾನ್ ಆಸ್‌ಲ್ಲೊ. ತಾಣೆಂ ಸಿಕೇರಾಮಾಕ್ ಕುಶಿಕ್ ಆಪವ್ನ್ ಕಂಟ್ರೋಲ್ ಚುಕೊನ್ ತಾಚೊ ಪೊಲ್ಯಾರ್ ಏಕ್ ಕೀಸ್ ಘೆತ್ಲೊ. ಪಯ್ಲಿ ಪಂಗತ್ ಜಾವ್ನ್ ದುಸ್ರಿ ಪಂಗ್ತೆಕ್ ಲೋಕ್ ಬಸೊನ್ ಜೆವಾನ್ ಜೇವ್ಣ್ ಆಸ್‌ಲ್ಲೊ. ಪೂಣ್ ಅರ್ಧೆಂ ಜೆವಾಣ್ ಸಂಪ್ತಾನಾ ಜ್ಯೋರ್ ವಾರೆಂ ಆಯ್ಲೆಂ ಆನಿ ಶಿರೊತಿ ಉಬೊನ್ ಎಕೆಕ್ಲ್ಯಾಚೆಂ ಉಶ್ಟೆಂ ಅನ್ಯೇಕ್ಲ್ಯಾಚ್ಯಾ ಶಿರೊತಿಂತ್ ಪಡೊನ್ ಮಾತ್ಸೊ ಗಲಾಟೊ ಸುರು ಜಾಲೊ. ತಿತ್ಲ್ಯಾರ್ ಚವ್ಗ್ ಪಾಂಚ್ ಜಣ್ ಬೋಜ ಶೆಟ್ಟಿಕ್ ಏಕ್ ಖಬರ್ ಹಾಡ್ನ್ ಆಯ್ಲೆ.
“ಧನ್ಯಾಂ. ತುಜಿಂ ಬಾರಾಂ ಗೊರ‍್ವಾಂ ಉದ್ಕಾಂತ್ ಪಡೊನ್ ಮೆಲಿಂ.”
ಆಯ್ಕೊನ್ ಬೋಜ ಶೆಟ್ಟಿಕ್ ಧಖೊ ಜಾಲೊ. “ಕಶಿಂ ಮೆಲಿಂ ತಿಂ?”
“ತಿಂ ಸಿಕೇರಾಮಾನ್ ಫಾತೊರ್ ಖೊಂಡುನ್ ದೋನ್ ಕಲ್ಪನಿಂ ಆನಿಕ್‌ಯೀ ಬಾಕಿ ಸೊಡ್‌ಲ್ಲಿಂ ನೇ, ತಾಂತುನ್ ಪಾವ್ಸಾಚೆಂ ಉದಾಕ್ ಭರ್‌ಲ್ಲೆಂ, ತಾಂತುನ್ ಪಡೊನ್ ಮೆಲಿಂ.”
“ಪೂಣ್ ಹಾಂವೆಂ ಗೊರ‍್ವಾಂಕ್ ಚರವಾಕ್ ಚಡ್ಸೊ ಗುಡೊ ಪಟ್ಟೆಗುಡೊ, ತೊ ಸಿಕೇರಾಮಾಚ್ಯಾ ಕಲ್ಪನ್ಯಾಥಾವ್ನ್ ಮೊಸ್ತ್ ಪಯ್ಸ್ ಆಸಾ.”
“ತೆಂ ವ್ಹಯ್ ಧನ್ಯಾಂ. ಪೂಣ್ ಖಬರ್ ಕಿತೆಂಗೀ ಮ್ಹಳ್ಯಾರ್ ನಾಯ್ತ್ಯಾಂಚೊ ಏಕ್ ಪಾಡೊ ಜಾಯ್ತ್ಯಾ ದಿಸಾಂಥಾವ್ನ್ ಹ್ಯಾ ಗೊರ‍್ವಾಂಚೆರ್ ದೊಳೊ ದವರ‍್ನ್ ಆಸ್‌ಲ್ಲೊ ಕಂಯ್. ತೊ ತ್ಯಾ ಗೊರ‍್ವಾಂಕ್ ಧಾಂವ್ಡಾವ್ನ್ ಹಾಡ್ನ್ ಆಯ್ಲೊ ಕಂಯ್. ಆಪ್ಣಾಚೊ ಮಾನ್ ರಾಕ್ಚ್ಯಾಕ್ ಹಿಂ ಗೊರ‍್ವಾಂ ಧಾಂವೊನ್ ಯೆತಾನಾ ಸಿಕೇರಾಮಾಚ್ಯಾ ಕಲ್ಪಾನ್ಯಾಂತ್ ಪಡೊನ್ ಮೆಲಿಂ ಕಂಯ್.”
ತಿತ್ಲ್ಯಾರ್ ಆಯಿಲ್ಲೆಂ ವಾರೆಂ ವಯ್ರ್ ಬಸ್‌ಲ್ಲ್ಯಾ ಸರ್ಕಾರಿ ಅಧಿಕಾರಿಂಚ್ಯಾ ಕಾನಾಂತ್ ಪಡೊನ್ ಥಾಂಬ್ಲೆಂ ಆನಿ ಆಪ್ಣಾಚೆಂ ಕಾಮ್ ಕರ‍್ನ್ ಗೆಲೆಂ ಜಾಯ್ಜಯ್. ತಿತ್ಲ್ಯಾರ್ ತ್ಯಾ ವಾರ‍್ಯಾನ್ ವೆಗ್ಳೊಚ್ ಏಕ್ ರೂಪ್ ಘೆತ್ಲೊ ಆನಿ ಸರ್ಕಾರಾಬರಿಂ ಅಧಿಕಾರಾಚ್ಯಾ ರುಪಾನ್ ಶಿರೊತಿಂತ್ಲ್ಯಾ ಉಶ್ಟ್ಯಾಬರಿಂ ಸಕ್ಡಾಂಕ್ ಹಳ್ಶಿಕ್ ಕರ‍್ನ್ ಮೆಳೊಂಕ್ ಲಾಗ್ಲೊ. ಉಶ್ಟ್ಯಾಂತ್ ಸುರು ಜಾಲ್ಲೊ ಗಲಾಟೊ ಅತಾಂ ಬೋಜ ಶೆಟ್ಟಿಚ್ಯಾ ಗೊರ‍್ವಾಂಥಾವ್ನ್, ನಾಯ್ತ್ಯಾಂಚ್ಯಾ ಪಾಡ್ಯಾಬರಿಂ ರಭಸಾನ್ ಧಾಂವೊನ್ ಮಾಟ್ವಾಂತ್ ಚಲ್ಲಾಪಿಲ್ಲಿ ಕರಿಲಾಗ್ಲೊ ಆನಿ ಥೊಡ್ಯಾಚ್ ವೆಳಾನ್ ಸಿಕೇರಾಮಾಕ್ ಬುಡಂವ್ಚ್ಯಾರ್ ಅಸ್‌ಲ್ಲೊ.
ಖಬರ್ ಆಯ್ಕೊನ್ ಗೋ ಮಾತೆಕ್ ಆಕ್ಮಾನ್ ಜಾಲೊ ಮ್ಹಣ್ ಪಯ್ಲೆಂ ಥೊಡ್ಯಾನಿಂ ಆವಾಜ್ ಉಟೊನ್ ಬಾಕಿಚ್ಯಾಂಕ್ ಚಾಳ್ವಯ್ಲೆಂ. ತಶೆಂ ಜಾಲ್ಲ್ಯಾನ್ ಅತಾಂ ಮಾಟ್ವಾಂತ್ ಲೋಕ್ ಸಕ್ಕಡ್ ಸರ್ವ ಸೊಡ್ನ್ ಫಕತ್ ಧರ್ಮ ಘೆವ್ನ್ ಝಗ್ಡೊಂಕ್ ತಯಾರ್ ಜಾಲ್ಲೊ. ವಿಶಯ್ ಆಯ್ಕೊನ್ ಆನಿ ಫುಡೆಂ ಕಿತೆಂ ಘಡೊಂಕ್ ಆಸಾ ತೆಂ ಚಿಂತುನ್ಂಚ್ ಗೊವ್ಳಿಕ್ ಮಂಡಳಿ ಶೆರ್ಮೆಲಿ. ಮೀಟಿಂಗಾರ್ ಪೊಲ್ಯಾಕ್ ಮಾರ‍್ಲ್ಯಾರ್ ಆಮಿಂಯ್ ಪಾಟಿಂ ದಿವ್ಯಾಂ ಮ್ಹಳ್ಳೊ ಮಾನೆಸ್ತ್ ಎದೊಳ್‌ಚ್ ತಾಂಬ್ಡೊ ತಾಂಬ್ಡೊ ಜಾಲ್ಲೊ. ಖಾಂವ್ಕ್ ದಿಲ್ಲೆ ಕೊಬು ಸಕ್ಕಡ್ ಹಾತೆರಾಂ ಜಾವ್ನ್ ಮಾರುಂಕ್ ಆಯ್ತೆ ಜಾಲ್ಲೆ. ಪಯ್ಲೆಂ ಗಲಾಟೊ ರಾವೊಂವ್ಚೊಗೀ ಯಾ ಸಿಕೇರಾಮಾಕ್ ಆಪಂವ್ಚೆಂಗೀ ಮ್ಹಣ್ ವಿಗಾರಾಕ್ ಏಕ್‌ಯೀ ಕಳ್ಳೆನಾಂ. ತಾಚಿ ದೀಷ್ಟ್ ಗ್ರೊಟ್ಟ್ಯಾಚೆರ್ ಗೆಲಿ. ತ್ಯಾ ಗ್ರೊಟ್ಟ್ಯಾಕ್ ಫುಲಾನಿಂ ಸುಂರ್ಗಾರಾಯಿಲ್ಲ್ಯಾನ್ ಆಜ್ ತೊ ಪರ್ನೊ ನ್ಹಯ್ ಬಗಾರ್ ನವ್ಯಾಬರಿಂಚ್ ದಿಸ್ತಾಲೊ. ತಕ್ಷಣ್ ವಿಗಾರಾಚಾ ಮತಿಂತ್ ಏಕ್ ಉಪಾವ್ ಝಳ್ಕಾಲೊ. ಕಶೆಂಯ್ ಕರ‍್ನ್ ಸರ್ಕಾರಾವ್ನ್ ಧಾ ಲಾಖ್ ಜೊಡ್ಚ್ಯಾಕ್ ಗಲಾಟೊ ಲೆಕಿನಾಸ್ತಾಂ ತೊ ಸರ್ಕಾರಿ ಅಧಿಕಾರಿಂಕ್ ಘೆವ್ನ್ ತಾಂಕಾಂ ಖುಶ್ ಕರ‍್ಚ್ಯಾಕ್ ಹಾತ್ ಧುವ್ನ್ ತಾಂಚೆಸಾಂಗಾತಾ ಜೆವ್ಣಾಸಾಲಾಂತ್ ಜೆವ್ಣಾಕ್ ಬಸ್ಲೊ.
ಫಿರ್ಗಜೆಕ್ ಧಾ ಲಾಖ್ ಜಾಂವ್ ವಾ ಆಪ್ಣಾಕ್ ರಾಜ್ಯೋತ್ಸವ ಪ್ರಶಸ್ತಿ ಜಾಂವ್ ಮೆಳ್ತಾತ್‌ಗೀ ನಾ ತೆಂ ಉಪ್ರಾಂತ್ ಪಳವ್ಯೆತ್. ಪೂಣ್ ಫಾಲ್ಯಾಂ ಪೇಪರಾರ್ ಆಪ್ಣಾಚಿ ಫೋಟೊ ಯೇನಾಂ ಜಾಂವ್ಚ್ಯಾಕ್ ಸಿಕೇರಾಮ್ ಮಾತ್ರ್ ಲಿಪೊನ್ ಬಸ್ಚ್ಯಾ ಖಾತಿರ್ ಆಪ್ಣೆಂಚ್ ಖೊಂಡ್‌ಲ್ಲ್ಯಾ ಕಲ್ಪಾನ್ಯಾಕ್ ಸೊಧುನ್ ಪನಾಂದೆ ಪದ್ರಾಡ್ ಜಾಲೊ.
■ ರೋಶು, ಬಜ್ಪೆ
Have any thoughts?
Share your reaction or leave a quick response — we’d love to hear what you think!
-
0
-
2
-
2
-
0
-
0
