ಎರಿಕ್ ಬಾಬಾಚ್ಯಾ ಮರ‍್ಣಾಸವೆಂ ಕೊಂಕ್ಣಿ ಸಂಗೀತ್ ಶೆತಾಚೊ ಆನ್ಯೇಕ್ ಅಧ್ಯಾಯ್ ಸಂಪ್ಲಾ. ಹ್ಯಾ ವಗ್ತಾ ಎರಿಕ್ ಬಾಬಾವಿಶಿಂ ಕಿತೆಂ ಬರೊಂವ್ಚೆಂ ಮ್ಹಣ್ ಚಿಂತುಂಕ್ ಬಸ್ತಾನಾ ಜಾಯ್ತಿಂ ಸವಾಲಾಂ ಮ್ಹಜ್ಯಾ ಮನಾಂತ್ ಉದೆತಾತ್. ವ್ಹಯ್ ಎರಿಕ್ ಬಾಬ್ ಸವಾಲ್ ಜಾವ್ನ್‌ಚ್ ಜಿಯೆಲ್ಲೊ ದೆಕುನ್ ಸವಾಲಾಂ ಉದೆಂವ್ಚಿಂ ಸಹಜ್‌ಚ್. ಪುಣ್ ಹಿಂ ಸವಾಲಾಂ ಹ್ಯಾ ವೆಳಾರ್ ವೆಕ್ತ್ ಕರ‍್ಚೆಂ ಸಾರ್ಕೆಂಗೀ… ಎಕ್ಲೊ ಮನಿಸ್ ಸಂಸಾರ್ ಸಾಂಡುನ್ ವೆತಾನಾ ತಾಚೆವಿಶಿಂ ವಾಸ್ತವ್‌ನಿಶ್ಟ್ ಜಾವ್ನ್ ಬರಯ್ನಾಶೆಂ ಫಕತ್ ಸಿಂತಿಮೆಂತಾಳ್ ಜಾವ್ನ್ ಬರಯ್ಲ್ಯಾರ್ ಪುರೊಗೀ… ಅಸಲಿಂ ಸಬಾರ್ ಸವಾಲಾಂ.
ಎರಿಕ್ ಬಾಬ್ ಆನಿ ತಾಚ್ಯಾ ಗುರ್ಕಾರ್‌ಪಣಾಖಾಲ್ ಮಾಂಡ್ ಸೊಭಾಣ್ ಸಂಸ್ಥ್ಯಾನ್ ಸಂಗೀತಾಕ್ ದಿಲ್ಲ್ಯೆ ದೇಣ್ಗೆವಿಶಿಂ ಕಾಂಯ್ಚ್ ಸುರಾತ್ ಕರಿನಾಸ್ತಾಂ ಹೊಗ್ಳಿಕ್ ಉಚಾರ‍್ಚೆಸವೆಂ ಹ್ಯಾ ಸರ್ವ್ ದಾಕ್ಶೆಣೆಚ್ಯಾ ಭಾಯ್ರ್ ವಸ್ತುನಿಶ್ಟ್ ಜಾವ್ನ್ ಚಿಂತ್ಚೆಂ ಆನಿ ಬರೊಂವ್ಚೆಂಯ್ ತಿತ್ಲೆಂಚ್ ಗರ್ಜೆಚೆಂ ಮ್ಹಣ್ ಚಿಂತ್ತಾಂ. ಏಕ್ ಮನಿಸ್ ಸವಾಲಾಂಚೊ ಜಾವ್ನ್ ಜಿಯೆತಾನಾ, ಸಮಾಜಿಕ್ ಜಾವ್ನ್ ಜಿಯೆತಾನಾ, ಪ್ರತಿಭಟನ್ ತಸಲ್ಯಾ ಸಂಗ್ತೆಂನಿ ಮೆತೆರ್ ಆಸ್ತಾನಾ ಅಶೆಂ ವಸ್ತುನಿಶ್ಟ್ ಜಾವ್ನ್ ಬರೊಂವ್ಚೆಂ ಸಮಾಜೆಚ್ಯೆ ದಿಶ್ಟಿನ್‌ಯೀ ಬರೆಂಚ್ ಮ್ಹಣ್ ಆಮಿ ಮಾಂದುನ್ ಆಯಿಲ್ಲೆಂ ಸಿದ್ಧಾಂತ್.
ಹ್ಯಾ ಅರ್ಥಾನ್ ಪಳೆಂವ್ಕ್ ಗೆಲ್ಯಾರ್ ಎರಿಕ್ ಬಾಬಾಚೆಂ ಜಿವಿತ್ ಮ್ಹಜ್ಯೆ ದಿಶ್ಟಿಕೋನಾಂತ್ ದೋನ್ ವಾಂಟೆ ಕರ್ಯೆತ್. ಪಯ್ಲೊ ವಾಂಟೊ – ಸಂಗೀತ್‌ಗಾರ್ ಎರಿಕ್ ಬಾಬ್. ಹಾಂವೆಂ ಮಾಂಡ್ ಸೊಭಾಣಾಚ್ಯಾ ಪದಾಂಚ್ಯಾ ಮೊಗಾರ್ ಪಡೊನ್, ತ್ಯಾ ಉಪ್ರಾಂತ್ ಸಳಾವಳ್ ಜಾಲ್ಲೊ, ಅಕಾಡೆಮಿ ಅಧ್ಯಕ್ಶ್ ಆವ್ದಿ ಸಂಪ್ತಾ ಪರ್ಯಾಂತ್ಲೊ ಎರಿಕ್ ಬಾಬ್. ದುಸ್ರೊ ವಾಂಟೊ – ಅಕಾಡೆಮಿ ಅಧ್ಯಕ್ಶಾಚಿ ಆವ್ದಿ ಸಂಪ್ಲ್ಯಾ ಉಪ್ರಾಂತ್ ಸಂಗೀತಾಕ್ ವಿಸ್ರೊನ್ ಫಕತ್ ವ್ಯಾಖ್ಯಾನಾಕ್ ಲಾಗೊನ್ ಚರ್ಚೆರ್ ಆಸ್‌ಲ್ಲೊ ಎರಿಕ್ ಬಾಬ್.
ಪಯ್ಲ್ಯಾ ವಾಂಟ್ಯಾಕ್ ಆಯ್ಲ್ಯಾರ್, ಹಾಂವ್ ಎರಿಕ್ ಬಾಬಾಚ್ಯಾ ಸಂಗೀತ್ ಫುಡಾರ‍್ಪಣಾಖಾಲ್ ಉದೆಲ್ಲ್ಯಾ ಮಾಂಡ್ ಸೊಭಾಣ್ ಪದಾಂಚೊ ಅಭಿಮಾನಿ. ಶಿರಾಂಧಾರಿಂಚೊ ಪಾವ್ಸ್ ತಸಲಿಂ ಉಡ್ತಿಂ ಪದಾಂ, ವೊಡಾಪಂದಾ ಶೇಜ್ ಮ್ಹಜಿ, ಬಾಪ್ಪಿನೆಚೊ ಕಾಂಟೊ ತಸಲಿಂ ಸಿಂತಿಮೆಂತಾಳ್ ಪದಾಂ, ಭಕ್ತಿಸೊಭಾಣಾಚಿಂ ಆಧ್ಯಾತ್ಮಿಕ್ ಪದಾಂ ಸರ್ವಾಂತೀ ಎರಿಕ್ ಬಾಬಾಚೆಂ ಏಕ್ ಸ್ಪರ್ಶ್ ಆಸಾ. ಮಾಂಡ್ ಸೊಭಾಣಾಚ್ಯಾ ಪದಾಂವಿಶಿಂ ಹಾಂವೆಂ ಕಾಂಯ್ ವೀಸ್ ವರ‍್ಸಾಂ ಆದಿಂ ‘ಮಿತ್ರ್’ ಪತ್ರಾರ್ ಬರಯಿಲ್ಲ್ಯಾ ಲೇಖನಾಚೊ ವಾಂಟೊ ಉಲ್ಲೇಖ್ ಕರ‍್ಚೊ ತರ್ :
ಕಿತೆಂ ನಾ ಮಾಂಡ್ ಸೊಭಾಣ್ ಪದಾಂನಿ? ಫೆಸ್ತಾಸಾಂತೆಕ್ ಆಪೊಂವ್ಚೊ ಚೆಡೊ, ಮ್ಹಾಕಾ ಮೋಗ್ ಕರುಂಕ್ ಶಿಕಯ್ ಮ್ಹಣ್ ಪರಾತ್ತುಂಚೆಂ ಚೆಡುಂ, ಸುಡ್ಸುಡ್ಯೆ ರೆಂವೆಚೆರ್ ತಾಪ್‌ಲ್ಲೊ ವಿರಹಿ, ಶಿರಾಂಧಾರಿಂಚ್ಯಾ ಪಾವ್ಸಾಕ್ ಭಿಜ್ಚಿ ಜೊಡಿ, ಗಾಂವಾಚಿ ವಡ್ವಿಕಾಯ್ ಉತ್ರಾಂವ್ಚೊ ಕವಿ, ರಾನಾಂತ್ಲ್ಯಾ ಮಾಂಕ್ಡಾಕ್ ಭಾವ್ ಮ್ಹಣ್ಚೊ ವಿಚಾರ್‌ವಾದಿ, ಕಾಳ್ಜಾಕ್ ವಚೊಂಕ್ ಪೊಟಾಂತ್ಲ್ಯಾನ್ ವಾಟ್ ಸೊಧ್ಚೊ ವಾಸ್ತವ್‌ವಾದಿ, ಚಂದ್ರೆಮಾಕ್ ವ್ಹಡ್ಲ್ಯಾ ಫೆಸ್ತಾಕ್ ಆಪೊಂವ್ಚೊ ನೆಂಟ್ಟೊ, ಸೊರೊ ಪಿಯೆವ್ನ್ ಸತ್ ಉಲೊಂವ್ಚೊ ಶಾಯರ್… ಸಕ್ಡಾಂ ಆಸಾತ್ ಹಾಂಗಾ. ಹ್ಯಾ ಸರ್ವಾಂ ಪಾಟ್ಲೊ ಆವಾಜ್‌ಚ್ ಬಾಬ್ ಎರಿಕ್ ಒಝೇರಿಯೊ. “ಪಯ್ಲೆಂಚ್ ತಾಳೊ ಘಡುನ್ ಉಪ್ರಾಂತ್ ಉತ್ರಾಂ ಭರುಂಕ್ ಮ್ಹಜ್ಯಾನ್ ಜಾಯ್ನಾ. ಲಿಖ್‌ಲ್ಲೆಂ ಗೀತ್ ವಾಚ್ತಾಂ ವಾಚ್ತಾಂನಾಂಚ್ ಸಂಗೀತ್ ಉಮಾಳೋನ್ ಯೇಜೆ” ಅಶೆಂ ಎರಿಕ್ ಬಾಬಾನ್ ಮ್ಹಜೆಲಾಗಿಂ ಮ್ಹಳ್ಳೆಂ ಆಸಾ. ದೆಕುನ್‌ಚ್ ತಾಂತ್ಲಿಂ ಉತ್ರಾಂ ಇಸ್ಕೊಲಾಂತ್ ಮಾಂಡ್‌ಲ್ಲ್ಯಾ ಬಾಂಕಾಂಬರಿ ತಟಸ್ತ್ ಜಾಯ್ನಾಸ್ತಾಂ ಹಳೂ ವಾರ‍್ಯಾಕ್ ಉಬ್ಚ್ಯಾ ಹಿಂದ್ಳ್ಯಾಂಬರಿ ಕಾಳ್ಜಾಕ್ ಲಾಗ್ತಾತ್.
ಹಾಂವೆಂ ಬರೊಂವ್ಕ್ ಸುರು ಕರುನ್, ಕೊಡ್ಯಾಳ್ ಸಾಹಿತ್ಯ್-ಸಂಗೀತ್ ಕಾರ್ಯಾಂಕ್ ಯೇಂವ್ಕ್ ಸುರ‍್ವಾತ್ಲ್ಯಾ ಉಪ್ರಾಂತ್ ಜಾಯ್ತ್ಯಾ ಕೊಂಕ್ಣಿ ಮಾನೆಸ್ತಾಂಚಿ ಒಳೊಕ್ ಜಾಲ್ಲಿ. ತ್ಯಾ ಪಯ್ಕಿ ಎರಿಕ್ ಬಾಬ್‌ಯೀ ಎಕ್ಲೊ. ತಾಚ್ಯಾ ಪಯ್ಲೆಂ ಮಾಂಡ್ ಸೊಭಾಣ್ ಸಂಸ್ಥ್ಯಾಚಿಂ ವ್ಹಡ್ ವ್ಹಡ್ ಕಾರ್ಬಾರಾಂ ಜಾವ್ನ್ ಜಾಲ್ಲಿಂ. ತವಳ್ ಎರಿಕ್ ಬಾಬಾಚ್ಯಾ ಗುಸ್ತಾರ್ ಕೊಂಕ್ಣಿ ಕವಿಂಚ್ಯಾ, ಕೊಂಕ್ಣಿ ಮೊಗಿಂಚ್ಯಾ ಘರಾಂನಿ, ಮ್ಹಯ್ನ್ಯಾಂತ್ ಏಕ್ ಪಾವ್ಟಿಂ ಕವಿತಾ ಸೊಭಾಣ್ ಮ್ಹಳ್ಳಿ ಕವಿಗೋಶ್ಟಿ ಆಸ್ತಾಲಿ. ವೆದಿ ನಾ, ಮಾಯ್ಕ್ ನಾ. ಫಕತ್ ಭೊಂವ್ತಿಂ ಆಮಿ ಬಸ್ಚೆಂ ಕವಿತಾ ವಾಚ್ಚೆಂ. ಎರಿಕ್ ಬಾಬ್ ಮುಕ್ಲ್ಯಾನ್ ಆಸೊಂ ವಾ ಪಾಟ್ಲ್ಯಾನ್ ಆಸೊಂ, ತಾಣೆಂ ಕವಿತಾ ಆಸ್ವಾಧನ್ ಕರ‍್ಚ್ಯೆ ರಿತಿಕ್ ಹಾಂವ್ ಪಿಸ್ವಲ್ಲೊಂ. ವೊಳಿಂತ್ಲೆಂ ಕಾವ್ಯೆಂ ಪಾರ್ಕುಂಚಿ ತಾಂಕ್ ಆಸ್‌ಲ್ಲಿ ಆನಿ ಖಂಯ್ಚೀಯ್ ವೋಳ್ ತಾಚ್ಯಾ ಕಾಳ್ಜಾಕ್ ಲಾಗ್ಲ್ಯಾರ್ ‘ವಾ’ ಮ್ಹಳ್ಳೊ ಉದ್ಗಾರ್ ಆಪಾಪಿಂಚ್ ತಾಚೆಥಾವ್ನ್ ಭಾಯ್ರ್ ಯೆತಾಲೊ. ತೊ ಪ್ರೇಕ್ಶಕ್ ಜಾವ್ನ್ ಆಸ್ಲ್ಯಾರ್ ಧಾ ಜಣ್ ಪ್ರೇಕ್ಶಕ್ ಆಸ್‌ಲ್ಲೆಬರಿ ವಾಚ್ತಲ್ಯಾಕ್ ಆನಿಕೀ ಹುಮೆದ್ ಮೆಳ್ತಾಲಿ. ತರ್ನಾಟ್ಯಾಂಸವೆಂ ತರ್ನಾಟೊ ಜಾವ್ನ್‌ಚ್ ಭರ‍್ಸೊಂಚೊ ತಾಚೊ ಗೂಣ್‌ಯೀ ಭಾರಿಚ್ ಉಲ್ಲಾಸ್‌ದಾಯೆಕ್.
ತಾಕಾ ಕವಿತಾ ಬರೀ ಲಾಗ್ಲ್ಯಾರ್ ಆಪಾಪಿಂಚ್ ತಾಳೊ ತಾಚೆಥಾವ್ನ್ ಉದೆತಾಲೊ ಆನಿ ಆಪುರ್ಬಾಯೆಚೆಂ ಪದ್ ಜಾತಾಲೆಂ. ತಾಚಿಂ ಜಾಯ್ತಿಂ ಪದಾಂ ಅಶಿಂಚ್ ಜಾಲ್ಲಿಂ. ಎರಿಕ್ ಬಾಬಾಥಾವ್ನ್ ಜಾಯ್ತೆಂ ಕಾವ್ಯೆಂ ಲೊಕಾಪರ್ಯಾಂತ್ ಪಾವ್ಲಾಂ. ಕೊಂಕ್ಣಿ ಸಂಗೀತಾಂತ್ ಕವಿಂಕ್ ಮಾನ್ ಲಾಬ್ಲಾ. ಕವಿಂಚ್ಯಾ ಉತ್ರಾಂಕ್ ಎರಿಕ್ ಬಾಬಾಚ್ಯಾ ತಾಳ್ಯಾನ್ ಪಾಕಾಂ ಲಾವ್ನ್ ಗಾಂವಾನ್ ಗಾಂವ್ ಉಬಯ್ಲ್ಯಾಂತ್ ಮ್ಹಣ್ಚ್ಯಾಂತ್ ಕಾಂಯ್ಚ್ ದುಬಾವ್ ನಾ. ಕೊಂಕ್ಣಿ ಸಂಗೀತ್ ಶೆತಾಕ್ ತಾಣೆಂ ದಿಲ್ಲಿ ದೇಣ್ಗಿ ವರ್ತಿ.
ಉಪ್ರಾಂತ್ ಎರಿಕ್ ಬಾಬ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಶ್ ಜಾಲ್ಲೊ. ಸಾಹಿತ್ಯ್ ಅಕಾಡೆಮಿಕ್ ಸಾಹಿತಿಚ್ ಅಧ್ಯಕ್ಶ್ ಜಾಯ್ಜೆ ಮ್ಹಣ್ ವ್ಹಡ್ ಆವಾಜ್ ಉಟ್‌ಲ್ಲೊ ತರೀ ತೊ ಎರಿಕ್ ಬಾಬಾಚ್ಯೆ ಆವ್ದೆ ಉಪ್ರಾಂತ್ ಉಟ್‌ಲ್ಲೊ ಶಿವಾಯ್ ಎರಿಕ್ ಬಾಬ್ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಶ್ ಜಾಲ್ಲ್ಯಾಂತ್ ಕೊಣಾಕ್‌ಚ್ ಬೆಜಾರಾಯ್ ನಾತ್ಲಿ. ಹಾಕಾ ಕಾರಣ್ ಕಿತೆಂ ಮ್ಹಳ್ಯಾರ್, ಎರಿಕ್ ಬಾಬಾಕ್ ಸಾಹಿತ್ಯಾಚಿ ವೋಡ್ ಆಸ್‌ಲ್ಲಿ. ತಾಚೆಭಿತರ್ ಎಕ್ಲೊ ವಾಚ್ಪಿ ವಾ ಅರ್ಥ್ ಸಮ್ಜೊನ್ ಘೆಂವ್ಚೆಂ ಮನ್ ಆಸ್‌ಲ್ಲೆಂ. ಎರಿಕ್ ಬಾಬಾನ್ ಅಕಾಡೆಮಿ ಅಧ್ಯಕ್ಶ್ಯಾಚಿ ಆವ್ದಿ ಬರ‍್ಯಾನ್ ವಾಪಾರ‍್ಲಿ. ಘರಾನ್ ಘರಾ, ಗಾಂವಾನ್ ಗಾಂವ್ ಅಕಾಡೆಮಿ ಪಾವ್ಲಿ. ‘ಮಾನ್ ಮನಿಸ್ ಮುಲಾಕಾತ್’ ತಸಲ್ಯಾ ಕಾರ್ಯಾಂತ್ ಆಮಿಂಯ್ ತಾಚೆಸಾಂಗಾತಾ ಹಾಸೊನ್ ಖುಶೆನ್ ಗಾಂವಾನ್ ಗಾಂವ್ ಭೊಂವ್ಲ್ಯಾಂವ್. ಶಾಳಾಂನಿ ಕೊಂಕ್ಣಿ ತಸಲಿ ಮಹತ್ವಾಚಿ ಯೆವ್ಜಣ್ ತಾಣೆಂ ಹಾತಿಂ ಘೆತ್ಲಿ. ಅಶೆಂ ಜಾಯ್ತಿಂ ಬರಿಂ ಕಾಮಾಂ ತಾಣೆಂ ಅಕಾಡೆಮಿಚೊ ಅಧ್ಯಕ್ಶ್ ಜಾತಾನಾ ಕೆಲ್ಯಾಂತ್. ಅಶೆಂ ಎರಿಕ್ ಬಾಬಾನ್ ಸಂಗೀತ್‌ಗಾರ್, ಕೊಂಕ್ಣಿ ಸಂಘಟಕ್ ಆನಿ ಆನಿ ಅಕಾಡೆಮಿ ಅಧ್ಯಕ್ಶ್ ಜಾವ್ನ್ ಕೆಲ್ಲೊ ವಾವ್ರ್ ಮಹತ್ವಾಚೊ ಆನಿ ಕೊಂಕ್ಣಿ ಲೊಕಾನ್ ವಿಸ್ರೊಂಕ್ ನ್ಹಜೊ ತಸಲೊ.
ಆತಾಂ ಅಕಾಡೆಮಿ ಅಧ್ಯಕ್ಶ್ ಜಾಲ್ಯಾ ಉಪ್ರಾಂತ್ಲ್ಯಾ ವಾಂಟ್ಯಾಕ್ ಆಯ್ಲ್ಯಾರ್, ಹಾಂಗಾಸರ್ ಮ್ಹಜೆತಸಲ್ಯಾಂಕ್ ವ್ಚಡ್ ನಿರಾಶಾ ಭೊಗ್ತಾ. ಜಾಯ್ತ್ಯಾಂನಿ ಎರಿಕ್ ಬಾಬ್ ಸರ್‌ಲ್ಲ್ಯಾ ವೆಳಾ ‘ತಾಚೊ ರಾಗ್, ತಾಚೆಂ ಹಟ್, ತಾಣೆಂ ಜಾಯ್ ಮ್ಹಳ್ಯಾರ್ ಜಾಯ್ಜೆಚ್’ ಅಸಲ್ಯಾ ತಾಚ್ಯಾ ವೆಕ್ತಿತ್ವಾವಿಶಿಂ ಹೊಗ್ಳಿಕ್ ಉಚಾರ‍್ಲ್ಯಾ. ರಾಗ್ ಆನಿ ಹಟ್ ಥೊಡಿಂ ಕಾಮಾಂ ಪೊಂತಾಕ್ ಪಾವೊಂವ್ಕ್ ಗರ್ಜ್. ಪುಣ್ ಹ್ಯಾ ರಾಗ್ ಆನಿ ಹಟಾಸವೆಂ ಏಕ್ ಘಟ್ ವಿಚಾರ್ ಆನಿ ಸಾರ್ಕೊ ಫುಡಾರಾಚೊ ದಿಶ್ಟಾವೊ ಸಾಂಗಾತಾ ಆಸ್ತಾನಾ ಮಾತ್. ಸಮಾಜ್ ಮ್ಹಣ್ತಾನಾ ಥಂಯ್ ವಿಶಯ್‌ಭೇದ್ ಆಸ್ತಾಚ್. ಅಶೆಂ ವಿಶಯ್‌ಭೇದ್ ಆಸ್ತಾನಾ ವಾದ್ ವಿವಾದ್ ಆಸ್ಚೊಚ್. ಹ್ಯಾ ವಗ್ತಾ ರಾಗ್‌ಯೀ ಯೆತಾ. ರಾಗ್‌ಯೀ ಮೊಗಾಬರಿ ಮನ್ಶಾಸಹಜ್ ಭೊಗಪ್. ಪುಣ್ ಸಮಾಜಿಕ್ ರಾಗಾಕ್ ಏಕ್ ಮಾನ್ ಆಸಾ. ತ್ಯಾ ಮಾನಾನ್‌ಚ್ ಸೈದ್ಧಾಂತಿಕ್ ರಾಗಾಸವೆಂ ಡೀಲ್ ಕರಿಜೆ. ತವಳ್ ಮಾತ್ ಹ್ಯಾ ರಾಗಾಥಾವ್ನ್ ಸಮಾಜೆಕ್ ಬರೆಪಣ್ ಜಾತಾ. ಪುಣ್ ಹ್ಯಾ ರಾಗಾನ್ ಸಮಾಜಿಕ್ ಮಾನ್ ಹೊಗ್ಡಾಯ್ತಾನಾ ವಿಚಾರ್ ಕೊನ್ಶಾಕ್ ವೆತಾ. ತಸಲ್ಯಾ ರಾಗಾನ್ ಸಮಾಜೆಕ್ ಕರ‍್ಚೆಂ ಡ್ಯಾಮೇಜ್ ಬೊವ್ ವ್ಹಡ್. ಹೆಂ ಎರಿಕ್ ಬಾಬ್ ಸಮ್ಜನಾಸ್ತಾಂ ಗೆಲೊ ತಸೊ ದಿಸ್ತಾ. ಜಾಯ್ತ್ಯಾ ಸಂದರ್ಶನಾಂನಿ ತೊ ತಾಚ್ಯಾ ತವಳ್ ಪರ್ಯಾಂತ್ಲ್ಯಾ ಸಾಧನಾಚ್ಯಾ ವೆಕ್ತಿತ್ವಾಕ್ ಬಿಲ್ಕುಲ್ ಸೊಭ್ ದೀನಾತ್ಲಿಂ ಉತ್ರಾಂ ಉಲಯ್ಲಾ. ಸಂಗೀತ್‌ಗಾರ್ ಜಾವ್ನ್ ಆಸ್ತಾನಾ ಕವಿಂಚ್ಯಾ ಉತ್ರಾಂಚೊ ಅರ್ಥ್, ತಾಂತ್ಲೆಂ ಕಾವ್ಯೆಂ ಸಮ್ಜಲ್ಲೊ ಎರಿಕ್ ಬಾಬ್ ಉಪ್ರಾಂತ್ ಆಪ್ಲ್ಯಾಚ್ ಉತ್ರಾಂಚೆರ್ ಕಶೆಂ ನಿಯಂತ್ರಣ್ ಘಾಲಿನಾತ್ಲೆಬರಿ ಬದಲ್ಲೊ – ಹೆಂ ಮ್ಹಜೆತಸಲ್ಯಾಂಕ್ ಧೊಸ್ಚೆಂ ವ್ಹಡ್ ಸವಾಲ್.
ವ್ಹಯ್ ಸುರ‍್ವೇಚ್ಯಾ ದಿಸಾಂನಿ ಮ್ಹಾಕಾಯ್ ಎರಿಕ್ ಬಾಬ್ ವೈಚಾರಿಕ್ ಆನಿ ಕ್ರಾಂತಿಕಾರಿ ಮ್ಹಣ್ ಭೊಗ್‌ಲ್ಲೆಂ ಆಸಾ. ಚಾಫ್ರಾಚೆಂ ವೈಚಾರಿಕ್‌ಪಣ್ ಎರಿಕ್ ಬಾಬಾಥಂಯ್ ಜಿವಾಳ್ ಆಸಾ ಮ್ಹಣ್ ಭೊಗ್‌ಲ್ಲೆಂ. ಪುಣ್ ಸವ್ಕಾಸ್ ತಾಚ್ಯಾ ವೈಚಾರಿಕ್‌ಪಣಾಕ್ ಸ್ಪಶ್ಟತಾ ನಾ ಮ್ಹಳ್ಳೆಂ ಉಪ್ರಾಂತ್ ಎರಿಕ್ ಬಾಬಾನ್‌ಚ್ ಆಪ್ಲ್ಯಾ ಉತ್ರಾಂನಿ ದಾಕೊವ್ನ್ ದಿಲ್ಲೆಂ ಮ್ಹಜೆತಸಲ್ಯಾಂಕ್ ಜಿರೊವ್ನ್ ಘೆಂವ್ಕ್ ಜಾಲೆಂನಾ. ಹಾಕಾಯ್ ಕಾರಣಾಂ ಜರೂರ್ ಆಸ್ತಾಲಿಂ. ಎಕಾ ಕಾಳಾರ್ ಮಾಂಡ್ ಸೊಭಾಣ್ ಸಂಸ್ಥ್ಯಾಕ್ ದಿಶ್ಟಾವೊ ದಿಂವ್ಚೆ ‘ಮೆಂಟರ್’ ಆಸ್ಲೆ ತೆ ಸವ್ಕಾಸ್ ಪಯ್ಸ್ ಜಾಲೆ. ಹೆ ಪಯ್ಸ್ ವಚೊಂಕ್‌ಯೀ ಕಾರಣಾಂ ಜರೂರ್ ಆಸ್ತಾಲಿಂ. ಫಕತ್ ಹಟ್ ಆನಿ ರಾಗ್ ಆಸ್ಲ್ಯಾರ್ ಪಾವನಾ ಬಗಾರ್ ತೆಂ ಹಟ್ ಆನಿ ರಾಗ್ ಸಾರ್ಕ್ಯೆ ದಿಶೆಂಕ್ ಘುಂವ್ಡಾಂವ್ಚೆಂ ಕಾಮ್ ಮೆಂಟರ್ ಕರ‍್ತಾತ್. ತಸಲ್ಯಾಂಚಿ ವಾ ತಸಲ್ಯಾ ಘಟ್ ವೈಚಾರಿಕ್‌ಪಣಾಚಿ ಗಯ್ರ್ ಹಾಜ್ರಿಯ್ ಉಪ್ರಾಂತ್ಲ್ಯಾ ಮಾಂಡ್ ಸೊಭಾಣ್ ಸಂಸ್ಥ್ಯಾಚ್ಯಾ ಜಾಯ್ತ್ಯಾ ಕರ‍್ನೆಂನಿ ದಿಸೊನ್ ಆಯ್ಲಿ. ಎಕಾ ಕಾಳಾರ್ ಕೊಂಕ್ಣಿ ಮನ್ಶಾಂಕ್ ಎಕ್ವಟಾಂವ್ಕ್, ಕೊಂಕ್ಣಿ ಕವಿಂಕ್ ಲೊಕಾಪರ್ಯಾಂತ್ ಪಾವೊಂವ್ಕ್ ನಾಂವ್ ವ್ಹೆಲ್ಲೊ ಸಂಸ್ಥೊ ಉಪ್ರಾಂತ್ ಆಪ್ಲೊ ಸಂಗೀತ್ ಶೆವೊಟ್ ವಿಸ್ರೊನ್ ಫಕತ್ ಅಕಾಡೆಮಿಚ್ಯಾ ಅಧ್ಯಕ್ಶಾಂಕ್ ತಯಾರ್ ಕರ‍್ಚೊ ಆನಿ ತ್ಯೆ ವಶೀಳಾಯೆಖಾತಿರ್ ಸುಪ್ತ್‌ಪಣಿಂ ವಾವುರ‍್ಚೊ ಸಂಸ್ಥೊ ಜಾವ್ನ್ ಗೆಲೊಗೀ ಮ್ಹಣ್ ಮ್ಹಜೆತಸಲ್ಯಾಂನಿ ಚಿಂತ್ಚೆಬರಿ ಜಾಲೊ ತರೀ ಕಸೊ? ಹೆಂ ಸಕ್ಕಡ್ ಎರಿಕ್ ಬಾಬಾಚ್ಯೆ ಗಯ್ರ್‌ಹಾಜ್ರೆಂತ್ ಜಾಲಾಂ ಮ್ಹಳ್ಯಾರ್ ಪಾತ್ಯೆಂವ್ಕ್ ಕಶ್ಟ್.
ಚಡ್ ಕರುನ್ ಎರಿಕ್ ಬಾಬಾಚ್ಯೆ ಆವ್ದೆ ಉಪ್ರಾಂತ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಆನಿ ಮಾಂಡ್ ಸೊಭಾಣ್ ಸಂಸ್ಥ್ಯಾಚೊ ಸಂಬಂದ್ ಭಾರಿಚ್ ದುಬಾವಾಚೊ. ಹಾಚೆವಿಶಿಂ ಜಾಯ್ತ್ಯಾಂನಿ ಸವಾಲಾಂ ಉಟಯಿಲ್ಲಿಂ. ಎರಿಕ್ ಬಾಬಾ ಉಪ್ರಾಂತ್ ಅಕಾಡೆಮಿಚೆ ಅಧ್ಯಕ್ಶ್ ಜಾಲ್ಲ್ಯಾಂಪಯ್ಕಿ ಕಾಂಯ್ ದೋಗ್ ಸೊಡ್ಲ್ಯಾರ್ ಮಾಂಡ್ ಸೊಭಾಣ್ ಸಂಸ್ಥ್ಯಾಚೆಚ್ ’ವೆಲ್‌ವಿಶರ್. ಅಶಲ್ಯೊ ಗಜಾಲಿ ಬರೊಂವ್ಕ್ ಗೆಲ್ಯಾರ್ ಜಾಯ್ತ್ಯೊ ಆಸಾತ್. ಮಾಂಡ್ ಸೊಭಾಣ್ ತಸಲೊ ಸಂಗೀತಾಂತ್ ಕ್ರಾಂತಿ ಕೆಲ್ಲೊ ಸಂಸ್ಥೊ ಆತಾಂ ಸಂಗೀತ್ ವಿಸ್ರೊನ್ ಫಕತ್ ಏಕ್ ಪೊಲಿಟಿಕಲ್ ಸಂಘಟನ್ ಜಾಲಾಂಗೀ ಮ್ಹಳ್ಳೆಂ ಸವಾಲ್ ಜಾಯ್ತ್ಯಾಂಥಯ್ ಆಸ್‌ಲ್ಲೆಂ. ಪುಣ್ ಅಶೆಂ ಸವಾಲಾಂ ಉಟಯಿಲ್ಲ್ಯಾಂಕ್ ಉಜ್ವ್ಯಾಪಂಥೀಯ್ ಲೊಕಾನ್ ವಾಪಾರ‍್ಚಿ ’ಟೆರರಿಸ್ಟ್’ ತಸಲಿ ಭಾಸ್ ವಾಪಾರ‍್ತಾನಾ ಎರಿಕ್ ಬಾಬಾಭಿತರ‍್ಲೊ ಧಾವ್ಯಾಪಂಥೀಯ್ ಝುಜಾರಿ ವಾ ಕಮ್ಯುನಿಸ್ಟ್ ಖಂಯ್ ಗೆಲ್ಲೊ ಮ್ಹಣ್ಚೆಂ ವ್ಹಡ್ ಸವಾಲ್ ಆಜೂನ್ ಧೊಸ್ತಾ.
ಎರಿಕ್ ಬಾಬ್ ಮ್ಹಣ್ತಾನಾ ತಾಚ್ಯಾ ನಾಂವಾಕ್‌ಚ್ ಲಿಪಿಚೊ ವಾದ್ ಚಿಡ್ಕೊನ್ ಆಸಾ. ಎರಿಕ್ ಬಾಬ್ ಗೊಂಯ್ಚ್ಯಾ ಕೊಂಕ್ಣ್ಯಾಸವೆಂ ಸಳಾವಳೆನ್ ಆಸ್‌ಲ್ಲೊ. ಕೊಂಕ್ಣಿ ಭಾಸ್ ಪಾಂಚ್ ಲಿಪಿಂನಿ ಲಿಖ್ತಾತ್ ಮ್ಹಣ್ತಾನಾ ಲಿಪಿ ಮ್ಹಳ್ಳಿ ಭಾರಿಚ್ ಸೂಕ್ಶಿಮಾಯೆಚಿ ಗಜಾಲ್ ಕಶಿ ಡೀಲ್ ಕರಿಜೆ, ಲಿಪಿಖಾತಿರ್ ಝಗಡ್ತನಾ ಹಾಚೊ ಫುಡಾರ್ ಖಂಯ್ ವಚೊನ್ ರಾವತ್ ಮ್ಹಳ್ಳಿ ಪಯ್ಸಾದೀಶ್ಟ್ ನಾಸ್ತಾಂ ಫಕತ್ ಲಿಪಿಚಿಂ ಸಿಂತಿಮೆಂತಾಂ ಮಾತ್ ದಿಸ್ತಾಲಿಂ. ಏಕ್ ಸಾರ್ಕಿ ವೈಜ್ನಾನಿಕ್ ವಾಟ್ ವಾ ಪರಿಹಾರ್ ನಾಸ್ತಾನಾ, ತ್ಯಾ ವಿಶಿಂ ಆಟೊವ್ ಕರಿನಾಸ್ತಾನಾ ಫಕತ್ ಝುಜಜೆ ಮ್ಹಳ್ಳೆಖಾತಿರ್ ಝುಜ್ಲ್ಯಾರ್ ತಾಂತುಂ ಜಾಂವ್ಚಿ ಡ್ಯಾಮೇಜ್ ಬೊವ್ ವ್ಹಡ್. ಗೊಂಯ್-ಕರ್ನಾಟಕ, ದೇವನಾಗರಿ-ಕನ್ನಡ ಮ್ಹಣ್ ಏಕ್ ವ್ಹಡ್ ಖಣಿ ರಚುನ್ ಜಾಲ್ಲಿ. ಏಕ್ ಮಾಲ್ಘಡೊ ಜಾವ್ನ್ ಎರಿಕ್ ಬಾಬಾನ್ ಹಾಚ್ಯಾಕೀ ಭಾಯ್ರ್ ಚಿಂತಿಜೆ ಆಸ್ಲೆಂ. ಅವಾರ್ಡಾಂತ್, ಲೇಖಕಾಂಚ್ಯಾ ಸಂಘಟನಾಂತ್ ’ಜಾಗತಿಕ’ ಮ್ಹಳ್ಳೊ ಸಬ್ದ್ ವಾಪಾರ್‌ಲ್ಲೆಬರಿ, ಜಾಗತಿಕ್ ಜಾವ್ನ್ ಚಿಂತಿಜೆ ಆಸ್‌ಲ್ಲೆಂ. ಅಸಲ್ಯಾ ಗಜಾಲಿಂನಿ ರಾಗ್, ಹಟ್, ಆನಿ ’ಜಾಯ್ ಮ್ಹಳ್ಳೆಂ ಜಾಯ್ಜೆಚ್ ಮ್ಹಳ್ಳೆಂ ಚಿಂತಪ್ ಬಿಲ್ಕುಲ್ ಕೊಂಕಣಿ ಲೊಕಾಕ್ ಎಕ್ಟಾಂಯ್ ಕರಿನಾ ಬಗಾರ್ ಆನಿಕೀ ಫಾಸ್ಳೊನ್ ಘಾಲ್ತಾ ಮ್ಹಣ್ ಎರಿಕ್ ಬಾಬ್ ಮಾತ್ ನ್ಹಯ್ ತಾಚೆಭೊಂವ್ತಿಲೆಯ್ ಸಮ್ಜನಾಸ್ತಾಂ ಗೆಲೆ.
ಆನಿ ಆಖೇರಿಕ್, ಎರಿಕ್ ಬಾಬಾಕ್ ಹೊಗೊಳ್ಸುಂಕ್‌ಯೀ ಮ್ಹಜೆಲಾಗಿಂ ಕಾರಣಾಂ ಆಸಾತ್ ಆನಿ ತಾಚೆವಿಶಿಂ ಆಸ್ಚಿ ಬೆಜಾರಾಯ್ ವೆಕ್ತ್ ಕರುಂಕ್‌ಯೀ ಕಾರಣಾಂ ಆಸಾತ್. ಹಿ ಬೆಜಾರಾಯ್ ವಯಕ್ತಿಕ್ ನ್ಹಯ್, ಬಗಾರ್ ಸಮಾಜಿಕ್. ಹಾಂತುಂ ಹಗೆಂ ಆನಿ ದ್ವೇಶ್ ಬಿಲ್ಕುಲ್ ನಾ. ಇತ್ಲೆಂ ಮ್ಹಣ್ತಚ್ ಹೆಂ ಹಾಂವೆಂ ರಾಗಾನ್ ಬರಯ್ಲಾಂ ವಾ ರಾಗ್ ಕಾಡುಂಕ್ ಲಿಖ್ಲಾಂ, ಹ್ಯಾ ವೆಳಾ ಹೆಂ ಸರ್ವ್ ಜಾಯ್ ಆಸ್‌ಲ್ಲೆಂಗೀ ಮ್ಹಣ್ ಕೊಣೀ ಚಿಂತ್ತಾ ತರ್ ತೆಂ ತಾಂಚೆಂ ಉಣೆಂಪಣ್.
ತಶೆಂ ಪಳೆಂವ್ಕ್ ಗೆಲ್ಯಾರ್ ಮ್ಹಜ್ಯಾಯ್ ಉತ್ರಾಂಕ್ ತಾಣೆಂ ತಾಳೊ ಬಸಯ್ಲಾ. ಮ್ಹಜಿಂ ಉತ್ರಾಂ ತಾಣೆಂ ತಾಚ್ಯಾಚ್ ತಾಳ್ಯಾಂತ್ ಗಾಯ್ಲ್ಯಾಂತ್. ಕೊಂಕ್ಣೆಚೊ ಆನ್ಯೇಕ್ ಮ್ಹಾನ್ ಸಂಗೀತ್ ಅಧ್ಯಾಯ್ ವಿಲ್ಫಿ ರೆಬಿಂಬಸ್ ಸರ‍್ತಾನಾ ಮ್ಹಜೆಕರ‍್ನಾ ಶೃದ್ಧಾಂಜಲಿ ಗೀತ್ ಬರೊಂವ್ಕ್ ಲಾವ್ನ್ ತಾಳೊ ಬಸಯ್ಲಾ. ತಾಚೆಂ ಘರ್ ಪ್ರೊಸ್ಪೆರೋಂತ್ ಕವಿಗೋಶ್ಟಿಂನಿ ಹಾಂವೆಂಯ್ ವಾಂಟೊ ಘೆತ್ಲಾ. ತೊಯ್ ಮ್ಹಜ್ಯಾ ಘರಾ ಆಯ್ಲಾ, ಮಾಂಡ್ ಸೊಭಾಣಾಚಿ ‘ವಜ್ರಾಂ ಮೊತಿಯಾಂ’ ಕೊವ್ಳಿ ಮ್ಹಜ್ಯಾ ಇಶ್ಟಾಂಸವೆಂ ಮೆಳೊನ್ ಕಟೀಲಾಂತ್ ಮೊಕ್ಳಿಕ್ ಕೆಲ್ಯಾ. ಇತ್ಲೆಂಚ್ ನ್ಹಯ್, ಎರಿಕ್ ಬಾಬಾನ್ ಮ್ಹಜ್ಯಾ ಕಾಜಾರಾ ದೀಸ್ ಪದಾಂ ಗಾವುನ್ ಕಾರ್ಯೆಂ ಮಧುರ್ ಕೆಲಾಂ. ಸೈದ್ಧಾಂತಿಕ್ ಭೇದಾಚೊ ಖತ್ಕತೊ ಆಸ್ತಾನಾಂಯ್ ಕಾರ್ಯಾವೆಳಿಂ, ಸಿನೆಮಾ ಪ್ರೀಮಿಯರ್ ಶೋವೆಳಿಂ ಮೆಳ್ತಾನಾ ಎಕಾಮೆಕಾ ಉಲೊವ್ನ್ ಹಾಸ್ಲ್ಯಾಂ. ಮ್ಹಜ್ಯಾ ಲಿರಿಕ್ಸಾಂತ್ಲೆಂ ಉತರ್ ‘ತಶೆಂ ನ್ಹಯ್ ಅಶೆಂ’ ಮ್ಹಣ್ ತಾಣೆಂ ದಾಕಯಿಲ್ಲಿ ಚೂಕ್ ಹಾಂವ್ ಒಳ್ಕಲಾಂ. ಆಯ್ಲೆವಾರ್ ಎರಿಕ್ ಬಾಬ್ – ಜೋಯ್ಸ್ ಬಾಯ್ ಜೊಡ್ಯಾಖಾತಿರ್ ಹಾಂವೆಂ ಲಿಖ್‌ಲ್ಲೆಂ ಏಕ್ ‘ರೆಟ್ರೋ ಡ್ಯುಯೆಟ್’ ಖುದ್ ಎರಿಕ್ ಬಾಬ್ ಆನಿ ಜೋಯ್ಸ್ ಬಾಯೆನ್ ಗಾಯ್ಲಲೆಂ ಜಾಯ್ತ್ಯಾಂಕ್ ಆನಿ ಖುದ್ ಎರಿಕ್ ಬಾಬಾಕ್ ಚಡ್ ಪಸಂದ್ ಜಾಲ್ಲೆಂ. ಹಾಚೆವಿಶಿಂ ಎರಿಕ್ ಬಾಬಾನ್ ಮ್ಹಾಕಾ ಮೆಸೇಜ್ ಕೆಲ್ಲಿಯ್ ಆಸಾ.
ಎರಿಕ್ ಬಾಬ್ ಮ್ಹಣ್ತಾನಾ ಇತ್ಲೊಚ್ ಉಡಾಸ್-
ಮಾಂಡ್ ಸೊಭಾಣ್ ಪದಾಂನಿ ಸಾದ್ಲಲೆ ತಾಚೆ ತಾಳೆ…
ಕಲಾಂಗಣಾಂತ್ ಜಾಲ್ಲ್ಯಾ ‘ಶೆವಿಯೊ ರೋಸ್’ ಕಾರ್ಯಾಂತ್ ಮ್ಹಜ್ಯಾ ಉತ್ರಾಂಕ್ ಪಯ್ಲೆಪಾವ್ಟಿಂ ಎರಿಕ್ ಬಾಬಾನ್ ತಾಳೊ ಬಸೊವ್ನ್ ಸಾದರ್ ಕರ‍್ಚ್ಯಾ ವೆಳಾ ಹಾಂವೆಂ ವೆದಿರ್ ರಾವೊನ್ “ಆಜ್ ಪಯ್ಲೆಪಾವ್ಟಿಂ ಎರಿಕ್ ಬಾಬಾಚ್ಯಾ ಸಂಗೀತಾಚ್ಯಾ ಕೊಂಬ್ಯಾನ್ ಆಜ್ ಪಯ್ಲೆಪಾವ್ಟಿಂ ಮ್ಹಜ್ಯಾ ಉತ್ರಾಂಚ್ಯೆ ಕೊಂಬಿಯೆಚಿ ಪಾಟ್ ಆಪುಡ್ಲ್ಯಾ ಮ್ಹಣ್ತಾನಾ ತಾಣೆಂ ಕೆಲ್ಲೊ ಉದ್ಗಾರ್…
ತಾಣೆಂಚ್ ತಾಳೊ ಬಸಯಿಲ್ಲ್ಯಾ ’ಮಾಂಡ್ ಸೊಭಾಣ್ ಪದಾಂಕ್ ಆಮಿ ಪೊಕ್ರಿ ಉತ್ರಾಂ ಘಾಲ್ನ್ ರಿಮಿಕ್ಸ್ ಕೆಲ್ಲೆಂ ಆಯ್ಕೊನ್ “ಪರ‍್ತುನ್ ಮ್ಹಣ್ ರೇ ತೆಂ” ಮ್ಹಣ್ ಆಮ್ಚ್ಯಾ ತಾಳ್ಯಾಂತ್‌ಚ್ ಆಯ್ಕೊನ್ ವ್ಹಡ್ಲ್ಯಾನ್ ಉದೆಲ್ಲ್ಯೊ ತಾಚ್ಯೊ ಹಾಸೊ…
ಹಾಂಗಾಸರ್ ಉಲ್ಲೇಖ್ ಕರುಂಕ್ ಮ್ಹಾಕಾ ಮನ್ ನಾತ್ಲಿಂ ತಾಚಿಂ ಥೊಡಿಂ ಉಜ್ವ್ಯಾಪಂಥೀಯ್ ಕಾಲೆತಿಚಿಂ ಅಪ್ರಭುದ್ದ್ ಸ್ಟೇಟ್‌ಮೆಮಟಾಂ…
ಆನಿ ಆಖೇರಿಕ್, ವಾಲೆನ್ಸಿಯಾ ಇಗರ್ಜೆ ಆಂಗ್ಣಾಂತ್ ತಾಚ್ಯಾ ವೊಂಟಾಂಚೆರ್ ರಾಜ್ ಕರ‍್ತಲೆಂ ಸಾಸ್ಣಿಕ್ ಮಾವ್ನ್…
ಹಾಂವ್ ಖಂಡಿತ್ ಜಾಣಾಂ ಕೀ, ಇತ್ಲೆಂ ಸರ್ವ್ ಬರಯ್ನಾತ್ಲೆಂ ತರ್ ಎರಿಕ್ ಬಾಬಾವಿಶ್ಯಾಂತ್ಲೆಂ ಬರಪ್ ಫಕತ್ ‘ಕಾನಾಂಚಿ ಸ್ತುತಿ’ ಜಾತೆಂ. ಹ್ಯಾ ಸರ‍್ವಾಂಸವೆಂಚ್ ಎರಿಕ್ ಬಾಬಾಕ್ ಆದೇವ್ಸ್…
■ ವಿಲ್ಸನ್ ಕಟೀಲ್
[blockquote align=”none” author=””]
ಕವಿ ವಿಲ್ಸನ್ ಕಟೀಲ್ ಸಂಪಾದಕ್ಪಣಾರ್ ಹರೇಕಾ ಮಯ್ನ್ಯಾಚ್ಯಾ ಪಯ್ಲ್ಯಾ ತಾರಿಕೆರ್ ಆರ್ಸೊ ಮಯ್ನ್ಯಾಳೆಂ ಪತ್ರ್ ಫಾಯ್ಸ್ ಜಾತಾ. ಮಯ್ನ್ಯಾಚ್ಯಾ 5 ತಾರಿಕೆರ್ ಪೋಸ್ಟ್ ಜಾತಾ. ಮುಕ್‌ಪಾನ್ ಲೇಖನ್, ವೈಚಾರಿಕ್ ಆನಿ ವೆಗ್ಯಾನಿಕ್ ಲೇಖನಾಂ ಸಾಂಗಾತಾ , ಮಟ್ವಿ ಕಾಣಿ, ಕವಿತಾ, ಅಂಕಣ್ ಬರ್ಪಾಂ ಪತ್ರಾಂತ್ ಆಸೊನ್, ಪತ್ರಾಚಿ ವರ್ಗಣಿ ಹೆ ಪರಿಂ ಆಸಾ.
: ವರ್ಗಣಿ ವಿವರ್ :
ಎಕಾ ವರ್ಸಾಕ್: ರು.500/-
ದೋನ್ ವರ್ಸಾಂಕ್: ರು.1,000/-
ಪೋಶಕ್: ರು.5,000/-
ಪಾತ್ರೊನ್: ರು.10,000/-
ವರ್ಗಣಿ ಹಾಂಗಾಸರ್ ದಿಲ್ಲ್ಯಾ ಎಂ.ಸಿ.ಸಿ. ಬ್ಯಾಂಕಾಚಾ ಖಾತ್ಯಾಕ್ ಪಾವಿತ್ ಕರ್ಯೆತ್.
: ಬ್ಯಾಂಕ್ ವಿವರ್ :
Account Name : ARSO,
A/c No.: 004011100000345
Account Type : Current Account
Bank : M C C Bank Ltd.,
Branch :Kankanady, Mangalore
IFSC Code : IBKL0078MCC
: ಗೂಗಲ್ ಪೆ ನಂಬರ್ :
94497 70629
: ಕ್ಯೂ ಆರ್ ಕೋಡ್ :
[/blockquote]
1 comment
Nice article, You have highlighted some core issues without degrading a person and his work.
From Music you directly came to academy. I would like to add some of the points.
When academy started it was money power and two major political parties.
Some rich people of our community wanted to work with the people of their wavelength. Initially two major stakeholders of Konkani started acting like they were together. But there was no unity.
Later some NRI’s who wanted a person who can project them as the community leader got their man.
Finally I would like to conclude as Eric bab gave new look to Konkani music. He was a great event manager. He had the capacity to gather thousands of people.
RIP Ericbab