ಕ್ರಿಸ್‌ಬೆನ್ ಮ್ಯೂಜಿಕಾನ್ ಆಯ್ಲೆವಾರ್ ಜಾಗತಿಕ್ ಮಟ್ಟಾಚೊ ಅಂತರ್ ಜಾಳಿಯ್ ಕೊಂಕ್ಣಿ ಗಾಯಾನ್ ಸ್ಪರ್ಧೊ ಮಾಂಡುನ್ ಹಾಡ್ಲೊ. ಚಲ್ಯಾಂಕ್ ಆನಿ ಚಲಿಯಾಂಕ್ ಪ್ರತ್ಯೇಕ್ ಸ್ಪರ್ಧೊ ಆಸಾ ಕೆಲ್ಲೊ. ಸರ್ವ್ ಪ್ರಾಯೆಚ್ಯಾ, ಸರ್ವ್ ಬೋಲಿಂಚ್ಯಾ ಕೊಂಕ್ಣಿ ಉಲಂವ್ಚ್ಯಾ ಗಾಯಕಾಂಕ್ ಹ್ಯಾ ಸ್ಪರ್ಧ್ಯಾಂತ್ ಭಾಗ್ ಘೆಂವ್ಕ್ ಆವ್ಕಾಸ್ ಆಸ್’ಲ್ಲೊ. ಸರ್ವ್ ಸ್ಪರ್ಧಿಕಾಂಕ್ ಕ್ರಿಸ್ ಬೆನ್ ಮ್ಯೂಜಿಕಾಚೆಂ ನವೆಂ ಕೊಂಕ್ಣಿ ಪದ್ “ಹಾಂವ್ ಉಬೊ ರಾವ್ತಲೊಂ” ಗಾಂವ್ಕ್ ಆಸ್’ಲ್ಲೆಂ. ಚಲಿಯಾಂಕ್ ಹಾಂವ್ ಉಬಿಂ ರಾವ್ತಲಿಂ ಮ್ಹಣೊನ್ ಉತ್ರಾಂನಿ ಥೊಡಿ ಬದ್ಲಾವಣ್ ಕರುನ್ ಗಾಂವ್ಕ್ ಆಸ್’ಲ್ಲೆಂ. ಸ್ಪರ್ಧಿಕಾಂಕ್ ಫೇಸ್’ಬುಕ್ ಲಾಯ್ವ್ ವಾ ಇನ್ಸ್ಟಾಗ್ರಾಮ್ ಲಾಯ್ವಾಚೆರ್ ಪದ್ ಗಾವುನ್ ವೀಡಿಯೊ ಪೋಸ್ಟ್ ಕರುಂಕ್ ಆಸ್’ಲ್ಲೊ ಆನಿ ಗೂಗಲ್ ಫೋರ್ಮ್ ಭರುನ್ ಸ್ಪರ್ಧ್ಯಾಕ್ ದಾಖಲ್ ಕರುಂಕ್ ಆಸ್’ಲ್ಲೆಂ. ಫೇಸ್’ಬುಕ್ ಆನಿ ಇನ್ಸ್ಟಾಗ್ರಾಮಾಚೆರ್ ಆಸ್’ಲ್ಲ್ಯಾ ಸ್ಪರ್ಧಿಕಾಂಚ್ಯಾ ಗಾಯ್ಲೆಲ್ಯಾ ವೀಡಿಯೋಕ್ ಸಾರ್ವಜನಿಕಾಂಕ್ ಲೈಕ್ ದೀಂವ್ಕ್ ಆವ್ಕಾಸ್ ಆಸ್’ಲ್ಲೊ. ಆಗೊಸ್ತಾಚ್ಯಾ 31 ತಾರಿಕ್ ಪರ್ಯಾಂತ್ ಲೈಕ್ ಘೆಂವ್ಕ್ ಆವ್ಕಾಸ್ ಆಸ್’ಲ್ಲೊ.
ವಿಭಿನ್ನ್ ಮಾಂಡಾವಳ್ ಆನಿ ರೆಗ್ರೊ ಆಸ್’ಲ್ಲ್ಯಾ ಹ್ಯಾ ಸ್ಪರ್ಧ್ಯಾಂತ್ ಚಲಿಯಾಂಚ್ಯಾ ವರ್ಗಾಂತ್ ವೀಸ್ ಆನಿ ಚಲ್ಯಾಂಚ್ಯಾ ವರ್ಗಾಂತ್ ಚೊವ್ದಾ ಜಣಾಂನಿ ಭಾಗ್ ಘೆತ್ಲೊ. ನಾಂವಾಡ್ದಿಕ್ ಸಂಗೀತ್ಗಾರ್ ಸಂಗೀತ್ ಗುರು ಜೋಯಲ್ ಪಿರೇರಾ, ಗೊಂಯ್ಚಿ ನಾಮ್ಣೆಚಿ ಗಾವ್ಪಿಣ್ ಸೋನಿಯಾ ಶಿರ್ಸಾತ್, ಆನಿ ಕೊಚ್ಚಿಚೊ ಆವಾಜಾ ಇಜ್ಣೆರ್ ಆನಿ ಗಾವ್ಪಿ, ಜಾಣೆ ಹಾಂವ್ ಉಬೊ ರಾವ್ತಲೊಂ ಪದ್ ಗಾಯ್ಲೆಲೆಂ ಆಸಾ- ನಿತಿನ್ ಕುಟ್ಟುಂಗಲ್ ಹಾಣಿಂ ಮೇಳುನ್ ಗಾಯಾನಾಂಚಿ ವರಯ್ಣಿ ಕೆಲಿ.
ವರಯ್ಣಾರಾಂಚ್ಯಾ 85 ಆಂಕಾಂಕ್ ಲೈಕ್ಸಾಚೆ 15 ಅಂಕ್ ಮೆಳವ್ನ್ ವಿಜೇತಾಂಕ್ ವಿಂಚುನ್ ಕಾಡ್ಲೆ. ಚಲಿಯಾಂಚ್ಯಾ ವಿಭಾಗಾಂತ್ ಪಲಿಮಾರ್ಚೆಂ ರಿಯಾ ಡಿಸೋಜಾ ವಿಜೇತ್ ಜಾವ್ನ್ ವಿಂಚುನ್ ಆಯ್ಲೆಂ- ತಾಕಾ ಕ್ರಿಸ್’ಬೆನ್ ವೋಯ್ಸ್ ಫಿಮೇಲ್ 2025 ಬಿರುದ್ ಆನಿ ರುಪಯ್ ಪನ್ನಾಸ್ ಹಜಾರಾಂಚೆಂ ನಗ್ದೆನ್ ಇನಾಮ್ ಮೆಳ್ಳೆಂ. ಚಲ್ಯಾಂಚ್ಯಾ ವಿಭಾಗಾಂತ್ ಬಜ್ಜೊಡಿಚೊ ಕ್ಲಿಯೋನ್ ಡಿಸಿಲ್ವಾ ವಿಜೇತ್ ಜಾವ್ನ್ ವಿಂಚುನ್ ಆಯ್ಲೊ- ತಾಕಾ ಕ್ರಿಸ್’ಬೆನ್ ವೋಯ್ಸ್ ಮೇಲ್ 2025 ಬಿರುದ್ ಆನಿ ರುಪಯ್ ಪನ್ನಾಸ್ ಹಜಾರಾಂಚೆಂ ನಗ್ದೆನ್ ಇನಾಮ್ ಮೆಳ್ಳೆಂ.
ವಿಜೇತಾಂಚೆಂ ಘೋಷಣ್ ಬಾಹ್ರೆನ್ಚ್ಯಾ ಕೊಂಕಣ್ ಸಿಂಗರ್ಸ್ ಕ್ಲಬ್ಬಾಚ್ಯಾ ಮಟ್ವ್ಯಾ ಕಾರ್ಯಾ ವೆಳಿಂ ಕೆಲೆಂ. ಬಾಪ್ ಡೆರಲ್ ಫೆರ್ನಾಂಡಿಸ್ ಹಾಣಿಂ ವಿಜೇತಾಂಚೆಂ ಘೋಷಣ್ ಕರುನ್ ವಿಜೇತಾಂಕ್ ಅಭಿನಂದನ್ ಪಾಟಯ್ಲೆಂ. ಕಾರ್ಯಾ ವೆಳಿಂ ಕೊಂಕಣ್ ಸಿಂಗರ್ಸ್ ಕ್ಲಬ್ಬಾಚೊ ಅಧ್ಯಕ್ಶ್ ಸುಜಯ್ ಪಿಂಟೊ, ಕಾರ್ಯದರ್ಶಿ ಅವಿನಾಶ್ ಫೆರ್ನಾಂಡಿಸ್, ಕ್ಲಬ್ಬಾಚೊ ಮಾಲ್ಘಡೊ ಸಾಂದೊ ವಾಲ್ಟರ್ ನೊರೊನ್ಹಾ, ಬಾಹ್ರೆನ್ಚ್ಯಾ ಪವಿತ್ರ್ ಕಾಳ್ಜಾಚ್ಯಾ ಫಿರ್ಗಜೆಚ್ಯಾ ಕೊಂಕ್ಣಿ ಸಮುದಾಯಾಚೊ ಅಧ್ಯಕ್ಶ್ ನೆಲ್ಸನ್ ಮಿನೇಜಸ್ ಆನಿ ಕ್ರಿಸ್ ಬೆನ್ ಮ್ಯೂಜಿಕ್ ಸಂಸ್ಥ್ಯಾಚೊ ಸಂಸ್ಥಾಪಕ್ ಕ್ರಿಸ್ಟೊಫರ್ ರೋಶನ್ ಲೋಬೊ ವೆದಿಚೆರ್ ಹಾಜರ್ ಆಸ್’ಲ್ಲೆ. ತಶೆಂಚ್ ಕ್ಲಬ್ಬಾಚೆ ಸಾಂದೆ ಕಾರ್ಯಾಕ್ ಹಾಜರ್ ಆಸ್’ಲ್ಲೆ.
